໑໖. ປິງ຺ຄິຍມາຓວປຸຈ຺ຉານິທ຺ເທໂສ

໘໙. ຊິຓ຺ໂຓຫມສ຺ມິ ອພໂລ ວີຕວຓ຺ໂຓ [ວິວຓ຺ໂຓ (ສ຺ຍາ.)], [ອິຈ຺ຈາຍສ຺ມາ ປິງ຺ຄິໂຍ]

ເນຕ຺ຕາ ນ ສຸທ຺ຘາ ສວນໍ ນ ຜາສຸ;

ມາຫໍ ນສ຺ສໍ ໂມມຸໂຫ ອນ຺ຕຣາວ [ອນ຺ຕຣາຍ (ສ຺ຍາ. ກ.)], ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ;

ຊາຕິຊຣາຍ ອິຘ ວິປ຺ປຫານໍ.

ຊິຓ຺ໂຓຫມສ຺ມິ ອພໂລ ວີຕວຓ຺ໂຓຕິ. ຊິຓ຺ໂຓຫມສ຺ມີຕິ ຊິຓ຺ໂຓ ວຸຑ຺ໂຒ ມຫລ຺ລໂກ ອທ຺ຘຄໂຕ ວໂຍອນຸປ຺ປຕ຺ໂຕ ວີສວສ຺ສສຕິໂກ ຊາຕິຍາ. ອພໂລຕິ ທຸພ຺ພໂລ ອປ຺ປພໂລ ອປ຺ປຖາໂມ. ວີຕວຓ຺ໂຓຕິ ວີຕວຓ຺ໂຓ ວິຄຕວຓ຺ໂຓ ວິຄຈ຺ຉິຕວຓ຺ໂຓ. ຍາ ສາ ປຸຣິມາ ສຸຠາ ວຓ຺ຓນິຠາ ສາ ອນ຺ຕຣຫິຕາ, ອາທີນໂວ ປາຕຸຠູໂຕຕິ – ຊິຓ຺ໂຓຫມສ຺ມິ ອພໂລ ວີຕວຓ຺ໂຓ.

ອິຈ຺ຈາຍສ຺ມາ ປິງ຺ຄິໂຍຕິ. ອິຈ຺ຈາຕິ ປທສນ຺ຘິ…ເປ…. ອາຍສ຺ມາຕິ ປິຍວຈນໍ…ເປ…. ປິງ຺ຄິໂຍຕິ ຕສ຺ສ ພ຺ຣາຫ຺ມຓສ຺ສ ນາມໍ…ເປ… ອຠິລາໂປຕິ – ອິຈ຺ຈາຍສ຺ມາ ປິງ຺ຄິໂຍ.

ເນຕ຺ຕາ ນ ສຸທ຺ຘາ ສວນໍ ນ ຜາສູຕິ ເນຕ຺ຕາ ອສຸທ຺ຘາ ອວິສຸທ຺ຘາ ອປຣິສຸທ຺ຘາ ອໂວທາຕາ. ໂນ ຕຖາ ຈກ຺ຂຸນາ ຣູເປ ປສ຺ສາມີຕິ – ເນຕ຺ຕາ ນ ສຸທ຺ຘາ. ສວນໍ ນ ຜາສູຕິ ໂສຕໍ ອສຸທ຺ຘໍ ອວິສຸທ຺ຘໍ ອປຣິສຸທ຺ຘໍ ອໂວທາຕໍ. ໂນ ຕຖາ ໂສເຕນ ສທ຺ທໍ ສຸໂຓມີຕິ – ເນຕ຺ຕາ ນ ສຸທ຺ຘາ ສວນໍ ນ ຜາສຸ.

ມາຫໍ ນສ຺ສໍ ໂມມຸໂຫ ອນ຺ຕຣາວາຕິ. ມາຫໍ ນສ຺ສນ຺ຕິ ມາຫໍ ນສ຺ສ ມາຫໍ ວິນສ຺ສໍ ມາຫໍ ປນສ຺ສໍ. ໂມມຸໂຫຕິ ໂມຫມຸໂຫ ອວິຊ຺ຊາຄໂຕ ອຎ຺ຎາຓີ ອວິຠາວີ ທຸປ຺ປຎ຺ໂຎ. ອນ຺ຕຣາວາຕິ ຕຸຍ຺ຫໍ ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ອນຎ຺ຎາຍ ອນຘິຄນ຺ຕ຺ວາ ອວິທິຕ຺ວາ ອປ຺ປຏິລຠິຕ຺ວາ ອຜສ຺ສຍິຕ຺ວາ ອສຈ຺ຉິກຣິຕ຺ວາ ອນ຺ຕຣາເຍວ ກາລງ຺ກເຣຍ຺ຍນ຺ຕິ – ມາຫໍ ນສ຺ສໍ ໂມມຸໂຫ ອນ຺ຕຣາວ.

