໕໐. ອິທ຺ຘິວິຘຎາຓນິທ຺ເທໂສ

໑໐໑. ກຖໍ ກາຍມ຺ປິ ຈິຕ຺ຕມ຺ປິ ເອກວວຕ຺ຖານຕາ ສຸຂສຎ຺ຎຎ຺ຈ ລຫຸສຎ຺ຎຎ຺ຈ ອຘິຏ຺ຐານວເສນ ອິຊ຺ຌນຏ຺ເຐ ປຎ຺ຎາ ອິທ຺ຘິວິເຘ ຎາຓໍ? ອິຘ ຠິກ຺ຂຸ ຉນ຺ທສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ວີຣິຍສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ຈິຕ຺ຕສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ວີມໍສາສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ. ໂສ ອິເມສຸ ຈຕູສຸ ອິທ຺ຘິປາເທສຸ ຈິຕ຺ຕໍ ປຣິຠາເວຕິ ປຣິທເມຕິ, ມຸທຸໍ ກໂຣຕິ ກມ຺ມນິຍໍ. ໂສ ອິເມສຸ ຈຕູສຸ ອິທ຺ຘິປາເທສຸ ຈິຕ຺ຕໍ ປຣິຠາເວຕ຺ວາ ປຣິທເມຕ຺ວາ ມຸທຸໍ ກຣິຕ຺ວາ ກມ຺ມນິຍໍ ກາຍມ຺ປິ ຈິຕ຺ເຕ ສໂມທຫຕິ, ຈິຕ຺ຕມ຺ປິ ກາເຍ ສໂມທຫຕິ, ກາຍວເສນ ຈິຕ຺ຕໍ ປຣິຓາເມຕິ, ຈິຕ຺ຕວເສນ ກາຍໍ ປຣິຓາເມຕິ, ກາຍວເສນ ຈິຕ຺ຕໍ ອຘິຏ຺ຐາຕິ, ຈິຕ຺ຕວເສນ ກາຍໍ ອຘິຏ຺ຐາຕິ; ກາຍວເສນ ຈິຕ຺ຕໍ ປຣິຓາເມຕ຺ວາ ຈິຕ຺ຕວເສນ ກາຍໍ ປຣິຓາເມຕ຺ວາ ກາຍວເສນ ຈິຕ຺ຕໍ ອຘິຏ຺ຐຫິຕ຺ວາ ຈິຕ຺ຕວເສນ ກາຍໍ ອຘິຏ຺ຐຫິຕ຺ວາ ສຸຂສຎ຺ຎຎ຺ຈ ລຫຸສຎ຺ຎຎ຺ຈ ກາເຍ ໂອກ຺ກມິຕ຺ວາ ວິຫຣຕິ. ໂສ ຕຖາຠາວິເຕນ ຈິຕ຺ເຕນ ປຣິສຸທ຺ເຘນ ປຣິໂຍທາເຕນ ອິທ຺ຘິວິຘຎາຓາຍ ຈິຕ຺ຕໍ ອຠິນີຫຣຕິ ອຠິນິນ຺ນາເມຕິ. ໂສ ອເນກວິຫິຕໍ ອິທ຺ຘິວິຘໍ ປຈ຺ຈນຸໂຠຕິ.

໑໐໒. ເອໂກປິ ຫຸຕ຺ວາ ພຫຸຘາ ໂຫຕິ, ພຫຸຘາປິ ຫຸຕ຺ວາ ເອໂກ ໂຫຕິ; ອາວິຠາວໍ ຕິໂຣຠາວໍ; ຕິໂຣກຸຏ຺ຏໍ [ຕິໂຣກຸຑ຺ຑໍ (ສ຺ຍາ.)] ຕິໂຣປາກາຣໍ ຕິໂຣປພ຺ພຕໍ ອສຊ຺ຊມາໂນ ຄຈ຺ຉຕິ, ເສຍ຺ຍຖາປິ ອາກາເສ; ປຖວິຍາປິ ອຸມ຺ມຸຊ຺ຊນິມຸຊ຺ຊໍ ກໂຣຕິ, ເສຍ຺ຍຖາປິ ອຸທເກ; ອຸທເກປິ ອຠິຊ຺ຊມາເນ ຄຈ຺ຉຕິ, ເສຍ຺ຍຖາປິ ປຖວິຍໍ; ອາກາເສປິ ປລ຺ລງ຺ເກນ ກມຕິ [ຈງ຺ກມຕິ (ສ຺ຍາ.) ທີ. ນິ. ໑.໒໓໘ ປສ຺ສິຕພ຺ພາ] ເສຍ຺ຍຖາປິ ປກ຺ຂີ ສກຸໂຓ ອິເມປິ ຈນ຺ທິມສູຣິເຍ ເອວໍມຫິທ຺ຘິເກ ເອວໍມຫານຸຠາເວ ປາຓິນາ ປຣາມສຕິ [ປຣິມສຕິ (ສ຺ຍາ.)] ປຣິມຊ຺ຊຕິ; ຍາວ ພ຺ຣຫ຺ມໂລກາປິ ກາເຍນ ວສໍ ວຕ຺ເຕຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ກາຍມ຺ປິ ຈິຕ຺ຕມ຺ປິ ເອກວວຕ຺ຖານຕາ ສຸຂສຎ຺ຎຎ຺ຈ ລຫຸສຎ຺ຎຎ຺ຈ ອຘິຏ຺ຐານວເສນ ອິຊ຺ຌນຏ຺ເຐ ປຎ຺ຎາ ອິທ຺ຘິວິເຘ ຎາຓໍ’’.

ອິທ຺ຘິວິຘຎາຓນິທ຺ເທໂສ ປຎ຺ຎາສໂມ.