໙. ນວກນິປາໂຕ

໔໒໗. ຄິຊ຺ຌຊາຕກໍ (໑)

໑. ປຣິສງ຺ກຸປໂຖ ນາມ, ຄິຊ຺ຌປນ຺ໂຖ ສນນ຺ຕໂນ;

ຕຕ຺ຣາສິ ມາຕາປິຕໂຣ, ຄິຊ຺ໂຌ ໂປເສສິ ຊິຓ຺ຓເກ;

ເຕສໍ ອຊຄຣເມທໍ, ອຈ຺ຈຫາສິ ພຫຸຕ຺ຕໂສ [ປຫຸຕ຺ຕໂຕ (ກ. ສີ.), ປຫູຕໂສ (ສ຺ຍາ. ປີ.), ພຫຸຘໂສ (ກ.)].

໒. ປິຕາ ຈ ປຸຕ຺ຕໍ ອວຈ, ຊານໍ ອຸຈ຺ຈໍ ປປາຕິນໍ;

ສຸປຕ຺ຕໍ ຖາມສມ຺ປນ຺ນໍ [ປກ຺ຂສມ຺ປນ຺ນໍ (ສີ. ສ຺ຍາ. ປີ.)], ເຕຊສ຺ສິໍ ທູຣຄາມິນໍ.

໓. ປຣິປ຺ລວນ຺ຕໍ ປຖວິໍ, ຍທາ ຕາຕ ວິຊານຫິ;

ສາຄເຣນ ປຣິກ຺ຂິຕ຺ຕໍ, ຈກ຺ກໍວ ປຣິມຓ຺ຑລໍ;

ຕໂຕ ຕາຕ ນິວຕ຺ຕສ຺ສຸ, ມາສ຺ສຸ ເອຕ຺ໂຕ ປຣໍ ຄມິ.

໔. ອຸທປຕ຺ໂຕສິ [ອຸທ຺ຘໍ ປຕ຺ໂຕສິ (ກ. ສີ.)] ເວເຄນ, ພລີ ປກ຺ຂີ ທິຊຸຕ຺ຕໂມ;

ໂອໂລກຍນ຺ໂຕ ວກ຺ກງ຺ໂຄ, ປພ຺ພຕານິ ວນານິ ຈ.

໕. ອທ຺ທສ຺ສ ປຖວິໍ ຄິຊ຺ໂຌ, ຍຖາສາສິ [ຍຖາສ຺ສາສິ (ສ຺ຍາ. ອຏ຺ຐ. ປາຐນ຺ຕຣໍ)] ປິຕຸສ຺ສຸຕໍ;

ສາຄເຣນ ປຣິກ຺ຂິຕ຺ຕໍ, ຈກ຺ກໍວ ປຣິມຓ຺ຑລໍ.

໖. ຕຎ຺ຈ ໂສ ສມຕິກ຺ກມ຺ມ, ປຣເມວຈ຺ຈວຕ຺ຕຖ [ປຣເມວ ປວຕ຺ຕຖ (ສີ. ສ຺ຍາ.)];

ຕຎ຺ຈ ວາຕສິຂາ ຕິກ຺ຂາ, ອຈ຺ຈຫາສິ ພລິໍ ທິຊໍ.

໗. ນາສກ຺ຂາຕິຄໂຕ ໂປໂສ, ປຸນເທວ ນິວຕ຺ຕິຕຸໍ;

ທິໂຊ ພ຺ຍສນມາປາທິ, ເວຣມ຺ຠານໍ [ເວຣມ຺ພານໍ (ສີ. ປີ.)] ວສໍ ຄໂຕ.

໘. ຕສ຺ສ ປຸຕ຺ຕາ ຈ ທາຣາ ຈ, ເຍ ຈຎ຺ເຎ ອນຸຊີວິໂນ;

ສພ຺ເພ ພ຺ຍສນມາປາທຸໍ, ອໂນວາທກເຣ ທິເຊ.