ອາຈິກ຺ຂ ຘມ຺ມໍ ຍມຫໍ ວິຊຎ຺ຎນ຺ຕິ. ຘມ຺ມນ຺ຕິ ອາທິກລ຺ຍາຓໍ ມຊ຺ເຌກລ຺ຍາຓໍ ປຣິໂຍສານກລ຺ຍາຓໍ ສາຕ຺ຖໍ ສພ຺ຍຎ຺ຊນໍ ເກວລປຣິປຸຓ຺ຓໍ ປຣິສຸທ຺ຘໍ ພ຺ຣຫ຺ມຈຣິຍໍ, ຈຕ຺ຕາໂຣ ສຕິປຏ຺ຐາເນ, ຈຕ຺ຕາໂຣ ສມ຺ມປ຺ປຘາເນ, ຈຕ຺ຕາໂຣ ອິທ຺ຘິປາເທ, ປຎ຺ຈິນ຺ທ຺ຣິຍານິ, ປຎ຺ຈ ພລານິ, ສຕ຺ຕ ໂພຊ຺ຌງ຺ເຄ, ອຣິຍໍ ອຏ຺ຐງ຺ຄິກໍ ມຄ຺ຄໍ, ນິພ຺ພານຎ຺ຈ ນິພ຺ພານຄາມິນິຎ຺ຈ ປຏິປທໍ ອາຈິກ຺ຂາຫິ ເທເສຫິ ປຎ຺ຎເປຫິ ປຏ຺ຐເປຫິ ວິວຣາຫິ ວິຠຊາຫິ ອຸຕ຺ຕານີກໂຣຫິ ປກາເສຫີຕິ – ອາຈິກ຺ຂ ຘມ຺ມໍ. ຍມຫໍ ວິຊຎ຺ຎນ຺ຕິ ຍມຫໍ ຊາເນຍ຺ຍໍ ອາຊາເນຍ຺ຍໍ ວິຊາເນຍ຺ຍໍ ປຏິວິຊາເນຍ຺ຍໍ ປຏິວິຊ຺ເຌຍ຺ຍໍ ອຘິຄຈ຺ເຉຍ຺ຍໍ ຜສ຺ເສຍ຺ຍໍ ສຈ຺ຉິກເຣຍ຺ຍນ຺ຕິ – ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ.

ຊາຕິຊຣາຍ ອິຘ ວິປ຺ປຫານນ຺ຕິ ອິເຘວ ຊາຕິຊຣາມຣຓສ຺ສ ປຫານໍ ວູປສມໍ ປຏິນິສ຺ສຄ຺ຄໍ ປຏິປ຺ປສ຺ສທ຺ຘິໍ ອມຕໍ ນິພ຺ພານນ຺ຕິ – ຊາຕິຊຣາຍ ອິຘ ວິປ຺ປຫານໍ. ເຕນາຫ ໂສ ພ຺ຣາຫ຺ມໂຓ –

‘‘ຊິຓ຺ໂຓຫມສ຺ມິ ອພໂລ ວີຕວຓ຺ໂຓ, [ອິຈ຺ຈາຍສ຺ມາ ປິງ຺ຄິໂຍ]

ເນຕ຺ຕາ ນ ສຸທ຺ຘາ ສວນໍ ນ ຜາສຸ;

ມາຫໍ ນສ຺ສໍ ໂມມຸໂຫ ອນ຺ຕຣາວ, ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ;

ຊາຕິຊຣາຍ ອິຘ ວິປ຺ປຫານ’’ນ຺ຕິ.

໙໐. ທິສ຺ວານ ຣູເປສຸ ວິຫຎ຺ຎມາເນ, [ປິງ຺ຄິຍາຕິ ຠຄວາ]

ຣຸປ຺ປນ຺ຕິ ຣູເປສຸ ຊນາ ປມຕ຺ຕາ;

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ, ຊຫສ຺ສຸ ຣູປໍ ອປຸນພ຺ຠວາຍ.

