໙. ປຣິວຕ຺ຕນຫາຣວິຠງ຺ໂຄ

໓໕. ຕຕ຺ຖ ກຕໂມ ປຣິວຕ຺ຕໂນ ຫາໂຣ? ‘‘ກຸສລາກຸສເລ ຘມ຺ເມ’’ຕິ. ສມ຺ມາທິຏ຺ຐິສ຺ສ ປຸຣິສປຸຄ຺ຄລສ຺ສ ມິຈ຺ຉາທິຏ຺ຐິ ນິຊ຺ຊິຓ຺ຓາ ຠວຕິ. ເຍ ຈສ຺ສ ມິຈ຺ຉາທິຏ຺ຐິປຈ຺ຈຍາ ອຸປ຺ປຊ຺ເຊຍ຺ຍຸໍ ອເນເກ [ອເນກາ (ກ.)] ປາປກາ ອກຸສລາ ຘມ຺ມາ, ເຕ ຈສ຺ສ ນິຊ຺ຊິຓ຺ຓາ ໂຫນ຺ຕິ. ສມ຺ມາທິຏ຺ຐິປຈ຺ຈຍາ ຈສ຺ສ ອເນເກ ກຸສລາ ຘມ຺ມາ ສມ຺ຠວນ຺ຕິ, ເຕ ຈສ຺ສ ຠາວນາປາຣິປູຣິໍ ຄຈ຺ຉນ຺ຕິ. ສມ຺ມາສງ຺ກປ຺ປສ຺ສ ປຸຣິສປຸຄ຺ຄລສ຺ສ ມິຈ຺ຉາສງ຺ກປ຺ໂປ ນິຊ຺ຊິຓ຺ໂຓ ຠວຕິ. ເຍ ຈສ຺ສ ມິຈ຺ຉາສງ຺ກປ຺ປປຈ຺ຈຍາ ອຸປ຺ປຊ຺ເຊຍ຺ຍຸໍ ອເນເກ ປາປກາ ອກຸສລາ ຘມ຺ມາ, ເຕ ຈສ຺ສ ນິຊ຺ຊິຓ຺ຓາ ໂຫນ຺ຕິ. ສມ຺ມາສງ຺ກປ຺ປປຈ຺ຈຍາ ຈສ຺ສ ອເນເກ ກຸສລາ ຘມ຺ມາ ສມ຺ຠວນ຺ຕິ. ເຕ ຈສ຺ສ ຠາວນາປາຣິປູຣິໍ ຄຈ຺ຉນ຺ຕິ. ເອວໍ ສມ຺ມາວາຈສ຺ສ ສມ຺ມາກມ຺ມນ຺ຕສ຺ສ ສມ຺ມາອາຊີວສ຺ສ ສມ຺ມາວາຍາມສ຺ສ ສມ຺ມາສຕິສ຺ສ ສມ຺ມາສມາຘິສ຺ສ ສມ຺ມາວິມຸຕ຺ຕສ຺ສ ສມ຺ມາວິມຸຕ຺ຕິຎາຓທສ຺ສນສ຺ສ ປຸຣິສປຸຄ຺ຄລສ຺ສ ມິຈ຺ຉາວິມຸຕ຺ຕິຎາຓທສ຺ສນໍ ນິຊ຺ຊິຓ຺ຓໍ ຠວຕິ. ເຍ ຈສ຺ສ ມິຈ຺ຉາວິມຸຕ຺ຕິຎາຓທສ຺ສນປຈ຺ຈຍາ ອຸປ຺ປຊ຺ເຊຍ຺ຍຸໍ ອເນເກ ປາປກາ ອກຸສລາ ຘມ຺ມາ, ເຕ ຈສ຺ສ ນິຊ຺ຊິຓ຺ຓາ ໂຫນ຺ຕິ. ສມ຺ມາວິມຸຕ຺ຕິຎາຓທສ຺ສນປຈ຺ຈຍາ ຈສ຺ສ ອເນເກ ກຸສລາ ຘມ຺ມາ ສມ຺ຠວນ຺ຕິ, ເຕ ຈສ຺ສ ຠາວນາປາຣິປູຣິໍ ຄຈ຺ຉນ຺ຕິ.

໓໖. ຍສ຺ສ ວາ ປາຓາຕິປາຕາ ປຏິວິຣຕສ຺ສ ປາຓາຕິປາໂຕ ປຫີໂນ ໂຫຕິ. ອທິນ຺ນາທານາ ປຏິວິຣຕສ຺ສ ອທິນ຺ນາທານໍ ປຫີນໍ ໂຫຕິ. ພ຺ຣຫ຺ມຈາຣິສ຺ສ ອພ຺ຣຫ຺ມຈຣິຍໍ ປຫີນໍ ໂຫຕິ. ສຈ຺ຈວາທິສ຺ສ ມຸສາວາໂທ ປຫີໂນ ໂຫຕິ. ອປິສຸຓວາຈສ຺ສ ປິສຸຓາ ວາຈາ ປຫີນາ ໂຫຕິ. ສຓ຺ຫວາຈສ຺ສ ຜຣຸສາ ວາຈາ ປຫີນາ ໂຫຕິ. ກາລວາທິສ຺ສ ສມ຺ຜປ຺ປລາໂປ ປຫີໂນ ໂຫຕິ. ອນຠິຊ຺ຌາລຸສ຺ສ [ອນຠິຊ຺ຌາມນສ຺ສ (ກ.)] ອຠິຊ຺ຌາ ປຫີນາ ໂຫຕິ. ອພ຺ຍາປນ຺ນຈິຕ຺ຕສ຺ສ ພ຺ຍາປາໂທ ປຫີໂນ ໂຫຕິ. ສມ຺ມາທິຏ຺ຐິສ຺ສ ມິຈ຺ຉາທິຏ຺ຐິ ປຫີນາ ໂຫຕິ.

