ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ຂຸທ຺ທກນິກາເຍ

ຈູຬນິທ຺ເທສປາຬິ

ປາຣາຍນວຄ຺ໂຄ

ວຕ຺ຖຸຄາຖາ

໑. ໂກສລານໍ ປຸຣາ ຣມ຺ມາ, ອຄມາ ທກ຺ຂິຓາປຖໍ;

ອາກິຎ຺ຈຎ຺ຎໍ ປຕ຺ຖຍາໂນ, ພ຺ຣາຫ຺ມໂຓ ມນ຺ຕປາຣຄູ.

໒. ໂສ ອສ຺ສກສ຺ສ ວິສເຍ, ມຬກສ຺ສ [ອຬກສ຺ສ (ສຸ. ນິ. ໙໘໓) ມຸຬກສ຺ສ (ສ຺ຍາ.), ມູຬ຺ຫກສ຺ສ (ກ.)] ສມາສເນ [ສມາສນ຺ເນ (ກ.)];

ວສິ ໂຄຘາວຣີກູເລ, ອຸຎ຺ເຉນ ຈ ຜເລນ ຈ.

໓. ຕສ຺ເສວ [ຕໍເຍວ (ກ.) ອຏ຺ຐກຖາ ໂອໂລເກຕພ຺ພາ] ອຸປນິສ຺ສາຍ, ຄາໂມ ຈ ວິປຸໂລ ອຫຸ;

ຕໂຕ ຊາເຕນ ອາເຍນ, ມຫາຍຎ຺ຎມກປ຺ປຍິ.

໔. ມຫາຍຎ຺ຎໍ ຍຊິຕ຺ວານ, ປຸນ ປາວິສິ ອສ຺ສມໍ;

ຕສ຺ມິໍ ປຏິປວິຏ຺ຐມ຺ຫິ, ອຎ຺ໂຎ ອາຄຎ຺ຉິ ພ຺ຣາຫ຺ມໂຓ.

໕. ອຸຄ຺ຆຏ຺ຏປາໂທ ຕສິໂຕ [ຕສ຺ສິໂຕ (ກ.)], ປງ຺ກທນ຺ໂຕ ຣຊສ຺ສິໂຣ;

ໂສ ຈ ນໍ ອຸປສງ຺ກມ຺ມ, ສຕານິ ປຎ຺ຈ ຍາຈຕິ.

໖. ຕເມນໍ ພາວຣີ ທິສ຺ວາ, ອາສເນນ ນິມນ຺ຕຍິ;

ສຸຂຎ຺ຈ ກຸສລໍ ປຸຈ຺ຉິ, ອິທໍ ວຈນມພ຺ຣວິ [ວຈນມພ຺ຣຸວິ (ສີ.)].

໗. ‘‘ຍໍ ໂຂ ມມ ເທຍ຺ຍຘມ຺ມໍ, ສພ຺ພໍ ວິສຊ຺ຊິຕໍ ມຍາ;

ອນຸຊານາຫິ ເມ ພ຺ຣຫ຺ເມ, ນຕ຺ຖິ ປຎ຺ຈສຕານິ ເມ’’.

໘. ‘‘ສເຈ ເມ ຍາຈມານສ຺ສ, ຠວໍ ນານຸປທສ຺ສຕິ [ປເທສ຺ສຕິ (ກ.)];

ສຕ຺ຕເມ ທິວເສ ຕຸຍ຺ຫໍ, ມຸທ຺ຘາ ຜລຕຸ ສຕ຺ຕຘາ’’.

໙. ອຠິສງ຺ຂຣິຕ຺ວາ ກຸຫໂກ, ເຠຣວໍ ໂສ ອກິຕ຺ຕຍິ;

ຕສ຺ສ ຕໍ ວຈນໍ ສຸຕ຺ວາ, ພາວຣີ ທຸກ຺ຂິໂຕ ອຫຸ.

