໒໒. ມຫານິປາໂຕ

໕໓໘. ມູຄປກ຺ຂຊາຕກໍ (໑)

໑. ‘‘ມາ ປຓ຺ຑິຈ຺ຈຍໍ [ປຓ຺ຑິຕິຍໍ (ສີ.), ປຓ຺ຑິຈ຺ຈິຍໍ (ປີ.)] ວິຠາວຍ, ພາລມໂຕ ຠວ ສພ຺ພປາຓິນໍ;

ສພ຺ໂພ ຕໍ ຊໂນ ໂອຈິນາຍຕຸ, ເອວໍ ຕວ ອຕ຺ໂຖ ຠວິສ຺ສຕິ’’.

໒. ‘‘ກໂຣມິ ເຕ ຕໍ ວຈນໍ, ຍໍ ມໍ ຠຓສິ ເທວເຕ;

ອຕ຺ຖກາມາສິ ເມ ອມ຺ມ, ຫິຕກາມາສິ ເທວເຕ’’.

໓. ‘‘ກິໍ ນຸ ສນ຺ຕຣມາໂນວ, ກາສຸໍ ຂຓສິ ສາຣຖິ;

ປຸຏ຺ໂຐ ເມ ສມ຺ມ ອກ຺ຂາຫິ, ກິໍ ກາສຸຍາ ກຣິສ຺ສສິ’’.

໔. ‘‘ຣຎ຺ໂຎ ມູໂຄ ຈ ປກ຺ໂຂ ຈ, ປຸຕ຺ໂຕ ຊາໂຕ ອເຈຕໂສ;

ໂສມ຺ຫິ ຣຎ຺ຎາ ສມຊ຺ຌິຏ຺ໂຐ, ປຸຕ຺ຕໍ ເມ ນິຂຓໍ ວເນ’’.

໕. ‘‘ນ ພຘິໂຣ ນ ມູໂຄສ຺ມິ, ນ ປກ຺ໂຂ ນ ຈ ວີກໂລ [ນປິ ປງ຺ຄຸໂລ (ສີ. ປີ.), ນ ຈ ປິງ຺ຄໂລ (ສ຺ຍາ.)];

ອຘມ຺ມໍ ສາຣຖິ ກຍິຣາ, ມໍ ເຈ ຕ຺ວໍ ນິຂຓໍ ວເນ’’.

໖. ‘‘ອູຣູ ພາຫຸໍ [ພາຫູ (ສີ. ກ.)] ຈ ເມ ປສ຺ສ, ຠາສິຕຎ຺ຈ ສຸໂຓຫິ ເມ;

ອຘມ຺ມໍ ສາຣຖິ ກຍິຣາ, ມໍ ເຈ ຕ຺ວໍ ນິຂຓໍ ວເນ’’.

໗. ‘‘ເທວຕາ ນຸສິ ຄນ຺ຘພ຺ໂພ, ອທຸ [ອາທຸ (ສີ.), ອາທູ (ສ຺ຍາ.)] ສກ຺ໂກ ປຸຣິນ຺ທໂທ;

ໂກ ວາ ຕ຺ວໍ ກສ຺ສ ວາ ປຸຕ຺ໂຕ, ກຖໍ ຊາເນມຸ ຕໍ ມຍໍ’’.

໘. ‘‘ນມ຺ຫິ ເທໂວ ນ ຄນ຺ຘພ຺ໂພ, ນາປິ ສກ຺ໂກ ປຸຣິນ຺ທໂທ;

ກາສິຣຎ຺ໂຎ ອຫໍ ປຸຕ຺ໂຕ, ຍໍ ກາສຸຍາ ນິຂຎ຺ຎສິ [ນິຆຎ຺ຎສິ (ສີ. ປີ.), ນິຂຎ຺ຉສິ (?)].

