໑໗. ປາຣາຍນຕ຺ຖຸຕິຄາຖານິທ຺ເທໂສ

໙໓. ອິທມໂວຈ ຠຄວາ ມຄເຘສຸ ວິຫຣນ຺ໂຕ ປາສາຓເກ ເຈຕິເຍ, ປຣິຈາຣກໂສຬສານໍ [ປຣິຈາຣິຕໂສຬສນ຺ນໍ (ສ຺ຍາ. ກ.)] ພ຺ຣາຫ຺ມຓານໍ ອຊ຺ຌິຏ຺ໂຐ ປຸຏ຺ໂຐ ປຸຏ຺ໂຐ ປຎ຺ຫໍ ພ຺ຍາກາສິ.

ອິທມໂວຈ ຠຄວາຕິ ອິທໍ ປາຣາຍນໍ ອໂວຈ. ຠຄວາຕິ ຄາຣວາຘິວຈນເມຕໍ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ຠຄວາຕິ – ອິທມໂວຈ ຠຄວາ. ມຄເຘສຸ ວິຫຣນ຺ໂຕຕິ ມຄຘນາມເກ ຊນປເທ ວິຫຣນ຺ໂຕ ອິຣິຍນ຺ໂຕ ວຕ຺ເຕນ຺ໂຕ ປາເລນ຺ໂຕ ຍເປນ຺ໂຕ ຍາເປນ຺ໂຕ. ປາສາຓເກ ເຈຕິເຍຕິ ປາສາຓກເຈຕິຍໍ ວຸຈ຺ຈຕິ ພຸທ຺ຘາສນນ຺ຕິ – ມຄເຘສຸ ວິຫຣນ຺ໂຕ ປາສາຓເກ ເຈຕິເຍ. ປຣິຈາຣກໂສຬສານໍ ພ຺ຣາຫ຺ມຓານນ຺ຕິ ປິງ຺ຄິໂຍ [ສິງ຺ຄິໂຍ (ກ.)] ພ຺ຣາຫ຺ມໂຓ ພາວຣິສ຺ສ ພ຺ຣາຫ຺ມຓສ຺ສ ປທ຺ໂຘ ປທ຺ຘຈໂຣ ປຣິຈາຣໂກ [ປຣິຈາຣິໂກ (ສ຺ຍາ. ກ.)] ສິສ຺ໂສ. ປິງ຺ຄິເຍນ [ເຕນ (ກ.)] ເຕ ໂສຬສາຕິ – ເອວມ຺ປິ ປຣິຈາຣກໂສຬສານໍ ພ຺ຣາຫ຺ມຓານໍ. ອຖ ວາ, ເຕ ໂສຬສ ພ຺ຣາຫ຺ມຓາ ພຸທ຺ຘສ຺ສ ຠຄວໂຕ ປທ຺ຘາ ປທ຺ຘຈຣາ ປຣິຈາຣກາ ສິສ຺ສາຕິ – ເອວມ຺ປິ ປຣິຈາຣກໂສຬສານໍ ພ຺ຣາຫ຺ມຓານໍ.

ອຊ຺ຌິຏ຺ໂຐ ປຸຏ຺ໂຐ ປຸຏ຺ໂຐ ປຎ຺ຫໍ ພ຺ຍາກາສີຕິ. ອຊ຺ຌິຏ຺ໂຐຕິ ອຊ຺ຌິຏ຺ໂຐ ອຊ຺ເຌສິໂຕ. ປຸຏ຺ໂຐ ປຸຏ຺ໂຐຕິ ປຸຏ຺ໂຐ ປຸຏ຺ໂຐ ປຸຈ຺ຉິໂຕ ປຸຈ຺ຉິໂຕ ຍາຈິໂຕ ຍາຈິໂຕ ອຊ຺ເຌສິໂຕ ອຊ຺ເຌສິໂຕ ປສາທິໂຕ ປສາທິໂຕ. ປຎ຺ຫໍ ພ຺ຍາກາສີຕິ ປຎ຺ຫໍ ພ຺ຍາກາສິ ອາຈິກ຺ຂິ ເທເສສິ ປຎ຺ຎເປສິ ປຏ຺ຐເປສິ ວິວຣິ ວິຠຊິ ອຸຕ຺ຕານີອາກາສິ ປກາເສສີຕິ – ອຊ຺ຌິຏ຺ໂຐ ປຸຏ຺ໂຐ ປຸຏ຺ໂຐ ປຎ຺ຫໍ ພ຺ຍາກາສິ. ເຕເນຕໍ ວຸຈ຺ຈຕິ –

‘‘ອິທມໂວຈ ຠຄວາ ມຄເຘສຸ ວິຫຣນ຺ໂຕ ປາສາຓເກ ເຈຕິເຍ, ປຣິຈາຣກໂສຬສານໍ ພ຺ຣາຫ຺ມຓານໍ ອຊ຺ຌິຏ຺ໂຐ ປຸຏ຺ໂຐ ປຸຏ຺ໂຐ ປຎ຺ຫໍ ພ຺ຍາກາສີ’’ຕິ.

