໘. ອຏ຺ຐກນິປາໂຕ

໔໑໗. ກຈ຺ຈານິຊາຕກໍ (໑)

໑. ໂອທາຕວຕ຺ຖາ ສຸຈິ ອລ຺ລເກສາ, ກຈ຺ຈານິ ກິໍ ກຸມ຺ຠິມຘິສ຺ສຍິຕ຺ວາ [ກຸມ຺ຠິມປສ຺ສຍິຕ຺ວາ (ປີ.)];

ປິຏ຺ຐາ ຕິລາ ໂຘວສິ ຕຓ຺ຑຸລານິ, ຕິໂລທໂນ ເຫຫິຕິ ກິສ຺ສ ເຫຕຸ.

໒. ນ ໂຂ ອຍໍ ພ຺ຣາຫ຺ມຓ ໂຠຊນຕ຺ຖາ [ໂຠຊນຕ຺ຖໍ (ສ຺ຍາ.)], ຕິໂລທໂນ ເຫຫິຕິ ສາຘຸປກ຺ໂກ;

ຘມ຺ໂມ ມໂຕ ຕສ຺ສ ປຫຸຕ຺ຕມຊ຺ຊ [ປຫູນມຊ຺ຊ (ສ຺ຍາ.), ປຫູຕມຊ຺ຊ (ສີ.), ພຫູຕມຊ຺ຊາ (ປີ.)], ອຫໍ ກຣິສ຺ສາມິ ສຸສານມຊ຺ເຌ.

໓. ອນຸວິຈ຺ຈ ກຈ຺ຈານິ ກໂຣຫິ ກິຈ຺ຈໍ, ຘມ຺ໂມ ມໂຕ ໂກ ນຸ ຕເວວ [ຕເວຕ (ສີ. ສ຺ຍາ. ປີ.)] ສໍສິ;

ສຫສ຺ສເນຕ຺ໂຕ ອຕຸລານຸຠາໂວ, ນ ມິຍ຺ຍຕີ ຘມ຺ມວໂຣ ກທາຈິ.

໔. ທຬ຺ຫປ຺ປມາຓໍ ມມ ເອຕ຺ຖ ພ຺ຣຫ຺ເມ, ຘມ຺ໂມ ມໂຕ ນຕ຺ຖິ ມເມຕ຺ຖ ກງ຺ຂາ;

ເຍ ເຍວ ທານິ ປາປາ ຠວນ຺ຕິ, ເຕ ເຕວ ທານິ ສຸຂິຕາ ຠວນ຺ຕິ.

໕. ສຸຓິສາ ຫິ ມຍ຺ຫໍ ວຎ຺ຌາ ອໂຫສິ, ສາ ມໍ ວຘິຕ຺ວານ ວິຊາຍິ ປຸຕ຺ຕໍ;

ສາ ທານິ ສພ຺ພສ຺ສ ກຸລສ຺ສ ອິສ຺ສຣາ, ອຫໍ ປນມ຺ຫິ [ວສາມິ (ສ຺ຍາ.)] ອປວິທ຺ຘາ ເອກິກາ.

໖. ຊີວາມິ ໂວຫໍ ນ ມໂຕຫມສ຺ມິ [ນາຫໍ ມໂຕສ຺ມິ (ສີ. ປີ.)], ຕເວວ ອຕ຺ຖາຍ ອິຘາຄໂຕສ຺ມິ;

ຍາ ຕໍ ວຘິຕ຺ວານ ວິຊາຍິ ປຸຕ຺ຕໍ, ສຫາວ ປຸຕ຺ເຕນ ກໂຣມິ ຠສ຺ມໍ.

໗. ເອວຎ຺ຈ [ເອຕຎ຺ຈ (ສີ. ປີ.)] ເຕ ຣຸຈ຺ຈຕິ ເທວຣາຊ, ມເມວ ອຕ຺ຖາຍ ອິຘາຄໂຕສິ;

ອຫຎ຺ຈ ປຸຕ຺ໂຕ ສຸຓິສາ ຈ ນຕ຺ຕາ, ສມ຺ໂມທມານາ ຆຣມາວເສມ.

໘. ເອວຎ຺ຈ ເຕ ຣຸຈ຺ຈຕິ ກາຕິຍານິ, ຫຕາປິ ສນ຺ຕາ ນ ຊຫາສິ ຘມ຺ມໍ;

ຕຸວຎ຺ຈ [ຕ຺ວຎ຺ຈ (ປີ. ກ.)] ປຸຕ຺ໂຕ ສຸຓິສາ ຈ ນຕ຺ຕາ, ສມ຺ໂມທມານາ ຆຣມາວເສຖ.

