໔໒໕. ອຏ຺ຐານຊາຕກໍ (໙)

໗໗. ຄງ຺ຄາ ກຸມຸທິນີ ສນ຺ຕາ, ສງ຺ຂວຓ຺ຓາ ຈ ໂກກິລາ;

ຊມ຺ພຸ ຕາລຜລໍ ທຊ຺ຊາ, ອຖ ນູນ ຕທາ ສິຍາ.

໗໘. ຍທາ ກຈ຺ຉປໂລມານໍ, ປາວາໂຣ ຕິວິໂຘ ສິຍາ;

ເຫມນ຺ຕິກໍ ປາວຸຣຓໍ [ປາປຸຣຓໍ (ສີ. ສ຺ຍາ. ປີ.)], ອຖ ນູນ ຕທາ ສິຍາ.

໗໙. ຍທາ ມກສປາທານໍ [ທາຐານໍ (ສີ. ປີ.)], ອຏ຺ຏາໂລ ສຸກໂຕ ສິຍາ;

ທຬ຺ໂຫ ຈ ອວິກມ຺ປີ ຈ [ອປ຺ປກມ຺ປີ ຈ (ສີ. ປີ.)], ອຖ ນູນ ຕທາ ສິຍາ.

໘໐. ຍທາ ສສວິສາຓານໍ, ນິສ຺ເສຓີ ສຸກຕາ ສິຍາ;

ສຄ຺ຄສ຺ສາໂຣຫຓຕ຺ຖາຍ, ອຖ ນູນ ຕທາ ສິຍາ.

໘໑. ຍທາ ນິສ຺ເສຓິມາຣຸຍ຺ຫ, ຈນ຺ທໍ ຂາເທຍ຺ຍຸ ມູສິກາ;

ຣາຫຸຎ຺ຈ ປຣິປາເຕຍ຺ຍຸໍ [ປຣິພາເຫຍ຺ຍຸໍ (ສ຺ຍາ.)], ອຖ ນູນ ຕທາ ສິຍາ.

໘໒. ຍທາ ສຸຣາຆຏໍ ປິຕ຺ວາ, ມກ຺ຂິກາ ຄຓຈາຣິຓີ;

ອງ຺ຄາເຣ ວາສໍ ກປ຺ເປຍ຺ຍຸໍ, ອຖ ນູນ ຕທາ ສິຍາ.

໘໓. ຍທາ ພິມ຺ໂພຏ຺ຐສມ຺ປນ຺ໂນ, ຄທ຺ຣໂຠ ສຸມຸໂຂ ສິຍາ;

ກຸສໂລ ນຈ຺ຈຄີຕສ຺ສ, ອຖ ນູນ ຕທາ ສິຍາ.

໘໔. ຍທາ ກາກາ ອຸລູກາ ຈ, ມນ຺ຕເຍຍ຺ຍຸໍ ຣໂຫຄຕາ;

ອຎ຺ຎມຎ຺ຎໍ ປິຫເຍຍ຺ຍຸໍ, ອຖ ນູນ ຕທາ ສິຍາ.

໘໕. ຍທາ ມຸຬາລ [ປຸລສ (ສີ. ປີ.), ປຸລາສ (ສ຺ຍາ.)] ປຕ຺ຕານໍ, ຉຕ຺ຕໍ ຖິຣຕຣໍ ສິຍາ;

ວສ຺ສສ຺ສ ປຏິຆາຕາຍ, ອຖ ນູນ ຕທາ ສິຍາ.

໘໖. ຍທາ ກຸລໂກ [ກຸລຸງ຺ໂກ (ສີ. ປີ.), ກຸລຸໂກ (ສ຺ຍາ.)] ສກຸໂຓ, ປພ຺ພຕໍ ຄນ຺ຘມາທນໍ;

ຕຸຓ຺ເຑນາທາຍ ຄຈ຺ເຉຍ຺ຍ, ອຖ ນູນ ຕທາ ສິຍາ.

໘໗. ຍທາ ສາມຸທ຺ທິກໍ ນາວໍ, ສ-ຍນ຺ຕໍ ສ-ວຏາກຣໍ [ສປຏາກາຣໍ (ກ.)];

ເຈໂຏ ອາທາຍ ຄຈ຺ເຉຍ຺ຍ, ອຖ ນູນ ຕທາ ສິຍາຕິ.

ອຏ຺ຐານຊາຕກໍ ນວມໍ.