໔. ປຏິປທາໂທສປຎ຺ໂຫ

໔. ‘‘ຠນ຺ເຕ ນາຄເສນ, ຍທາ ໂພຘິສຕ຺ໂຕ ທຸກ຺ກຣກາຣິກໍ ອກາສິ, ເນຕາທິໂສ ອຎ຺ຎຕ຺ຣ ອາຣມ຺ໂຠ ອໂຫສິ ນິກ຺ກໂມ ກິເລສຍຸທ຺ຘໍ ມຈ຺ຈຸເສນໍ ວິຘມນໍ ອາຫາຣປຣິຄ຺ຄໂຫ ທຸກ຺ກຣກາຣິກາ, ເອວຣູເປ ປຣກ຺ກເມ ກິຎ຺ຈິ ອສ຺ສາທໍ ອລຠິຕ຺ວາ ຕເມວ ຈິຕ຺ຕໍ ປຣິຫາເປຕ຺ວາ ເອວມໂວຈ ‘ນ ໂຂ ປນາຫໍ ອິມາຍ ກຏຸກາຍ ທຸກ຺ກຣກາຣິກາຍ ອຘິຄຈ຺ຉາມິ ອຸຕ຺ຕຣິມນຸສ຺ສຘມ຺ມໍ ອລມຣິຍຎາຓທສ຺ສນວິເສສໍ, ສິຍາ ນຸ ໂຂ ອຎ຺ໂຎ ມຄ຺ໂຄ ໂພຘາຍາ’ຕິ, ຕໂຕ ນິພ຺ພິນ຺ທິຕ຺ວາ ອຎ຺ເຎນ ມເຄນ ສພ຺ພຎ຺ຎຸຕໍ ປຕ຺ໂຕ, ປຸນ ຕາຍ ປຏິປທາຍ ສາວເກ ອນຸສາສຕິ ສມາທເປຕິ.

‘‘‘ອາຣມ຺ຠຖ ນິກ຺ຂມຖ, ຍຸຎ຺ຊຖ ພຸທ຺ຘສາສເນ;

ຘຸນາຖ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ’ຕິ [ສໍ. ນິ. ໑.໑໘໕].

‘‘ເກນ ນ ໂຂ, ຠນ຺ເຕ ນາຄເສນ, ກາຣເຓນ ຕຖາຄໂຕ ຍາຍ ປຏິປທາຍ ອຕ຺ຕນາ ນິພ຺ພິນ຺ໂນ ວິຣຕ຺ຕຣູໂປ, ຕຕ຺ຖ ສາວເກ ອນຸສາສຕິ ສມາທເປຕີ’’ຕິ?

‘‘ຕທາປິ, ມຫາຣາຊ, ເອຕຣຫິປິ ສາ ເຍວ ປຏິປທາ, ຕໍ ເຍວ ປຏິປທໍ ປຏິປຊ຺ຊິຕ຺ວາ ໂພຘິສຕ຺ໂຕ ສພ຺ພຎ຺ຎຸຕໍ ປຕ຺ໂຕ. ອປິ ຈ, ມຫາຣາຊ, ໂພຘິສຕ຺ໂຕ ອຕິວີຣິຍໍ ກໂຣນ຺ໂຕ ນິຣວເສສໂຕ ອາຫາຣໍ ອຸປຣຸນ຺ຘິ. ຕສ຺ສ ອາຫາຣູປໂຣເຘນ ຈິຕ຺ຕທຸພ຺ພລ຺ຍໍ ອຸປ຺ປຊ຺ຊິ. ໂສ ເຕນ ທຸພ຺ພລ຺ເຍນ ນາສກ຺ຂິ ສພ຺ພຎ຺ຎຸຕໍ ປາປຸຓິຕຸໍ, ໂສ ມຕ຺ຕມຕ຺ຕໍ ກພຬີກາຣາຫາຣໍ ເສວນ຺ໂຕ ຕາເຍວ ປຏິປທາຍ ນຈິຣສ຺ເສວ ສພ຺ພຎ຺ຎຸຕໍ ປາປຸຓິ. ໂສ ເຍວ, ມຫາຣາຊ, ປຏິປທາ ສພ຺ເພສໍ ຕຖາຄຕານໍ ສພ຺ພຎ຺ຎຸຕຎາຓປ຺ປຏິລາຠາຍ.

