໓໔. ນິໂຣຘສມາປຕ຺ຕິຎາຓນິທ຺ເທໂສ

໘໓. ກຖໍ ທ຺ວີຫິ ພເລຫິ ສມນ຺ນາຄຕຕ຺ຕາ ຕໂຍ ຈ ສງ຺ຂາຣານໍ ປຏິປ຺ປສ຺ສທ຺ຘິຍາ ໂສຬສຫິ ຎາຓຈຣິຍາຫິ ນວຫິ ສມາຘິຈຣິຍາຫິ ວສິຠາວຕາ ປຎ຺ຎາ ນິໂຣຘສມາປຕ຺ຕິຍາ ຎາຓໍ?

ທ຺ວີຫິ ພເລຫີຕິ ທ຺ເວ ພລານິ – ສມຖພລໍ, ວິປສ຺ສນາພລໍ. ກຕມໍ ສມຖພລໍ? ເນກ຺ຂມ຺ມວເສນ ຈິຕ຺ຕສ຺ເສກຄ຺ຄຕາ ອວິກ຺ເຂໂປ ສມຖພລໍ. ອພ຺ຍາປາທວເສນ ຈິຕ຺ຕສ຺ເສກຄ຺ຄຕາ ອວິກ຺ເຂໂປ ສມຖພລໍ. ອາໂລກສຎ຺ຎາວເສນ ຈິຕ຺ຕສ຺ເສກຄ຺ຄຕາ ອວິກ຺ເຂໂປ ສມຖພລໍ. ອວິກ຺ເຂປວເສນ ຈິຕ຺ຕສ຺ເສກຄ຺ຄຕາ ອວິກ຺ເຂໂປ ສມຖພລໍ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສວເສນ ຈິຕ຺ຕສ຺ເສກຄ຺ຄຕາ ອວິກ຺ເຂໂປ ສມຖພລໍ. ປຏິນິສ຺ສຄ຺ຄານຸປສ຺ສີ ປສ຺ສາສວເສນ ຈິຕ຺ຕສ຺ເສກຄ຺ຄຕາ ອວິກ຺ເຂໂປ ສມຖພລໍ.

ສມຖພລນ຺ຕິ ເກນຏ຺ເຐນ ສມຖພລໍ? ປຐເມນ ຌາເນນ ນີວຣເຓ ນ ກມ຺ປຕີຕິ – ສມຖພລໍ. ທຸຕິເຍນ ຌາເນນ ວິຕກ຺ກວິຈາເຣ ນ ກມ຺ປຕີຕິ – ສມຖພລໍ. ຕຕິເຍນ ຌາເນນ ປີຕິຍາ ນ ກມ຺ປຕີຕິ – ສມຖພລໍ. ຈຕຸຕ຺ເຖນ ຌາເນນ ສຸຂທຸກ຺ເຂ ນ ກມ຺ປຕີຕິ – ສມຖພລໍ. ອາກາສານຎ຺ຈາຍຕນສມາປຕ຺ຕິຍາ ຣູປສຎ຺ຎາຍ ປຏິຆສຎ຺ຎາຍ ນານຕ຺ຕສຎ຺ຎາຍ ນ ກມ຺ປຕີຕິ – ສມຖພລໍ. ວິຎ຺ຎາຓຎ຺ຈາຍຕນສມາປຕ຺ຕິຍາ ອາກາສານຎ຺ຈາຍຕນສຎ຺ຎາຍ ນ ກມ຺ປຕີຕິ – ສມຖພລໍ. ອາກິຎ຺ຈຎ຺ຎາຍຕນສມາປຕ຺ຕິຍາ ວິຎ຺ຎາຓຎ຺ຈາຍຕນສຎ຺ຎາຍ ນ ກມ຺ປຕີຕິ – ສມຖພລໍ. ເນວສຎ຺ຎານາສຎ຺ຎາຍຕນສມາປຕ຺ຕິຍາ ອາກິຎ຺ຈຎ຺ຎາຍຕນສຎ຺ຎາຍ ນ ກມ຺ປຕີຕິ – ສມຖພລໍ. ອຸທ຺ຘຈ຺ເຈ ຈ ອຸທ຺ຘຈ຺ຈສຫຄຕກິເລເສ ຈ ຂນ຺ເຘ ຈ ນ ກມ຺ປຕິ ນ ຈລຕິ ນ ເວຘຕີຕິ – ສມຖພລໍ. ອິທໍ ສມຖພລໍ.

