໕໔໗. ເວສ຺ສນ຺ຕຣຊາຕກໍ (໑໐)

ທສວຣກຖາ

໑໖໕໕. ‘‘ຜຸສ຺ສຕີ [ຜຸສຕິ (ສີ. ປີ.)] ວຣວຓ຺ຓາເຠ, ວຣສ຺ສຸ ທສຘາ ວເຣ;

ປຖພ຺ຍາ ຈາຣຸປຸພ຺ພງ຺ຄິ, ຍໍ ຕຸຍ຺ຫໍ ມນໂສ ປິຍໍ’’.

໑໖໕໖. ‘‘ເທວຣາຊ ນໂມ ຕ຺ຍຕ຺ຖຸ, ກິໍ ປາປໍ ປກຕໍ ມຍາ;

ຣມ຺ມາ ຈາເວສິ ມໍ ຐານາ, ວາໂຕວ ຘຣຓີຣຸຫໍ’’.

໑໖໕໗. ‘‘ນ ເຈວ ເຕ ກຕໍ ປາປໍ, ນ ຈ ເມ ຕ຺ວມສິ ອປ຺ປິຍາ;

ປຸຎ຺ຎຎ຺ຈ ເຕ ປຣິກ຺ຂີຓໍ, ເຍນ ເຕວໍ ວທາມຫໍ.

໑໖໕໘. ‘‘ສນ຺ຕິເກ ມຣຓໍ ຕຸຍ຺ຫໍ, ວິນາຠາໂວ ຠວິສ຺ສຕິ;

ປຏິຄຓ຺ຫາຫິ ເມ ເອເຕ, ວເຣ ທສ ປເວຈ຺ຉໂຕ’’.

໑໖໕໙. ‘‘ວຣໍ ເຈ ເມ ອໂທ ສກ຺ກ, ສພ຺ພຠູຕານມິສ຺ສຣ;

ສິວິຣາຊສ຺ສ ຠທ຺ທນ຺ເຕ, ຕຕ຺ຖ ອສ຺ສໍ ນິເວສເນ.

໑໖໖໐. ‘‘ນີລເນຕ຺ຕາ ນີລຠມຸ, ນິລກ຺ຂີ ຈ ຍຖາ ມິຄີ;

ຜຸສ຺ສຕີ ນາມ ນາເມນ, ຕຕ຺ຖປສ຺ສໍ ປຸຣິນ຺ທທ.

໑໖໖໑. ‘‘ປຸຕ຺ຕໍ ລເຠຖ ວຣທໍ, ຍາຈໂຍຄໍ [ຍາຈໂຍຄິໍ (ກ.)] ອມຈ຺ຉຣິໍ;

ປູຊິຕໍ ປຏິຣາຊູຫິ, ກິຕ຺ຕິມນ຺ຕໍ ຍສສ຺ສິນໍ.

໑໖໖໒. ‘‘ຄພ຺ຠໍ ເມ ຘາຣຍນ຺ຕິຍາ, ມຊ຺ຌິມງ຺ຄໍ ອນຸນ຺ນຕໍ;

ກຸຈ຺ຉິ ອນຸນ຺ນໂຕ ອສ຺ສ, ຈາປໍວ ລິຂິຕໍ ສມໍ.

໑໖໖໓. ‘‘ຖນາ ເມ ນປ຺ປປເຕຍ຺ຍຸໍ, ປລິຕາ ນ ສນ຺ຕຸ ວາສວ;

ກາເຍ ຣໂຊ ນ ລິມ຺ເປຖ, ວຊ຺ຌຎ຺ຈາປິ ປໂມຈເຍ.

໑໖໖໔. ‘‘ມຍູຣໂກຎ຺ຈາຠິຣຸເທ, ນາຣິວຣຄຓາຍຸເຕ;

ຂຸຊ຺ຊເຈລາປກາກິຓ຺ເຓ, ສູທມາຄຘວຓ຺ຓິເຕ.

