໓໖. ສມສີສຏ຺ຐຎາຓນິທ຺ເທໂສ

໘໗. ກຖໍ ສພ຺ພຘມ຺ມານໍ ສມ຺ມາ ສມຸຈ຺ເຉເທ ນິໂຣເຘ ຈ ອນຸປຏ຺ຐານຕາ ປຎ຺ຎາ ສມສີສຏ຺ເຐ ຎາຓໍ? ສພ຺ພຘມ຺ມານນ຺ຕິ – ປຎ຺ຈກ຺ຂນ຺ຘາ, ທ຺ວາທສາຍຕນານິ, ອຏ຺ຐາຣສ ຘາຕຸໂຍ, ກຸສລາ ຘມ຺ມາ, ອກຸສລາ ຘມ຺ມາ, ອພ຺ຍາກຕາ ຘມ຺ມາ, ກາມາວຈຣາ ຘມ຺ມາ, ຣູປາວຈຣາ ຘມ຺ມາ, ອຣູປາວຈຣາ ຘມ຺ມາ, ອປຣິຍາປນ຺ນາ ຘມ຺ມາ. ສມ຺ມາ ສມຸຈ຺ເຉເທຕິ ເນກ຺ຂມ຺ເມນ ກາມຈ຺ຉນ຺ທໍ ສມ຺ມາ ສມຸຈ຺ຉິນ຺ທຕິ. ອພ຺ຍາປາເທນ ພ຺ຍາປາທໍ ສມ຺ມາ ສມຸຈ຺ຉິນ຺ທຕິ. ອາໂລກສຎ຺ຎາຍ ຖິນມິທ຺ຘໍ ສມ຺ມາ ສມຸຈ຺ຉິນ຺ທຕິ. ອວິກ຺ເຂເປນ ອຸທ຺ຘຈ຺ຈໍ ສມ຺ມາ ສມຸຈ຺ຉິນ຺ທຕິ. ຘມ຺ມວວຕ຺ຖາເນນ ວິຈິກິຈ຺ຉໍ ສມ຺ມາ ສມຸຈ຺ຉິນ຺ທຕິ. ຎາເຓນ ອວິຊ຺ຊໍ ສມ຺ມາ ສມຸຈ຺ຉິນ຺ທຕິ. ປາໂມຊ຺ເຊນ ອຣຕິໍ ສມ຺ມາ ສມຸຈ຺ຉິນ຺ທຕິ. ປຐເມນ ຌາເນນ ນີວຣເຓ ສມ຺ມາ ສມຸຈ຺ຉິນ຺ທຕິ…ເປ… ອຣຫຕ຺ຕມຄ຺ເຄນ ສພ຺ພກິເລເສ ສມ຺ມາ ສມຸຈ຺ຉິນ຺ທຕິ.

ນິໂຣເຘຕິ ເນກ຺ຂມ຺ເມນ ກາມຈ຺ຉນ຺ທໍ ນິໂຣເຘຕິ. ອພ຺ຍາປາເທນ ພ຺ຍາປາທໍ ນິໂຣເຘຕິ. ອາໂລກສຎ຺ຎາຍ ຖິນມິທ຺ຘໍ ນິໂຣເຘຕິ. ອວິກ຺ເຂເປນ ອຸທ຺ຘຈ຺ຈໍ ນິໂຣເຘຕິ. ຘມ຺ມວວຕ຺ຖາເນນ ວິຈິກິຈ຺ຉໍ ນິໂຣເຘຕິ. ຎາເຓນ ອວິຊ຺ຊໍ ນິໂຣເຘຕິ. ປາໂມຊ຺ເຊນ ອຣຕິໍ ນິໂຣເຘຕິ. ປຐເມນ ຌາເນນ ນີວຣເຓ ນິໂຣເຘຕິ…ເປ… ອຣຫຕ຺ຕມຄ຺ເຄນ ສພ຺ພກິເລເສ ນິໂຣເຘຕິ.

