໒. ຘມ຺ມວິນຍປຏິຈ຺ຉນ຺ນາປຏິຈ຺ຉນ຺ນປຎ຺ໂຫ

໒. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ຕຖາຄຕປ຺ປເວທິໂຕ, ຠິກ຺ຂເວ, ຘມ຺ມວິນໂຍ ວິວໂຏ ວິໂຣຈຕິ ໂນ ປຏິຈ຺ຉນ຺ໂນ’ຕິ. ປຸນ ຈ ປາຕິໂມກ຺ຂຸທ຺ເທໂສ ເກວລຎ຺ຈ ວິນຍປິຏກໍ ປິຫິຕໍ ປຏິຈ຺ຉນ຺ນໍ. ຍທິ, ຠນ຺ເຕ ນາຄເສນ, ຊິນສາສເນ ຍຸຕ຺ຕໍ ວາ ປຕ຺ຕໍ ວາ ສມຍໍ ລເຠຖ, ວິນຍປຓ຺ຓຕ຺ຕິ ວິວຏາ ໂສເຠຍ຺ຍ. ເກນ ກາຣເຓນ? ເກວລໍ ຕຕ຺ຖ ສິກ຺ຂາ ສໍຍໂມ ນິຍໂມ ສີລຄຸຓອາຈາຣປຓ຺ຓຕ຺ຕິ ອຕ຺ຖຣໂສ ຘມ຺ມຣໂສ ວິມຸຕ຺ຕິຣໂສ. ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ຕຖາຄຕປ຺ປເວທິໂຕ, ຠິກ຺ຂເວ, ຘມ຺ມວິນໂຍ ວິວໂຏ ວິໂຣຈຕິ ໂນ ປຏິຈ຺ຉນ຺ໂນ’ຕິ, ເຕນ ຫິ ‘ປາຕິໂມກ຺ຂຸທ຺ເທໂສ ເກວລຎ຺ຈ ວິນຍປິຏກໍ ປິຫິຕໍ ປຏິຈ຺ຉນ຺ນ’ນ຺ຕິ ຍໍ ວຈນໍ, ຕໍ ມິຈ຺ຉາ. ຍທິ ປາຕິໂມກ຺ຂຸທ຺ເທໂສ ເກວລຎ຺ຈ ວິນຍປິຏກໍ ປິຫິຕໍ ປຏິຈ຺ຉນ຺ນໍ, ເຕນ ຫິ ‘ຕຖາຄຕປ຺ປເວທິໂຕ, ຠິກ຺ຂເວ, ຘມ຺ມວິນໂຍ ວິວໂຏ ວິໂຣຈຕິ ໂນ ປຏິຈ຺ຉນ຺ໂນ’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ຕຖາຄຕປ຺ປເວທິໂຕ, ຠິກ຺ຂເວ, ຘມ຺ມວິນໂຍ ວິວໂຏ ວິໂຣຈຕິ ໂນ ປຏິຈ຺ຉນ຺ໂນ’ຕິ. ປຸນ ຈ ປາຕິໂມກ຺ຂຸທ຺ເທໂສ ເກວລຎ຺ຈ ວິນຍປິຏກໍ ປິຫິຕໍ ປຏິຈ຺ຉນ຺ນໍ, ຕຎ຺ຈ ປນ ນ ສພ຺ເພສໍ, ສີມໍ ກຕ຺ວາ ປິຫິຕໍ.

‘‘ຕິວິເຘນ, ມຫາຣາຊ, ຠຄວຕາ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ, ປຸພ຺ພການໍ ຕຖາຄຕານໍ ວໍສວເສນ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ, ຘມ຺ມສ຺ສ ຄຣຸກຕ຺ຕາ ປິຫິໂຕ, ຠິກ຺ຂຸຠູມິຍາ ຄຣຸກຕ຺ຕາ ປິຫິໂຕ.