໙. ‘‘ຕສ຺ສ ຣຎ຺ໂຎ ອຫໍ ປຸຕ຺ໂຕ, ຍໍ ຕ຺ວໍ ສມ຺ມູປຊີວສິ [ສມຸປຊີວສິ (ສີ. ປີ.)];

ອຘມ຺ມໍ ສາຣຖິ ກຍິຣາ, ມໍ ເຈ ຕ຺ວໍ ນິຂຓໍ ວເນ.

໑໐. ‘‘ຍສ຺ສ ຣຸກ຺ຂສ຺ສ ຉາຍາຍ, ນິສີເທຍ຺ຍ ສເຍຍ຺ຍ ວາ;

ນ ຕສ຺ສ ສາຂໍ ຠຎ຺ເຊຍ຺ຍ, ມິຕ຺ຕທຸພ຺ໂຠ [ມິຕ຺ຕທູໂຠ (ສີ. ປີ.)] ຫິ ປາປໂກ.

໑໑. ‘‘ຍຖາ ຣຸກ຺ໂຂ ຕຖາ ຣາຊາ, ຍຖາ ສາຂາ ຕຖາ ອຫໍ;

ຍຖາ ຉາຍູປໂຄ ໂປໂສ, ເອວໍ ຕ຺ວມສິ ສາຣຖິ;

ອຘມ຺ມໍ ສາຣຖິ ກຍິຣາ, ມໍ ເຈ ຕ຺ວໍ ນິຂຓໍ ວເນ.

໑໒. ‘‘ປຫູຕຠກ຺ໂຂ [ພຫຸຕ຺ຕຠກ຺ໂຂ (ກ.)] ຠວຕິ, ວິປ຺ປວຸຏ຺ໂຐ [ວິປ຺ປວຸຕ຺ໂຖ (ສີ. ປີ.), ວິປ຺ປມຸຕ຺ໂຕ (ກ.)] ສກໍ [ສກາ (ສີ. ປີ.)] ຆຣາ;

ພຫູ ນໍ ອຸປຊີວນ຺ຕິ, ໂຍ ມິຕ຺ຕານໍ ນ ທຸພ຺ຠຕິ.

໑໓. ‘‘ຍໍ ຍໍ ຊນປທໍ ຍາຕິ, ນິຄເມ ຣາຊຘານິໂຍ;

ສພ຺ພຕ຺ຖ ປູຊິໂຕ ໂຫຕິ, ໂຍ ມິຕ຺ຕານໍ ນ ທຸພ຺ຠຕິ.

໑໔. ‘‘ນາສ຺ສ ໂຈຣາ ປສາຫນ຺ຕິ [ປສຫນ຺ຕິ (ສີ. ສ຺ຍາ. ປີ.)], ນາຕິມຎ຺ຎນ຺ຕິ ຂຕ຺ຕິຍາ [ນາຕິມຎ຺ເຎຕິ ຂຕ຺ຕິໂຍ (ສີ. ສ຺ຍາ. ປີ.)];

ສພ຺ເພ ອມິຕ຺ເຕ ຕຣຕິ, ໂຍ ມິຕ຺ຕານໍ ນ ທຸພ຺ຠຕິ.

໑໕. ‘‘ອກ຺ກຸທ຺ໂຘ ສຆຣໍ ເອຕິ, ສຠາຍໍ [ສຠາຍ (ສີ. ສ຺ຍາ. ປີ.)] ປຏິນນ຺ທິໂຕ;

ຎາຕີນໍ ອຸຕ຺ຕໂມ ໂຫຕິ, ໂຍ ມິຕ຺ຕານໍ ນ ທຸພ຺ຠຕິ.

໑໖. ‘‘ສກ຺ກຕ຺ວາ ສກ຺ກໂຕ ໂຫຕິ, ຄຣຸ ໂຫຕິ ສຄາຣໂວ [ຄຣຸໂກ ໂຫຕິ ຄາຣໂວ (ກ.)];

ວຓ຺ຓກິຕ຺ຕິຠໂຕ ໂຫຕິ, ໂຍ ມິຕ຺ຕານໍ ນ ທຸພ຺ຠຕິ.

