໘. ເຫມກມາຓວປຸຈ຺ຉານິທ຺ເທໂສ

໕໓. ເຍ ເມ ປຸພ຺ເພ ວິຍາກໍສຸ, [ອິຈ຺ຈາຍສ຺ມາ ເຫມໂກ]

ຫຸຣໍ ໂຄຕມສາສນາ;

ອິຈ຺ຈາສິ ອິຕິ ຠວິສ຺ສຕິ, ສພ຺ພໍ ຕໍ ອິຕິຫີຕິຫໍ;

ສພ຺ພໍ ຕໍ ຕກ຺ກວຑ຺ຒນໍ, ນາຫໍ ຕຕ຺ຖ ອຠິຣມິໍ.

ເຍ ເມ ປຸພ຺ເພ ວິຍາກໍສູຕິ ໂຍ ຈ ພາວຣີ ພ຺ຣາຫ຺ມໂຓ ເຍ ຈຎ຺ເຎ ຕສ຺ສ ອາຈຣິຍາ, ເຕ ສກໍ ທິຏ຺ຐິໍ ສກໍ ຂນ຺ຕິໍ ສກໍ ຣຸຈິໍ ສກໍ ລທ຺ຘິໍ ສກໍ ອຊ຺ຌາສຍໍ ສກໍ ອຘິປ຺ປາຍໍ ພ຺ຍາກໍສຸ ອາຈິກ຺ຂິໍສຸ ເທສຍິໍສຸ ປຎ຺ຎປິໍສຸ ປຏ຺ຐປິໍສຸ ວິວຣິໍສຸ ວິຠຊິໍສຸ ອຸຕ຺ຕານີອກໍສຸ ປກາເສສຸນ຺ຕິ – ເຍ ເມ ປຸພ຺ເພ ວິຍາກໍສຸ. ອິຈ຺ຈາຍສ຺ມາ ເຫມໂກຕິ. ອິຈ຺ຈາຕິ ປທສນ຺ຘິ…ເປ… ປທານຸປຸພ຺ພຕາເປຕໍ – ອິຈ຺ຈາຕິ. ອາຍສ຺ມາຕິ ປິຍວຈນໍ…ເປ…. ເຫມໂກຕິ ຕສ຺ສ ພ຺ຣາຫ຺ມຓສ຺ສ ນາມໍ…ເປ… ອຠິລາໂປຕິ – ອິຈ຺ຈາຍສ຺ມາ ເຫມໂກ.

ຫຸຣໍ ໂຄຕມສາສນາຕິ ຫຸຣໍ ໂຄຕມສາສນາ ປຣໍ ໂຄຕມສາສນາ ປຸເຣ ໂຄຕມສາສນາ ປຐມຕຣໍ ໂຄຕມສາສນາ ພຸທ຺ຘສາສນາ ຊິນສາສນາ ຕຖາຄຕສາສນາ [ຕຖາຄຕສາສນາ ເທວສາສນາ (ກ.)] ອຣຫນ຺ຕສາສນາຕິ – ຫຸຣໍ ໂຄຕມສາສນາ.

ອິຈ຺ຈາສິ ອິຕິ ຠວິສ຺ສຕີຕິ ເອວໍ ກິຣ ອາສິ, ເອວໍ ກິຣ ຠວິສ຺ສຕີຕິ – ອິຈ຺ຈາສິ ອິຕິ ຠວິສ຺ສຕິ.

ສພ຺ພໍ ຕໍ ອິຕິຫີຕິຫນ຺ຕິ ສພ຺ພໍ ຕໍ ອິຕິຫີຕິຫໍ ອິຕິກິຣາຍ ປຣໍປຣາຍ ປິຏກສມ຺ປທາຍ ຕກ຺ກເຫຕຸ ນຍເຫຕຸ ອາກາຣປຣິວິຕກ຺ເກນ ທິຏ຺ຐິນິຊ຺ຌານກ຺ຂນ຺ຕິຍາ ນ ສາມໍ ສຍມຠິຎ຺ຎາຕໍ ນ ອຕ຺ຕປຈ຺ຈກ຺ຂຘມ຺ມໍ ກຖຍິໍສູຕິ – ສພ຺ພໍ ຕໍ ອິຕິຫີຕິຫໍ.

