໙. ໂຕເທຍ຺ຍມາຓວປຸຈ຺ຉານິທ຺ເທໂສ

໕໗. ຍສ຺ມິໍ ກາມາ ນ ວສນ຺ຕິ, [ອິຈ຺ຈາຍສ຺ມາ ໂຕເທຍ຺ໂຍ]

ຕຓ຺ຫາ ຍສ຺ສ ນ ວິຊ຺ຊຕິ;

ກຖໍກຖາ ຈ ໂຍ ຕິຓ຺ໂຓ, ວິໂມກ຺ໂຂ ຕສ຺ສ ກີທິໂສ.

ຍສ຺ມິໍ ກາມາ ນ ວສນ຺ຕີຕິ ຍສ຺ມິໍ ກາມາ ນ ວສນ຺ຕິ ນ ສໍວສນ຺ຕິ ນ ອາວສນ຺ຕິ ນ ປຣິວສນ຺ຕີຕິ – ຍສ຺ມິໍ ກາມາ ນ ວສນ຺ຕິ. ອິຈ຺ຈາຍສ຺ມາ ໂຕເທຍ຺ໂຍຕິ. ອິຈ຺ຈາຕິ ປທສນ຺ຘິ…ເປ… ປທານຸປຸພ຺ພຕາເປຕໍ – ອິຈ຺ຈາຕິ. ອາຍສ຺ມາຕິ ປິຍວຈນໍ…ເປ…. ໂຕເທຍ຺ໂຍຕິ ຕສ຺ສ ພ຺ຣາຫ຺ມຓສ຺ສ ນາມໍ…ເປ… ອຠິລາໂປຕິ – ອິຈ຺ຈາຍສ຺ມາ ໂຕເທຍ຺ໂຍ.

ຕຓ຺ຫາ ຍສ຺ສ ນ ວິຊ຺ຊຕີຕິ ຕຓ຺ຫາ ຍສ຺ສ ນຕ຺ຖິ ນ ສຕິ ນ ສໍວິຊ຺ຊຕິ ນຸປລພ຺ຠຕິ ຎາຓຄ຺ຄິນາ ທຑ຺ຒາຕິ – ຕຓ຺ຫາ ຍສ຺ສ ນ ວິຊ຺ຊຕິ.

ກຖໍກຖາ ຈ ໂຍ ຕິຓ຺ໂຓຕິ ກຖໍກຖາ ຈ ໂຍ ຕິຓ຺ໂຓ ອຸຕ຺ຕິຓ຺ໂຓ ນິຕ຺ຖິຓ຺ໂຓ ອຕິກ຺ກນ຺ໂຕ ສມຕິກ຺ກນ຺ໂຕ ວີຕິວຕ຺ໂຕຕິ – ກຖໍກຖາ ຈ ໂຍ ຕິຓ຺ໂຓ.

ວິໂມກ຺ໂຂ ຕສ຺ສ ກີທິໂສຕິ ວິໂມກ຺ໂຂ ຕສ຺ສ ກີທິໂສ ກິໍສຓ຺ຐິໂຕ ກິໍປກາໂຣ ກິໍປຏິຠາໂຄ ອິຈ຺ຉິຕພ຺ໂພຕິ ວິໂມກ຺ຂໍ ປຸຈ຺ຉຕີຕິ – ວິໂມກ຺ໂຂ ຕສ຺ສ ກີທິໂສ. ເຕນາຫ ໂສ ພ຺ຣາຫ຺ມໂຓ –

‘‘ຍສ຺ມິໍ ກາມາ ນ ວສນ຺ຕິ, [ອິຈ຺ຈາຍສ຺ມາ ໂຕເທຍ຺ໂຍ]

ຕຓ຺ຫາ ຍສ຺ສ ນ ວິຊ຺ຊຕິ;

ກຖໍກຖາ ຈ ໂຍ ຕິຓ຺ໂຓ, ວິໂມກ຺ໂຂ ຕສ຺ສ ກີທິໂສ’’ຕິ.