໑໖໖໕. ‘‘ຈິຕ຺ຣຄ຺ຄເຬຣຸຆຸສິເຕ, ສຸຣາມໍສປໂພຘເນ;

ສິວິຣາຊສ຺ສ ຠທ຺ທນ຺ເຕ, ຕຕ຺ຖສ຺ສໍ ມເຫສີ ປິຍາ’’.

໑໖໖໖. ‘‘ເຍ ເຕ ທສ ວຣາ ທິນ຺ນາ, ມຍາ ສພ຺ພງ຺ຄໂສຠເນ;

ສິວິຣາຊສ຺ສ ວິຊິເຕ, ສພ຺ເພ ເຕ ລຈ຺ຉສີ ວເຣ.

໑໖໖໗. ‘‘ອິທໍ ວຕ຺ວານ ມຆວາ, ເທວຣາຊາ ສຸຊມ຺ປຕິ;

ຜຸສ຺ສຕິຍາ ວຣໍ ທຕ຺ວາ, ອນຸໂມທິຕ຺ຖ ວາສໂວ.

ທສວຣກຖາ ນາມ.

ເຫມວນ຺ຕໍ

໑໖໖໘. ‘‘ປຣູຬ຺ຫກຈ຺ຉນຂໂລມາ, ປງ຺ກທນ຺ຕາ ຣຊສ຺ສິຣາ;

ປຄ຺ຄຍ຺ຫ ທກ຺ຂິຓໍ ພາຫຸໍ, ກິໍ ມໍ ຍາຈນ຺ຕິ ພ຺ຣາຫ຺ມຓາ’’.

໑໖໖໙. ‘‘ຣຕນໍ ເທວ ຍາຈາມ, ສິວີນໍ ຣຏ຺ຐວຑ຺ຒນໍ;

ທທາຫິ ປວຣໍ ນາຄໍ, ອີສາທນ຺ຕໍ ອຸຣູຬ຺ຫວໍ’’.

໑໖໗໐. ‘‘ທທາມິ ນ ວິກມ຺ປາມິ, ຍໍ ມໍ ຍາຈນ຺ຕິ ພ຺ຣາຫ຺ມຓາ;

ປຠິນ຺ນໍ ກຸຎ຺ຊຣໍ ທນ຺ຕິໍ, ໂອປວຍ຺ຫໍ ຄຊຸຕ຺ຕມໍ’’.

໑໖໗໑. ‘‘ຫຕ຺ຖິກ຺ຂນ຺ຘໂຕ ໂອຣຸຍ຺ຫ, ຣາຊາ ຈາຄາຘິມານໂສ;

ພ຺ຣາຫ຺ມຓານໍ ອທາ ທານໍ, ສິວີນໍ ຣຏ຺ຐວຑ຺ຒໂນ’’.

໑໖໗໒. ‘‘ຕທາສິ ຍໍ ຠິໍສນກໍ, ຕທາສິ ໂລມຫໍສນໍ;

ຫຕ຺ຖິນາເຄ ປທິນ຺ນມ຺ຫິ, ເມທນີ ສມ຺ປກມ຺ປຖ.

໑໖໗໓. ‘‘ຕທາສິ ຍໍ ຠິໍສນກໍ, ຕທາສິ ໂລມຫໍສນໍ;

ຫຕ຺ຖິນາເຄ ປທິນ຺ນມ຺ຫິ, ຂຸພ຺ຠິຕ຺ຖ ນຄຣໍ ຕທາ.

໑໖໗໔. ‘‘ສມາກຸລໍ ປຸຣໍ ອາສິ, ໂຆໂສ ຈ ວິປຸໂລ ມຫາ;

ຫຕ຺ຖິນາເຄ ປທິນ຺ນມ຺ຫິ, ສິວີນໍ ຣຏ຺ຐວຑ຺ຒເນ’’.

໑໖໗໕. ‘‘ອຸຄ຺ຄາ ຈ ຣາຊປຸຕ຺ຕາ ຈ, ເວສິຍານາ ຈ ພ຺ຣາຫ຺ມຓາ;

ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ.