໙໔. ເອກເມກສ຺ສ ເຈປິ ປຎ຺ຫສ຺ສ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມໍ ປຏິປຊ຺ເຊຍ຺ຍ, ຄຈ຺ເຉຍ຺ເຍວ ຊຣາມຣຓສ຺ສ ປາຣໍ. ປາຣງ຺ຄມນີຍາ ອິເມ ຘມ຺ມາຕິ. ຕສ຺ມາ ອິມສ຺ສ ຘມ຺ມປຣິຍາຍສ຺ສ ‘‘ປາຣາຍນ’’ນ຺ເຕວ ອຘິວຈນໍ.

ເອກເມກສ຺ສ ເຈປິ ປຎ຺ຫສ຺ສາຕິ ເອກເມກສ຺ສ ເຈປິ ອຊິຕປຎ຺ຫສ຺ສ, ເອກເມກສ຺ສ ເຈປິ ຕິສ຺ສເມຕ຺ເຕຍ຺ຍປຎ຺ຫສ຺ສ, ເອກເມກສ຺ສ ເຈປິ ປຸຓ຺ຓກປຎ຺ຫສ຺ສ, ເອກເມກສ຺ສ ເຈປິ ເມຕ຺ຕຄູປຎ຺ຫສ຺ສ, ເອກເມກສ຺ສ ເຈປິ ໂຘຕກປຎ຺ຫສ຺ສ, ເອກເມກສ຺ສ ເຈປິ ອຸປສີວປຎ຺ຫສ຺ສ, ເອກເມກສ຺ສ ເຈປິ ນນ຺ທກປຎ຺ຫສ຺ສ, ເອກເມກສ຺ສ ເຈປິ ເຫມກປຎ຺ຫສ຺ສ, ເອກເມກສ຺ສ ເຈປິ ໂຕເທຍ຺ຍປຎ຺ຫສ຺ສ, ເອກເມກສ຺ສ ເຈປິ ກປ຺ປປຎ຺ຫສ຺ສ, ເອກເມກສ຺ສ ເຈປິ ຊຕຸກຓ຺ຓິປຎ຺ຫສ຺ສ, ເອກເມກສ຺ສ ເຈປິ ຠທ຺ຣາວຸຘປຎ຺ຫສ຺ສ, ເອກເມກສ຺ສ ເຈປິ ອຸທຍປຎ຺ຫສ຺ສ, ເອກເມກສ຺ສ ເຈປິ ໂປສາລປຎ຺ຫສ຺ສ, ເອກເມກສ຺ສ ເຈປິ ໂມຆຣາຊປຎ຺ຫສ຺ສ, ເອກເມກສ຺ສ ເຈປິ ປິງ຺ຄິຍປຎ຺ຫສ຺ສາຕິ – ເອກເມກສ຺ສ ເຈປິ ປຎ຺ຫສ຺ສ.

ອຕ຺ຖມຎ຺ຎາຍ ຘມ຺ມມຎ຺ຎາຍາຕິ ສ຺ເວວ ປຎ຺ໂຫ ຘມ຺ໂມ, ວິສຊ຺ຊນໍ [ວິສ຺ສຊ຺ຊນໍ (ກ.)] ອຕ຺ໂຖຕິ ອຕ຺ຖໍ ອຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາຕິ – ອຕ຺ຖມຎ຺ຎາຍ. ຘມ຺ມມຎ຺ຎາຍາຕິ ຘມ຺ມໍ ອຎ຺ຎາຍ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາຕິ – ຘມ຺ມມຎ຺ຎາຍາຕິ – ອຕ຺ຖມຎ຺ຎາຍ ຘມ຺ມມຎ຺ຎາຍ. ຘມ຺ມານຸຘມ຺ມໍ ປຏິປຊ຺ເຊຍ຺ຍາຕິ ສມ຺ມາປຏິປທໍ ອນຸໂລມປຏິປທໍ ອປຈ຺ຈນີກປຏິປທໍ ອນ຺ວຕ຺ຖປຏິປທໍ ຘມ຺ມານຸຘມ຺ມປຏິປທໍ ປຏິປຊ຺ເຊຍ຺ຍາຕິ – ຘມ຺ມານຸຘມ຺ມໍ ປຏິປຊ຺ເຊຍ຺ຍ. ຄຈ຺ເຉຍ຺ເຍວ ຊຣາມຣຓສ຺ສ ປາຣນ຺ຕິ ຊຣາມຣຓສ຺ສ ປາຣໍ ວຸຈ຺ຈຕິ ອມຕໍ ນິພ຺ພານໍ. ໂຍ ໂສ ສພ຺ພສງ຺ຂາຣສມໂຖ ສພ຺ພູປຘິປ຺ປຏິນິສ຺ສຄ຺ໂຄ ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ຄຈ຺ເຉຍ຺ເຍວ ຊຣາມຣຓສ຺ສ ປາຣນ຺ຕິ ຊຣາມຣຓສ຺ສ ປາຣໍ ຄຈ຺ເຉຍ຺ຍ, ປາຣໍ ອຘິຄຈ຺ເຉຍ຺ຍ, ປາຣໍ ອຘິຜສ຺ເສຍ຺ຍ, ປາຣໍ ສຈ຺ຉິກເຣຍ຺ຍາຕິ – ຄຈ຺ເຉຍ຺ເຍວ ຊຣາມຣຓສ຺ສ ປາຣໍ. ປາຣງ຺ຄມນີຍາ ອິເມ ຘມ຺ມາຕິ ອິເມ ຘມ຺ມາ ປາຣງ຺ຄມນີຍາ. ປາຣໍ ປາເປນ຺ຕິ ປາຣໍ ສມ຺ປາເປນ຺ຕິ ປາຣໍ ສມນຸປາເປນ຺ຕິ, ຊຣາມຓສ຺ສ ຕຣຓາຍ [ຕາຣຓາຍ (ສ຺ຍາ.)] ສໍວຕ຺ຕນ຺ຕີຕິ – ປາຣງ຺ຄມນີຍາ ອິເມ ຘມ຺ມາຕິ.