໕໘. ຍສ຺ມິໍ ກາມາ ນ ວສນ຺ຕິ, [ໂຕເທຍ຺ຍາຕິ ຠຄວາ]

ຕຓ຺ຫາ ຍສ຺ສ ນ ວິຊ຺ຊຕິ;

ກຖໍກຖາ ຈ ໂຍ ຕິຓ຺ໂຓ, ວິໂມກ຺ໂຂ ຕສ຺ສ ນາປໂຣ.

ຍສ຺ມິໍ ກາມາ ນ ວສນ຺ຕີຕິ. ຍສ຺ມິນ຺ຕິ ຍສ຺ມິໍ ປຸຄ຺ຄເລ ອຣຫນ຺ເຕ ຂີຓາສເວ. ກາມາຕິ ອຸທ຺ທານໂຕ ທ຺ເວ ກາມາ – ວຕ຺ຖຸກາມາ ຈ ກິເລສກາມາ ຈ…ເປ… ອິເມ ວຸຈ຺ຈນ຺ຕິ ວຕ຺ຖຸກາມາ…ເປ… ອິເມ ວຸຈ຺ຈນ຺ຕິ ກິເລສກາມາ. ຍສ຺ມິໍ ກາມາ ນ ວສນ຺ຕີຕິ ຍສ຺ມິໍ ກາມາ ນ ວສນ຺ຕິ ນ ສໍວສນ຺ຕິ ນ ອາວສນ຺ຕິ ນ ປຣິວສນ຺ຕີຕິ – ຍສ຺ມິໍ ກາມາ ນ ວສນ຺ຕິ.

ໂຕເທຍ຺ຍາຕິ ຠຄວາຕິ. ໂຕເທຍ຺ຍາຕິ ຠຄວາ ຕໍ ພ຺ຣາຫ຺ມຓໍ ນາເມນ ອາລປຕິ. ຠຄວາຕິ ຄາຣວາຘິວຈນເມຕໍ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ຠຄວາຕິ – ໂຕເທຍ຺ຍາຕິ ຠຄວາ.

ຕຓ຺ຫາ ຍສ຺ສ ນ ວິຊ຺ຊຕີຕິ. ຕຓ຺ຫາຕິ ຣູປຕຓ຺ຫາ ສທ຺ທຕຓ຺ຫາ ຄນ຺ຘຕຓ຺ຫາ ຣສຕຓ຺ຫາ ໂຜຏ຺ຐພ຺ພຕຓ຺ຫາ ຘມ຺ມຕຓ຺ຫາ. ຍສ຺ສາຕິ ອຣຫໂຕ ຂີຓາສວສ຺ສ. ຕຓ຺ຫາ ຍສ຺ສ ນ ວິຊ຺ຊຕີຕິ ຕຓ຺ຫາ ຍສ຺ສ ນຕ຺ຖິ ນ ສຕິ ນ ສໍວິຊ຺ຊຕິ ນຸປລພ຺ຠຕິ, ປຫີນາ ສມຸຈ຺ຉິນ຺ນາ ວູປສນ຺ຕາ ປຏິປ຺ປສ຺ສທ຺ຘາ ອຠພ຺ພຸປ຺ປຕ຺ຕິກາ ຎາຓຄ຺ຄິນາ ທຑ຺ຒາຕິ – ຕຓ຺ຫາ ຍສ຺ສ ນ ວິຊ຺ຊຕິ.

ກຖໍກຖາ ຈ ໂຍ ຕິຓ຺ໂຓຕິ ກຖໍກຖາ ວຸຈ຺ຈຕິ ວິຈິກິຈ຺ຉາ. ທຸກ຺ເຂ ກງ຺ຂາ…ເປ… ຉມ຺ຠິຕຕ຺ຕໍ ຈິຕ຺ຕສ຺ສ ມໂນວິເລໂຂ. ໂຍຕິ ໂຍ ໂສ ອຣຫໍ ຂີຓາສໂວ. ກຖໍກຖາ ຈ ໂຍ ຕິຓ຺ໂຓຕິ ກຖໍກຖາ ຈ ໂຍ ຕິຓ຺ໂຓ ອຸຕ຺ຕິຓ຺ໂຓ ນິຕ຺ຖິຓ຺ໂຓ ອຕິກ຺ກນ຺ໂຕ ສມຕິກ຺ກນ຺ໂຕ ວີຕິວຕ຺ໂຕຕິ – ກຖໍກຖາ ຈ ໂຍ ຕິຓ຺ໂຓ.