໙. ເອວມ຺ປິ ອິຘ ວຸຑ຺ຒານໍ, ໂຍ ວາກ຺ຍໍ ນາວພຸຊ຺ຌຕິ;

ອຕິສີມຈໂຣ ທິຕ຺ໂຕ, ຄິຊ຺ໂຌວາຕີຕສາສໂນ;

ສ ເວ ພ຺ຍສນໍ ປປ຺ໂປຕິ, ອກຕ຺ວາ ວຸຑ຺ຒສາສນນ຺ຕິ.

ຄິຊ຺ຌຊາຕກໍ ປຐມໍ.

໔໒໘. ໂກສມ຺ພິຍຊາຕກໍ (໒)

໑໐. ປຸຖຸສທ຺ໂທ ສມຊໂນ, ນ ພາໂລ ໂກຈິ ມຎ຺ຎຖ;

ສງ຺ຆສ຺ມິໍ ຠິຊ຺ຊມານສ຺ມິໍ, ນາຎ຺ຎໍ ຠິຍ຺ໂຍ ອມຎ຺ຎຣຸໍ.

໑໑. ປຣິມຸຏ຺ຐາ ປຓ຺ຑິຕາຠາສາ, ວາຈາໂຄຈຣຠາຓິໂນ;

ຍາວິຈ຺ຉນ຺ຕິ ມຸຂາຍາມໍ, ເຍນ ນີຕາ ນ ຕໍ ວິທູ.

໑໒. ອກ຺ໂກຈ຺ຉິ ມໍ ອວຘິ ມໍ, ອຊິນິ ມໍ ອຫາສິ ເມ;

ເຍ ຈ ຕໍ ອຸປນຍ຺ຫນ຺ຕິ, ເວຣໍ ເຕສໍ ນ ສມ຺ມຕິ.

໑໓. ອກ຺ໂກຈ຺ຉິ ມໍ ອວຘິ ມໍ, ອຊິນິ ມໍ ອຫາສິ ເມ;

ເຍ ຈ ຕໍ ນຸປນຍ຺ຫນ຺ຕິ, ເວຣໍ ເຕສູປສມ຺ມຕິ.

໑໔. ນ ຫິ ເວເຣນ ເວຣານິ, ສມ຺ມນ຺ຕີຘ ກຸທາຈນໍ;

ອເວເຣນ ຈ ສມ຺ມນ຺ຕິ, ເອສ ຘມ຺ໂມ ສນນ຺ຕໂນ.

໑໕. ປເຣ ຈ ນ ວິຊານນ຺ຕິ, ມຍເມຕ຺ຖ ຍມາມເສ;

ເຍ ຈ ຕຕ຺ຖ ວິຊານນ຺ຕິ, ຕໂຕ ສມ຺ມນ຺ຕິ ເມຘຄາ.

໑໖. ອຏ຺ຐິຈ຺ຉິນ຺ນາ ປາຓຫຣາ, ຄວສ຺ສ [ຄວາສ຺ສ (ສີ. ສ຺ຍາ. ປີ.)] ຘນຫາຣິໂນ;

ຣຏ຺ຐໍ ວິລຸມ຺ປມານານໍ, ເຕສມ຺ປິ ໂຫຕິ ສງ຺ຄຕິ;

ກສ຺ມາ ຕຸມ຺ຫາກ ໂນ ສິຍາ.

໑໗. ສເຈ ລເຠຖ ນິປກໍ ສຫາຍໍ, ສທ຺ຘິໍຈຣໍ ສາຘຸວິຫາຣິຘີຣໍ;

ອຠິຠຸຍ຺ຍ ສພ຺ພານິ ປຣິສ຺ສຍານິ, ຈເຣຍ຺ຍ ເຕນຕ຺ຕມໂນ ສຕີມາ.

໑໘. ໂນ ເຈ ລເຠຖ ນິປກໍ ສຫາຍໍ, ສທ຺ຘິໍຈຣໍ ສາຘຸວິຫາຣິຘີຣໍ;

ຣາຊາວ ຣຏ຺ຐໍ ວິຊິຕໍ ປຫາຍ, ເອໂກ ຈເຣ ມາຕງ຺ຄຣຎ຺ເຎວ ນາໂຄ.