໑໐. ອຸສ຺ສຸສ຺ສຕິ ອນາຫາໂຣ, ໂສກສລ຺ລສມປ຺ປິໂຕ;

ອໂຖປິ ເອວໍ ຈິຕ຺ຕສ຺ສ, ຌາເນ ນ ຣມຕີ ມໂນ.

໑໑. ອຸຕ຺ຣສ຺ຕໍ ທຸກ຺ຂິຕໍ ທິສ຺ວາ, ເທວຕາ ອຕ຺ຖກາມິນີ;

ພາວຣິໍ ອຸປສງ຺ກມ຺ມ, ອິທໍ ວຈນມພ຺ຣວິ.

໑໒. ‘‘ນ ໂສ ມຸທ຺ຘໍ ປຊານາຕິ, ກຸຫໂກ ໂສ ຘນຕ຺ຖິໂກ;

ມຸທ຺ຘນິ ມຸທ຺ຘປາເຕ [ມຸທ຺ຘນິມ຺ມຸທ຺ຘປາເຕ (ກ.)] ວາ, ຎາຓໍ ຕສ຺ສ ນ ວິຊ຺ຊຕິ’’.

໑໓. ‘‘ໂຠຕີ [ໂຠຕິ (ກ.)] ຈຣຫິ ຊານາຕິ, ຕໍ ເມ ອກ຺ຂາຫິ ປຸຈ຺ຉິຕາ;

ມຸທ຺ຘໍ ມຸທ຺ຘາຘິປາຕຎ຺ຈ [ມຸທ຺ຘາຕິປາຕຎ຺ຈ (ກ.)], ຕໍ ສຸໂຓມ ວໂຈ ຕວ’’.

໑໔. ‘‘ອຫມ຺ເປຕໍ ນ ຊານາມິ, ຎາຓໍ ເມຕ຺ຖ ນ ວິຊ຺ຊຕິ;

ມຸທ຺ຘນິ ມຸທ຺ຘາຘິປາເຕ ຈ, ຊິນານຎ຺ເຫຕ຺ຖ [ຊນານຎ຺ເຫຕ຺ຖ (ກ.)] ທສ຺ສນໍ’’.

໑໕. ‘‘ອຖ ໂກ ຈຣຫິ [ໂຍ ຈຣຕິ (ກ.)] ຊານາຕິ, ອສ຺ມິໍ ປຖວິມຓ຺ຑເລ [ປຸຖວິມຓ຺ຑເລ (ສີ.)];

ມຸທ຺ຘໍ ມຸທ຺ຘາຘິປາຕຎ຺ຈ, ຕໍ ເມ ອກ຺ຂາຫິ ເທວເຕ’’.

໑໖. ‘‘ປຸຣາ ກປິລວຕ຺ຖຸມ຺ຫາ, ນິກ຺ຂນ຺ໂຕ ໂລກນາຍໂກ;

ອປຈ຺ໂຈ ໂອກ຺ກາກຣາຊສ຺ສ, ສກ຺ຍປຸຕ຺ໂຕ ປຠງ຺ກໂຣ.

໑໗. ‘‘ໂສ ຫິ ພ຺ຣາຫ຺ມຓ ສມ຺ພຸທ຺ໂຘ, ສພ຺ພຘມ຺ມານ ປາຣຄູ;

ສພ຺ພາຠິຎ຺ຎາພລປ຺ປຕ຺ໂຕ [ຜລປ຺ປຕ຺ໂຕ (ກ.)], ສພ຺ພຘມ຺ເມສຸ ຈກ຺ຂຸມາ;

ສພ຺ພກມ຺ມກ຺ຂຍໍ ປຕ຺ໂຕ, ວິມຸຕ຺ໂຕ ອຸປຘິກ຺ຂເຍ.

໑໘. ‘‘ພຸທ຺ໂຘ ໂສ ຠຄວາ ໂລເກ, ຘມ຺ມໍ ເທເສຕິ ຈກ຺ຂຸມາ;

ຕໍ ຕ຺ວໍ ຄນ຺ຕ຺ວານ ປຸຈ຺ຉສ຺ສຸ, ໂສ ເຕ ຕໍ ພ຺ຍາກຣິສ຺ສຕິ’’.

