໕. ສຸປິນປຎ຺ໂຫ

໕. ‘‘ຠນ຺ເຕ ນາຄເສນ, ອິມສ຺ມິໍ ໂລເກ ນຣນາຣິໂຍ ສຸປິນໍ ປສ຺ສນ຺ຕິ ກລ຺ຍາຓມ຺ປິ ປາປກມ຺ປິ, ທິຏ຺ຐປຸພ຺ພມ຺ປິ ອທິຏ຺ຐປຸພ຺ພມ຺ປິ, ກຕປຸພ຺ພມ຺ປິ ອກຕປຸພ຺ພມ຺ປິ, ເຂມມ຺ປິ ສຠຍມ຺ປິ, ທູເຣປິ ສນ຺ຕິເກປິ, ພຫຸວິຘານິປິ ອເນກວຓ຺ຓສຫສ຺ສານິ ທິສ຺ສນ຺ຕິ, ກິຎ຺ເຈຕໍ ສຸປິນໍ ນາມ, ໂກ ເຈຕໍ ປສ຺ສຕີ’’ຕິ? ‘‘ນິມິຕ຺ຕເມຕໍ, ມຫາຣາຊ, ສຸປິນໍ ນາມ, ຍໍ ຈິຕ຺ຕສ຺ສ ອາປາຕ [ອາປາຖ (ສີ. ປີ.)] ມຸປຄຈ຺ຉຕິ. ຉຍິເມ, ມຫາຣາຊ, ສຸປິນໍ ປສ຺ສນ຺ຕິ, ວາຕິໂກ ສຸປິນໍ ປສ຺ສຕິ, ປິຕ຺ຕິໂກ ສຸປິນໍ ປສ຺ສຕິ, ເສມ຺ຫິໂກ ສຸປິນໍ ປສ຺ສຕິ, ເທວຕູປສໍຫາຣໂຕ ສຸປິນໍ ປສ຺ສຕິ, ສມຸທາຈິຓ຺ຓໂຕ ສຸປິນໍ ປສ຺ສຕິ, ປຸພ຺ພນິມິຕ຺ຕໂຕ ສຸປິນໍ ປສ຺ສຕິ, ຕຕ຺ຣ, ມຫາຣາຊ, ຍໍ ປຸພ຺ພນິມິຕ຺ຕໂຕ ສຸປິນໍ ປສ຺ສຕິ, ຕໍ ເຍວ ສຈ຺ຈໍ, ອວເສສໍ ມິຈ຺ຉາ’’ຕິ.

‘‘ຠນ຺ເຕ ນາຄເສນ, ໂຍ ປຸພ຺ພນິມິຕ຺ຕໂຕ ສຸປິນໍ ປສ຺ສຕິ, ກິໍ ຕສ຺ສ ຈິຕ຺ຕໍ ສຍໍ ຄນ຺ຕ຺ວາ ຕໍ ນິມິຕ຺ຕໍ ວິຈິນາຕິ, ຕໍ ວາ ນິມິຕ຺ຕໍ ຈິຕ຺ຕສ຺ສ ອາປາຕມຸປຄຈ຺ຉຕິ, ອຎ຺ໂຎ ວາ ອາຄນ຺ຕ຺ວາ ຕສ຺ສ ອາໂຣເຈຕີ’’ຕິ? ‘‘ນ, ມຫາຣາຊ, ຕສ຺ສ ຈິຕ຺ຕໍ ສຍໍ ຄນ຺ຕ຺ວາ ຕໍ ນິມິຕ຺ຕໍ ວິຈິນາຕິ, ນາປິ ອຎ຺ໂຎ ໂກຈິ ອາຄນ຺ຕ຺ວາ ຕສ຺ສ ອາໂຣເຈຕິ, ອຖ ໂຂ ຕໍ ເຍວ ນິມິຕ຺ຕໍ ຈິຕ຺ຕສ຺ສ ອາປາຕມຸປຄຈ຺ຉຕິ. ຍຖາ, ມຫາຣາຊ, ອາທາໂສ ນ ສຍໍ ກຸຫິຎ຺ຈິ ຄນ຺ຕ຺ວາ ຉາຍໍ ວິຈິນາຕິ, ນາປິ ອຎ຺ໂຎ ໂກຈິ ຉາຍໍ ອາເນຕ຺ວາ ອາທາສໍ ອາໂຣເປຕິ [ອາໂຣເຈຕິ (ກ.)], ອຖ ໂຂ ຍໂຕ ກຸໂຕຈິ ຉາຍາ ອາຄນ຺ຕ຺ວາ ອາທາສສ຺ສ ອາປາຕມຸປຄຈ຺ຉຕິ, ເອວເມວ ໂຂ, ມຫາຣາຊ, ນ ຕສ຺ສ ຈິຕ຺ຕໍ ສຍໍ ຄນ຺ຕ຺ວາ ຕໍ ນິມິຕ຺ຕໍ ວິຈິນາຕິ, ນາປິ ອຎ຺ໂຎ ໂກຈິ ອາຄນ຺ຕ຺ວາ ອາໂຣເຈຕິ, ອຖ ໂຂ ຍໂຕ ກຸໂຕຈິ ນິມິຕ຺ຕໍ ອາຄນ຺ຕ຺ວາ ຈິຕ຺ຕສ຺ສ ອາປາຕມຸປຄຈ຺ຉຕີ’’ຕິ.