ວິໂມກ຺ໂຂ ຕສ຺ສ ນາປໂຣຕິ ນຕ຺ຖິ ຕສ຺ສ ອປໂຣ ວິໂມກ຺ໂຂ. ເຍນ ວິໂມກ຺ເຂນ ວິມຸຈ຺ເຈຍ຺ຍ ວິມຸຕ຺ໂຕ ໂສ. ກຕໍ ຕສ຺ສ ວິໂມກ຺ເຂນ ກຣຓີຍນ຺ຕິ – ວິໂມກ຺ໂຂ ຕສ຺ສ ນາປໂຣ. ເຕນາຫ ຠຄວາ –

‘‘ຍສ຺ມິໍ ກາມາ ນ ວສນ຺ຕິ, [ໂຕເທຍ຺ຍາຕິ ຠຄວາ]

ຕຓ຺ຫາ ຍສ຺ສ ນ ວິຊ຺ຊຕິ;

ກຖໍກຖາ ຈ ໂຍ ຕິຓ຺ໂຓ, ວິໂມກ຺ໂຂ ຕສ຺ສ ນາປໂຣ’’ຕິ.

໕໙. ນິຣາສໂສ ໂສ ອຸທ ອາສສາໂນ, ປຎ຺ຎາຓວາ ໂສ ອຸທ ປຎ຺ຎກປ຺ປີ;

ມຸນິໍ ອຫໍ ສກ຺ກ ຍຖາ ວິຊຎ຺ຎໍ, ຕໍ ເມ ວິຍາຈິກ຺ຂ ສມນ຺ຕຈກ຺ຂຸ.

ນິຣາສໂສ ໂສ ອຸທ ອາສສາໂນຕິ ນິຕ຺ຕຓ຺ໂຫ ໂສ, ອຸທາຫຸ ສຕຓ຺ໂຫ ຣູເປ ອາສີສຕິ [ອາສິໍສຕິ (ສ຺ຍາ.)], ສທ຺ເທ…ເປ… ຄນ຺ເຘ… ຣເສ… ໂຜຏ຺ຐພ຺ເພ… ກຸລໍ… ຄຓໍ… ອາວາສໍ… ລາຠໍ… ຍສໍ… ປສໍສໍ… ສຸຂໍ… ຈີວຣໍ… ປິຓ຺ຑປາຕໍ… ເສນາສນໍ… ຄິລານປຈ຺ຈຍເຠສຊ຺ຊປຣິກ຺ຂາຣໍ… ກາມຘາຕຸໍ … ຣູປຘາຕຸໍ… ອຣູປຘາຕຸໍ… ກາມຠວໍ… ຣູປຠວໍ… ອຣູປຠວໍ… ສຎ຺ຎາຠວໍ… ອສຎ຺ຎາຠວໍ… ເນວສຎ຺ຎານາສຎ຺ຎາຠວໍ… ເອກໂວກາຣຠວໍ… ຈຕຸໂວກາຣຠວໍ… ປຎ຺ຈໂວກາຣຠວໍ… ອຕີຕໍ… ອນາຄຕໍ… ປຈ຺ຈຸປ຺ປນ຺ນໍ… ທິຏ຺ຐສຸຕມຸຕວິຎ຺ຎາຕພ຺ເພ ຘມ຺ເມ ອາສີສຕິ ສາທິຍຕິ ປຕ຺ເຖຕິ ປິເຫຕິ ອຠິຊປ຺ປຕີຕິ – ນິຣາສໂສ ໂສ ອຸທ ອາສສາໂນ.

