໕໔໖. ວິຘຸຣຊາຕກໍ (໙)

ໂທຫຬກຓ຺ຑໍ

໑໓໔໖. ‘‘ປຓ຺ຑຸ ກິສິຍາສິ ທຸພ຺ພລາ, ວຓ຺ຓຣູປໍ [ວຓ຺ຓຣູເປ (ກ.)] ນຕເວທິສໍ ປຸເຣ;

ວິມເລ ອກ຺ຂາຫິ ປຸຈ຺ຉິຕາ, ກີທິສີ ຕຸຍ຺ຫໍ ສຣີຣເວທນາ’’.

໑໓໔໗. ‘‘ຘມ຺ໂມ ມນຸເຊສຸ ມາຕີນໍ [ມາຕິນໍ (ສີ. ປີ.)], ໂທຫໂຬ ນາມ ຊນິນ຺ທ ວຸຈ຺ຈຕິ;

ຘມ຺ມາຫຕໍ ນາຄກຸຎ຺ຊຣ, ວິຘຸຣສ຺ສ ຫທຍາຠິປຕ຺ຖເຍ’’.

໑໓໔໘. ‘‘ຈນ຺ທໍ ໂຂ ຕ຺ວໍ ໂທຫຬາຍສິ, ສູຣິຍໍ ວາ ອຖ ວາປິ ມາລຸຕໍ;

ທຸລ຺ລຠຎ຺ຫິ [ທຸລ຺ລເຠ (ສີ. ປີ.)] ວິຘຸຣສ຺ສ ທສ຺ສນໍ [ທສ຺ສເນ (ສີ. ປີ.)], ໂກ ວິຘຸຣມິຘ ມານຍິສ຺ສຕິ’’.

໑໓໔໙. ‘‘ກິນ຺ນຸ ຕາຕ ຕຸວໍ ປຊ຺ຌາຍສິ, ປທຸມໍ ຫຕ຺ຖຄຕໍວ ເຕ ມຸຂໍ;

ກິນ຺ນຸ ທຸມ຺ມນຣູໂປສິ ອິສ຺ສຣ, ມາ ຕ຺ວໍ ໂສຈິ ອມິຕ຺ຕຕາປນ’’.

໑໓໕໐. ‘‘ມາຕາ ຫິ ຕວ ອິຣນ຺ຘຕິ [ອິຣນ຺ທຕິ (ສີ. ສ຺ຍາ. ປີ.)], ວິຘຸຣສ຺ສ ຫທຍໍ ຘນິຍຕິ;

ທຸລ຺ລຠຎ຺ຫິ ວິຘຸຣສ຺ສ ທສ຺ສນໍ, ໂກ ວິຘຸຣມິຘ ມານຍິສ຺ສຕິ’’.

໑໓໕໑. ‘‘ຕສ຺ສ ຠຕ຺ຕຸປຣິເຍສນໍ [ຠຕ຺ຕຸປຣິເຍສນໍ (ສີ. ປີ.)] ຈຣ, ໂຍ ວິຘຸຣມິຘ ມານຍິສ຺ສຕິ’’;

‘‘ປິຕຸໂນ ຈ ສາ ສຸຕ຺ວານ ວາກ຺ຍໍ, ຣຕ຺ຕິໍ ນິກ຺ຂມ຺ມ ອວສ຺ສຸຕິໍ ຈຣິ’’.

໑໓໕໒. ‘‘ເກ ຄນ຺ຘພ຺ເພ ຣກ຺ຂເສ ຈ ນາເຄ, ເກ ກິມ຺ປຸຣິເສ ຈາປິ ມານຸເສ;

ເກ ປຓ຺ຑິເຕ ສພ຺ພກາມທເທ [ສພ຺ພກາມເທ (ສີ. ປີ.)], ທີຆຣຕ຺ຕໍ ຠຕ຺ຕາ ເມ ຠວິສ຺ສຕິ’’.

໑໓໕໓. ‘‘ອສ຺ສາສ ເຫສ຺ສາມິ ເຕ ປຕິ, ຠຕ຺ຕາ ເຕ ເຫສ຺ສາມິ ອນິນ຺ທໂລຈເນ;

ປຎ຺ຎາ ຫິ ມມໍ ຕຖາວິຘາ, ອສ຺ສາສ ເຫສ຺ສສິ ຠຣິຍາ ມມ.

