໑໕. ປຣິກ຺ຂາຣຫາຣວິຠງ຺ໂຄ

໔໙. ຕຕ຺ຖ ກຕໂມ ປຣິກ຺ຂາໂຣ ຫາໂຣ? ‘‘ເຍ ຘມ຺ມາ ຍໍ ຘມ຺ມໍ ຊນຍນ຺ຕີ’’ຕິ.

ໂຍ ຘມ຺ໂມ ຍໍ ຘມ຺ມໍ ຊນຍຕິ, ຕສ຺ສ ໂສ ປຣິກ຺ຂາໂຣ. ກິໍລກ຺ຂໂຓ ປຣິກ຺ຂາໂຣ? ຊນກລກ຺ຂໂຓ ປຣິກ຺ຂາໂຣ. ທ຺ເວ ຘມ຺ມາ ຊນຍນ຺ຕິ ເຫຕຸ ຈ ປຈ຺ຈໂຍ ຈ. ຕຕ຺ຖ ກິໍລກ຺ຂໂຓ ເຫຕຸ, ກິໍລກ຺ຂໂຓ ປຈ຺ຈໂຍ? ອສາຘາຣຓລກ຺ຂໂຓ ເຫຕຸ, ສາຘາຣຓລກ຺ຂໂຓ ປຈ຺ຈໂຍ. ຍຖາ ກິໍ ຠເວ? ຍຖາ ອງ຺ກຸຣສ຺ສ ນິພ຺ພຕ຺ຕິຍາ ພີຊໍ ອສາຘາຣຓໍ, ປຖວີ ອາໂປ ຈ ສາຘາຣຓາ. ອງ຺ກຸຣສ຺ສ ຫິ ປຖວີ ອາໂປ ຈ ປຈ຺ຈໂຍ ສຠາໂວ ເຫຕຸ. ຍຖາ ວາ ປນ ຆເຏ ທຸທ຺ຘໍ ປກ຺ຂິຕ຺ຕໍ ທຘິ ຠວຕິ, ນ ຈຕ຺ຖິ ເອກກາລສມວຘານໍ ທຸທ຺ຘສ຺ສ ຈ ທຘິສ຺ສ ຈ. ເອວເມວໍ ນຕ຺ຖິ ເອກກາລສມວຘານໍ ເຫຕຸສ຺ສ ຈ ປຈ຺ຈຍສ຺ສ ຈ.

ອຍຎ຺ຫິ ສໍສາໂຣ ສເຫຕຸ ສປ຺ປຈ຺ຈໂຍ ນິພ຺ພຕ຺ໂຕ. ວຸຕ຺ຕໍ ຫິ ອວິຊ຺ຊາປຈ຺ຈຍາ ສງ຺ຂາຣາ, ສງ຺ຂາຣປຈ຺ຈຍາ ວິຎ຺ຎາຓໍ, ເອວໍ ສພ຺ໂພ ປຏິຈ຺ຈສມຸປ຺ປາໂທ. ອິຕິ ອວິຊ຺ຊາ ອວິຊ຺ຊາຍ ເຫຕຸ ອໂຍນິໂສ ມນສິກາໂຣ ປຈ຺ຈໂຍ. ປຸຣິມິກາ ອວິຊ຺ຊາ ປຈ຺ຉິມິກາຍ ອວິຊ຺ຊາຍ ເຫຕຸ. ຕຕ຺ຖ ປຸຣິມິກາ ອວິຊ຺ຊາ ອວິຊ຺ຊານຸສໂຍ ປຈ຺ຉິມິກາ ອວິຊ຺ຊາ ອວິຊ຺ຊາປຣິຍຸຏ຺ຐານໍ, ປຸຣິມິໂກ ອວິຊ຺ຊານຸສໂຍ ປຈ຺ຉິມິກສ຺ສ ອວິຊ຺ຊາປຣິຍຸຏ຺ຐານສ຺ສ ເຫຕຸຠູໂຕ ປຣິພ຺ຣູຫນາຍ, ພີຊງ຺ກຸໂຣ ວິຍ ສມນນ຺ຕຣເຫຕຸຕາຍ. ຍໍ ປນ ຍຕ຺ຖ ຜລໍ ນິພ຺ພຕ຺ຕຕິ, ອິທມສ຺ສ ປຣມ຺ປຣເຫຕຸຕາຍ ເຫຕຸຠູຕໍ. ທຸວິໂຘ ຫິ ເຫຕຸ ສມນນ຺ຕຣເຫຕຸ ປຣມ຺ປຣເຫຕຸ ຈ, ເອວໍ ອວິຊ຺ຊາຍປິ ທຸວິໂຘ ເຫຕຸ ສມນນ຺ຕຣເຫຕຸ ປຣມ຺ປຣເຫຕຸ ຈ.