໑໗. ‘‘ປູຊໂກ ລຠເຕ ປູຊໍ, ວນ຺ທໂກ ປຏິວນ຺ທນໍ;

ຍໂສ ກິຕ຺ຕິຎ຺ຈ ປປ຺ໂປຕິ, ໂຍ ມິຕ຺ຕານໍ ນ ທຸພ຺ຠຕິ.

໑໘. ‘‘ອຄ຺ຄິ ຍຖາ ປຊ຺ຊລຕິ, ເທວຕາວ ວິໂຣຈຕິ;

ສິຣິຍາ ອຊຫິໂຕ ໂຫຕິ, ໂຍ ມິຕ຺ຕານໍ ນ ທຸພ຺ຠຕິ.

໑໙. ‘‘ຄາໂວ ຕສ຺ສ ປຊາຍນ຺ຕິ, ເຂຕ຺ເຕ ວຸຕ຺ຕໍ ວິຣູຫຕິ;

ວຸຕ຺ຕານໍ ຜລມສ຺ນາຕິ, ໂຍ ມິຕ຺ຕານໍ ນ ທຸພ຺ຠຕິ.

໒໐. ‘‘ທຣິໂຕ ປພ຺ພຕາໂຕ ວາ, ຣຸກ຺ຂໂຕ ປຕິໂຕ ນໂຣ;

ຈຸໂຕ ປຕິຏ຺ຐໍ ລຠຕິ, ໂຍ ມິຕ຺ຕານໍ ນ ທຸພ຺ຠຕິ.

໒໑. ‘‘ວິຣູຬ຺ຫມູລສນ຺ຕານໍ, ນິຄ຺ໂຣຘມິວ ມາລຸໂຕ;

ອມິຕ຺ຕາ ນປ຺ປສາຫນ຺ຕິ, ໂຍ ມິຕ຺ຕານໍ ນ ທຸພ຺ຠຕິ’’.

໒໒. ‘‘ເອຫິ ຕໍ ປຏິເນສ຺ສາມິ, ຣາຊປຸຕ຺ຕ ສກໍ ຆຣໍ;

ຣຊ຺ຊໍ ກາເຣຫິ ຠທ຺ທນ຺ເຕ, ກິໍ ອຣຎ຺ເຎ ກຣິສ຺ສສິ’’.

໒໓. ‘‘ອລໍ ເມ ເຕນ ຣຊ຺ເຊນ, ຎາຕເກຫິ [ຎາຕເກນ (ສ຺ຍາ. ກ.)] ຘເນນ ວາ;

ຍໍ ເມ ອຘມ຺ມຈຣິຍາຍ, ຣຊ຺ຊໍ ລພ຺ເຠຖ ສາຣຖິ’’.

໒໔. ‘‘ປຸຓ຺ຓປຕ຺ຕໍ ມໍ ລາເຠຫິ [ປລາເຠຫິ (ສີ. ປີ.)], ຣາຊປຸຕ຺ຕ ອິໂຕ ຄໂຕ;

ປິຕາ ມາຕາ ຈ ເມ ທຊ຺ຊຸໍ, ຣາຊປຸຕ຺ຕ ຕຍີ ຄເຕ.

໒໕. ‘‘ໂອໂຣຘາ ຈ ກຸມາຣາ ຈ, ເວສິຍານາ ຈ ພ຺ຣາຫ຺ມຓາ;

ເຕປິ ອຕ຺ຕມນາ ທຊ຺ຊຸໍ, ຣາຊປຸຕ຺ຕ ຕຍີ ຄເຕ.

໒໖. ‘‘ຫຕ຺ຖາໂຣຫາ [ຫຕ຺ຖາຣູຫາ (ສີ. ປີ.) ເອວມຸປຣິປິ] ອນີກຏ຺ຐາ, ຣຖິກາ ປຕ຺ຕິກາຣກາ;

ເຕປິ ອຕ຺ຕມນາ ທຊ຺ຊຸໍ [ເຕປິ ທຊ຺ຊຸໍ ປຕີຕາເມ (ສີ. ປີ.)], ຣາຊປຸຕ຺ຕ ຕຍີ ຄເຕ.

