໕. ອຸລູກງ຺ຄປຎ຺ໂຫ

໕. ‘‘ຠນ຺ເຕ ນາຄເສນ, ‘ອຸລູກສ຺ສ ທ຺ເວ ອງ຺ຄານິ ຄເຫຕພ຺ພານີ’ຕິ ຍໍ ວເທສິ, ກຕມານິ ຕານິ ທ຺ເວ ອງ຺ຄານິ ຄເຫຕພ຺ພານີ’’ຕິ? ‘‘ຍຖາ, ມຫາຣາຊ, ອຸລູໂກ ກາເກຫິ ປຏິວິຣຸທ຺ໂຘ, ຣຕ຺ຕິໍ ກາກສງ຺ຆໍ ຄນ຺ຕ຺ວາ ພຫູປິ ກາເກ ຫນຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ອຎ຺ຎາເຓນ ປຏິວິຣຸທ຺ໂຘ ກາຕພ຺ໂພ, ເອເກນ ຣໂຫ ນິສີທິຕ຺ວາ ອຎ຺ຎາຓໍ ສມ຺ປມທ຺ທິຕພ຺ພໍ, ມູລໂຕ ຉິນ຺ທິຕພ຺ພໍ. ອິທໍ, ມຫາຣາຊ, ອຸລູກສ຺ສ ປຐມໍ ຄເຫຕພ຺ພໍ.

‘‘ປຸນ ຈປຣໍ, ມຫາຣາຊ, ອຸລູໂກ ສຸປ຺ປຏິສລ຺ລີໂນ ໂຫຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ປຏິສລ຺ລານາຣາເມນ ຠວິຕພ຺ພໍ ປຏິສລ຺ລານຣເຕນ. ອິທໍ, ມຫາຣາຊ, ອຸລູກສ຺ສ ທຸຕິຍໍ ອງ຺ຄໍ ຄເຫຕພ຺ພໍ. ຠາສິຕມ຺ເປຕໍ, ມຫາຣາຊ, ຠຄວຕາ ເທວາຕິເທເວນ ສໍຍຸຕ຺ຕນິກາຍວເຣ –

‘‘‘ອິຘ, ຠິກ຺ຂເວ, ຠິກ຺ຂຸ ປຏິສລ຺ລານາຣາໂມ ປຏິສລ຺ລານຣໂຕ ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂສມຸທໂຍ’’ຕິ ຍຖາ ຠູຖໍ ປຊານາຕິ, ‘‘ອຍໍ ທຸກ຺ຂນິໂຣໂຘ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣຘຄາມິນີ ປຏິປທາ’’ຕິ ຍຖາຠູຕໍ ປຊານາຕີ’’’ຕິ.

ອຸລູກງ຺ຄປຎ຺ໂຫ ປຎ຺ຈໂມ.