໒. ທຸກ຺ກຣກາຣິກປຎ຺ໂຫ

໒. ‘‘ຠນ຺ເຕ ນາຄເສນ, ສພ຺ເພວ ໂພຘິສຕ຺ຕາ ທຸກ຺ກຣກາຣິກໍ ກໂຣນ຺ຕິ, ອຸທາຫຸ ໂຄຕເມເນວ ໂພຘິສຕ຺ເຕນ ທຸກ຺ກຣກາຣິກາ ກຕາ’’ຕິ? ‘‘ນຕ຺ຖິ, ມຫາຣາຊ, ສພ຺ເພສໍ ໂພຘິສຕ຺ຕານໍ ທຸກ຺ກຣກາຣິກາ, ໂຄຕເມເນວ ໂພຘິສຕ຺ເຕນ ທຸກ຺ກຣກາຣິກາ ກຕາ’’ຕິ.

‘‘ຠນ຺ເຕ ນາຄເສນ, ຍທິ ເອວໍ ອຍຸຕ຺ຕໍ, ຍໍ ໂພຘິສຕ຺ຕານໍ ໂພຘິສຕ຺ເຕຫິ ເວມຕ຺ຕຕາ ໂຫຕີ’’ຕິ. ‘‘ຈຕູຫິ, ມຫາຣາຊ, ຐາເນຫິ ໂພຘິສຕ຺ຕານໍ ໂພຘິສຕ຺ເຕຫິ ເວມຕ຺ຕຕາ ໂຫຕິ. ກຕເມຫິ ຈຕູຫິ? ກຸລເວມຕ຺ຕຕາ ປຘານເວມຕ຺ຕຕາ [ອທ຺ຘານເວມຕ຺ຕຕາ (ສີ. ສ຺ຍາ. ປີ.)] ອາຍຸເວມຕ຺ຕຕາ ປມາຓເວມຕ຺ຕຕາຕິ. ອິເມຫິ ໂຂ, ມຫາຣາຊ, ຈຕູຫິ ຐາເນຫິ ໂພຘິສຕ຺ຕານໍ ໂພຘິສຕ຺ເຕຫິ ເວມຕ຺ຕຕາ ໂຫຕິ. ສພ຺ເພສມ຺ປິ, ມຫາຣາຊ, ພຸທ຺ຘານໍ ຣູເປ ສີເລ ສມາຘິມ຺ຫິ ປຎ຺ຎາຍ ວິມຸຕ຺ຕິຍາ ວິມຸຕ຺ຕິຎາຓທສ຺ສເນ ຈຕຸເວສາຣຊ຺ເຊ ທສຕຖາຄຕພເລ ຉອສາຘາຣຓຎາເຓ ຈຸທ຺ທສພຸທ຺ຘຎາເຓ ອຏ຺ຐາຣສພຸທ຺ຘຘມ຺ເມ ເກວເລ ຈ ພຸທ຺ຘຄຸເຓ [ພຸທ຺ຘຘມ຺ເມ (ສີ. ປີ.)] ນຕ຺ຖິ ເວມຕ຺ຕຕາ, ສພ຺ເພປິ ພຸທ຺ຘາ ພຸທ຺ຘຘມ຺ເມຫິ ສມສມາ’’ຕິ.

‘‘ຍທິ, ຠນ຺ເຕ ນາຄເສນ, ສພ຺ເພປິ ພຸທ຺ຘາ ພຸທ຺ຘຘມ຺ເມຫິ ສມສມາ, ເກນ ກາຣເຓນ ໂຄຕເມເນວ ໂພຘິສຕ຺ເຕນ ທຸກ຺ກຣກາຣິກາ ກຕາ’’ຕິ? ‘‘ອປຣິປກ຺ເກ, ມຫາຣາຊ, ຎາເຓ ອປຣິປກ຺ກາຍ ໂພຘິຍາ ໂຄຕໂມ ໂພຘິສຕ຺ໂຕ ເນກ຺ຂມ຺ມມຠິນິກ຺ຂນ຺ໂຕ ອປຣິປກ຺ກໍ ຎາຓໍ ປຣິປາຈຍມາເນນ ທຸກ຺ກຣກາຣິກາ ກຕາ’’ຕິ.