໑໖໗໖. ‘‘ເກວໂລ ຈາປິ ນິຄໂມ, ສິວໂຍ ຈ ສມາຄຕາ;

ທິສ຺ວາ ນາຄໍ ນີຍມານໍ, ເຕ ຣຎ຺ໂຎ ປຏິເວທຍຸໍ.

໑໖໗໗. ‘‘ວິຘມໍ ເທວ ເຕ ຣຏ຺ຐໍ, ປຸຕ຺ໂຕ ເວສ຺ສນ຺ຕໂຣ ຕວ;

ກຖໍ ໂນ ຫຕ຺ຖິນໍ ທຊ຺ຊາ, ນາຄໍ ຣຏ຺ຐສ຺ສ ປູຊິຕໍ.

໑໖໗໘. ‘‘ກຖໍ ໂນ ກຸຎ຺ຊຣໍ ທຊ຺ຊາ, ອີສາທນ຺ຕໍ ອຸຣູຬ຺ຫວໍ;

ເຂຕ຺ຕຎ຺ຎຸໍ ສພ຺ພຍຸທ຺ຘານໍ, ສພ຺ພເສຕໍ ຄຊຸຕ຺ຕມໍ.

໑໖໗໙. ‘‘ປຓ຺ຑຸກມ຺ພລສຎ຺ຉນ຺ນໍ, ປຠິນ຺ນໍ ສຕ຺ຕຸມທ຺ທນໍ;

ທນ຺ຕິໍ ສວາຬພີຊນິໍ, ເສຕໍ ເກລາສສາທິສໍ.

໑໖໘໐. ‘‘ສເສຕຈ຺ຉຕ຺ຕໍ ສອຸປາເຘຍ຺ຍໍ, ສາຖພ຺ພນໍ ສຫຕ຺ຖິປໍ;

ອຄ຺ຄຍານໍ ຣາຊວາຫິໍ, ພ຺ຣາຫ຺ມຓານໍ ອທາ ຄຊໍ [ຘນໍ (ສີ. ປີ.), ທານໍ (ສ຺ຍາ.)].

໑໖໘໑. ‘‘ອນ຺ນໍ ປານຎ຺ຈ ໂຍ [ໂສ (ສີ. ສ຺ຍາ. ກ.)] ທຊ຺ຊາ, ວຕ຺ຖເສນາສນານິ ຈ;

ເອຕໍ ໂຂ ທານໍ ປຕິຣູປໍ, ເອຕໍ ໂຂ ພ຺ຣາຫ຺ມຓາຣຫໍ.

໑໖໘໒. ‘‘ອຍໍ ເຕ ວໍສຣາຊາ ໂນ, ສິວີນໍ ຣຏ຺ຐວຑ຺ຒໂນ [ຣຏ຺ຐວຑ຺ຒນໍ (ສີ.), ຣຏ຺ຐວຑ຺ຒນ (ປີ.)];

ກຖໍ ເວສ຺ສນ຺ຕໂຣ ປຸຕ຺ໂຕ, ຄຊໍ ຠາເຊຕິ ສຎ຺ຊຍ.

໑໖໘໓. ‘‘ສເຈ ຕ຺ວໍ ນ ກຣິສ຺ສສິ, ສິວີນໍ ວຈນໍ ອິທໍ;

ມຎ຺ເຎ ຕໍ ສຫ ປຸຕ຺ເຕນ, ສິວີ ຫຕ຺ເຖ ກຣິສ຺ສເຣ’’.

໑໖໘໔. ‘‘ກາມໍ ຊນປໂທ ມາສິ, ຣຏ຺ຐຎ຺ຈາປິ ວິນສ຺ສຕຸ;

ນາຫໍ ສິວີນໍ ວຈນາ, ຣາຊປຸຕ຺ຕໍ ອທູສກໍ;

ປພ຺ພາເຊຍ຺ຍໍ ສກາ ຣຏ຺ຐາ, ປຸຕ຺ໂຕ ຫິ ມມ ໂອຣໂສ.