໙. ສາ ກາຕິຍານີ ສຸຓິສາຍ ສທ຺ຘິໍ, ສມ຺ໂມທມານາ ຆຣມາວສິຕ຺ຖ;

ປຸຕ຺ໂຕ ຈ ນຕ຺ຕາ ຈ ອຸປຏ຺ຐຫິໍສຸ, ເທວານມິນ຺ເທນ ອຘິຄ຺ຄຫີຕາຕິ.

ກຈ຺ຈານິຊາຕກໍ ປຐມໍ.

໔໑໘. ອຏ຺ຐສທ຺ທຊາຕກໍ (໒)

໑໐. ອິທໍ ປຸເຣ ນິນ຺ນມາຫຸ, ພຫຸມຈ຺ຉໍ ມໂຫທກໍ;

ອາວາໂສ ພກຣາຊສ຺ສ, ເປຕ຺ຕິກໍ ຠວນໍ ມມ;

ຕ຺ຍຊ຺ຊ ເຠເກນ [ຠິງ຺ເຄນ (ກ.)] ຍາເປມ, ໂອກໍ ນ ວຊຫາມເສ [ໂອກນ຺ຕໍ ນ ຊຫາມເສ (ກ.)].

໑໑. ໂກ ທຸຕິຍໍ ອສີລິສ຺ສ, ພນ຺ຘຣສ຺ສກ຺ຂິ ເຠຈ຺ຉຕິ [ເຠຊ຺ຊຕິ (ສີ. ສ຺ຍາ. ປີ.), ຠິນ຺ທຕິ (ກ.)];

ໂກ ເມ ປຸຕ຺ເຕ ກຸລາວກໍ, ມຎ຺ຈ ໂສຕ຺ຖິໍ ກຣິສ຺ສຕິ.

໑໒. ສພ຺ພາ ປຣິກ຺ຂຍາ ເຜຄ຺ຄຸ, ຍາວ ຕສ຺ສາ ຄຕີ ອຫຸ;

ຂີຓຠກ຺ໂຂ ມຫາຣາຊ, ສາເຣ ນ ຣມຕີ ຆຸໂຓ.

໑໓. ສາ ນູນາຫໍ ອິໂຕ ຄນ຺ຕ຺ວາ, ຣຎ຺ໂຎ ມຸຕ຺ຕາ ນິເວສນາ;

ອຕ຺ຕານໍ ຣມຍິສ຺ສາມິ, ທຸມສາຂນິເກຕິນີ.

໑໔. ໂສ ນູນາຫໍ ອິໂຕ ຄນ຺ຕ຺ວາ, ຣຎ຺ໂຎ ມຸຕ຺ໂຕ ນິເວສນາ;

ອຄ຺ໂຄທການິ ປິສ຺ສາມິ, ຍູຖສ຺ສ ປຸຣໂຕ ວຊໍ.

໑໕. ຕໍ ມໍ ກາເມຫິ ສມ຺ມຕ຺ຕໍ, ຣຕ຺ຕໍ ກາເມສຸ ມຸຈ຺ຉິຕໍ;

ອານຍີ ຠຣໂຕ [ວນໂຕ (ກ.)] ລຸທ຺ໂທ, ພາຫິໂກ ຠທ຺ທມຕ຺ຖຸ ເຕ.

໑໖. ອນ຺ຘກາຣຕິມິສາຍໍ, ຕຸງ຺ເຄ ອຸປຣິປພ຺ພເຕ;

ສາ ມໍ ສຓ຺ເຫນ ມຸທຸນາ, ມາ ປາທໍ ຂລິ [ຂຓິ (ສີ. ສ຺ຍາ. ປີ.)] ຍສ຺ມນິ.

໑໗. ອສໍສຍໍ ຊາຕິຂຍນ຺ຕທສ຺ສີ, ນ ຄພ຺ຠເສຍ຺ຍໍ ປຸນຣາວຊິສ຺ສໍ;

ອຍມນ຺ຕິມາ ປຈ຺ຉິມາ ຄພ຺ຠເສຍ຺ຍາ [ອຍໍ ຫິ ເມ ອນ຺ຕິມາ ຄພ຺ຠເສຍ຺ຍາ (ສີ. ປີ.)], ຂີໂຓ ເມ ສໍສາໂຣ ປຸນພ຺ຠວາຍາຕິ.

ອຏ຺ຐສທ຺ທຊາຕກໍ ທຸຕິຍໍ.