໑໙. ສມ຺ພຸທ຺ໂຘຕິ ວໂຈ ສຸຕ຺ວາ, ອຸທຄ຺ໂຄ ພາວຣີ ອຫຸ;

ໂສກສ຺ສ ຕນຸໂກ ອາສິ, ປີຕິຎ຺ຈ ວິປຸລໍ ລຠິ.

໒໐. ໂສ ພາວຣີ ອຕ຺ຕມໂນ ອຸທຄ຺ໂຄ, ຕໍ ເທວຕໍ ປຸຈ຺ຉຕິ ເວທຊາໂຕ;

‘‘ກຕມມ຺ຫິ ຄາເມ ນິຄມມ຺ຫິ ວາ ປນ, ກຕມມ຺ຫິ ວາ ຊນປເທ ໂລກນາໂຖ;

ຍຕ຺ຖ ຄນ຺ຕ຺ວານ ປສ຺ເສມຸ, ສມ຺ພຸທ຺ຘໍ ທ຺ວິປທຸຕ຺ຕມໍ’’.

໒໑. ‘‘ສາວຕ຺ຖິຍໍ ໂກສລມນ຺ທິເຣ ຊິໂນ, ປຫູຕປຎ຺ໂຎ ວຣຠູຣິເມຘໂສ;

ໂສ ສກ຺ຍປຸຕ຺ໂຕ ວິຘຸໂຣ ອນາສໂວ, ມຸທ຺ຘາຘິປາຕສ຺ສ ວິທູ ນຣາສໂຠ’’.

໒໒. ຕໂຕ ອາມນ຺ຕຍີ ສິສ຺ເສ, ພ຺ຣາຫ຺ມເຓ ມນ຺ຕປາຣຄູ [ປາຣເຄ (ສ຺ຍາ.)];

‘‘ເອຖ ມາຓວາ ອກ຺ຂິສ຺ສໍ, ສຸຓາຖ ວຈນໍ ມມ.

໒໓. ‘‘ຍສ຺ເສໂສ ທຸລ຺ລໂຠ ໂລເກ, ປາຕຸຠາໂວ ອຠິຓ຺ຫໂສ;

ສ຺ວາຊ຺ຊ ໂລກມ຺ຫິ ອຸປ຺ປນ຺ໂນ, ສມ຺ພຸທ຺ໂຘ ອິຕິ ວິສ຺ສຸໂຕ;

ຂິປ຺ປໍ ຄນ຺ຕ຺ວານ ສາວຕ຺ຖິໍ, ປສ຺ສວ຺ໂຫ ທ຺ວິປທຸຕ຺ຕມໍ’’.

໒໔. ‘‘ກຖໍ ຈຣຫິ ຊາເນມຸ, ທິສ຺ວາ ພຸທ຺ໂຘຕິ ພ຺ຣາຫ຺ມຓ;

ອຊານຕໍ ໂນ ປພ຺ຣູຫິ, ຍຖາ ຊາເນມຸ ຕໍ ມຍໍ’’.

໒໕. ‘‘ອາຄຕານິ ຫິ ມນ຺ເຕສຸ, ມຫາປຸຣິສລກ຺ຂຓາ;

ທ຺ວຕ຺ຕິໍສານິ ຈ ພ຺ຍາກ຺ຂາຕາ, ສມຕ຺ຕາ ອນຸປຸພ຺ພໂສ.

໒໖. ‘‘ຍສ຺ເສເຕ ໂຫນ຺ຕິ ຄຕ຺ເຕສຸ, ມຫາປຸຣິສລກ຺ຂຓາ;

ທ຺ເວເຍວ ຕສ຺ສ ຄຕິໂຍ, ຕຕິຍາ ຫິ ນ ວິຊ຺ຊຕິ.

