໕໔໕. ມຫານາຣທກສ຺ສປຊາຕກໍ (໘)

໑໑໕໓. ‘‘ອຫຸ ຣາຊາ ວິເທຫານໍ, ອງ຺ຄຕິ [ອງ຺ຄາຕິ (ສີ.) ເອວມຸປຣິປິ] ນາມ ຂຕ຺ຕິໂຍ;

ປຫູຕໂຍຄ຺ໂຄ ຘນິມາ, ອນນ຺ຕພລໂປຣິໂສ.

໑໑໕໔. ໂສ ຈ ປນ຺ນຣສິໍ [ປນ຺ນຣເສ (ສ຺ຍາ. ກ.)] ຣຕ຺ຕິໍ, ປຸຣິມຍາເມ ອນາຄເຕ;

ຈາຕຸມາສາ [ຈາຕຸມສ຺ສ (ສີ. ປີ.)] ໂກມຸທິຍາ, ອມຈ຺ເຈ ສນ຺ນິປາຕຍິ.

໑໑໕໕. ‘‘ປຓ຺ຑິເຕ ສຸຕສມ຺ປນ຺ເນ, ມິຕປຸພ຺ເພ [ມິຫິຕປຸພ຺ເພ (ສີ. ປີ.)] ວິຈກ຺ຂເຓ;

ວິຊຍຎ຺ຈ ສຸນາມຎ຺ຈ, ເສນາປຕິໍ ອລາຕກໍ.

໑໑໕໖. ‘‘ຕມນຸປຸຈ຺ຉິ ເວເທໂຫ, ‘‘ປຈ຺ເຈກໍ ພ຺ຣູຖ ສໍ ຣຸຈິໍ;

ຈາຕຸມາສາ ໂກມຸທຊ຺ຊ, ຊຸຓ຺ຫໍ ພ຺ຍປຫຕໍ [ພ຺ຍປຄຕໍ (ສີ. ປີ.)] ຕມໍ;

ກາຍຊ຺ຊ ຣຕິຍາ ຣຕ຺ຕິໍ, ວິຫເຣມຸ ອິມໍ ອຸຕຸໍ’’.

໑໑໕໗. ‘‘ຕໂຕ ເສນາປຕິ ຣຎ຺ໂຎ, ອລາໂຕ ເອຕທພ຺ຣວິ;

‘‘ຫຏ຺ຐໍ ໂຍຄ຺ຄໍ ພລໍ ສພ຺ພໍ, ເສນໍ ສນ຺ນາຫຍາມເສ.

໑໑໕໘. ‘‘ນິຍ຺ຍາມ ເທວ ຍຸທ຺ຘາຍ, ອນນ຺ຕພລໂປຣິສາ;

ເຍ ເຕ ວສໍ ນ ອາຍນ຺ຕິ, ວສໍ ອຸປນຍາມເສ [ອຸປນິຍ຺ຍາມເສ (ກ.)];

ເອສາ ມຍ຺ຫໍ ສກາ ທິຏ຺ຐິ, ອຊິຕໍ ໂອຊິນາມເສ.

໑໑໕໙. ອລາຕສ຺ສ ວໂຈ ສຸຕ຺ວາ, ສຸນາໂມ ເອຕທພ຺ຣວິ;

‘‘ສພ຺ເພ ຕຸຍ຺ຫໍ ມຫາຣາຊ, ອມິຕ຺ຕາ ວສມາຄຕາ.

໑໑໖໐. ‘‘ນິກ຺ຂິຕ຺ຕສຕ຺ຖາ ປຈ຺ຈຕ຺ຖາ, ນິວາຕມນຸວຕ຺ຕເຣ;

ອຸຕ຺ຕໂມ ອຸສ຺ສໂວ ອຊ຺ຊ, ນ ຍຸທ຺ຘໍ ມມ ຣຸຈ຺ຈຕິ.

໑໑໖໑. ‘‘ອນ຺ນປານຎ຺ຈ ຂຊ຺ຊຎ຺ຈ, ຂິປ຺ປໍ ອຠິຫຣນ຺ຕຸ ເຕ;

ຣມສ຺ສຸ ເທວ ກາເມຫິ, ນຈ຺ຈຄີເຕ ສຸວາທິເຕ’’.