ກຕມໍ ວິປສ຺ສນາພລໍ? ອນິຈ຺ຈານຸປສ຺ສນາ ວິປສ຺ສນາພລໍ. ທຸກ຺ຂານຸປສ຺ສນາ ວິປສ຺ສນາພລໍ. ອນຕ຺ຕານຸປສ຺ສນາ ວິປສ຺ສນາພລໍ. ນິພ຺ພິທານຸປສ຺ສນາ ວິປສ຺ສນາພລໍ. ວິຣາຄານຸປສ຺ສນາ ວິປສ຺ສນາພລໍ. ນິໂຣຘານຸປສ຺ສນາ ວິປສ຺ສນາພລໍ. ປຏິນິສ຺ສຄ຺ຄານຸປສ຺ສນາ ວິປສ຺ສນາພລໍ. ຣູເປ ອນິຈ຺ຈານຸປສ຺ສນາ ວິປສ຺ສນາພລໍ …ເປ… ຣູເປ ປຏິນິສ຺ສຄ຺ຄານຸປສ຺ສນາ ວິປສ຺ສນາພລໍ. ເວທນາຍ…ເປ… ສຎ຺ຎາຍ… ສງ຺ຂາເຣສຸ… ວິຎ຺ຎາເຓ… ຈກ຺ຂຸສ຺ມິໍ…ເປ… ຊຣາມຣເຓ ອນິຈ຺ຈານຸປສ຺ສນາ ວິປສ຺ສນາພລໍ…ເປ… ຊຣາມຣເຓ ປຏິນິສ຺ສຄ຺ຄານຸປສ຺ສນາ ວິປສ຺ສນາພລໍ.

ວິປສ຺ສນາພລນ຺ຕິ ເກນຏ຺ເຐນ ວິປສ຺ສນາພລໍ? ອນິຈ຺ຈານຸປສ຺ສນາຍ ນິຈ຺ຈສຎ຺ຎາຍ ນ ກມ຺ປຕີຕິ – ວິປສ຺ສນາພລໍ. ທຸກ຺ຂານຸປສ຺ສນາຍ ສຸຂສຎ຺ຎາຍ ນ ກມ຺ປຕີຕິ – ວິປສ຺ສນາພລໍ. ອນຕ຺ຕານຸປສ຺ສນາຍ ອຕ຺ຕສຎ຺ຎາຍ ນ ກມ຺ປຕີຕິ – ວິປສ຺ສນາພລໍ. ນິພ຺ພິທານຸປສ຺ສນາຍ ນນ຺ທິຍາ ນ ກມ຺ປຕີຕິ – ວິປສ຺ສນາພລໍ. ວິຣາຄານຸປສ຺ສນາຍ ຣາເຄ ນ ກມ຺ປຕີຕິ – ວິປສ຺ສນາພລໍ. ນິໂຣຘານຸປສ຺ສນາຍ ສມຸທເຍ ນ ກມ຺ປຕີຕິ – ວິປສ຺ສນາພລໍ. ປຏິນິສ຺ສຄ຺ຄານຸປສ຺ສນາຍ ອາທາເນ ນ ກມ຺ປຕີຕິ – ວິປສ຺ສນາພລໍ. ອວິຊ຺ຊາຍ ຈ ອວິຊ຺ຊາ ສຫຄຕກິເລເສ ຈ ຂນ຺ເຘ ຈ ນ ກມ຺ປຕິ ນ ຈລຕິ ນ ເວຘຕີຕິ – ວິປສ຺ສນາພລໍ. ອິທໍ ວິປສ຺ສນາພລໍ.

