໓໙. ອຕ຺ຖສນ຺ທສ຺ສນຎາຓນິທ຺ເທໂສ

໙໐. ກຖໍ ນານາຘມ຺ມປ຺ປກາສນຕາ ປຎ຺ຎາ ອຕ຺ຖສນ຺ທສ຺ສເນ ຎາຓໍ? ນານາຘມ຺ມາຕິ ປຎ຺ຈກ຺ຂນ຺ຘາ, ທ຺ວາທສາຍຕນານິ, ອຏ຺ຐາຣສ ຘາຕຸໂຍ, ກຸສລາ ຘມ຺ມາ, ອກຸສລາ ຘມ຺ມາ, ອພ຺ຍາກຕາ ຘມ຺ມາ, ກາມາວຈຣາ ຘມ຺ມາ, ຣູປາວຈຣາ ຘມ຺ມາ, ອຣູປາວຈຣາ ຘມ຺ມາ, ອປຣິຍາປນ຺ນາ ຘມ຺ມາ.

ປກາສນຕາຕິ ຣູປໍ ອນິຈ຺ຈໂຕ ປກາເສຕິ, ຣູປໍ ທຸກ຺ຂໂຕ ປກາເສຕິ, ຣູປໍ ອນຕ຺ຕໂຕ ປກາເສຕິ. ເວທນໍ…ເປ… ສຎ຺ຎໍ… ສງ຺ຂາເຣ… ວິຎ຺ຎາຓໍ… ຈກ຺ຂຸໍ…ເປ… ຊຣາມຣຓໍ ອນິຈ຺ຈໂຕ ປກາເສຕິ, ຊຣາມຣຓໍ ທຸກ຺ຂໂຕ ປກາເສຕິ, ຊຣາມຣຓໍ ອນຕ຺ຕໂຕ ປກາເສຕິ.

ອຕ຺ຖສນ຺ທສ຺ສເນຕິ ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມຕ຺ຖໍ ສນ຺ທສ຺ເສຕິ. ພ຺ຍາປາທໍ ປຊຫນ຺ໂຕ ອພ຺ຍາປາທຕ຺ຖໍ ສນ຺ທສ຺ເສຕິ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎຕ຺ຖໍ ສນ຺ທສ຺ເສຕິ. ອຸທ຺ຘຈ຺ຈໍ ປຊຫນ຺ໂຕ ອວິກ຺ເຂປຕ຺ຖໍ ສນ຺ທສ຺ເສຕິ. ວິຈິກິຈ຺ຉໍ ປຊຫນ຺ໂຕ ຘມ຺ມວວຕ຺ຖານຕ຺ຖໍ ສນ຺ທສ຺ເສຕິ. ອວິຊ຺ຊໍ ປຊຫນ຺ໂຕ ຎາຓຕ຺ຖໍ ສນ຺ທສ຺ເສຕິ. ອຣຕິໍ ປຊຫນ຺ໂຕ ປາໂມຊ຺ຊຕ຺ຖໍ ສນ຺ທສ຺ເສຕິ. ນີວຣເຓ ປຊຫນ຺ໂຕ ປຐມຌານຕ຺ຖໍ ສນ຺ທສ຺ເສຕິ …ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄຕ຺ຖໍ ສນ຺ທສ຺ເສຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ນານາຘມ຺ມປກາສນຕາ ປຎ຺ຎາ ອຕ຺ຖສນ຺ທສ຺ສເນ ຎາຓໍ’’.

ອຕ຺ຖສນ຺ທສ຺ສນຎາຓນິທ຺ເທໂສ ນວຕິໍສຕິໂມ.