໑໓໕໔. ‘‘ອວຈາສິ ປຸຓ຺ຓກໍ ອິຣນ຺ຘຕີ [ອິຣນ຺ທຕີ (ສີ. ປີ.)], ປຸພ຺ພປຖານຸຄເຕນ ເຈຕສາ;

ເອຫິ ຄຈ຺ຉາມ ປິຕຸ ມມນ຺ຕິເກ [ປິຕຸ ມມ ສນ຺ຕິກໍ (ກ.)], ເອໂສວ ເຕ ເອຕມຕ຺ຖໍ ປວກ຺ຂຕິ.

໑໓໕໕. ‘‘ອລງ຺ກຕາ ສຸວສນາ, ມາລິນີ ຈນ຺ທນຸສ຺ສທາ;

ຍກ຺ຂໍ ຫຕ຺ເຖ ຄເຫຕ຺ວານ, ປິຕຸສນ຺ຕິກຸປາຄມິ’’.

໑໓໕໖. ‘‘ນາຄວຣ ວໂຈ ສຸໂຓຫິ ເມ, ປຕິຣູປໍ ປຏິປຊ຺ຊ ສຸງ຺ກິຍໍ;

ປຕ຺ເຖມິ ອຫໍ ອິຣນ຺ຘຕິໍ, ຕາຍ ສມງ຺ຄິໍ ກໂຣຫິ ມໍ ຕຸວໍ.

໑໓໕໗. ‘‘ສຕໍ ຫຕ຺ຖີ ສຕໍ ອສ຺ສາ, ສຕໍ ອສ຺ສຕຣີຣຖາ;

ສຕໍ ວລຠິໂຍ ປຸຓ຺ຓາ, ນານາຣຕ຺ນສ຺ສ ເກວລາ;

ເຕ ນາຄ ປຏິປຊ຺ຊສ຺ສຸ, ຘີຕຣໍ ເທຫິຣນ຺ຘຕິໍ’’.

໑໓໕໘. ‘‘ຍາວ ອາມນ຺ຕເຍ ຎາຕີ, ມິຕ຺ເຕ ຈ ສຸຫທຊ຺ຊເນ [ສຸຫທໍຊນໍ (ສີ. ປີ.)];

ອນາມນ຺ຕ ກຕໍ ກມ຺ມໍ, ຕໍ ປຈ຺ຉາ ອນຸຕປ຺ປຕິ’’.

໑໓໕໙. ຕໂຕ ໂສ ວຣຸໂຓ ນາໂຄ, ປວິສິຕ຺ວາ ນິເວສນໍ;

ຠຣິຍໍ ອາມນ຺ຕຍິຕ຺ວານ, ອິທໍ ວຈນມພ຺ຣວິ.

໑໓໖໐. ‘‘ອຍໍ ໂສ ປຸຓ຺ຓໂກ ຍກ຺ໂຂ, ຍາຈຕີ ມໍ ອິຣນ຺ຘຕິໍ;

ພຫຸນາ ວິຕ຺ຕລາເຠນ, ຕສ຺ສ ເທມ ປິຍໍ ມມໍ’’.

໑໓໖໑. ‘‘ນ ຘເນນ ນ ວິຕ຺ເຕນ, ລພ຺ຠາ ອມ຺ຫໍ ອິຣນ຺ຘຕີ;

ສເຈ ຈ ໂຂ ຫທຍໍ ປຓ຺ຑິຕສ຺ສ, ຘມ຺ເມນ ລທ຺ຘາ ອິຘ ມາຫເຣຍ຺ຍ;

ເອເຕນ ວິຕ຺ເຕນ ກຸມາຣິ ລພ຺ຠາ, ນາຎ຺ຎໍ ຘນໍ ອຸຕ຺ຕຣິ ປຕ຺ຖຍາມ’’.

໑໓໖໒. ຕໂຕ ໂສ ວຣຸໂຓ ນາໂຄ, ນິກ຺ຂມິຕ຺ວາ ນິເວສນາ;

ປຸຓ຺ຓກາມນ຺ຕຍິຕ຺ວານ, ອິທໍ ວຈນມພ຺ຣວິ.

