໔໓. ປເທສວິຫາຣຎາຓນິທ຺ເທໂສ

໙໔. ກຖໍ ສໂມທຫເນ ປຎ຺ຎາ ປເທສວິຫາເຣ ຎາຓໍ? ມິຈ຺ຉາທິຏ຺ຐິປຈ຺ຈຍາປິ ເວທຍິຕໍ, ມິຈ຺ຉາທິຏ຺ຐິວູປສມປຈ຺ຈຍາປິ ເວທຍິຕໍ. ສມ຺ມາທິຏ຺ຐິປຈ຺ຈຍາປິ ເວທຍິຕໍ, ສມ຺ມາທິຏ຺ຐິວູປສມປຈ຺ຈຍາປິ ເວທຍິຕໍ. ມິຈ຺ຉາສງ຺ກປ຺ປປຈ຺ຈຍາປິ ເວທຍິຕໍ, ມິຈ຺ຉາສງ຺ກປ຺ປວູປສມປຈ຺ຈຍາປິ ເວທຍິຕໍ. ສມ຺ມາສງ຺ກປ຺ປປຈ຺ຈຍາປິ ເວທຍິຕໍ, ສມ຺ມາສງ຺ກປ຺ປວູປສມປຈ຺ຈຍາປິ ເວທຍິຕໍ…ເປ… ມິຈ຺ຉາວິມຸຕ຺ຕິປຈ຺ຈຍາປິ ເວທຍິຕໍ, ມິຈ຺ຉາວິມຸຕ຺ຕິວູປສມປຈ຺ຈຍາປິ ເວທຍິຕໍ. ສມ຺ມາວິມຸຕ຺ຕິປຈ຺ຈຍາປິ ເວທຍິຕໍ, ສມ຺ມາວິມຸຕ຺ຕິວູປສມປຈ຺ຈຍາປິ ເວທຍິຕໍ. ຉນ຺ທປຈ຺ຈຍາປິ ເວທຍິຕໍ, ຉນ຺ທວູປສມປຈ຺ຈຍາປິ ເວທຍິຕໍ. ວິຕກ຺ກປຈ຺ຈຍາປິ ເວທຍິຕໍ, ວິຕກ຺ກວູປສມປຈ຺ຈຍາປິ ເວທຍິຕໍ. ສຎ຺ຎາປຈ຺ຈຍາປິ ເວທຍິຕໍ, ສຎ຺ຎາວູປສມປຈ຺ຈຍາປິ ເວທຍິຕໍ.

ຉນ຺ໂທ ຈ ອວູປສນ຺ໂຕ ໂຫຕິ, ວິຕກ຺ໂກ ຈ ອວູປສນ຺ໂຕ ໂຫຕິ, ສຎ຺ຎາ ຈ ອວູປສນ຺ຕາ ໂຫຕິ, ຕປ຺ປຈ຺ຈຍາປິ ເວທຍິຕໍ. ຉນ຺ໂທ ຈ ວູປສນ຺ໂຕ ໂຫຕິ, ວິຕກ຺ໂກ ຈ ອວູປສນ຺ໂຕ ໂຫຕິ, ສຎ຺ຎາ ຈ ອວູປສນ຺ຕາ ໂຫຕິ, ຕປ຺ປຈ຺ຈຍາປິ ເວທຍິຕໍ. ຉນ຺ໂທ ຈ ວູປສນ຺ໂຕ ໂຫຕິ, ວິຕກ຺ໂກ ຈ ວູປສນ຺ໂຕ ໂຫຕິ, ສຎ຺ຎາ ຈ ອວູປສນ຺ຕາ ໂຫຕິ, ຕປ຺ປຈ຺ຈຍາປິ ເວທຍິຕໍ. ຉນ຺ໂທ ຈ ວູປສນ຺ໂຕ ໂຫຕິ, ວິຕກ຺ໂກ ຈ ວູປສນ຺ໂຕ ໂຫຕິ, ສຎ຺ຎາ ຈ ວູປສນ຺ຕາ ໂຫຕິ, ຕປ຺ປຈ຺ຈຍາປິ ເວທຍິຕໍ. ອປ຺ປຕ຺ຕສ຺ສ ປຕ຺ຕິຍາ ອຕ຺ຖິ ອາສວໍ, ຕສ຺ມິມ຺ປິ ຐາເນ ອນຸປ຺ປຕ຺ເຕ ຕປ຺ປຈ຺ຈຍາປິ ເວທຍິຕໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ສໂມທຫເນ ປຎ຺ຎາ ປເທສວິຫາເຣ ຎາຓໍ’’.

ປເທສວິຫາຣຎາຓນິທ຺ເທໂສ ເຕຈຕ຺ຕາລີສໂມ.