໑໑໖໒. ສຸນາມສ຺ສ ວໂຈ ສຸຕ຺ວາ, ວິຊໂຍ ເອຕທພ຺ຣວິ;

‘‘ສພ຺ເພ ກາມາ ມຫາຣາຊ, ນິຈ຺ຈໍ ຕວ ມຸປຏ຺ຐິຕາ.

໑໑໖໓. ‘‘ນ ເຫເຕ ທຸລ຺ລຠາ ເທວ, ຕວ ກາເມຫິ ໂມທິຕຸໍ;

ສທາປິ ກາມາ ສຸລຠາ, ເນຕໍ ຈິຕ຺ຕມຕໍ [ຈິຕ຺ຕໍ ມຕີ (ກ.)] ມມ.

໑໑໖໔. ‘‘ສມຓໍ ພ຺ຣາຫ຺ມຓໍ ວາປິ, ອຸປາເສມຸ ພຫຸສ຺ສຸຕໍ;

ໂຍ ນຊ຺ຊ ວິນເຍ ກງ຺ຂໍ, ອຕ຺ຖຘມ຺ມວິທູ ອິເສ’’.

໑໑໖໕. ວິຊຍສ຺ສ ວໂຈ ສຸຕ຺ວາ, ຣາຊາ ອງ຺ຄຕິ ມພ຺ຣວິ;

‘‘ຍຖາ ວິຊໂຍ ຠຓຕິ, ມຍ຺ຫມ຺ເປຕໍວ ຣຸຈ຺ຈຕິ.

໑໑໖໖. ‘‘ສມຓໍ ພ຺ຣາຫ຺ມຓໍ ວາປິ, ອຸປາເສມຸ ພຫຸສ຺ສຸຕໍ;

ໂຍ ນຊ຺ຊ ວິນເຍ ກງ຺ຂໍ, ອຕ຺ຖຘມ຺ມວິທູ ອິເສ.

໑໑໖໗. ‘‘ສພ຺ເພວ ສນ຺ຕາ ກໂຣຖ ມຕິໍ, ກໍ ອຸປາເສມຸ ປຓ຺ຑິຕໍ;

ໂຍ [ໂກ (ສີ. ປີ.)] ນຊ຺ຊ ວິນເຍ ກງ຺ຂໍ, ອຕ຺ຖຘມ຺ມວິທູ ອິເສ’’.

໑໑໖໘. ‘‘ເວເທຫສ຺ສ ວໂຈ ສຸຕ຺ວາ, ອລາໂຕ ເອຕທພ຺ຣວິ;

‘‘ອຕ຺ຖາຍໍ ມິຄທາຍສ຺ມິໍ, ອເຈໂລ ຘີຣສມ຺ມໂຕ.

໑໑໖໙. ‘‘ຄຸໂຓ ກສ຺ສປໂຄຕ຺ຕາຍໍ, ສຸໂຕ ຈິຕ຺ຣກຖີ ຄຓີ;

ຕໍ ເທວ [ຕເທວ (ກ.)] ປຍິຣຸປາເສມຸ [ປຍິຣຸປາສຍ (ສີ. ປີ.)], ໂສ ໂນ ກງ຺ຂໍ ວິເນສ຺ສຕິ’’.

໑໑໗໐. ‘‘ອລາຕສ຺ສ ວໂຈ ສຸຕ຺ວາ, ຣາຊາ ໂຈເທສິ ສາຣຖິໍ;

‘‘ມິຄທາຍໍ ຄມິສ຺ສາມ, ຍຸຕ຺ຕໍ ຍານໍ ອິຘານຍ’’.

໑໑໗໑. ຕສ຺ສ ຍານໍ ອໂຍເຊສຸໍ, ທນ຺ຕໍ ຣູປິຍປກ຺ຂຣໍ [ຣູປິຍຸປກ຺ຂຣໍ (ກ.)];

ສຸກ຺ກມຏ຺ຐປຣິວາຣໍ, ປຓ຺ຑຣໍ ໂທສິນາມຸຂໍ.

໑໑໗໒. ‘‘ຕຕ຺ຣາສຸໍ ກຸມຸທາຍຸຕ຺ຕາ, ຈຕ຺ຕາໂຣ ສິນ຺ຘວາ ຫຍາ;

ອນິລູປມສມຸປ຺ປາຕາ [ອນິລູປມສມຸປ຺ປາທາ (ກ.)], ສຸທນ຺ຕາ ໂສຓ຺ຓມາລິໂນ.