‘‘ຠນ຺ເຕ ນາຄເສນ, ເກນ ກາຣເຓນ ໂພຘິສຕ຺ໂຕ ອປຣິປກ຺ເກ ຎາເຓ ອປຣິປກ຺ກາຍ ໂພຘິຍາ ມຫາຠິນິກ຺ຂມນໍ ນິກ຺ຂນ຺ໂຕ, ນນຸ ນາມ ຎາຓໍ ປຣິປາເຈຕ຺ວາ ປຣິປກ຺ເກ ຎາເຓ ນິກ຺ຂມິຕພ຺ພ’’ນ຺ຕິ?

‘‘ໂພຘິສຕ຺ໂຕ, ມຫາຣາຊ, ວິປຣີຕໍ ອິຕ຺ຖາຄາຣໍ ທິສ຺ວາ ວິປ຺ປຏິສາຣີ ອໂຫສິ, ຕສ຺ສ ວິປ຺ປຏິສາຣິສ຺ສ ອຣຕິ ອຸປ຺ປຊ຺ຊິ, ອຣຕິຈິຕ຺ຕໍ ອຸປ຺ປນ຺ນໍ ທິສ຺ວາ ອຎ຺ຎຕໂຣ ມາຣກາຍິໂກ ເທວປຸຕ຺ໂຕ ‘ອຍໍ ໂຂ ກາໂລ ອຣຕິຈິຕ຺ຕສ຺ສ ວິໂນທນາຍາ’ຕິ ເວຫາເສ ຐຕ຺ວາ ອິທໍ ວຈນມພ຺ຣວິ –

‘‘ມາຣິສ, ມາ ໂຂ ຕ຺ວໍ ອຸກ຺ກຓ຺ຐິໂຕ ອໂຫສິ, ອິໂຕ ເຕ ສຕ຺ຕເມ ທິວເສ ທິພ຺ພໍ ຈກ຺ກຣຕນໍ ປາຕຸຠວິສ຺ສຕິ ສຫສ຺ສາຣໍ ສເນມິກໍ ສນາຠິກໍ ສພ຺ພາກາຣປຣິປູຣໍ, ປຖວິຄຕານິ ຈ ເຕ ຣຕນານິ ອາກາສຏ຺ຐານິ ຈ ສຍເມວ ອຸປຄຈ຺ຉິສ຺ສນ຺ຕິ, ທ຺ວິສຫສ຺ສປຣິຕ຺ຕທີປປຣິວາເຣສຸ ຈຕູສຸ ມຫາທີເປສຸ ເອກມຸເຂນ ອາຓາ ປວຕ຺ຕິສ຺ສຕິ, ປໂຣສຫສ຺ສຎ຺ຈ ເຕ ປຸຕ຺ຕາ ຠວິສ຺ສນ຺ຕິ ສູຣາ ວີຣງ຺ຄຣູປາ ປຣເສນປ຺ປມທ຺ທນາ, ເຕຫິ ປຸຕ຺ເຕຫິ ປຣິກິຓ຺ໂຓ ສຕ຺ຕຣຕນສມນ຺ນາຄໂຕ ຈຕຸທ຺ທີປມນຸສາສິສ຺ສສີ’ຕິ.

‘‘ຍຖາ ນາມ ທິວສສນ຺ຕຕ຺ຕໍ ອໂຍສູລໍ ສພ຺ພຕ຺ຖ ອຸປຑຫນ຺ຕໍ ກຓ຺ຓໂສຕໍ ປວິເສຍ຺ຍ, ເອວເມວ ໂຂ, ມຫາຣາຊ, ໂພຘິສຕ຺ຕສ຺ສ ຕໍ ວຈນໍ ກຓ຺ຓໂສຕໍ ປວິສິຕ຺ຖ, ອິຕິ ໂສ ປກຕິຍາວ ອຸກ຺ກຓ຺ຐິໂຕ ຕສ຺ສາ ເທວຕາຍ ວຈເນນ ຠິຍ຺ໂຍໂສມຕ຺ຕາຍ ອຸພ຺ພິຊ຺ຊິ ສໍວິຊ຺ຊິ ສໍເວຄມາປຊ຺ຊິ.