ອນຸປຏ຺ຐານຕາຕິ ເນກ຺ຂມ຺ມໍ ປຏິລທ຺ຘສ຺ສ ກາມຈ຺ຉນ຺ໂທ ນ ອຸປຏ຺ຐາຕິ. ອພ຺ຍາປາທໍ ປຏິລທ຺ຘສ຺ສ ພ຺ຍາປາໂທ ນ ອຸປຏ຺ຐາຕິ. ອາໂລກສຎ຺ຎໍ ປຏິລທ຺ຘສ຺ສ ຖິນມິທ຺ຘໍ ນ ອຸປຏ຺ຐາຕິ. ອວິກ຺ເຂປໍ ປຏິລທ຺ຘສ຺ສ ອຸທ຺ຘຈ຺ຈໍ ນ ອຸປຏ຺ຐາຕິ. ຘມ຺ມວວຕ຺ຖານໍ ປຏິລທ຺ຘສ຺ສ ວິຈິກິຈ຺ຉາ ນ ອຸປຏ຺ຐາຕິ. ຎາຓໍ ປຏິລທ຺ຘສ຺ສ ອວິຊ຺ຊາ ນ ອຸປຏ຺ຐາຕິ. ປາໂມຊ຺ຊໍ ປຏິລທ຺ຘສ຺ສ ອຣຕິ ນ ອຸປຏ຺ຐາຕິ. ປຐມໍ ຌານໍ ປຏິລທ຺ຘສ຺ສ ນີວຣຓາ ນ ອຸປຏ຺ຐຫນ຺ຕິ…ເປ… ອຣຫຕ຺ຕມຄ຺ຄໍ ປຏິລທ຺ຘສ຺ສ ສພ຺ພກິເລສາ ນ ອຸປຏ຺ຐຫນ຺ຕິ.

ສມນ຺ຕິ ກາມຈ຺ຉນ຺ທສ຺ສ ປຫີນຕ຺ຕາ ເນກ຺ຂມ຺ມໍ ສມໍ. ພ຺ຍາປາທສ຺ສ ປຫີນຕ຺ຕາ ອພ຺ຍາປາໂທ ສມໍ. ຖິນມິທ຺ຘສ຺ສ ປຫີນຕ຺ຕາ ອາໂລກສຎ຺ຎາ ສມໍ. ອຸທ຺ຘຈ຺ຈສ຺ສ ປຫີນຕ຺ຕາ ອວິກ຺ເຂໂປ ສມໍ. ວິຈິກິຈ຺ຉາຍ ປຫີນຕ຺ຕາ ຘມ຺ມວວຕ຺ຖານໍ ສມໍ. ອວິຊ຺ຊາຍ ປຫີນຕ຺ຕາ ຎາຓໍ ສມໍ. ອຣຕິຍາ ປຫີນຕ຺ຕາ ປາໂມຊ຺ຊໍ ສມໍ. ນີວຣຓານໍ ປຫີນຕ຺ຕາ ປຐມໍ ຌານໍ ສມໍ…ເປ… ສພ຺ພກິເລສານໍ ປຫີນຕ຺ຕາ ອຣຫຕ຺ຕມຄ຺ໂຄ ສມໍ.

ສີສນ຺ຕິ ເຕຣສ ສີສານິ – ປລິໂພຘສີສຎ຺ຈ ຕຓ຺ຫາ, ວິນິພນ຺ຘນສີສຎ຺ຈ ມາໂນ, ປຣາມາສສີສຎ຺ຈ ທິຏ຺ຐິ, ວິກ຺ເຂປສີສຎ຺ຈ ອຸທ຺ຘຈ຺ຈໍ, ສໍກິເລສສີສຎ຺ຈ ອວິຊ຺ຊາ, ອຘິໂມກ຺ຂສີສຎ຺ຈ ສທ຺ຘາ, ປຄ຺ຄຫສີສຎ຺ຈ ວີຣິຍໍ, ອຸປຏ຺ຐານສີສຎ຺ຈ ສຕິ, ອວິກ຺ເຂປສີສຎ຺ຈ ສມາຘິ, ທສ຺ສນສີສຎ຺ຈ ປຎ຺ຎາ, ປວຕ຺ຕສີສຎ຺ຈ ຊີວິຕິນ຺ທ຺ຣິຍໍ, ໂຄຈຣສີສຎ຺ຈ ວິໂມກ຺ໂຂ, ສງ຺ຂາຣສີສຎ຺ຈ ນິໂຣໂຘ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ສພ຺ພຘມ຺ມານໍ ສມ຺ມາ ສມຸຈ຺ເຉເທ ນິໂຣເຘ ຈ ອນຸປຏ຺ຐານຕາ ປຎ຺ຎາ ສມສີສຏ຺ເຐ ຎາຓໍ’’.

ສມສີສຏ຺ຐຎາຓນິທ຺ເທໂສ ຉຕ຺ຕິໍສຕິໂມ.