ມິລິນ຺ທປຎ຺ຫປຸຈ຺ຉາວິສຊ຺ຊນາ

ເຖໂຣ ອາຫ ‘‘ຊານາສິ ໂຂ, ມຫາຣາຊ, ສມ຺ປຕິ ກາ ເວລາ’’ຕິ? ‘‘ອາມ, ຠນ຺ເຕ, ຊານາມິ ‘ສມ຺ປຕິ ປຐໂມ ຍາໂມ ອຕິກ຺ກນ຺ໂຕ, ມຊ຺ຌິໂມ ຍາໂມ ປວຕ຺ຕຕິ, ອຸກ຺ກາ ປທີປີຍນ຺ຕິ, ຈຕ຺ຕາຣິ ປຏາການິ ອາຓຕ຺ຕານິ ຄມິສ຺ສນ຺ຕິ ຠຓ຺ຑໂຕ ຣາຊເທຍ຺ຍານີ’’’ຕິ.

ໂຍນກາ ເອວມາຫໍສຸ ‘‘ກລ຺ໂລສິ, ມຫາຣາຊ, ປຓ຺ຑິໂຕ ເຖໂຣ’’ຕິ. ‘‘ອາມ, ຠເຓ, ປຓ຺ຑິໂຕ ເຖໂຣ, ເອທິໂສ ອາຈຣິໂຍ ຠເວຍ຺ຍ ມາທິໂສ ຈ ອນ຺ເຕວາສີ, ນຈິຣສ຺ເສວ ປຓ຺ຑິໂຕ ຘມ຺ມໍ ອາຊາເນຍ຺ຍາ’’ຕິ. ຕສ຺ສ ປຎ຺ຫເວຍ຺ຍາກຣເຓນ ຕຸຏ຺ໂຐ ຣາຊາ ເຖຣໍ ນາຄເສນໍ ສຕສຫສ຺ສຄ຺ຆນເກນ ກມ຺ພເລນ ອຈ຺ຉາເທຕ຺ວາ ‘‘ຠນ຺ເຕ ນາຄເສນ, ອຊ຺ຊຕຄ຺ເຄ ເຕ ອຏ຺ຐສຕໍ ຠຕ຺ຕໍ ປຎ຺ຎເປມິ, ຍໍ ກິຎ຺ຈິ ອນ຺ເຕປຸເຣ ກປ຺ປິຍໍ, ເຕນ ຈ ປວາເຣມີ’’ຕິ ອາຫ. ອລໍ ມຫາຣາຊ ຊີວາມີ’’ຕິ. ‘‘ຊານາມິ, ຠນ຺ເຕ ນາຄເສນ, ຊີວສິ, ອປິ ຈ ອຕ຺ຕານຎ຺ຈ ຣກ຺ຂ, ມມຎ຺ຈ ຣກ຺ຂາຫີ’’ຕິ. ‘‘ກຖໍ ອຕ຺ຕານໍ ຣກ຺ຂສິ, ‘ນາຄເສໂນ ມິລິນ຺ທໍ ຣາຊານໍ ປສາເທຕິ, ນ ຈ ກິຎ຺ຈິ ອລຠີ’ຕິ ປຣາປວາໂທ [ປຣປ຺ປວາໂທ (ກ.)] ອາຄຈ຺ເຉຍ຺ຍາຕິ, ເອວໍ ອຕ຺ຕານໍ ຣກ຺ຂ. ກຖໍ ມມໍ ຣກ຺ຂສິ, ‘ມິລິນ຺ໂທ ຣາຊາ ປສນ຺ໂນ ປສນ຺ນາກາຣໍ ນ ກໂຣຕີ’ຕິ ປຣາປວາໂທ ອາຄຈ຺ເຉຍ຺ຍາຕິ, ເອວໍ ມມໍ ຣກ຺ຂາຫີ’’ຕິ. ‘‘ຕຖາ ໂຫຕຸ, ມຫາຣາຊາ’’ຕິ. ‘‘ເສຍ຺ຍຖາປິ, ຠນ຺ເຕ, ສີໂຫ ມິຄຣາຊາ ສຸວຓ຺ຓປຎ຺ຊເຣ ປກ຺ຂິຕ຺ໂຕປິ ພຫິມຸໂຂ ເຍວ ໂຫຕິ, ເອວເມວ ໂຂ ອຫໍ, ຠນ຺ເຕ, ກິຎ຺ຈາປິ ອຄາຣໍ ອຊ຺ຌາວສາມິ ພຫິມຸໂຂ ເຍວ ປນ ອຈ຺ຉາມິ. ສເຈ ອຫໍ, ຠນ຺ເຕ, ອຄາຣສ຺ມາ ອນາຄາຣິຍໍ ປພ຺ພເຊຍ຺ຍໍ, ນ ຈິຣໍ ຊີເວຍ຺ຍໍ, ພຫູ ເມ ປຈ຺ຈຕ຺ຖິກາ’’ຕິ.