ທິສ຺ວານ ຣູເປສຸ ວິຫຎ຺ຎມາເນຕິ. ຣູປນ຺ຕິ ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍ ຣູປໍ. ສຕ຺ຕາ ຣູປເຫຕຸ ຣູປປ຺ປຈ຺ຈຍາ ຣູປກາຣຓາ ຫຎ຺ຎນ຺ຕິ ວິຫຎ຺ຎນ຺ຕິ ອຸປຫຎ຺ຎນ຺ຕິ ອຸປຆາຕິຍນ຺ຕິ [ອຸປຆາຕຍນ຺ຕິ (ສ຺ຍາ. ກ.)]. ຣູເປ ສຕິ ວິວິຘກມ຺ມກາຣຓາ [ວິວິຘກມ຺ມກຣຓານິ (ກ.)] ກາເຣນ຺ຕິ. ກສາຫິປິ ຕາເຬນ຺ຕິ, ເວຕ຺ເຕຫິປິ ຕາເຬນ຺ຕິ, ອຑ຺ຒທຓ຺ຑເກຫິປິ ຕາເຬນ຺ຕິ, ຫຕ຺ຖມ຺ປິ ຉິນ຺ທນ຺ຕິ, ປາທມ຺ປິ ຉິນ຺ທນ຺ຕິ, ຫຕ຺ຖປາທມ຺ປິ ຉິນ຺ທນ຺ຕິ, ກຓ຺ຓມ຺ປິ ຉິນ຺ທນ຺ຕິ, ນາສມ຺ປິ ຉິນ຺ທນ຺ຕິ, ກຓ຺ຓນາສມ຺ປິ ຉິນ຺ທນ຺ຕິ, ພິລງ຺ຄຖາລິກມ຺ປິ ກໂຣນ຺ຕິ, ສງ຺ຂມຸຓ຺ຑິກມ຺ປິ ກໂຣນ຺ຕິ, ຣາຫຸມຸຂມ຺ປິ ກໂຣນ຺ຕິ, ໂຊຕິມາລິກມ຺ປິ ກໂຣນ຺ຕິ, ຫຕ຺ຖປຊ຺ໂຊຕິກມ຺ປິ ກໂຣນ຺ຕິ, ເອຣກວຕ຺ຕິກມ຺ປິ ກໂຣນ຺ຕິ, ຈີຣກວາສິກມ຺ປິ ກໂຣນ຺ຕິ, ເອເຓຍ຺ຍກມ຺ປິ ກໂຣນ຺ຕິ, ພຬິສມໍສິກມ຺ປິ ກໂຣນ຺ຕິ, ກຫາປຓິກມ຺ປິ ກໂຣນ຺ຕິ, ຂາຣາປຕຈ຺ຉິກມ຺ປິ [ຂາຣາປຏິຈ຺ຉິກມ຺ປິ (ກ.)] ກໂຣນ຺ຕິ, ປລິຆປຣິວຕ຺ຕິກມ຺ປິ ກໂຣນ຺ຕິ, ປລາລປີຐກມ຺ປິ ກໂຣນ຺ຕິ, ຕຕ຺ເຕນປິ ເຕເລນ ໂອສິຎ຺ຈນ຺ຕິ, ສຸນເຂຫິປິ ຂາທາເປນ຺ຕິ, ຊີວນ຺ຕມ຺ປິ ສູເລ ອຸຕ຺ຕາເສນ຺ຕິ, ອສິນາປິ ສີສໍ ຉິນ຺ທນ຺ຕິ. ເອວໍ ສຕ຺ຕາ ຣູປເຫຕຸ ຣູປປ຺ປຈ຺ຈຍາ ຣູປກາຣຓາ ຫຎ຺ຎນ຺ຕິ ວິຫຎ຺ຎນ຺ຕິ ອຸປຫຎ຺ຎນ຺ຕິ ອຸປຆາຕິຍນ຺ຕິ. ເອວໍ ຫຎ຺ຎມາເນ ວິຫຎ຺ຎມາເນ ອຸປຫຎ຺ຎມາເນ ອຸປຆາຕິຍມາເນ ທິສ຺ວາ ປສ຺ສິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາຕິ – ທິສ຺ວານ ຣູເປສຸ ວິຫຎ຺ຎມາເນ.

ປິງ຺ຄິຍາຕິ ຠຄວາຕິ. ປິງ຺ຄິຍາຕິ ຠຄວາ ຕໍ ພ຺ຣາຫ຺ມຓໍ ນາເມນ ອາລປຕິ. ຠຄວາຕິ ຄາຣວາຘິວຈນເມຕໍ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ຠຄວາຕິ – ປິງ຺ຄິຍາຕິ ຠຄວາ.