໒໗. ‘‘ສເຈ ອຄາຣໍ ອາວສຕິ, ວິເຊຍ຺ຍ ປຖວິໍ ອິມໍ;

ອທຓ຺ເຑນ ອສຕ຺ເຖນ, ຘມ຺ເມນ ອນຸສາສຕິ.

໒໘. ‘‘ສເຈ ຈ ໂສ ປພ຺ພຊຕິ, ອຄາຣາ ອນຄາຣິຍໍ;

ວິວຏ຺ຏຈ຺ຉໂທ [ວິວຕ຺ຕຈ຺ຉທ຺ໂທ (ສີ.)] ສມ຺ພຸທ຺ໂຘ, ອຣຫາ ຠວຕິ ອນຸຕ຺ຕໂຣ.

໒໙. ‘‘ຊາຕິໍ ໂຄຕ຺ຕຎ຺ຈ ລກ຺ຂຓໍ, ມນ຺ເຕ ສິສ຺ເສ ປຸນາປເຣ;

ມຸທ຺ຘໍ ມຸທ຺ຘາຘິປາຕຎ຺ຈ, ມນສາເຍວ ປຸຈ຺ຉຖ.

໓໐. ‘‘ອນາວຣຓທສ຺ສາວີ, ຍທິ ພຸທ຺ໂຘ ຠວິສ຺ສຕິ;

ມນສາ ປຸຈ຺ຉິເຕ ປຎ຺ເຫ, ວາຈາຍ ວິສຊ຺ຊິສ຺ສຕິ’’ [ວິສ຺ສຊິສ຺ສຕິ (ກ.)].

໓໑. ພາວຣິສ຺ສ ວໂຈ ສຸຕ຺ວາ, ສິສ຺ສາ ໂສຬສ ພ຺ຣາຫ຺ມຓາ;

ອຊິໂຕ ຕິສ຺ສເມຕ຺ເຕຍ຺ໂຍ, ປຸຓ຺ຓໂກ ອຖ ເມຕ຺ຕຄູ.

໓໒. ໂຘຕໂກ ອຸປສີໂວ ຈ, ນນ຺ໂທ ຈ ອຖ ເຫມໂກ;

ໂຕເທຍ຺ຍ-ກປ຺ປາ ທຸຠໂຍ, ຊຕຸກຓ຺ຓີ ຈ ປຓ຺ຑິໂຕ.

໓໓. ຠທ຺ຣາວຸໂຘ ອຸທໂຍ ຈ, ໂປສາໂລ ຈາປິ ພ຺ຣາຫ຺ມໂຓ;

ໂມຆຣາຊາ ຈ ເມຘາວີ, ປິງ຺ຄິໂຍ ຈ ມຫາອິສິ.

໓໔. ປຈ຺ເຈກຄຓິໂນ ສພ຺ເພ, ສພ຺ພໂລກສ຺ສ ວິສ຺ສຸຕາ;

ຌາຍີ ຌານຣຕາ ຘີຣາ, ປຸພ຺ພວາສນວາສິຕາ.

໓໕. ພາວຣິໍ ອຠິວາເທຕ຺ວາ, ກຕ຺ວາ ຈ ນໍ ປທກ຺ຂິຓໍ;

ຊຏາຊິນຘຣາ ສພ຺ເພ, ປກ຺ກາມຸໍ ອຸຕ຺ຕຣາມຸຂາ.

໓໖. ມຬກສ຺ສ ປຕິຏ຺ຐານໍ, ປຸຣມາຫິສ຺ສຕິໍ [ປຸຣມາຫິຍຕິ (ກ.)] ຕທາ [ສທາ (ກ.)];

ອຸຊ຺ເຊນິຎ຺ຈາປິ ໂຄນທ຺ຘໍ, ເວທິສໍ ວນສວ຺ຫຍໍ.

໓໗. ໂກສມ຺ພິຎ຺ຈາປິ ສາເກຕໍ, ສາວຕ຺ຖິຎ຺ຈ ປຸຣຸຕ຺ຕມໍ;

ເສຕພ຺ຍໍ ກປິລວຕ຺ຖຸໍ, ກຸສິນາຣຎ຺ຈ ມນ຺ທິຣໍ.