‘‘ຍຖາ ປນ, ມຫາຣາຊ, ມຫຕິມຫາອຄ຺ຄິກ຺ຂນ຺ໂຘ ຊລມາໂນ ອຎ຺ເຎນ ກຏ຺ເຐນ ອຸປຑຫິໂຕ ຠິຍ຺ໂຍໂສມຕ຺ຕາຍ ຊເລຍ຺ຍ, ເອວເມວ ໂຂ, ມຫາຣາຊ, ໂພຘິສຕ຺ໂຕ ປກຕິຍາວ ອຸກ຺ກຓ຺ຐິໂຕ ຕສ຺ສາ ເທວຕາຍ ວຈເນນ ຠິຍ຺ໂຍໂສມຕ຺ຕາຍ ອຸພ຺ພິຊ຺ຊິ ສໍວິຊ຺ຊິ ສໍເວຄມາປຊ຺ຊິ.

‘‘ຍຖາ ວາ ປນ, ມຫາຣາຊ, ມຫາປຖວີ ປກຕິຕິນ຺ຕາ ນິພ຺ພຕ຺ຕຫຣິຕສທ຺ທລາ ອາສິຕ຺ໂຕທກາ ຈິກ຺ຂລ຺ລຊາຕາ ປຸນເທວ ມຫາເມເຆ ອຠິວຸຏ຺ເຐ ຠິຍ຺ໂຍໂສມຕ຺ຕາຍ ຈິກ຺ຂລ຺ລຕຣາ ອສ຺ສ, ເອວເມວ ໂຂ, ມຫາຣາຊ, ໂພຘິສຕ຺ໂຕ ປກຕິຍາວ ອຸກ຺ກຓ຺ຐິໂຕ ຕສ຺ສາ ເທວຕາຍ ວຈເນນ ຠິຍ຺ໂຍໂສມຕ຺ຕາຍ ອຸພ຺ພິຊ຺ຊິ ສໍວິຊ຺ຊິ ສໍເວຄມາປຊ຺ຊີ’’ຕິ.

‘‘ອປິ ນຸ ໂຂ, ຠນ຺ເຕ ນາຄເສນ, ໂພຘິສຕ຺ຕສ຺ສ ຍທິ ສຕ຺ຕເມ ທິວເສ ທິພ຺ພໍ ຈກ຺ກຣຕນໍ ນິພ຺ພຕ຺ເຕຍ຺ຍ, ປຏິນິວຕ຺ເຕຍ຺ຍ ໂພຘິສຕ຺ໂຕ ທິພ຺ເພ ຈກ຺ກຣຕເນ ນິພ຺ພຕ຺ເຕ’’ຕິ? ‘‘ນ ຫິ, ມຫາຣາຊ, ສຕ຺ຕເມ ທິວເສ ໂພຘິສຕ຺ຕສ຺ສ ທິພ຺ພໍ ຈກ຺ກຣຕນໍ ນິພ຺ພຕ຺ເຕຍ຺ຍ, ອປິ ຈ ປໂລຠນຕ຺ຖາຍ ຕາຍ ເທວຕາຍ ມຸສາ ຠຓິຕໍ, ຍທິປິ, ມຫາຣາຊ, ສຕ຺ຕເມ ທິວເສ ທິພ຺ພໍ ຈກ຺ກຣຕນໍ ນິພ຺ພຕ຺ເຕຍ຺ຍ, ໂພຘິສຕ຺ໂຕ ນ ນິວຕ຺ເຕຍ຺ຍ. ກິໍ ກາຣຓໍ? ‘ອນິຈ຺ຈ’ນ຺ຕິ, ມຫາຣາຊ, ໂພຘິສຕ຺ໂຕ ທຬ຺ຫໍ ອຄ຺ຄເຫສິ, ‘ທຸກ຺ຂໍ ອນຕ຺ຕາ’ຕິ ທຬ຺ຫໍ ອຄ຺ຄເຫສິ, ອຸປາທານກ຺ຂຍໍ ປຕ຺ໂຕ.

