໒. ຕິສ຺ສເມຕ຺ເຕຍ຺ຍມາຓວປຸຈ຺ຉານິທ຺ເທໂສ

໙. ໂກຘ ສນ຺ຕຸສິໂຕ ໂລເກ, [ອິຈ຺ຈາຍສ຺ມາ ຕິສ຺ສເມຕ຺ເຕຍ຺ໂຍ]

ກສ຺ສ ໂນ ສນ຺ຕິ ອິຎ຺ຊິຕາ;

ໂກ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕິ;

ກໍ ພ຺ຣູສິ ມຫາປຸຣິໂສຕິ, ໂກ ອິຘ ສິພ຺ພິນິມຈ຺ຈຄາ.

ໂກຘ ສນ຺ຕຸສິໂຕ ໂລເກຕິ ໂກ ໂລເກ ຕຸຏ຺ໂຐ ສນ຺ຕຸຏ຺ໂຐ ອຕ຺ຕມໂນ ປຣິປຸຓ຺ຓສງ຺ກປ຺ໂປຕິ – ໂກຘ ສນ຺ຕຸສິໂຕ ໂລເກ.

ອິຈ຺ຈາຍສ຺ມາ ຕິສ຺ສເມຕ຺ເຕຍ຺ໂຍຕິ. ອິຈ຺ຈາຕິ ປທສນ຺ຘິ ປທສໍສຄ຺ໂຄ ປທປາຣິປູຣີ ອກ຺ຂຣສມວາໂຍ ພ຺ຍຎ຺ຊນສິລິຏ຺ຐຕາ ປທານຸປຸພ຺ພຕາເປຕໍ – ອິຈ຺ຈາຕິ. ອາຍສ຺ມາຕິ ປິຍວຈນໍ ຄຣຸວຈນໍ ສຄາຣວສປ຺ປຕິສ຺ສາຘິວຈນເມຕໍ – ອາຍສ຺ມາຕິ. ຕິສ຺ໂສຕິ ຕສ຺ສ ພ຺ຣາຫ຺ມຓສ຺ສ ນາມໍ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ. ເມຕ຺ເຕຍ຺ໂຍຕິ ຕສ຺ສ ພ຺ຣາຫ຺ມຓສ຺ສ ໂຄຕ຺ຕໍ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣຕິ – ອິຈ຺ຈາຍສ຺ມາ ຕິສ຺ສເມຕ຺ເຕຍ຺ໂຍ.

ກສ຺ສ ໂນ ສນ຺ຕິ ອິຎ຺ຊິຕາຕິ ຕຓ຺ຫິຎ຺ຊິຕໍ ທິຏ຺ຐິຎ຺ຊິຕໍ ມານິຎ຺ຊິຕໍ ກິເລສິຎ຺ຊິຕໍ ກາມິຎ຺ຊິຕໍ. ກສ຺ສິເມ ອິຎ຺ຊິຕາ ນຕ຺ຖິ ນ ສນ຺ຕິ ນ ສໍວິຊ຺ຊນ຺ຕິ ນຸປລພ຺ຠນ຺ຕິ ປຫີນາ ສມຸຈ຺ຉິນ຺ນາ ວູປສນ຺ຕາ ປຏິປສ຺ສທ຺ຘາ ອຠພ຺ພຸປ຺ປຕ຺ຕິກາ ຎາຓຄ຺ຄິນາ ທຑ຺ຒາຕິ – ກສ຺ສ ໂນ ສນ຺ຕິ ອິຎ຺ຊິຕາ.

ໂກ ອຸຠນ຺ຕມຠິຎ຺ຎາຍາຕິ ໂກ ອຸໂຠ ອນ຺ເຕ ອຠິຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາຕິ – ໂກ ອຸຠນ຺ຕມຠິຎ຺ຎາຍ.