໓໘. ປາວຎ຺ຈ ໂຠຄນຄຣໍ, ເວສາລິໍ ມາຄຘໍ ປຸຣໍ;

ປາສາຓກໍ ເຈຕິຍຎ຺ຈ, ຣມຓີຍໍ ມໂນຣມໍ.

໓໙. ຕສິໂຕວຸທກໍ ສີຕໍ, ມຫາລາຠໍວ ວາຓິໂຊ;

ຉາຍໍ ຆມ຺ມາຠິຕຕ຺ໂຕວ ຕຸຣິຕາ ປພ຺ພຕມາຣຸຫຸໍ.

໔໐. ຠຄວາ ຕມ຺ຫິ ສມເຍ, ຠິກ຺ຂຸສງ຺ຆປຸຣກ຺ຂໂຕ;

ຠິກ຺ຂູນໍ ຘມ຺ມໍ ເທເສຕິ, ສີໂຫວ ນທຕີ ວເນ.

໔໑. ອຊິໂຕ ອທ຺ທສ ພຸທ຺ຘໍ, ປີຕຣໍສິໍວ [ຊິຕຣໍສິໍ ສີຕຣໍສິໍ (ກ.), ວີຕຣໍສິໍ (ສີ. ສ຺ຍາ.)] ຠາຓຸມໍ;

ຈນ຺ທໍ ຍຖາ ປນ຺ນຣເສ, ປຣິປູຣໍ [ປາຣິປູຣິໍ (ສີ. ສ຺ຍາ.)] ອຸປາຄຕໍ.

໔໒. ອຖສ຺ສ ຄຕ຺ເຕ ທິສ຺ວານ, ປຣິປູຣຎ຺ຈ ພ຺ຍຎ຺ຊນໍ;

ເອກມນ຺ຕໍ ຐິໂຕ ຫຏ຺ໂຐ, ມໂນປຎ຺ເຫ ອປຸຈ຺ຉຖ.

໔໓. ‘‘ອາທິສ຺ສ ຊມ຺ມນໍ ພ຺ຣູຫິ, ໂຄຕ຺ຕໍ ພ຺ຣູຫິ ສລກ຺ຂຓໍ;

ມນ຺ເຕສຸ ປາຣມິໍ ພ຺ຣູຫິ, ກຕິ ວາເຈຕິ ພ຺ຣາຫ຺ມໂຓ’’.

໔໔. ‘‘ວີສໍ ວສ຺ສສຕໍ ອາຍຸ, ໂສ ຈ ໂຄຕ຺ເຕນ ພາວຣີ;

ຕີຓິສ຺ສ ລກ຺ຂຓາ ຄຕ຺ເຕ, ຕິຓ຺ຓໍ ເວທານ ປາຣຄູ.

໔໕. ‘‘ລກ຺ຂເຓ ອິຕິຫາເສ ຈ, ສນິຆຓ຺ຑຸສເກຏຸເຠ;

ປຎ຺ຈສຕານິ ວາເຈຕິ, ສຘມ຺ເມ ປາຣມິໍ ຄໂຕ’’.

໔໖. ‘‘ລກ຺ຂຓານໍ ປວິຈຍໍ, ພາວຣິສ຺ສ ນຣຸຕ຺ຕມ;

ຕຓ຺ຫຈ຺ຉິທ [ກງ຺ຂຈ຺ຉິທ (ກ.)] ປກາເສຫິ, ມາ ໂນ ກງ຺ຂາຍິຕໍ ອຫຸ’’.

໔໗. ‘‘ມຸຂໍ ຊິວ຺ຫາຍ ຉາເທຕິ, ອຸຓ຺ຓສ຺ສ ຠມຸກນ຺ຕເຣ;

ໂກໂສຫິຕໍ ວຕ຺ຖຄຸຍ຺ຫໍ, ເອວໍ ຊານາຫິ ມາຓວ’’.

