໓໓. ອຣຓວິຫາຣຎາຓນິທ຺ເທໂສ

໘໒. ກຖໍ ທສ຺ສນາຘິປເຕຍ຺ຍໍ ສນ຺ໂຕ ຈ ວິຫາຣາຘິຄໂມ ປຓີຕາຘິມຸຕ຺ຕຕາ ປຎ຺ຎາ ອຣຓວິຫາເຣ ຎາຓໍ? ທສ຺ສນາຘິປເຕຍ຺ຍນ຺ຕິ ອນິຈ຺ຈານຸປສ຺ສນາ ທສ຺ສນາຘິປເຕຍ຺ຍໍ, ທຸກ຺ຂານຸປສ຺ສນາ ທສ຺ສນາຘິປເຕຍ຺ຍໍ, ອນຕ຺ຕານຸປສ຺ສນາ ທສ຺ສນາຘິປເຕຍ຺ຍໍ, ຣູເປ ອນິຈ຺ຈານຸປສ຺ສນາ ທສ຺ສນາຘິປເຕຍ຺ຍໍ, ຣູເປ ທຸກ຺ຂານຸປສ຺ສນາ ທສ຺ສນາຘິປເຕຍ຺ຍໍ, ຣູເປ ອນຕ຺ຕານຸປສ຺ສນາ ທສ຺ສນາຘິປເຕຍ຺ຍໍ; ເວທນາຍ…ເປ… ສຎ຺ຎາຍ… ສງ຺ຂາເຣສຸ… ວິຎ຺ຎາເຓ… ຈກ຺ຂຸສ຺ມິໍ…ເປ… ຊຣາມຣເຓ ອນິຈ຺ຈານຸປສ຺ສນາ ທສ຺ສນາຘິປເຕຍ຺ຍໍ, ຊຣາມຣເຓ ທຸກ຺ຂານຸປສ຺ສນາ ທສ຺ສນາຘິປເຕຍ຺ຍໍ, ຊຣາມຣເຓ ອນຕ຺ຕານຸປສ຺ສນາ ທສ຺ສນາຘິປເຕຍ຺ຍໍ.

ສນ຺ໂຕ ຈ ວິຫາຣາຘິຄໂມຕິ ສຸຎ຺ຎໂຕ ວິຫາໂຣ ສນ຺ໂຕ ວິຫາຣາຘິຄໂມ. ອນິມິຕ຺ໂຕ ວິຫາໂຣ ສນ຺ໂຕ ວິຫາຣາຘິຄໂມ. ອປ຺ປຓິຫິໂຕ ວິຫາໂຣ ສນ຺ໂຕ ວິຫາຣາຘິຄໂມ.

ປຓີຕາຘິມຸຕ຺ຕຕາຕິ ສຸຎ຺ຎເຕ ອຘິມຸຕ຺ຕຕາ ປຓີຕາຘິມຸຕ຺ຕຕາ. ອນິມິຕ຺ເຕ ອຘິມຸຕ຺ຕຕາ ປຓີຕາຘິມຸຕ຺ຕຕາ. ອປ຺ປຓິຫິເຕ ອຘິມຸຕ຺ຕຕາ ປຓີຕາຘິມຸຕ຺ຕຕາ.

ອຣຓວິຫາໂຣຕິ ປຐມໍ ຌານໍ ອຣຓວິຫາໂຣ. ທຸຕິຍໍ ຌານໍ ອຣຓວິຫາໂຣ. ຕຕິຍໍ ຌານໍ ອຣຓວິຫາໂຣ. ຈຕຸຕ຺ຖໍ ຌານໍ ອຣຓວິຫາໂຣ. ອາກາສານຎ຺ຈາຍຕນສມາປຕ຺ຕິ ອຣຓວິຫາໂຣ…ເປ… ເນວສຎ຺ຎານາສຎ຺ຎາຍຕນສມາປຕ຺ຕິ ອຣຓວິຫາໂຣ.

ອຣຓວິຫາໂຣຕິ ເກນຏ຺ເຐນ ອຣຓວິຫາໂຣ? ປຐເມນ ຌາເນນ ນີວຣເຓ ຫຣຕີຕິ – ອຣຓວິຫາໂຣ. ທຸຕິເຍນ ຌາເນນ ວິຕກ຺ກວິຈາເຣ ຫຣຕີຕິ – ອຣຓວິຫາໂຣ. ຕຕິເຍນ ຌາເນນ ປີຕິໍ ຫຣຕີຕິ – ອຣຓວິຫາໂຣ. ຈຕຸຕ຺ເຖນ ຌາເນນ ສຸຂທຸກ຺ເຂ ຫຣຕີຕິ – ອຣຓວິຫາໂຣ. ອາກາສານຎ຺ຈາຍຕນສມາປຕ຺ຕິຍາ ຣູປສຎ຺ຎໍ ປຏິຆສຎ຺ຎໍ ນານຕ຺ຕສຎ຺ຎໍ ຫຣຕີຕິ – ອຣຓວິຫາໂຣ. ວິຎ຺ຎາຓຎ຺ຈາຍຕນສມາປຕ຺ຕິຍາ ອາກາສານຎ຺ຈາຍຕນສຎ຺ຎໍ ຫຣຕີຕິ – ອຣຓວິຫາໂຣ. ອາກິຎ຺ຈຎ຺ຎາຍຕນສມາປຕ຺ຕິຍາ ວິຎ຺ຎາຓຎ຺ຈາຍຕນສຎ຺ຎໍ ຫຣຕີຕິ – ອຣຓວິຫາໂຣ. ເນວສຎ຺ຎານາສຎ຺ຎາຍຕນສມາປຕ຺ຕິຍາ ອາກິຎ຺ຈຎ຺ຎາຍຕນສຎ຺ຎໍ ຫຣຕີຕິ – ອຣຓວິຫາໂຣ. ອຍໍ ອຣຓວິຫາໂຣ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ທສ຺ສນາຘິປເຕຍ຺ຍໍ ສນ຺ໂຕ ຈ ວິຫາຣາຘິຄໂມ ປຓີຕາຘິມຸຕ຺ຕຕາ ປຎ຺ຎາ ອຣຓວິຫາເຣ ຎາຓໍ’’.

ອຣຓວິຫາຣຎາຓນິທ຺ເທໂສ ເຕຕ຺ຕິໍສຕິໂມ.