‘‘ຍຖາ, ມຫາຣາຊ, ອໂນຕຕ຺ຕທຫໂຕ ອຸທກໍ ຄງ຺ຄໍ ນທິໍ ປວິສຕິ, ຄງ຺ຄາຍ ນທິຍາ ມຫາສມຸທ຺ທໍ ປວິສຕິ, ມຫາສມຸທ຺ທໂຕ ປາຕາລມຸຂໍ ປວິສຕິ, ອປິ ນຸ, ມຫາຣາຊ, ຕໍ ອຸທກໍ ປາຕາລມຸຂຄຕໍ ປຏິນິວຕ຺ຕິຕ຺ວາ ມຫາສມຸທ຺ທໍ ປວິເສຍ຺ຍ, ມຫາສມຸທ຺ທໂຕ ຄງ຺ຄໍ ນທິໍ ປວິເສຍ຺ຍ, ຄງ຺ຄາຍ ນທິຍາ ປຸນ ອໂນຕຕ຺ຕໍ ປວິເສຍ຺ຍາ’’ຕິ? ‘‘ນ ຫິ, ຠນ຺ເຕ’’ຕິ. ‘‘ເອວເມວ ໂຂ, ມຫາຣາຊ, ໂພຘິສຕ຺ເຕນ ກປ຺ປານໍ ສຕສຫສ຺ສໍ ຈຕຸໂຣ ຈ ອສງ຺ຂ຺ເຍຍ຺ເຍ ກຸສລໍ ປຣິປາຈິຕໍ ອິມສ຺ສ ຠວສ຺ສ ກາຣຓາ, ໂສຍໍ ອນ຺ຕິມຠໂວ ອນຸປ຺ປຕ຺ໂຕ ປຣິປກ຺ກໍ ໂພຘິຎາຓໍ ຉຫິ ວສ຺ເສຫິ ພຸທ຺ໂຘ ຠວິສ຺ສຕິ ສພ຺ພຎ຺ຎູ ໂລເກ ອຄ຺ຄປຸຄ຺ຄໂລ, ອປິ ນຸ ໂຂ, ມຫາຣາຊ, ໂພຘິສຕ຺ໂຕ ຈກ຺ກຣຕນກາຣຓາ [ຈກ຺ກຣຕນສ຺ສ ກາຣຓາ (ສີ. ສ຺ຍາ. ປີ.)] ປຏິນິວຕ຺ເຕຍ຺ຍາ’’ຕິ [ປຣິນິວຕ຺ເຕຍ຺ຍາຕິ (ສີ. ປີ. ກ.)]? ‘‘ນ ຫິ, ຠນ຺ເຕ’’ຕິ.