‘‘ກຖໍ ປຸພ຺ພການໍ ຕຖາຄຕານໍ ວໍສວເສນ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ, ເອໂສ ວໍໂສ, ມຫາຣາຊ, ສພ຺ເພສໍ ປຸພ຺ພການໍ ຕຖາຄຕານໍ ຍທິທໍ ຠິກ຺ຂຸມຊ຺ເຌ ປາຕິໂມກ຺ຂຸທ຺ເທໂສ ອວເສສານໍ ປິຫິໂຕ. ຍຖາ, ມຫາຣາຊ, ຂຕ຺ຕິຍານໍ ຂຕ຺ຕິຍມາຍາ ຂຕ຺ຕິເຍສຸ ເຍວ ຈຣຕິ, ເອວເມຕໍ ຂຕ຺ຕິຍານໍ ໂລກສ຺ສ ປເວຓີ ອວເສສານໍ ປິຫິຕາ. ເອວເມວ ໂຂ, ມຫາຣາຊ, ເອໂສ ວໍໂສ ສພ຺ເພສໍ ປຸພ຺ພການໍ ຕຖາຄຕານໍ ຍທິທໍ ຠິກ຺ຂຸມຊ຺ເຌ ປາຕິໂມກ຺ຂຸທ຺ເທໂສ ອວເສສານໍ ປິຫິໂຕ.

‘‘ຍຖາ ວາ ປນ, ມຫາຣາຊ, ມຫິຍາ ຄຓາ ວຕ຺ຕນ຺ຕິ, ເສຍ຺ຍຖິທໍ, ມລ຺ລາ ອໂຕຓາ ປພ຺ພຕາ ຘມ຺ມຄິຣິຍາ ພ຺ຣຫ຺ມຄິຣິຍາ ນຏກາ ນຈ຺ຈກາ ລງ຺ຆກາ ປິສາຈາ ມຓິຠທ຺ທາ ປຸຓ຺ຓພທ຺ຘາ ຈນ຺ທິມສູຣິຍາ ສິຣິເທວຕາ ກາລິເທວຕາ, ສິວາ ວສຸເທວາ ຆນິກາ ອສິປາສາ ຠທ຺ທິປຸຕ຺ຕາຕິ, ເຕສໍ ເຕສໍ ຣຫສ຺ສໍ ເຕສຸ ເຕສຸ ຄເຓສຸ ເຍວ ຈຣຕິ, ອວເສສານໍ ປິຫິຕໍ. ເອວເມວ ໂຂ, ມຫາຣາຊ, ເອໂສ ວໍໂສ ສພ຺ເພສໍ ປຸພ຺ພການໍ ຕຖາຄຕານໍ ຍທິທໍ ຠິກ຺ຂຸມຊ຺ເຌ ປາຕິໂມກ຺ຂຸທ຺ເທໂສ ອວເສສານໍ ປິຫິໂຕ. ເອວໍ ປຸພ຺ພການໍ ຕຖາຄຕານໍ ວໍສວເສນ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ.

‘‘ກຖໍ ຘມ຺ມສ຺ສ ຄຣຸກຕ຺ຕາ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ? ຘມ຺ໂມ, ມຫາຣາຊ, ຄຣຸໂກ ຠາຣິໂຍ, ຕຕ຺ຖ ສມ຺ມຕ຺ຕກາຣີ ອຎ຺ຎໍ ອາຣາເຘຕິ, ຕໍ ຕຕ຺ຖ ປຣມ຺ປຣາສມ຺ມຕ຺ຕກາຣິຕາຍ ປາປຸຓາຕິ, ນ ຕໍ ຕຕ຺ຖ ປຣມ຺ປຣາສມ຺ມຕ຺ຕກາຣິຕາຍ ປາປຸຓາຕິ, ມາ ຈາຍໍ ສາຣຘມ຺ໂມ ວຣຘມ຺ໂມ ອສມ຺ມຕ຺ຕກາຣີນໍ ຫຕ຺ຖຄໂຕ ໂອຎ຺ຎາໂຕ ອວຎ຺ຎາໂຕ ຫີຬິໂຕ ຂີຬິໂຕ ຄຣຫິໂຕ ຠວຕຸ, ມາ ຈາຍໍ ສາຣຘມ຺ໂມ ວຣຘມ຺ໂມ ທຸຊ຺ຊນຄໂຕ ໂອຎ຺ຎາໂຕ ອວຎ຺ຎາໂຕ ຫີຬິໂຕ ຂີຬິໂຕ ຄຣຫິໂຕ ຠວຕູຕິ. ເອວໍ ຘມ຺ມສ຺ສ ຄຣຸກຕ຺ຕາ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ.