໑໑໗໓. ‘‘ເສຕຈ຺ຉຕ຺ຕໍ ເສຕຣໂຖ, ເສຕສ຺ສາ ເສຕພີຊນີ;

ເວເທໂຫ ສຫມຈ຺ເຈຫິ, ນິຍ຺ຍໍ ຈນ຺ໂທວ ໂສຠຕິ.

໑໑໗໔. ‘‘ຕມນຸຍາຍິໍສຸ ພຫໂວ, ອິນ຺ທິຂຄ຺ຄຘຣາ [ອິນ຺ທຂຄ຺ຄຘຣາ (ສີ.), ອິຏ຺ຐິຂຄ຺ຄຘຣາ (ປີ.)] ພລີ;

ອສ຺ສປິຏ຺ຐິຄຕາ ວີຣາ, ນຣາ ນຣວຣາຘິປໍ.

໑໑໗໕. ໂສ ມຸຫຸຕ຺ຕໍວ ຍາຍິຕ຺ວາ, ຍານາ ໂອຣຸຍ຺ຫ ຂຕ຺ຕິໂຍ;

ເວເທໂຫ ສຫມຈ຺ເຈຫິ, ປຕ຺ຕີ ຄຸຓມຸປາຄມິ.

໑໑໗໖. ເຍປິ ຕຕ຺ຖ ຕທາ ອາສຸໍ, ພ຺ຣາຫ຺ມຓິພ຺ຠາ ສມາຄຕາ;

ນ ເຕ ອປນຍີ ຣາຊາ, ອກຕໍ ຠູມິມາຄເຕ.

໑໑໗໗. ‘‘ຕໂຕ ໂສ ມຸທຸກາ ຠິສິຍາ, ມຸທຸຈິຕ຺ຕກສນ຺ຖເຕ [ມຸທຸຈິຕ຺ຕກຬນ຺ທເກ (ສີ. ປີ.)];

ມຸທຸປຈ຺ຈຕ຺ຖເຕ ຣາຊາ, ເອກມນ຺ຕໍ ອຸປາວິສິ.

໑໑໗໘. ‘‘ນິສຊ຺ຊ ຣາຊາ ສມ຺ໂມທິ, ກຖໍ ສາຣຓິຍໍ ຕໂຕ;

‘‘ກຈ຺ຈິ ຍາປນິຍໍ ຠນ຺ເຕ, ວາຕານມວິຍຄ຺ຄຕາ [ວາຕານມວິສຄ຺ຄຕາ (ສີ. ປີ.), ວາຕານມວິຍຕ຺ຕຕາ (ສ຺ຍາ.)].

໑໑໗໙. ‘‘ກຈ຺ຈິ ອກສິຣາ ວຸຕ຺ຕິ, ລຠສິ [ລພ຺ຠຕິ (ສີ. ປີ.)] ປິຓ຺ຑຍາປນໍ [ປິຓ຺ຑິຍາປນໍ (ສ຺ຍາ. ກ.)];

ອປາພາໂຘ ຈສິ ກຈ຺ຈິ, ຈກ຺ຂຸໍ ນ ປຣິຫາຍຕິ’’.

໑໑໘໐. ຕໍ ຄຸໂຓ ປຏິສມ຺ໂມທິ, ເວເທຫໍ ວິນເຍ ຣຕໍ;

‘‘ຍາປນີຍໍ ມຫາຣາຊ, ສພ຺ພເມຕໍ ຕທູຠຍໍ.

໑໑໘໑. ‘‘ກຈ຺ຈິ ຕຸຍ຺ຫມ຺ປິ ເວເທຫ, ປຈ຺ຈນ຺ຕາ ນ ພລີຍເຣ;

ກຈ຺ຈິ ອໂຣຄໍ ໂຍຄ຺ຄໍ ເຕ, ກຈ຺ຈິ ວຫຕິ ວາຫນໍ;

ກຈ຺ຈິ ເຕ ພ຺ຍາຘໂຍ ນຕ຺ຖິ, ສຣີຣສ຺ສຸປຕາປິຍາ’’ [ສຣີຣສ຺ສຸປຕາປິກາ (ສີ. ປີ.), ສຣີຣສ຺ສຸປຕາປນາ (?)].

