໔໔-໔໙. ຉວິວຏ຺ຏຎາຓນິທ຺ເທໂສ

໙໕. ກຖໍ ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ? ເນກ຺ຂມ຺ມາຘິປຕຕ຺ຕາ ປຎ຺ຎາ ກາມຈ຺ຉນ຺ທໂຕ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ອພ຺ຍາປາທາຘິປຕຕ຺ຕາ ປຎ຺ຎາ ພ຺ຍາປາທໂຕ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ອາໂລກສຎ຺ຎາຘິປຕຕ຺ຕາ ປຎ຺ຎາ ຖິນມິທ຺ຘໂຕ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ອວິກ຺ເຂປາຘິປຕຕ຺ຕາ ປຎ຺ຎາ ອຸທ຺ຘຈ຺ຈໂຕ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ຘມ຺ມວວຕ຺ຖານາຘິປຕຕ຺ຕາ ປຎ຺ຎາ ວິຈິກິຈ຺ຉາຍ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ຎາຓາຘິປຕຕ຺ຕາ ປຎ຺ຎາ ອວິຊ຺ຊາຍ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ປາໂມຊ຺ຊາຘິປຕຕ຺ຕາ ປຎ຺ຎາ ອຣຕິຍາ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ປຐມຊ຺ຌານາຘິປຕຕ຺ຕາ ປຎ຺ຎາ ນີວຣເຓຫິ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ…ເປ… ອຣຫຕ຺ຕມຄ຺ຄາຘິປຕຕ຺ຕາ ປຎ຺ຎາ ສພ຺ພກິເລເສຫິ ສຎ຺ຎາຍ ວິວຏ຺ຏຕີຕິ – ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ອຘິປຕຕ຺ຕາ ປຎ຺ຎາ ສຎ຺ຎາວິວຏ຺ເຏ ຎາຓໍ’’.

໙໖. ກຖໍ ນານຕ຺ເຕ ປຎ຺ຎາ ເຈໂຕວິວຏ຺ເຏ ຎາຓໍ? ກາມຈ຺ຉນ຺ໂທ ນານຕ຺ຕໍ, ເນກ຺ຂມ຺ມໍ ເອກຕ຺ຕໍ. ເນກ຺ຂມ຺ເມກຕ຺ຕໍ ເຈຕຍໂຕ ກາມຈ຺ຉນ຺ທໂຕ ຈິຕ຺ຕໍ ວິວຏ຺ຏຕີຕິ – ນານຕ຺ເຕ ປຎ຺ຎາ ເຈໂຕວິວຏ຺ເຏ ຎາຓໍ. ພ຺ຍາປາໂທ ນານຕ຺ຕໍ, ອພ຺ຍາປາໂທ ເອກຕ຺ຕໍ. ອພ຺ຍາປາເທກຕ຺ຕໍ ເຈຕຍໂຕ ພ຺ຍາປາທໂຕ ຈິຕ຺ຕໍ ວິວຏ຺ຏຕີຕິ – ນານຕ຺ເຕ ປຎ຺ຎາ ເຈໂຕວິວຏ຺ເຏ ຎາຓໍ. ຖິນມິທ຺ຘໍ ນານຕ຺ຕໍ, ອາໂລກສຎ຺ຎາ ເອກຕ຺ຕໍ. ອາໂລກສຎ຺ເຎກຕ຺ຕໍ ເຈຕຍໂຕ ຖິນມິທ຺ຘໂຕ ຈິຕ຺ຕໍ ວິວຏ຺ຏຕີຕິ – ນານຕ຺ເຕ ປຎ຺ຎາ ເຈໂຕວິວຏ຺ເຏ ຎາຓໍ…ເປ… ສພ຺ພກິເລສາ ນານຕ຺ຕໍ, ອຣຫຕ຺ຕມຄ຺ໂຄ ເອກຕ຺ຕໍ. ອຣຫຕ຺ຕມຄ຺ເຄກຕ຺ຕໍ ເຈຕຍໂຕ ສພ຺ພກິເລເສຫິ ຈິຕ຺ຕໍ ວິວຏ຺ຏຕີຕິ – ນານຕ຺ເຕ ປຎ຺ຎາ ເຈໂຕວິວຏ຺ເຏ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ນານຕ຺ເຕ ປຎ຺ຎາ ເຈໂຕວິວຏ຺ເຏ ຎາຓໍ’’.