ຕສ຺ມາ ອິມສ຺ສ ຘມ຺ມປຣິຍາຍສ຺ສາຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາຕິ – ຕສ຺ມາ. ອິມສ຺ສ ຘມ຺ມປຣິຍາຍສ຺ສາຕິ ອິມສ຺ສ ປາຣາຍນສ຺ສາຕິ – ຕສ຺ມາ ອິມສ຺ສ ຘມ຺ມປຣິຍາຍສ຺ສ. ປາຣາຍນນ຺ເຕວ ອຘິວຈນນ຺ຕິ ປາຣໍ ວຸຈ຺ຈຕິ ອມຕໍ ນິພ຺ພານໍ…ເປ… ນິໂຣໂຘ ນິພ຺ພານໍ. ອຍນໍ ວຸຈ຺ຈຕິ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ…ເປ… ສມ຺ມາສມາຘິ. ອຘິວຈນນ຺ຕິ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປຕິ – ປາຣາຍນນ຺ເຕວ ອຘິວຈນໍ. ເຕເນຕໍ ວຸຈ຺ຈຕິ –

‘‘ເອກເມກສ຺ສ ເຈປິ ປຎ຺ຫສ຺ສ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມໍ ປຏິປຊ຺ເຊຍ຺ຍ, ຄຈ຺ເຉຍ຺ເຍວ ຊຣາມຣຓສ຺ສ ປາຣໍ. ປາຣງ຺ຄມນີຍາ ອິເມ ຘມ຺ມາຕິ. ຕສ຺ມາ ອິມສ຺ສ ຘມ຺ມປຣິຍາຍສ຺ສ ‘ປາຣາຍນ’ນ຺ເຕວ ອຘິວຈນ’’ນ຺ຕິ.

໙໕. ອຊິໂຕ ຕິສ຺ສເມຕ຺ເຕຍ຺ໂຍ, ປຸຓ຺ຓໂກ ອຖ ເມຕ຺ຕຄູ;

ໂຘຕໂກ ອຸປສີໂວ ຈ, ນນ຺ໂທ ຈ ອຖ ເຫມໂກ.

໙໖. ໂຕເທຍ຺ຍກປ຺ປາ ທຸຠໂຍ, ຊຕຸກຓ຺ຓີ ຈ ປຓ຺ຑິໂຕ;

ຠທ຺ຣາວຸໂຘ ອຸທໂຍ ຈ, ໂປສາໂລ ຈາປິ ພ຺ຣາຫ຺ມໂຓ;

ໂມຆຣາຊາ ຈ ເມຘາວີ, ປິງ຺ຄິໂຍ ຈ ມຫາອິສິ.

໙໗. ເອເຕ ພຸທ຺ຘໍ ອຸປາຄຈ຺ຉຸໍ, ສມ຺ປນ຺ນຈຣຓໍ ອິສິໍ;

ປຸຈ຺ຉນ຺ຕາ ນິປຸເຓ ປຎ຺ເຫ, ພຸທ຺ຘເສຏ຺ຐໍ ອຸປາຄມຸໍ.