ຣຸປ຺ປນ຺ຕິ ຣູເປສຸ ຊນາ ປມຕ຺ຕາຕິ. ຣຸປ຺ປນ຺ຕີຕິ ຣຸປ຺ປນ຺ຕິ ກຸປ຺ປນ຺ຕິ ປີຬຍນ຺ຕິ [ປີຬິຍນ຺ຕິ (ສ຺ຍາ. ກ.)] ຆຏ຺ຏຍນ຺ຕິ, ພ຺ຍາຘິຕາ ໂທມນສ຺ສິຕາ ໂຫນ຺ຕິ. ຈກ຺ຂຸໂຣເຄນ ຣຸປ຺ປນ຺ຕິ ກຸປ຺ປນ຺ຕິ ປີຬຍນ຺ຕິ ຆຏ຺ຏຍນ຺ຕິ, ພ຺ຍາຘິຕາ ໂທມນສ຺ສິຕາ ໂຫນ຺ຕິ. ໂສຕໂຣເຄນ…ເປ… ກາຍໂຣເຄນ…ເປ… ຑໍສມກສວາຕາຕປສຣີສປສມ຺ຜສ຺ເສຫິ ຣຸປ຺ປນ຺ຕິ ກຸປ຺ປນ຺ຕິ ປີຬຍນ຺ຕິ ຆຏ຺ຏຍນ຺ຕິ, ພ຺ຍາຘິຕາ ໂທມນສ຺ສິຕາ ໂຫນ຺ຕີຕິ – ຣຸປ຺ປນ຺ຕິ ຣູເປສຸ.

ອຖ ວາ, ຈກ຺ຂຸສ຺ມິໍ ຫີຍມາເນ ຫາຍມາເນ ປຣິຫາຍມາເນ ເວມາເນ [ວິຫາຍມາເນ (ກ.)] ວິຄຈ຺ຉມາເນ ອນ຺ຕຣຘາຍມາເນ ຣຸປ຺ປນ຺ຕິ…ເປ… ໂທມນສ຺ສິຕາ ໂຫນ຺ຕິ. ໂສຕສ຺ມິໍ…ເປ… ຆານສ຺ມິໍ… ຊິວ຺ຫາຍ… ກາຍສ຺ມິໍ… ຣູປສ຺ມິໍ… ສທ຺ທສ຺ມິໍ… ຄນ຺ຘສ຺ມິໍ… ຣສສ຺ມິໍ… ໂຜຏ຺ຐພ຺ພສ຺ມິໍ… ກຸລສ຺ມິໍ… ຄຓສ຺ມິໍ… ອາວາສສ຺ມິໍ… ລາຠສ຺ມິໍ… ຍສສ຺ມິໍ… ປສໍສາຍ… ສຸຂສ຺ມິໍ… ຈີວຣສ຺ມິໍ… ປິຓ຺ຑປາຕສ຺ມິໍ… ເສນາສນສ຺ມິໍ… ຄິລານປຈ຺ຈຍເຠສຊ຺ຊປຣິກ຺ຂາຣສ຺ມິໍ ຫີຍມາເນ ຫາຍມາເນ ປຣິຫາຍມາເນ ເວມາເນ ວິຄຈ຺ຉມາເນ ອນ຺ຕຣຘາຍມາເນ ຣຸປ຺ປນ຺ຕິ ກຸປ຺ປນ຺ຕິ ປີຬຍນ຺ຕິ ຆຏ຺ຏຍນ຺ຕິ, ພ຺ຍາຘິຕາ ໂທມນສ຺ສິຕາ ໂຫນ຺ຕີຕິ – ເອວມ຺ປິ ຣຸປ຺ປນ຺ຕິ ຣູເປສຸ.

ຊນາຕິ ຂຕ຺ຕິຍາ ຈ ພ຺ຣາຫ຺ມຓາ ຈ ເວສ຺ສາ ຈ ສຸທ຺ທາ ຈ ຄຫຏ຺ຐາ ຈ ປພ຺ພຊິຕາ ຈ ເທວາ ຈ ມນຸສ຺ສາ ຈ. ປມຕ຺ຕາຕິ ປມາໂທ ວຕ຺ຕພ຺ໂພ ກາຍທຸຈ຺ຈຣິເຕນ ວາ ວຈີທຸຈ຺ຈຣິເຕນ ວາ ມໂນທຸຈ຺ຈຣິເຕນ ວາ ປຎ຺ຈສຸ ກາມຄຸເຓສຸ ຈິຕ຺ຕສ຺ສ ໂວສຄ຺ໂຄ ໂວສຄ຺ຄານຸປ຺ປທານໍ ກຸສລານໍ ວາ ຘມ຺ມານໍ ຠາວນາຍ ອສກ຺ກຈ຺ຈກິຣິຍຕາ ອສາຕຈ຺ຈກິຣິຍຕາ ອນຏ຺ຐິຕກິຣິຍຕາ ໂອລີນວຸຕ຺ຕິຕາ ນິກ຺ຂິຕ຺ຕຈ຺ຉນ຺ທຕາ ນິກ຺ຂິຕ຺ຕຘຸຣຕາ ອນາເສວນາ ອຠາວນາ ອພຫຸລີກມ຺ມໍ [ອພຫຸລິກມ຺ມໍ (ກ.)] ອນຘິຏ຺ຐານໍ ອນນຸໂຍໂຄ ປມາໂທ. ໂຍ ເອວຣູໂປ ປມາໂທ ປມຊ຺ຊນາ ປມຊ຺ຊິຕຕ຺ຕໍ – ອຍໍ ວຸຈ຺ຈຕິ ປມາໂທ. ອິມິນາ ປມາເທນ ສມນ຺ນາຄຕາ ຊນາ ປມຕ຺ຕາຕິ – ຣຸປ຺ປນ຺ຕິ ຣູເປສຸ ຊນາ ປມຕ຺ຕາ.

