໔. ໂພຘິສຕ຺ຕຘມ຺ມຕາປຎ຺ໂຫ

໔. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ຘມ຺ມຕາຘມ຺ມປຣິຍາເຍ ‘ປຸພ຺ເພວ ໂພຘິສຕ຺ຕານໍ ມາຕາປິຕໂຣ ນິຍຕາ ໂຫນ຺ຕິ, ໂພຘິ ນິຍຕາ ໂຫຕິ, ອຄ຺ຄສາວກາ ນິຍຕາ ໂຫນ຺ຕິ, ປຸຕ຺ໂຕ ນິຍໂຕ ໂຫຕິ, ອຸປຏ຺ຐາໂກ ນິຍໂຕ ໂຫຕີ’ຕິ. ປຸນ ຈ ຕຸມ຺ເຫ ຠຓຖ ‘ຕຸສິເຕ ກາເຍ ຐິໂຕ ໂພຘິສຕ຺ໂຕ ອຏ຺ຐ ມຫາວິໂລກນານິ ວິໂລເກຕິ, ກາລໍ ວິໂລເກຕິ, ທີປໍ ວິໂລເກຕິ, ເທສໍ ວິໂລເກຕິ, ກຸລໍ ວິໂລເກຕິ, ຊເນຕ຺ຕິໍ ວິໂລເກຕິ, ອາຍຸໍ ວິໂລເກຕິ, ມາສໍ ວິໂລເກຕິ, ເນກ຺ຂມ຺ມໍ ວິໂລເກຕີ’ຕິ. ຠນ຺ເຕ ນາຄເສນ, ອປຣິປກ຺ເກ ຎາເຓ ພຸຊ຺ຌນໍ ນຕ຺ຖິ, ປຣິປກ຺ເກ ຎາເຓ ນ ສກ຺ກາ ນິເມສນ຺ຕຣມ຺ປິ ອາຄເມຕຸໍ, ອນຕິກ຺ກມນີຍໍ ປຣິປກ຺ກມານສໍ. ກສ຺ມາ ໂພຘິສຕ຺ໂຕ ກາລໍ ວິໂລເກຫິ ‘ກມ຺ຫິ ກາເລ ອຸປ຺ປຊ຺ຊາມີ’ຕິ. ອປຣິປກ຺ເກ ຎາເຓ ພຸຊ຺ຌນໍ ນຕ຺ຖິ, ປຣິປກ຺ເກ ຎາເຓ ນ ສກ຺ກາ ນິເມສນ຺ຕຣມ຺ປິ ອາຄເມຕຸໍ, ກສ຺ມາ ໂພຘິສຕ຺ໂຕ ກຸລໍ ວິໂລເກຕິ ‘ກຸມ຺ຫິ ກຸເລ ອຸປ຺ປຊ຺ຊາມີ’ຕິ. ຍທິ, ຠນ຺ເຕ ນາຄເສນ, ປຸພ຺ເພວ ໂພຘິສຕ຺ຕສ຺ສ ມາຕາປິຕໂຣ ນິຍຕາ, ເຕນ ຫິ ‘ກຸລໍ ວິໂລເກຕີ’ຕິ ຍໍ ວຈນໍ, ຕໍ ມິຈ຺ຉາ. ຍທິ ກຸລໍ ວິໂລເກຕິ, ເຕນ ຫິ ‘ປຸພ຺ເພວ ໂພຘິສຕ຺ຕສ຺ສ ມາຕາປິຕໂຣ ນິຍຕາ’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ນິຍຕາ, ມຫາຣາຊ, ປຸພ຺ເພວ ໂພຘິສຕ຺ຕສ຺ສ ມາຕາປິຕໂຣ, ກຸລຎ຺ຈ ໂພຘິສຕ຺ໂຕ ວິໂລເກຕິ. ກິນ຺ຕິ ປນ ກຸລໍ ວິໂລເກຕິ ‘ເຍ ເມ ມາຕາປິຕໂຣ, ເຕ ຂຕ຺ຕິຍາ ອຸທາຫຸ ພ຺ຣາຫ຺ມຓາ’ຕິ. ເອວໍ ກຸລໍ ວິໂລເກຕິ.

‘‘ອຏ຺ຐນ຺ນໍ, ມຫາຣາຊ, ປຸພ຺ເພວ ອນາຄຕໍ ໂອໂລເກຕພ຺ພໍ ໂຫຕິ. ກຕເມສໍ ອຏ຺ຐນ຺ນໍ? ວາຓິຊສ຺ສ, ມຫາຣາຊ, ປຸພ຺ເພວ ວິກ຺ກຍຠຓ຺ຑໍ ໂອໂລເກຕພ຺ພໍ ໂຫຕິ, ຫຕ຺ຖິນາຄສ຺ສ ປຸພ຺ເພວ ໂສຓ຺ຑາຍ ອນາຄໂຕ ມຄ຺ໂຄ ໂອໂລເກຕພ຺ໂພ ໂຫຕິ, ສາກຏິກສ຺ສ ປຸພ຺ເພວ ອນາຄຕໍ ຕິຕ຺ຖໍ ໂອໂລເກຕພ຺ພໍ ໂຫຕິ, ນິຍາມກສ຺ສ ປຸພ຺ເພວ ອນາຄຕໍ ຕີຣໍ ໂອໂລເກຕ຺ວາ ນາວາ ເປເສຕພ຺ພາ ໂຫຕິ, ຠິສກ຺ກສ຺ສ ປຸພ຺ເພວ ອາຍຸໍ ໂອໂລເກຕ຺ວາ ອາຕຸໂຣ ອຸປສງ຺ກມິຕພ຺ໂພ ໂຫຕິ, ອຸຕ຺ຕຣເສຕຸສ຺ສ ປຸພ຺ເພວ ຖິຣາຖິຣຠາວໍ ຊານິຕ຺ວາ ອຠິຣຸຫິຕພ຺ພໍ ໂຫຕິ, ຠິກ຺ຂຸສ຺ສ ປຸພ຺ເພວ ອນາຄຕໍ ກາລໍ ປຈ຺ຈເວກ຺ຂິຕ຺ວາ ໂຠຊນໍ ຠຸຎ຺ຊິຕພ຺ພໍ ໂຫຕິ, ໂພຘິສຕ຺ຕານໍ ປຸພ຺ເພວ ກຸລໍ ໂອໂລເກຕພ຺ພໍ ໂຫຕິ ‘ຂຕ຺ຕິຍກຸລໍ ວາ ພ຺ຣາຫ຺ມຓກຸລໍ ວາ’ຕິ. ອິເມສໍ ໂຂ, ມຫາຣາຊ, ອຏ຺ຐນ຺ນໍ ປຸພ຺ເພວ ອນາຄຕໍ ໂອໂລເກຕພ຺ພໍ ໂຫຕີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ໂພຘິສຕ຺ຕຘມ຺ມຕາປຎ຺ໂຫ ຈຕຸຕ຺ໂຖ.