໕໒. ເຈໂຕປຣິຍຎາຓນິທ຺ເທໂສ

໑໐໔. ກຖໍ ຕິຓ຺ຓໍ ຈິຕ຺ຕານໍ ວິປ຺ຜາຣຕ຺ຕາ ອິນ຺ທ຺ຣິຍານໍ ປສາທວເສນ ນານຕ຺ເຕກຕ຺ຕວິຎ຺ຎາຓຈຣິຍາປຣິໂຍຄາຫເຓ ປຎ຺ຎາ ເຈໂຕປຣິຍຎາຓໍ? ອິຘ ຠິກ຺ຂຸ ຉນ຺ທສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ວີຣິຍສມາຘິ…ເປ… ຈິຕ຺ຕສມາຘິ…ເປ… ວີມໍສາສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ. ໂສ ອິເມສຸ ຈຕູສຸ ອິທ຺ຘິປາເທສຸ ຈິຕ຺ຕໍ ປຣິຠາເວຕິ ປຣິທເມຕິ, ມຸທຸໍ ກໂຣຕິ ກມ຺ມນິຍໍ. ໂສ ອິເມສຸ ຈຕູສຸ ອິທ຺ຘິປາເທສຸ ຈິຕ຺ຕໍ ປຣິຠາເວຕ຺ວາ ປຣິທເມຕ຺ວາ, ມຸທຸໍ ກຣິຕ຺ວາ ກມ຺ມນິຍໍ ເອວໍ ປຊານາຕິ – ‘‘ອິທໍ ຣູປໍ ໂສມນສ຺ສິນ຺ທ຺ຣິຍສມຸຏ຺ຐິຕໍ, ອິທໍ ຣູປໍ ໂທມນສ຺ສິນ຺ທ຺ຣິຍສມຸຏ຺ຐິຕໍ, ອິທໍ ຣູປໍ ອຸເປກ຺ຂິນ຺ທ຺ຣິຍສມຸຏ຺ຐິຕ’’ນ຺ຕິ. ໂສ ຕຖາຠາວິເຕນ ຈິຕ຺ເຕນ ປຣິສຸທ຺ເຘນ ປຣິໂຍທາເຕນ ເຈໂຕປຣິຍຎາຓາຍ ຈິຕ຺ຕໍ ອຠິນີຫຣຕິ ອຠິນິນ຺ນາເມຕິ. ໂສ ປຣສຕ຺ຕານໍ ປຣປຸຄ຺ຄລານໍ ເຈຕສາ ເຈໂຕ ປຣິຈ຺ຈ ປຊານາຕິ – ສຣາຄໍ ວາ ຈິຕ຺ຕໍ ‘‘ສຣາຄໍ ຈິຕ຺ຕ’’ນ຺ຕິ ປຊານາຕິ, ວີຕຣາຄໍ ວາ ຈິຕ຺ຕໍ ‘‘ວີຕຣາຄໍ ຈິຕ຺ຕ’’ນ຺ຕິ ປຊານາຕິ, ສໂທສໍ ວາ ຈິຕ຺ຕໍ…ເປ… ວີຕໂທສໍ ວາ ຈິຕ຺ຕໍ… ສໂມຫໍ ວາ ຈິຕ຺ຕໍ… ວີຕໂມຫໍ ວາ ຈິຕ຺ຕໍ… ສໍຂິຕ຺ຕໍ ວາ ຈິຕ຺ຕໍ… ວິກ຺ຂິຕ຺ຕໍ ວາ ຈິຕ຺ຕໍ… ມຫຄ຺ຄຕໍ ວາ ຈິຕ຺ຕໍ… ອມຫຄ຺ຄຕໍ ວາ ຈິຕ຺ຕໍ… ສອຸຕ຺ຕຣໍ ວາ ຈິຕ຺ຕໍ… ອນຸຕ຺ຕຣໍ ວາ ຈິຕ຺ຕໍ… ສມາຫິຕໍ ວາ ຈິຕ຺ຕໍ… ອສມາຫິຕໍ ວາ ຈິຕ຺ຕໍ… ວິມຸຕ຺ຕໍ ວາ ຈິຕ຺ຕໍ… ອວິມຸຕ຺ຕໍ ວາ ຈິຕ຺ຕໍ ‘‘ອວິມຸຕ຺ຕໍ ຈິຕ຺ຕນ຺ຕິ ປຊານາຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຕິຓ຺ຓໍ ຈິຕ຺ຕານໍ ວິປ຺ຜາຣຕ຺ຕາ ອິນ຺ທ຺ຣິຍານໍ ປສາທວເສນ ນານຕ຺ເຕກຕ຺ຕວິຎ຺ຎາຓຈຣິຍາປຣິໂຍຄາຫເຓ ປຎ຺ຎາ ເຈໂຕປຣິຍຎາຓໍ’’.

ເຈໂຕປຣິຍຎາຓນິທ຺ເທໂສ ທ຺ເວປຎ຺ຎາສໂມ.