໑໖໘໕. ‘‘ກາມໍ ຊນປໂທ ມາສິ, ຣຏ຺ຐຎ຺ຈາປິ ວິນສ຺ສຕຸ;

ນາຫໍ ສິວີນໍ ວຈນາ, ຣາຊປຸຕ຺ຕໍ ອທູສກໍ;

ປພ຺ພາເຊຍ຺ຍໍ ສກາ ຣຏ຺ຐາ, ປຸຕ຺ໂຕ ຫິ ມມ ອຕ຺ຣໂຊ.

໑໖໘໖. ‘‘ນ ຈາຫໍ ຕສ຺ມິໍ ທຸພ຺ເຠຍ຺ຍໍ, ອຣິຍສີລວໂຕ ຫິ ໂສ;

ອສິໂລໂກປິ ເມ ອສ຺ສ, ປາປຎ຺ຈ ປສເວ ພຫຸໍ;

ກຖໍ ເວສ຺ສນ຺ຕຣໍ ປຸຕ຺ຕໍ, ສຕ຺ເຖນ ຆາຕຍາມເສ’’.

໑໖໘໗. ‘‘ມາ ນໍ ທຓ຺ເຑນ ສຕ຺ເຖນ, ນ ຫິ ໂສ ພນ຺ຘນາຣໂຫ;

ປພ຺ພາເຊຫິ ຈ ນໍ ຣຏ຺ຐາ, ວງ຺ເກ ວສຕຸ ປພ຺ພເຕ’’.

໑໖໘໘. ‘‘ເອໂສ ເຈ ສິວີນໍ ຉນ຺ໂທ, ຉນ຺ທໍ ນ ປນຸທາມເສ;

ອິມໍ ໂສ ວສຕຸ ຣຕ຺ຕິໍ, ກາເມ ຈ ປຣິຠຸຎ຺ຊຕຸ.

໑໖໘໙. ‘‘ຕໂຕ ຣຕ຺ຍາ ວິວສາເນ, ສູຣິຍສ຺ສຸຄ຺ຄມນໍ ປຕິ [ສູຣິຍຸຄ຺ຄມເນ ສຕິ (ກ.)];

ສມຄ຺ຄາ ສິວໂຍ ຫຸຕ຺ວາ, ຣຏ຺ຐາ ປພ຺ພາຊຍນ຺ຕຸ ນໍ’’.

໑໖໙໐. ‘‘ອຸຏ຺ເຐຫິ ກຕ຺ເຕ ຕຣມາໂນ, ຄນ຺ຕ຺ວາ ເວສ຺ສນ຺ຕຣໍ ວທ;

ສິວໂຍ ເທວ ເຕ ກຸທ຺ຘາ, ເນຄມາ ຈ ສມາຄຕາ.

໑໖໙໑. ‘‘ອຸຄ຺ຄາ ຈ ຣາຊປຸຕ຺ຕາ ຈ, ເວສິຍານາ ຈ ພ຺ຣາຫ຺ມຓາ;

ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ເກວໂລ ຈາປິ ນິຄໂມ, ສິວໂຍ ຈ ສມາຄຕາ.

໑໖໙໒. ‘‘ອສ຺ມາ ຣຕ຺ຍາ ວິວສາເນ, ສູຣິຍສ຺ສຸຄ຺ຄມນໍ ປຕິ;

ສມຄ຺ຄາ ສິວໂຍ ຫຸຕ຺ວາ, ຣຏ຺ຐາ ປພ຺ພາຊຍນ຺ຕິ ຕໍ.

໑໖໙໓. ‘‘ສ ກຕ຺ຕາ ຕຣມາໂນວ, ສິວິຣາເຊນ ເປສິໂຕ;

ອາມຸຕ຺ຕຫຕ຺ຖາຠຣຓາ, ສຸວຕ຺ໂຖ ຈນ຺ທນຠູສິໂຕ.

໑໖໙໔. ‘‘ສີສໍ ນ຺ຫາໂຕ ອຸທເກ ໂສ, ອາມຸຕ຺ຕມຓິກຸຓ຺ຑໂລ;

ອຸປາຄມິ ປຸຣໍ ຣມ຺ມໍ, ເວສ຺ສນ຺ຕຣນິເວສນໍ.