ເອເຕ ພຸທ຺ຘໍ ອຸປາຄຈ຺ຉຸນ຺ຕິ. ເອເຕຕິ ໂສຬສ ປາຣາຍນິຍາ ພ຺ຣາຫ຺ມຓາ. ພຸທ຺ໂຘຕິ ໂຍ ໂສ ຠຄວາ ສຍມ຺ຠູ ອນາຈຣິຍໂກ ປຸພ຺ເພ ອນນຸສ຺ສຸເຕສຸ ຘມ຺ເມສຸ ສາມໍ ສຈ຺ຈານິ ອຠິສມ຺ພຸຊ຺ຌິ, ຕຕ຺ຖ ຈ ສພ຺ພຎ຺ຎຸຕໍ ປຕ຺ໂຕ ພເລສຸ ຈ ວສີຠາວໍ. ພຸທ຺ໂຘຕິ ເກນຏ຺ເຐນ ພຸທ຺ໂຘ? ພຸຊ຺ຌິຕາ ສຈ຺ຈານີຕິ ພຸທ຺ໂຘ, ໂພເຘຕາ ປຊາຍາຕິ ພຸທ຺ໂຘ, ສພ຺ພຎ຺ຎຸຕາຍ ພຸທ຺ໂຘ, ສພ຺ພທສ຺ສາວິຕາຍ ພຸທ຺ໂຘ, ອຠິຎ຺ເຎຍ຺ຍຕາຍ ພຸທ຺ໂຘ, ວິສວິຕາຍ ພຸທ຺ໂຘ, ຂີຓາສວສງ຺ຂາເຕນ ພຸທ຺ໂຘ, ນິຣຸປເລປສງ຺ຂາເຕນ ພຸທ຺ໂຘ, ເອກນ຺ຕວີຕຣາໂຄຕິ ພຸທ຺ໂຘ, ເອກນ຺ຕວີຕໂທໂສຕິ ພຸທ຺ໂຘ, ເອກນ຺ຕວີຕໂມໂຫຕິ ພຸທ຺ໂຘ, ເອກນ຺ຕນິກ຺ກິເລໂສຕິ ພຸທ຺ໂຘ, ເອກາຍນມຄ຺ຄໍ ຄໂຕຕິ ພຸທ຺ໂຘ, ເອໂກ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘຕິ ພຸທ຺ໂຘ, ອພຸທ຺ຘິວິຫຕຕ຺ຕາ ພຸທ຺ຘິປຏິລາຠາຕິ ພຸທ຺ໂຘ. ພຸທ຺ໂຘຕິ ເນຕໍ ນາມໍ ມາຕຣາ ກຕໍ ນ ປິຕຣາ ກຕໍ ນ ຠາຕຣາ ກຕໍ ນ ຠຄິນິຍາ ກຕໍ ນ ມິຕ຺ຕາມຈ຺ເຈຫິ ກຕໍ ນ ຎາຕິສາໂລຫິເຕຫິ ກຕໍ ນ ສມຓພ຺ຣາຫ຺ມເຓຫິ ກຕໍ ນ ເທວຕາຫິ ກຕໍ. ວິໂມກ຺ຂນ຺ຕິກເມຕໍ ພຸທ຺ຘານໍ ຠຄວນ຺ຕານໍ ໂພຘິຍາ ມູເລ ສຫ ສພ຺ພຎ຺ຎຸຕຎາຓສ຺ສ ປຏິລາຠາ ສຈ຺ຉິກາ ປຎ຺ຎຕ຺ຕິ, ຍທິທໍ ພຸທ຺ໂຘຕິ. ເອເຕ ພຸທ຺ຘໍ ອຸປາຄຈ຺ຉຸນ຺ຕິ ເອເຕ ພຸທ຺ຘໍ ອຸປາຄມິໍສຸ ອຸປສງ຺ກມິໍສຸ ປຍິຣຸປາສິໍສຸ ປຣິປຸຈ຺ຉິໍສຸ ປຣິປຎ຺ຫິໍສູຕິ – ເອເຕ ພຸທ຺ຘໍ ອຸປາຄຈ຺ຉຸໍ.

ສມ຺ປນ຺ນຈຣຓໍ ອິສິນ຺ຕິ ຈຣຓໍ ວຸຈ຺ຈຕິ ສີລາຈາຣນິພ຺ພຕ຺ຕິ. ສີລສໍວໂຣປິ ຈຣຓໍ, ອິນ຺ທ຺ຣິຍສໍວໂຣປິ ຈຣຓໍ, ໂຠຊເນ ມຕ຺ຕຎ຺ຎຸຕາປິ ຈຣຓໍ, ຊາຄຣິຍານຸໂຍໂຄປິ ຈຣຓໍ, ສຕ຺ຕປິ ສທ຺ຘມ຺ມາ ຈຣຓໍ, ຈຕ຺ຕາຣິປິ ຌານານິ ຈຣຓໍ. ສມ຺ປນ຺ນຈຣຓນ຺ຕິ ສມ຺ປນ຺ນຈຣຓໍ ເສຏ຺ຐຈຣຓໍ ວິເສຏ຺ຐຈຣຓໍ [ວິສິຏ຺ຐຈຣຓໍ (ກ.)] ປາໂມກ຺ຂຈຣຓໍ ອຸຕ຺ຕມຈຣຓໍ ປວຣຈຣຓໍ. ອິສີຕິ ອິສິ ຠຄວາ ມຫນ຺ຕໍ ສີລກ຺ຂນ຺ຘໍ ເອສີ ຄເວສີ ປຣິເຍສີຕິ ອິສິ…ເປ… ມເຫສກ຺ເຂຫິ ວາ ສຕ຺ເຕຫິ ເອສິໂຕ ຄເວສິໂຕ ປຣິເຍສິໂຕ – ‘‘ກຫໍ ພຸທ຺ໂຘ, ກຫໍ ຠຄວາ, ກຫໍ ເທວເທໂວ ກຫໍ ນຣາສໂຠ’’ຕິ – ອິສີຕິ – ສມ຺ປນ຺ນຈຣຓໍ ອິສິໍ.

