໕໔໔. ຈນ຺ທກຸມາຣຊາຕກໍ (໗)

໙໘໒. ‘‘ຣາຊາສິ ລຸທ຺ທກມ຺ໂມ, ເອກຣາຊາ ປຸປ຺ຜວຕີຍາ;

ໂສ ປຸຈ຺ຉິ ພ຺ຣຫ຺ມພນ຺ຘຸໍ, ຂຓ຺ຑຫາລໍ ປຸໂຣຫິຕໍ ມູຬ຺ຫໍ.

໙໘໓. ‘ສຄ຺ຄານ ມຄ຺ຄມາຈິກ຺ຂ [ສຄ຺ຄມຄ຺ຄມາຈິກ຺ຂ (ສີ. ປີ.)], ຕ຺ວໍສິ ພ຺ຣາຫ຺ມຓ ຘມ຺ມວິນຍກຸສໂລ;

ຍຖາ ອິໂຕ ວຊນ຺ຕິ ສຸຄຕິໍ, ນຣາ ປຸຎ຺ຎານິ ກຕ຺ວານ’.

໙໘໔. ‘ອຕິທານໍ ທທິຕ຺ວານ, ອວຊ຺ເຌ ເທວ ຆາເຕຕ຺ວາ;

ເອວໍ ວຊນ຺ຕິ ສຸຄຕິໍ, ນຣາ ປຸຎ຺ຎານິ ກຕ຺ວານ’.

໙໘໕. ‘ກິໍ ປນ ຕໍ ອຕິທານໍ, ເກ ຈ ອວຊ຺ຌາ ອິມສ຺ມິ ໂລກສ຺ມິໍ;

ເອຕຎ຺ຈ ໂຂ ໂນ ອກ຺ຂາຫິ, ຍຊິສ຺ສາມິ ທທາມິ [ຍຊິສ຺ສາມ ທທາມ (ສີ. ປີ.)] ທານານິ’.

໙໘໖. ‘ປຸຕ຺ເຕຫິ ເທວ ຍຊິຕພ຺ພໍ, ມເຫສີຫິ ເນຄເມຫິ ຈ;

ອຸສເຠຫິ ອາຊານິເຍຫິ ຈຕູຫິ, ສພ຺ພຈຕຸກ຺ເກນ ເທວ ຍຊິຕພ຺ພໍ’’’.

໙໘໗. ‘‘ຕໍ ສຸຕ຺ວາ ອນ຺ເຕປຸເຣ, ກຸມາຣາ ມເຫສິໂຍ ຈ ຫຎ຺ຎນ຺ຕຸ;

ເອໂກ ອໂຫສິ ນິຄ຺ໂຆໂສ, ຠິສ຺ມາ ອຈ຺ຈຸຄ຺ຄໂຕ ສທ຺ໂທ’’.

໙໘໘. ‘‘ຄຈ຺ຉຖ ວເທຖ ກຸມາເຣ, ຈນ຺ທໍ ສູຣິຍຎ຺ຈ ຠທ຺ທເສນຎ຺ຈ;

ສູຣຎ຺ຈ ວາມໂຄຕ຺ຕຎ຺ຈ, ປຈຸຣາ [ປສຸຣາ (ສີ. ປີ. ກ.)] ກິຣ ໂຫຖ ຍຎ຺ຎຕ຺ຖາຍ.

໙໘໙. ‘‘ກຸມາຣິໂຍປິ ວເທຖ, ອຸປເສນໍ [ອຸປເສນິໍ (ສີ.), ອຸປເສຓິໍ (ປີ.)] ໂກກິລຎ຺ຈ ມຸທິຕຎ຺ຈ;

ນນ຺ທຎ຺ຈາປິ ກຸມາຣິໍ, ປຈຸຣາ [ປສຸຣາ (ສີ. ປີ. ກ.)] ກິຣ ໂຫຖ ຍຎ຺ຎຕ຺ຖາຍ.

໙໙໐. ‘‘ວິຊຍມ຺ປິ ມຍ຺ຫໍ ມເຫສິໍ, ເອຣາວຕິໍ [ເອກປຕິໍ (ປີ.), ເອຣາປຕິໍ (ກ.)] ເກສິນິໍ ສຸນນ຺ທຎ຺ຈ;

ລກ຺ຂຓວຣູປປນ຺ນາ, ປຈຸຣາ ກິຣ ໂຫຖ ຍຎ຺ຎຕ຺ຖາຍ.