໑໑໘໒. ປຏິສມ຺ໂມທິໂຕ ຣາຊາ, ຕໂຕ ປຸຈ຺ຉິ ອນນ຺ຕຣາ;

ອຕ຺ຖໍ ຘມ຺ມຎ຺ຈ ຎາຍຎ຺ຈ, ຘມ຺ມກາໂມ ຣເຖສໂຠ.

໑໑໘໓. ‘‘ກຖໍ ຘມ຺ມໍ ຈເຣ ມຈ຺ໂຈ, ມາຕາປິຕູສຸ ກສ຺ສປ;

ກຖໍ ຈເຣ ອາຈຣິເຍ, ປຸຕ຺ຕທາເຣ ກຖໍ ຈເຣ.

໑໑໘໔. ‘‘ກຖໍ ຈເຣຍ຺ຍ ວຸຑ຺ເຒສຸ, ກຖໍ ສມຓພ຺ຣາຫ຺ມເຓ;

ກຖຎ຺ຈ ພລກາຍສ຺ມິໍ, ກຖໍ ຊນປເທ ຈເຣ.

໑໑໘໕. ‘‘ກຖໍ ຘມ຺ມໍ ຈຣິຕ຺ວານ, ມຈ຺ຈາ ຄຈ຺ຉນ຺ຕິ [ເປຈ຺ຈ ຄຈ຺ຉຕິ (ສີ. ສ຺ຍາ. ປີ.)] ສຸຄ຺ຄຕິໍ;

ກຖຎ຺ເຈເກ ອຘມ຺ມຏ຺ຐາ, ປຕນ຺ຕິ ນິຣຍໍ ອໂຖ’’.

໑໑໘໖. ‘‘ເວເທຫສ຺ສ ວໂຈ ສຸຕ຺ວາ, ກສ຺ສໂປ ເອຕທພ຺ຣວິ;

‘‘‘ສຸໂຓຫິ ເມ ມຫາຣາຊ, ສຈ຺ຈໍ ອວິຕຖໍ ປທໍ.

໑໑໘໗. ‘‘‘ນຕ຺ຖິ ຘມ຺ມຈຣິຕສ຺ສ [ຘມ຺ມສ຺ສ ຈິຓ຺ຓສ຺ສ (ສີ.)], ຜລໍ ກລ຺ຍາຓປາປກໍ;

ນຕ຺ຖິ ເທວ ປໂຣ ໂລໂກ, ໂກ ຕໂຕ ຫິ ອິຘາຄໂຕ.

໑໑໘໘. ‘‘‘ນຕ຺ຖິ ເທວ ປິຕໂຣ ວາ, ກຸໂຕ ມາຕາ ກຸໂຕ ປິຕາ;

ນຕ຺ຖິ ອາຈຣິໂຍ ນາມ, ອທນ຺ຕໍ ໂກ ທເມສ຺ສຕິ.

໑໑໘໙. ‘‘‘ສມຕຸລ຺ຍານິ ຠູຕານິ, ນຕ຺ຖິ ເຊຏ຺ຐາປຈາຍິກາ;

ນຕ຺ຖິ ພລໍ ວີຣິຍໍ ວາ, ກຸໂຕ ອຸຏ຺ຐານໂປຣິສໍ;

ນິຍຕານິ ຫິ ຠູຕານິ, ຍຖາ ໂຄຏວິໂສ ຕຖາ.

໑໑໙໐. ‘‘‘ລທ຺ເຘຍ຺ຍໍ ລຠເຕ ມຈ຺ໂຈ, ຕຕ຺ຖ ທານຜລໍ ກຸໂຕ;

ນຕ຺ຖິ ທານຜລໍ ເທວ, ອວໂສ ເທວວີຣິໂຍ.

໑໑໙໑. ‘‘‘ພາເລຫິ ທານໍ ປຎ຺ຎຕ຺ຕໍ, ປຓ຺ຑິເຕຫິ ປຏິຈ຺ຉິຕໍ;

ອວສາ ເທນ຺ຕິ ຘີຣານໍ, ພາລາ ປຓ຺ຑິຕມານິໂນ.

໑໑໙໒. ‘‘‘ສຕ຺ຕິເມ ສສ຺ສຕາ ກາຍາ, ອຈ຺ເຉຊ຺ຊາ ອວິໂກປິໂນ;

ເຕໂຊ ປຖວີ ອາໂປ ຈ, ວາໂຍ ສຸຂໍ ທຸຂຎ຺ຈິເມ;

ຊີເວ ຈ ສຕ຺ຕິເມ ກາຍາ, ເຍສໍ ເຉຕ຺ຕາ ນ ວິຊ຺ຊຕິ.

