໘. ຘມ຺ມາຠິສມຍປຎ຺ໂຫ

໘. ‘‘ຠນ຺ເຕ ນາຄເສນ, ເຍ ເຕ ສມ຺ມາ ປຏິປຊ຺ຊນ຺ຕິ, ເຕສໍ ສພ຺ເພສໍ ເຍວ ຘມ຺ມາຠິສມໂຍ ໂຫຕິ, ອຸທາຫຸ ກສ຺ສຈິ ນ ໂຫຕີ’’ຕິ? ‘‘ກສ຺ສຈິ, ມຫາຣາຊ, ໂຫຕິ, ກສ຺ສຈິ ນ ໂຫຕີ’’ຕິ. ‘‘ກສ຺ສ ຠນ຺ເຕ ໂຫຕິ, ກສ຺ສ ນ ໂຫຕີ’’ຕິ? ‘‘ຕິຣຈ຺ຉານຄຕສ຺ສ, ມຫາຣາຊ, ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ, ເປຕ຺ຕິວິສຍູປປນ຺ນສ຺ສ…ເປ… ມິຈ຺ຉາທິຏ຺ຐິກສ຺ສ…ເປ… ກຸຫກສ຺ສ…ເປ… ມາຕຸຆາຕກສ຺ສ…ເປ… ປິຕຸຆາຕກສ຺ສ…ເປ… ອຣຫນ຺ຕຆາຕກສ຺ສ…ເປ… ສງ຺ຆເຠທກສ຺ສ…ເປ… ໂລຫິຕຸປ຺ປາທກສ຺ສ…ເປ… ເຖຍ຺ຍສໍວາສກສ຺ສ…ເປ… ຕິຕ຺ຖິຍປກ຺ກນ຺ຕສ຺ສ…ເປ… ຠິກ຺ຂຸນິທູສກສ຺ສ…ເປ… ເຕຣສນ຺ນໍ ຄຣຸກາປຕ຺ຕີນໍ ອຎ຺ຎຕຣໍ ອາປຊ຺ຊິຕ຺ວາ ອວຸຏ຺ຐິຕສ຺ສ…ເປ… ປຓ຺ຑກສ຺ສ…ເປ… ອຸຠໂຕພ຺ຍຎ຺ຊນກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ…ເປ… ໂຍປິ ມນຸສ຺ສທຫຣໂກ ອູນກສຕ຺ຕວສ຺ສິໂກ, ຕສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ. ອິເມສໍ ໂຂ, ມຫາຣາຊ, ໂສຬສນ຺ນໍ ປຸຄ຺ຄລານໍ ສຸປ຺ປຏິປນ຺ນານມ຺ປິ ຘມ຺ມາຠິສມໂຍ ນ ໂຫຕີ’’ຕິ.

‘‘ຠນ຺ເຕ ນາຄເສນ, ເຍ ເຕ ປນ຺ນຣສ ປຸຄ຺ຄລາ ວິຣຸທ຺ຘາ ເຍວ, ເຕສໍ ຘມ຺ມາຠິສມໂຍ ໂຫຕຸ ວາ ມາ ວາ ໂຫຕຸ, ອຖ ເກນ ກາຣເຓນ ມນຸສ຺ສທຫຣກສ຺ສ ອູນກສຕ຺ຕວສ຺ສິກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ? ເອຕ຺ຖ ຕາວ ປຎ຺ໂຫ ຠວຕິ ‘ນນຸ ນາມ ທຫຣກສ຺ສ ນ ຣາໂຄ ໂຫຕິ, ນ ໂທໂສ ໂຫຕິ, ນ ໂມໂຫ ໂຫຕິ, ນ ມາໂນ ໂຫຕິ, ນ ມິຈ຺ຉາທິຏ຺ຐິ ໂຫຕິ, ນ ອຣຕິ ໂຫຕິ, ນ ກາມວິຕກ຺ໂກ ໂຫຕິ, ອມິສ຺ສິໂຕ ກິເລເສຫິ, ໂສ ນາມ ທຫຣໂກ ຍຸຕ຺ໂຕ ຈ ປຕ຺ໂຕ ຈ ອຣຫຕິ ຈ ຈຕ຺ຕາຣິ ສຈ຺ຈານິ ເອກປຏິເວເຘນ ປຏິວິຊ຺ຌິຕຸ’’’ນ຺ຕິ.