໙໗. ກຖໍ ອຘິຏ຺ຐາເນ ປຎ຺ຎາ ຈິຕ຺ຕວິວຏ຺ເຏ ຎາຓໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐາເນ ປຎ຺ຎາ ຈິຕ຺ຕວິວຏ຺ເຏ ຎາຓໍ. ພ຺ຍາປາທໍ ປຊຫນ຺ໂຕ ອພ຺ຍາປາທວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐາເນ ປຎ຺ຎາ ຈິຕ຺ຕວິວຏ຺ເຏ ຎາຓໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎາວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐາເນ ປຎ຺ຎາ ຈິຕ຺ຕວິວຏ຺ເຏ ຎາຓໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐາເນ ປຎ຺ຎາ ຈິຕ຺ຕວິວຏ຺ເຏ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ອຘິຏ຺ຐາເນ ປຎ຺ຎາ ຈິຕ຺ຕວິວຏ຺ເຏ ຎາຓໍ’’.

໙໘. ກຖໍ ສຸຎ຺ຎເຕ ປຎ຺ຎາ ຎາຓວິວຏ຺ເຏ ຎາຓໍ? ‘‘ຈກ຺ຂຸ ສຸຎ຺ຎໍ ອຕ຺ເຕນ ວາ ອຕ຺ຕນິເຍນ ວາ ນິຈ຺ເຈນ ວາ ຘຸເວນ ວາ ສສ຺ສເຕນ ວາ ອວິປຣິຓາມຘມ຺ເມນ ວາ’’ຕິ ຍຖາຠູຕໍ ຊານໂຕ [ປຊານໂຕ (ສ຺ຍາ.)] ປສ຺ສໂຕ ຈກ຺ຂາຠິນິເວສໂຕ [ກາມາຠິນິເວສໂຕ (ສ຺ຍາ.) ອຏ຺ຐກຖາ ໂອໂລເກຕພ຺ພາ] ຎາຓໍ ວິວຏ຺ຏຕີຕິ – ສຸຎ຺ຎເຕ ປຎ຺ຎາ ຎາຓວິວຏ຺ເຏ ຎາຓໍ. ‘‘ໂສຕໍ ສຸຎ຺ຎໍ…ເປ… ຆານໍ ສຸຎ຺ຎໍ… ຊິວ຺ຫາ ສຸຎ຺ຎາ… ກາໂຍ ສຸຎ຺ໂຎ… ມໂນ ສຸຎ຺ໂຎ ອຕ຺ເຕນ ວາ ອຕ຺ຕນິເຍນ ວາ ນິຈ຺ເຈນ ວາ ຘຸເວນ ວາ ສສ຺ສເຕນ ວາ ອວິປຣິຓາມຘມ຺ເມນ ວາ’’ຕິ ຍຖາຠູຕໍ ຊານໂຕ ປສ຺ສໂຕ ມນາຠິນິເວສໂຕ ຎາຓໍ ວິວຏ຺ຏຕີຕິ – ສຸຎ຺ຎເຕ ປຎ຺ຎາ ຎາຓວິວຏ຺ເຏ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ສຸຎ຺ຎເຕ ປຎ຺ຎາ ຎາຓວິວຏ຺ເຏ ຎາຓໍ’’.

໙໙. ກຖໍ ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ? ເນກ຺ຂມ຺ເມນ ກາມຈ຺ຉນ຺ທໍ ໂວສຊ຺ຊຕີຕິ – ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ. ອພ຺ຍາປາເທນ ພ຺ຍາປາທໍ ໂວສຊ຺ຊຕີຕິ – ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ. ອາໂລກສຎ຺ຎາຍ ຖິນມິທ຺ຘໍ ໂວສຊ຺ຊຕີຕິ – ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ. ອວິກ຺ເຂເປນ ອຸທ຺ຘຈ຺ຈໍ ໂວສຊ຺ຊຕີຕິ – ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ. ຘມ຺ມວວຕ຺ຖາເນນ ວິຈິກິຈ຺ຉໍ ໂວສຊ຺ຊຕີຕິ – ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ…ເປ… ອຣຫຕ຺ຕມຄ຺ເຄນ ສພ຺ພກິເລເສ ໂວສຊ຺ຊຕີຕິ – ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ໂວສຄ຺ເຄ ປຎ຺ຎາ ວິໂມກ຺ຂວິວຏ຺ເຏ ຎາຓໍ’’.