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ ເອວໍ ອາທີນວໍ ສມ຺ປສ຺ສມາໂນ ຣູເປສູຕິ – ຕສ຺ມາ ຕຸວໍ ປິງ຺ຄິຍ. ອປ຺ປມຕ຺ໂຕຕິ ສກ຺ກຈ຺ຈກາຣີ ສາຕຈ຺ຈກາຣີ…ເປ… ອປ຺ປມາໂທ ກຸສເລສຸ ຘມ຺ເມສູຕິ – ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ.

ຊຫສ຺ສຸ ຣູປໍ ອປຸນພ຺ຠວາຍາຕິ. ຣູປນ຺ຕິ ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍ ຣູປໍ. ຊຫສ຺ສຸ ຣູປນ຺ຕິ ຊຫສ຺ສຸ ຣູປໍ, ປຊຫສ຺ສຸ ຣູປໍ, ວິໂນເທຫິ ຣູປໍ, ພ຺ຍນ຺ຕີກໂຣຫິ ຣູປໍ, ອນຠາວໍ ຄເມຫິ ຣູປໍ. ອປຸນພ຺ຠວາຍາຕິ ຍຖາ ເຕ ຣູປໍ ອິເຘວ ນິຣຸຊ຺ເຌຍ຺ຍ, ປຸນປຏິສນ຺ຘິໂກ ຠໂວ ນ ນິພ຺ພຕ຺ເຕຍ຺ຍ ກາມຘາຕຸຍາ ວາ ຣູປຘາຕຸຍາ ວາ ອຣູປຘາຕຸຍາ ວາ, ກາມຠເວ ວາ ຣູປຠເວ ວາ ອຣູປຠເວ ວາ, ສຎ຺ຎາຠເວ ວາ ອສຎ຺ຎາຠເວ ວາ ເນວສຎ຺ຎານາສຎ຺ຎາຠເວ ວາ, ເອກໂວກາຣຠເວ ວາ ຈຕຸໂວກາຣຠເວ ວາ ປຎ຺ຈໂວກາຣຠເວ ວາ, ປຸນ ຄຕິຍາ ວາ ອຸປປຕ຺ຕິຍາ ວາ ປຏິສນ຺ຘິຍາ ວາ ຠເວ ວາ ສໍສາເຣ ວາ ວຏ຺ເຏ ວາ ນ ຊເນຍ຺ຍ ນ ສຎ຺ຊເນຍ຺ຍ ນ ນິພ຺ພຕ຺ເຕຍ຺ຍ ນາຠິນິພ຺ພຕ຺ເຕຍ຺ຍ, ອິເຘວ ນິຣຸຊ຺ເຌຍ຺ຍ ວູປສເມຍ຺ຍ ອຕ຺ຖໍ ຄຈ຺ເຉຍ຺ຍ ປຏິປ຺ປສ຺ສມ຺ເຠຍ຺ຍາຕິ – ຊຫສ຺ສຸ ຣູປໍ ອປຸນພ຺ຠວາຍ. ເຕນາຫ ຠຄວາ –

‘‘ທິສ຺ວານ ຣູເປສຸ ວິຫຎ຺ຎມາເນ, [ປິງ຺ຄິຍາຕິ ຠຄວາ]

ຣຸປ຺ປນ຺ຕິ ຣູເປສຸ ຊນາ ປມຕ຺ຕາ;

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ, ຊຫສ຺ສຸ ຣູປໍ ອປຸນພ຺ຠວາຍາ’’ຕິ.

໙໑. ທິສາ ຈຕສ຺ໂສ ວິທິສາ ຈຕສ຺ໂສ, ອຸທ຺ຘໍ ອໂຘ ທສ ທິສາ ອິມາໂຍ;

ນ ຕຸຍ຺ຫໍ ອທິຏ຺ຐໍ ອສ຺ສຸຕໍ ອມຸຕໍ, ອໂຖ ອວິຎ຺ຎາຕໍ ກິຎ຺ຈິ ນມຕ຺ຖິ ໂລເກ;

ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ, ຊາຕິຊຣາຍ ອິຘ ວິປ຺ປຫານໍ.

ທິສາ ຈຕສ຺ໂສ ວິທິສາ ຈຕສ຺ໂສ, ອຸທ຺ຘໍ ອໂຘ ທສ ທິສາ ອິມາໂຍຕິ ທສ ທິສາ.