ປຸຈ຺ຉນ຺ຕາ ນິປຸເຓ ປຎ຺ເຫຕິ. ປຸຈ຺ຉນ຺ຕາຕິ ປຸຈ຺ຉນ຺ຕາ ຍາຈນ຺ຕາ ອຊ຺ເຌສນ຺ຕາ ປສາເທນ຺ຕາ. ນິປຸເຓ ປຎ຺ເຫຕິ ຄມ຺ຠີເຣ ທຸທ຺ທເສ ທຸຣນຸໂພເຘ ສນ຺ເຕ ປຓີເຕ ອຕກ຺ກາວຈເຣ ນິປຸເຓ ປຓ຺ຑິຕເວທນີເຍ ປຎ຺ເຫຕິ – ປຸຈ຺ຉນ຺ຕາ ນິປຸເຓ ປຎ຺ເຫ.

ພຸທ຺ຘເສຏ຺ຐໍ ອຸປາຄມຸນ຺ຕິ. ພຸທ຺ໂຘຕິ ໂຍ ໂສ ຠຄວາ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ພຸທ຺ໂຘຕິ. ເສຏ຺ຐນ຺ຕິ ອຄ຺ຄໍ ເສຏ຺ຐໍ ວິເສຏ຺ຐໍ ປາໂມກ຺ຂໍ ອຸຕ຺ຕມໍ ປວຣໍ ພຸທ຺ຘໍ ອຸປາຄມຸໍ ອຸປາຄມິໍສຸ ອຸປສງ຺ກມິໍສຸ ປຍິຣຸປາສິໍສຸ ປຣິປຸຈ຺ຉິໍສຸ ປຣິປຎ຺ຫິໍສູຕິ – ພຸທ຺ຘເສຏ຺ຐໍ ອຸປາຄມຸໍ. ເຕເນຕໍ ວຸຈ຺ຈຕິ –

‘‘ເອເຕ ພຸທ຺ຘໍ ອຸປາຄຈ຺ຉຸໍ, ສມ຺ປນ຺ນຈຣຓໍ ອິສິໍ;

ປຸຈ຺ຉນ຺ຕາ ນິປຸເຓ ປຎ຺ເຫ, ພຸທ຺ຘເສຏ຺ຐໍ ອຸປາຄມຸ’’ນ຺ຕິ.

໙໘. ເຕສໍ ພຸທ຺ໂຘ ປພ຺ຍາກາສິ, ປຎ຺ຫໍ ປຸຏ຺ໂຐ ຍຖາຕຖໍ;

ປຎ຺ຫານໍ ເວຍ຺ຍາກຣເຓນ, ໂຕເສສິ ພ຺ຣາຫ຺ມເຓ ມຸນິ.

ເຕສໍ ພຸທ຺ໂຘ ປພ຺ຍາກາສີຕິ. ເຕສນ຺ຕິ ໂສຬສານໍ ປາຣາຍນິຍານໍ ພ຺ຣາຫ຺ມຓານໍ. ພຸທ຺ໂຘຕິ ໂຍ ໂສ ຠຄວາ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ພຸທ຺ໂຘຕິ. ປພ຺ຍາກາສີຕິ ເຕສໍ ພຸທ຺ໂຘ ປພ຺ຍາກາສິ ອາຈິກ຺ຂິ ເທເສສິ ປຎ຺ຎເປສິ ປຏ຺ຐເປສິ ວິວຣິ ວິຠຊິ ອຸຕ຺ຕານີອກາສິ ປກາເສສີຕິ – ເຕສໍ ພຸທ຺ໂຘ ປພ຺ຍາກາສິ.

ປຎ຺ຫໍ ປຸຏ຺ໂຐ ຍຖາຕຖນ຺ຕິ. ປຎ຺ຫໍ ປຸຏ຺ໂຐຕິ ປຎ຺ຫໍ ປຸຏ຺ໂຐ ປຸຈ຺ຉິໂຕ ຍາຈິໂຕ ອຊ຺ເຌສິໂຕ ປສາທິໂຕ. ຍຖາຕຖນ຺ຕິ ຍຖາ ອາຈິກ຺ຂິຕພ຺ພໍ ຕຖາ ອາຈິກ຺ຂິ, ຍຖາ ເທສິຕພ຺ພໍ ຕຖາ ເທເສສິ, ຍຖາ ປຎ຺ຎເປຕພ຺ພໍ ຕຖາ ປຎ຺ຎເປສິ, ຍຖາ ປຏ຺ຐເປຕພ຺ພໍ ຕຖາ ປຏ຺ຐເປສິ, ຍຖາ ວິວຣິຕພ຺ພໍ ຕຖາ ວິວຣິ, ຍຖາ ວິຠຊິຕພ຺ພໍ ຕຖາ ວິຠຊິ, ຍຖາ ອຸຕ຺ຕານີກາຕພ຺ພໍ ຕຖາ ອຸຕ຺ຕານີອກາສິ, ຍຖາ ປກາສິຕພ຺ພໍ ຕຖາ ປກາເສສີຕິ – ປຎ຺ຫໍ ປຸຏ຺ໂຐ ຍຖາຕຖໍ.

ປຎ຺ຫານໍ ເວຍ຺ຍາກຣເຓນາຕິ ປຎ຺ຫານໍ ເວຍ຺ຍາກຣເຓນ ອາຈິກ຺ຂເນນ ເທສເນນ ປຎ຺ຎປເນນ ປຏ຺ຐປເນນ ວິວຣເຓນ ວິຠຊເນນ ອຸຕ຺ຕານີກມ຺ເມນ ປກາສເນນາຕິ – ປຎ຺ຫານໍ ເວຍ຺ຍາກຣເຓນ.