໔໑໙. ສຸລສາຊາຕກໍ (໓)

໑໘. ອິທໍ ສຸວຓ຺ຓກາຍູຣໍ, ມຸຕ຺ຕາ ເວຬຸຣິຍາ ພຫູ;

ສພ຺ພໍ ຫຣສ຺ສຸ ຠທ຺ທນ຺ເຕ, ມຎ຺ຈ ທາສີຕິ ສາວຍ.

໑໙. ໂອໂຣປຍສ຺ສຸ ກລ຺ຍາຓິ, ມາ ພາຬ຺ຫໍ [ພຫຸໍ (ສີ. ສ຺ຍາ. ປີ.)] ປຣິເທວສິ;

ນ ຈາຫໍ ອຠິຊານາມິ, ອຫນ຺ຕ຺ວາ ຘນມາຠຕໍ.

໒໐. ຍໂຕ ສຣາມິ ອຕ຺ຕານໍ, ຍໂຕ ປຕ຺ຕາສ຺ມິ ວິຎ຺ຎຸຕໍ;

ນ ຈາຫໍ ອຠິຊານາມິ, ອຎ຺ຎໍ ປິຍຕຣໍ ຕຍາ.

໒໑. ເອຫິ ຕໍ ອຸປຄູຫິສ຺ສໍ [ອຸປຄຸຍ຺ຫິສ຺ສໍ (ກ.)], ກຣິສ຺ສຎ຺ຈ ປທກ຺ຂິຓໍ;

ນ ຫິ ທານິ ປຸນ ອຕ຺ຖິ, ມມ ຕຸຍ຺ຫຎ຺ຈ ສງ຺ຄໂມ.

໒໒. ນ ຫິ ສພ຺ເພສຸ ຐາເນສຸ, ປຸຣິໂສ ໂຫຕິ ປຓ຺ຑິໂຕ;

ອິຕ຺ຖີປິ ປຓ຺ຑິຕາ ໂຫຕິ, ຕຕ຺ຖ ຕຕ຺ຖ ວິຈກ຺ຂຓາ.

໒໓. ນ ຫິ ສພ຺ເພສຸ ຐາເນສຸ, ປຸຣິໂສ ໂຫຕິ ປຓ຺ຑິໂຕ;

ອິຕ຺ຖີປິ ປຓ຺ຑິຕາ ໂຫຕິ, ລຫຸໍ ອຕ຺ຖໍ ວິຈິນ຺ຕິກາ [ລຫຸມຕ຺ຖວິຈິນ຺ຕິກາ (ສີ. ປີ.)].

໒໔. ລຫຸຎ຺ຈ ວຕ ຂິປ຺ປຎ຺ຈ, ນິກຏ຺ເຐ ສມເຈຕຍິ;

ມິຄໍ ປຸຓ຺ຓາຍເຕເນວ [ປຸຓ຺ຓາຍຕເນວ (ສ຺ຍາ.)], ສຸລສາ ສຕ຺ຕຸກໍ ວຘິ.

໒໕. ໂຍຘ ອຸປ຺ປຕິຕໍ ອຕ຺ຖໍ, ນ ຂິປ຺ປມນຸພຸຊ຺ຌຕິ;

ໂສ ຫຎ຺ຎຕິ ມນ຺ທມຕິ, ໂຈໂຣວ ຄິຣິຄພ຺ຠເຣ.

໒໖. ໂຍ ຈ ອຸປ຺ປຕິຕໍ ອຕ຺ຖໍ, ຂິປ຺ປເມວ ນິໂພຘຕິ;

ມຸຈ຺ຈເຕ ສຕ຺ຕຸສມ຺ພາຘາ, ສຸລສາ ສຕ຺ຕຸກາມິວາຕິ.

ສຸລສາຊາຕກໍ ຕຕິຍໍ.

໔໒໐. ສຸມງ຺ຄລຊາຕກໍ (໔)

໒໗. ຠຸສມ຺ຫິ [ຠຸສມ຺ປິ (ກ.), ຠຸສໍ ຫິ (ສີ. ນິຍ຺ຍ)] ກຸທ຺ໂຘຕິ ອເວກ຺ຂິຍານ, ນ ຕາວ ທຓ຺ຑໍ ປຓເຍຍ຺ຍ ອິສ຺ສໂຣ;

ອຏ຺ຐານໂສ ອປ຺ປຕິຣູປມຕ຺ຕໂນ, ປຣສ຺ສ ທຸກ຺ຂານິ ຠຸສໍ ອຸທີຣເຍ.