‘‘ຕຎ຺ເຎເວຕ຺ຖ, ມຫາຣາຊ, ກາຣຓໍ, ເຍນາຫໍ ກາຣເຓນ ຠຓາມິ ‘ອູນກສຕ຺ຕວສ຺ສິກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕີ’ຕິ. ຍທິ, ມຫາຣາຊ, ອູນກສຕ຺ຕວສ຺ສິໂກ ຣຊນີເຍ ຣຊ຺ເຊຍ຺ຍ, ທຸສ຺ສນີເຍ ທຸສ຺ເສຍ຺ຍ, ໂມຫນີເຍ ມຸຍ຺ເຫຍ຺ຍ, ມທນີເຍ ມຊ຺ເຊຍ຺ຍ, ທິຏ຺ຐິໍ ວິຊາເນຍ຺ຍ, ຣຕິຎ຺ຈ ອຣຕິຎ຺ຈ ວິຊາເນຍ຺ຍ, ກຸສລາກຸສລໍ ວິຕກ຺ເກຍ຺ຍ, ຠເວຍ຺ຍ ຕສ຺ສ ຘມ຺ມາຠິສມໂຍ, ອປິ ຈ, ມຫາຣາຊ, ອູນກສຕ຺ຕວສ຺ສິກສ຺ສ ຈິຕ຺ຕໍ ອພລໍ ທຸພ຺ພລໍ ປຣິຕ຺ຕໍ ອປ຺ປໍ ໂຖກໍ ມນ຺ທໍ ອວິຠູຕໍ, ອສງ຺ຂຕາ ນິພ຺ພານຘາຕຸ ຄຣຸກາ ຠາຣິກາ ວິປຸລາ ມຫຕີ. ອູນກສຕ຺ຕວສ຺ສິໂກ, ມຫາຣາຊ, ເຕນ ທຸພ຺ພເລນ ຈິຕ຺ເຕນ ປຣິຕ຺ຕເກນ ມນ຺ເທນ ອວິຠູເຕນ ນ ສກ຺ໂກຕິ ຄຣຸກໍ ຠາຣິກໍ ວິປຸລໍ ມຫຕິໍ ອສງ຺ຂຕໍ ນິພ຺ພານຘາຕຸໍ ປຏິວິຊ຺ຌິຕຸໍ.

‘‘ຍຖາ, ມຫາຣາຊ, ສິເນຣຸປພ຺ພຕຣາຊາ ຄຣຸໂກ ຠາຣິໂກ ວິປຸໂລ ມຫນ຺ໂຕ, ອປິ ນຸ ໂຂ ຕໍ, ມຫາຣາຊ, ປຸຣິໂສ ອຕ຺ຕໂນ ປາກຕິເກນ ຖາມພລວີຣິເຍນ ສກ຺ກຸເຓຍ຺ຍ ສິເນຣຸປພ຺ພຕຣາຊານໍ ອຸທ຺ຘຣິຕຸ’’ນ຺ຕິ? ‘‘ນ ຫິ, ຠນ຺ເຕ’’ຕິ. ‘‘ເກນ ກາຣເຓນ ມຫາຣາຊາ’’ຕິ? ‘‘ທຸພ຺ພລຕ຺ຕາ, ຠນ຺ເຕ, ປຸຣິສສ຺ສ, ມຫນ຺ຕຕ຺ຕາ ສິເນຣຸປພ຺ພຕຣາຊສ຺ສາ’’ຕິ. ‘‘ເອວເມວ ໂຂ, ມຫາຣາຊ, ອູນກສຕ຺ຕວສ຺ສິກສ຺ສ ຈິຕ຺ຕໍ ອພລໍ ທຸພ຺ພລໍ ປຣິຕ຺ຕໍ ອປ຺ປໍ ໂຖກໍ ມນ຺ທໍ ອວິຠູຕໍ, ອສງ຺ຂຕາ ນິພ຺ພານຘາຕຸ ຄຣຸກາ ຠາຣິກາ ວິປຸລາ ມຫຕີ. ອູນກສຕ຺ຕວສ຺ສິໂກ ເຕນ ທຸພ຺ພເລນ ຈິຕ຺ເຕນ ປຣິຕ຺ເຕນ ມນ຺ເທນ ອວິຠູເຕນ ນ ສກ຺ໂກຕິ ຄຣຸກໍ ຠາຣິກໍ ວິປຸລໍ ມຫຕິໍ ອສງ຺ຂຕໍ ນິພ຺ພານຘາຕຸໍ ປຏິວິຊ຺ຌິຕຸໍ, ເຕນ ກາຣເຓນ ອູນກສຕ຺ຕວສ຺ສິກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ.