໑໙. ເອກສ຺ສ ຈຣິຕໍ ເສຍ຺ໂຍ, ນຕ຺ຖິ ພາເລ ສຫາຍຕາ;

ເອໂກ ຈເຣ ນ ປາປານິ ກຍິຣາ, ອປ຺ໂປສ຺ສຸກ຺ໂກ ມາຕງ຺ຄຣຎ຺ເຎວ ນາໂຄຕິ.

ໂກສມ຺ພິຍຊາຕກໍ ທຸຕິຍໍ.

໔໒໙. ມຫາສຸວຊາຕກໍ (໓)

໒໐. ທຸໂມ ຍທາ ໂຫຕິ ຜລູປປນ຺ໂນ, ຠຸຎ຺ຊນ຺ຕິ ນໍ ວິຫງ຺ຄມາ [ວິຫຄາ (ສີ. ປີ.)] ສມ຺ປຕນ຺ຕາ;

ຂີຓນ຺ຕິ ຎຕ຺ວານ ທຸມໍ ຜລຈ຺ຈເຍ [ຎຕ຺ວາ ທຸມປ຺ຜລຈ຺ຈເຍນ (ກ.)], ທິໂສທິສໍ ຍນ຺ຕິ ຕໂຕ ວິຫງ຺ຄມາ.

໒໑. ຈຣ ຈາຣິກໍ ໂລຫິຕຕຸຓ຺ຑ ມາມຣິ, ກິໍ ຕ຺ວໍ ສຸວ ສຸກ຺ຂທຸມມ຺ຫິ ຌາຍສິ;

ຕທິງ຺ຆ ມໍ ພ຺ຣູຫິ ວສນ຺ຕສນ຺ນິຠ, ກສ຺ມາ ສຸວ ສຸກ຺ຂທຸມໍ ນ ຣິຎ຺ຈສິ.

໒໒. ເຍ ເວ ສຂີນໍ ສຂາໂຣ ຠວນ຺ຕິ, ປາຓຈ຺ຈເຍ [ປາຓໍ ຈເຊ (ກ.), ປາຓຈ຺ຈເຍ ມຣຓກາເລ ຈ ສຸຂທຸກ຺ເຂສຸ ຈ ນ ຊຫນ຺ຕີຕິ ສມ຺ພນ຺ໂຘ] ທຸກ຺ຂສຸເຂສຸ ຫໍສ;

ຂີຓໍ ອຂີຓນ຺ຕິ ນ ຕໍ ຊຫນ຺ຕິ, ສນ຺ໂຕ ສຕໍ ຘມ຺ມມນຸສ຺ສຣນ຺ຕາ.

໒໓. ໂສຫໍ ສຕໍ ອຎ຺ຎຕໂຣສ຺ມິ ຫໍສ, ຎາຕີ ຈ ເມ ໂຫຕິ ສຂາ ຈ ຣຸກ຺ໂຂ;

ຕໍ ນຸສ຺ສເຫ ຊີວິກຕ຺ໂຖ ປຫາຕຸໍ, ຂີຓນ຺ຕິ ຎຕ຺ວານ ນ ເຫສ ຘມ຺ໂມ [ນ ໂສສ (ກ.), ນ ເອສ (ສ຺ຍາ.)].

໒໔. ສາຘຸ ສກ຺ຂິ ກຕໍ ໂຫຕິ, ເມຕ຺ຕິ ສໍສຕິ ສນ຺ຖໂວ [ມິຕ຺ຕໍ ສງ຺ຄຕິ ສນ຺ຘໂວ (ກ.)];

ສເຈຕໍ ຘມ຺ມໍ ໂຣເຈສິ, ປາສໍໂສສິ ວິຊານຕໍ.

໒໕. ໂສ ເຕ ສຸວ ວຣໍ ທມ຺ມິ, ປຕ຺ຕຍານ ວິຫງ຺ຄມ;

ວຣໍ ວຣສ຺ສຸ ວກ຺ກງ຺ຄ, ຍໍ ກິຎ຺ຈິ ມນສິຈ຺ຉສິ.