໒໘. ຍໂຕ ຈ ຊາເນຍ຺ຍ ປສາທມຕ຺ຕໂນ, ອຕ຺ຖໍ ນິຍຸຎ຺ເຊຍ຺ຍ ປຣສ຺ສ ທຸກ຺ກຏໍ;

ຕທາຍມຕ຺ໂຖຕິ ສຍໍ ອເວກ຺ຂິຍ, ອຖສ຺ສ ທຓ຺ຑໍ ສທິສໍ ນິເວສເຍ.

໒໙. ນ ຈາປິ ຌາເປຕິ ປຣໍ ນ ອຕ຺ຕນໍ, ອມຸຈ຺ຉິໂຕ ໂຍ ນຍເຕ ນຍານຍໍ;

ໂຍ ທຓ຺ຑຘາໂຣ ຠວຕີຘ ອິສ຺ສໂຣ, ສ ວຓ຺ຓຄຸຕ຺ໂຕ ສິຣິຍາ ນ ຘໍສຕິ.

໓໐. ເຍ ຂຕ຺ຕິຍາ ເສ ອນິສມ຺ມກາຣິໂນ, ປເຓນ຺ຕິ ທຓ຺ຑໍ ສຫສາ ປມຸຈ຺ຉິຕາ;

ອວຓ຺ຓສໍຍຸຕາ [ຍຸຕ຺ຕາວ (ກ.)] ຊຫນ຺ຕິ ຊີວິຕໍ, ອິໂຕ ວິມຸຕ຺ຕາປິ ຈ ຍນ຺ຕິ ທຸຄ຺ຄຕິໍ.

໓໑. ຘມ຺ເມ ຈ ເຍ ອຣິຍປ຺ປເວທິເຕ ຣຕາ, ອນຸຕ຺ຕຣາ ເຕ ວຈສາ ມນສາ ກມ຺ມຸນາ ຈ;

ເຕ ສນ຺ຕິໂສຣຈ຺ຈສມາຘິສຓ຺ຐິຕາ, ວຊນ຺ຕິ ໂລກໍ ທຸຠຍໍ ຕຖາວິຘາ.

໓໒. ຣາຊາຫມສ຺ມິ ນຣປມທານມິສ຺ສໂຣ, ສເຈປິ ກຸຊ຺ຌາມິ ຐເປມິ ອຕ຺ຕນໍ;

ນິເສຘຍນ຺ໂຕ ຊນຕໍ ຕຖາວິຘໍ, ປເຓມິ ທຓ຺ຑໍ ອນຸກມ຺ປ ໂຍນິໂສ.

໓໓. ສິຣີ ຈ ລກ຺ຂີ ຈ ຕເວວ ຂຕ຺ຕິຍ, ຊນາຘິປ ມາ ວິຊຫິ ກຸທາຈນໍ;

ອກ຺ໂກຘໂນ ນິຈ຺ຈປສນ຺ນຈິຕ຺ໂຕ, ອນີໂຆ ຕຸວໍ ວສ຺ສສຕານິ ປາລຍ.

໓໔. ຄຸເຓຫິ ເອເຕຫິ ອຸເປຕ ຂຕ຺ຕິຍ, ຐິຕມຣິຍວຕ຺ຕີ [ວຕ຺ຕິ (ສີ.), ວຸຕ຺ຕິ (ກ.)] ສຸວໂຈ ອໂກຘໂນ;

ສຸຂີ ອນຸປ຺ປີຬ ປສາສເມທິນິໍ [ອນຸປ຺ປີຬໍ ສຫສເມທນິໍ (ກ.)], ອິໂຕ ວິມຸຕ຺ໂຕປິ ຈ ຍາຫິ ສຸຄ຺ຄຕິໍ.

໓໕. ເອວໍ ສຸນີເຕນ [ສຸວິນີເຕນ (ປີ.)] ສຸຠາສິເຕນ, ຘມ຺ເມນ ຎາເຍນ ອຸປາຍໂສ ນຍໍ;

ນິພ຺ພາປເຍ ສງ຺ຂຸຠິຕໍ ມຫາຊນໍ, ມຫາວ ເມໂຆ ສລິເລນ ເມທິນິນ຺ຕິ [ເມທນິນ຺ຕິ (ສ຺ຍາ. ກ.)].

ສຸມງ຺ຄລຊາຕກໍ ຈຕຸຕ຺ຖໍ.

໔໒໑. ຄງ຺ຄມາລຊາຕກໍ (໕)

໓໖. ອງ຺ຄາຣຊາຕາ ປຖວີ, ກຸກ຺ກຸຬານຸຄຕາ ມຫີ;

ອຖ ຄາຍສິ ວຕ຺ຕານິ [ວຕ຺ຖານິ (ກ.)], ນ ຕໍ ຕປຕິ ອາຕໂປ.