໑໖໙໕. ‘‘ຕຕ຺ຖທ຺ທສ ກຸມາຣໍ ໂສ, ຣມມານໍ ສເກ ປຸເຣ;

ປຣິກິຓ຺ຓໍ ອມຈ຺ເຈຫິ, ຕິທສານໍວ ວາສວໍ.

໑໖໙໖. ‘‘ໂສ ຕຕ຺ຖ ຄນ຺ຕ຺ວາ ຕຣມາໂນ, ກຕ຺ຕາ ເວສ຺ສນ຺ຕຣໍພ຺ຣວິ;

ທຸກ຺ຂໍ ເຕ ເວທຍິສ຺ສາມິ, ມາ ເມ ກຸຊ຺ຌິ ຣເຖສຠ.

໑໖໙໗. ‘‘ວນ຺ທິຕ຺ວາ ໂຣທມາໂນ ໂສ, ກຕ຺ຕາ ຣາຊານມພ຺ຣວິ;

ຠຕ຺ຕາ ເມສິ ມຫາຣາຊ, ສພ຺ພກາມຣສາຫໂຣ.

໑໖໙໘. ‘‘ທຸກ຺ຂໍ ເຕ ເວທຍິສ຺ສາມິ, ຕຕ຺ຖ ອສ຺ສາສຍນ຺ຕຸ ມໍ;

ສິວໂຍ ເທວ ເຕ ກຸທ຺ຘາ, ເນຄມາ ຈ ສມາຄຕາ.

໑໖໙໙. ‘‘ອຸຄ຺ຄາ ຈ ຣາຊປຸຕ຺ຕາ ຈ, ເວສິຍານາ ຈ ພ຺ຣາຫ຺ມຓາ;

ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ເກວໂລ ຈາປິ ນິຄໂມ, ສິວໂຍ ຈ ສມາຄຕາ.

໑໗໐໐. ‘‘ອສ຺ມາ ຣຕ຺ຍາ ວິວສາເນ, ສູຣິຍສ຺ສຸຄ຺ຄມນໍ ປຕິ;

ສມຄ຺ຄາ ສິວໂຍ ຫຸຕ຺ວາ, ຣຏ຺ຐາ ປພ຺ພາຊຍນ຺ຕິ ຕໍ’’.

໑໗໐໑. ‘‘ກິສ຺ມິໍ ເມ ສິວໂຍ ກຸທ຺ຘາ, ນາຫໍ ປສ຺ສາມິ ທຸກ຺ກຏໍ;

ຕໍ ເມ ກຕ຺ເຕ ວິຍາຈິກ຺ຂ, ກສ຺ມາ ປພ຺ພາຊຍນ຺ຕິ ມໍ’’.

໑໗໐໒. ‘‘ອຸຄ຺ຄາ ຈ ຣາຊປຸຕ຺ຕາ ຈ, ເວສິຍານາ ຈ ພ຺ຣາຫ຺ມຓາ;

ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ນາຄທາເນນ ຂິຍ຺ຍນ຺ຕິ, ຕສ຺ມາ ປພ຺ພາຊຍນ຺ຕິ ຕໍ’’.

໑໗໐໓. ‘‘ຫທຍໍ ຈກ຺ຂຸມ຺ປຫໍ ທຊ຺ຊໍ, ກິໍ ເມ ພາຫິຣກໍ ຘນໍ;

ຫິຣຎ຺ຎໍ ວາ ສຸວຓ຺ຓໍ ວາ, ມຸຕ຺ຕາ ເວຬຸຣິຍາ ມຓິ.

໑໗໐໔. ‘‘ທກ຺ຂິຓໍ ວາປຫໍ ພາຫຸໍ, ທິສ຺ວາ ຍາຈກມາຄເຕ;

ທເທຍ຺ຍໍ ນ ວິກມ຺ເປຍ຺ຍໍ, ທາເນ ເມ ຣມເຕ ມໂນ.