ມຊ຺ເຌ ມນ຺ຕາ ນ ລິປ຺ປຕີຕິ ມຊ຺ເຌ ມນ຺ຕາຍ ນ ລິປ຺ປຕິ, ອລິຕ຺ໂຕ ອນຸປລິຕ຺ໂຕ ນິກ຺ຂນ຺ໂຕ ນິສ຺ສໂຏ ວິປ຺ປມຸຕ຺ໂຕ ວິສຎ຺ຎຸຕ຺ໂຕ ວິມຣິຍາທິກເຕນ ເຈຕສາ ວິຫຣຕີຕິ – ມຊ຺ເຌ ມນ຺ຕາ ນ ລິປ຺ປຕິ.

ກໍ ພ຺ຣູສິ ມຫາປຸຣິໂສຕິ ມຫາປຸຣິໂສ ອຄ຺ຄປຸຣິໂສ ເສຏ຺ຐປຸຣິໂສ ວິເສຏ຺ຐປຸຣິໂສ ປາໂມກ຺ຂປຸຣິໂສ ອຸຕ຺ຕມປຸຣິໂສ ປຘານປຸຣິໂສ ປວຣປຸຣິໂສຕິ. ກໍ ພ຺ຣູສິ ກໍ ກເຖສິ ກໍ ມຎ຺ຎສິ ກໍ ຠຓສິ ກໍ ປສ຺ສຕິ ກໍ ໂວຫຣສີຕິ – ກໍ ພ຺ຣູສິ ມຫາປຸຣິໂສຕິ.

ໂກ ອິຘ ສິພ຺ພິນິມຈ຺ຈຄາຕິ ໂກ ອິຘ ສິພ຺ພິນິໍ ຕຓ຺ຫໍ ອຊ຺ຌຄາ ອຸປຈ຺ຈຄາ ອຕິກ຺ກນ຺ໂຕ ສມຕິກ຺ກນ຺ໂຕ ວີຕິວຕ຺ໂຕຕິ – ໂກ ອິຘ ສິພ຺ພິນິມຈ຺ຈຄາ. ເຕນາຫ ໂສ ພ຺ຣາຫ຺ມໂຓ –

‘‘ໂກຘ ສນ຺ຕຸສິໂຕ ໂລເກ, [ອິຈ຺ຈາຍສ຺ມາ ຕິສ຺ສເມຕ຺ເຕຍ຺ໂຍ]

ກສ຺ສ ໂນ ສນ຺ຕິ ອິຎ຺ຊິຕາ;

ໂກ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕິ;

ກໍ ພ຺ຣູສິ ມຫາປຸຣິໂສຕິ, ໂກ ອິຘ ສິພ຺ພິນິມຈ຺ຈຄາ’’ຕິ.

໑໐. ກາເມສຸ ພ຺ຣຫ຺ມຈຣິຍວາ, [ເມຕ຺ເຕຍ຺ຍາຕິ ຠຄວາ]

ວີຕຕຓ຺ໂຫ ສທາ ສໂຕ;

ສງ຺ຂາຍ ນິພ຺ພຸໂຕ ຠິກ຺ຂຸ, ຕສ຺ສ ໂນ ສນ຺ຕິ ອິຎ຺ຊິຕາ.