‘‘ຍຖາ ວາ ປນ, ມຫາຣາຊ, ອຍໍ ມຫາປຖວີ ທີຆາ ອາຍຕາ ປຸຖຸລາ ວິຕ຺ຖຕາ ວິສາລາ ວິຕ຺ຖິຓ຺ຓາ ວິປຸລາ ມຫນ຺ຕາ, ອປິ ນຸ ໂຂ ຕໍ, ມຫາຣາຊ, ມຫາປຖວິໍ ສກ຺ກາ ປຣິຕ຺ຕເກນ ອຸທກພິນ຺ທຸເກນ ເຕເມຕ຺ວາ ອຸທກຈິກ຺ຂລ຺ລໍ ກາຕຸ’’ນ຺ຕິ? ‘‘ນ ຫິ, ຠນ຺ເຕ’’ຕິ. ‘‘ເກນ ກາຣເຓນ, ມຫາຣາຊາ’’ຕິ? ‘‘ປຣິຕ຺ຕຕ຺ຕາ, ຠນ຺ເຕ, ອຸທກພິນ຺ທຸສ຺ສ, ມຫນ຺ຕຕ຺ຕາ ມຫາປຖວິຍາ’’ຕິ. ‘‘ເອວເມວ ໂຂ, ມຫາຣາຊ, ອູນກສຕ຺ຕວສ຺ສິກສ຺ສ ຈິຕ຺ຕໍ ອພລໍ ທຸພ຺ພລໍ ປຣິຕ຺ຕໍ ອປ຺ປໍ ໂຖກໍ ມນ຺ທໍ ອວິຠູຕໍ, ອສງ຺ຂຕາ ນິພ຺ພານຘາຕຸ ທີຆາ ອາຍຕາ ປຸຖຸລາ ວິຕ຺ຖຕາ ວິສາລາ ວິຕ຺ຖິຓ຺ຓາ ວິປຸລາ ມຫນ຺ຕາ. ອູນກສຕ຺ຕວສ຺ສິໂກ ເຕນ ທຸພ຺ພເລນ ຈິຕ຺ເຕນ ປຣິຕ຺ຕເກນ ມນ຺ເທນ ອວິຠູເຕນ ນ ສກ຺ໂກຕິ ມຫຕິໍ ອສງ຺ຂຕໍ ນິພ຺ພານຘາຕຸໍ ປຏິວິຊ຺ຌິຕຸໍ, ເຕນ ກາຣເຓນ ອູນກສຕ຺ຕວສ຺ສິກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ.