໑໑໙໓. ‘‘‘ນຕ຺ຖິ ຫນ຺ຕາ ວ ເຉຕ຺ຕາ ວາ, ຫຎ຺ເຎ ເຍວາປິ [ຫຎ຺ຎເຣ ວາປິ (ສີ. ສ຺ຍາ. ປີ.)] ໂກຈິ ນໍ;

ອນ຺ຕເຣເນວ ກາຍານໍ, ສຕ຺ຖານິ ວີຕິວຕ຺ຕເຣ.

໑໑໙໔. ‘‘‘ໂຍ ຈາປິ [ໂຍປາຍໍ (ສີ. ປີ.), ໂຍ ຈາຍໍ (ສ຺ຍາ. ກ.)] ສິຣມາທາຍ, ປເຣສໍ ນິສິຕາສິນາ;

ນ ໂສ ຉິນ຺ທຕິ ເຕ ກາເຍ, ຕຕ຺ຖ ປາປຜລໍ ກຸໂຕ.

໑໑໙໕. ‘‘‘ຈຸລ຺ລາສີຕິມຫາກປ຺ເປ, ສພ຺ເພ ສຸຊ຺ຌນ຺ຕິ ສໍສຣໍ;

ອນາຄເຕ ຕມ຺ຫິ ກາເລ, ສຎ຺ຎໂຕປິ ນ ສຸຊ຺ຌຕິ.

໑໑໙໖. ‘‘‘ຈຣິຕ຺ວາປິ ພຫຸໍ ຠທ຺ຣໍ, ເນວ ສຸຊ຺ຌນ຺ຕິນາຄເຕ;

ປາປຎ຺ເຈປິ ພຫຸໍ ກຕ຺ວາ, ຕໍ ຂຓໍ ນາຕິວຕ຺ຕເຣ.

໑໑໙໗. ‘‘‘ອນຸປຸພ຺ເພນ ໂນ ສຸທ຺ຘິ, ກປ຺ປານໍ ຈຸລ຺ລສີຕິຍາ;

ນິຍຕິໍ ນາຕິວຕ຺ຕາມ, ເວລນ຺ຕມິວ ສາຄໂຣ’’’.

໑໑໙໘. ກສ຺ສປສ຺ສ ວໂຈ ສຸຕ຺ວາ, ອລາໂຕ ເອຕທພ຺ຣວິ;

‘‘ຍຖາ ຠທນ຺ໂຕ ຠຓຕິ, ມຍ຺ຫມ຺ເປຕໍວ ຣຸຈ຺ຈຕິ.

໑໑໙໙. ‘‘ອຫມ຺ປິ ປຸຣິມໍ ຊາຕິໍ, ສເຣ ສໍສຣິຕຕ຺ຕໂນ;

ປິງ຺ຄໂລ ນາມຫໍ ອາສິໍ, ລຸທ຺ໂທ ໂຄຆາຕໂກ ປຸເຣ.

໑໒໐໐. ‘‘ພາຣາຓສິຍໍ ຜີຕາຍໍ, ພຫຸໍ ປາປໍ ກຕໍ ມຍາ;

ພຫູ ມຍາ ຫຕາ ປາຓາ, ມຫິໍສາ ສູກຣາ ອຊາ.

໑໒໐໑. ‘‘ຕໂຕ ຈຸໂຕ ອິຘ ຊາໂຕ, ອິທ຺ເຘ ເສນາປຕີກຸເລ;

ນຕ຺ຖິ ນູນ ຜລໍ ປາປໍ, ໂຍຫໍ [ປາເປ ໂສຫໍ (ສີ. ປີ.)] ນ ນິຣຍໍ ຄໂຕ.

໑໒໐໒. ອເຖຕ຺ຖ ພີຊໂກ ນາມ, ທາໂສ ອາສິ ປຏຈ຺ຈຣີ [ປຬຈ຺ຈຣີ (ສີ. ປີ.), ປຏຊ຺ຊຣີ (ກ.)];

ອຸໂປສຖໍ ອຸປວສນ຺ໂຕ, ຄຸຓສນ຺ຕິກຸປາຄມິ.