ກາເມສຸ ພ຺ຣຫ຺ມຈຣິຍວາຕິ. ກາມາຕິ ອຸທ຺ທານໂຕ ທ຺ເວ ກາມາ – ວຕ຺ຖຸກາມາ ຈ ກິເລສກາມາ ຈ…ເປ… ອິເມ ວຸຈ຺ຈນ຺ຕິ ວຕ຺ຖຸກາມາ…ເປ… ອິເມ ວຸຈ຺ຈນ຺ຕິ ກິເລສກາມາ. ພ຺ຣຫ຺ມຈຣິຍໍ ວຸຈ຺ຈຕິ ອສທ຺ຘມ຺ມສມາປຕ຺ຕິຍາ ອາຣຕິ ວິຣຕິ ປຏິວິຣຕິ ເວຣມຓີ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ. ອປິ ຈ, ນິປ຺ປຣິຍາເຍນ ພ຺ຣຫ຺ມຈຣິຍໍ ວຸຈ຺ຈຕິ ອຣິໂຍ ອຏ຺ຐງ຺ຄິໂກ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຈາ, ສມ຺ມາກມ຺ມນ຺ໂຕ, ສມ຺ມາອາຊີໂວ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ. ໂຍ ອິມິນາ ອຣິເຍນ ອຏ຺ຐງ຺ຄິເກນ ມຄ຺ເຄນ ອຸເປໂຕ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມຸປປນ຺ໂນ ສມນ຺ນາຄໂຕ, ໂສ ວຸຈ຺ຈຕິ ພ຺ຣຫ຺ມຈຣິຍວາ. ຍຖາ ຈ ຘເນນ ຘນວາຕິ ວຸຈ຺ຈຕິ, ໂຠເຄນ ໂຠຄວາຕິ ວຸຈ຺ຈຕິ, ຍເສນ ຍສວາຕິ ວຸຈ຺ຈຕິ, ສິປ຺ເປນ ສິປ຺ປວາຕິ ວຸຈ຺ຈຕິ, ສີເລນ ສີລວາຕິ ວຸຈ຺ຈຕິ, ວີຣິເຍນ ວີຣິຍວາຕິ ວຸຈ຺ຈຕິ, ປຎ຺ຎາຍ ປຎ຺ຎວາຕິ ວຸຈ຺ຈຕິ, ວິຊ຺ຊາຍ ວິຊ຺ຊວາຕິ ວຸຈ຺ຈຕິ – ເອວເມວ ໂຍ ອິມິນາ ອຣິເຍນ ອຏ຺ຐງ຺ຄິເກນ ມຄ຺ເຄນ ອຸເປໂຕ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມຸປປນ຺ໂນ ສມນ຺ນາຄໂຕ, ໂສ ວຸຈ຺ຈຕິ ພ຺ຣຫ຺ມຈຣິຍວາຕິ – ກາເມສຸ ພ຺ຣຫ຺ມຈຣິຍວາ.

ເມຕ຺ເຕຍ຺ຍາຕິ ຠຄວາ ຕໍ ພ຺ຣາຫ຺ມຓໍ ໂຄຕ຺ເຕນ ອາລປຕິ. ຠຄວາຕິ ຄາຣວາຘິວຈນເມຕໍ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ຠຄວາຕິ – ເມຕ຺ເຕຍ຺ຍາຕິ ຠຄວາ.

ວີຕຕຓ຺ໂຫ ສທາ ສໂຕຕິ. ຕຓ຺ຫາຕິ ຣູປຕຓ຺ຫາ…ເປ… ຘມ຺ມຕຓ຺ຫາ. ຍສ຺ເສສາ ຕຓ຺ຫາ ປຫີນາ ສມຸຈ຺ຉິນ຺ນາ ວູປສນ຺ຕາ ປຏິປສ຺ສທ຺ຘາ ອຠພ຺ພຸປ຺ປຕ຺ຕິກາ ຎາຓຄ຺ຄິນາ ທຑ຺ຒາ, ໂສ ວຸຈ຺ຈຕິ ວີຕຕຓ຺ໂຫ ຈຕ຺ຕຕຓ຺ໂຫ ວນ຺ຕຕຓ຺ໂຫ ມຸຕ຺ຕຕຓ຺ໂຫ ປຫີນຕຓ຺ໂຫ ປຏິນິສ຺ສຏ຺ຐຕຓ຺ໂຫ ວີຕຣາໂຄ ຈຕ຺ຕຣາໂຄ ວນ຺ຕຣາໂຄ ມຸຕ຺ຕຣາໂຄ ປຫີນຣາໂຄ ປຏິນິສ຺ສຏ຺ຐຣາໂຄ ນິຈ຺ຉາໂຕ ນິພ຺ພຸໂຕ ສີຕິຠູໂຕ ສຸຂປ຺ປຏິສໍເວທີ ພ຺ຣຫ຺ມຠູເຕນ ອຕ຺ຕນາ ວິຫຣຕິ. ສທາຕິ ສທາ ສພ຺ພທາ ສພ຺ພກາລໍ ນິຈ຺ຈກາລໍ ຘຸວກາລໍ ສຕຕໍ ສມິຕໍ ອພ຺ໂພກິຓ຺ຓໍ ໂປງ຺ຂານຸໂປງ຺ຂໍ [ໂປຂານຸໂປຂໍ (ສ຺ຍາ.)] ອຸທກູມິກຊາຕໍ ອວີຈິສນ຺ຕຕິສຫິຕໍ [ອວີຈິ ສມງ຺ຄິສຫິຕໍ (ສ຺ຍາ.)] ຜສ຺ສິຕໍ [ຜຸສິຕໍ (ສ຺ຍາ.)] ປຸເຣຠຕ຺ຕໍ ປຈ຺ຉາຠຕ຺ຕໍ ປຸຣິມຍາມໍ ມຊ຺ຌິມຍາມໍ ປຈ຺ຉິມຍາມໍ ກາເຬ ຊຸຓ຺ເຫ ວສ຺ເສ ເຫມນ຺ເຕ ຄິມ຺ເຫ ປຸຣິເມ ວໂຍຂນ຺ເຘ ມຊ຺ຌິເມ ວໂຍຂນ຺ເຘ ປຈ຺ຉິເມ ວໂຍຂນ຺ເຘ. ສໂຕຕິ ຈຕູຫິ ກາຣເຓຫິ ສໂຕ – ກາເຍ ກາຍານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ, ເວທນາສຸ ເວທນານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ, ຈິຕ຺ເຕ ຈິຕ຺ຕານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ, ຘມ຺ເມສຸ ຘມ຺ມານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ…ເປ… ໂສ ວຸຈ຺ຈຕິ ສໂຕຕິ – ວີຕຕຓ຺ໂຫ ສທາ ສໂຕ.