ນ ຕຸຍ຺ຫໍ ອທິຏ຺ຐໍ ອສ຺ສຸຕໍ ອມຸຕໍ, ອໂຖ ອວິຎ຺ຎາຕໍ ກິຎ຺ຈິ ນມຕ຺ຖິ ໂລເກຕິ ນ ຕຸຍ຺ຫໍ ອທິຏ຺ຐໍ ອສ຺ສຸຕໍ ອມຸຕໍ ອວິຎ຺ຎາຕໍ ກິຎ຺ຈິ ອຕ຺ຕຕ຺ໂຖ ວາ ປຣຕ຺ໂຖ ວາ ອຸຠຍຕ຺ໂຖ ວາ ທິຏ຺ຐຘມ຺ມິໂກ ວາ ອຕ຺ໂຖ ສມ຺ປຣາຍິໂກ ວາ ອຕ຺ໂຖ ອຸຕ຺ຕາໂນ ວາ ອຕ຺ໂຖ ຄມ຺ຠີໂຣ ວາ ອຕ຺ໂຖ ຄູຬ຺ໂຫ ວາ ອຕ຺ໂຖ ປຏິຈ຺ຉນ຺ໂນ ວາ ອຕ຺ໂຖ ເນຍ຺ໂຍ ວາ ອຕ຺ໂຖ ນີໂຕ ວາ ອຕ຺ໂຖ ອນວຊ຺ໂຊ ວາ ອຕ຺ໂຖ ນິກ຺ກິເລໂສ ວາ ອຕ຺ໂຖ ໂວທາໂນ ວາ ອຕ຺ໂຖ ປຣມຕ຺ໂຖ ວາ ນຕ຺ຖິ ນ ສຕິ ນ ສໍວິຊ຺ຊຕິ ນຸປລພ຺ຠຕີຕິ – ນ ຕຸຍ຺ຫໍ ອທິຏ຺ຐໍ ອສ຺ສຸຕໍ ອມຸຕໍ, ອໂຖ ອວິຎ຺ຎາຕໍ ກິຎ຺ຈິ ນມຕ຺ຖິ ໂລເກ.

ອາຈິກ຺ຂ ຘມ຺ມໍ ຍມຫໍ ວິຊຎ຺ຎນ຺ຕິ. ຘມ຺ມນ຺ຕິ ອາທິກລ຺ຍາຓໍ…ເປ… ນິພ຺ພານຎ຺ຈ ນິພ຺ພານຄາມິນິຎ຺ຈ ປຏິປທໍ ອາຈິກ຺ຂາຫິ ເທເສຫິ ປຎ຺ຎເປຫິ ປຏ຺ຐເປຫິ ວິວຣາຫິ ວິຠຊາຫິ ອຸຕ຺ຕານີກໂຣຫິ ປກາເສຫິ. ຍມຫໍ ວິຊຎ຺ຎນ຺ຕິ ຍມຫໍ ຊາເນຍ຺ຍໍ ອາຊາເນຍ຺ຍໍ ວິຊາເນຍ຺ຍໍ ປຏິວິຊາເນຍ຺ຍໍ ປຏິວິຊ຺ເຌຍ຺ຍໍ ອຘິຄຈ຺ເຉຍ຺ຍໍ ຜສ຺ເສຍ຺ຍໍ ສຈ຺ຉິກເຣຍ຺ຍນ຺ຕິ – ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ.

ຊາຕິຊຣາຍ ອິຘ ວິປ຺ປຫານນ຺ຕິ ອິເຘວ ຊາຕິຊຣາມຣຓສ຺ສ ປຫານໍ ວູປສມໍ ປຏິນິສ຺ສຄ຺ຄໍ ປຏິປ຺ປສ຺ສທ຺ຘິໍ ອມຕໍ ນິພ຺ພານນ຺ຕິ – ຊາຕິຊຣາຍ ອິຘ ວິປ຺ປຫານໍ. ເຕນາຫ ໂສ ພ຺ຣາຫ຺ມໂຓ –

‘‘ທິສາ ຈຕສ຺ໂສ ວິທິສາ ຈຕສ຺ໂສ, ອຸທ຺ຘໍ ອໂຘ ທສ ທິສາ ອິມາໂຍ;

ນ ຕຸຍ຺ຫໍ ອທິຏ຺ຐໍ ອສ຺ສຸຕໍ ອມຸຕໍ, ອໂຖ ອວິຎ຺ຎາຕໍ ກິຎ຺ຈິ ນມຕ຺ຖິ ໂລເກ;

ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ, ຊາຕິຊຣາຍ ອິຘ ວິປ຺ປຫານ’’ນ຺ຕິ.