໑໓໖໓. ‘‘ນ ຘເນນ ນ ວິຕ຺ເຕນ, ລພ຺ຠາ ອມ຺ຫໍ ອິຣນ຺ຘຕີ;

ສເຈ ຕຸວໍ ຫທຍໍ ປຓ຺ຑິຕສ຺ສ, ຘມ຺ເມນ ລທ຺ຘາ ອິຘ ມາຫເຣສິ;

ເອເຕນ ວິຕ຺ເຕນ ກຸມາຣິ ລພ຺ຠາ, ນາຎ຺ຎໍ ຘນໍ ອຸຕ຺ຕຣິ ປຕ຺ຖຍາມ’’.

໑໓໖໔. ‘‘ຍໍ ປຓ຺ຑິໂຕຕ຺ເຍເກ ວທນ຺ຕິ ໂລເກ, ຕເມວ ພາໂລຕິ ປຸນາຫຸ ອຎ຺ເຎ;

ອກ຺ຂາຫິ ເມ ວິປ຺ປວທນ຺ຕິ ເອຕ຺ຖ, ກໍ ປຓ຺ຑິຕໍ ນາຄ ຕຸວໍ ວເທສິ’’.

໑໓໖໕. ‘‘ໂກຣພ຺ຍຣາຊສ຺ສ ຘນຎ຺ຈຍສ຺ສ [ຘນຎ຺ຊຍສ຺ສ (ສີ. ສ຺ຍາ. ປີ.)], ຍທິ ເຕ ສຸໂຕ ວິຘຸໂຣ ນາມ ກຕ຺ຕາ;

ອາເນຫິ ຕໍ ປຓ຺ຑິຕໍ ຘມ຺ມລທ຺ຘາ, ອິຣນ຺ຘຕີ ປທຈຣາ [ປທ຺ຘຈຣາ (ສີ. ປີ.), ປຏ຺ຐຈຣາ (ສ຺ຍາ. ກ.)] ເຕ ໂຫຕຸ.

໑໓໖໖. ‘‘ອິທຎ຺ຈ ສຸຕ຺ວາ ວຣຸຓສ຺ສ ວາກ຺ຍໍ, ອຸຏ຺ຐາຍ ຍກ຺ໂຂ ປຣມປ຺ປຕີໂຕ;

ຕຕ຺ເຖວ ສນ຺ໂຕ ປຸຣິສໍ ອສໍສິ, ອາເນຫິ ອາຊຎ຺ຎມິເຘວ ຍຸຕ຺ຕໍ.

໑໓໖໗. ‘‘ຊາຕຣູປມຍາ ກຓ຺ຓາ, ກາຈມ຺ຫິຈມຍາ [ກາຈມ຺ຫມຍາ (ສີ.), ກາຈມ຺ຠມຍາ (ປີ.)] ຂຸຣາ;

ຊມ຺ໂພນທສ຺ສ ປາກສ຺ສ, ສຸວຓ຺ຓສ຺ສ ອຸຣຈ຺ຉໂທ’’.

໑໓໖໘. ‘‘ເທວວາຫວຫໍ ຍານໍ, ອສ຺ສມາຣຸຍ຺ຫ ປຸຓ຺ຓໂກ;

ອລງ຺ກໂຕ ກປ຺ປິຕເກສມສ຺ສຸ, ປກ຺ກາມິ ເວຫາຍສມນ຺ຕລິກ຺ເຂ [ອນ຺ຕລິກ຺ຂໍ (ກ.)].

໑໓໖໙. ‘‘ໂສ ປຸຓ຺ຓໂກ ກາມຣາເຄນ [ກາມເວເຄນ (ສີ. ປີ.)] ຄິທ຺ໂຘ, ອິຣນ຺ຘຕິໍ ນາຄກຎ຺ຎໍ ຊິຄີສໍ [ຊິຄິໍສໍ (ສີ. ສ຺ຍາ. ປີ.)];

ຄນ຺ຕ຺ວານ ຕໍ ຠູຕປຕິໍ ຍສສ຺ສິໍ, ອິຈ຺ຈພ຺ຣວີ ເວສ຺ສວຓໍ ກຸເວຣໍ.

໑໓໗໐. ‘‘ໂຠຄວຕີ ນາມ ມນ຺ທິເຣ, ວາສາ ຫິຣຎ຺ຎວຕີຕິ ວຸຈ຺ຈຕິ;

ນຄເຣ ນິມ຺ມິເຕ ກຎ຺ຈນມເຍ, ມຓ຺ຑລສ຺ສ ອຸຣຄສ຺ສ ນິຏ຺ຐິຕໍ.