‘‘ຠນ຺ເຕ ນາຄເສນ, ຍໍ ຕໍ ຈິຕ຺ຕໍ ສຸປິນໍ ປສ຺ສຕິ, ອປິ ນຸ ຕໍ ຈິຕ຺ຕໍ ຊານາຕິ ‘ເອວໍ ນາມ ວິປາໂກ ຠວິສ຺ສຕິ ເຂມໍ ວາ ຠຍໍ ວາ’ຕິ? ‘‘ນ ຫິ, ມຫາຣາຊ, ຕໍ ຈິຕ຺ຕໍ ຊານາຕິ ‘ເອວໍວິປາໂກ ຠວິສ຺ສຕິ ເຂມໍ ວາ ຠຍໍ ວາ’ຕິ, ນິມິຕ຺ເຕ ປນ ອຸປ຺ປນ຺ເນ ອຎ຺ເຎສໍ ກເຖຕິ, ຕໂຕ ເຕ ອຕ຺ຖໍ ກເຖນ຺ຕີ’’ຕິ.

‘‘ອິງ຺ຆ, ຠນ຺ເຕ ນາຄເສນ, ກາຣຓໍ ເມ ທສ຺ເສຫີ’’ຕິ. ‘‘ຍຖາ, ມຫາຣາຊ, ສຣີເຣ ຕິລກາ ປີຬກາ ທທ຺ທູນິ ອຸຏ຺ຐຫນ຺ຕິ ລາຠາຍ ວາ ອລາຠາຍ ວາ, ຍສາຍ ວາ ອຍສາຍ ວາ, ນິນ຺ທາຍ ວາ ປສໍສາຍ ວາ, ສຸຂາຍ ວາ ທຸກ຺ຂາຍ ວາ, ອປິ ນຸ ຕາ, ມຫາຣາຊ, ປີຬກາ ຊານິຕ຺ວາ ອຸປ຺ປຊ຺ຊນ຺ຕິ ‘ອິມໍ ນາມ ມຍໍ ອຕ຺ຖໍ ນິປ຺ຜາເທສ຺ສາມາ’’’ຕິ? ‘‘ນ ຫິ, ຠນ຺ເຕ, ຍາທິເສ ຕາ ໂອກາເສ ປີຬກາ ສມ຺ຠວນ຺ຕິ, ຕຕ຺ຖ ຕາ ປີຬກາ ທິສ຺ວາ ເນມິຕ຺ຕກາ ພ຺ຍາກໂຣນ຺ຕິ ‘ເອວໍ ນາມ ວິປາໂກ ຠວິສ຺ສຕີ’’’ຕິ. ‘‘ເອວເມວ ໂຂ, ມຫາຣາຊ, ຍໍ ຕໍ ຈິຕ຺ຕໍ ສຸປິນໍ ປສ຺ສຕິ, ນ ຕໍ ຈິຕ຺ຕໍ ຊານາຕິ ‘ເອວໍ ນາມ ວິປາໂກ ຠວິສ຺ສຕິ ເຂມໍ ວາ ຠຍໍ ວາ’ຕິ, ນິມິຕ຺ເຕ ປນ ອຸປ຺ປນ຺ເນ ອຎ຺ເຎສໍ ກເຖຕິ, ຕໂຕ ເຕ ອຕ຺ຖໍ ກເຖນ຺ຕີ’’ຕິ.

