໑໑. ອາຈຣິຍານາຈຣິຍປຎ຺ໂຫ

໑໑. ‘‘ຠນ຺ເຕ, ນາຄເສນ, ຠາສິຕມ຺ເປຕໍ ຠຄວຕາ –

‘‘‘ນ ເມ ອາຈຣິໂຍ ອຕ຺ຖິ, ສທິໂສ ເມ ນ ວິຊ຺ຊຕິ;

ສເທວກສ຺ມິໍ ໂລກສ຺ມິໍ, ນຕ຺ຖິ ເມ ປຏິປຸຄ຺ຄໂລ’ຕິ [ມຫາວ. ໑໑].

‘‘ປຸນ ຈ ຠຓິຕໍ ‘ອິຕິ ໂຂ, ຠິກ຺ຂເວ, ອາຬາໂຣ ກາລາໂມ ອາຈຣິໂຍ ເມ ສມາໂນ ອນ຺ເຕວາສິໍ ມໍ ສມານໍ ອຕ຺ຕນາ ສມສມໍ ຐເປສິ, ອຸຬາຣາຍ ຈ ມໍ ປູຊາຍ ປູເຊສີ’ຕິ. ຍທິ, ຠນ຺ເຕ ນາຄເສນ, ຕຖາຄເຕນ ຠຓິຕໍ ‘ນ ເມ ອາຈຣິໂຍ ອຕ຺ຖິ, ສທິໂສ ເມ ນ ວິຊ຺ຊຕິ. ສເທວກສ຺ມິໍ ໂລກສ຺ມິໍ, ນຕ຺ຖິ ເມ ປຏິປຸຄ຺ຄໂລ’ຕິ, ເຕນ ຫິ ‘ອິຕິ ໂຂ, ຠິກ຺ຂເວ, ອາຬາໂຣ ກາລາໂມ ອາຈຣິໂຍ ເມ ສມາໂນ ອນ຺ເຕວາສິໍ ມໍ ສມານໍ ອຕ຺ຕນາ ສມສມໍ ຐເປສີ’ຕິ ຍໍ ວຈນໍ, ຕໍ ມິຈ຺ຉາ. ຍທິ ຕຖາຄເຕນ ຠຓິຕໍ ‘ອິຕິ ໂຂ, ຠິກ຺ຂເວ, ອາຬາໂຣ ກາລາໂມ ອາຈຣິໂຍ ເມ ສມາໂນ ອນ຺ເຕວາສິໍ ມໍ ສມານໍ ອຕ຺ຕນາ ສມສມໍ ຐເປສີ’ຕິ, ເຕນ ຫິ ‘ນ ເມ ອາຈຣິໂຍ ອຕ຺ຖິ, ສທິໂສ ເມ ນ ວິຊ຺ຊຕິ. ສເທວກສ຺ມິໍ ໂລກສ຺ມິໍ, ນຕ຺ຖິ ເມ ປຏິປຸຄ຺ຄໂລ’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຕຖາຄເຕນ ‘ນ ເມ ອາຈຣິໂຍ ອຕ຺ຖິ, ສທິໂສ ເມ ນ ວິຊ຺ຊຕິ. ສເທວກສ຺ມິໍ ໂລກສ຺ມິໍ, ນຕ຺ຖິ ເມ ປຏິປຸຄ຺ຄໂລ’ຕິ, ຠຓິຕຎ຺ຈ ‘ອິຕິ ໂຂ, ຠິກ຺ຂເວ, ອາຬາໂຣ ກາລາໂມ ອາຈຣິໂຍ ເມ ສມາໂນ ອນ຺ເຕວາສິໍ ມໍ ສມານໍ ອຕ຺ຕນາ ສມສມໍ ຐເປສິ, ອຸຬາຣາຍ ຈ ມໍ ປູຊາຍ ປູເຊສີ’ຕິ.

‘‘ຕຎ຺ຈ ປນ ວຈນໍ ປຸພ຺ເພວ ສມ຺ໂພຘາ ອນຠິສມ຺ພຸທ຺ຘສ຺ສ ໂພຘິສຕ຺ຕສ຺ເສວ ສໂຕ ອາຈຣິຍຠາວໍ ສນ຺ຘາຍ ຠາສິຕໍ.

‘ປຎ຺ຈິເມ, ມຫາຣາຊ, ປຸພ຺ເພວ ສມ຺ໂພຘາ ອນຠິສມ຺ພຸທ຺ຘສ຺ສ ໂພຘິສຕ຺ຕສ຺ສ ສໂຕ ອາຈຣິຍາ, ເຍຫິ ອນຸສິຏ຺ໂຐ ໂພຘິສຕ຺ໂຕ ຕຕ຺ຖ ຕຕ຺ຖ ທິວສໍ ວີຕິນາເມສິ. ກຕເມ ປຎ຺ຈ? ເຍ ເຕ, ມຫາຣາຊ, ອຏ຺ຐ ພ຺ຣາຫ຺ມຓາ ຊາຕມຕ຺ເຕ ໂພຘິສຕ຺ເຕ ລກ຺ຂຓານິ ປຣິຄ຺ຄຓ຺ຫິໍສຸ, ເສຍ຺ຍຖີທໍ, ຣາໂມ ຘໂຊ ລກ຺ຂໂຓ ມນ຺ຕີ ຍຎ຺ໂຎ ສຸຍາໂມ ສຸໂຠໂຊ ສຸທຕ຺ໂຕຕິ. ເຕ ຕສ຺ສ ໂສຕ຺ຖິໍ ປເວທຍິຕ຺ວາ ຣກ຺ຂາກມ຺ມໍ ອກໍສຸ, ເຕ ຈ ປຐມໍ ອາຈຣິຍາ.