໑໓໗໑. ‘‘ອຏ຺ຏາລກາ ໂອຏ຺ຐຄີວິໂຍ, ໂລຫິຕງ຺ກສ຺ສ ມສາຣຄລ຺ລິໂນ;

ປາສາເທຕ຺ຖ ສິລາມຍາ, ໂສວຓ຺ຓຣຕເນຫິ ຉາທິຕາ.

໑໓໗໒. ‘‘ອມ຺ພາ ຕິລກາ ຈ ຊມ຺ພຸໂຍ, ສຕ຺ຕປຓ຺ຓາ ມຸຈລິນ຺ທເກຕກາ;

ປິຍງ຺ຄຸ [ປິຍກາ (ສີ. ປີ.), ປິຍງ຺ຄຸກາ (ສ຺ຍາ.)] ອຸທ຺ທາລກາ ສຫາ, ອຸປຣິຠທ຺ທກາ ສິນ຺ທຸວາຣກາ [ຠິນ຺ທຸວາຣິຕາ (ສ຺ຍາ. ປີ.), ຠິນ຺ຘວາຣິຕາ (ກ.)].

໑໓໗໓. ‘‘ຈມ຺ເປຍ຺ຍກາ ນາຄມລ຺ລິກາ, ຠຄິນີມາລາ ອຖ ເມຕ຺ຖ ໂກລິຍາ;

ເອເຕ ທຸມາ ປຣິຓາມິຕາ, ໂສຠຍນ຺ຕິ ອຸຣຄສ຺ສ ມນ຺ທິຣໍ [ມນ຺ທິເຣ (ສ຺ຍາ. ກ.)].

໑໓໗໔. ‘‘ຂຊ຺ຊຸເຣຕ຺ຖ ສິລາມຍາ, ໂສວຓ຺ຓຘຸວປຸປ຺ຜິຕາ ພຫູ;

ຍຕ຺ຖ ວສໂຕ ປປາຕິໂກ, ນາຄຣາຊາ ວຣຸໂຓ ມຫິທ຺ຘິໂກ.

໑໓໗໕. ‘‘ຕສ຺ສ ໂກມາຣິກາ ຠຣິຍາ, ວິມລາ ກຎ຺ຈນເວລ຺ລິວິຄ຺ຄຫາ;

ກາລາ ຕຣຸຓາວ ອຸຄ຺ຄຕາ, ປຸຈິມນ຺ທຕ຺ຖນີ ຈາຣຸທສ຺ສນາ.

໑໓໗໖. ‘‘ລາຂາຣສຣຕ຺ຕສຸຈ຺ຉວີ, ກຓິກາຣາວ ນິວາຕປຸປ຺ຜິຕາ [ກຓິກາໂຣວ ນິວາຕປຸປ຺ຜິໂຕ (ສີ. ປີ.)];

ຕິທິໂວກຈຣາວ ອຈ຺ຉຣາ, ວິຊ຺ຊຸວພ຺ຠຆນາ ວິນິສ຺ສຏາ.

໑໓໗໗. ‘‘ສາ ໂທຫຬິນີ ສຸວິມ຺ຫິຕາ, ວິຘຸຣສ຺ສ ຫທຍໍ ຘນິຍຕິ;

ຕໍ ເຕສໍ ເທມິ ອິສ຺ສຣ, ເຕນ ເຕ ເທນ຺ຕິ ອິຣນ຺ຘຕິໍ ມມໍ’’.

໑໓໗໘. ‘‘ໂສ ປຸຓ຺ຓໂກ ຠູຕປຕິໍ ຍສສ຺ສິໍ, ອາມນ຺ຕຍ ເວສ຺ສວຓໍ ກຸເວຣໍ;

ຕຕ຺ເຖວ ສນ຺ໂຕ [ສນ຺ຕໍ (ປີ.)] ປຸຣິສໍ ອສໍສິ, ອາເນຫິ ອາຊຎ຺ຎມິເຘວ ຍຸຕ຺ຕໍ.

໑໓໗໙. ‘‘ຊາຕຣູປມຍາ ກຓ຺ຓາ, ກາຈມ຺ຫິຈມຍາ ຂຸຣາ;

ຊມ຺ໂພນທສ຺ສ ປາກສ຺ສ, ສຸວຓ຺ຓສ຺ສ ອຸຣຈ຺ຉໂທ.

