໔໒໔. ອາທິຕ຺ຕຊາຕກໍ (໘)

໖໙. ອາທິຕ຺ຕສ຺ມິໍ ອຄາຣສ຺ມິໍ, ຍໍ ນີຫຣຕິ ຠາຊນໍ;

ຕໍ ຕສ຺ສ ໂຫຕິ ອຕ຺ຖາຍ, ໂນ ຈ ຍໍ ຕຕ຺ຖ ຑຍ຺ຫຕິ.

໗໐. ເອວາມາທີປິໂຕ ໂລໂກ, ຊຣາຍ ມຣເຓນ ຈ;

ນີຫເຣເຖວ ທາເນນ, ທິນ຺ນໍ ໂຫຕິ ສຸນີຫຕໍ [ສຸນີຠຕໍ (ສີ. ສ຺ຍາ. ປີ.), ສຸນິພ຺ຠຕໍ (ກ.)].

໗໑. ໂຍ ຘມ຺ມລທ຺ຘສ຺ສ ທທາຕິ ທານໍ, ອຸຏ຺ຐານວີຣິຍາຘິຄຕສ຺ສ ຊນ຺ຕຸ;

ອຕິກ຺ກມ຺ມ ໂສ ເວຕຣຓິໍ [ເວຕ຺ຕຣຓິໍ (ກ.)] ຍມສ຺ສ, ທິພ຺ພານິ ຐານານິ ອຸເປຕິ ມຈ຺ໂຈ.

໗໒. ທານຎ຺ຈ ຍຸທ຺ຘຎ຺ຈ ສມານມາຫຸ, ອປ຺ປາປິ ສນ຺ຕາ ພຫຸເກ ຊິນນ຺ຕິ;

ອປ຺ປມ຺ປິ ເຈ ສທ຺ທຫາໂນ ທທາຕິ, ເຕເນວ ໂສ ໂຫຕິ ສຸຂີ ປຣຕ຺ຖ.

໗໓. ວິເຈຍ຺ຍ ທານໍ ສຸຄຕປ຺ປສຕ຺ຖໍ, ເຍ ທກ຺ຂິເຓຍ຺ຍາ ອິຘ ຊີວໂລເກ;

ເອເຕສຸ ທິນ຺ນານິ ມຫປ຺ຜລານິ, ພີຊານິ ວຸຕ຺ຕານິ ຍຖາ ສຸເຂຕ຺ເຕ.

໗໔. ໂຍ ປາຓຠູຕານິ ອເຫຐຍໍ ຈຣໍ, ປຣູປວາທາ ນ ກໂຣຕິ ປາປໍ;

ຠີຣຸໍ ປສໍສນ຺ຕິ ນ ຕຕ຺ຖ ສູຣໍ, ຠຍາ ຫິ ສນ຺ໂຕ ນ ກໂຣນ຺ຕິ ປາປໍ.

໗໕. ຫີເນນ ພ຺ຣຫ຺ມຈຣິເຍນ, ຂຕ຺ຕິເຍ ອຸປປຊ຺ຊຕິ;

ມຊ຺ຌິເມນ ຈ ເທວຕ຺ຕໍ, ອຸຕ຺ຕເມນ ວິສຸຊ຺ຌຕິ.

໗໖. ອທ຺ຘາ ຫິ ທານໍ ພຫຸຘາ ປສຕ຺ຖໍ, ທານາ ຈ ໂຂ ຘມ຺ມປທໍວ ເສຍ຺ໂຍ;

ປຸພ຺ເພວ ຫິ ປຸພ຺ພຕເຣວ ສນ຺ໂຕ [ປຸພ຺ເພ ຈ ຫິ ປຸພ຺ພຕເຣ ຈ ສນ຺ໂຕ (ສໍ. ນິ. ໑.໓໓)], ນິພ຺ພານເມວຊ຺ຌຄມຸໍ ສປຎ຺ຎາຕິ.

ອາທິຕ຺ຕຊາຕກໍ ອຏ຺ຐມໍ.