ປຎ຺ຎາຓວາ ໂສ ອຸທ ປຎ຺ຎກປ຺ປີຕິ. ປຎ຺ຎາຓວາ ໂສຕິ ປຓ຺ຑິໂຕ ປຎ຺ຎວາ ພຸທ຺ຘິມາ ຎາຓີ ວິຠາວີ ເມຘາວີ. ອຸທ ປຎ຺ຎກປ຺ປີຕິ ອຸທາຫຸ ອຏ຺ຐສມາປຕ຺ຕິຎາເຓນ ວາ ປຎ຺ຈາຠິຎ຺ຎາຎາເຓນ ວາ ມິຈ຺ຉາຎາເຓນ ວາ ຕຓ຺ຫາກປ຺ປໍ ວາ ທິຏ຺ຐິກປ຺ປໍ ວາ ກປ຺ເປຕິ ຊເນຕິ ສຎ຺ຊເນຕິ ນິພ຺ພຕ຺ເຕຕິ ອຠິນິພ຺ພຕ຺ເຕຕີຕິ – ປຎ຺ຎາຓວາ ໂສ ອຸທ ປຎ຺ຎກປ຺ປີ.

ມຸນິໍ ອຫໍ ສກ຺ກ ຍຖາ ວິຊຎ຺ຎນ຺ຕິ. ສກ຺ກາຕິ ສກ຺ໂກ ຠຄວາ. ສກ຺ຍກຸລາ ປພ຺ພຊິໂຕຕິປິ ສກ຺ໂກ. ອຖ ວາ, ອຑ຺ໂຒ ມຫທ຺ຘໂນ ຘນວາຕິປິ ສກ຺ໂກ. ຕສ຺ສິມານິ ຘນານິ, ເສຍ຺ຍຖິທໍ – ສທ຺ຘາຘນໍ ສີລຘນໍ ຫິຣິຘນໍ ໂອຕ຺ຕປ຺ປຘນໍ ສຸຕຘນໍ ຈາຄຘນໍ ປຎ຺ຎາຘນໍ ສຕິປຏ຺ຐານຘນໍ ສມ຺ມປ຺ປຘານຘນໍ ອິທ຺ຘິປາທຘນໍ ອິນ຺ທ຺ຣິຍຘນໍ ພລຘນໍ ໂພຊ຺ຌງ຺ຄຘນໍ ມຄ຺ຄຘນໍ ຜລຘນໍ ນິພ຺ພານຘນນ຺ຕິ. ເຕຫິ ອເນກວິເຘຫິ ຘນຣຕເນຫິ ອຑ຺ໂຒ ມຫທ຺ຘໂນ ຘນວາຕິປິ ສກ຺ໂກ. ອຖ ວາ, ປຫຸ ວິສວີ ອລມຕ຺ໂຕ ສູໂຣ ວີໂຣ ວິກ຺ກນ຺ໂຕ ອຠີຣູ ອຈ຺ຉມ຺ຠີ ອນຸຕ຺ຣາສີ ອປລາຍີ ປຫີນຠຍເຠຣໂວ ວິຄຕໂລມຫໍໂສຕິປິ ສກ຺ໂກ. ມຸນິໍ ອຫໍ ສກ຺ກ ຍຖາ ວິຊຎ຺ຎນ຺ຕິ ສກ຺ກ ຍຖາຫໍ ມຸນິໍ ຊາເນຍ຺ຍໍ ອາຊາເນຍ຺ຍໍ ວິຊາເນຍ຺ຍໍ ປຏິວິຊາເນຍ຺ຍໍ ປຏິວິຊ຺ເຌຍ຺ຍນ຺ຕິ – ມຸນິໍ ອຫໍ ສກ຺ກ ຍຖາ ວິຊຎ຺ຎໍ.