໑໓໘໐. ‘‘ເທວວາຫວຫໍ ຍານໍ, ອສ຺ສມາຣຸຍ຺ຫ ປຸຓ຺ຓໂກ;

ອລງ຺ກໂຕ ກປ຺ປິຕເກສມສ຺ສຸ, ປກ຺ກາມິ ເວຫາຍສມນ຺ຕລິກ຺ເຂ’’.

໑໓໘໑. ‘‘ໂສ ອຄ຺ຄມາ ຣາຊຄຫໍ ສຸຣມ຺ມໍ, ອງ຺ຄສ຺ສ ຣຎ຺ໂຎ ນຄຣໍ ທຸຣາຍຸຕໍ [ທຸຣາສທໍ (ສ຺ຍາ.)];

ປຫູຕຠກ຺ຂໍ ພຫຸອນ຺ນປານໍ, ມສກ຺ກສາຣໍ ວິຍ ວາສວສ຺ສ.

໑໓໘໒. ‘‘ມຍູຣໂກຎ຺ຈາຄຓສມ຺ປຆຸຏ຺ຐໍ, ທິຊາຠິຆຸຏ຺ຐໍ ທິຊສງ຺ຆເສວິຕໍ;

ນານາສກຸນ຺ຕາຠິຣຸທໍ ສຸວງ຺ຄຓໍ [ສຸຠງ຺ຄຓໍ (ສີ. ປີ.)], ປຸປ຺ຜາຠິກິຓ຺ຓໍ ຫິມວໍວ ປພ຺ພຕໍ.

໑໓໘໓. ‘‘ໂສ ປຸຓ຺ຓໂກ ເວປຸລມາຠິຣູຫິ [ເວປຸລ຺ລມາຠິຣຸຈ຺ຉິ (ສີ. ປີ.)], ສິລຸຈ຺ຈຍໍ ກິມ຺ປຸຣິສານຸຈິຓ຺ຓໍ;

ອນ຺ເວສມາໂນ ມຓິຣຕນໍ ອຸຬາຣໍ, ຕມທ຺ທສາ ປພ຺ພຕກູຏມຊ຺ເຌ.

໑໓໘໔. ‘‘ທິສ຺ວາ ມຓິໍ ປຠສ຺ສຣໍ ຊາຕິມນ຺ຕໍ [ຊາຕິວນ຺ຕໍ (ສີ. ສ຺ຍາ.)], ມໂນຫຣໍ [ຘນາຫຣໍ (ສີ. ປີ. ກ.)] ມຓິຣຕນໍ ອຸຬາຣໍ;

ທທ຺ທລ຺ລມານໍ ຍສສາ ຍສສ຺ສິນໍ, ໂອຠາສຕີ ວິຊ຺ຊຸຣິວນ຺ຕລິກ຺ເຂ.

໑໓໘໕. ‘‘ຕມຄ຺ຄຫີ ເວຬຸຣິຍໍ ມຫຄ຺ຆໍ, ມໂນຫຣໍ ນາມ ມຫານຸຠາວໍ;

ອາຊຎ຺ຎມາຣຸຍ຺ຫ ມໂນມວຓ຺ໂຓ, ປກ຺ກາມິ ເວຫາຍສມນ຺ຕລິກ຺ເຂ.

໑໓໘໖. ‘‘ໂສ ອຄ຺ຄມາ [ອຄມາ (ສ຺ຍາ. ປີ. ກ.)] ນຄຣມິນ຺ທປຕ຺ຖໍ, ໂອຣຸຍ຺ຫຸປາຄຈ຺ຉິ ສຠໍ ກຸຣູນໍ;

ສມາຄເຕ ເອກສຕໍ ສມຄ຺ເຄ, ອວ຺ເຫຕ຺ຖ ຍກ຺ໂຂ ອວິກມ຺ປມາໂນ.

໑໓໘໗. ‘‘ໂກ ນີຘ ຣຎ຺ຎໍ ວຣມາຠິເຊຕິ, ກມາຠິເຊຍ຺ຍາມ ວຣທ຺ຘເນນ [ວຣໍຘເນນ (ສີ. ປີ.)];

ກມນຸຕ຺ຕຣໍ ຣຕນວຣໍ ຊິນາມ, ໂກ ວາປິ ໂນ ເຊຕິ ວຣທ຺ຘເນນ’’.