໒໖. ວຣຎ຺ຈ ເມ ຫໍສ ຠວໍ ທເທຍ຺ຍ, ອຍຎ຺ຈ ຣຸກ຺ໂຂ ປຸນຣາຍຸໍ ລເຠຖ;

ໂສ ສາຂວາ ຜລິມາ ສໍວິຣູຬ຺ໂຫ, ມຘຸຕ຺ຖິໂກ ຕິຏ຺ຐຕຸ ໂສຠມາໂນ.

໒໗. ຕໍ ປສ຺ສ ສມ຺ມ ຜລິມໍ ອຸຬາຣໍ, ສຫາວ ເຕ ໂຫຕຸ ອຸທຸມ຺ພເຣນ;

ໂສ ສາຂວາ ຜລິມາ ສໍວິຣູຬ຺ໂຫ, ມຘຸຕ຺ຖິໂກ ຕິຏ຺ຐຕຸ ໂສຠມາໂນ.

໒໘. ເອວໍ ສກ຺ກ ສຸຂີ ໂຫຫິ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ສຸຂິໂຕ, ທິສ຺ວານ ສຜລໍ ທຸມໍ.

໒໙. ສຸວສ຺ສ ຈ ວຣໍ ທຕ຺ວາ, ກຕ຺ວານ ສຜລໍ ທຸມໍ;

ປກ຺ກາມິ ສຫ ຠຣິຍາຍ, ເທວານໍ ນນ຺ທນໍ ວນນ຺ຕິ.

ມຫາສຸວຊາຕກໍ ຕຕິຍໍ.

໔໓໐. ຈູຬສຸວຊາຕກໍ (໔)

໓໐. ສນ຺ຕິ ຣຸກ຺ຂາ ຫຣິປຕ຺ຕາ [ຫຣິຕປຕ຺ຕາ (ສີ. ສ຺ຍາ. ປີ.)], ທຸມາ ເນກຜລາ ພຫູ;

ກສ຺ມາ ນຸ ສຸກ຺ເຂ [ສຸກ຺ຂ (ກ.)] ໂກຬາເປ, ສຸວສ຺ສ ນິຣໂຕ ມໂນ.

໓໑. ຜລສ຺ສ ອຸປຠຸຎ຺ຊິມ຺ຫາ, ເນກວສ຺ສຄເຓ ພຫູ;

ອຜລມ຺ປິ ວິທິຕ຺ວານ, ສາວ ເມຕ຺ຕິ ຍຖາ ປຸເຣ.

໓໒. ສຸຂຎ຺ຈ ຣຸກ຺ຂໍ ໂກຬາປໍ, ໂອປຕ຺ຕມຜລໍ ທຸມໍ;

ໂອຫາຍ ສກຸຓາ ຍນ຺ຕິ, ກິໍ ໂທສໍ ປສ຺ສເສ ທິຊ.

໓໓. ເຍ ຜລຕ຺ຖາ ສມ຺ຠຊນ຺ຕິ, ອຜໂລຕິ ຊຫນ຺ຕິ ນໍ;

ອຕ຺ຕຕ຺ຖປຎ຺ຎາ ທຸມ຺ເມຘາ, ເຕ ໂຫນ຺ຕິ ປກ຺ຂປາຕິໂນ.

໓໔. ສາຘຸ ສກ຺ຂິ ກຕໍ ໂຫຕິ, ເມຕ຺ຕິ ສໍສຕິ ສນ຺ຖໂວ;

ສເຈຕໍ ຘມ຺ມໍ ໂຣເຈສິ, ປາສໍໂສສິ ວິຊານຕໍ.

໓໕. ໂສ ເຕ ສຸວ ວຣໍ ທມ຺ມິ, ປຕ຺ຕຍານ ວິຫງ຺ຄມ;

ວຣໍ ວຣສ຺ສຸ ວກ຺ກງ຺ຄ, ຍໍ ກິຎ຺ຈິ ມນສິຈ຺ຉສິ.