໔໘. ປຸຈ຺ຉຎ຺ຫິ ກິຎ຺ຈິ ອສຸຓນ຺ໂຕ, ສຸຕ຺ວາ ປຎ຺ເຫ ວິຍາກເຕ;

ວິຈິນ຺ເຕຕິ ຊໂນ ສພ຺ໂພ, ເວທຊາໂຕ ກຕຎ຺ຊລີ.

໔໙. ‘‘ໂກ ນຸ ເທໂວ ວາ ພ຺ຣຫ຺ມາ ວາ, ອິນ຺ໂທ ວາປິ ສຸຊມ຺ປຕິ;

ມນສາ ປຸຈ຺ຉິເຕ ປຎ຺ເຫ, ກເມຕໍ ປຏິຠາສຕິ.

໕໐. ‘‘ມຸທ຺ຘໍ ມຸທ຺ຘາຘິປາຕຎ຺ຈ, ພາວຣີ ປຣິປຸຈ຺ຉຕິ;

ຕໍ ພ຺ຍາກໂຣຫິ ຠຄວາ, ກງ຺ຂໍ ວິນຍ ໂນ ອິເສ’’.

໕໑. ‘‘ອວິຊ຺ຊາ ມຸທ຺ຘາຕິ ຊານາຫິ, ວິຊ຺ຊາ ມຸທ຺ຘາຘິປາຕິນີ;

ສທ຺ຘາສຕິສມາຘີຫິ, ຉນ຺ທວີຣິເຍນ ສໍຍຸຕາ’’.

໕໒. ຕໂຕ ເວເທນ ມຫຕາ, ສນ຺ຖມ຺ເຠຕ຺ວານ ມາຓໂວ;

ເອກໍສໍ ອຊິນໍ ກຕ຺ວາ, ປາເທສຸ ສິຣສາ ປຕິ.

໕໓. ‘‘ພາວຣີ ພ຺ຣາຫ຺ມໂຓ ໂຠໂຕ, ສຫ ສິສ຺ເສຫິ ມາຣິສ;

ອຸທຄ຺ຄຈິຕ຺ໂຕ ສຸມໂນ, ປາເທ ວນ຺ທຕິ ຈກ຺ຂຸມ’’.

໕໔. ‘‘ສຸຂິໂຕ ພາວຣີ ໂຫຕຸ, ສຫ ສິສ຺ເສຫິ ພ຺ຣາຫ຺ມໂຓ;

ຕ຺ວຎ຺ຈາປິ ສຸຂິໂຕ ໂຫຫິ, ຈິຣໍ ຊີວາຫິ ມາຓວ.

໕໕. ‘‘ພາວຣິສ຺ສ ຈ ຕຸຍ຺ຫໍ ວາ, ສພ຺ເພສໍ ສພ຺ພສໍສຍໍ;

ກຕາວກາສາ ປຸຈ຺ຉວ຺ໂຫ, ຍໍ ກິຎ຺ຈິ ມນສິຈ຺ຉຖ’’.

໕໖. ສມ຺ພຸທ຺ເຘນ ກໂຕກາໂສ, ນິສີທິຕ຺ວານ ປຎ຺ຊລີ;

ອຊິໂຕ ປຐມໍ ປຎ຺ຫໍ, ຕຕ຺ຖ ປຸຈ຺ຉິ ຕຖາຄຕໍ.

ວຕ຺ຖຸຄາຖາ ນິຏ຺ຐິຕາ.

໑. ອຊິຕມາຓວປຸຈ຺ຉາ

໕໗. ‘‘ເກນສ຺ສຸ ນິວຸໂຕ ໂລໂກ, [ອິຈ຺ຈາຍສ຺ມາ ອຊິໂຕ]

ເກນສ຺ສຸ ນປ຺ປກາສຕິ;

ກິສ຺ສາຠິເລປນໍ ພ຺ຣູສິ, ກິໍສຸ ຕສ຺ສ ມຫພ຺ຠຍໍ’’.