ຍຖາ ວາ ປນ ຖາລກຎ຺ຈ ວຏ຺ຏິ ຈ ເຕລຎ຺ຈ ປທີປສ຺ສ ປຈ຺ຈຍຠູຕໍ ນ ສຠາວເຫຕຸ, ນ ຫິ ສກ຺ກາ ຖາລກຎ຺ຈ ວຏ຺ຏິຎ຺ຈ ເຕລຎ຺ຈ ອນຄ຺ຄິກໍ ທີເປຕຸໍ ປທີປສ຺ສ ປຈ຺ຈຍຠູຕໍ. ປທີໂປ ວິຍ ສຠາໂວ ເຫຕຸ ໂຫຕິ. ອິຕິ ສຠາໂວ ເຫຕຸ, ປຣຠາໂວ ປຈ຺ຈໂຍ. ອຊ຺ຌຕ຺ຕິໂກ ເຫຕຸ, ພາຫິໂຣ ປຈ຺ຈໂຍ. ຊນໂກ ເຫຕຸ, ປຣິຄ຺ຄາຫໂກ ປຈ຺ຈໂຍ. ອສາຘາຣໂຓ ເຫຕຸ, ສາຘາຣໂຓ ປຈ຺ຈໂຍ.

ອວຸປຈ຺ເຉທຕ຺ໂຖ ສນ຺ຕຕິ ອຕ຺ໂຖ, ນິພ຺ພຕ຺ຕິ ອຕ຺ໂຖ ຜລຕ຺ໂຖ, ປຏິສນ຺ຘິ ອຕ຺ໂຖ ປຸນພ຺ຠວຕ຺ໂຖ, ປລິໂພຘຕ຺ໂຖ ປຣິຍຸຏ຺ຐານຕ຺ໂຖ, ອສມຸຄ຺ຆາຕຕ຺ໂຖ ອນຸສຍຕ຺ໂຖ, ອສມ຺ປຏິເວຘຕ຺ໂຖ ອວິຊ຺ຊຕ຺ໂຖ, ອປຣິຎ຺ຎາຕຕ຺ໂຖ ວິຎ຺ຎາຓສ຺ສ ພີຊຕ຺ໂຖ. ຍຕ຺ຖ ອວຸປຈ຺ເຉໂທ ຕຕ຺ຖ ສນ຺ຕຕິ, ຍຕ຺ຖ ສນ຺ຕຕິ ຕຕ຺ຖ ນິພ຺ພຕ຺ຕິ, ຍຕ຺ຖ ນິພ຺ພຕ຺ຕິ ຕຕ຺ຖ ຜລໍ, ຍຕ຺ຖ ຜລໍ ຕຕ຺ຖ ປຏິສນ຺ຘິ, ຍຕ຺ຖ ປຏິສນ຺ຘິ ຕຕ຺ຖ ປຸນພ຺ຠໂວ, ຍຕ຺ຖ ປຸນພ຺ຠໂວ ຕຕ຺ຖ ປລິໂພໂຘ, ຍຕ຺ຖ ປລິໂພໂຘ ຕຕ຺ຖ ປຣິຍຸຏ຺ຐານໍ, ຍຕ຺ຖ ປຣິຍຸຏ຺ຐານໍ ຕຕ຺ຖ ອສມຸຄ຺ຆາໂຕ. ຍຕ຺ຖ ອສມຸຄ຺ຆາໂຕ ຕຕ຺ຖ ອນຸສໂຍ, ຍຕ຺ຖ ອນຸສໂຍ ຕຕ຺ຖ ອສມ຺ປຏິເວໂຘ, ຍຕ຺ຖ ອສມ຺ປຏິເວໂຘ ຕຕ຺ຖ ອວິຊ຺ຊາ, ຍຕ຺ຖ ອວິຊ຺ຊາ ຕຕ຺ຖ ສາສວໍ ວິຎ຺ຎາຓໍ ອປຣິຎ຺ຎາຕໍ, ຍຕ຺ຖ ສາສວໍ ວິຎ຺ຎາຓໍ ອປຣິຎ຺ຎາຕໍ ຕຕ຺ຖ ພີຊຕ຺ໂຖ.

