໗. ເຈຕິຍປາຏິຫາຣິຍປຎ຺ໂຫ

໗. ‘‘ຠນ຺ເຕ ນາຄເສນ, ສພ຺ເພສໍ ປຣິນິພ຺ພຸຕານໍ ເຈຕິເຍ ປາຏິຫີຣໍ ໂຫຕິ, ອຸທາຫຸ ເອກຈ຺ຈານໍ ເຍວ ໂຫຕີ’’ຕິ? ‘‘ເອກຈ຺ຈານໍ, ມຫາຣາຊ, ໂຫຕິ, ເອກຈ຺ຈານໍ ນ ໂຫຕີ’’ຕິ. ‘‘ກຕເມສໍ, ຠນ຺ເຕ, ໂຫຕິ, ກຕເມສໍ ນ ໂຫຕີ’’ຕິ? ‘‘ຕິຓ຺ຓນ຺ນໍ, ມຫາຣາຊ, ອຎ຺ຎຕຣສ຺ສ ອຘິຏ຺ຐານາ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ໂຫຕິ. ກຕເມສໍ ຕິຓ຺ຓນ຺ນໍ? ອິຘ, ມຫາຣາຊ, ອຣຫາ ເທວມນຸສ຺ສານໍ ອນຸກມ຺ປາຍ ຕິຏ຺ຐນ຺ໂຕວ ອຘິຏ຺ຐາຕິ ‘ເອວໍນາມ ເຈຕິເຍ ປາຏິຫີຣໍ ໂຫຕູ’ຕິ, ຕສ຺ສ ອຘິຏ຺ຐານວເສນ ເຈຕິເຍ ປາຏິຫີຣໍ ໂຫຕິ, ເອວໍ ອຣຫໂຕ ອຘິຏ຺ຐານວເສນ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ໂຫຕິ.

‘‘ປຸນ ຈປຣໍ, ມຫາຣາຊ, ເທວຕາ ມນຸສ຺ສານໍ ອນຸກມ຺ປາຍ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ທສ຺ເສນ຺ຕິ ‘ອິມິນາ ປາຏິຫີເຣນ ສທ຺ຘມ຺ໂມ ນິຈ຺ຈສມ຺ປຄ຺ຄຫິໂຕ ຠວິສ຺ສຕິ, ມນຸສ຺ສາ ຈ ປສນ຺ນາ ກຸສເລນ ອຠິວຑ຺ຒິສ຺ສນ຺ຕີ’ຕິ, ເອວໍ ເທວຕານໍ ອຘິຏ຺ຐານວເສນ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ໂຫຕິ.

‘‘ປຸນ ຈປຣໍ, ມຫາຣາຊ, ອິຕ຺ຖີ ວາ ປຸຣິໂສ ວາ ສທ຺ໂຘ ປສນ຺ໂນ ປຓ຺ຑິໂຕ ພ຺ຍຕ຺ໂຕ ເມຘາວີ ພຸທ຺ຘິສມ຺ປນ຺ໂນ ໂຍນິໂສ ຈິນ຺ຕຍິຕ຺ວາ ຄນ຺ຘໍ ວາ ມາລໍ ວາ ທຸສ຺ສໍ ວາ ອຎ຺ຎຕຣໍ ວາ ກິຎ຺ຈິ ອຘິຏ຺ຐຫິຕ຺ວາ ເຈຕິເຍ ອຸກ຺ຂິປຕິ ‘ເອວໍນາມ ໂຫຕູ’ຕິ, ຕສ຺ສປິ ອຘິຏ຺ຐານວເສນ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ໂຫຕິ, ເອວໍ ມນຸສ຺ສານໍ ອຘິຏ຺ຐານວເສນ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ໂຫຕິ.

‘‘ອິເມສໍ ໂຂ, ມຫາຣາຊ, ຕິຓ຺ຓນ຺ນໍ ອຎ຺ຎຕຣສ຺ສ ອຘິຏ຺ຐານວເສນ ປຣິນິພ຺ພຸຕສ຺ສ ເຈຕິເຍ ປາຏິຫີຣໍ ໂຫຕິ.

‘‘ຍທິ, ມຫາຣາຊ, ເຕສໍ ອຘິຏ຺ຐານໍ ນ ໂຫຕິ, ຂີຓາສວສ຺ສປິ ຉຬຠິຎ຺ຎສ຺ສ ເຈໂຕວສິປ຺ປຕ຺ຕສ຺ສ ເຈຕິເຍ ປາຏິຫີຣໍ ນ ໂຫຕິ, ອສຕິປິ, ມຫາຣາຊ, ປາຏິຫີເຣ ຈຣິຕໍ ທິສ຺ວາ ສຸປຣິສຸທ຺ຘໍ ໂອກປ຺ເປຕພ຺ພໍ ນິຏ຺ຐໍ ຄນ຺ຕພ຺ພໍ ສທ຺ທຫິຕພ຺ພໍ ‘ສຸປຣິນິພ຺ພຸໂຕ ອຍໍ ພຸທ຺ຘປຸຕ຺ໂຕ’’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ເຈຕິຍປາຏິຫາຣິຍປຎ຺ໂຫ ສຕ຺ຕໂມ.