ອຖ ໂຂ ອາຍສ຺ມາ ນາຄເສໂນ ມິລິນ຺ທສ຺ສ ຣຎ຺ໂຎ ປຎ຺ຫໍ ວິສຊ຺ເຊຕ຺ວາ ອຸຏ຺ຐາຍາສນາ ສງ຺ຆາຣາມໍ ອຄມາສິ. ອຈິຣປກ຺ກນ຺ເຕ ຈ ອາຍສ຺ມນ຺ເຕ ນາຄເສເນ ມິລິນ຺ທສ຺ສ ຣຎ຺ໂຎ ເອຕທໂຫສິ ‘‘ກິໍ ມຍາ ປຸຈ຺ຉິຕໍ, ກິໍ ຠທນ຺ເຕນ ນາຄເສເນນ ວິສຊ຺ຊິຕ’’ນ຺ຕິ? ອຖ ໂຂ ມິລິນ຺ທສ຺ສ ຣຎ຺ໂຎ ເອຕທໂຫສິ ‘‘ສພ຺ພໍ ມຍາ ສຸປຸຈ຺ຉິຕໍ, ສພ຺ພໍ ຠທນ຺ເຕນ ນາຄເສເນນ ສຸວິສຊ຺ຊິຕ’’ນ຺ຕິ. ອາຍສ຺ມໂຕປິ ນາຄເສນສ຺ສ ສງ຺ຆາຣາມຄຕສ຺ສ ເອຕທໂຫສິ ‘‘ກິໍ ມິລິນ຺ເທນ ຣຎ຺ຎາ ປຸຈ຺ຉິຕໍ, ກິໍ ມຍາ ວິສຊ຺ຊິຕ’’ນ຺ຕິ. ອຖ ໂຂ ອາຍສ຺ມໂຕ ນາຄເສນສ຺ສ ເອຕທໂຫສິ ‘‘ສພ຺ພໍ ມິລິນ຺ເທນ ຣຎ຺ຎາ ສຸປຸຈ຺ຉິຕໍ, ສພ຺ພໍ ມຍາ ສຸວິສຊ຺ຊິຕ’’ນ຺ຕິ.

ອຖ ໂຂ ອາຍສ຺ມາ ນາຄເສໂນ ຕສ຺ສາ ຣຕ຺ຕິຍາ ອຈ຺ຈເຍນ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ມິລິນ຺ທສ຺ສ ຣຎ຺ໂຎ ນິເວສນໍ ເຕນຸປສງ຺ກມິ, ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ມິລິນ຺ໂທ ຣາຊາ ອາຍສ຺ມນ຺ຕໍ ນາຄເສນໍ ອຠິວາເທຕ຺ວາ ເອກມນ຺ຕໍ ນິສີທິ, ເອກມນ຺ຕໍ ນິສິນ຺ໂນ ໂຂ ມິລິນ຺ໂທ ຣາຊາ ອາຍສ຺ມນ຺ຕໍ ນາຄເສນໍ ເອຕທໂວຈ –

‘‘ມາ ໂຂ ຠທນ຺ຕສ຺ສ ເອວໍ ອໂຫສິ ‘ນາຄເສໂນ ມຍາ ປຎ຺ຫໍ ປຸຈ຺ຉິໂຕ’ຕິ ເຕເນວ ໂສມນສ຺ເສນ ຕໍ ຣຕ຺ຕາວເສສໍ ວີຕິນາເມສີຕິ ນ ເຕ ເອວໍ ທຏ຺ຐພ຺ພໍ. ຕສ຺ສ ມຍ຺ຫໍ, ຠນ຺ເຕ, ຕໍ ຣຕ຺ຕາວເສສໍ ເອຕທໂຫສິ ‘ກິໍ ມຍາ ປຸຈ຺ຉິຕໍ, ກິໍ ຠທນ຺ເຕນ ວິສຊ຺ຊິຕ’ນ຺ຕິ, ‘ສພ຺ພໍ ມຍາ ສຸປຸຈ຺ຉິຕໍ, ສພ຺ພໍ ຠທນ຺ເຕນ ສຸວິສຊ຺ຊິຕ’’’ນ຺ຕິ.

ເຖໂຣປິ ເອວມາຫ – ‘‘ມາ ໂຂ ມຫາຣາຊສ຺ສ ເອວໍ ອໂຫສິ ‘ມິລິນ຺ທສ຺ສ ຣຎ຺ໂຎ ມຍາ ປຎ຺ໂຫ ວິສຊ຺ຊິໂຕ’ຕິ ເຕເນວ ໂສມນສ຺ເສນ ຕໍ ຣຕ຺ຕາວເສສໍ ວີຕິນາເມສີຕິ ນ ເຕ ເອວໍ ທຏ຺ຐພ຺ພໍ. ຕສ຺ສ ມຍ຺ຫໍ, ມຫາຣາຊ, ຕໍ ຣຕ຺ຕາວເສສໍ ເອຕທໂຫສິ ‘ກິໍ ມິລິນ຺ເທນ ຣຎ຺ຎາ ປຸຈ຺ຉິຕໍ, ກິໍ ມຍາ ວິສຊ຺ຊິຕ’ນ຺ຕິ, ‘ສພ຺ພໍ ມິລິນ຺ເທນ ຣຎ຺ຎາ ສຸປຸຈ຺ຉິຕໍ, ສພ຺ພໍ ມຍາ ສຸວິສຊ຺ຊິຕ’’’ນ຺ຕິ ອິຕິຫ ເຕ ມຫານາຄາ ອຎ຺ຎມຎ຺ຎສ຺ສ ສຸຠາສິຕໍ ສມນຸໂມທິໍສູຕິ.

ມິລິນ຺ທປຎ຺ຫປຸຈ຺ຉາວິສຊ຺ຊນາ ນິຏ຺ຐິຕາ.