໕໘. ‘‘ອວິຊ຺ຊາຍ ນິວຸໂຕ ໂລໂກ, [ອຊິຕາຕິ ຠຄວາ]

ເວວິຈ຺ຉາ ປມາທາ ນປ຺ປກາສຕິ;

ຊປ຺ປາຠິເລປນໍ ພ຺ຣູມິ, ທຸກ຺ຂມສ຺ສ ມຫພ຺ຠຍໍ’’.

໕໙. ‘‘ສວນ຺ຕິ ສພ຺ພຘິ ໂສຕາ, [ອິຈ຺ຈາຍສ຺ມາ ອຊິໂຕ]

ໂສຕານໍ ກິໍ ນິວາຣຓໍ;

ໂສຕານໍ ສໍວຣໍ ພ຺ຣູຫິ, ເກນ ໂສຕາ ປິຘິຍ຺ຍເຣ’’.

໖໐. ‘‘ຍານິ ໂສຕານິ ໂລກສ຺ມິໍ, [ອຊິຕາຕິ ຠຄວາ]

ສຕິ ເຕສໍ ນິວາຣຓໍ;

ໂສຕານໍ ສໍວຣໍ ພ຺ຣູມິ, ປຎ຺ຎາເຍເຕ ປິຘິຍ຺ຍເຣ’’.

໖໑. ‘‘ປຎ຺ຎາ ເຈວ ສຕິ ຈາປິ [ສຕີ ເຈວ (ສີ.)], [ອິຈ຺ຈາຍສ຺ມາ ອຊິໂຕ]

ນາມຣູປຎ຺ຈ ມາຣິສ;

ເອຕໍ ເມ ປຸຏ຺ໂຐ ປພ຺ຣູຫິ, ກຕ຺ເຖຕໍ ອຸປຣຸຊ຺ຌຕິ’’.

໖໒. ‘‘ຍເມຕໍ ປຎ຺ຫໍ ອປຸຈ຺ຉິ, ອຊິຕ ຕໍ ວທາມິ ເຕ;

ຍຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕິ;

ວິຎ຺ຎາຓສ຺ສ ນິໂຣເຘນ, ເອຕ຺ເຖຕໍ ອຸປຣຸຊ຺ຌຕິ’’.

໖໓. ‘‘ເຍ ຈ ສງ຺ຂາຕຘມ຺ມາເສ, ເຍ ຈ ເສຂາ [ເສກ຺ຂາ (ກ.)] ປຸຖູ ອິຘ;

ເຕສໍ ເມ ນິປໂກ ອິຣິຍໍ, ປຸຏ຺ໂຐ ປພ຺ຣູຫິ ມາຣິສ’’.

໖໔. ‘‘ກາເມສຸ ນາຠິຄິຊ຺ເຌຍ຺ຍ, ມນສານາວິໂລ ສິຍາ;

ກຸສໂລ ສພ຺ພຘມ຺ມານໍ, ສໂຕ ຠິກ຺ຂຸ ປຣິພ຺ພເຊ’’ຕິ.

ອຊິຕມາຓວປຸຈ຺ຉາ ປຐມາ.

໒. ຕິສ຺ສເມຕ຺ເຕຍ຺ຍມາຓວປຸຈ຺ຉາ

໖໕. ‘‘ໂກຘ ສນ຺ຕຸສິໂຕ ໂລເກ, [ອິຈ຺ຈາຍສ຺ມາ ຕິສ຺ສເມຕ຺ເຕຍ຺ໂຍ]

ກສ຺ສ ໂນ ສນ຺ຕິ ອິຎ຺ຊິຕາ;

ໂກ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕິ [ນ ປິມ຺ປຕິ (ພຫູສຸ)];

ກໍ ພ຺ຣູສິ ມຫາປຸຣິໂສຕິ, ໂກ ອິຘ ສິພ຺ພິນິມຈ຺ຈຄາ’’ຕິ [ສິພ຺ພນິມຈ຺ຈຄາ (ສີ. ສ຺ຍາ.)].