ສພ຺ພໍ ຕໍ ຕກ຺ກວຑ຺ຒນນ຺ຕິ ສພ຺ພໍ ຕໍ ຕກ຺ກວຑ຺ຒນໍ ວິຕກ຺ກວຑ຺ຒນໍ ສງ຺ກປ຺ປວຑ຺ຒນໍ ກາມວິຕກ຺ກວຑ຺ຒນໍ ພ຺ຍາປາທວິຕກ຺ກວຑ຺ຒນໍ ວິຫິໍສາວິຕກ຺ກວຑ຺ຒນໍ ຎາຕິວິຕກ຺ກວຑ຺ຒນໍ ຊນປທວິຕກ຺ກວຑ຺ຒນໍ ອມຣາວິຕກ຺ກວຑ຺ຒນໍ ປຣານຸທຍຕາປຏິສໍຍຸຕ຺ຕວິຕກ຺ກວຑ຺ຒນໍ ລາຠສກ຺ກາຣສິໂລກປຏິສໍຍຸຕ຺ຕວິຕກ຺ກວຑ຺ຒນໍ ອນວຎ຺ຎຕ຺ຕິປຏິສໍຍຸຕ຺ຕວິຕກ຺ກວຑ຺ຒນນ຺ຕິ – ສພ຺ພໍ ຕໍ ຕກ຺ກວຑ຺ຒນໍ.

ນາຫໍ ຕຕ຺ຖ ອຠິຣມິນ຺ຕິ ນາຫໍ ຕຕ຺ຖ ອຠິຣມິໍ ນ ວິນ຺ທິໍ ນາຘິຄຈ຺ຉິໍ ນ ປຏິລຠິນ຺ຕິ – ນາຫໍ ຕຕ຺ຖ ອຠິຣມິໍ. ເຕນາຫ ໂສ ພ຺ຣາຫ຺ມໂຓ –

‘‘ເຍ ເມ ປຸພ຺ເພ ວິຍາກໍສຸ, [ອິຈ຺ຈາຍສ຺ມາ ເຫມໂກ]

ຫຸຣໍ ໂຄຕມສາສນາ;

ອິຈ຺ຈາສິ ອິຕິ ຠວິສ຺ສຕິ, ສພ຺ພໍ ຕໍ ອິຕິຫີຕິຫໍ;

ສພ຺ພໍ ຕໍ ຕກ຺ກວຑ຺ຒນໍ, ນາຫໍ ຕຕ຺ຖ ອຠິຣມິ’’ນ຺ຕິ.

໕໔. ຕ຺ວຎ຺ຈ ເມ ຘມ຺ມມກ຺ຂາຫິ, ຕຓ຺ຫານິຄ຺ຆາຕນໍ ມຸນິ;

ຍໍ ວິທິຕ຺ວາ ສໂຕ ຈຣໍ, ຕເຣ ໂລເກ ວິສຕ຺ຕິກໍ.

ຕ຺ວຎ຺ຈ ເມ ຘມ຺ມມກ຺ຂາຫີຕິ. ຕ຺ວນ຺ຕິ ຠຄວນ຺ຕໍ ຠຓຕິ. ຘມ຺ມມກ຺ຂາຫີຕິ. ຘມ຺ມນ຺ຕິ ອາທິກລ຺ຍາຓໍ ມຊ຺ເຌກລ຺ຍາຓໍ ປຣິໂຍສານກລ຺ຍາຓໍ ສາຕ຺ຖໍ ສພ຺ຍຎ຺ຊນໍ ເກວລປຣິປຸຓ຺ຓໍ ປຣິສຸທ຺ຘໍ ພ຺ຣຫ຺ມຈຣິຍໍ, ຈຕ຺ຕາໂຣ ສຕິປຏ຺ຐາເນ ຈຕ຺ຕາໂຣ ສມ຺ມປ຺ປຘາເນ ຈຕ຺ຕາໂຣ ອິທ຺ຘິປາເທ ປຎ຺ຈິນ຺ທ຺ຣິຍານິ ປຎ຺ຈ ພລານິ ສຕ຺ຕ ໂພຊ຺ຌງ຺ເຄ ອຣິຍໍ ອຏ຺ຐງ຺ຄິກໍ ມຄ຺ຄໍ ນິພ຺ພານຎ຺ຈ ນິພ຺ພານຄາມິນິຎ຺ຈ ປຏິປທໍ ອກ຺ຂາຫິ ອາຈິກ຺ຂາຫິ ເທເສຫິ ປຎ຺ຎເປຫິ ປຏ຺ຐເປຫິ ວິວຣາຫິ ວິຠຊາຫິ ອຸຕ຺ຕານີກໂຣຫິ ປກາເສຫີຕິ – ຕ຺ວຎ຺ຈ ເມ ຘມ຺ມມກ຺ຂາຫິ.