໙໙໑. ‘‘ຄຫປຕໂຍ ຈ ວເທຖ, ປຸຓ຺ຓມຸຂໍ ຠທ຺ທິຍໍ ສິງ຺ຄາລຎ຺ຈ;

ວຑ຺ຒຎ຺ຈາປິ ຄຫປຕິໍ, ປຈຸຣາ ກິຣ ໂຫຖ ຍຎ຺ຎຕ຺ຖາຍ’’.

໙໙໒. ‘‘ເຕ ຕຕ຺ຖ ຄຫປຕໂຍ, ອໂວຈິສຸໍ ສມາຄຕາ ປຸຕ຺ຕທາຣປຣິກິຓ຺ຓາ;

ສພ຺ເພວ ສິຂິໂນ ເທວ ກໂຣຫິ, ອຖ ວາ ໂນ ທາເສ ສາເວຫິ’’.

໙໙໓. ‘‘ອຠຍໍກຣມ຺ປິ ເມ ຫຕ຺ຖິໍ, ນາຬາຄິຣິໍ ອຈ຺ຈຸຄ຺ຄຕໍ ວຣຸຓທນ຺ຕໍ [ນາຬາຄິຣິໍ ອຈ຺ຈຸຕໍ ວຣຸຓທນ຺ຕໍ (ສີ.), ຣາຊຄິຣິໍ ອຈ຺ຈຸຕວຣຸຓທນ຺ຕໍ (ປີ.)];

ອາເນຖ ໂຂ ເນ ຂິປ຺ປໍ, ຍຎ຺ຎຕ຺ຖາຍ ຠວິສ຺ສນ຺ຕິ.

໙໙໔. ‘‘ອສ຺ສຣຕນມ຺ປິ [ອສ຺ສຕຣມ຺ປິ (ສີ. ປີ.), ອສ຺ສຣຕນມ຺ປິ ເມ (ສ຺ຍາ.)] ເກສິໍ, ສຸຣາມຸຂໍ ປຸຓ຺ຓກໍ ວິນຕກຎ຺ຈ;

ອາເນຖ ໂຂ ເນ ຂິປ຺ປໍ, ຍຎ຺ຎຕ຺ຖາຍ ຠວິສ຺ສນ຺ຕິ.

໙໙໕. ‘‘ອຸສຠມ຺ປິ [ອຸສຠມ຺ປິ ເມ (ສ຺ຍາ.)] ຍູຖປຕິໍ ອໂນຊໍ, ນິສຠໍ ຄວມ຺ປຕິໍ ເຕປິ ມຍ຺ຫໍ ອາເນຖ;

ສມູຫ [ສມຸປາ (ສີ. ປີ.), ສມ຺ມຸຂາ (ສ຺ຍາ.)] ກໂຣນ຺ຕຸ ສພ຺ພໍ, ຍຊິສ຺ສາມິ ທທາມິ ທານານິ.

໙໙໖. ‘‘ສພ຺ພໍ [ສພ຺ພມ຺ປິ (ສ຺ຍາ.)] ປຏິຍາເທຖ, ຍຎ຺ຎໍ ປນ ອຸຄ຺ຄຕມ຺ຫິ ສູຣິຍມ຺ຫິ;

ອາຓາເປຖ ຈ ກຸມາເຣ [ອາຓາເປຖ ຈນ຺ທກຸມາເຣ (ສ຺ຍາ. ກ.)], ອຠິຣມນ຺ຕຸ ອິມໍ ຣຕ຺ຕິໍ.

໙໙໗. ‘‘ສພ຺ພໍ [ສພ຺ພມ຺ປິ (ສ຺ຍາ.)] ອຸປຏ຺ຐເປຖ, ຍຎ຺ຎໍ ປນ ອຸຄ຺ຄຕມ຺ຫິ ສູຣິຍມ຺ຫິ;

ວເທຖ ທານິ ກຸມາເຣ, ອຊ຺ຊ ໂຂ [ໂວ (ປີ.)] ປຈ຺ຉິມາ ຣຕ຺ຕິ’’.