‘‘ອປິ ຈ, ມຫາຣາຊ, ມຫາປຖວີ ປຣິວຕ຺ເຕຍ຺ຍ ສການນາ ສປພ຺ພຕາ, ນຕ຺ເວວ ໂພຘິສຕ຺ໂຕ ປຏິນິວຕ຺ເຕຍ຺ຍ ອປຕ຺ວາ ສມ຺ມາສມ຺ໂພຘິໍ. ອາໂຣເຫຍ຺ຍປິ ເຈ, ມຫາຣາຊ, ຄງ຺ຄາຍ ອຸທກໍ ປຏິໂສຕໍ, ນຕ຺ເວວ ໂພຘິສຕ຺ໂຕ ປຏິນິວຕ຺ເຕຍ຺ຍ ອປຕ຺ວາ ສມ຺ມາສມ຺ໂພຘິໍ; ວິສຸສ຺ເສຍ຺ຍປິ ເຈ, ມຫາຣາຊ, ມຫາສມຸທ຺ໂທ ອປຣິມິຕຊລຘໂຣ ໂຄປເທ ອຸທກໍ ວິຍ, ນຕ຺ເວວ ໂພຘິສຕ຺ໂຕ ປຏິນິວຕ຺ເຕຍ຺ຍ ອປຕ຺ວາ ສມ຺ມາສມ຺ໂພຘິໍ; ຜເລຍ຺ຍປິ ເຈ, ມຫາຣາຊ, ສິເນຣຸປພ຺ພຕຣາຊາ ສຕຘາ ວາ ສຫສ຺ສຘາ ວາ, ນຕ຺ເວວ ໂພຘິສຕ຺ໂຕ ປຏິນິວຕ຺ເຕຍ຺ຍ ອປຕ຺ວາ ສມ຺ມາສມ຺ໂພຘິໍ; ປເຕຍ຺ຍຸມ຺ປິ ເຈ, ມຫາຣາຊ, ຈນ຺ທິມສູຣິຍາ ສຕາຣກາ ເລຑ຺ຑຸ ວິຍ ຉມາຍໍ, ນຕ຺ເວວ ໂພຘິສຕ຺ໂຕ ປຏິນິວຕ຺ເຕຍ຺ຍ ອປຕ຺ວາ ສມ຺ມາສມ຺ໂພຘິໍ; ສໍວຕ຺ເຕຍ຺ຍປິ ເຈ, ມຫາຣາຊ, ອາກາໂສ ກິລຎ຺ຊມິວ, ນຕ຺ເວວ ໂພຘິສຕ຺ໂຕ ປຏິນິວຕ຺ເຕຍ຺ຍ ອປຕ຺ວາ ສມ຺ມາສມ຺ໂພຘິໍ. ກິໍ ກາຣຓາ? ປທາລິຕຕ຺ຕາ ສພ຺ພພນ຺ຘນານ’’ນ຺ຕິ.

‘‘ຠນ຺ເຕ ນາຄເສນ, ກຕິ ໂລເກ ພນ຺ຘນານີ’’ຕິ? ‘‘ທສ ໂຂ ປນິມານິ, ມຫາຣາຊ, ໂລເກ ພນ຺ຘນານິ, ເຍຫິ ພນ຺ຘເນຫິ ພທ຺ຘາ ສຕ຺ຕາ ນ ນິກ຺ຂມນ຺ຕິ, ນິກ຺ຂມິຕ຺ວາປິ ປຏິນິວຕ຺ຕນ຺ຕິ. ກຕມານິ ທສ? ມາຕາ, ມຫາຣາຊ, ໂລເກ ພນ຺ຘນໍ, ປິຕາ, ມຫາຣາຊ, ໂລເກ ພນ຺ຘນໍ, ຠຣິຍາ, ມຫາຣາຊ, ໂລເກ ພນ຺ຘນໍ, ປຸຕ຺ຕາ, ມຫາຣາຊ, ໂລເກ ພນ຺ຘນໍ, ຎາຕີ, ມຫາຣາຊ, ໂລເກ ພນ຺ຘນໍ, ມິຕ຺ຕໍ, ມຫາຣາຊ, ໂລເກ ພນ຺ຘນໍ, ຘນໍ, ມຫາຣາຊ, ໂລເກ ພນ຺ຘນໍ, ລາຠສກ຺ກາໂຣ, ມຫາຣາຊ, ໂລເກ ພນ຺ຘນໍ, ອິສ຺ສຣິຍໍ, ມຫາຣາຊ, ໂລເກ ພນ຺ຘນໍ, ປຎ຺ຈ ກາມຄຸຓາ, ມຫາຣາຊ, ໂລເກ ພນ຺ຘນໍ, ອິມານິ ໂຂ ມຫາຣາຊ ທສ ໂລເກ ພນ຺ຘນານິ, ເຍຫິ ພນ຺ຘເນຫິ ພທ຺ຘາ ສຕ຺ຕາ ນ ນິກ຺ຂມນ຺ຕິ, ນິກ຺ຂມິຕ຺ວາປິ ປຏິນິວຕ຺ຕນ຺ຕິ, ຕານິ ທສ ພນ຺ຘນານິ ໂພຘິສຕ຺ຕສ຺ສ ຉິນ຺ນານິ ປທາລິຕານິ, ຕສ຺ມາ, ມຫາຣາຊ, ໂພຘິສຕ຺ໂຕ ນ ປຏິນິວຕ຺ຕຕີ’’ຕິ.