ຕຓ຺ຫານິຄ຺ຆາຕນໍ ມຸນີຕິ. ຕຓ຺ຫາຕິ – ຣູປຕຓ຺ຫາ…ເປ… ຘມ຺ມຕຓ຺ຫາ. ຕຓ຺ຫານິຄ຺ຆາຕນໍ ຕຓ຺ຫາປຫານໍ ຕຓ຺ຫາວູປສມໍ ຕຓ຺ຫາປຏິນິສ຺ສຄ຺ຄໍ ຕຓ຺ຫາປຏິປ຺ປສ຺ສທ຺ຘິໍ ອມຕໍ ນິພ຺ພານໍ. ມຸນີຕິ ໂມນໍ ວຸຈ຺ຈຕິ ຎາຓໍ…ເປ… ສງ຺ຄຊາລມຕິຈ຺ຈ ໂສ ມຸນີຕິ – ຕຓ຺ຫານິຄ຺ຆາຕນໍ ມຸນິ.

ຍໍ ວິທິຕ຺ວາ ສໂຕ ຈຣນ຺ຕິ ຍໍ ວິທິຕໍ ກຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ. ‘‘ສພ຺ເພ ສງ຺ຂາຣາ ອນິຈ຺ຈາ’’ຕິ ວິທິຕໍ ກຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ, ‘‘ສພ຺ເພ ສງ຺ຂາຣາ ທຸກ຺ຂາ’’ຕິ…ເປ… ‘‘ສພ຺ເພ ຘມ຺ມາ ອນຕ຺ຕາ’’ຕິ…ເປ… ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ ວິທິຕໍ ກຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ. ສໂຕຕິ ຈຕູຫິ ກາຣເຓຫິ ສໂຕ – ກາເຍ ກາຍານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ…ເປ… ໂສ ວຸຈ຺ຈຕິ ສໂຕ. ຈຣນ຺ຕິ ຈຣນ຺ໂຕ ວິຫຣນ຺ໂຕ ອິຣິຍນ຺ໂຕ ວຕ຺ເຕນ຺ໂຕ ປາເລນ຺ໂຕ ຍເປນ຺ໂຕ ຍາເປນ຺ໂຕຕິ – ຍໍ ວິທິຕ຺ວາ ສໂຕ ຈຣໍ.

ຕເຣ ໂລເກ ວິສຕ຺ຕິກນ຺ຕິ ວິສຕ຺ຕິກາ ວຸຈ຺ຈຕິ ຕຓ຺ຫາ. ໂຍ ຣາໂຄ ສາຣາໂຄ…ເປ… ອຠິຊ຺ຌາ ໂລໂຠ ອກຸສລມູລໍ. ວິສຕ຺ຕິກາຕິ ເກນຏ຺ເຐນ ວິສຕ຺ຕິກາ…ເປ… ວິສຏາ ວິຕ຺ຖຕາຕິ ວິສຕ຺ຕິກາ. ໂລເກຕິ ອປາຍໂລເກ ມນຸສ຺ສໂລເກ ເທວໂລເກ ຂນ຺ຘໂລເກ ຘາຕຸໂລເກ ອາຍຕນໂລເກ. ຕເຣ ໂລເກ ວິສຕ຺ຕິກນ຺ຕິ ໂລເກ ເວສາ ວິສຕ຺ຕິກາ ໂລເກ ເວຕໍ ວິສຕ຺ຕິກໍ ສໂຕ ຕເຣຍ຺ຍໍ ອຸຕ຺ຕເຣຍ຺ຍໍ ປຕເຣຍ຺ຍໍ ສມຕິກ຺ກເມຍ຺ຍໍ ວີຕິວຕ຺ເຕຍ຺ຍນ຺ຕິ – ຕເຣ ໂລເກ ວິສຕ຺ຕິກໍ. ເຕນາຫ ໂສ ພ຺ຣາຫ຺ມໂຓ –

‘‘ຕ຺ວຎ຺ຈ ເມ ຘມ຺ມມກ຺ຂາຫິ, ຕຓ຺ຫານິຄ຺ຆາຕນໍ ມຸນິ;

ຍໍ ວິທິຕ຺ວາ ສໂຕ ຈຣໍ, ຕເຣ ໂລເກ ວິສຕ຺ຕິກ’’ນ຺ຕິ.