ຕໂຍ ຈ ສງ຺ຂາຣານໍ ປຏິປ຺ປສ຺ສທ຺ຘິຍາຕິ ກຕເມສໍ ຕິຓ຺ຓນ຺ນໍ ສງ຺ຂາຣານໍ ປຏິປ຺ປສ຺ສທ຺ຘິຍາ? ທຸຕິຍໍ ຌານໍ ສມາປນ຺ນສ຺ສ ວິຕກ຺ກວິຈາຣາ ວຈີສງ຺ຂາຣາ ປຏິປ຺ປສ຺ສທ຺ຘາ ໂຫນ຺ຕິ. ຈຕຸຕ຺ຖໍ ຌານໍ ສມາປນ຺ນສ຺ສ ອສ຺ສາສປສ຺ສາສາ ກາຍສງ຺ຂາຣາ ປຏິປ຺ປສ຺ສທ຺ຘາ ໂຫນ຺ຕິ. ສຎ຺ຎາເວທຍິຕນິໂຣຘໍ ສມາປນ຺ນສ຺ສ ສຎ຺ຎາ ຈ ເວທນາ ຈ ຈິຕ຺ຕສງ຺ຂາຣາ ປຏິປ຺ປສ຺ສທ຺ຘາ ໂຫນ຺ຕິ. ອິເມສໍ ຕິຓ຺ຓນ຺ນໍ ສງ຺ຂາຣານໍ ປຏິປ຺ປສ຺ສທ຺ຘິຍາ.

໘໔. ໂສຬສຫິ ຎາຓຈຣິຍາຫີຕິ ກຕມາຫິ ໂສຬສຫິ ຎາຓຈຣິຍາຫິ? ອນິຈ຺ຈານຸປສ຺ສນາ ຎາຓຈຣິຍາ, ທຸກ຺ຂານຸປສ຺ສນາ ຎາຓຈຣິຍາ, ອນຕ຺ຕານຸປສ຺ສນາ ຎາຓຈຣິຍາ, ນິພ຺ພິທານຸປສ຺ສນາ ຎາຓຈຣິຍາ, ວິຣາຄານຸປສ຺ສນາ ຎາຓຈຣິຍາ, ນິໂຣຘານຸປສ຺ສນາ ຎາຓຈຣິຍາ, ປຏິນິສ຺ສຄ຺ຄານຸປສ຺ສນາ ຎາຓຈຣິຍາ, ວິວຏ຺ຏນານຸປສ຺ສນາ ຎາຓຈຣິຍາ, ໂສຕາປຕ຺ຕິມຄ຺ໂຄ ຎາຓຈຣິຍາ, ໂສຕາປຕ຺ຕິຜລສມາປຕ຺ຕິ ຎາຓຈຣິຍາ, ສກທາຄາມິມຄ຺ໂຄ ຎາຓຈຣິຍາ, ສກທາຄາມິຜລສມາປຕ຺ຕິ ຎາຓຈຣິຍາ, ອນາຄາມິມຄ຺ໂຄ ຎາຓຈຣິຍາ, ອນາຄາມິຜລສມາປຕ຺ຕິ ຎາຓຈຣິຍາ, ອຣຫຕ຺ຕມຄ຺ໂຄ ຎາຓຈຣິຍາ, ອຣຫຕ຺ຕຜລສມາປຕ຺ຕິ ຎາຓຈຣິຍາ – ອິມາຫິ ໂສຬສຫິ ຎາຓຈຣິຍາຫິ.

໘໕. ນວຫິ ສມາຘິຈຣິຍາຫີຕິ ກຕມາຫິ ນວຫິ ສມາຘິຈຣິຍາຫິ? ປຐມໍ ຌານໍ ສມາຘິຈຣິຍາ, ທຸຕິຍໍ ຌານໍ ສມາຘິຈຣິຍາ, ຕຕິຍໍ ຌານໍ ສມາຘິຈຣິຍາ, ຈຕຸຕ຺ຖໍ ຌານໍ ສມາຘິຈຣິຍາ, ອາກາສານຎ຺ຈາຍຕນສມາປຕ຺ຕິ…ເປ… ວິຎ຺ຎາຓຎ຺ຈາຍຕນສມາປຕ຺ຕິ… ອາກິຎ຺ຈຎ຺ຎາຍຕນສມາປຕ຺ຕິ… ເນວສຎ຺ຎານາສຎ຺ຎາຍຕນສມາປຕ຺ຕິ ສມາຘິຈຣິຍາ. ປຐມໍ ຌານໍ ປຏິລາຠຕ຺ຖາຍ ວິຕກ຺ໂກ ຈ ວິຈາໂຣ ຈ ປີຕິ ຈ ສຸຂຎ຺ຈ ຈິຕ຺ເຕກຄ຺ຄຕາ ຈ…ເປ… ເນວສຎ຺ຎານາສຎ຺ຎາຍຕນສມາປຕ຺ຕິໍ ປຏິລາຠຕ຺ຖາຍ ວິຕກ຺ໂກ ຈ ວິຈາໂຣ ຈ ປີຕິ ຈ ສຸຂຎ຺ຈ ຈິຕ຺ເຕກຄ຺ຄຕາ ຈ – ອິມາຫິ ນວຫິ ສມາຘິຈຣິຍາຫິ.