໙໙໘. ‘‘ຕໍຕໍ ມາຕາ ອວຈ, ໂຣທນ຺ຕີ ອາຄນ຺ຕ຺ວາ ວິມານໂຕ;

ຍຎ຺ໂຎ ກິຣ ເຕ ປຸຕ຺ຕ, ຠວິສ຺ສຕິ ຈຕູຫິ ປຸຕ຺ເຕຫິ’’.

໙໙໙. ‘‘ສພ຺ເພປິ ມຍ຺ຫໍ ປຸຕ຺ຕາ ຈຕ຺ຕາ, ຈນ຺ທສ຺ມິໍ ຫຎ຺ຎມານສ຺ມິໍ;

ປຸຕ຺ເຕຫິ ຍຎ຺ຎໍ ຍຊິຕ຺ວານ, ສຸຄຕິໍ ສຄ຺ຄໍ ຄມິສ຺ສາມິ’’.

໑໐໐໐. ‘‘ມາ ຕໍ [ມາ (ສີ. ປີ.)] ປຸຕ຺ຕ ສທ຺ທເຫສິ, ສຸຄຕິ ກິຣ ໂຫຕິ ປຸຕ຺ຕຍຎ຺ເຎນ;

ນິຣຍາເນໂສ ມຄ຺ໂຄ, ເນໂສ ມຄ຺ໂຄ ຫິ ສຄ຺ຄານໍ.

໑໐໐໑. ‘‘ທານານິ ເທຫິ ໂກຓ຺ຑຎ຺ຎ, ອຫິໍສາ ສພ຺ພຠູຕຠພ຺ຍານໍ’’;

ເອສ ມຄ຺ໂຄ ສຸຄຕິຍາ, ນ ຈ ມຄ຺ໂຄ ປຸຕ຺ຕຍຎ຺ເຎນ’’.

໑໐໐໒. ‘‘ອາຈຣິຍານໍ ວຈນາ, ຆາເຕສ຺ສໍ ຈນ຺ທຎ຺ຈ ສູຣິຍຎ຺ຈ;

ປຸຕ຺ເຕຫິ ຍຎ຺ຎໍ [ປຸຕ຺ເຕຫິ (ສີ. ສ຺ຍາ. ປີ.)] ຍຊິຕ຺ວານ ທຸຈ຺ຈເຊຫິ, ສຸຄຕິໍ ສຄ຺ຄໍ ຄມິສ຺ສາມິ’’.

໑໐໐໓. ‘‘ຕໍຕໍ ປິຕາປິ ອວຈ, ວສວຕ຺ຕີ ໂອຣສໍ ສກໍ ປຸຕ຺ຕໍ;

ຍຎ຺ໂຎ ກິຣ ເຕ ປຸຕ຺ຕ, ຠວິສ຺ສຕິ ຈຕູຫິ ປຸຕ຺ເຕຫິ’’.

໑໐໐໔. ‘‘ສພ຺ເພປິ ມຍ຺ຫໍ ປຸຕ຺ຕາ ຈຕ຺ຕາ, ຈນ຺ທສ຺ມິໍ ຫຎ຺ຎມານສ຺ມິໍ;

ປຸຕ຺ເຕຫິ ຍຎ຺ຎໍ ຍຊິຕ຺ວານ, ສຸຄຕິໍ ສຄ຺ຄໍ ຄມິສ຺ສາມິ’’.

໑໐໐໕. ‘‘ມາ ຕໍ ປຸຕ຺ຕ ສທ຺ທເຫສິ, ສຸຄຕິ ກິຣ ໂຫຕິ ປຸຕ຺ຕຍຎ຺ເຎນ;

ນິຣຍາເນໂສ ມຄ຺ໂຄ, ເນໂສ ມຄ຺ໂຄ ຫິ ສຄ຺ຄານໍ.

໑໐໐໖. ‘‘ທານານິ ເທຫິ ໂກຓ຺ຑຎ຺ຎ, ອຫິໍສາ ສພ຺ພຠູຕຠພ຺ຍານໍ;

ເອສ ມຄ຺ໂຄ ສຸຄຕິຍາ, ນ ຈ ມຄ຺ໂຄ ປຸຕ຺ຕຍຎ຺ເຎນ’’.

໑໐໐໗. ‘‘ອາຈຣິຍານໍ ວຈນາ, ຆາເຕສ຺ສໍ ຈນ຺ທຎ຺ຈ ສູຣິຍຎ຺ຈ;

ປຸຕ຺ເຕຫິ ຍຎ຺ຎໍ ຍຊິຕ຺ວານ ທຸຈ຺ຈເຊຫິ, ສຸຄຕິໍ ສຄ຺ຄໍ ຄມິສ຺ສາມິ’’.