ຕໍ ເມ ວິຍາຈິກ຺ຂ ສມນ຺ຕຈກ຺ຂູຕິ. ຕນ຺ຕິ ຍໍ ປຸຈ຺ຉາມິ ຍໍ ຍາຈາມິ ຍໍ ອຊ຺ເຌສາມິ ຍໍ ປສາເທມິ. ວິຍາຈິກ຺ຂາຕິ ອາຈິກ຺ຂາຫິ ເທເສຫິ ປຎ຺ຎເປຫິ ປຏ຺ຐເປຫິ ວິວຣາຫິ ວິຠຊາຫິ ອຸຕ຺ຕານີກໂຣຫິ ປກາເສຫິ. ສມນ຺ຕຈກ຺ຂູຕິ ສມນ຺ຕຈກ຺ຂຸ ວຸຈ຺ຈຕິ ສພ຺ພຎ຺ຎຸຕຎາຓໍ…ເປ… ຕຖາຄໂຕ ເຕນ ສມນ຺ຕຈກ຺ຂູຕິ – ຕໍ ເມ ວິຍາຈິກ຺ຂ ສມນ຺ຕຈກ຺ຂຸ. ເຕນາຫ ໂສ ພ຺ຣາຫ຺ມໂຓ –

‘‘ນິຣາສໂສ ໂສ ອຸທ ອາສສາໂນ, ປຎ຺ຎາຓວາ ໂສ ອຸທ ປຎ຺ຎກປ຺ປີ;

ມຸນິໍ ອຫໍ ສກ຺ກ ຍຖາ ວິຊຎ຺ຎໍ, ຕໍ ເມ ວິຍາຈິກ຺ຂ ສມນ຺ຕຈກ຺ຂູ’’ຕິ.

໖໐. ນິຣາສໂສ ໂສ ນ ຈ ອາສສາໂນ, ປຎ຺ຎາຓວາ ໂສ ນ ຈ ປຎ຺ຎກປ຺ປີ;

ເອວມ຺ປິ ໂຕເທຍ຺ຍ ມຸນິໍ ວິຊານ, ອກິຎ຺ຈນໍ ກາມຠເວ ອສຕ຺ຕໍ.

ນິຣາສໂສ ໂສ ນ ຈ ອາສສາໂນຕິ ນິຕ຺ຕຓ຺ໂຫ ໂສ. ນ ໂສ ສຕຓ຺ໂຫ ຣູເປ ນາສີສຕິ. ສທ຺ເທ…ເປ… ຄນ຺ເຘ… ທິຏ຺ຐສຸຕມຸຕວິຎ຺ຎາຕພ຺ເພ ຘມ຺ເມ ນາສີສຕິ ນ ອິຈ຺ຉຕິ ນ ສາທິຍຕິ ນ ປຕ຺ເຖຕິ ນ ປິເຫຕິ ນາຠິຊປ຺ປຕີຕິ – ນິຣາສໂສ ໂສ ນ ຈ ອາສສາໂນ.

ປຎ຺ຎາຓວາ ໂສ ນ ຈ ປຎ຺ຎກປ຺ປີຕິ. ປຎ຺ຎາຓວາຕິ ປຓ຺ຑິໂຕ ປຎ຺ຎວາ ພຸທ຺ຘິມາ ຎາຓີ ວິຠາວີ ເມຘາວີ. ນ ຈ ປຎ຺ຎກປ຺ປີຕິ ອຏ຺ຐສມາປຕ຺ຕິຎາເຓນ ວາ ປຎ຺ຈາຠິຎ຺ຎາຎາເຓນ ວາ ມິຈ຺ຉາຎາເຓນ ວາ ຕຓ຺ຫາກປ຺ປໍ ວາ ນ ກປ຺ເປຕິ ທິຏ຺ຐິກປ຺ປໍ ວາ ນ ກປ຺ເປຕິ ນ ຊເນຕິ ນ ສຎ຺ຊເນຕິ ນ ນິພ຺ພຕ຺ເຕຕິ ນາຠິນິພ຺ພຕ຺ເຕຕີຕິ – ປຎ຺ຎາຓວາ ໂສ ນ ຈ ປຎ຺ຎກປ຺ປີ.

