໘. ມາຄວິກງ຺ຄປຎ຺ໂຫ

໘. ‘‘ຠນ຺ເຕ ນາຄເສນ, ‘ມາຄວິກສ຺ສ ຈຕ຺ຕາຣິ ອງ຺ຄານິ ຄເຫຕພ຺ພານີ’ຕິ ຍໍ ວເທສິ, ກຕມານິ ຕານິ ຈຕ຺ຕາຣິ ອງ຺ຄານິ ຄເຫຕພ຺ພານີ’’ຕິ? ‘‘ຍຖາ, ມຫາຣາຊ, ມາຄວິໂກ ອປ຺ປມິທ຺ໂຘ ໂຫຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ອປ຺ປມິທ຺ເຘນ ຠວິຕພ຺ພໍ. ອິທໍ, ມຫາຣາຊ, ມາຄວິກສ຺ສ ປຐມໍ ອງ຺ຄໍ ຄເຫຕພ຺ພໍ.

‘‘ປຸນ ຈປຣໍ, ມຫາຣາຊ, ມາຄວິໂກ ມິເຄສຸ ເຍວ ຈິຕ຺ຕໍ ອຸປນິພນ຺ຘຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ອາຣມ຺ມເຓສຸ ເຍວ ຈິຕ຺ຕໍ ອຸປນິພນ຺ຘິຕພ຺ພໍ. ອິທໍ, ມຫາຣາຊ, ມາຄວິກສ຺ສ ທຸຕິຍໍ ອງ຺ຄໍ ຄເຫຕພ຺ພໍ.

‘‘ປຸນ ຈປຣໍ, ມຫາຣາຊ, ມາຄວິໂກ ກາລໍ ກມ຺ມສ຺ສ ຊານາຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ປຏິສລ຺ລານສ຺ສ ກາໂລ ຊານິຕພ຺ໂພ ‘ອຍໍ ກາໂລ ປຏິສລ຺ລານສ຺ສ, ອຍໍ ກາໂລ ນິກ຺ຂມນາຍາ’ຕິ. ອິທໍ, ມຫາຣາຊ, ມາຄວິກສ຺ສ ຕຕິຍໍ ອງ຺ຄໍ ຄເຫຕພ຺ພໍ.

‘‘ປຸນ ຈປຣໍ, ມຫາຣາຊ, ມາຄວິໂກ ມິຄໍ ທິສ຺ວາ ຫາສມຠິຊເນຕິ ‘ອິມໍ ລຈ຺ຉາມີ’ຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ອາຣມ຺ມເຓ ອຠິຣມິຕພ຺ພໍ, ຫາສມຠິຊເນຕພ຺ພໍ ‘ອຸຕ຺ຕຣິໍ ວິເສສມຘິຄຈ຺ຉິສ຺ສາມີ’ຕິ. ອິທໍ, ມຫາຣາຊ, ມາຄວິກສ຺ສ ຈຕຸຕ຺ຖໍ ອງ຺ຄໍ ຄເຫຕພ຺ພໍ. ຠາສິຕມ຺ເປຕໍ ມຫາຣາຊ ເຖເຣນ ໂມຆຣາເຊນ –

‘‘‘ອາຣມ຺ມເຓ ລຠິຕ຺ວານ, ປຫິຕຕ຺ເຕນ ຠິກ຺ຂຸນາ;

ຠິຍ຺ໂຍ ຫາໂສ ຊເນຕພ຺ໂພ, ອຘິຄຈ຺ຉິສ຺ສາມິ ອຸຕ຺ຕຣິ’’’ນ຺ຕິ.

ມາຄວິກງ຺ຄປຎ຺ໂຫ ອຏ຺ຐໂມ.