໑໐໐໘. ‘‘ທານານິ ເທຫິ ໂກຓ຺ຑຎ຺ຎ, ອຫິໍສາ ສພ຺ພຠູຕຠພ຺ຍານໍ;

ປຸຕ຺ຕປຣິວຸໂຕ ຕຸວໍ, ຣຏ຺ຐໍ ຊນປທຎ຺ຈ ປາເລຫິ’’.

໑໐໐໙. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ອປິ ນິຄຬພນ຺ຘກາປິ, ຫຕ຺ຖີ ອສ຺ເສ ຈ ປາເລມ.

໑໐໑໐. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ອປິ ນິຄຬພນ຺ຘກາປິ, ຫຕ຺ຖິຉກຓານິ ອຸຊ຺ເຌມ.

໑໐໑໑. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ອປິ ນິຄຬພນ຺ຘກາປິ, ອສ຺ສຉກຓານິ ອຸຊ຺ເຌມ.

໑໐໑໒. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ [ອິທໍ ປທໍ ສີ. ປີ. ໂປຕ຺ຖເກສຸ ນຕ຺ຖິ];

ຍສ຺ສ ໂຫນ຺ຕິ ຕວ ກາມາ, ອປິ ຣຏ຺ຐາ ປພ຺ພາຊິຕາ;

ຠິກ຺ຂາຈຣິຍໍ ຈຣິສ຺ສາມ’’.

໑໐໑໓. ‘‘ທຸກ຺ຂໍ ໂຂ ເມ ຊນຍຖ, ວິລປນ຺ຕາ ຊີວິຕສ຺ສ ກາມາ ຫິ;

ມຸຎ຺ເຈຖ [ມຸຎ຺ຈຖ (ສີ. ປີ.)] ທານິ ກຸມາເຣ, ອລມ຺ປິ ເມ ໂຫຕຸ ປຸຕ຺ຕຍຎ຺ເຎນ’’.

໑໐໑໔. ‘‘ປຸພ຺ເພວ ໂຂສິ ເມ ວຸຕ຺ໂຕ, ທຸກ຺ກຣໍ ທຸຣຠິສມ຺ຠວຎ຺ເຈຕໍ;

ອຖ ໂນ ອຸປກ຺ຂຏສ຺ສ ຍຎ຺ຎສ຺ສ, ກສ຺ມາ ກໂຣສິ ວິກ຺ເຂປໍ.

໑໐໑໕. ‘‘ສພ຺ເພ ວຊນ຺ຕິ ສຸຄຕິໍ, ເຍ ຍຊນ຺ຕິ ເຍປິ ຍາເຊນ຺ຕິ;

ເຍ ຈາປິ ອນຸໂມທນ຺ຕິ, ຍຊນ຺ຕານໍ ເອທິສໍ ມຫາຍຎ຺ຎໍ’’.

໑໐໑໖. ‘‘ອຖ ກິສ຺ສ ຊໂນ [ຈ ໂນ (ສີ. ສ຺ຍາ. ປີ.)] ປຸພ຺ເພ, ໂສຕ຺ຖານໍ ພ຺ຣາຫ຺ມເຓ ອວາເຈສິ;

ອຖ ໂນ ອກາຣຓສ຺ມາ, ຍຎ຺ຎຕ຺ຖາຍ ເທວ ຆາເຕສິ.

໑໐໑໗. ‘‘ປຸພ຺ເພວ ໂນ ທຫຣກາເລ [ທຫຣເກ ສມາເນ (ສີ. ປີ.)], ນ ຫເນສິ [ນ ມາເຣສິ (ສີ. ປີ.)] ນ ຆາເຕສິ;

ທຫຣມ຺ຫາ ໂຍພ຺ພນໍ ປຕ຺ຕາ, ອທູສກາ ຕາຕ ຫຎ຺ຎາມ.

໑໐໑໘. ‘‘ຫຕ຺ຖິຄເຕ ອສ຺ສຄເຕ, ສນ຺ນທ຺ເຘ ປສ຺ສ ໂນ ມຫາຣາຊ;

ຍຸທ຺ເຘ ວາ ຍຸຊ຺ຌມາເນ ວາ, ນ ຫິ ມາທິສາ ສູຣາ ໂຫນ຺ຕິ ຍຎ຺ຎຕ຺ຖາຍ.

