໔໐. ທສ຺ສນວິສຸທ຺ຘິຎາຓນິທ຺ເທໂສ

໙໑. ກຖໍ ສພ຺ພຘມ຺ມານໍ ເອກສງ຺ຄຫຕານານຕ຺ເຕກຕ຺ຕປຏິເວເຘ ປຎ຺ຎາ ທສ຺ສນວິສຸທ຺ຘິຎາຓໍ? ສພ຺ພຘມ຺ມານນ຺ຕິ ປຎ຺ຈກ຺ຂນ຺ຘາ…ເປ… ອປຣິຍາປນ຺ນາ ຘມ຺ມາ.

ເອກສງ຺ຄຫຕາຕິ ທ຺ວາທສຫິ ອາກາເຣຫິ ສພ຺ເພ ຘມ຺ມາ ເອກສງ຺ຄຫິຕາ. ຕຖຏ຺ເຐນ, ອນຕ຺ຕຏ຺ເຐນ, ສຈ຺ຈຏ຺ເຐນ, ປຏິເວຘຏ຺ເຐນ, ອຠິຊານນຏ຺ເຐນ, ປຣິຊານນຏ຺ເຐນ, ຘມ຺ມຏ຺ເຐນ, ຘາຕຸຏ຺ເຐນ, ຎາຕຏ຺ເຐນ, ສຈ຺ຉິກິຣິຍຏ຺ເຐນ, ຜຸສນຏ຺ເຐນ, ອຠິສມຍຏ຺ເຐນ – ອິເມຫິ ທ຺ວາທສຫິ ອາກາເຣຫິ ສພ຺ເພ ຘມ຺ມາ ເອກສງ຺ຄຫິຕາ.

ນານຕ຺ເຕກຕ຺ຕນ຺ຕິ ກາມຈ຺ຉນ຺ໂທ ນານຕ຺ຕໍ, ເນກ຺ຂມ຺ມໍ ເອກຕ຺ຕໍ…ເປ… ສພ຺ພກິເລສາ ນານຕ຺ຕໍ, ອຣຫຕ຺ຕມຄ຺ໂຄ ເອກຕ຺ຕໍ.

ປຏິເວເຘຕິ ທຸກ຺ຂສຈ຺ຈໍ ປຣິຎ຺ຎາປຏິເວຘໍ ປຏິວິຊ຺ຌຕິ. ສມຸທຍສຈ຺ຈໍ ປຫານປຏິເວຘໍ ປຏິວິຊ຺ຌຕິ. ນິໂຣຘສຈ຺ຈໍ ສຈ຺ຉິກິຣິຍາປຏິເວຘໍ ປຏິວິຊ຺ຌຕິ. ມຄ຺ຄສຈ຺ຈໍ ຠາວນາປຏິເວຘໍ ປຏິວິຊ຺ຌຕິ.

ທສ຺ສນວິສຸທ຺ຘີຕິ ໂສຕາປຕ຺ຕິມຄ຺ຄກ຺ຂເຓ ທສ຺ສນໍ ວິສຸຊ຺ຌຕິ; ໂສຕາປຕ຺ຕິຜລກ຺ຂເຓ ທສ຺ສນໍ ວິສຸທ຺ຘໍ. ສກທາຄາມິມຄ຺ຄກ຺ຂເຓ ທສ຺ສນໍ ວິສຸຊ຺ຌຕິ; ສກທາຄາມິຜລກ຺ຂເຓ ທສ຺ສນໍ ວິສຸທ຺ຘໍ. ອນາຄາມິມຄ຺ຄກ຺ຂເຓ ທສ຺ສນໍ ວິສຸຊ຺ຌຕິ; ອນາຄາມິຜລກ຺ຂເຓ ທສ຺ສນໍ ວິສຸທ຺ຘໍ. ອຣຫຕ຺ຕມຄ຺ຄກ຺ຂເຓ ທສ຺ສນໍ ວິສຸຊ຺ຌຕິ; ອຣຫຕ຺ຕຜລກ຺ຂເຓ ທສ຺ສນໍ ວິສຸທ຺ຘໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ສພ຺ພຘມ຺ມານໍ ເອກສງ຺ຄຫຕານານຕ຺ເຕກຕ຺ຕປຏິເວເຘ ປຎ຺ຎາ ທສ຺ສນວິສຸທ຺ຘິຎາຓໍ’’.

ທສ຺ສນວິສຸທ຺ຘິຎາຓນິທ຺ເທໂສ ຈຕ຺ຕາລີສໂມ.