໓໖. ອປິ ນາມ ນໍ ປສ຺ເສຍ຺ຍໍ [ອປິ ນາມ ນໍ ປຸນ ປສ຺ເສ (ສີ. ສ຺ຍາ.)], ສປຕ຺ຕໍ ສຜລໍ ທຸມໍ;

ທລິທ຺ໂທວ ນິຘິ ລທ຺ຘາ, ນນ຺ເທຍ຺ຍາຫໍ ປຸນປ຺ປຸນໍ.

໓໗. ຕໂຕ ອມຕມາທາຍ, ອຠິສິຎ຺ຈິ ມຫີຣຸຫໍ;

ຕສ຺ສ ສາຂາ ວິຣູຫິໍສຸ [ວິຣູຬ຺ຫສ຺ສ (ກ.)], ສີຕຈ຺ຉາຍາ ມໂນຣມາ.

໓໘. ເອວໍ ສກ຺ກ ສຸຂີ ໂຫຫິ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ສຸຂິໂຕ, ທິສ຺ວານ ສຜລໍ ທຸມໍ.

໓໙. ສຸວສ຺ສ ຈ ວຣໍ ທຕ຺ວາ, ກຕ຺ວານ ສຜລໍ ທຸມໍ;

ປກ຺ກາມິ ສຫ ຠຣິຍາຍ, ເທວານໍ ນນ຺ທນໍ ວນນ຺ຕິ.

ຈູຬສຸວຊາຕກໍ ຈຕຸຕ຺ຖໍ.

໔໓໑. ຫຣິຕຈຊາຕກໍ (໕)

໔໐. ສຸຕໍ ເມຕໍ ມຫາພ຺ຣຫ຺ເມ, ກາເມ ຠຸຎ຺ຊຕິ ຫາຣິໂຕ;

ກຈ຺ເຈຕໍ ວຈນໍ ຕຸຈ຺ຉໍ, ກຈ຺ຈິ ສຸທ຺ໂຘ ອິຣິຍ຺ຍສິ.

໔໑. ເອວເມຕໍ ມຫາຣາຊ, ຍຖາ ເຕ ວຈນໍ ສຸຕໍ;

ກຸມ຺ມຄ຺ຄໍ ປຏິປນ຺ໂນສ຺ມິ, ໂມຫເນຍ຺ເຍສຸ ມຸຈ຺ຉິໂຕ.

໔໒. ອທຸ [ອາທຸ (ສີ. ປີ.)] ປຎ຺ຎາ ກິມຕ຺ຖິຍາ, ນິປຸຓາ ສາຘຸຈິນ຺ຕິນີ [ຈິນ຺ຕນີ (ສີ. ປີ.)];

ຍາຍ ອຸປ຺ປຕິຕໍ ຣາຄໍ, ກິໍ ມໂນ ນ ວິໂນທເຍ.

໔໓. ຈຕ຺ຕາໂຣເມ ມຫາຣາຊ, ໂລເກ ອຕິພລາ ຠຸສາ;

ຣາໂຄ ໂທໂສ ມໂທ ໂມໂຫ, ຍຕ຺ຖ ປຎ຺ຎາ ນ ຄາຘຕິ.

໔໔. ອຣຫາ ສີລສມ຺ປນ຺ໂນ, ສຸທ຺ໂຘ ຈຣຕິ ຫາຣິໂຕ;

ເມຘາວີ ປຓ຺ຑິໂຕ ເຈວ, ອິຕິ ໂນ ສມ຺ມໂຕ ຠວໍ.

໔໕. ເມຘາວີນມ຺ປິ ຫິໍສນ຺ຕິ, ອິສິໍ ຘມ຺ມຄຸເຓ ຣຕໍ;

ວິຕກ຺ກາ ປາປກາ ຣາຊ, ສຸຠາ ຣາຄູປສໍຫິຕາ.

໔໖. ອຸປ຺ປນ຺ນາຍໍ ສຣີຣໂຊ, ຣາໂຄ ວຓ຺ຓວິທູສໂນ ຕວ;

ຕໍ ປຊຫ ຠທ຺ທມຕ຺ຖຸ ເຕ, ພຫຸນ຺ນາສິ ເມຘາວິສມ຺ມໂຕ.