໒໗. ‘‘ພຫຸຘຎ຺ຎາ ຊານປທາ [ພຫູ ຊານປທາ ຈຎ຺ເຎ (ສີ.), ພຫູ ຊນປທາ ຈຎ຺ເຎ (ປີ.)], ເນຄມາ ຈ ສມາຄຕາ;

ອຸປາຍນານິ ເມ ທຊ຺ຊຸໍ, ຣາຊປຸຕ຺ຕ ຕຍີ ຄເຕ’’.

໒໘. ‘‘ປິຕຸ ມາຕຸ ຈຫໍ ຈຕ຺ໂຕ, ຣຏ຺ຐສ຺ສ ນິຄມສ຺ສ ຈ;

ອໂຖ ສພ຺ພກຸມາຣານໍ, ນຕ຺ຖິ ມຍ຺ຫໍ ສກໍ ຆຣໍ.

໒໙. ‘‘ອນຸຎ຺ຎາໂຕ ອຫໍ ມຕ຺ຍາ, ສຎ຺ຈຕ຺ໂຕ ປິຕຣາ ມຫໍ;

ເອໂກຣຎ຺ເຎ ປພ຺ພຊິໂຕ, ນ ກາເມ ອຠິປຕ຺ຖເຍ.

໓໐. ‘‘ອປິ ອຕຣມານານໍ, ຜລາສາວ ສມິຊ຺ຌຕິ;

ວິປກ຺ກພ຺ຣຫ຺ມຈຣິໂຍສ຺ມິ, ເອວໍ ຊານາຫິ ສາຣຖິ.

໓໑. ‘‘ອປິ ອຕຣມານານໍ, ສມ຺ມທຕ຺ໂຖ ວິປຈ຺ຈຕິ;

ວິປກ຺ກພ຺ຣຫ຺ມຈຣິໂຍສ຺ມິ, ນິກ຺ຂນ຺ໂຕ ອກຸໂຕຠໂຍ’’.

໓໒. ‘‘ເອວໍ ວຄ຺ຄຸກໂຖ ສນ຺ໂຕ, ວິສຏ຺ຐວຈໂນ ຈສິ [ຈ ໂສ (ສ຺ຍາ. ກ.)];

ກສ຺ມາ ປິຕຸ ຈ ມາຕຸຈ຺ຈ, ສນ຺ຕິເກ ນ ຠຓີ ຕທາ’’.

໓໓. ‘‘ນາຫໍ ອສນ຺ຘິຕາ [ອສຕ຺ຖິຕາ (ສີ.)] ປກ຺ໂຂ, ນ ພຘິໂຣ ອໂສຕຕາ;

ນາຫໍ ອຊິວ຺ຫຕາ ມູໂຄ, ມາ ມໍ ມູຄມຘາຣຍິ [ມູໂຄ ອຘາຣຍິ (ສີ.)].

໓໔. ‘‘ປຸຣິມໍ ສຣາມຫໍ ຊາຕິໍ, ຍຕ຺ຖ ຣຊ຺ຊມກາຣຍິໍ;

ກາຣຍິຕ຺ວາ ຕຫິໍ ຣຊ຺ຊໍ, ປາປຕ຺ຖໍ ນິຣຍໍ ຠຸສໍ.

໓໕. ‘‘ວີສຕິຎ຺ເຈວ ວສ຺ສານິ, ຕຫິໍ ຣຊ຺ຊມກາຣຍິໍ;

ອສີຕິວສ຺ສສຫສ຺ສານິ, ນິຣຍມ຺ຫິ ອປຈ຺ຈິສໍ [ອປຈ຺ຈສິໍ (ສ຺ຍາ.), ອປຈ຺ຈຍິໍ (ປີ.)].