ສງ຺ຂາຍ ນິພ຺ພຸໂຕ ຠິກ຺ຂູຕິ ສງ຺ຂາ ວຸຈ຺ຈຕິ ຎາຓໍ. ຍາ ປຎ຺ຎາ ປຊານນາ ວິຈໂຍ ປວິຈໂຍ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ. ສງ຺ຂາຍາຕິ ສງ຺ຂາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ, ‘‘ສພ຺ເພ ສງ຺ຂາຣາ ອນິຈ຺ຈາ’’ຕິ ສງ຺ຂາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ, ‘‘ສພ຺ເພ ສງ຺ຂາຣາ ທຸກ຺ຂາ’’ຕິ…ເປ… ‘‘ສພ຺ເພ ຘມ຺ມາ ອນຕ຺ຕາ’’ຕິ… ‘‘ອວິຊ຺ຊາປຈ຺ຈຍາ ສງ຺ຂາຣາ’’ຕິ… ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ ສງ຺ຂາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ.

ອຖ ວາ, ອນິຈ຺ຈໂຕ ສງ຺ຂາຍ ຊານິຕ຺ວາ…ເປ… ທຸກ຺ຂໂຕ… ໂຣຄໂຕ… ຄຓ຺ຑໂຕ… ສລ຺ລໂຕ…ເປ… ນິສ຺ສຣຓໂຕ ສງ຺ຂາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ. ນິພ຺ພຸໂຕຕິ ຣາຄສ຺ສ ນິພ຺ພາປິຕຕ຺ຕາ ນິພ຺ພຸໂຕ, ໂທສສ຺ສ ນິພ຺ພາປິຕຕ຺ຕາ ນິພ຺ພຸໂຕ, ໂມຫສ຺ສ ນິພ຺ພາປິຕຕ຺ຕາ ນິພ຺ພຸໂຕ, ໂກຘສ຺ສ… ອຸປນາຫສ຺ສ… ມກ຺ຂສ຺ສ… ປຬາສສ຺ສ… ອິສ຺ສາຍ… ມຈ຺ຉຣິຍສ຺ສ… ມາຍາຍ… ສາເຐຍ຺ຍສ຺ສ… ຖມ຺ຠສ຺ສ… ສາຣມ຺ຠສ຺ສ… ມານສ຺ສ… ອຕິມານສ຺ສ… ມທສ຺ສ… ປມາທສ຺ສ… ສພ຺ພກິເລສານໍ… ສພ຺ພທຸຈ຺ຈຣິຕານໍ… ສພ຺ພທຣຖານໍ … ສພ຺ພປຣິຬາຫານໍ… ສພ຺ພສນ຺ຕາປານໍ… ສພ຺ພາກຸສລາຠິສງ຺ຂາຣານໍ ນິພ຺ພາປິຕຕ຺ຕາ ນິພ຺ພຸໂຕ. ຠິກ຺ຂູຕິ ສຕ຺ຕນ຺ນໍ ຘມ຺ມານໍ ຠິນ຺ນຕ຺ຕາ ຠິກ຺ຂຸ…ເປ… ວຸສິຕວາ ຂີຓປຸນພ຺ຠໂວ ສ ຠິກ຺ຂູຕິ – ສງ຺ຂາຍ ນິພ຺ພຸໂຕ ຠິກ຺ຂຸ.