໑໐໑໙. ‘‘ປຈ຺ຈນ຺ເຕ ວາປິ ກຸປິເຕ, ອຏວີສຸ ວາ ມາທິເສ ນິໂຍເຊນ຺ຕິ;

ອຖ ໂນ ອກາຣຓສ຺ມາ, ອຠູມິຍໍ ຕາຕ ຫຎ຺ຎາມ.

໑໐໒໐. ‘‘ຍາປິ ຫິ ຕາ ສກຸຓິໂຍ, ວສນ຺ຕິ ຕິຓຆຣານິ ກຕ຺ວານ;

ຕາສມ຺ປິ ປິຍາ ປຸຕ຺ຕາ, ອຖ ໂນ ຕ຺ວໍ ເທວ ຆາເຕສິ.

໑໐໒໑. ‘‘ມາ ຕສ຺ສ ສທ຺ທເຫສິ, ນ ມໍ ຂຓ຺ຑຫາໂລ ຆາເຕຍ຺ຍ;

ມມຎ຺ຫິ ໂສ ຆາເຕຕ຺ວານ, ອນນ຺ຕຣາ ຕມ຺ປິ ເທວ ຆາເຕຍ຺ຍ.

໑໐໒໒. ‘‘ຄາມວຣໍ ນິຄມວຣໍ ທທນ຺ຕິ, ໂຠຄມ຺ປິສ຺ສ ມຫາຣາຊ;

ອຖຄ຺ຄປິຓ຺ຑິກາປິ, ກຸເລ ກຸເລ ເຫເຕ ຠຸຎ຺ຊນ຺ຕິ.

໑໐໒໓. ‘‘ເຕສມ຺ປິ ຕາທິສານໍ, ອິຈ຺ຉນ຺ຕິ ທຸພ຺ຠິຕຸໍ ມຫາຣາຊ;

ເຍຠຸຍ຺ເຍນ ເອເຕ, ອກຕຎ຺ຎຸໂນ ພ຺ຣາຫ຺ມຓາ ເທວ.

໑໐໒໔. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ອປິ ນິຄຬພນ຺ຘກາປິ, ຫຕ຺ຖີ ອສ຺ເສ ຈ ປາເລມ.

໑໐໒໕. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ອປິ ນິຄຬພນ຺ຘກາປິ, ຫຕ຺ຖິຉກຓານິ ອຸຊ຺ເຌມ.

໑໐໒໖. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ອປິ ນິຄຬພນ຺ຘກາປິ, ອສ຺ສຉກຓານິ ອຸຊ຺ເຌມ.

໑໐໒໗. ‘‘ມາ ໂນ ເທວ ອວຘິ, ທາເສ ໂນ ເທຫິ ຂຓ຺ຑຫາລສ຺ສ;

ຍສ຺ສ ໂຫນ຺ຕິ ຕວ ກາມາ, ອປິ ຣຏ຺ຐາ ປພ຺ພາຊິຕາ;

ຠິກ຺ຂາຈຣິຍໍ ຈຣິສ຺ສາມ’’.

໑໐໒໘. ‘‘ທຸກ຺ຂໍ ໂຂ ເມ ຊນຍຖ, ວິລປນ຺ຕາ ຊີວິຕສ຺ສ ກາມາ ຫິ;

ມຸຎ຺ເຈຖ ທານິ ກຸມາເຣ, ອລມ຺ປິ ເມ ໂຫຕຸ ປຸຕ຺ຕຍຎ຺ເຎນ’’.

໑໐໒໙. ‘‘ປຸພ຺ເພວ ໂຂສິ ເມ ວຸຕ຺ໂຕ, ທຸກ຺ກຣໍ ທຸຣຠິສມ຺ຠວຎ຺ເຈຕໍ;

ອຖ ໂນ ອຸປກ຺ຂຏສ຺ສ ຍຎ຺ຎສ຺ສ, ກສ຺ມາ ກໂຣສິ ວິກ຺ເຂປໍ.