ສີລກ຺ຂນ຺ໂຘ ສມາຘິກ຺ຂນ຺ຘສ຺ສ ປຈ຺ຈໂຍ, ສມາຘິກ຺ຂນ຺ໂຘ ປຎ຺ຎາກ຺ຂນ຺ຘສ຺ສ ປຈ຺ຈໂຍ, ປຎ຺ຎາກ຺ຂນ຺ໂຘ ວິມຸຕ຺ຕິກ຺ຂນ຺ຘສ຺ສ ປຈ຺ຈໂຍ, ວິມຸຕ຺ຕິກ຺ຂນ຺ໂຘ ວິມຸຕ຺ຕິຎາຓທສ຺ສນກ຺ຂນ຺ຘສ຺ສ ປຈ຺ຈໂຍ. ຕິຕ຺ຖຎ຺ຎຸຕາ ປີຕຎ຺ຎຸຕາຍ ປຈ຺ຈໂຍ, ປີຕຎ຺ຎຸຕາ ປຕ຺ຕຎ຺ຎຸຕາຍ ປຈ຺ຈໂຍ, ປຕ຺ຕຎ຺ຎຸຕາ ອຕ຺ຕຎ຺ຎຸຕາຍ ປຈ຺ຈໂຍ.

ຍຖາ ວາ ປນ ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓໍ. ຕຕ຺ຖ ຈກ຺ຂຸ ອາຘິປເຕຍ຺ຍປຈ຺ຈຍຕາຍ ປຈ຺ຈໂຍ, ຣູປາ ອາຣມ຺ມຓປຈ຺ຈຍຕາຍ ປຈ຺ຈໂຍ. ອາໂລໂກ ສນ຺ນິສ຺ສຍຕາຍ ປຈ຺ຈໂຍ, ມນສິກາໂຣ ສຠາໂວ ເຫຕຸ. ສງ຺ຂາຣາ ວິຎ຺ຎາຓສ຺ສ ປຈ຺ຈໂຍ, ສຠາໂວ ເຫຕຸ. ວິຎ຺ຎາຓໍ ນາມຣູປສ຺ສ ປຈ຺ຈໂຍ, ສຠາໂວ ເຫຕຸ. ນາມຣູປໍ ສຬາຍຕນສ຺ສ ປຈ຺ຈໂຍ, ສຠາໂວ ເຫຕຸ. ສຬາຍຕນໍ ຜສ຺ສສ຺ສ ປຈ຺ຈໂຍ, ສຠາໂວ ເຫຕຸ. ຜສ຺ໂສ ເວທນາຍ ປຈ຺ຈໂຍ, ສຠາໂວ ເຫຕຸ. ເວທນາ ຕຓ຺ຫາຍ ປຈ຺ຈໂຍ, ສຠາໂວ ເຫຕຸ. ຕຓ຺ຫາ ອຸປາທານສ຺ສ ປຈ຺ຈໂຍ, ສຠາໂວ ເຫຕຸ. ອຸປາທານໍ ຠວສ຺ສ ປຈ຺ຈໂຍ, ສຠາໂວ ເຫຕຸ. ຠໂວ ຊາຕິຍາ ປຈ຺ຈໂຍ, ສຠາໂວ ເຫຕຸ. ຊາຕິ ຊຣາມຣຓສ຺ສ ປຈ຺ຈໂຍ, ສຠາໂວ ເຫຕຸ. ຊຣາມຣຓໍ ໂສກສ຺ສ ປຈ຺ຈໂຍ, ສຠາໂວ ເຫຕຸ. ໂສໂກ ປຣິເທວສ຺ສ ປຈ຺ຈໂຍ, ສຠາໂວ ເຫຕຸ. ປຣິເທໂວ ທຸກ຺ຂສ຺ສ ປຈ຺ຈໂຍ, ສຠາໂວ ເຫຕຸ. ທຸກ຺ຂໍ ໂທມນສ຺ສສ຺ສ ປຈ຺ຈໂຍ, ສຠາໂວ ເຫຕຸ. ໂທມນສ຺ສໍ ອຸປາຍາສສ຺ສ ປຈ຺ຈໂຍ, ສຠາໂວ ເຫຕຸ. ເອວໍ ໂຍ ໂກຈິ ອຸປນິສ຺ສໂຍ ສພ຺ໂພ ໂສ ປຣິກ຺ຂາໂຣ. ເຕນາຫ ອາຍສ຺ມາ ມຫາກຈ຺ຈາຍໂນ ‘‘ເຍ ຘມ຺ມາ ຍໍ ຘມ຺ມໍ ຊນຍນ຺ຕີ’’ຕິ.

ນິຍຸຕ຺ໂຕ ປຣິກ຺ຂາໂຣ ຫາໂຣ.