ຕສ຺ສ ໂນ ສນ຺ຕິ ອິຎ຺ຊິຕາຕິ. ຕສ຺ສາຕິ ອຣຫໂຕ ຂີຓາສວສ຺ສ. ອິຎ຺ຊິຕາຕິ ຕຓ຺ຫິຎ຺ຊິຕໍ ທິຏ຺ຐິຎ຺ຊິຕໍ ມານິຎ຺ຊິຕໍ ກິເລສິຎ຺ຊິຕໍ ກາມິຎ຺ຊິຕໍ. ຕສ຺ສິເມ ອິຎ຺ຊິຕາ ນຕ຺ຖິ ນ ສນ຺ຕິ ນ ສໍວິຊ຺ຊນ຺ຕິ ນຸປລພ຺ຠນ຺ຕິ ປຫີນາ ສມຸຈ຺ຉິນ຺ນາ ວູປສນ຺ຕາ ປຏິປສ຺ສທ຺ຘາ ອຠພ຺ພຸປ຺ປຕ຺ຕິກາ ຎາຓຄ຺ຄິນາ ທຑ຺ຒາຕິ – ຕສ຺ສ ໂນ ສນ຺ຕິ ອິຎ຺ຊິຕາ. ເຕນາຫ ຠຄວາ –

‘‘ກາເມສຸ ພ຺ຣຫ຺ມຈຣິຍວາ, [ເມຕ຺ເຕຍ຺ຍາຕິ ຠຄວາ]

ວີຕຕຓ຺ໂຫ ສທາ ສໂຕ;

ສງ຺ຂາຍ ນິພ຺ພຸໂຕ ຠິກ຺ຂຸ, ຕສ຺ສ ໂນ ສນ຺ຕິ ອິຎ຺ຊິຕາ’’ຕິ.

໑໑. ໂສ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕິ;

ຕໍ ພ຺ຣູມິ ມຫາປຸຣິໂສຕິ, ໂສ ອິຘ ສິພ຺ພິນິມຈ຺ຈຄາ.

ໂສ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕີຕິ. ອນ຺ຕາຕິ ຜສ຺ໂສ ເອໂກ ອນ຺ໂຕ, ຜສ຺ສສມຸທໂຍ ທຸຕິໂຍ ອນ຺ໂຕ, ຜສ຺ສນິໂຣໂຘ ມຊ຺ເຌ; ອຕີຕໍ ເອໂກ ອນ຺ໂຕ, ອນາຄຕໍ ທຸຕິໂຍ ອນ຺ໂຕ, ປຈ຺ຈຸປ຺ປນ຺ນໍ ມຊ຺ເຌ; ສຸຂາ ເວທນາ ເອໂກ ອນ຺ໂຕ, ທຸກ຺ຂາ ເວທນາ ທຸຕິໂຍ ອນ຺ໂຕ, ອທຸກ຺ຂມສຸຂາ ເວທນາ ມຊ຺ເຌ; ນາມໍ ເອໂກ ອນ຺ໂຕ, ຣູປໍ ທຸຕິໂຍ ອນ຺ໂຕ, ວິຎ຺ຎາຓໍ ມຊ຺ເຌ; ຉ ອຊ຺ຌຕ຺ຕິການິ ອາຍຕນານິ ເອໂກ ອນ຺ໂຕ, ຉ ພາຫິຣານິ ອາຍຕນານິ ທຸຕິໂຍ ອນ຺ໂຕ, ວິຎ຺ຎາຓໍ ມຊ຺ເຌ; ສກ຺ກາໂຍ ເອໂກ ອນ຺ໂຕ, ສກ຺ກາຍສມຸທໂຍ ທຸຕິໂຍ ອນ຺ໂຕ, ສກ຺ກາຍນິໂຣໂຘ ມຊ຺ເຌ. ມນ຺ຕາ ວຸຈ຺ຈຕິ ປຎ຺ຎາ, ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ.