ໂຕເສສິ ພ຺ຣາຫ຺ມເຓ ມຸນີຕິ. ໂຕເສສີຕິ ໂຕເສສິ ວິໂຕເສສິ ປສາເທສິ ອາຣາເຘສິ ອຕ຺ຕມເນ ອກາສິ. ພ຺ຣາຫ຺ມເຓຕິ ໂສຬສ ປາຣາຍນິເຍ ພ຺ຣາຫ຺ມເຓ. ມຸນີຕິ ໂມນໍ ວຸຈ຺ຈຕິ ຎາຓໍ…ເປ… ສງ຺ຄຊາລມຕິຈ຺ຈ ໂສ ມຸນີຕິ – ໂຕເສສິ ພ຺ຣາຫ຺ມເຓ ມຸນິ. ເຕເນຕໍ ວຸຈ຺ຈຕິ –

‘‘ເຕສໍ ພຸທ຺ໂຘ ປພ຺ຍາກາສິ, ປຎ຺ຫໍ ປຸຏ຺ໂຐ ຍຖາຕຖໍ;

ປຎ຺ຫານໍ ເວຍ຺ຍາກຣເຓນ, ໂຕເສສິ ພ຺ຣາຫ຺ມເຓ ມຸນີ’’ຕິ.

໙໙. ເຕ ໂຕສິຕາ ຈກ຺ຂຸມຕາ, ພຸທ຺ເຘນາທິຈ຺ຈພນ຺ຘຸນາ;

ພ຺ຣຫ຺ມຈຣິຍມຈຣິໍສຸ, ວຣປຎ຺ຎສ຺ສ ສນ຺ຕິເກ.

ເຕ ໂຕສິຕາ ຈກ຺ຂຸມຕາຕິ. ເຕຕິ ໂສຬສ ປາຣາຍນິຍາ ພ຺ຣາຫ຺ມຓາ. ໂຕສິຕາຕິ ໂຕສິຕາ ວິໂຕສິຕາ ປສາທິຕາ ອາຣາຘິຕາ ອຕ຺ຕມນາ ກຕາຕິ – ເຕ ໂຕສິຕາ. ຈກ຺ຂຸມຕາຕິ ຠຄວາ ປຎ຺ຈຫິ ຈກ຺ຂູຫິ ຈກ຺ຂຸມາ – ມໍສຈກ຺ຂຸນາປິ ຈກ຺ຂຸມາ, ທິພ຺ພຈກ຺ຂຸນາປິ ຈກ຺ຂຸມາ, ປຎ຺ຎາຈກ຺ຂຸນາປິ ຈກ຺ຂຸມາ, ພຸທ຺ຘຈກ຺ຂຸນາປິ ຈກ຺ຂຸມາ, ສມນ຺ຕຈກ຺ຂຸນາປິ ຈກ຺ຂຸມາ. ກຖໍ ຠຄວາ ມໍສຈກ຺ຂຸນາປິ ຈກ຺ຂຸມາ…ເປ… ເອວໍ ຠຄວາ ສມນ຺ຕຈກ຺ຂຸນາປິ ຈກ຺ຂຸມາຕິ – ເຕ ໂຕສິຕາ ຈກ຺ຂຸມຕາ.

ພຸທ຺ເຘນາທິຈ຺ຈພນ຺ຘຸນາຕິ. ພຸທ຺ໂຘຕິ ໂຍ ໂສ ຠຄວາ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ພຸທ຺ໂຘຕິ. ອາທິຈ຺ຈພນ຺ຘຸນາຕິ ອາທິຈ຺ໂຈ ວຸຈ຺ຈຕິ ສູຣິໂຍ. ໂສ ໂຄຕໂມ ໂຄຕ຺ເຕນ, ຠຄວາປິ ໂຄຕໂມ ໂຄຕ຺ເຕນ, ຠຄວາ ສູຣິຍສ຺ສ ໂຄຕ຺ຕຎາຕໂກ ໂຄຕ຺ຕພນ຺ຘຸ. ຕສ຺ມາ ພຸທ຺ໂຘ ອາທິຈ຺ຈພນ຺ຘູຕິ – ພຸທ຺ເຘນາທິຈ຺ຈພນ຺ຘຸນາ.

ພ຺ຣຫ຺ມຈຣິຍມຈຣິໍສູຕິ ພ຺ຣຫ຺ມຈຣິຍໍ ວຸຈ຺ຈຕິ ອສທ຺ຘມ຺ມສມາປຕ຺ຕິຍາ ອາຣຕິ ວິຣຕິ ປຏິວິຣຕິ ເວຣມຓີ ວິຣມຓໍ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ. ອປິ ຈ, ນິປ຺ປຣິຍາຍວເສນ ພ຺ຣຫ຺ມຈຣິຍໍ ວຸຈ຺ຈຕິ ອຣິໂຍ ອຏ຺ຐງ຺ຄິໂກ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຈາ, ສມ຺ມາກມ຺ມນ຺ໂຕ, ສມ຺ມາອາຊີໂວ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ. ພ຺ຣຫ຺ມຈຣິຍມຈຣິໍສູຕິ ພ຺ຣຫ຺ມຈຣິຍໍ ຈຣິໍສຸ ອຈຣິໍສຸ ສມາທາຍ ວຕ຺ຕິໍສູຕິ – ພ຺ຣຫ຺ມຈຣິຍມຈຣິໍສຸ.