໑໐໓໐. ‘‘ສພ຺ເພ ວຊນ຺ຕິ ສຸຄຕິໍ, ເຍ ຍຊນ຺ຕິ ເຍປິ ຍາເຊນ຺ຕິ;

ເຍ ຈາປິ ອນຸໂມທນ຺ຕິ, ຍຊນ຺ຕານໍ ເອທິສໍ ມຫາຍຎ຺ຎໍ’’.

໑໐໓໑. ‘‘ຍທິ ກິຣ ຍຊິຕ຺ວາ ປຸຕ຺ເຕຫິ, ເທວໂລກໍ ອິໂຕ ຈຸຕາ ຍນ຺ຕິ;

ພ຺ຣາຫ຺ມໂຓ ຕາວ ຍຊຕຸ, ປຈ຺ຉາປິ ຍຊສິ ຕຸວໍ ຣາຊາ.

໑໐໓໒. ‘‘ຍທິ ກິຣ ຍຊິຕ຺ວາ ປຸຕ຺ເຕຫິ, ເທວໂລກໍ ອິໂຕ ຈຸຕາ ຍນ຺ຕິ;

ເອສ຺ເວວ ຂຓ຺ຑຫາໂລ, ຍຊຕໍ ສເກຫິ ປຸຕ຺ເຕຫິ.

໑໐໓໓. ‘‘ເອວໍ ຊານນ຺ໂຕ ຂຓ຺ຑຫາໂລ, ກິໍ ປຸຕ຺ຕເກ ນ ຆາເຕສິ;

ສພ຺ພຎ຺ຈ ຎາຕິຊນໍ, ອຕ຺ຕານຎ຺ຈ ນ ຆາເຕສິ.

໑໐໓໔. ‘‘ສພ຺ເພ ວຊນ຺ຕິ ນິຣຍໍ, ເຍ ຍຊນ຺ຕິ ເຍປິ ຍາເຊນ຺ຕິ;

ເຍ ຈາປິ ອນຸໂມທນ຺ຕິ, ຍຊນ຺ຕານໍ ເອທິສໍ ມຫາຍຎ຺ຎໍ.

໑໐໓໕. [ອຍໍ ຄາຖາ ສີ. ສ຺ຍາ. ປີ. ໂປຕ຺ຖເກສຸ ນ ທິສ຺ສຕິ] ‘‘ສເຈ ຫິ ໂສ ສຸຊ຺ຌຕິ ໂຍ ຫນາຕິ, ຫໂຕປິ ໂສ ສຄ຺ຄມຸເປຕິ ຐານໍ;

ໂຠວາທິ ໂຠວາທິນ ມາຣເຍຍ຺ຍຸໍ, ເຍ ຈາປິ ເຕສໍ ອຠິສທ຺ທເຫຍ຺ຍຸໍ’’ [ອຍໍ ຄາຖາ ສີ. ສ຺ຍາ. ປີ. ໂປຕ຺ຖເກສຸ ນ ທິສ຺ສຕິ].

໑໐໓໖. ‘‘ກຖຎ຺ຈ ກິຣ ປຸຕ຺ຕກາມາໂຍ, ຄຫປຕໂຍ ຆຣຓິໂຍ ຈ;

ນຄຣມ຺ຫິ ນ ອຸປຣວນ຺ຕິ ຣາຊານໍ, ມາ ຆາຕຍິ ໂອຣສໍ ປຸຕ຺ຕໍ.

໑໐໓໗. ‘‘ກຖຎ຺ຈ ກິຣ ປຸຕ຺ຕກາມາໂຍ, ຄຫປຕໂຍ ຆຣຓິໂຍ ຈ;

ນຄຣມ຺ຫິ ນ ອຸປຣວນ຺ຕິ ຣາຊານໍ, ມາ ຆາຕຍິ ອຕ຺ຣຊໍ ປຸຕ຺ຕໍ.

໑໐໓໘. ‘‘ຣຎ຺ໂຎ ຈມ຺ຫິ ອຕ຺ຖກາໂມ, ຫິໂຕ ຈ ສພ຺ພຊນປທສ຺ສ [ສພ຺ພທາ ຊນປທສ຺ສ (ສີ. ປີ.)];

ນ ໂກຈິ ອສ຺ສ ປຏິຆໍ, ມຍາ ຊານປໂທ ນ ປເວເທຕິ’’.