ວສີຕິ ປຎ຺ຈ ວສິໂຍ. ອາວຊ຺ຊນວສີ, ສມາປຊ຺ຊນວສີ, ອຘິຏ຺ຐານວສີ, ວຸຏ຺ຐານວສີ, ປຈ຺ຈເວກ຺ຂຓາວສີ. ປຐມໍ ຌານໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ອາວຊ຺ຊຕິ; ອາວຊ຺ຊນາຍ ທນ຺ຘາຍິຕຕ຺ຕໍ ນຕ຺ຖີຕິ – ອາວຊ຺ຊນວສີ. ປຐມໍ ຌານໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິ; ສມາປຊ຺ຊນາຍ ທນ຺ຘາຍິຕຕ຺ຕໍ ນຕ຺ຖີຕິ – ສມາປຊ຺ຊນວສີ. ປຐມໍ ຌານໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ອຘິຏ຺ຐາຕິ; ອຘິຏ຺ຐາເນ ທນ຺ຘາຍິຕຕ຺ຕໍ ນຕ຺ຖີຕິ – ອຘິຏ຺ຐານວສີ. ປຐມໍ ຌານໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ວຸຏ຺ຐາຕິ; ວຸຏ຺ຐາເນ ທນ຺ຘາຍິຕຕ຺ຕໍ ນຕ຺ຖີຕິ – ວຸຏ຺ຐານວສີ. ປຐມໍ ຌານໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ປຈ຺ຈເວກ຺ຂຕິ; ປຈ຺ຈເວກ຺ຂຓາຍ ທນ຺ຘາຍິຕຕ຺ຕໍ ນຕ຺ຖີຕິ – ປຈ຺ຈເວກ຺ຂຓາວສີ.

ທຸຕິຍໍ ຌານໍ…ເປ… ເນວສຎ຺ຎານາສຎ຺ຎາຍຕນສມາປຕ຺ຕິໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ອາວຊ຺ຊຕິ; ອາວຊ຺ຊນາຍ ທນ຺ຘາຍິຕຕ຺ຕໍ ນຕ຺ຖີຕິ – ອາວຊ຺ຊນວສີ. ເນວສຎ຺ຎານາສຎ຺ຎາຍຕນສມາປຕ຺ຕິໍ ຍຕ຺ຖິຈ຺ຉກໍ ຍທິຈ຺ຉກໍ ຍາວຕິຈ຺ຉກໍ ສມາປຊ຺ຊຕິ…ເປ… ອຘິຏ຺ຐາຕິ… ວຸຏ຺ຐາຕິ… ປຈ຺ຈເວກ຺ຂຕິ; ປຈ຺ຈເວກ຺ຂຓາຍ ທນ຺ຘາຍິຕຕ຺ຕໍ ນຕ຺ຖີຕິ – ປຈ຺ຈເວກ຺ຂຓາວສີ. ອິມາ ປຎ຺ຈ ວສິໂຍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ທ຺ວີຫິ ພເລຫິ ສມນ຺ນາຄຕຕ຺ຕາ ຕໂຍ ຈ ສງ຺ຂາຣານໍ ປຏິປສ຺ສທ຺ຘິຍາ ໂສຬສຫິ ຎາຓຈຣິຍາຫິ ນວຫິ ສມາຘິຈຣິຍາຫິ ວສີຠາວຕາ ປຎ຺ຎາ ນິໂຣຘສມາປຕ຺ຕິຍາ ຎາຓໍ’’.

ນິໂຣຘສມາປຕ຺ຕິຎາຓນິທ຺ເທໂສ ຈຕຸຕ຺ຕິໍສຕິໂມ.