໑໓໘໘. ‘‘ກຸຫິໍ ນຸ ຣຏ຺ເຐ ຕວ ຊາຕິຠູມິ, ນ ໂກຣພ຺ຍສ຺ເສວ ວໂຈ ຕເວທໍ;

ອຠີໂຕສິ [ອຠິໂຠສິ (ສີ. ປີ.)] ໂນ ວຓ຺ຓນິຠາຍ ສພ຺ເພ, ອກ຺ຂາຫິ ເມ ນາມຎ຺ຈ ພນ຺ຘເວ ຈ’’.

໑໓໘໙. ‘‘ກຈ຺ຈາຍໂນ ມາຓວໂກສ຺ມິ ຣາຊ, ອນູນນາໂມ ອິຕິ ມວ຺ຫຍນ຺ຕິ;

ອງ຺ເຄສຸ ເມ ຎາຕໂຍ ພນ຺ຘວາ ຈ, ອກ຺ເຂນ ເທວສ຺ມິ ອິຘານຸປຕ຺ໂຕ’’.

໑໓໙໐. ‘‘ກິໍ ມາຓວສ຺ສ ຣຕນານິ ອຕ຺ຖິ, ເຍ ຕໍ ຊິນນ຺ໂຕ ຫເຣ ອກ຺ຂຘຸຕ຺ໂຕ;

ພຫູນິ ຣຎ຺ໂຎ ຣຕນານິ ອຕ຺ຖິ, ເຕ ຕ຺ວໍ ທລິທ຺ໂທ ກຖມວ຺ຫເຍສິ’’.

໑໓໙໑. ‘‘ມໂນຫໂຣ ນາມ ມຓີ ມມາຍໍ, ມໂນຫຣໍ ມຓິຣຕນໍ ອຸຬາຣໍ;

ອິມຎ຺ຈ ອາຊຎ຺ຎມມິຕ຺ຕຕາປນໍ, ເອຕໍ ເມ ຊິນິຕ຺ວາ ຫເຣ ອກ຺ຂຘຸຕ຺ໂຕ’’.

໑໓໙໒. ‘‘ເອໂກ ມຓີ ມາຓວ ກິໍ ກຣິສ຺ສຕິ, ອາຊານິເຍໂກ ປນ ກິໍ ກຣິສ຺ສຕິ;

ພຫູນິ ຣຎ຺ໂຎ ມຓິຣຕນານິ ອຕ຺ຖິ, ອາຊານິຍາ ວາຕຊວາ ອນປ຺ປກາ’’.

ໂທຫຬກຓ຺ຑໍ ນາມ.

ມຓິກຓ຺ຑໍ

໑໓໙໓. ‘‘ອິທຎ຺ຈ ເມ ມຓິຣຕນໍ, ປສ຺ສ ຕ຺ວໍ ທ຺ວິປທຸຕ຺ຕມ;

ອິຕ຺ຖີນໍ ວິຄ຺ຄຫາ ເຈຕ຺ຖ, ປຸຣິສານຎ຺ຈ ວິຄ຺ຄຫາ.

໑໓໙໔. ‘‘ມິຄານໍ ວິຄ຺ຄຫາ ເຈຕ຺ຖ, ສກຸຓານຎ຺ຈ ວິຄ຺ຄຫາ;

ນາຄຣາຊາ ສຸປຓ຺ຓາ ຈ [ນາຄຣາເຊ ສຸປຓ຺ເຓ ຈ (ສີ. ສ຺ຍາ. ປີ.)], ມຓິມ຺ຫິ ປສ຺ສ ນິມ຺ມິຕໍ.

໑໓໙໕. ‘‘ຫຕ຺ຖານີກໍ ຣຖານີກໍ, ອສ຺ເສ ປຕ຺ຕີ ຈ ວມ຺ມິເນ [ຘຊານິ ຈ (ປີ.)];

ຈຕຸຣງ຺ຄິນິມໍ ເສນໍ, ມຓິມ຺ຫິ ປສ຺ສ ນິມ຺ມິຕໍ.

໑໓໙໖. ‘‘ຫຕ຺ຖາໂຣເຫ ອນີກຏ຺ເຐ, ຣຖິເກ ປຕ຺ຕິກາຣເກ;

ພລຄ຺ຄານິ ວິຍູຬ຺ຫານິ [ວິຍູຫານິ (ສ຺ຍາ. ກ.)], ມຓິມ຺ຫິ ປສ຺ສ ນິມ຺ມິຕໍ.