໓໖. ‘‘ຕສ຺ສ ຣຊ຺ຊສ຺ສຫໍ ຠີໂຕ, ມາ ມໍ ຣຊ຺ຊາຠິເສຈຍຸໍ [ຣຊ຺ເຊຠິເສຈຍຸໍ (ສ຺ຍາ. ກ.)];

ຕສ຺ມາ ປິຕຸ ຈ ມາຕຸຈ຺ຈ, ສນ຺ຕິເກ ນ ຠຓິໍ ຕທາ.

໓໗. ‘‘ອຸຈ຺ຉງ຺ເຄ ມໍ ນິສາເທຕ຺ວາ, ປິຕາ ອຕ຺ຖານຸສາສຕິ;

ເອກໍ ຫນຖ ພນ຺ຘຖ, ເອກໍ ຂາຣາປຕຈ຺ຉິກໍ [ຂຣາປຕິຈ຺ຉກໍ (ສ຺ຍາ.), ຂຣາປຏິຈ຺ຉກໍ (ກ.)];

ເອກໍ ສູລສ຺ມິໍ ອຸປ຺ເປຖ [ອປ຺ເປຖ (ສີ.), ອຸພ຺ເພຖ (ສ຺ຍາ.), ອຈ຺ເຈຖ (ປີ.)], ອິຈ຺ຈສ຺ສ ມນຸສາສຕິ.

໓໘. ‘‘ຕາຍາຫໍ [ຕສ຺ສາຫໍ (ສີ. ປີ.)] ຜຣຸສໍ ສຸຕ຺ວາ, ວາຈາໂຍ ສມຸທີຣິຕາ;

ອມູໂຄ ມູຄວຓ຺ເຓນ, ອປກ຺ໂຂ ປກ຺ຂສມ຺ມໂຕ;

ສເກ ມຸຕ຺ຕກຣີສສ຺ມິໍ, ອຈ຺ຉາຫໍ ສມ຺ປຣິປ຺ລຸໂຕ.

໓໙. ‘‘ກສິຣຎ຺ຈ ປຣິຕ຺ຕຎ຺ຈ, ຕຎ຺ຈ ທຸກ຺ເຂນ ສໍຍຸຕໍ;

ໂກມໍ [ໂກ ຕໍ (ສີ. ປີ.)] ຊີວິຕມາຄມ຺ມ, ເວຣໍ ກຍິຣາຖ ເກນຈິ.

໔໐. ‘‘ປຎ຺ຎາຍ ຈ ອລາເຠນ, ຘມ຺ມສ຺ສ ຈ ອທສ຺ສນາ;

ໂກມໍ [ໂກ ຕໍ (ສີ. ປີ.)] ຊີວິຕມາຄມ຺ມ, ເວຣໍ ກຍິຣາຖ ເກນຈິ.

໔໑. ‘‘ອປິ ອຕຣມານານໍ, ຜລາສາວ ສມິຊ຺ຌຕິ;

ວິປກ຺ກພ຺ຣຫ຺ມຈຣິໂຍສ຺ມິ, ເອວໍ ຊານາຫິ ສາຣຖິ.

໔໒. ‘‘ອປິ ອຕຣມານານໍ, ສມ຺ມທຕ຺ໂຖ ວິປຈ຺ຈຕິ;

ວິປກ຺ກພ຺ຣຫ຺ມຈຣິໂຍສ຺ມິ, ນິກ຺ຂນ຺ໂຕ ອກຸໂຕຠໂຍ’’.

໔໓. ‘‘ອຫມ຺ປິ ປພ຺ພຊິສ຺ສາມິ, ຣາຊປຸຕ຺ຕ ຕວນ຺ຕິເກ;

ອວ຺ຫາຍສ຺ສຸ [ອວ຺ຫຍສ຺ສຸ (ສີ. ປີ.)] ມໍ ຠທ຺ທນ຺ເຕ, ປພ຺ພຊ຺ຊາ ມມ ຣຸຈ຺ຈຕິ’’.

໔໔. ‘‘ຣຖໍ ນິຍ຺ຍາທຍິຕ຺ວານ, ອນໂຓ ເອຫິ ສາຣຖິ;

ອນຓສ຺ສ ຫິ ປພ຺ພຊ຺ຊາ, ເອຕໍ ອິສີຫິ ວຓ຺ຓິຕໍ’’.