‘‘ຠນ຺ເຕ ນາຄເສນ, ຍທິ ໂພຘິສຕ຺ໂຕ ອຸປ຺ປນ຺ເນ ອຣຕິຈິຕ຺ເຕ ເທວຕາຍ ວຈເນນ ອປຣິປກ຺ເກ ຎາເຓ ອປຣິປກ຺ກາຍ ໂພຘິຍາ ເນກ຺ຂມ຺ມມຠິນິກ຺ຂນ຺ໂຕ, ກິໍ ຕສ຺ສ ທຸກ຺ກຣກາຣິກາຍ ກຕາຍ, ນນຸ ນາມ ສພ຺ພຠກ຺ເຂນ ຠວິຕພ຺ພໍ ຎາຓປຣິປາກໍ ອາຄມຍມາເນນາ’’ຕິ?

‘‘ທສ ໂຂ ປນິເມ, ມຫາຣາຊ, ປຸຄ຺ຄລາ ໂລກສ຺ມິໍ ໂອຎ຺ຎາຕາ ອວຎ຺ຎາຕາ ຫີຬິຕາ ຂີຬິຕາ ຄຣຫິຕາ ປຣິຠູຕາ ອຈິຕ຺ຕີກຕາ. ກຕເມ ທສ? ອິຕ຺ຖີ, ມຫາຣາຊ, ວິຘວາ ໂລກສ຺ມິໍ ໂອຎ຺ຎາຕາ ອວຎ຺ຎາຕາ ຫີຬິຕາ ຂີຬິຕາ ຄຣຫິຕາ ປຣິຠູຕາ ອຈິຕ຺ຕີກຕາ. ທຸພ຺ພໂລ, ມຫາຣາຊ, ປຸຄ຺ຄໂລ…ເປ… ອມິຕ຺ຕຎາຕິ, ມຫາຣາຊ, ປຸຄ຺ຄໂລ…ເປ… ມຫຄ຺ຆໂສ, ມຫາຣາຊ, ປຸຄ຺ຄໂລ…ເປ… ອຄຣຸກຸລວາສິໂກ, ມຫາຣາຊ, ປຸຄ຺ຄໂລ…ເປ… ປາປມິຕ຺ໂຕ, ມຫາຣາຊ, ປຸຄ຺ຄໂລ…ເປ… ຘນຫີໂນ, ມຫາຣາຊ, ປຸຄ຺ຄໂລ…ເປ… ອາຈາຣຫີໂນ, ມຫາຣາຊ, ປຸຄ຺ຄໂລ…ເປ… ກມ຺ມຫີໂນ, ມຫາຣາຊ, ປຸຄ຺ຄໂລ…ເປ… ປໂຍຄຫີໂນ, ມຫາຣາຊ, ປຸຄ຺ຄໂລ ໂລກສ຺ມິໍ ໂອຎ຺ຎາໂຕ ອວຎ຺ຎາໂຕ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ. ອິເມ ໂຂ, ມຫາຣາຊ, ທສ ປຸຄ຺ຄລາ ໂລກສ຺ມິໍ ໂອຎ຺ຎາຕາ ອວຎ຺ຎາຕາ ຫີຬິຕາ ຂີຬິຕາ ຄຣຫິຕາ ປຣິຠູຕາ ອຈິຕ຺ຕີກຕາ. ອິມານິ ໂຂ, ມຫາຣາຊ, ທສ ຐານານິ ອນຸສ຺ສຣມານສ຺ສ ໂພຘິສຕ຺ຕສ຺ສ ເອວໍ ສຎ຺ຎາ ອຸປ຺ປຊ຺ຊິ ‘ມາຫໍ ກມ຺ມຫີໂນ ອສ຺ສໍ ປໂຍຄຫີໂນ ຄຣຫິໂຕ ເທວມນຸສ຺ສານໍ, ຍໍນູນາຫໍ ກມ຺ມສ຺ສາມີ ອສ຺ສໍ ກມ຺ມຄຣຸ ກມ຺ມາຘິປເຕຍ຺ໂຍ ກມ຺ມສີໂລ ກມ຺ມໂຘຣຍ຺ໂຫ ກມ຺ມນິເກຕວາ ອປ຺ປມຕ຺ໂຕ ວິຫເຣຍ຺ຍ’ນ຺ຕິ, ເອວໍ ໂຂ, ມຫາຣາຊ, ໂພຘິສຕ຺ໂຕ ຎາຓໍ ປຣິປາເຈນ຺ໂຕ ທຸກ຺ກຣກາຣິກໍ ອກາສີ’’ຕິ.