ເລປາຕິ ທ຺ເວ ເລປາ – ຕຓ຺ຫາເລໂປ ຈ ທິຏ຺ຐິເລໂປ ຈ. ກຕໂມ ຕຓ຺ຫາເລໂປ? ຍາວຕາ ຕຓ຺ຫາສງ຺ຂາເຕນ ສີມກຕໍ ໂອຘິກຕໍ [ມຣິຍາທິກຕໍ ໂອຘິກຕໍ (ສ຺ຍາ.)] ປຣິຍນ຺ຕກຕໍ ປຣິຄ຺ຄຫິຕໍ ມມາຍິຕໍ – ‘‘ອິທໍ ມມ, ເອຕໍ ມມ, ເອຕ຺ຕກໍ ມມ, ເອຕ຺ຕາວຕາ ມມ ຣູປາ ສທ຺ທາ ຄນ຺ຘາ ຣສາ ໂຜຏ຺ຐພ຺ພາ ອຕ຺ຖຣຓາ ປາວຸຣຓາ ທາສິທາສາ ອເຊຬກາ ກຸກ຺ກຸຏສູກຣາ ຫຕ຺ຖິຄວາສ຺ສວຬວາ ເຂຕ຺ຕໍ ວຕ຺ຖຸ ຫິຣຎ຺ຎໍ ສຸວຓ຺ຓໍ ຄາມນິຄມຣາຊຘານິໂຍ ຣຏ຺ຐຎ຺ຈ ຊນປໂທ ຈ ໂກໂສ ຈ ໂກຏ຺ຐາຄາຣຎ຺ຈ’’. ເກວລມ຺ປິ ມຫາປຖວິໍ ຕຓ຺ຫາວເສນ ມມາຍຕິ. ຍາວຕາ ອຏ຺ຐສຕຕຓ຺ຫາວິຈຣິຕໍ – ອຍໍ ຕຓ຺ຫາເລໂປ.

ກຕໂມ ທິຏ຺ຐິເລໂປ? ວີສຕິວຕ຺ຖຸກາ ສກ຺ກາຍທິຏ຺ຐິ, ທສວຕ຺ຖຸກາ ມິຈ຺ຉາທິຏ຺ຐິ, ທສວຕ຺ຖຸກາ ອນ຺ຕຄ຺ຄາຫິກາ ທິຏ຺ຐິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ ທິຏ຺ຐິຄຫນໍ ທິຏ຺ຐິກນ຺ຕາໂຣ ທິຏ຺ຐິວິສູກາຍິກໍ ທິຏ຺ຐິວິປ຺ຜນ຺ທິຕໍ ທິຏ຺ຐິສໍໂຍຊນໍ ຄາໂຫ ປຏິຄ຺ຄາໂຫ ອຠິນິເວໂສ ປຣາມາໂສ ກຸມ຺ມຄ຺ໂຄ ມິຈ຺ຉາປໂຖ ມິຈ຺ຉຕ຺ຕໍ ຕິຕ຺ຖາຍຕນໍ ວິປຣິເຍສຄ຺ຄາໂຫ [ວິປຣິເຍສຄ຺ຄາໂຫ (ພຫູສຸ)] ວິປຣີຕຄ຺ຄາໂຫ ວິປລ຺ລາສຄ຺ຄາໂຫ ມິຈ຺ຉາຄາໂຫ ອຍາຖາວກສ຺ມິໍ ຍາຖາວກນ຺ຕິ ຄາໂຫ, ຍາວຕາ ທ຺ວາສຏ຺ຐິ ທິຏ຺ຐິຄຕານິ – ອຍໍ ທິຏ຺ຐິເລໂປ.