໔໕. ‘‘ຍເທວ ຕ຺ຍາຫໍ ວຈນໍ, ອກຣໍ ຠທ຺ທມຕ຺ຖຸ ເຕ;

ຕເທວ ເມ ຕ຺ວໍ ວຈນໍ, ຍາຈິໂຕ ກຕ຺ຕຸມຣຫສິ.

໔໖. ‘‘ອິເຘວ ຕາວ ອຈ຺ຉສ຺ສຸ, ຍາວ ຣາຊານມານເຍ;

ອປ຺ເປວ ເຕ ປິຕາ ທິສ຺ວາ, ປຕີໂຕ ສຸມໂນ ສິຍາ’’.

໔໗. ‘‘ກໂຣມິ ເຕຕໍ ວຈນໍ, ຍໍ ມໍ ຠຓສິ ສາຣຖິ;

ອຫມ຺ປິ ທຏ຺ຐຸກາໂມສ຺ມິ, ປິຕຣໍ ເມ ອິຘາຄຕໍ.

໔໘. ‘‘ເອຫິ ສມ຺ມ ນິວຕ຺ຕສ຺ສຸ, ກຸສລໍ ວຊ຺ຊາສິ ຎາຕິນໍ;

ມາຕຣໍ ປິຕຣໍ ມຍ຺ຫໍ, ວຸຕ຺ໂຕ ວຊ຺ຊາສິ ວນ຺ທນໍ’’.

໔໙. ຕສ຺ສ ປາເທ ຄເຫຕ຺ວານ, ກຕ຺ວາ ຈ ນໍ ປທກ຺ຂິຓໍ;

ສາຣຖິ ຣຖມາຣຸຍ຺ຫ, ຣາຊທ຺ວາຣໍ ອຸປາຄມິ.

໕໐. ‘‘ສຸຎ຺ຎໍ ມາຕາ ຣຖໍ ທິສ຺ວາ, ເອກໍ ສາຣຖິມາຄຕໍ;

ອສ຺ສຸປຸຓ຺ເຓຫິ ເນຕ຺ເຕຫິ, ໂຣທນ຺ຕີ ນໍ ອຸທິກ຺ຂຕິ.

໕໑. ‘‘ອຍໍ ໂສ ສາຣຖິ ເອຕິ, ນິຫນ຺ຕ຺ວາ ມມ ອຕ຺ຣຊໍ;

ນິຫໂຕ ນູນ ເມ ປຸຕ຺ໂຕ, ປຖພ຺ຍາ ຠູມິວຑ຺ຒໂນ.

໕໒. ‘‘ອມິຕ຺ຕາ ນູນ ນນ຺ທນ຺ຕິ, ປຕີຕາ ນູນ ເວຣິໂນ;

ອາຄຕໍ ສາຣຖິໍ ທິສ຺ວາ, ນິຫນ຺ຕ຺ວາ ມມ ອຕ຺ຣຊໍ.

໕໓. ‘‘ສຸຎ຺ຎໍ ມາຕາ ຣຖໍ ທິສ຺ວາ, ເອກໍ ສາຣຖິມາຄຕໍ;

ອສ຺ສຸປຸຓ຺ເຓຫິ ເນຕ຺ເຕຫິ, ໂຣທນ຺ຕີ ປຣິປຸຈ຺ຉິ ນໍ [ໂຣທນ຺ຕີ ປຣິປຸຈ຺ຉຕິ (ສີ. ປີ.), ໂຣທນ຺ຕີ ນໍ ປຣິປຸຈ຺ຉຕິ (ສ຺ຍາ.)].

໕໔. ‘‘ກິນ຺ນຸ ມູໂຄ ກິໍ ນຸ ປກ຺ໂຂ, ກິນ຺ນຸ ໂສ ວິລປີ ຕທາ;

ນິຫຎ຺ຎມາໂນ ຠູມິຍາ, ຕໍ ເມ ອກ຺ຂາຫິ ສາຣຖິ.