‘‘ຠນ຺ເຕ ນາຄເສນ, ໂພຘິສຕ຺ໂຕ ທຸກ຺ກຣກາຣິກໍ ກໂຣນ຺ໂຕ ເອວມາຫ ‘ນ ໂຂ ປນາຫໍ ອິມາຍ ກຏຸກາຍ ທຸກ຺ກຣກາຣິກາຍ ອຘິຄຈ຺ຉາມິ ອຸຕ຺ຕຣິມນຸສ຺ສຘມ຺ມໍ ອລມຣິຍຎາຓທສ຺ສນວິເສສໍ, ສິຍາ ນຸ ໂຂ ອຎ຺ໂຎ ມຄ຺ໂຄ ໂພຘາຍາ’ຕິ. ອປິ ນຸ ຕສ຺ມິໍ ສມເຍ ໂພຘິສຕ຺ຕສ຺ສ ມຄ຺ຄໍ ອາຣພ຺ຠ ສຕິສມ຺ໂມໂສ ອໂຫສີ’’ຕິ?

‘‘ປຎ຺ຈວີສຕິ ໂຂ ປນິເມ, ມຫາຣາຊ, ຈິຕ຺ຕທຸພ຺ພລີກຣຓາ ຘມ຺ມາ, ເຍຫິ ທຸພ຺ພລີກຕໍ ຈິຕ຺ຕໍ ນ ສມ຺ມາ ສມາຘິຍຕິ ອາສວານໍ ຂຍາຍ. ກຕເມ ປຎ຺ຈວີສຕິ? ໂກໂຘ, ມຫາຣາຊ, ຈິຕ຺ຕທຸພ຺ພລີກຣໂຓ ຘມ຺ໂມ, ເຍນ ທຸພ຺ພລີກຕໍ ຈິຕ຺ຕໍ ນ ສມ຺ມາ ສມາຘິຍຕິ ອາສວານໍ ຂຍາຍ, ອຸປນາໂຫ…ເປ… ມກ຺ໂຂ…ເປ… ປຬາໂສ…ເປ… ອິສ຺ສາ…ເປ… ມຈ຺ຉຣິຍໍ…ເປ… ມາຍາ…ເປ… ສາເຐຍ຺ຍໍ…ເປ… ຖມ຺ໂຠ…ເປ… ສາຣມ຺ໂຠ…ເປ… ມາໂນ…ເປ… ອຕິມາໂນ …ເປ… ມໂທ…ເປ… ປມາໂທ…ເປ… ຖິນມິທ຺ຘໍ…ເປ… ຕນ຺ທິ [ນນ຺ທີ (ປີ. ກ.)] …ເປ… ອາລສ຺ຍໍ…ເປ… ປາປມິຕ຺ຕຕາ…ເປ… ຣູປາ…ເປ… ສທ຺ທາ…ເປ… ຄນ຺ຘາ…ເປ… ຣສາ…ເປ… ໂຜຏ຺ຐພ຺ພາ…ເປ… ຂຸທາປິປາສາ…ເປ… ອຣຕິ, ມຫາຣາຊ, ຈິຕ຺ຕທຸພ຺ພລີກຣໂຓ ຘມ຺ໂມ, ເຍນ ທຸພ຺ພລີກຕໍ ຈິຕ຺ຕໍ ນ ສມ຺ມາ ສມາຘິຍຕິ ອາສວານໍ ຂຍາຍ. ອິເມ ໂຂ, ມຫາຣາຊ, ປຎ຺ຈວີສຕິ ຈິຕ຺ຕທຸພ຺ພລີກຣຓາ ຘມ຺ມາ, ເຍຫິ ທຸພ຺ພລີກຕໍ ຈິຕ຺ຕໍ ນ ສມ຺ມາ ສມາຘິຍຕິ ອາສວານໍ ຂຍາຍ.