‘‘ຠນ຺ເຕ ນາຄເສນ, ໂຍ ສຸປິນໍ ປສ຺ສຕິ, ໂສ ນິທ຺ທາຍນ຺ໂຕ, ອຸທາຫຸ ຊາຄຣນ຺ໂຕ [ຊຄ຺ຄນ຺ໂຕ (ສີ. ປີ.)] ປສ຺ສຕີ’’ຕິ? ‘‘ໂຍ ໂສ, ມຫາຣາຊ, ສຸປິນໍ ປສ຺ສຕິ, ນ ໂສ ນິທ຺ທາຍນ຺ໂຕ ປສ຺ສຕິ, ນາປິ ຊາຄຣນ຺ໂຕ ປສ຺ສຕິ. ອປິ ຈ ໂອກ຺ກນ຺ເຕ ມິທ຺ເຘ ອສມ຺ປຕ຺ເຕ ຠວງ຺ເຄ ເອຕ຺ຖນ຺ຕເຣ ສຸປິນໍ ປສ຺ສຕິ. ມິທ຺ຘສມາຣູຬ຺ຫສ຺ສ, ມຫາຣາຊ, ຈິຕ຺ຕໍ ຠວງ຺ຄຄຕໍ ໂຫຕິ, ຠວງ຺ຄຄຕໍ ຈິຕ຺ຕໍ ນປ຺ປວຕ຺ຕຕິ, ອປ຺ປວຕ຺ຕໍ ຈິຕ຺ຕໍ ສຸຂທຸກ຺ຂໍ ນປ຺ປຊານາຕິ, ອປ຺ປຏິວິຊານນ຺ຕສ຺ສ ສຸປິໂນ ນ ໂຫຕິ, ປວຕ຺ຕມາເນ ຈິຕ຺ເຕ ສຸປິນໍ ປສ຺ສຕິ.

‘‘ຍຖາ, ມຫາຣາຊ, ຕິມິເຣ ອນ຺ຘກາເຣ ອປ຺ປຠາເສ ສຸປຣິສຸທ຺ເຘປິ ອາທາເສ ຉາຍາ ນ ທິສ຺ສຕິ, ເອວເມວ ໂຂ, ມຫາຣາຊ, ມິທ຺ຘສມາຣູຬ຺ເຫ ຈິຕ຺ເຕ ຠວງ຺ຄຄເຕ ຕິຏ຺ຐມາເນປິ ສຣີເຣ ຈິຕ຺ຕໍ ອປ຺ປວຕ຺ຕໍ ໂຫຕິ, ອປ຺ປວຕ຺ເຕ ຈິຕ຺ເຕ ສຸປິນໍ ນ ປສ຺ສຕິ. ຍຖາ, ມຫາຣາຊ, ອາທາໂສ, ເອວໍ ສຣີຣໍ ທຏ຺ຐພ຺ພໍ; ຍຖາ ອນ຺ຘກາໂຣ, ເອວໍ ມິທ຺ຘໍ ທຏ຺ຐພ຺ພໍ; ຍຖາ ອາໂລໂກ, ເອວໍ ຈິຕ຺ຕໍ ທຏ຺ຐພ຺ພໍ.