໑໗໐໕. ‘‘ກາມໍ ມໍ ສິວໂຍ ສພ຺ເພ, ປພ຺ພາເຊນ຺ຕຸ ຫນນ຺ຕຸ ວາ;

ເນວ ທານາ ວິຣມິສ຺ສໍ, ກາມໍ ຉິນ຺ທນ຺ຕຸ ສຕ຺ຕຘາ’’.

໑໗໐໖. ‘‘ເອວໍ ຕໍ ສິວໂຍ ອາຫຸ, ເນຄມາ ຈ ສມາຄຕາ;

ໂກນ຺ຕິມາຣາຍ ຕີເຣນ, ຄິຣິມາຣຎ຺ຊຣໍ ປຕິ;

ເຍນ ປພ຺ພາຊິຕາ ຍນ຺ຕິ, ເຕນ ຄຈ຺ຉຕຸ ສຸພ຺ພໂຕ’’.

໑໗໐໗. ‘‘ໂສຫໍ ເຕນ ຄມິສ຺ສາມິ, ເຍນ ຄຈ຺ຉນ຺ຕິ ທູສກາ;

ຣຕ຺ຕິນ຺ທິວໍ ເມ ຂມຖ, ຍາວ ທານໍ ທທາມຫໍ’’.

໑໗໐໘. ‘‘ອາມນ຺ຕຍິຕ຺ຖ ຣາຊານໍ, ມທ຺ທິໍ ສພ຺ພງ຺ຄໂສຠນໍ;

ຍໍ ເຕ ກິຎ຺ຈິ ມຍາ ທິນ຺ນໍ, ຘນໍ ຘຎ຺ຎຎ຺ຈ ວິຊ຺ຊຕິ.

໑໗໐໙. ‘‘ຫິຣຎ຺ຎໍ ວາ ສຸວຓ຺ຓໍ ວາ, ມຸຕ຺ຕາ ເວຬຸຣິຍາ ພຫູ;

ສພ຺ພໍ ຕໍ ນິທເຫຍ຺ຍາສິ, ຍຎ຺ຈ ເຕ ເປຕ຺ຕິກໍ ຘນໍ.

໑໗໑໐. ‘‘ຕມພ຺ຣວິ ຣາຊປຸຕ຺ຕີ, ມທ຺ທີ ສພ຺ພງ຺ຄໂສຠນາ;

ກຸຫິໍ ເທວ ນິທຫາມິ, ຕໍ ເມ ອກ຺ຂາຫິ ປຸຈ຺ຉິໂຕ’’.

໑໗໑໑. ‘‘ສີລວນ຺ເຕສຸ ທຊ຺ຊາສິ, ທານໍ ມທ຺ທິ ຍຖາຣຫໍ;

ນ ຫິ ທານາ ປຣໍ ອຕ຺ຖິ, ປຕິຏ຺ຐາ ສພ຺ພປາຓິນໍ.

໑໗໑໒. ‘‘ປຸຕ຺ເຕສຸ ມທ຺ທິ ທເຍສິ, ສສ຺ສຸຍາ ສສຸຣມ຺ຫິ ຈ;

ໂຍ ຈ ຕໍ ຠຕ຺ຕາ ມຎ຺ເຎຍ຺ຍ, ສກ຺ກຈ຺ຈໍ ຕໍ ອຸປຏ຺ຐເຫ.

໑໗໑໓. ‘‘ໂນ ເຈ ຕໍ ຠຕ຺ຕາ ມຎ຺ເຎຍ຺ຍ, ມຍາ ວິປ຺ປວເສນ ເຕ;

ອຎ຺ຎໍ ຠຕ຺ຕາຣໍ ປຣິເຍສ, ມາ ກິສິຕ຺ໂຖ [ມາ ກິລິຕ຺ຖ (ສີ. ປີ.)] ມຍາ ວິນາ’’.