ໂພຘິສຕ຺ຕສ຺ສ ໂຂ, ມຫາຣາຊ, ຂຸທາປິປາສາ [ຂຸທາປິປາສາ (ສີ. ປີ. ກ.)] ກາຍໍ ປຣິຍາທິຍິໍສຸ, ກາເຍ ປຣິຍາທິນ຺ເນ ຈິຕ຺ຕໍ ນ ສມ຺ມາ ສມາຘິຍຕິ ອາສວານໍ ຂຍາຍ. ສຕສຫສ຺ສໍ, ມຫາຣາຊ, ກປ຺ປານໍ [ກປ຺ເປ (ກ.)] ຈຕຸໂຣ ຈ ອສງ຺ຂ຺ເຍຍ຺ເຍ ກປ຺ເປ ໂພຘິສຕ຺ໂຕ ຈຕຸນ຺ນໍ ເຍວ ອຣິຍສຈ຺ຈານໍ ອຠິສມຍໍ ອນ຺ເວສິ ຕາສຸ ຕາສຸ ຊາຕີສຸ, ກິໍ ປນສ຺ສ ປຈ຺ຉິເມ ຠເວ ອຠິສມຍຊາຕິຍໍ ມຄ຺ຄໍ ອາຣພ຺ຠ ສຕິສມ຺ໂມໂສ ເຫສ຺ສຕິ? ອປິ ຈ, ມຫາຣາຊ, ໂພຘິສຕ຺ຕສ຺ສ ສຎ຺ຎາມຕ຺ຕໍ ອຸປ຺ປຊ຺ຊິ ‘ສິຍາ ນຸ ໂຂ ອຎ຺ໂຎ ມຄ຺ໂຄ ໂພຘາຍາ’ຕິ. ປຸພ຺ເພ ໂຂ, ມຫາຣາຊ, ໂພຘິສຕ຺ໂຕ ເອກມາສິໂກ ສມາໂນ ປິຕຸ ສກ຺ກສ຺ສ ກມ຺ມນ຺ເຕ ສີຕາຍ ຊມ຺ພຸຈ຺ຉາຍາຍ ສິຣິສຍເນ ປລ຺ລງ຺ກໍ ອາຠຸຊິຕ຺ວາ ນິສິນ຺ໂນ ວິວິຈ຺ເຈວ ກາເມຫິ ວິຈິຈ຺ຈ ອກຸສເລຫິ ຘມ຺ເມຫິ ສວິຕກ຺ກໍ ສວິຈາຣໍ ວິເວກຊໍ ປີຕິສຸຂໍ ປຐມໍ ຌານໍ ອຸປສມ຺ປຊ຺ຊ ວິຫາສິ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫາສີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມິ, ຎາຓໍ ປຣິປາເຈນ຺ໂຕ ໂພຘິສຕ຺ໂຕ ທຸກ຺ກຣກາຣິກໍ ອກາສີ’’ຕິ.

ທຸກ຺ກຣກາຣິກປຎ຺ໂຫ ທຸຕິໂຍ.