໕໕. ອິຘ ທິຏ຺ຐສຸຕມຸຕວິຎ຺ຎາເຕສຸ, ປິຍຣູເປສຸ ເຫມກ;

ຉນ຺ທຣາຄວິໂນທນໍ, ນິພ຺ພານປທມຈ຺ຈຸຕໍ.

ອິຘ ທິຏ຺ຐສຸຕມຸຕວິຎ຺ຎາເຕສູຕິ. ທິຏ຺ຐນ຺ຕິ ຈກ຺ຂຸນາ ທິຏ຺ຐໍ; ສຸຕນ຺ຕິ ໂສເຕນ ສຸຕໍ; ມຸຕນ຺ຕິ ຆາເນນ ຆາຍິຕໍ ຊິວ຺ຫາຍ ສາຍິຕໍ ກາເຍນ ຜຸຏ຺ຐໍ; ວິຎ຺ຎາຕນ຺ຕິ ມນສາ ວິຎ຺ຎາຕນ຺ຕິ – ອິຘ ທິຏ຺ຐສຸຕມຸຕວິຎ຺ຎາເຕສຸ.

ປິຍຣູເປສຸ ເຫມກາຕິ ກິຎ຺ຈ ໂລເກ ປິຍຣູປໍ ສາຕຣູປໍ? ຈກ຺ຂຸ [ຈກ຺ຂຸໍ (ສ຺ຍາ. ກ.)] ໂລເກ ປິຍຣູປໍ ສາຕຣູປໍ, ໂສຕໍ ໂລເກ…ເປ… ຆານໍ ໂລເກ… ຊິວ຺ຫາ ໂລເກ… ກາໂຍ ໂລເກ… ມໂນ ໂລເກ ປິຍຣູປໍ ສາຕຣູປໍ; ຣູປາ ໂລເກ ປິຍຣູປໍ ສາຕຣູປໍ, ສທ຺ທາ ໂລເກ… ຄນ຺ຘາ ໂລເກ… ຣສາ ໂລເກ… ໂຜຏ຺ຐພ຺ພາ ໂລເກ… ຘມ຺ມາ ໂລເກ ປິຍຣູປໍ ສາຕຣູປໍ; ຈກ຺ຂຸວິຎ຺ຎາຓໍ ໂລເກ ປິຍຣູປໍ ສາຕຣູປໍ, ໂສຕວິຎ຺ຎາຓໍ ໂລເກ ປິຍຣູປໍ ສາຕຣູປໍ, ຆານວິຎ຺ຎາຓໍ ໂລເກ… ຊິວ຺ຫາວິຎ຺ຎາຓໍ ໂລເກ… ກາຍວິຎ຺ຎາຓໍ ໂລເກ… ມໂນວິຎ຺ຎາຓໍ ໂລເກ ປິຍຣູປໍ ສາຕຣູປໍ, ຈກ຺ຂຸສມ຺ຜສ຺ໂສ ໂລເກ… ໂສຕສມ຺ຜສ຺ໂສ ໂລເກ… ຆານສມ຺ຜສ຺ໂສ ໂລເກ… ຊິວ຺ຫາສມ຺ຜສ຺ໂສ ໂລເກ… ກາຍສມ຺ຜສ຺ໂສ ໂລເກ… ມໂນສມ຺ຜສ຺ໂສ ໂລເກ ປິຍຣູປໍ ສາຕຣູປໍ; ຈກ຺ຂຸສມ຺ຜສ຺ສຊາ ເວທນາ ໂລເກ ປິຍຣູປໍ ສາຕຣູປໍ… ໂສຕສມ຺ຜສ຺ສຊາ ເວທນາ… ຆານສມ຺ຜສ຺ສຊາ ເວທນາ… ຊິວ຺ຫາສມ຺ຜສ຺ສຊາ ເວທນາ… ກາຍສມ຺ຜສ຺ສຊາ ເວທນາ… ມໂນສມ຺ຜສ຺ສຊາ ເວທນາ ໂລເກ ປິຍຣູປໍ ສາຕຣູປໍ; ຣູປສຎ຺ຎາ ໂລເກ… ສທ຺ທສຎ຺ຎາ ໂລເກ… ຄນ຺ຘສຎ຺ຎາ ໂລເກ… ຣສສຎ຺ຎາ ໂລເກ… ໂຜຏ຺ຐພ຺ພສຎ຺ຎາ ໂລເກ… ຘມ຺ມສຎ຺ຎາ ໂລເກ ປິຍຣູປໍ ສາຕຣູປໍ, ຣູປສຎ຺ເຈຕນາ ໂລເກ… ສທ຺ທສຎ຺ເຈຕນາ ໂລເກ… ຄນ຺ຘສຎ຺ເຈຕນາ ໂລເກ… ຣສສຎ຺ເຈຕນາ ໂລເກ… ໂຜຏ຺ຐພ຺ພສຎ຺ເຈຕນາ ໂລເກ… ຘມ຺ມສຎ຺ເຈຕນາ ໂລເກ ປິຍຣູປໍ ສາຕຣູປໍ; ຣູປຕຓ຺ຫາ ໂລເກ… ສທ຺ທຕຓ຺ຫາ ໂລເກ… ຄນ຺ຘຕຓ຺ຫາ ໂລເກ… ຣສຕຓ຺ຫາ ໂລເກ … ໂຜຏ຺ຐພ຺ພຕຓ຺ຫາ ໂລເກ… ຘມ຺ມຕຓ຺ຫາ ໂລເກ ປິຍຣູປໍ ສາຕຣູປໍ; ຣູປວິຕກ຺ໂກ ໂລເກ… ສທ຺ທວິຕກ຺ໂກ ໂລເກ… ຄນ຺ຘວິຕກ຺ໂກ ໂລເກ… ຣສວິຕກ຺ໂກ ໂລເກ… ໂຜຏ຺ຐພ຺ພວິຕກ຺ໂກ ໂລເກ… ຘມ຺ມວິຕກ຺ໂກ ໂລເກ ປິຍຣູປໍ ສາຕຣູປໍ; ຣູປວິຈາໂຣ ໂລເກ ປິຍຣູປໍ ສາຕຣູປໍ, ສທ຺ທວິຈາໂຣ ໂລເກ… ຄນ຺ຘວິຈາໂຣ ໂລເກ… ຣສວິຈາໂຣ ໂລເກ… ໂຜຏ຺ຐພ຺ພວິຈາໂຣ ໂລເກ… ຘມ຺ມວິຈາໂຣ ໂລເກ ປິຍຣູປໍ ສາຕຣູປນ຺ຕິ – ປິຍຣູເປສຸ ເຫມກ.