໑໒໐໓. ກສ຺ສປສ຺ສ ວໂຈ ສຸຕ຺ວາ, ອລາຕສ຺ສ ຈ ຠາສິຕໍ;

ປສ຺ສສນ຺ໂຕ ມຸຫຸໍ ອຸຓ຺ຫໍ, ຣຸທໍ ອສ຺ສູນິ ວຕ຺ຕຍິ.

໑໒໐໔. ຕມນຸປຸຈ຺ຉິ ເວເທໂຫ, ‘‘ກິມຕ຺ຖໍ ສມ຺ມ ໂຣທສິ;

ກິໍ ເຕ ສຸຕໍ ວາ ທິຏ຺ຐໍ ວາ, ກິໍ ມໍ ເວເທສິ ເວທນໍ’’.

໑໒໐໕. ເວເທຫສ຺ສ ວໂຈ ສຸຕ຺ວາ, ພີຊໂກ ເອຕທພ຺ຣວິ;

‘‘ນຕ຺ຖິ ເມ ເວທນາ ທຸກ຺ຂາ, ມຫາຣາຊ ສຸໂຓຫິ ເມ.

໑໒໐໖. ‘‘ອຫມ຺ປິ ປຸຣິມໍ ຊາຕິໍ, ສຣາມິ ສຸຂມຕ຺ຕໂນ;

ສາເກຕາຫໍ ປຸເຣ ອາສິໍ, ຠາວເສຏ຺ຐິ ຄຸເຓ ຣໂຕ.

໑໒໐໗. ‘‘ສມ຺ມໂຕ ພ຺ຣາຫ຺ມຓິພ຺ຠານໍ, ສໍວິຠາຄຣໂຕ ສຸຈິ;

ນ ຈາປິ ປາປກໍ ກມ຺ມໍ, ສຣາມິ ກຕມຕ຺ຕໂນ.

໑໒໐໘. ‘‘ຕໂຕ ຈຸຕາຫໍ ເວເທຫ, ອິຘ ຊາໂຕ ທຸຣິຕ຺ຖິຍາ;

ຄພ຺ຠມ຺ຫິ ກຸມ຺ຠທາສິຍາ, ຍໂຕ ຊາໂຕ ສຸທຸຄ຺ຄໂຕ.

໑໒໐໙. ‘‘ເອວມ຺ປິ ທຸຄ຺ຄໂຕ ສນ຺ໂຕ, ສມຈຣິຍໍ ອຘິຏ຺ຐິໂຕ;

ອຸປຑ຺ຒຠາຄໍ ຠຕ຺ຕສ຺ສ, ທທາມິ ໂຍ ເມ ອິຈ຺ຉຕິ.

໑໒໑໐. ‘‘ຈາຕຸທ຺ທສິໍ ປຎ຺ຈທສິໍ, ສທາ ອຸປວສາມຫໍ;

ນ ຈາປິ [ນ ອຫໍ (ກ.)] ຠູເຕ ຫິໍສາມິ, ເຖຍ຺ຍຎ຺ຈາປິ ວິວຊ຺ຊຍິໍ.

໑໒໑໑. ‘‘ສພ຺ພເມວ ຫິ ນູເນຕໍ, ສຸຈິຓ຺ຓໍ ຠວຕິ ນິປ຺ຜລໍ;

ນິຣຕ຺ຖໍ ມຎ຺ຎິທໍ ສີລໍ, ອລາໂຕ ຠາສຕີ ຍຖາ.

໑໒໑໒. ‘‘ກລິເມວ ນູນ ຄຓ຺ຫາມິ, ອສິປ຺ໂປ ຘຸຕ຺ຕໂກ ຍຖາ;

ກຏໍ ອລາໂຕ ຄຓ຺ຫາຕິ, ກິຕໂວສິກ຺ຂິໂຕ ຍຖາ.

໑໒໑໓. ‘‘ທ຺ວາຣໍ ນປ຺ປຏິປສ຺ສາມິ, ເຍນ ຄຈ຺ຉາມິ ສຸຄ຺ຄຕິໍ;

ຕສ຺ມາ ຣາຊ ປໂຣທາມິ, ສຸຕ຺ວາ ກສ຺ສປຠາສິຕໍ’’.

໑໒໑໔. ພີຊກສ຺ສ ວໂຈ ສຸຕ຺ວາ, ຣາຊາ ອງ຺ຄຕິ ມພ຺ຣວິ;

‘‘ນຕ຺ຖິ ທ຺ວາຣໍ ສຸຄຕິຍາ, ນິຍຕິໍ [ນິຍຕໍ (ສ຺ຍາ.)] ກງ຺ຂ ພີຊກ.