໔໗. ເຕ ອນ຺ຘກາຣເກ [ກຣເຓ (ສີ. ສ຺ຍາ. ປີ.)] ກາເມ, ພຫຸທຸກ຺ເຂ ມຫາວິເສ;

ເຕສໍ ມູລໍ ຄເວສິສ຺ສໍ, ເຉຈ຺ຉໍ ຣາຄໍ ສພນ຺ຘນໍ.

໔໘. ອິທໍ ວຕ຺ວານ ຫາຣິໂຕ, ອິສິ ສຈ຺ຈປຣກ຺ກໂມ;

ກາມຣາຄໍ ວິຣາເຊຕ຺ວາ, ພ຺ຣຫ຺ມໂລກູປໂຄ ອຫູຕິ.

ຫຣິຕຈຊາຕກໍ [ຫາຣິຕຊາຕກໍ (ສີ. ປີ.)] ປຎ຺ຈມໍ.

໔໓໒. ປທກຸສລມາຓວຊາຕກໍ (໖)

໔໙. ພຫຸສ຺ສຸຕໍ ຈິຕ຺ຕກຖິໍ [ຈິຕ຺ຕກຖໍ (ສ຺ຍາ. ກ.)], ຄງ຺ຄາ ວຫຕິ ປາຏລິໍ [ປາຏລໍ (ສີ. ປີ.)];

ວຸຍ຺ຫມານກ ຠທ຺ທນ຺ເຕ, ເອກໍ ເມ ເທຫິ ຄາຖກໍ [ຄີຕກໍ (ກ. ອຏ຺ຐ.)].

໕໐. ເຍນ ສິຎ຺ຈນ຺ຕິ ທຸກ຺ຂິຕໍ, ເຍນ ສິຎ຺ຈນ຺ຕິ ອາຕຸຣໍ;

ຕສ຺ສ ມຊ຺ເຌ ມຣິສ຺ສາມິ, ຊາຕໍ ສຣຓໂຕ ຠຍໍ.

໕໑. ຍຕ຺ຖ ພີຊານິ ຣູຫນ຺ຕິ, ສຕ຺ຕາ ຍຕ຺ຖ ປຕິຏ຺ຐິຕາ;

ສາ ເມ ສີສໍ ນິປີເຬຕິ, ຊາຕໍ ສຣຓໂຕ ຠຍໍ.

໕໒. ເຍນ ຠຕ຺ຕານິ ປຈ຺ຈນ຺ຕິ, ສີຕໍ ເຍນ ວິຫຎ຺ຎຕິ;

ໂສ ມໍ ຑຫຕິ [ທຍ຺ຫຕິ (ກ.)] ຄຕ຺ຕານິ, ຊາຕໍ ສຣຓໂຕ ຠຍໍ.

໕໓. ເຍນ ຠຸຕ຺ເຕນ [ຠຕ຺ເຕນ (ສ຺ຍາ. ກ.)] ຍາເປນ຺ຕິ, ປຸຖູ ພ຺ຣາຫ຺ມຓຂຕ຺ຕິຍາ;

ໂສ ມໍ ຠຸຕ຺ໂຕ ພ຺ຍາປາເທຕິ, ຊາຕໍ ສຣຓໂຕ ຠຍໍ.

໕໔. ຄິມ຺ຫານໍ ປຈ຺ຉິເມ ມາເສ, ວາຕມິຈ຺ຉນ຺ຕິ ປຓ຺ຑິຕາ;

ໂສ ມໍ [ໂສ ເມ (ສີ. ປີ.)] ຠຎ຺ຊຕິ ຄຕ຺ຕານິ, ຊາຕໍ ສຣຓໂຕ ຠຍໍ.

໕໕. ຍໍ ນິສ຺ສິຕາ ຊຄຕິຣຸຫໍ, ສ຺ວາຍໍ ອຄ຺ຄິໍ ປມຸຎ຺ຈຕິ;

ທິສາ ຠຊຖ ວກ຺ກງ຺ຄາ, ຊາຕໍ ສຣຓໂຕ ຠຍໍ.