ຉນ຺ທຣາຄວິໂນທນນ຺ຕິ. ຉນ຺ທຣາໂຄຕິ ໂຍ ກາເມສຸ ກາມຈ຺ຉນ຺ໂທ ກາມຣາໂຄ ກາມນນ຺ທີ ກາມຕຓ຺ຫາ ກາມສິເນໂຫ ກາມປຣິຬາໂຫ ກາມມຸຈ຺ຉາ ກາມຊ຺ໂຌສານໍ ກາໂມໂຆ ກາມໂຍໂຄ ກາມຸປາທານໍ ກາມຈ຺ຉນ຺ທນີວຣຓໍ. ຉນ຺ທຣາຄວິໂນທນນ຺ຕິ ຉນ຺ທຣາຄປ຺ປຫານໍ ຉນ຺ທຣາຄວູປສມໍ ຉນ຺ທຣາຄປຏິນິສ຺ສຄ຺ຄໍ ຉນ຺ທຣາຄປຏິປ຺ປສ຺ສທ຺ຘໍ ອມຕໍ ນິພ຺ພານນ຺ຕິ – ຉນ຺ທຣາຄວິໂນທນໍ.

ນິພ຺ພານປທມຈ຺ຈຸຕນ຺ຕິ ນິພ຺ພານປທໍ ຕາຓປທໍ ເລຓປທໍ ສຣຓປທໍ ອຠຍປທໍ. ອຈ຺ຈຸຕນ຺ຕິ ນິຈ຺ຈໍ ຘຸວໍ ສສ຺ສຕໍ ອວິປຣິຓາມຘມ຺ມນ຺ຕິ – ນິພ຺ພານປທມຈ຺ຈຸຕໍ. ເຕນາຫ ຠຄວາ –

‘‘ອິຘ ທິຏ຺ຐສຸຕມຸຕວິຎ຺ຎາເຕສຸ, ປິຍຣູເປສຸ ເຫມກ;

ຉນ຺ທຣາຄວິໂນທນໍ, ນິພ຺ພານປທມຈ຺ຈຸຕ’’ນ຺ຕິ.