ໂສ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕີຕິ ໂສ ອຸໂຠ ຈ ອນ຺ເຕ ມຊ຺ຌຎ຺ຈ ມນ຺ຕາຍ ອຠິຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ນ ລິປ຺ປຕິ ນ ປລິປ຺ປຕິ ນ ອຸປລິປ຺ປຕິ, ອລິຕ຺ໂຕ ອສໍລິຕ຺ໂຕ ອນຸປລິຕ຺ໂຕ ນິກ຺ຂນ຺ໂຕ ນິສ຺ສໂຏ ວິປ຺ປມຸຕ຺ໂຕ ວິສຎ຺ຎຸຕ຺ໂຕ ວິມຣິຍາທິກເຕນ ເຈຕສາ ວິຫຣຕີຕິ – ໂສ ອຸຠນ຺ຕມຠິຎ຺ຎາຍ ມຊ຺ເຌ ມນ຺ຕາ ນ ລິປ຺ປຕິ.

ຕໍ ພ຺ຣູມິ ມຫາປຸຣິໂສຕິ ມຫາປຸຣິໂສ ອຄ຺ຄປຸຣິໂສ ເສຏ຺ຐປຸຣິໂສ ວິເສຏ຺ຐປຸຣິໂສ ປາໂມກ຺ຂປຸຣິໂສ ອຸຕ຺ຕມປຸຣິໂສ ປວຣປຸຣິໂສ, ຕໍ ພ຺ຣູມິ ຕໍ ກເຖມິ ຕໍ ຠຓາມິ ຕໍ ທີເປມິ ຕໍ ໂວຫຣາມິ.

ອາຍສ຺ມາ ສາຣິປຸຕ຺ໂຕ [ປສ຺ສ ສໍ. ນິ. ໕.໓໗໗] ຠຄວນ຺ຕໍ ເອຕທໂວຈ – ‘‘ມຫາປຸຣິໂສ ມຫາປຸຣິໂສ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ມຫາປຸຣິໂສ ໂຫຕີ’’ຕິ? ‘‘ວິມຸຕ຺ຕຈິຕ຺ຕຕ຺ຕາ ຂ຺ວາຫໍ, ສາຣິປຸຕ຺ຕ, ມຫາປຸຣິໂສຕິ ວທາມິ, ອວິມຸຕ຺ຕຈິຕ຺ຕຕ຺ຕາ ໂນ ມຫາປຸຣິໂສຕິ ວທາມິ.

‘‘ກຖຎ຺ຈ, ສາຣິປຸຕ຺ຕ, ວິມຸຕ຺ຕຈິຕ຺ໂຕ ໂຫຕິ? ອິຘ, ສາຣິປຸຕ຺ຕ, ຠິກ຺ຂຸ ອຊ຺ຌຕ຺ຕໍ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ກາເຍ ກາຍານຸປສ຺ສິໂນ ວິຫຣໂຕ ຈິຕ຺ຕໍ ວິຣຊ຺ຊຕິ ວິມຸຈ຺ຈຕິ ອນຸປາທາຍ ອາສເວຫິ. ເວທນາສຸ…ເປ… ຈິຕ຺ເຕ… ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ຘມ຺ເມສຸ ຘມ຺ມານຸປສ຺ສິໂນ ວິຫຣໂຕ ຈິຕ຺ຕໍ ວິຣຊ຺ຊຕິ ວິມຸຈ຺ຈຕິ ອນຸປາທາຍ ອາສເວຫິ. ເອວໍ ໂຂ, ສາຣິປຸຕ຺ຕ, ຠິກ຺ຂຸ ວິມຸຕ຺ຕຈິຕ຺ໂຕ ໂຫຕິ. ວິມຸຕ຺ຕຈິຕ຺ຕຕ຺ຕາ ຂ຺ວາຫໍ, ສາຣິປຸຕ຺ຕ, ມຫາປຸຣິໂສຕິ ວທາມິ, ອວິມຸຕ຺ຕຈິຕ຺ຕຕ຺ຕາ ໂນ ມຫາປຸຣິໂສຕິ ວທາມີ’’ຕິ – ຕໍ ພ຺ຣູມິ ມຫາປຸຣິໂສຕິ.