໓໗. ອຸທ຺ຘໍ ຕປຕິ ອາທິຈ຺ໂຈ, ອໂຘ ຕປຕິ ວາລຸກາ;

ອຖ ຄາຍສິ ວຕ຺ຕານິ [ວຕ຺ຖານິ (ກ.)], ນ ຕໍ ຕປຕິ ອາຕໂປ.

໓໘. ນ ມໍ ຕປຕິ ອາຕໂປ, ອາຕປາ [ອາຕປ຺ປາ (ສີ. ສ຺ຍາ. ປີ.)] ຕປຍນ຺ຕິ ມໍ;

ອຕ຺ຖາ ຫິ ວິວິຘາ ຣາຊ, ເຕ ຕປນ຺ຕິ ນ ອາຕໂປ.

໓໙. ອທ຺ທສໍ ກາມ ເຕ ມູລໍ, ສງ຺ກປ຺ປາ ກາມ ຊາຍສິ;

ນ ຕໍ ສງ຺ກປ຺ປຍິສ຺ສາມິ, ເອວໍ ກາມ ນ ເຫຫິສິ.

໔໐. ອປ຺ປາປິ ກາມາ ນ ອລໍ, ພຫູຫິປິ ນ ຕປ຺ປຕິ;

ອຫຫາ ພາລລປນາ, ປຣິວຊ຺ເຊຖ [ປຏິວິຊ຺ເຌຖ (ປີ. ສີ. ອຏ຺ຐ.)] ຊຄ຺ຄໂຕ.

໔໑. ອປ຺ປສ຺ສ ກມ຺ມສ຺ສ ຜລໍ ມເມທໍ, ອຸທໂຍ ອຊ຺ຌາຄມາ ມຫຕ຺ຕປຕ຺ຕໍ;

ສຸລທ຺ຘລາໂຠ ວຕ ມາຓວສ຺ສ, ໂຍ ປພ຺ພຊີ ກາມຣາຄໍ ປຫາຍ.

໔໒. ຕປສາ ປຊຫນ຺ຕິ ປາປກມ຺ມໍ, ຕປສາ ນ຺ຫາປິຕກຸມ຺ຠກາຣຠາວໍ;

ຕປສາ ອຠິຠຸຍ຺ຍ ຄງ຺ຄມາລ, ນາເມນາລປສຊ຺ຊ ພ຺ຣຫ຺ມທຕ຺ຕໍ.

໔໓. ສນ຺ທິຏ຺ຐິກເມວ ‘‘ອມ຺ມ’’ ປສ຺ສຖ, ຂນ຺ຕີໂສຣຈ຺ຈສ຺ສ ອຍໍ [ໂຍ (ສ຺ຍາ. ປີ. ກ.)] ວິປາໂກ;

ໂຍ [ໂສ (ສ຺ຍາ. ກ.)] ສພ຺ພຊນສ຺ສ ວນ຺ທິໂຕຫຸ, ຕໍ ວນ຺ທາມ ສຣາຊິກາ ສມຈ຺ຈາ.

໔໔. ມາ ກິຎ຺ຈິ ອວຈຸຕ຺ຖ ຄງ຺ຄມາລໍ, ມຸນິນໍ ໂມນປເຖສຸ ສິກ຺ຂມານໍ;

ເອໂສ ຫິ ອຕຣິ ອຓ຺ຓວໍ, ຍໍ ຕຣິຕ຺ວາ ຈຣນ຺ຕິ ວີຕໂສກາຕິ.

ຄງ຺ຄມາລຊາຕກໍ ປຎ຺ຈມໍ.

໔໒໒. ເຈຕິຍຊາຕກໍ (໖)

໔໕. ຘມ຺ໂມ ຫເວ ຫໂຕ ຫນ຺ຕິ, ນາຫໂຕ ຫນ຺ຕິ ກິຎ຺ຈນໍ [ກຎ຺ຈິນໍ (ປີ.)];

ຕສ຺ມາ ຫິ ຘມ຺ມໍ ນ ຫເນ, ມາ ຕ຺ວໍ [ຕໍ (ສ຺ຍາ. ປີ.)] ຘມ຺ໂມ ຫໂຕ ຫນິ.

໔໖. ອລິກໍ ຠາສມານສ຺ສ, ອປກ຺ກມນ຺ຕິ ເທວຕາ;

ປູຕິກຎ຺ຈ ມຸຂໍ ວາຕິ, ສກຏ຺ຐານາ ຈ ຘໍສຕິ;