໙໒. ຕຓ຺ຫາຘິປນ຺ເນ ມນຸເຊ ເປກ຺ຂມາໂນ, [ປິງ຺ຄິຍາຕິ ຠຄວາ]

ສນ຺ຕາປຊາເຕ ຊຣສາ ປເຣເຕ;

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ, ຊຫສ຺ສຸ ຕຓ຺ຫໍ ອປຸນພ຺ຠວາຍ.

ຕຓ຺ຫາຘິປນ຺ເນ ມນຸເຊ ເປກ຺ຂມາໂນຕິ. ຕຓ຺ຫາຕິ ຣູປຕຓ຺ຫາ…ເປ… ຘມ຺ມຕຓ຺ຫາ. ຕຓ຺ຫາຘິປນ຺ເນຕິ ຕຓ຺ຫາຘິປນ຺ເນ [ຕຓ຺ຫາຍ ອຘິປນ຺ເນ (ກ.)] ຕຓ຺ຫານຸເຄ ຕຓ຺ຫານຸຄເຕ ຕຓ຺ຫານຸສເຏ ຕຓ຺ຫາຍ ປນ຺ເນ ປຏິປນ຺ເນ ອຠິຠູເຕ ປຣິຍາທິນ຺ນຈິຕ຺ເຕ. ມນຸເຊຕິ ສຕ຺ຕາຘິວຈນໍ. ເປກ຺ຂມາໂນຕິ ເປກ຺ຂມາໂນ ທກ຺ຂມາໂນ ໂອໂລກຍມາໂນ ນິຊ຺ຌາຍມາໂນ ອຸປປຣິກ຺ຂມາໂນຕິ – ຕຓ຺ຫາຘິປນ຺ເນ ມນຸເຊ ເປກ຺ຂມາໂນ. ປິງ຺ຄິຍາຕິ ຠຄວາຕິ. ປິງ຺ຄິຍາຕິ ຠຄວາ ຕໍ ພ຺ຣາຫ຺ມຓໍ ນາເມນ ອາລປຕິ. ຠຄວາຕິ ຄາຣວາຘິວຈນເມຕໍ…ເປ… ສຈ຺ຉິກາ ປຎ຺ຎຕ຺ຕິ, ຍທິທໍ ຠຄວາຕິ – ປິງ຺ຄິຍາຕິ ຠຄວາ.

ສນ຺ຕາປຊາເຕ ຊຣສາ ປເຣເຕຕິ. ສນ຺ຕາປຊາເຕຕິ ຊາຕິຍາ ສນ຺ຕາປຊາເຕ, ຊຣາຍ ສນ຺ຕາປຊາເຕ, ພ຺ຍາຘິນາ ສນ຺ຕາປຊາເຕ, ມຣເຓນ ສນ຺ຕາປຊາເຕ, ໂສກປຣິເທວທຸກ຺ຂໂທມນສ຺ສຸປາຍາເສຫິ ສນ຺ຕາປຊາເຕ, ເນຣຍິເກນ ທຸກ຺ເຂນ ສນ຺ຕາປຊາເຕ…ເປ… ທິຏ຺ຐິພ຺ຍສເນນ ທຸກ຺ເຂນ ສນ຺ຕາປຊາເຕ ອີຕິຊາເຕ ອຸປທ຺ທວຊາເຕ ອຸປສຄ຺ຄຊາເຕຕິ – ສນ຺ຕາປຊາເຕ. ຊຣສາ ປເຣເຕຕິ ຊຣາຍ ຜຸຏ຺ເຐ ປເຣເຕ ສໂມຫິເຕ ສມນ຺ນາຄເຕ. ຊາຕິຍາ ອນຸຄເຕ ຊຣາຍ ອນຸສເຏ ພ຺ຍາຘິນາ ອຠິຠູເຕ ມຣເຓນ ອພ຺ຠາຫເຕ ອຕາເຓ ອເລເຓ ອສຣເຓ ອສຣຓີຠູເຕຕິ – ສນ຺ຕາປຊາເຕ ຊຣສາ ປເຣເຕ.

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ ເອວໍ ອາທີນວໍ ສມ຺ປສ຺ສມາໂນ ຕຓ຺ຫາຍາຕິ – ຕສ຺ມາ ຕຸວໍ ປິງ຺ຄິຍ. ອປ຺ປມຕ຺ໂຕຕິ ສກ຺ກຈ຺ຈກາຣີ…ເປ… ອປ຺ປມາໂທ ກຸສເລສຸ ຘມ຺ເມສູຕິ – ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ.