ວຣປຎ຺ຎສ຺ສ ສນ຺ຕິເກຕິ ວຣປຎ຺ຎສ຺ສ ອຄ຺ຄປຎ຺ຎສ຺ສ ເສຏ຺ຐປຎ຺ຎສ຺ສ ວິເສຏ຺ຐປຎ຺ຎສ຺ສ ປາໂມກ຺ຂປຎ຺ຎສ຺ສ ອຸຕ຺ຕມປຎ຺ຎສ຺ສ ປວຣປຎ຺ຎສ຺ສ. ສນ຺ຕິເກຕິ ສນ຺ຕິເກ ສາມນ຺ຕາ ອາສນ຺ເນ ອວິທູເຣ ອຸປກຏ຺ເຐຕິ – ວຣປຎ຺ຎສ຺ສ ສນ຺ຕິເກ. ເຕເນຕໍ ວຸຈ຺ຈຕິ –

‘‘ເຕ ໂຕສິຕາ ຈກ຺ຂຸມຕາ, ພຸທ຺ເຘນາທິຈ຺ຈພນ຺ຘຸນາ;

ພ຺ຣຫ຺ມຈຣິຍມຈຣິໍສຸ, ວຣປຎ຺ຎສ຺ສ ສນ຺ຕິເກ’’ຕິ.

໑໐໐. ເອກເມກສ຺ສ ປຎ຺ຫສ຺ສ, ຍຖາ ພຸທ຺ເຘນ ເທສິຕໍ;

ຕຖາ ໂຍ ປຏິປຊ຺ເຊຍ຺ຍ, ຄຈ຺ເຉ ປາຣໍ ອປາຣໂຕ.

ເອກເມກສ຺ສ ປຎ຺ຫສ຺ສາຕິ ເອກເມກສ຺ສ ອຊິຕປຎ຺ຫສ຺ສ, ເອກເມກສ຺ສ ຕິສ຺ສເມຕ຺ເຕຍ຺ຍປຎ຺ຫສ຺ສ…ເປ… ເອກເມກສ຺ສ ປິງ຺ຄິຍປຎ຺ຫສ຺ສາຕິ – ເອກເມກສ຺ສ ປຎ຺ຫສ຺ສ.

ຍຖາ ພຸທ຺ເຘນ ເທສິຕນ຺ຕິ. ພຸທ຺ໂຘຕິ ໂຍ ໂສ ຠຄວາ ສຍມ຺ຠູ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ພຸທ຺ໂຘຕິ. ຍຖາ ພຸທ຺ເຘນ ເທສິຕນ຺ຕິ ຍຖາ ພຸທ຺ເຘນ ອາຈິກ຺ຂິຕໍ ເທສິຕໍ ປຎ຺ຎປິຕໍ ປຏ຺ຐປິຕໍ ວິວຣິຕໍ ວິຠຊິຕໍ [ວິຠຕ຺ຕໍ (ສ຺ຍາ.)] ອຸຕ຺ຕານີກຕໍ ປກາສິຕນ຺ຕິ – ຍຖາ ພຸທ຺ເຘນ ເທສິຕໍ.

ຕຖາ ໂຍ ປຏິປຊ຺ເຊຍ຺ຍາຕິ ສມ຺ມາປຏິປທໍ ອນຸໂລມປຏິປທໍ ອປຈ຺ຈນີກປຏິປທໍ ອນ຺ວຕ຺ຖປຏິປທໍ ຘມ຺ມານຸຘມ຺ມປຏິປທໍ ປຏິປຊ຺ເຊຍ຺ຍາຕິ – ຕຖາ ໂຍ ປຏິປຊ຺ເຊຍ຺ຍ.

ຄຈ຺ເຉ ປາຣໍ ອປາຣໂຕຕິ ປາຣໍ ວຸຈ຺ຈຕິ ອມຕໍ ນິພ຺ພານໍ…ເປ… ນິໂຣໂຘ ນິພ຺ພານໍ; ອປາຣໍ ວຸຈ຺ຈນ຺ຕິ ກິເລສາ ຈ ຂນ຺ຘາ ຈ ອຠິສງ຺ຂາຣາ ຈ. ຄຈ຺ເຉ ປາຣໍ ອປາຣໂຕຕິ ອປາຣໂຕ ປາຣໍ ຄຈ຺ເຉຍ຺ຍ, ປາຣໍ ອຘິຄຈ຺ເຉຍ຺ຍ, ປາຣໍ ຜສ຺ເສຍ຺ຍ, ປາຣໍ ສຈ຺ຉິກເຣຍ຺ຍາຕິ – ຄຈ຺ເຉ ປາຣໍ ອປາຣໂຕ. ເຕເນຕໍ ວຸຈ຺ຈຕິ –

‘‘ເອກເມກສ຺ສ ປຎ຺ຫສ຺ສ, ຍຖາ ພຸທ຺ເຘນ ເທສິຕໍ;

ຕຖາ ໂຍ ປຏິປຊ຺ເຊຍ຺ຍ, ຄຈ຺ເຉ ປາຣໍ ອປາຣໂຕ’’ຕິ.