໑໓໙໗. ‘‘ປຸຣໍ ອຸທ຺ຘາປສມ຺ປນ຺ນໍ [ອຸທ຺ທາປສມ຺ປນ຺ນໍ (ສີ. ປີ.), ອຏ຺ຏາລສມ຺ປນ຺ນໍ (ສ຺ຍາ.)], ພຫຸປາກາຣໂຕຣຓໍ;

ສິງ຺ຆາຏເກສຸ ຠູມິໂຍ, ມຓິມ຺ຫິ ປສ຺ສ ນິມ຺ມິຕໍ.

໑໓໙໘. ‘‘ເອສິກາ ປຣິຂາໂຍ ຈ, ປລິຂໍ ອຄ຺ຄຬານິ ຈ;

ອຏ຺ຏາລເກ ຈ ທ຺ວາເຣ ຈ, ມຓິມ຺ຫິ ປສ຺ສ ນິມ຺ມິຕໍ.

໑໓໙໙. ‘‘ປສ຺ສ ໂຕຣຓມຄ຺ເຄສຸ, ນານາທິຊາ ຄຓາ ພຫູ;

ຫໍສາ ໂກຎ຺ຈາ ມຍູຣາ ຈ, ຈກ຺ກວາກາ ຈ ກຸກ຺ກຸຫາ.

໑໔໐໐. ‘‘ກຸຓາລກາ ພຫູ ຈິຕ຺ຣາ, ສິຂຓ຺ຑີ ຊີວຊີວກາ;

ນານາທິຊຄຓາກິຓ຺ຓໍ, ມຓິມ຺ຫິ ປສ຺ສ ນິມ຺ມິຕໍ.

໑໔໐໑. ‘‘ປສ຺ສ ນຄຣໍ ສຸປາກາຣໍ, ອພ຺ຠຸຕໍ ໂລມຫໍສນໍ;

ສມຸສ຺ສິຕຘຊໍ ຣມ຺ມໍ, ໂສຓ຺ຓວາລຸກສນ຺ຖຕໍ.

໑໔໐໒. ‘‘ປສ຺ເສຕ຺ຖ [ປສ຺ສ ຕ຺ວໍ (ສີ. ປີ.)] ປຓ຺ຓສາລາໂຍ, ວິຠຕ຺ຕາ ຠາຄໂສ ມິຕາ;

ນິເວສເນ ນິເວເສ ຈ, ສນ຺ຘິພ຺ຍູເຫ ປຖທ຺ຘິໂຍ.

໑໔໐໓. ‘‘ປານາຄາເຣ ຈ ໂສຓ຺ເຑ ຈ, ສູນາ [ສູຓາ (ສີ. ປີ.), ສຸທ຺ທາ (ສ຺ຍາ. ກ.)] ໂອທນິຍາ ຆຣາ;

ເວສີ ຈ ຄຓິກາໂຍ ຈ, ມຓິມ຺ຫິ ປສ຺ສ ນິມ຺ມິຕໍ.

໑໔໐໔. ‘‘ມາລາກາເຣ ຈ ຣຊເກ, ຄນ຺ຘິເກ ອຖ ທຸສ຺ສິເກ;

ສຸວຓ຺ຓກາເຣ ມຓິກາເຣ, ມຓິມ຺ຫິ ປສ຺ສ ນິມ຺ມິຕໍ.

໑໔໐໕. ‘‘ອາຬາຣິເກ ຈ ສູເທ ຈ, ນຏນາຏກຄາຍິໂນ;

ປາຓິສ຺ສເຣ ກຸມ຺ຠຖູນິເກ, ມຓິມ຺ຫິ ປສ຺ສ ນິມ຺ມິຕໍ.

໑໔໐໖. ‘‘ປສ຺ສ ເຠຣີ ມຸທິງ຺ຄາ ຈ, ສງ຺ຂາ ປຓວທິນ຺ທິມາ;

ສພ຺ພຎ຺ຈ ຕາຬາວຈຣໍ, ມຓິມ຺ຫິ ປສ຺ສ ນິມ຺ມິຕໍ.