໕໕. ‘‘ກຖໍ ຫຕ຺ເຖຫິ ປາເທຫິ, ມູຄປກ຺ໂຂ ວິວຊ຺ຊຍິ;

ນິຫຎ຺ຎມາໂນ ຠູມິຍາ, ຕໍ ເມ ອກ຺ຂາຫິ ປຸຈ຺ຉິໂຕ’’.

໕໖. ‘‘ອກ຺ເຂຍ຺ຍໍ [ອກ຺ຂິສ຺ສໍ (ສີ. ປີ.)] ເຕ ອຫໍ ອຍ຺ເຍ, ທຊ຺ຊາສິ ອຠຍໍ ມມ;

ຍໍ ເມ ສຸຕໍ ວາ ທິຏ຺ຐໍ ວາ, ຣາຊປຸຕ຺ຕສ຺ສ ສນ຺ຕິເກ’’.

໕໗. ‘‘ອຠຍໍ ສມ຺ມ ເຕ ທມ຺ມິ, ອຠີໂຕ ຠຓ ສາຣຖິ;

ຍໍ ເຕ ສຸຕໍ ວາ ທິຏ຺ຐໍ ວາ, ຣາຊປຸຕ຺ຕສ຺ສ ສນ຺ຕິເກ’’.

໕໘. ‘‘ນ ໂສ ມູໂຄ ນ ໂສ ປກ຺ໂຂ, ວິສຏ຺ຐວຈໂນ ຈ ໂສ;

ຣຊ຺ຊສ຺ສ ກິຣ ໂສ ຠີໂຕ, ອກຣາ [ອກຣີ (ສີ. ປີ.)] ອາລເຍ ພຫູ.

໕໙. ‘‘ປຸຣິມໍ ສຣຕິ ໂສ ຊາຕິໍ, ຍຕ຺ຖ ຣຊ຺ຊມກາຣຍິ;

ກາຣຍິຕ຺ວາ ຕຫິໍ ຣຊ຺ຊໍ, ປາປຕ຺ຖ ນິຣຍໍ ຠຸສໍ.

໖໐. ‘‘ວີສຕິຎ຺ເຈວ ວສ຺ສານິ, ຕຫິໍ ຣຊ຺ຊມກາຣຍິ;

ອສີຕິວສ຺ສສຫສ຺ສານິ, ນິຣຍມ຺ຫິ ອປຈ຺ຈິ ໂສ.

໖໑. ‘‘ຕສ຺ສ ຣຊ຺ຊສ຺ສ ໂສ ຠີໂຕ, ມາ ມໍ ຣຊ຺ຊາຠິເສຈຍຸໍ;

ຕສ຺ມາ ປິຕຸ ຈ ມາຕຸຈ຺ຈ, ສນ຺ຕິເກ ນ ຠຓີ ຕທາ.

໖໒. ‘‘ອງ຺ຄປຈ຺ຈງ຺ຄສມ຺ປນ຺ໂນ, ອາໂຣຫປຣິຓາຫວາ;

ວິສຏ຺ຐວຈໂນ ປຎ຺ໂຎ, ມຄ຺ເຄ ສຄ຺ຄສ຺ສ ຕິຏ຺ຐຕິ.

໖໓. ‘‘ສເຈ ຕ຺ວໍ ທຏ຺ຐຸກາມາສິ, ຣາຊປຸຕ຺ຕໍ [ຣາຊປຸຕ຺ຕິ (ສີ.)] ຕວຕ຺ຣຊໍ;

ເອຫິ ຕໍ ປາປຍິສ຺ສາມິ, ຍຕ຺ຖ ສມ຺ມຕິ ເຕມິໂຍ’’.

໖໔. ‘‘ໂຍຊຍນ຺ຕຸ ຣເຖ ອສ຺ເສ, ກຈ຺ຉໍ ນາຄານ [ນາຄານິ (ສ຺ຍາ. ກ.)] ພນ຺ຘຖ;

ອຸທີຣຍນ຺ຕຸ ສງ຺ຂປຓວາ, ວາທນ຺ຕຸ [ວທນ຺ຕຸ (ສີ.), ນທນ຺ຕຸ (ສ຺ຍາ. ກ.), ວທຕໍ (ປີ.)] ເອກໂປກ຺ຂຣາ.