‘‘ຍຖາ ວາ ປນ, ມຫາຣາຊ, ອພລທຸພ຺ພລປຣິຕ຺ຕອປ຺ປໂຖກມນ຺ທຄ຺ຄິ ຠເວຍ຺ຍ, ອປິ ນຸ ໂຂ, ມຫາຣາຊ, ຕາວຕເກນ ມນ຺ເທນ ອຄ຺ຄິນາ ສກ຺ກາ ສເທວເກ ໂລເກ ອນ຺ຘກາຣໍ ວິຘມິຕ຺ວາ ອາໂລກໍ ທສ຺ເສຕຸ’’ນ຺ຕິ? ‘‘ນ ຫິ, ຠນ຺ເຕ’’ຕິ. ‘‘ເກນ ກາຣເຓນ ມຫາຣາຊາ’’ຕິ? ‘‘ມນ຺ທຕ຺ຕາ, ຠນ຺ເຕ, ອຄ຺ຄິສ຺ສ, ໂລກສ຺ສ ມຫນ຺ຕຕ຺ຕາ’’ຕິ. ‘‘ເອວເມວ ໂຂ, ມຫາຣາຊ, ອູນກສຕ຺ຕວສ຺ສິກສ຺ສ ຈິຕ຺ຕໍ ອພລໍ ທຸພ຺ພລໍ ປຣິຕ຺ຕໍ ອປ຺ປໍ ໂຖກໍ ມນ຺ທໍ ອວິຠູຕໍ, ມຫຕາ ຈ ອວິຊ຺ຊນ຺ຘກາເຣນ ປິຫິຕໍ. ຕສ຺ມາ ທຸກ຺ກຣໍ ຎາຓາໂລກໍ ທສ຺ສຍິຕຸໍ, ເຕນ ກາຣເຓນ ອູນກສຕ຺ຕວສ຺ສິກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕິ.

‘‘ຍຖາ ວາ ປນ, ມຫາຣາຊ, ອາຕຸໂຣ ກິໂສ ອຓຸປຣິມິຕກາໂຍ ສາລກກິມິ ຫຕ຺ຖິນາຄໍ ຕິຘາ ປຠິນ຺ນໍ ນວາຍຕໍ ຕິວິຕ຺ຖຕໍ ທສປຣິຓາຫໍ ອຏ຺ຐຣຕນິກໍ ສກຏ຺ຐານມຸປຄຕໍ ທິສ຺ວາ ຄິລິຕຸໍ ປຣິກຑ຺ເຒຍ຺ຍ, ອປິ ນຸ ໂຂ ໂສ, ມຫາຣາຊ, ສາລກກິມິ ສກ຺ກຸເຓຍ຺ຍ ຕໍ ຫຕ຺ຖິນາຄໍ ຄິລິຕຸ’’ນ຺ຕິ? ‘‘ນ ຫິ, ຠນ຺ເຕ’’ຕິ. ‘‘ເກນ ກາຣເຓນ, ມຫາຣາຊາ’’ຕິ? ‘‘ປຣິຕ຺ຕຕ຺ຕາ, ຠນ຺ເຕ, ສາລກກິມິສ຺ສ, ມຫນ຺ຕຕ຺ຕາ ຫຕ຺ຖິນາຄສ຺ສາ’’ຕິ. ‘‘ເອວເມວ ໂຂ, ມຫາຣາຊ, ອູນກສຕ຺ຕວສ຺ສິກສ຺ສ ຈິຕ຺ຕໍ ອພລໍ ທຸພ຺ພລໍ ປຣິຕ຺ຕໍ ອປ຺ປໍ ໂຖກໍ ມນ຺ທໍ ອວິຠູຕໍ, ມຫຕີ ອສງ຺ຂຕາ ນິພ຺ພານຘາຕຸ. ໂສ ເຕນ ທຸພ຺ພເລນ ຈິຕ຺ເຕນ ປຣິຕ຺ຕເກນ ມນ຺ເທນ ອວິຠູເຕນ ນ ສກ຺ໂກຕິ ມຫຕິໍ ອສງ຺ຂຕໍ ນິພ຺ພານຘາຕຸໍ ປຏິວິຊ຺ຌິຕຸໍ, ເຕນ ກາຣເຓນ ອູນກສຕ຺ຕວສ຺ສິກສ຺ສ ສຸປ຺ປຏິປນ຺ນສ຺ສາປິ ຘມ຺ມາຠິສມໂຍ ນ ໂຫຕີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ຘມ຺ມາຠິສມຍປຎ຺ໂຫ ອຏ຺ຐໂມ.