ເອວມ຺ປິ ໂຕເທຍ຺ຍ ມຸນິໍ ວິຊານາຕິ. ມຸນີຕິ ໂມນໍ ວຸຈ຺ຈຕິ ຎາຓໍ…ເປ… ສງ຺ຄຊາລມຕິຈ຺ຈ ໂສ ມຸນິ. ເອວມ຺ປິ ໂຕເທຍ຺ຍ ມຸນິໍ ວິຊານາຕິ ໂຕເທຍ຺ຍ, ເອວໍ ມຸນິໍ ຊານ ປຏິຊານ ປຏິວິຊານ ປຏິວິຊ຺ຌາຕິ – ເອວມ຺ປິ ໂຕເທຍ຺ຍ ມຸນິໍ ວິຊານ.

ອກິຎ຺ຈນໍ ກາມຠເວ ອສຕ຺ຕນ຺ຕິ. ອກິຎ຺ຈນນ຺ຕິ ຣາຄກິຎ຺ຈນໍ ໂທສກິຎ຺ຈນໍ ໂມຫກິຎ຺ຈນໍ ມານກິຎ຺ຈນໍ ທິຏ຺ຐິກິຎ຺ຈນໍ ກິເລສກິຎ຺ຈນໍ ທຸຈ຺ຈຣິຕກິຎ຺ຈນໍ. ຍສ຺ເສຕານິ [ຍສ຺ເສເຕ (ສ຺ຍາ.)] ກິຎ຺ຈນານິ [ກິຎ຺ຈນາ (ສ຺ຍາ.)] ປຫີນານິ ສມຸຈ຺ຉິນ຺ນານິ ວູປສນ຺ຕານິ ປຏິປ຺ປສ຺ສທ຺ຘານິ ອຠພ຺ພຸປ຺ປຕ຺ຕິການິ ຎາຓຄ຺ຄິນາ ທຑ຺ຒານິ, ໂສ ວຸຈ຺ຈຕິ ອກິຎ຺ຈໂນ. ກາມາຕິ ອຸທ຺ທານໂຕ ທ຺ເວ ກາມາ – ວຕ຺ຖຸກາມາ ຈ ກິເລສກາມາ ຈ…ເປ… ອິເມ ວຸຈ຺ຈນ຺ຕິ ວຕ຺ຖຸກາມາ…ເປ… ອິເມ ວຸຈ຺ຈນ຺ຕິ ກິເລສກາມາ. ຠວາຕິ ທ຺ເວ ຠວາ – ກມ຺ມຠໂວ ຈ ປຏິສນ຺ຘິໂກ ຈ ປຸນພ຺ຠໂວ…ເປ… ອຍໍ ປຏິສນ຺ຘິໂກ ປຸນພ຺ຠໂວ.

ອກິຎ຺ຈນໍ ກາມຠເວ ອສຕ຺ຕນ຺ຕິ ອກິຎ຺ຈນໍ ປຸຄ຺ຄລໍ ກາເມ ຈ ຠເວ ຈ ອສຕ຺ຕໍ ອລຄ຺ຄໍ ອລຄ຺ຄິຕໍ ອປລິພຸທ຺ຘໍ ນິກ຺ຂນ຺ຕໍ ນິສ຺ສຏໍ ວິປ຺ປມຸຕ຺ຕໍ ວິສຎ຺ຎຸຕ຺ຕໍ ວິມຣິຍາທິກເຕນ ເຈຕສາ ວິຫຣນ຺ຕນ຺ຕິ – ອກິຎ຺ຈນໍ ກາມຠເວ ອສຕ຺ຕໍ. ເຕນາຫ ຠຄວາ –

‘‘ນິຣາສໂສ ໂສ ນ ຈ ອາສສາໂນ, ປຎ຺ຎາຓວາ ໂສ ນ ຈ ປຎ຺ຎກປ຺ປີ;

ເອວມ຺ປິ ໂຕເທຍ຺ຍ ມຸນິໍ ວິຊານ, ອກິຎ຺ຈນໍ ກາມຠເວ ອສຕ຺ຕນ຺ຕິ.

ສຫ ຄາຖາປຣິໂຍສານາ…ເປ… ສຕ຺ຖາ ເມ ຠນ຺ເຕ ຠຄວາ, ສາວໂກຫມສ຺ມີຕິ.

ໂຕເທຍ຺ຍມາຓວປຸຈ຺ຉານິທ຺ເທໂສ ນວໂມ.