‘‘ຍຖາ ວາ ປນ, ມຫາຣາຊ, ມຫິໂກຕ຺ຖຏສ຺ສ ສູຣິຍສ຺ສ ປຠາ ນ ທິສ຺ສຕິ ສນ຺ຕາ ເຍວ ສູຣິຍຣສ຺ມິ ອປ຺ປວຕ຺ຕາ ໂຫຕິ, ອປ຺ປວຕ຺ຕາຍ ສູຣິຍຣສ຺ມິຍາ ອາໂລໂກ ນ ໂຫຕິ, ເອວເມວ ໂຂ, ມຫາຣາຊ, ມິທ຺ຘສມາຣູຬ຺ຫສ຺ສ ຈິຕ຺ຕໍ ຠວງ຺ຄຄຕໍ ໂຫຕິ, ຠວງ຺ຄຄຕໍ ຈິຕ຺ຕໍ ນປ຺ປວຕ຺ຕຕິ, ອປ຺ປວຕ຺ເຕ ຈິຕ຺ເຕ ສຸປິນໍ ນ ປສ຺ສຕິ. ຍຖາ, ມຫາຣາຊ, ສູຣິໂຍ, ເອວໍ ສຣີຣໍ ທຏ຺ຐພ຺ພໍ; ຍຖາ ມຫິໂກຕ຺ຖຣຓໍ, ເອວໍ ມິທ຺ຘໍ ທຏ຺ຐພ຺ພໍ; ຍຖາ ສູຣິຍຣສ຺ມິ, ເອວໍ ຈິຕ຺ຕໍ ທຏ຺ຐພ຺ພໍ.

‘‘ທ຺ວິນ຺ນໍ, ມຫາຣາຊ, ສນ຺ເຕປິ ສຣີເຣ ຈິຕ຺ຕໍ ອປ຺ປວຕ຺ຕໍ ໂຫຕິ, ມິທ຺ຘສມາຣູຬ຺ຫສ຺ສ ຠວງ຺ຄຄຕສ຺ສ ສນ຺ເຕປິ ສຣີເຣ ຈິຕ຺ຕໍ ອປ຺ປວຕ຺ຕໍ ໂຫຕິ, ນິໂຣຘສມາປນ຺ນສ຺ສ ສນ຺ເຕປິ ສຣີເຣ ຈິຕ຺ຕໍ ອປ຺ປວຕ຺ຕໍ ໂຫຕິ, ຊາຄຣນ຺ຕສ຺ສ, ມຫາຣາຊ, ຈິຕ຺ຕໍ ໂລລໍ ໂຫຕິ ວິວຏໍ ປາກຏໍ ອນິພທ຺ຘໍ, ເອວຣູປສ຺ສ ຈິຕ຺ເຕ ນິມິຕ຺ຕໍ ອາປາຕໍ ນ ອຸເປຕິ. ຍຖາ, ມຫາຣາຊ, ປຸຣິສໍ ວິວຏໍ ປາກຏໍ ອກິຣິຍໍ ອຣຫສ຺ສໍ ຣຫສ຺ສກາມາ ປຣິວຊ຺ເຊນ຺ຕິ, ເອວເມວ ໂຂ, ມຫາຣາຊ, ຊາຄຣນ຺ຕສ຺ສ ທິພ຺ໂພ ອຕ຺ໂຖ ອາປາຕໍ ນ ອຸເປຕິ, ຕສ຺ມາ ຊາຄຣນ຺ໂຕ ສຸປິນໍ ນ ປສ຺ສຕິ. ຍຖາ ວາ ປນ, ມຫາຣາຊ, ຠິກ຺ຂຸໍ ຠິນ຺ນາຊີວໍ ອນາຈາຣໍ ປາປມິຕ຺ຕໍ ທຸສ຺ສີລໍ ກຸສີຕໍ ຫີນວີຣິຍໍ ກຸສລາ ໂພຘິປກ຺ຂິຍາ ຘມ຺ມາ ອາປາຕໍ ນ ອຸເປນ຺ຕິ, ເອວເມວ ໂຂ, ມຫາຣາຊ, ຊາຄຣນ຺ຕສ຺ສ ທິພ຺ໂພ ອຕ຺ໂຖ ອາປາຕໍ ນ ອຸເປຕິ, ຕສ຺ມາ ຊາຄຣນ຺ໂຕ ສຸປິນໍ ນ ປສ຺ສຕີ’’ຕິ.