໑໐໑. ອປາຣາ ປາຣໍ ຄຈ຺ເຉຍ຺ຍ, ຠາເວນ຺ໂຕ ມຄ຺ຄມຸຕ຺ຕມໍ;

ມຄ຺ໂຄ ໂສ ປາຣໍ ຄມນາຍ, ຕສ຺ມາ ປາຣາຍນໍ ອິຕິ.

ອປາຣາ ປາຣໍ ຄຈ຺ເຉຍ຺ຍາຕິ ອປາຣໍ ວຸຈ຺ຈນ຺ຕິ ກິເລສາ ຈ ຂນ຺ຘາ ຈ ອຠິສງ຺ຂາຣາ ຈ; ປາຣໍ ວຸຈ຺ຈຕິ ອມຕໍ ນິພ຺ພານໍ…ເປ… ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ອປາຣາ ປາຣໍ ຄຈ຺ເຉຍ຺ຍາຕິ ອປາຣາ ປາຣໍ ຄຈ຺ເຉຍ຺ຍ, ປາຣໍ ອຘິຄຈ຺ເຉຍ຺ຍ, ປາຣໍ ຜສ຺ເສຍ຺ຍ, ປາຣໍ ສຈ຺ຉິກເຣຍ຺ຍາຕິ – ອປາຣາ ປາຣໍ ຄຈ຺ເຉຍ຺ຍ.

ຠາເວນ຺ໂຕ ມຄ຺ຄມຸຕ຺ຕມນ຺ຕິ ມຄ຺ຄມຸຕ຺ຕມໍ ວຸຈ຺ຈຕິ ອຣິໂຍ ອຏ຺ຐງ຺ຄິໂກ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ…ເປ… ສມ຺ມາສມາຘິ. ມຄ຺ຄມຸຕ຺ຕມນ຺ຕິ ມຄ຺ຄໍ ອຄ຺ຄໍ ເສຏ຺ຐໍ ວິເສຏ຺ຐໍ ປາໂມກ຺ຂໍ ອຸຕ຺ຕມໍ ປວຣໍ. ຠາເວນ຺ໂຕຕິ ຠາເວນ຺ໂຕ ອາເສວນ຺ໂຕ ພຫຸລີກໂຣນ຺ໂຕຕິ – ຠາເວນ຺ໂຕ ມຄ຺ຄມຸຕ຺ຕມໍ.

ມຄ຺ໂຄ ໂສ ປາຣໍ ຄມນາຍາຕິ –

ມຄ຺ໂຄ ປນ຺ໂຖ ປໂຖ ປຊ຺ໂຊ [ອທ຺ໂຘ (ກ.)], ອຎ຺ຊສໍ ວຏຸມາຍນໍ;

ນາວາ ອຸຕ຺ຕຣເສຕຸ ຈ, ກຸລ຺ໂລ ຈ ຠິສິ ສງ຺ກໂມ [ສງ຺ຄໂມ (ສ຺ຍາ. ກ.) ປສ຺ສ-ຘາຕຸມາລາຍໍ ມຄ຺ຄຘາຕຸວຓ຺ຓນາຍໍ].

ປາຣໍ ຄມນາຍາຕິ ປາຣໍ ຄມນາຍ ປາຣໍ ສມ຺ປາປນາຍ ປາຣໍ ສມນຸປາປນາຍ ຊຣາມຣຓສ຺ສ ຕຣຓາຍາຕິ – ມຄ຺ໂຄ ໂສ ປາຣໍ ຄມນາຍ.

ຕສ຺ມາ ປາຣາຍນໍ ອິຕີຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ. ປາຣໍ ວຸຈ຺ຈຕິ ອມຕໍ ນິພ຺ພານໍ…ເປ… ນິໂຣໂຘ ນິພ຺ພານໍ. ອຍນໍ ວຸຈ຺ຈຕິ ມຄ຺ໂຄ. ອິຕີຕິ ປທສນ຺ຘິ…ເປ… ປທານຸປຸພ຺ພຕາເປຕໍ ອິຕີຕິ – ຕສ຺ມາ ປາຣາຍນໍ ອິຕິ. ເຕເນຕໍ ວຸຈ຺ຈຕິ –

‘‘ອປາຣາ ປາຣໍ ຄຈ຺ເຉຍ຺ຍ, ຠາເວນ຺ໂຕ ມຄ຺ຄມຸຕ຺ຕມໍ;

ມຄ຺ໂຄ ໂສ ປາຣໍ ຄມນາຍ, ຕສ຺ມາ ປາຣາຍນໍ ອິຕີ’’ຕິ.

ປາຣາຍນຕ຺ຖຸຕິຄາຖານິທ຺ເທໂສ ສຕ຺ຕຣສໂມ.