໑໒໑໕. ‘‘ສຸຂໍ ວາ ຍທິ ວາ ທຸກ຺ຂໍ, ນິຍຕິຍາ ກິຣ ລພ຺ຠຕິ;

ສໍສາຣສຸທ຺ຘິ ສພ຺ເພສໍ, ມາ ຕຸຣິຕ຺ໂຖ [ຕຸຣິໂຕ (ສ຺ຍາ.)] ອນາຄເຕ.

໑໒໑໖. ‘‘ອຫມ຺ປິ ປຸພ຺ເພ ກລ຺ຍາໂຓ, ພ຺ຣາຫ຺ມຓິພ຺ເຠສຸ ພ຺ຍາວໂຏ [ວາວໂຏ (ກ.)];

ໂວຫາຣມນຸສາສນ຺ໂຕ, ຣຕິຫີໂນ ຕທນ຺ຕຣາ’’.

໑໒໑໗. ‘‘ປຸນປິ ຠນ຺ເຕ ທກ຺ເຂມຸ, ສງ຺ຄຕິ ເຈ ຠວິສ຺ສຕິ’’;

ອິທໍ ວຕ຺ວານ ເວເທໂຫ, ປຈ຺ຈຄາ ສນິເວສນໍ.

໑໒໑໘. ຕໂຕ ຣຕ຺ຍາ ວິວສາເນ, ອຸປຏ຺ຐານມ຺ຫິ ອງ຺ຄຕິ;

ອມຈ຺ເຈ ສນ຺ນິປາເຕຕ຺ວາ, ອິທໍ ວຈນມພ຺ຣວິ.

໑໒໑໙. ‘‘ຈນ຺ທເກ ເມ ວິມານສ຺ມິໍ, ສທາ ກາເມ ວິເຘນ຺ຕຸ ເມ;

ມາ ອຸປຄຈ຺ຉຸໍ ອຕ຺ເຖສຸ, ຄຸຍ຺ຫປ຺ປກາສິເຍສຸ ຈ.

໑໒໒໐. ‘‘ວິຊໂຍ ຈ ສຸນາໂມ ຈ, ເສນາປຕິ ອລາຕໂກ;

ເອເຕ ອຕ຺ເຖ ນິສີທນ຺ຕຸ, ໂວຫາຣກຸສລາ ຕໂຍ’’.

໑໒໒໑. ອິທໍ ວຕ຺ວານ ເວເທໂຫ, ກາເມວ ພຫຸມຎ຺ຎຖ;

ນ ຈາປິ ພ຺ຣາຫ຺ມຓິພ຺ເຠສຸ, ອຕ຺ເຖ ກິສ຺ມິຎ຺ຈິ ພ຺ຍາວໂຏ.

໑໒໒໒. ຕໂຕ ທ຺ເວສຕ຺ຕຣຕ຺ຕສ຺ສ, ເວເທຫສ຺ສຕ຺ຣຊາ ປິຍາ;

ຣາຊກຎ຺ຎາ ຣຸຈາ [ຣຸຊາ (ສີ. ປີ.) ເອວມຸປຣິປິ] ນາມ, ຘາຕິມາຕຣມພ຺ຣວິ.

໑໒໒໓. ‘ອລງ຺ກໂຣຖ ມໍ ຂິປ຺ປໍ, ສຂິໂຍ ຈາລງ຺ກໂຣນ຺ຕຸ [ຈ ກໂຣນ຺ຕຸ (ສີ. ປີ.)] ເມ;

ສຸເວ ປນ຺ນຣໂສ ທິພ຺ໂຍ, ຄຈ຺ຉໍ ອິສ຺ສຣສນ຺ຕິເກ’ [ປິຕຸສ຺ສ ສນ຺ຕິເກ (ສ຺ຍາ.)].

໑໒໒໔. ຕສ຺ສາ ມາລ຺ຍໍ ອຠິຫຣິໍສຸ, ຈນ຺ທນຎ຺ຈ ມຫາຣຫໍ;

ມຓິສງ຺ຂມຸຕ຺ຕາຣຕນໍ, ນານາຣຕ຺ເຕ ຈ ອມ຺ພເຣ.