໑໔໐໗. ‘‘ສມ຺ມຕາລຎ຺ຈ ວີຓຎ຺ຈ, ນຈ຺ຈຄີຕໍ ສຸວາທິຕໍ;

ຕູຣິຍຕາຬິຕສງ຺ຆຸຏ຺ຐໍ, ມຓິມ຺ຫິ ປສ຺ສ ນິມ຺ມິຕໍ.

໑໔໐໘. ‘‘ລງ຺ຆິກາ ມຸຏ຺ຐິກາ ເຈຕ຺ຖ, ມາຍາກາຣາ ຈ ໂສຠິຍາ;

ເວຕາລິເກ [ເວຕ຺ຕລິເກ (ກ.)] ຈ ຊລ຺ເລ ຈ, ມຓິມ຺ຫິ ປສ຺ສ ນິມ຺ມິຕໍ.

໑໔໐໙. ‘‘ສມຊ຺ຊາ ເຈຕ຺ຖ ວຕ຺ຕນ຺ຕິ, ອາກິຓ຺ຓາ ນຣນາຣິຠິ;

ມຎ຺ຈາຕິມຎ຺ເຈ ຠູມິໂຍ, ມຓິມ຺ຫິ ປສ຺ສ ນິມ຺ມິຕໍ.

໑໔໑໐. ‘‘ປສ຺ສ ມລ຺ເລ ສມຊ຺ຊສ຺ມິໍ, ໂຜເຏນ຺ເຕ [ປາເຐນ຺ເຕ (ສີ. ສ຺ຍາ. ປີ.)] ທິຄຸຓໍ ຠຸຊໍ;

ນິຫເຕ ນິຫຕມາເນ ຈ, ມຓິມ຺ຫິ ປສ຺ສ ນິມ຺ມິຕໍ.

໑໔໑໑. ‘‘ປສ຺ສ ປພ຺ພຕປາເທສຸ, ນານາມິຄຄຓາ ພຫູ;

ສີຫາ ພ຺ຍຄ຺ຆາ ວຣາຫາ ຈ, ອຈ຺ຉໂກກຕຣຈ຺ຉໂຍ.

໑໔໑໒. ‘‘ປລາສາທາ ຄວຊາ ຈ, ມຫິໍສາ ໂຣຫິຕາ ຣຸຣູ;

ເອເຓຍ຺ຍາ ຈ ວຣາຫາ [ສຣຠາ (ສ຺ຍາ.)] ຈ, ຄຓິໂນ ນີກ [ນິງ຺ກ (ສີ. ສ຺ຍາ. ປີ.)] ສູກຣາ.

໑໔໑໓. ‘‘ກທລິມິຄາ ພຫູ ຈິຕ຺ຣາ, ພິຬາຣາ ສສກຓ຺ຏກາ;

ນານາມິຄຄຓາກິຓ຺ຓໍ, ມຓິມ຺ຫິ ປສ຺ສ ນິມ຺ມິຕໍ.

໑໔໑໔. ‘‘ນຊ຺ຊາໂຍ ສຸປຕິຕ຺ຖາໂຍ, ໂສຓ຺ຓວາລຸກສນ຺ຖຕາ;

ອຈ຺ຉາ ສວນ຺ຕິ ອມ຺ພູນິ, ມຈ຺ຉຄຸມ຺ພນິເສວິຕາ.

໑໔໑໕. ‘‘ກຸມ຺ຠີລາ ມກຣາ ເຈຕ຺ຖ, ສຸສຸມາຣາ ຈ ກຈ຺ຉປາ;

ປາຐີນາ ປາວຸສາ ມຈ຺ຉາ, ພລຊາ [ວລຊາ (ສີ.), ວາລຊາ (ປີ.)] ມຸຎ຺ຊໂຣຫິຕາ.

໑໔໑໖. ‘‘ນານາທິຊຄຓາກິຓ຺ຓາ, ນານາທຸມຄຓາຍຸຕາ;

ເວຬຸຣິຍກ-ໂຣທາໂຍ [ເວຬຸຣິຍຜລກໂຣທາໂຍ (ສີ.)], ມຓິມ຺ຫິ ປສ຺ສ ນິມ຺ມິຕໍ.

໑໔໑໗. ‘‘ປສ຺ເສຕ຺ຖ ໂປກ຺ຂຣຓິໂຍ, ສຸວິຠຕ຺ຕາ ຈຕຸທ຺ທິສາ;