‘‘ຠນ຺ເຕ ນາຄເສນ, ອຕ຺ຖິ ມິທ຺ຘສ຺ສ ອາທິມຊ຺ຌປຣິໂຍສານ’’ນ຺ຕິ? ‘‘ອາມ, ມຫາຣາຊ, ອຕ຺ຖິ ມິທ຺ຘສ຺ສ ອາທິມຊ຺ຌປຣິໂຍສານ’’ນ຺ຕິ. ‘‘ກຕມໍ ອາທິ, ກຕມໍ ມຊ຺ຌໍ, ກຕມໍ ປຣິໂຍສານ’’ນ຺ຕິ? ‘‘ໂຍ, ມຫາຣາຊ, ກາຍສ຺ສ ໂອນາໂຫ ປຣິໂຍນາໂຫ ທຸພ຺ພລ຺ຍໍ ມນ຺ທຕາ ອກມ຺ມຎ຺ຎຕາ ກາຍສ຺ສ, ອຍໍ ມິທ຺ຘສ຺ສ ອາທິ; ໂຍ, ມຫາຣາຊ, ກປິນິທ຺ທາປເຣໂຕ ໂວກິຓ຺ຓກໍ ຊຄ຺ຄຕິ [ໂວກິຓ຺ຓຕໍ ຄຈ຺ຉຕິ (ນິສ຺ຍ)], ອິທໍ ມິທ຺ຘສ຺ສ ມຊ຺ຌໍ; ຠວງ຺ຄຄຕິ ປຣິໂຍສນໍ. ມຊ຺ຌູປຄໂຕ, ມຫາຣາຊ, ກປິນິທ຺ທາປເຣໂຕ ສຸປິນໍ ປສ຺ສຕິ. ຍຖາ, ມຫາຣາຊ, ໂກຈິ ຍຕຈາຣີ ສມາຫິຕຈິຕ຺ໂຕ ຐິຕຘມ຺ໂມ ອຈລພຸທ຺ຘິ ປຫີນໂກຕູຫລສທ຺ທໍ ວນມຊ຺ໂຌຄາຫິຕ຺ວາ ສຸຂຸມໍ ອຕ຺ຖໍ ຈິນ຺ຕຍຕິ, ນ ຈ ໂສ ຕຕ຺ຖ ມິທ຺ຘໍ ໂອກ຺ກມຕິ, ໂສ ຕຕ຺ຖ ສມາຫິໂຕ ເອກຄ຺ຄຈິຕ຺ໂຕ ສຸຂຸມໍ ອຕ຺ຖໍ ປຏິວິຊ຺ຌຕິ, ເອວເມວ ໂຂ, ມຫາຣາຊ, ຊາຄໂຣ ນ ມິທ຺ຘສມາປນ຺ໂນ, ມຊ຺ຌູປຄໂຕ ກປິນິທ຺ທາປເຣໂຕ ສຸປິນໍ ປສ຺ສຕິ. ຍຖາ, ມຫາຣາຊ, ໂກຕູຫລສທ຺ໂທ, ເອວໍ ຊາຄຣໍ ທຏ຺ຐພ຺ພໍ; ຍຖາ ວິວິຕ຺ຕໍ ວນໍ, ເອວໍ ກປິນິທ຺ທາປເຣໂຕ ທຏ຺ຐພ຺ໂພ; ຍຖາ ໂສ ໂກຕູຫລສທ຺ທໍ ໂອຫາຍ ມິທ຺ຘໍ ວິວຊ຺ເຊຕ຺ວາ ມຊ຺ຌຕ຺ຕຠູໂຕ ສຸຂຸມໍ ອຕ຺ຖໍ ປຏິວິຊ຺ຌຕິ, ເອວໍ ຊາຄໂຣ ນ ມິທ຺ຘສມາປນ຺ໂນ ກປິນິທ຺ທາປເຣໂຕ ສຸປິນໍ ປສ຺ສຕີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ສຸປິນປຎ຺ໂຫ ປຎ຺ຈໂມ.