໕໖. ເອຕທຎ຺ຎາຍ ເຍ ສຕາ, ທິຏ຺ຐຘມ຺ມາຠິນິພ຺ພຸຕາ;

ອຸປສນ຺ຕາ ຈ ເຕ ສທາ, ຕິຓ຺ຓາ ໂລເກ ວິສຕ຺ຕິກໍ.

ເອຕທຎ຺ຎາຍ ເຍ ສຕາຕິ. ເອຕນ຺ຕິ ອມຕໍ ນິພ຺ພານໍ. ໂຍ ໂສ ສພ຺ພສງ຺ຂາຣສມໂຖ ສພ຺ພູປຘິປຏິນິສ຺ສຄ຺ໂຄ ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ອຎ຺ຎາຍາຕິ ອຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ. ‘‘ສພ຺ເພ ສງ຺ຂາຣາ ອນິຈ຺ຈາ’’ຕິ ອຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ. ‘‘ສພ຺ເພ ສງ຺ຂາຣາ ທຸກ຺ຂາ’’ຕິ… ‘‘ສພ຺ເພ ຘມ຺ມາ ອນຕ຺ຕາ’’ຕິ…ເປ… ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ ອຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ. ເຍຕິ ອຣຫນ຺ໂຕ ຂີຓາສວາ. ສຕາຕິ ຈຕູຫິ ກາຣເຓຫິ ສຕາ – ກາເຍ ກາຍານຸປສ຺ສນາສຕິປຏ຺ຐານໍ ຠາວິຕຕ຺ຕາ ສຕາ…ເປ… ເຕ ວຸຈ຺ຈນ຺ຕິ ສຕາຕິ – ເອຕທຎ຺ຎາຍ ເຍ ສຕາ.

ທິຏ຺ຐຘມ຺ມາຠິນິພ຺ພຸຕາຕິ. ທິຏ຺ຐຘມ຺ມາຕິ ທິຏ຺ຐຘມ຺ມາ ຎາຕຘມ຺ມາ ຕຸລິຕຘມ຺ມາ ຕີຣິຕຘມ຺ມາ ວິຠູຕຘມ຺ມາ ວິຠາວິຕຘມ຺ມາ. ‘‘ສພ຺ເພ ສງ຺ຂາຣາ ອນິຈ຺ຈາ’’ຕິ ທິຏ຺ຐຘມ຺ມາ…ເປ… ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ ທິຏ຺ຐຘມ຺ມາ ຎາຕຘມ຺ມາ ຕຸລິຕຘມ຺ມາ ຕີຣິຕຘມ຺ມາ ວິຠູຕຘມ຺ມາ ວິຠາວິຕຘມ຺ມາ. ອຠິນິພ຺ພຸຕາຕິ ຣາຄສ຺ສ ນິພ຺ພາປິຕຕ຺ຕາ ນິພ຺ພຸຕາ, ໂທສສ຺ສ ນິພ຺ພາປິຕຕ຺ຕາ ນິພ຺ພຸຕາ, ໂມຫສ຺ສ ນິພ຺ພາປິຕຕ຺ຕາ ນິພ຺ພຸຕາ, ໂກຘສ຺ສ…ເປ… ອຸປນາຫສ຺ສ… ສພ຺ພາກຸສລາຠິສງ຺ຂາຣານໍ ສນ຺ຕຕ຺ຕາ ສມິຕຕ຺ຕາ ວູປສມິຕຕ຺ຕາ ນິຊ຺ຌາຕຕ຺ຕາ ນິພ຺ພຸຕຕ຺ຕາ ວິຄຕຕ຺ຕາ ປຏິປ຺ປສທ຺ຘຕ຺ຕາ ສນ຺ຕາ ອຸປສນ຺ຕາ ວູປສນ຺ຕາ ນິພ຺ພຸຕາ ປຏິປ຺ປສ຺ສທ຺ຘາຕິ – ທິຏ຺ຐຘມ຺ມາຠິນິພ຺ພຸຕາ.