໕໖. ຍມານຍິໍ ໂສມນສ຺ສໍ, ມາລິນິໍ ຈນ຺ທນຸສ຺ສທໍ;

ສາ ມໍ ຆຣາ ນິຈ຺ຉຸຠຕິ [ນີຫຣຕິ (ສີ. ສ຺ຍາ.)], ຊາຕໍ ສຣຓໂຕ ຠຍໍ.

໕໗. ເຍນ ຊາເຕນ ນນ຺ທິສ຺ສໍ, ຍສ຺ສ ຈ ຠວມິຈ຺ຉິສໍ;

ໂສ ມໍ ຆຣາ ນິຈ຺ຉຸຠຕິ [ນີຫຣຕິ (ສີ. ສ຺ຍາ.)], ຊາຕໍ ສຣຓໂຕ ຠຍໍ.

໕໘. ສຸຓນ຺ຕຸ ເມ ຊານປທາ, ເນຄມາ ຈ ສມາຄຕາ;

ຍໂຕທກໍ ຕທາທິຕ຺ຕໍ, ຍໂຕ ເຂມໍ ຕໂຕ ຠຍໍ.

໕໙. ຣາຊາ ວິລຸມ຺ປເຕ ຣຏ຺ຐໍ, ພ຺ຣາຫ຺ມໂຓ ຈ ປຸໂຣຫິໂຕ;

ອຕ຺ຕຄຸຕ຺ຕາ ວິຫຣຖ, ຊາຕໍ ສຣຓໂຕ ຠຍນ຺ຕິ.

ປທກຸສລມາຓວຊາຕກໍ ຉຏ຺ຐໍ.

໔໓໓. ໂລມສກສ຺ສປຊາຕກໍ (໗)

໖໐. ອສ຺ສ ອິນ຺ທສໂມ ຣາຊ, ອຈ຺ຈນ຺ຕໍ ອຊຣາມໂຣ;

ສເຈ ຕ຺ວໍ ຍຎ຺ຎໍ ຍາເຊຍ຺ຍ, ອິສິໍ ໂລມສກສ຺ສປໍ.

໖໑. ສສມຸທ຺ທປຣິຍາຍໍ, ມຫິໍ ສາຄຣກຸຓ຺ຑລໍ;

ນ ອິຈ຺ເຉ ສຫ ນິນ຺ທາຍ, ເອວໍ ເສຍ຺ຍ [ສຍ຺ຫ (ສີ. ສ຺ຍາ. ປີ.)] ວິຊານຫິ.

໖໒. ຘິຣຕ຺ຖຸ ຕໍ ຍສລາຠໍ, ຘນລາຠຎ຺ຈ ພ຺ຣາຫ຺ມຓ;

ຍາ ວຸຕ຺ຕິ ວິນິປາເຕນ, ອຘມ຺ມຈຣເຓນ ວາ.

໖໓. ອປິ ເຈ ປຕ຺ຕມາທາຍ, ອນຄາໂຣ ປຣິພ຺ພເຊ;

ສາເຍວ ຊີວິກາ ເສຍ຺ໂຍ, ຍາ ຈາຘມ຺ເມນ ເອສນາ.

໖໔. ອປິ ເຈ ປຕ຺ຕມາທາຍ, ອນຄາໂຣ ປຣິພ຺ພເຊ;

ອຎ຺ຎໍ ອຫິໍສຍໍ ໂລເກ, ອປິ ຣຊ຺ເຊນ ຕໍ ວຣໍ.

໖໕. ພລໍ ຈນ຺ໂທ ພລໍ ສຸຣິໂຍ, ພລໍ ສມຓພ຺ຣາຫ຺ມຓາ;

ພລໍ ເວລາ ສມຸທ຺ທສ຺ສ, ພລາຕິພລມິຕ຺ຖິໂຍ.

໖໖. ຍຖາ ອຸຄ຺ຄຕປໍ ສນ຺ຕໍ, ອິສິໍ ໂລມສກສ຺ສປໍ;

ປິຕຸ ອຕ຺ຖາ ຈນ຺ທວຕີ, ວາຊເປຍ຺ຍໍ [ວາຈເປຍ຺ຍໍ (ປີ. ກ.)] ອຍາຊຍິ.