໑໐໐. ກຖໍ ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ? ທຸກ຺ຂສ຺ສ ປີຬນຏ຺ຐໍ ສງ຺ຂຕຏ຺ຐໍ ສນ຺ຕາປຏ຺ຐໍ ວິປຣິຓາມຏ຺ຐໍ ປຣິຊານນ຺ໂຕ ວິວຏ຺ຏຕີຕິ – ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ. ສມຸທຍສ຺ສ ອາຍູຫນຏ຺ຐໍ ນິທານຏ຺ຐໍ ສຎ຺ໂຎຄຏ຺ຐໍ ປລິໂພຘຏ຺ຐໍ ປຊຫນ຺ໂຕ ວິວຏ຺ຏຕີຕິ – ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ. ນິໂຣຘສ຺ສ ນິສ຺ສຣຓຏ຺ຐໍ ວິເວກຏ຺ຐໍ ອສງ຺ຂຕຏ຺ຐໍ ອມຕຏ຺ຐໍ ສຈ຺ຉິກໂຣນ຺ໂຕ ວິວຏ຺ຏຕີຕິ – ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ. ມຄ຺ຄສ຺ສ ນິຍ຺ຍານຏ຺ຐໍ ເຫຕຸຏ຺ຐໍ ທສ຺ສນຏ຺ຐໍ ອາຘິປເຕຍ຺ຍຏ຺ຐໍ ຠາເວນ຺ໂຕ ວິວຏ຺ຏຕີຕິ – ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ.

ສຎ຺ຎາວິວຏ຺ໂຏ, ເຈໂຕວິວຏ຺ໂຏ, ຈິຕ຺ຕວິວຏ຺ໂຏ, ຎາຓວິວຏ຺ໂຏ, ວິໂມກ຺ຂວິວຏ຺ໂຏ, ສຈ຺ຈວິວຏ຺ໂຏ. ສຎ຺ຊານນ຺ໂຕ ວິວຏ຺ຏຕີຕິ – ສຎ຺ຎາວິວຏ຺ໂຏ. ເຈຕຍນ຺ໂຕ ວິວຏ຺ຏຕີຕິ – ເຈໂຕວິວຏ຺ໂຏ. ວິຊານນ຺ໂຕ ວິວຏ຺ຏຕີຕິ – ຈິຕ຺ຕວິວຏ຺ໂຏ. ຎາຓໍ ກໂຣນ຺ໂຕ ວິວຏ຺ຏຕີຕິ – ຎາຓວິວຏ຺ໂຏ. ໂວສຊ຺ຊນ຺ໂຕ ວິວຏ຺ຏຕີຕິ – ວິໂມກ຺ຂວິວຏ຺ໂຏ. ຕຖຏ຺ເຐ ວິວຏ຺ຏຕີຕິ – ສຈ຺ຈວິວຏ຺ໂຏ.

ຍຕ຺ຖ ສຎ຺ຎາວິວຏ຺ໂຏ, ຕຕ຺ຖ ເຈໂຕວິວຏ຺ໂຏ. ຍຕ຺ຖ ເຈໂຕວິວຏ຺ໂຏ, ຕຕ຺ຖ ສຎ຺ຎາວິວຏ຺ໂຏ. ຍຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຕຕ຺ຖ ຈິຕ຺ຕວິວຏ຺ໂຏ. ຍຕ຺ຖ ຈິຕ຺ຕວິວຏ຺ໂຏ, ຕຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ. ຍຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຈິຕ຺ຕວິວຏ຺ໂຏ, ຕຕ຺ຖ ຎາຓວິວຏ຺ໂຏ. ຍຕ຺ຖ ຎາຓວິວຏ຺ໂຏ, ຕຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຈິຕ຺ຕວິວຏ຺ໂຏ. ຍຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຈິຕ຺ຕວິວຏ຺ໂຏ ຎາຓວິວຏ຺ໂຏ, ຕຕ຺ຖ ວິໂມກ຺ຂວິວຏ຺ໂຏ. ຍຕ຺ຖ ວິໂມກ຺ຂວິວຏ຺ໂຏ, ຕຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຈິຕ຺ຕວິວຏ຺ໂຏ ຎາຓວິວຏ຺ໂຏ. ຍຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຈິຕ຺ຕວິວຏ຺ໂຏ ຎາຓວິວຏ຺ໂຏ ວິໂມກ຺ຂວິວຏ຺ໂຏ, ຕຕ຺ຖ ສຈ຺ຈວິວຏ຺ໂຏ. ຍຕ຺ຖ ສຈ຺ຈວິວຏ຺ໂຏ, ຕຕ຺ຖ ສຎ຺ຎາວິວຏ຺ໂຏ ເຈໂຕວິວຏ຺ໂຏ ຈິຕ຺ຕວິວຏ຺ໂຏ ຎາຓວິວຏ຺ໂຏ ວິໂມກ຺ຂວິວຏ຺ໂຏ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ’’.

ຉວິວຏ຺ຏຎາຓນິທ຺ເທໂສ ນວຈຕ຺ຕາລີສໂມ.