໖໕. ‘‘ວາທນ຺ຕຸ [ນທນ຺ຕຸ (ສີ. ສ຺ຍາ. ປີ.)] ເຠຣີ ສນ຺ນທ຺ຘາ, ວຄ຺ຄູ ວາທນ຺ຕຸ ທຸນ຺ທຸຠີ;

ເນຄມາ ຈ ມໍ ອນ຺ເວນ຺ຕຸ, ຄຈ຺ຉໍ ປຸຕ຺ຕນິເວທໂກ [ນິວາທໂກ (ສ຺ຍາ. ກ.)].

໖໖. ‘‘ໂອໂຣຘາ ຈ ກຸມາຣາ ຈ, ເວສິຍານາ ຈ ພ຺ຣາຫ຺ມຓາ;

ຂິປ຺ປໍ ຍານານິ ໂຍເຊນ຺ຕຸ, ຄຈ຺ຉໍ ປຸຕ຺ຕນິເວທໂກ [ນິວາທໂກ (ສ຺ຍາ. ກ.)].

໖໗. ‘‘ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ຂິປ຺ປໍ ຍານານິ ໂຍເຊນ຺ຕຸ, ຄຈ຺ຉໍ ປຸຕ຺ຕນິເວທໂກ [ນິວາທໂກ (ສ຺ຍາ. ກ.)].

໖໘. ‘‘ສມາຄຕາ ຊານປທາ, ເນຄມາ ຈ ສມາຄຕາ;

ຂິປ຺ປໍ ຍານານິ ໂຍເຊນ຺ຕຸ, ຄຈ຺ຉໍ ປຸຕ຺ຕນິເວທໂກ’’ [ນິວາທໂກ (ສ຺ຍາ. ກ.)].

໖໙. ‘‘ອສ຺ເສ ຈ ສາຣຖີ ຍຸຕ຺ເຕ, ສິນ຺ຘເວ ສີຆວາຫເນ;

ຣາຊທ຺ວາຣໍ ອຸປາຄຈ຺ຉຸໍ, ຍຸຕ຺ຕາ ເທວ ອິເມ ຫຍາ’’.

໗໐. ‘‘ຖູລາ ຊເວນ ຫາຍນ຺ຕິ, ກິສາ ຫາຍນ຺ຕິ ຖາມຸນາ;

ກິເສ ຖູເລ ວິວຊ຺ເຊຕ຺ວາ, ສໍສຏ຺ຐາ ໂຍຊິຕາ ຫຍາ’’.

໗໑. ‘‘ຕໂຕ ຣາຊາ ຕຣມາໂນ, ຍຸຕ຺ຕມາຣຸຍ຺ຫ ສນ຺ທນໍ;

ອິຕ຺ຖາຄາຣໍ ອຊ຺ຌຠາສິ [ອຠາສຖ (ກ.)], ສພ຺ພາວ ອນຸຍາຖ ມໍ.

໗໒. ‘‘ວາລພີຊນິມຸຓ຺ຫີສໍ, ຂຄ຺ຄໍ ຉຕ຺ຕຎ຺ຈ ປຓ຺ຑຣໍ;

ອຸປາຘິ ຣຖມາຣຸຍ຺ຫ [ອຸປາທິຣຖມາຣຸຍ຺ຫ (ສີ.), ອຸປາຘີ ຣຖມາຣຸຍ຺ຫ (ສ຺ຍາ.)], ສຸວຓ຺ເຓຫິ ອລງ຺ກຕາ.

໗໓. ‘‘ຕໂຕ ສ [ຈ (ສີ. ສ຺ຍາ. ປີ.)] ຣາຊາ ປາຍາສິ, ປຸຣກ຺ຂຕ຺ວານ ສາຣຖິໍ;