໓໕. ປຣິນິພ຺ພານຎາຓນິທ຺ເທໂສ

໘໖. ກຖໍ ສມ຺ປຊານສ຺ສ ປວຕ຺ຕປຣິຍາທາເນ ປຎ຺ຎາ ປຣິນິພ຺ພາເນ ຎາຓໍ? ອິຘ ສມ຺ປຊາໂນ ເນກ຺ຂມ຺ເມນ ກາມຈ຺ຉນ຺ທສ຺ສ ປວຕ຺ຕໍ ປຣິຍາທິຍຕິ, ອພ຺ຍາປາເທນ ພ຺ຍາປາທສ຺ສ ປວຕ຺ຕໍ ປຣິຍາທິຍຕິ, ອາໂລກສຎ຺ຎາຍ ຖິນມິທ຺ຘສ຺ສ ປວຕ຺ຕໍ ປຣິຍາທິຍຕິ, ອວິກ຺ເຂເປນ ອຸທ຺ຘຈ຺ຈສ຺ສ ປວຕ຺ຕໍ ປຣິຍາທິຍຕິ, ຘມ຺ມວວຕ຺ຖາເນນ ວິຈິກິຈ຺ຉາຍ…ເປ… ຎາເຓນ ອວິຊ຺ຊາຍ… ປາໂມຊ຺ເຊນ ອຣຕິຍາ … ປຐເມນ ຌາເນນ ນີວຣຓານໍ ປວຕ຺ຕໍ ປຣິຍາທິຍຕິ…ເປ… ອຣຫຕ຺ຕມຄ຺ເຄນ ສພ຺ພກິເລສານໍ ປວຕ຺ຕໍ ປຣິຍາທິຍຕິ.

ອຖ ວາ ປນ ສມ຺ປຊານສ຺ສ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພາຍນ຺ຕສ຺ສ ອິທຎ຺ເຈວ ຈກ຺ຂຸປວຕ຺ຕໍ ປຣິຍາທິຍຕິ, ອຎ຺ຎຎ຺ຈ ຈກ຺ຂຸປວຕ຺ຕໍ ນ ອຸປ຺ປຊ຺ຊຕິ. ອິທຎ຺ເຈວ ໂສຕປວຕ຺ຕໍ…ເປ… ຆານປວຕ຺ຕໍ… ຊິວ຺ຫາປວຕ຺ຕໍ… ກາຍປວຕ຺ຕໍ… ມໂນປວຕ຺ຕໍ ປຣິຍາທິຍຕິ, ອຎ຺ຎຎ຺ຈ ມໂນປວຕ຺ຕໍ ນ ອຸປ຺ປຊ຺ຊຕິ. ອິທໍ ສມ຺ປຊານສ຺ສ ປວຕ຺ຕປຣິຍາທາເນ ປຎ຺ຎາ ປຣິນິພ຺ພາເນ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ສມ຺ປຊານສ຺ສ ປວຕ຺ຕປຣິຍາທາເນ ປຎ຺ຎາ ປຣິນິພ຺ພາເນ ຎາຓໍ’’.

ປຣິນິພ຺ພານຎາຓນິທ຺ເທໂສ ປຎ຺ຈຕິໍສຕິໂມ.