‘‘ປຸນ ຈປຣໍ, ມຫາຣາຊ, ໂພຘິສຕ຺ຕສ຺ສ ປິຕາ ສຸທ຺ໂຘທໂນ ຣາຊາ ຍໍ ເຕນ ສມເຍນ ອຠິຊາຕໍ ອຸທິຈ຺ຈຊາຕິມນ຺ຕໍ ປທກໍ ເວຍ຺ຍາກຣຓໍ ຉຬງ຺ຄວນ຺ຕໍ ສພ຺ພມິຕ຺ຕໍ ນາມ ພ຺ຣາຫ຺ມຓໍ ອຸປເນຕ຺ວາ ໂສວຓ຺ເຓນ ຠິງ຺ຄາເຣນ [ຠິງ຺ກາເຣນ (ສີ. ປີ.)] ອຸທກໍ ໂອໂຓເຊຕ຺ວາ ‘ອິມໍ ກຸມາຣໍ ສິກ຺ຂາເປຫີ’ຕິ ອທາສິ, ອຍໍ ທຸຕິໂຍ ອາຈຣິໂຍ.

‘‘ປຸນ ຈປຣໍ, ມຫາຣາຊ, ຍາ ສາ ເທວຕາ ໂພຘິສຕ຺ຕໍ ສໍເວເຊສີ, ຍສ຺ສາ ວຈນໍ ສຸຕ຺ວາ ໂພຘິສຕ຺ໂຕ ສໍວິຄ຺ໂຄ ອຸພ຺ພິຄ຺ໂຄ ຕສ຺ມິໍ ເຍວ ຂເຓ ເນກ຺ຂມ຺ມໍ ນິກ຺ຂມິຕ຺ວາ ປພ຺ພຊິ, ອຍໍ ຕຕິໂຍ ອາຈຣິໂຍ.

‘‘ປຸນ ຈປຣໍ, ມຫາຣາຊ, ອາຬາໂຣ ກາລາໂມ ອາກິຎ຺ຈຎ຺ຎາຍຕນສ຺ສ ປຣິກມ຺ມໍ ອາຈິກ຺ຂິ, ອຍໍ ຈຕຸຕ຺ໂຖ ອາຈຣິໂຍ.

‘‘ປຸນ ຈປຣໍ, ມຫາຣາຊ, ອຸທໂກ ຣາມປຸຕ຺ໂຕ ເນວສຎ຺ຎານາສຎ຺ຎາຍຕນສ຺ສ ປຣິກມ຺ມໍ ອາຈິກ຺ຂິ [ອາຈິກ຺ຂຕິ (ກ.)], ອຍໍ ປຎ຺ຈໂມ ອາຈຣິໂຍ. ອິເມ ໂຂ, ມຫາຣາຊ, ປຸພ຺ເພວ ສມ຺ໂພຘາ ອນຠິສມ຺ພຸທ຺ຘສ຺ສ ໂພຘິສຕ຺ຕສ຺ສ ສໂຕ ປຎ຺ຈ ອາຈຣິຍາ. ເຕ ຈ ປນ ອາຈຣິຍາ ໂລກິເຍ ຘມ຺ເມ. ອິມສ຺ມິຎ຺ຈ ປນ, ມຫາຣາຊ, ໂລກຸຕ຺ຕເຣ ຘມ຺ເມ ສພ຺ພຎ຺ຎຸຕຎາຓປ຺ປຏິເວຘາຍ ນຕ຺ຖິ ຕຖາຄຕສ຺ສ ອນຸຕ຺ຕໂຣ ອນຸສາສໂກ, ສຍມ຺ຠູ, ມຫາຣາຊ, ຕຖາຄໂຕ ອນາຈຣິຍໂກ, ຕສ຺ມາ ກາຣຓາ ຕຖາຄເຕນ ຠຓິຕໍ ‘ນ ເມ ອາຈຣິໂຍ ອຕ຺ຖິ, ສທິໂສ ເມ ນ ວິຊ຺ຊຕິ. ສເທວກສ຺ມິໍ ໂລກສ຺ມິໍ, ນຕ຺ຖິ ເມ ປຏິປຸຄ຺ຄໂລ’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ອາຈຣິຍານາຈຣິຍປຎ຺ໂຫ ເອກາທສໂມ.

ສນ຺ຖວວຄ຺ໂຄ ປຎ຺ຈໂມ.

ອິມສ຺ມິໍ ວຄ຺ເຄ ເອກາທສ ປຎ຺ໂຫ.

ເມຓ຺ຑກປຎ຺ໂຫ ນິຏ຺ຐິໂຕ.