໑໗໑໔. ‘‘ອຫຎ຺ຫິ ວນໍ ຄຈ຺ຉາມິ, ໂຆຣໍ ວາຬມິຄາຍຸຕໍ;

ສໍສໂຍ ຊີວິຕໍ ມຍ຺ຫໍ, ເອກກສ຺ສ ພ຺ຣຫາວເນ’’.

໑໗໑໕. ‘‘ຕມພ຺ຣວິ ຣາຊປຸຕ຺ຕີ, ມທ຺ທີ ສພ຺ພງ຺ຄໂສຠນາ;

‘‘ອຠຸມ຺ເມ ກຖໍ ນຸ ຠຓສິ, ປາປກໍ ວຕ ຠາສສິ.

໑໗໑໖. ‘‘ເນສ ຘມ຺ໂມ ມຫາຣາຊ, ຍໍ ຕ຺ວໍ ຄຈ຺ເຉຍ຺ຍ ເອກໂກ;

ອຫມ຺ປິ ເຕນ ຄຈ຺ຉາມິ, ເຍນ ຄຈ຺ຉສິ ຂຕ຺ຕິຍ.

໑໗໑໗. ‘‘ມຣຓໍ ວາ ຕຍາ ສທ຺ຘິໍ, ຊີວິຕໍ ວາ ຕຍາ ວິນາ;

ຕເທວ ມຣຓໍ ເສຍ຺ໂຍ, ຍໍ ເຈ ຊີເວ ຕຍາ ວິນາ.

໑໗໑໘. ‘‘ອຄ຺ຄິໍ ອຸຊ຺ຊາລຍິຕ຺ວານ [ນິຊ຺ຊາລຍິຕ຺ວານ (ສີ. ປີ.)], ເອກຊາລສມາຫິຕໍ;

ຕຕ຺ຖ ເມ [ຕຕ຺ເຖວ (ສ຺ຍາ. ກ.)] ມຣຓໍ ເສຍ຺ໂຍ, ຍໍ ເຈ ຊີເວ ຕຍາ ວິນາ.

໑໗໑໙. ‘‘ຍຖາ ອາຣຎ຺ຎກໍ ນາຄໍ, ທນ຺ຕິໍ ອນ຺ເວຕິ ຫຕ຺ຖິນີ;

ເຊສ຺ສນ຺ຕໍ ຄິຣິທຸຄ຺ເຄສຸ, ສເມສຸ ວິສເມສຸ ຈ.

໑໗໒໐. ‘‘ເອວໍ ຕໍ ອນຸຄຈ຺ຉາມິ, ປຸຕ຺ເຕ ອາທາຍ ປຈ຺ຉໂຕ;

ສຸຠຣາ ເຕ ຠວິສ຺ສາມິ, ນ ເຕ ເຫສ຺ສາມິ ທຸພ຺ຠຣາ.

໑໗໒໑. ‘‘ອິເມ ກຸມາເຣ ປສ຺ສນ຺ໂຕ, ມຎ຺ຊຸເກ ປິຍຠາຓິເນ;

ອາສີເນ [ອາສເນ (ກ.)] ວນຄຸມ຺ພສ຺ມິໍ, ນ ຣຊ຺ຊສ຺ສ ສຣິສ຺ສສິ.

໑໗໒໒. ‘‘ອິເມ ກຸມາເຣ ປສ຺ສນ຺ໂຕ, ມຎ຺ຊຸເກ ປິຍຠາຓິເນ;

ກີຬນ຺ເຕ ວນຄຸມ຺ພສ຺ມິໍ, ນ ຣຊ຺ຊສ຺ສ ສຣິສ຺ສສິ.

໑໗໒໓. ‘‘ອິເມ ກຸມາເຣ ປສ຺ສນ຺ໂຕ, ມຎ຺ຊຸເກ ປິຍຠາຓິເນ;

ອສ຺ສເມ ຣມຓີຍມ຺ຫິ, ນ ຣຊ຺ຊສ຺ສ ສຣິສ຺ສສິ.

໑໗໒໔. ‘‘ອິເມ ກຸມາເຣ ປສ຺ສນ຺ໂຕ, ມຎ຺ຊຸເກ ປິຍຠາຓິເນ;