໗. ມິຄງ຺ຄປຎ຺ໂຫ

໗. ‘‘ຠນ຺ເຕ ນາຄເສນ, ‘ມິຄສ຺ສ ຕີຓິ ອງ຺ຄານິ ຄເຫຕພ຺ພານີ’ຕິ ຍໍ ວເທສິ, ກຕມານິ ຕານິ ຕີຓິ ອງ຺ຄານິ ຄເຫຕພ຺ພານີ’’ຕິ? ‘‘ຍຖາ, ມຫາຣາຊ, ມິໂຄ ທິວາ ອຣຎ຺ເຎ ຈຣຕິ, ຣຕ຺ຕິໍ ອພ຺ໂຠກາເສ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ທິວາ ອຣຎ຺ເຎ ວິຫຣິຕພ຺ພໍ, ຣຕ຺ຕິໍ ອພ຺ໂຠກາເສ. ອິທໍ, ມຫາຣາຊ, ມິຄສ຺ສ ປຐມໍ ອງ຺ຄໍ ຄເຫຕພ຺ພໍ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ເທວາຕິເທເວນ ໂລມຫໍສນປຣິຍາເຍ –

‘ໂສ ໂຂ ອຫໍ, ສາຣິປຸຕ຺ຕ, ຍາ ຕາ ຣຕ຺ຕິໂຍ ສີຕາ ເຫມນ຺ຕິກາ ອນ຺ຕຣຏ຺ຐກາ ຫິມປາຕສມຍາ [ອນ຺ຕຣຏ຺ຐເກ ຫິມປາຕສມເຍ (ສີ. ປີ. ກ.)], ຕຖາຣູປາສຸ ຣຕ຺ຕີສຸ ຣຕ຺ຕິໍ ອພ຺ໂຠກາເສ ວິຫຣາມິ, ທິວາ ວນສຓ຺ເຑ. ຄິມ຺ຫານໍ ປຈ຺ຉິເມ ມາເສ ທິວາ ອພ຺ໂຠກາເສ ວິຫຣາມິ, ຣຕ຺ຕິໍ ວນສຓ຺ເຑ’ຕິ.

‘‘ປຸນ ຈປຣໍ, ມຫາຣາຊ, ມິໂຄ ສຕ຺ຕິມ຺ຫິ ວາ ສເຣ ວາ ໂອປຕນ຺ເຕ ວຎ຺ເຈຕິ [ວຊ຺ເຊຕິ (ກ.)] ປລາຍຕິ, ນ ກາຍມຸປເນຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ກິເລເສສຸ ໂອປຕນ຺ເຕສຸ ວຎ຺ຈຍິຕພ຺ພໍ [ວຊ຺ຊຍິຕພ຺ພໍ (ກ.)] ປລາຍິຕພ຺ພໍ, ນ ຈິຕ຺ຕມຸປເນຕພ຺ພໍ. ອິທໍ, ມຫາຣາຊ, ມິຄສ຺ສ ທຸຕິຍໍ ອງ຺ຄໍ ຄເຫຕພ຺ພໍ.

‘‘ປຸນ ຈປຣໍ, ມຫາຣາຊ, ມິໂຄ ມນຸສ຺ເສ ທິສ຺ວາ ເຍນ ວາ ເຕນ ວາ ປລາຍຕິ ‘ມາ ມໍ ເຕ ອທ຺ທສໍສູ’ຕິ, ເອວເມວ ໂຂ, ມຫາຣາຊ, ໂຍຄິນາ ໂຍຄາວຈເຣນ ຠຓ຺ຑນກລຫວິຄ຺ຄຫວິວາທສີເລ ທຸສ຺ສີເລ ກຸສີເຕ ສງ຺ຄຓິກາຣາເມ ທິສ຺ວາ ເຍນ ວາ ເຕນ ວາ ປລາຍິຕພ຺ພໍ ‘ມາ ມໍ ເຕ ອທ຺ທສໍສຸ, ອຫຎ຺ຈ ເຕ ມາ ອທ຺ທສ’ນ຺ຕິ. ອິທໍ, ມຫາຣາຊ, ມິຄສ຺ສ ຕຕິຍໍ ອງ຺ຄໍ ຄເຫຕພ຺ພໍ. ຠາສິຕມ຺ເປຕໍ, ມຫາຣາຊ, ເຖເຣນ ສາຣິປຸຕ຺ເຕນ ຘມ຺ມເສນາປຕິນາ –

‘‘‘ມາ ເມ ກທາຈິ ປາປິຈ຺ໂຉ, ກຸສີໂຕ ຫີນວີຣິໂຍ;

ອປ຺ປສ຺ສຸໂຕ ອນາຈາໂຣ, ສມ຺ມໂຕ [ສເມໂຕ (ສີ. ປີ.)] ອຫຸ ກຕ຺ຖຈີ’’’ຕິ.

ມິຄງ຺ຄປຎ຺ໂຫ ສຕ຺ຕໂມ.