ຊຫສ຺ສຸ ຕຓ຺ຫໍ ອປຸນພ຺ຠວາຍາຕິ. ຕຓ຺ຫາຕິ ຣູປຕຓ຺ຫາ…ເປ… ຘມ຺ມຕຓ຺ຫາ. ຊຫສ຺ສຸ ຕຓ຺ຫນ຺ຕິ ຊຫສ຺ສຸ ຕຓ຺ຫໍ ປຊຫສ຺ສຸ ຕຓ຺ຫໍ ວິໂນເທຫິ ຕຓ຺ຫໍ ພ຺ຍນ຺ຕີກໂຣຫິ ຕຓ຺ຫໍ ອນຠາວໍ ຄເມຫິ ຕຓ຺ຫໍ. ອປຸນພ຺ຠວາຍາຕິ ຍຖາ ເຕ…ເປ… ປຸນປຏິສນ຺ຘິໂກ ຠໂວ ນ ນິພ຺ພຕ຺ເຕຍ຺ຍ ກາມຘາຕຸຍາ ວາ ຣູປຘາຕຸຍາ ວາ ອຣູປຘາຕຸຍາ ວາ, ກາມຠເວ ວາ ຣູປຠເວ ວາ ອຣູປຠເວ ວາ, ສຎ຺ຎາຠເວ ວາ ອສຎ຺ຎາຠເວ ວາ ເນວສຎ຺ຎານາສຎ຺ຎາຠເວ ວາ, ເອກໂວກາຣຠເວ ວາ ຈຕຸໂວກາຣຠເວ ວາ ປຎ຺ຈໂວກາຣຠເວ ວາ, ປຸນຄຕິຍາ ວາ ອຸປປຕ຺ຕິຍາ ວາ ປຏິສນ຺ຘິຍາ ວາ ຠເວ ວາ ສໍສາເຣ ວາ ວຏ຺ເຏ ວາ ນ ຊເນຍ຺ຍ ນ ສຎ຺ຊເນຍ຺ຍ ນ ນິພ຺ພຕ຺ເຕຍ຺ຍ ນາຠິນິພ຺ພຕ຺ເຕຍ຺ຍ, ອິເຘວ ນິຣຸຊ຺ເຌຍ຺ຍ ວູປສເມຍ຺ຍ ອຕ຺ຖໍ ຄຈ຺ເຉຍ຺ຍ ປຏິປ຺ປສ຺ສມ຺ເຠຍ຺ຍາຕິ – ຊຫສ຺ສຸ ຕຓ຺ຫໍ ອປຸນພ຺ຠວາຍ. ເຕນາຫ ຠຄວາ –

‘‘ຕຓ຺ຫາຘິປນ຺ເນ ມນຸເຊ ເປກ຺ຂມາໂນ, [ປິງ຺ຄິຍາຕິ ຠຄວາ]

ສນ຺ຕາປຊາເຕ ຊຣສາ ປເຣເຕ;

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ, ຊຫສ຺ສຸ ຕຓ຺ຫໍ ອປຸນພ຺ຠວາຍາ’’ຕິ.

ສຫ ຄາຖາປຣິໂຍສານາ ເຍ ເຕ ພ຺ຣາຫ຺ມເຓນ ສທ຺ຘິໍ ເອກຈ຺ຉນ຺ທາ ເອກປໂຍຄາ ເອກາຘິປ຺ປາຍາ ເອກວາສນວາສິຕາ, ເຕສໍ ອເນກປາຓສຫສ຺ສານໍ ວິຣຊໍ ວີຕມລໍ ຘມ຺ມຈກ຺ຂຸໍ ອຸທປາທິ – ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ. ຕສ຺ສ ຈ ພ຺ຣາຫ຺ມຓສ຺ສ ວິຣຊໍ ວີຕມລໍ ຘມ຺ມຈກ຺ຂຸໍ ອຸທປາທິ – ‘‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’’ນ຺ຕິ. ສຫ ຘມ຺ມຈກ຺ຂຸສ຺ສ ປຏິລາຠາ ອຊິນຊຏາວາກຈີຣຕິທຓ຺ຑກມຓ຺ຑລຸເກສາ ຈ ມສ຺ສູ ຈ ອນ຺ຕຣຫິຕາ ຠຓ຺ຑຸກາສາຍວຕ຺ຖວສໂນ ສງ຺ຆາຏິປຕ຺ຕຈີວຣຘໂຣ ອນ຺ວຕ຺ຖປຏິປຕ຺ຕິຍາ ປຎ຺ຊລິໂກ ຠຄວນ຺ຕໍ ນມສ຺ສມາໂນ ນິສິນ຺ໂນ ໂຫຕິ – ‘‘ສຕ຺ຖາ ເມ ຠນ຺ເຕ ຠຄວາ, ສາວໂກຫມສ຺ມີ’’ຕິ.

ປິງ຺ຄິຍມາຓວປຸຈ຺ຉານິທ຺ເທໂສ [ສິງ຺ຄິຍປຎ຺ຫໍ (ກ.)] ໂສຬສໂມ.