‘‘ຍຖາ, ມຫາຣາຊ, ສພ຺ເພສໍ ສຕ຺ຕານໍ ອາຫາໂຣ ອຸປຕ຺ຖມ຺ໂຠ, ອາຫາຣູປນິສ຺ສິຕາ ສພ຺ເພ ສຕ຺ຕາ ສຸຂໍ ອນຸຠວນ຺ຕິ, ເອວເມວ ໂຂ, ມຫາຣາຊ, ສາ ເຍວ ປຏິປທາ ສພ຺ເພສໍ ຕຖາຄຕານໍ ສພ຺ພຎ຺ຎຸຕຎາຓປ຺ປຏິລາຠາຍ, ເນໂສ, ມຫາຣາຊ, ໂທໂສ ອາຣມ຺ຠສ຺ສ, ນ ນິກ຺ກມສ຺ສ, ນ ກິເລສຍຸທ຺ຘສ຺ສ, ເຍນ ຕຖາຄໂຕ ຕສ຺ມິໍ ສມເຍ ນ ປາປຸຓິ ສພ຺ພຎ຺ຎຸຕຎາຓໍ, ອຖ ໂຂ ອາຫາຣູປໂຣຘສ຺ເສເວໂສ ໂທໂສ, ສທາ ປຏິຍຕ຺ຕາ ເຍເວສາ ປຏິປທາ.

‘‘ຍຖາ, ມຫາຣາຊ, ປຸຣິໂສ ອທ຺ຘານໍ ອຕິເວເຄນ ຄຈ຺ເຉຍ຺ຍ, ເຕນ ໂສ ປກ຺ຂຫໂຕ ວາ ຠເວຍ຺ຍ ປີຐສປ຺ປີ ວາ ອສຎ຺ຈໂຣ ປຖວິຕເລ. ອປິ ນຸ ໂຂ, ມຫາຣາຊ, ມຫາປຖວິຍາ ໂທໂສ ອຕ຺ຖິ, ເຍນ ໂສ ປຸຣິໂສ ປກ຺ຂຫໂຕ ອໂຫສີ’’ຕິ? ‘‘ນ ຫິ, ຠນ຺ເຕ; ສທາ ປຏິຍຕ຺ຕາ, ຠນ຺ເຕ, ມຫາປຖວີ, ກຸໂຕ ຕສ຺ສາ ໂທໂສ? ວາຍາມສ຺ເສເວໂສ ໂທໂສ, ເຍນ ໂສ ປຸຣິໂສ ປກ຺ຂຫໂຕ ອໂຫສີ’’ຕິ. ‘‘ເອວເມວ ໂຂ, ມຫາຣາຊ, ເນໂສ ໂທໂສ ອາຣມ຺ຠສ຺ສ, ນ ນິກ຺ກມສ຺ສ, ນ ກິເລສຍຸທ຺ຘສ຺ສ, ເຍນ ຕຖາຄໂຕ ຕສ຺ມິໍ ສມເຍ ນ ປາປຸຓິ ສພ຺ພຎ຺ຎຸຕຎາຓໍ, ອຖ ໂຂ ອາຫາຣູປໂຣຘສ຺ເສເວໂສ ໂທໂສ ສທາ ປຏິຍຕ຺ຕາ ເຍເວສາ ປຏິປທາ.

‘‘ຍຖາ ວາ ປນ, ມຫາຣາຊ, ປຸຣິໂສ ກິລິຏ຺ຐໍ ສາຏກໍ ນິວາເສຍ຺ຍ, ນ ໂສ ຕໍ ໂຘວາເປຍ຺ຍ, ເນໂສ ໂທໂສ ອຸທກສ຺ສ, ສທາ ປຏິຍຕ຺ຕໍ ອຸທກໍ. ປຸຣິສສ຺ເສເວໂສ ໂທໂສ. ເອວເມວ ໂຂ, ມຫາຣາຊ, ເນໂສ ໂທໂສ ອາຣມ຺ຠສ຺ສ, ນ ນິກ຺ກມສ຺ສ, ນ ກິເລສຍຸທ຺ຘສ຺ສ, ເຍນ ຕຖາຄໂຕ ຕສ຺ມິໍ ສມເຍ ນ ປາປຸຓິ ສພ຺ພຎ຺ຎຸຕຎາຓໍ, ອຖ ໂຂ ອາຫາຣູປໂຣຘສ຺ເສເວໂສ ໂທໂສ, ສທາ ປຏິຍຕ຺ຕາ ເຍເວສາ ປຏິປທາ, ຕສ຺ມາ ຕຖາຄໂຕ ຕາເຍວ ປຏິປທາຍ ສາວເກ ອນຸສາສຕິ ສມາທເປຕິ, ເອວໍ ໂຂ, ມຫາຣາຊ, ສທາ ປຏິຍຕ຺ຕາ ອນວຊ຺ຊາ ສາ ປຏິປທາ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ປຏິປທາໂທສປຎ຺ໂຫ ຈຕຸຕ຺ໂຖ.