ໂສ ອິຘ ສິພ຺ພິນິມຈ຺ຈຄາຕິ ສິພ຺ພິນີ ວຸຈ຺ຈຕິ ຕຓ຺ຫາ. ໂຍ ຣາໂຄ ສາຣາໂຄ…ເປ… ອຠິຊ຺ຌາ ໂລໂຠ ອກຸສລມູລໍ, ຍສ຺ເສສາ ສິພ຺ພິນີ ຕຓ຺ຫາ ປຫີນາ ສມຸຈ຺ຉິນ຺ນາ ວູປສນ຺ຕາ ປຏິປສ຺ສທ຺ຘາ ອຠພ຺ພຸປ຺ປຕ຺ຕິກາ ຎາຓຄ຺ຄິນາ ທຑ຺ຒາ. ໂສ ສິພ຺ພິນິໍ ຕຓ຺ຫໍ ອຈ຺ຈຄາ ອຸປຈ຺ຈຄາ ອຕິກ຺ກນ຺ໂຕ ສມຕິກ຺ກນ຺ໂຕ ວີຕິວຕ຺ໂຕຕິ – ໂສ ອິຘ ສິພ຺ພິນິມຈ຺ຈຄາ. ເຕນາຫ ຠຄວາ –

‘‘ໂສ ອຸຠນ຺ຕມຠິຎ຺ຎາຍ, ມຊ຺ເຌ ມນ຺ຕາ ນ ລິປ຺ປຕິ;

ຕໍ ພ຺ຣູມິ ມຫາປຸຣິໂສຕິ, ໂສ ອິຘ ສິພ຺ພິນິມຈ຺ຈຄາ’’ຕິ.

ສຫ ຄາຖາປຣິໂຍສານາ ເຍ ເຕ ພ຺ຣາຫ຺ມເຓນ ສທ຺ຘິໍ ເອກຈ຺ຉນ຺ທາ ເອກປໂຍຄາ ເອກາຘິປ຺ປາຍາ ເອກວາສນວາສິຕາ, ເຕສໍ ອເນກປາຓສຫສ຺ສານໍ ວິຣຊໍ ວີຕມລໍ ຘມ຺ມຈກ຺ຂຸໍ ອຸທປາທິ – ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ. ຕສ຺ສ ພ຺ຣາຫ຺ມຓສ຺ສ ອນຸປາທາຍ ອາສເວຫິ ຈິຕ຺ຕໍ ວິມຸຈ຺ຈິ. ສຫ ອຣຫຕ຺ຕປ຺ປຕ຺ຕາ ອຊິນຊຏາວາກຈີຣຕິທຓ຺ຑກມຓ຺ຑລຸເກສາ ຈ ມສ຺ສູ ຈ ອນ຺ຕຣຫິຕາ. ຠຓ຺ຑຸກາສາຍວຕ຺ຖວສໂນ ສງ຺ຆາຏິປຕ຺ຕຈີວຣຘໂຣ ອນ຺ວຕ຺ຖປຏິປຕ຺ຕິຍາ ປຎ຺ຊລິໂກ ຠຄວນ຺ຕໍ ນມສ຺ສມາໂນ ນິສິນ຺ໂນ ໂຫຕິ – ‘‘ສຕ຺ຖາ ເມ ຠນ຺ເຕ ຠຄວາ, ສາວໂກຫມສ຺ມີ’’ຕິ.

ຕິສ຺ສເມຕ຺ເຕຍ຺ຍມາຓວປຸຈ຺ຉານິທ຺ເທໂສ ທຸຕິໂຍ.