ອຸປສນ຺ຕາ ຈ ເຕ ສທາຕິ. ອຸປສນ຺ຕາຕິ ຣາຄສ຺ສ ອຸປສມິຕຕ຺ຕາ ນິພ຺ພາປິຕຕ຺ຕາ ອຸປສນ຺ຕາ…ເປ… ໂທສສ຺ສ… ໂມຫສ຺ສ… ໂກຘສ຺ສ… ອຸປນາຫສ຺ສ…ເປ… ສພ຺ພາກຸສລາຠິສງ຺ຂາຣານໍ ສນ຺ຕຕ຺ຕາ ສມິຕຕ຺ຕາ ວູປສມິຕຕ຺ຕາ ນິຊ຺ຌາຕຕ຺ຕາ ນິພ຺ພຸຕຕ຺ຕາ ວິຄຕຕ຺ຕາ ປຏິປ຺ປສທ຺ຘຕ຺ຕາ ສນ຺ຕາ ອຸປສນ຺ຕາ ວູປສນ຺ຕາ ນິພ຺ພຸຕາ ປຏິປ຺ປສ຺ສທ຺ຘາຕິ ອຸປສນ຺ຕາ. ເຕຕິ ອຣຫນ຺ໂຕ ຂີຓາສວາ. ສທາຕິ ສທາ ສພ຺ພກາລໍ ນິຈ຺ຈກາລໍ ຘຸວກາລໍ ສຕຕໍ ສມິຕໍ ອພ຺ໂພກິຓ຺ຓໍ ໂປງ຺ຂານຸໂປງ຺ຂໍ ອຸທກູມິກຊາຕໍ ອວີຈິສນ຺ຕຕິສຫິຕໍ ຜສ຺ສິຕໍ ປຸເຣຠຕ຺ຕໍ ປຈ຺ຉາຠຕ຺ຕໍ ປຸຣິມຍາມໍ ມຊ຺ຌິມຍາມໍ ປຈ຺ຉິມຍາມໍ ກາເຬ ຊຸຓ຺ເຫ ວສ຺ເສ ເຫມນ຺ເຕ ຄິມ຺ເຫ ປຸຣິເມ ວໂຍຂນ຺ເຘ ມຊ຺ຌິເມ ວໂຍຂນ຺ເຘ ປຈ຺ຉິເມ ວໂຍຂນ຺ເຘຕິ – ອຸປສນ຺ຕາ ຈ ເຕ ສທາ.

ຕິຓ຺ຓາ ໂລເກ ວິສຕ຺ຕິກນ຺ຕິ ວິສຕ຺ຕິກາ ວຸຈ຺ຈຕິ ຕຓ຺ຫາ. ໂຍ ຣາໂຄ ສາຣາໂຄ…ເປ… ອຠິຊ຺ຌາ ໂລໂຠ ອກຸສລມູລໍ. ວິສຕ຺ຕິກາຕິ ເກນຏ຺ເຐນ ວິສຕ຺ຕິກາ…ເປ… ວິສຏາ ວິຕ຺ຖຕາຕິ ວິສຕ຺ຕິກາ. ໂລເກຕິ ອປາຍໂລເກ…ເປ… ອາຍຕນໂລເກ. ຕິຓ຺ຓາ ໂລເກ ວິສຕ຺ຕິກນ຺ຕິ ໂລເກ ເວສາ ວິສຕ຺ຕິກາ ໂລເກ ເວຕໍ ວິສຕ຺ຕິກໍ ຕິຓ຺ຓາ ອຸຕ຺ຕິຓ຺ຓາ ນິຕ຺ຖິຓ຺ຓາ ອຕິກ຺ກນ຺ຕາ ສມຕິກ຺ກນ຺ຕາ ວີຕິວຕ຺ຕາຕິ – ຕິຓ຺ຓາ ໂລເກ ວິສຕ຺ຕິກໍ. ເຕນາຫ ຠຄວາ –

‘‘ເອຕທຎ຺ຎາຍ ເຍ ສຕາ, ທິຏ຺ຐຘມ຺ມາຠິນິພ຺ພຸຕາ;

ອຸປສນ຺ຕາ ຈ ເຕ ສທາ, ຕິຓ຺ຓາ ໂລເກ ວິສຕ຺ຕິກ’’ນ຺ຕິ.

ສຫ ຄາຖາປຣິໂຍສານາ…ເປ… ສຕ຺ຖາ ເມ ຠນ຺ເຕ ຠຄວາ, ສາວໂກຫມສ຺ມີຕິ.

ເຫມກມາຓວປຸຈ຺ຉານິທ຺ເທໂສ ອຏ຺ຐໂມ.