‘‘ຍຖາ, ມຫາຣາຊ, ສາຣວຣປວຣອຠິຊາຕຊາຕິມນ຺ຕຣຕ຺ຕໂລຫິຕຈນ຺ທນໍ ນາມ ສວຣປຸຣມນຸຄຕໍ ໂອຎ຺ຎາຕໍ ອວຎ຺ຎາຕໍ ຫີຬິຕໍ ຂີຬິຕໍ ຄຣຫິຕໍ ຠວຕິ, ເອວເມວ ໂຂ, ມຫາຣາຊ, ມາ ຈາຍໍ ສາຣຘມ຺ໂມ ວຣຘມ຺ໂມ ປຣມ຺ປຣາອສມ຺ມຕ຺ຕກາຣີນໍ ຫຕ຺ຖຄໂຕ ໂອຎ຺ຎາໂຕ ອວຎ຺ຎາໂຕ ຫີຬິໂຕ ຂີຬິໂຕ ຄຣຫິໂຕ ຠວຕຸ, ມາ ຈາຍໍ ສາຣຘມ຺ໂມ ວຣຘມ຺ໂມ ທຸຊ຺ຊນຄໂຕ ໂອຎ຺ຎາໂຕ ອວຎ຺ຎາໂຕ ຫີຬິໂຕ ຂີຬິໂຕ ຄຣຫິໂຕ ຠວຕູຕິ. ເອວໍ ຘມ຺ມສ຺ສ ຄຣຸກຕ຺ຕາ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ.

‘‘ກຖໍ ຠິກ຺ຂຸຠູມິຍາ ຄຣຸກຕ຺ຕາ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ, ຠິກ຺ຂຸຠາໂວ ໂຂ, ມຫາຣາຊ, ໂລເກ ອຕຸລິໂຍ ອປ຺ປມາໂຓ ອນຄ຺ຆິໂຍ, ນ ສກ຺ກາ ເກນຈິ ອຄ຺ຆາເປຕຸໍ ຕຸເລຕຸໍ ປຣິເມຕຸໍ, ມາຍໍ ເອວຣູເປ ຠິກ຺ຂຸຠາເວ ຐິໂຕ ໂລເກນ ສມສໂມ ຠວຕູຕິ ຠິກ຺ຂູນໍ ເຍວ ອນ຺ຕເຣ ປາຕິໂມກ຺ຂຸທ຺ເທໂສ ຈຣຕິ. ຍຖາ, ມຫາຣາຊ, ໂລເກ ວຣປວຣຠຓ຺ຑໍ ວຕ຺ຖໍ ວາ ອຕ຺ຖຣຓໍ ວາ ຄຊຕຸຣງ຺ຄຣຖສຸວຓ຺ຓຣຊຕມຓິມຸຕ຺ຕາອິຕ຺ຖິຣຕນາທີນິ ວາ ວິຊິຕກມ຺ມສູຣາ ວາ [ນິຊ຺ຊິຕກມ຺ມສູຣາ ວາ (ສີ. ປີ.)] ສພ຺ເພ ເຕ ຣາຊານມຸປຄຈ຺ຉນ຺ຕິ, ເອວເມວ ໂຂ, ມຫາຣາຊ, ຍາວຕາ ໂລເກ [ໂລເກ ສິກ຺ຂາ (ສີ. ປີ.)] ສຸຄຕາຄມປຣິຍຕ຺ຕິອາຈາຣສໍຍມສີລສໍວຣຄຸຓາ, ສພ຺ເພ ເຕ ຠິກ຺ຂຸສງ຺ຆມຸປຄຕາ ຠວນ຺ຕິ. ເອວໍ ຠິກ຺ຂຸຠູມິຍາ ຄຣຸກຕ຺ຕາ ປາຕິໂມກ຺ຂຸທ຺ເທໂສ ສີມໍ ກຕ຺ວາ ປິຫິໂຕ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປິຏິຈ຺ຉາມີ’’ຕິ.

ຘມ຺ມວິນຍປຏິຈ຺ຉນ຺ນາປຏິຈ຺ຉນ຺ນປຎ຺ໂຫ ທຸຕິໂຍ.