ເຍ ຈ ໂຂ ເກຈິ ອຣິຍໍ ອຏ຺ຐງ຺ຄິກໍ ມຄ຺ຄໍ ຄຣຫນ຺ຕິ, ເນສໍ ສນ຺ທິຏ຺ຐິກາ ສຫຘມ຺ມິກາ ຄາຣຍ຺ຫາ ວາທານຸວາທາ ອາຄຈ຺ຉນ຺ຕິ. ສມ຺ມາທິຏ຺ຐິຎ຺ຈ ເຕ ຠວນ຺ໂຕ ຘມ຺ມໍ ຄຣຫນ຺ຕິ. ເຕນ ຫິ ເຍ ມິຈ຺ຉາທິຏ຺ຐິກາ, ເຕສໍ ຠວນ຺ຕານໍ ປຸຊ຺ຊາ ຈ ປາສໍສາ ຈ. ເອວໍ ສມ຺ມາສງ຺ກປ຺ປໍ ສມ຺ມາວາຈໍ ສມ຺ມາກມ຺ມນ຺ຕໍ ສມ຺ມາອາຊີວໍ ສມ຺ມາວາຍາມໍ ສມ຺ມາສຕິໍ ສມ຺ມາສມາຘິໍ ສມ຺ມາວິມຸຕ຺ຕິໍ ສມ຺ມາວິມຸຕ຺ຕິຎາຓທສ຺ສນຎ຺ຈ ເຕ ຠວນ຺ໂຕ ຘມ຺ມໍ ຄຣຫນ຺ຕິ. ເຕນ ຫິ ເຍ ມິຈ຺ຉາວິມຸຕ຺ຕິຎາຓທສ຺ສນາ, ເຕສໍ ຠວນ຺ຕານໍ ປຸຊ຺ຊາ ຈ ປາສໍສາ ຈ.

ເຍ ຈ ໂຂ ເກຈິ ເອວມາຫໍສຸ ‘‘ຠຸຎ຺ຊິຕພ຺ພາ ກາມາ, ປຣິຠຸຎ຺ຊິຕພ຺ພາ ກາມາ, ອາເສວິຕພ຺ພາ ກາມາ, ນິເສວິຕພ຺ພາ ກາມາ, ຠາວຍິຕພ຺ພາ ກາມາ, ພຫຸລີກາຕພ຺ພາ ກາມາ’’ຕິ. ກາເມຫິ ເວຣມຓີ ເຕສໍ ອຘມ຺ໂມ.

ເຍ ວາ ປນ ເກຈິ ເອວມາຫໍສຸ ‘‘ອຕ຺ຕກິລມຖານຸໂຍໂຄ ຘມ຺ໂມ’’ຕິ. ນິຍ຺ຍານິໂກ ເຕສໍ ຘມ຺ໂມ ອຘມ຺ໂມ. ເຍ ຈ ໂຂ ເກຈິ ເອວມາຫໍສຸ ‘‘ທຸກ຺ໂຂ ຘມ຺ໂມ’’ຕິ. ສຸໂຂ ເຕສໍ ຘມ຺ໂມ ອຘມ຺ໂມ. ຍຖາ ວາ ປນ ຠິກ຺ຂຸໂນ ສພ຺ພສງ຺ຂາເຣສຸ ອສຸຠານຸປສ຺ສິໂນ ວິຫຣໂຕ ສຸຠສຎ຺ຎາ ປຫີຍນ຺ຕິ. ທຸກ຺ຂານຸປສ຺ສິໂນ ວິຫຣໂຕ ສຸຂສຎ຺ຎາ ປຫີຍນ຺ຕິ. ອນິຈ຺ຈານຸປສ຺ສິໂນ ວິຫຣໂຕ ນິຈ຺ຈສຎ຺ຎາ ປຫີຍນ຺ຕິ. ອນຕ຺ຕານຸປສ຺ສິໂນ ວິຫຣໂຕ ອຕ຺ຕສຎ຺ຎາ ປຫີຍນ຺ຕິ. ຍໍ ຍໍ ວາ ປນ ຘມ຺ມໍ ໂຣຈຍຕິ ວາ ອຸປຄຈ຺ຉຕິ ວາ, ຕສ຺ສ ຕສ຺ສ ຘມ຺ມສ຺ສ ໂຍ ປຏິປກ຺ໂຂ, ສ຺ວສ຺ສ ອນິຏ຺ຐໂຕ ອຊ຺ຌາປນ຺ໂນ ຠວຕິ. ເຕນາຫ ອາຍສ຺ມາ ມຫາກຈ຺ຈາຍໂນ ‘‘ກຸສລາກຸສລຘມ຺ເມ’’ຕິ.

ນິຍຸຕ຺ໂຕ ປຣິວຕ຺ຕໂນ ຫາໂຣ.