໑໐໓໙. ‘‘ຄຈ຺ຉຖ ໂວ ຆຣຓິໂຍ, ຕາຕຎ຺ຈ ວເທຖ ຂຓ຺ຑຫາລຎ຺ຈ;

ມາ ຆາເຕຖ ກຸມາເຣ, ອທູສເກ ສີຫສງ຺ກາເສ.

໑໐໔໐. ‘‘ຄຈ຺ຉຖ ໂວ ຆຣຓິໂຍ, ຕາຕຎ຺ຈ ວເທຖ ຂຓ຺ຑຫາລຎ຺ຈ;

ມາ ຆາເຕຖ ກຸມາເຣ, ອເປກ຺ຂິເຕ ສພ຺ພໂລກສ຺ສ’’.

໑໐໔໑. ‘‘ຍໍ ນູນາຫໍ ຊາເຍຍ຺ຍໍ, ຣຖກາຣກຸເລສຸ ວາ;

ປຸກ຺ກຸສກຸເລສຸ ວາ ເວສ຺ເສສຸ ວາ ຊາເຍຍ຺ຍໍ;

ນ ຫຊ຺ຊ ມໍ ຣາຊ ຍຎ຺ເຎ [ຍຎ຺ຎຕ຺ຖາຍ (ສີ. ປີ.)] ຆາເຕຍ຺ຍ’’.

໑໐໔໒. ‘‘ສພ຺ພາ ສີມນ຺ຕິນິໂຍ ຄຈ຺ຉຖ, ອຍ຺ຍສ຺ສ ຂຓ຺ຑຫາລສ຺ສ;

ປາເທສຸ ນິປຕຖ, ອປຣາຘາຫໍ ນ ປສ຺ສາມິ.

໑໐໔໓. ‘‘ສພ຺ພາ ສີມນ຺ຕິນິໂຍ ຄຈ຺ຉຖ, ອຍ຺ຍສ຺ສ ຂຓ຺ຑຫາລສ຺ສ;

ປາເທສຸ ນິປຕຖ, ກິນ຺ເຕ ຠນ຺ເຕ ມຍໍ ອທູເສມ’’.

໑໐໔໔. ‘‘ກປຓາ [ກປຓໍ (ສີ. ປີ.)] ວິລປຕິ ເສລາ, ທິສ຺ວານ ຠາຕເຣ [ຠາຕໂຣ (ສີ. ສ຺ຍາ. ປີ. ກ.)] ອຸປນີຕຕ຺ເຕ;

ຍຎ຺ໂຎ ກິຣ ເມ ອຸກ຺ຂິປິໂຕ, ຕາເຕນ ສຄ຺ຄກາເມນ’’.

໑໐໔໕. ‘‘ອາວຕ຺ຕິ ປຣິວຕ຺ຕິ ຈ, ວສຸໂລ ສມ຺ມຸຂາ ຣຎ຺ໂຎ;

ມາ ໂນ ປິຕຣໍ ອວຘິ, ທຫຣມ຺ຫາ ໂຍພ຺ພນໍ ປຕ຺ຕາ’’.

໑໐໔໖. ‘‘ເອໂສ ເຕ ວສຸລ ປິຕາ, ສເມຫິ ປິຕຣາ ສຫ;

ທຸກ຺ຂໍ ໂຂ ເມ ຊນຍສິ, ວິລປນ຺ໂຕ ອນ຺ເຕປຸຣສ຺ມິໍ;

ມຸຎ຺ເຈຖ ທານິ ກຸມາເຣ, ອລມ຺ປິ ເມ ໂຫຕຸ ປຸຕ຺ຕຍຎ຺ເຎນ’’.

໑໐໔໗. ‘‘ປຸພ຺ເພວ ໂຂສິ ເມ ວຸຕ຺ໂຕ, ທຸກ຺ກຣໍ ທຸຣຠິສມ຺ຠວຎ຺ເຈຕໍ;

ອຖ ໂນ ອຸປກ຺ຂຏສ຺ສ ຍຎ຺ຎສ຺ສ, ກສ຺ມາ ກໂຣສິ ວິກ຺ເຂປໍ.

໑໐໔໘. ‘‘ສພ຺ເພ ວຊນ຺ຕິ ສຸຄຕິໍ, ເຍ ຍຊນ຺ຕິ ເຍປິ ຍາເຊນ຺ຕິ;

ເຍ ຈາປິ ອນຸໂມທນ຺ຕິ, ຍຊນ຺ຕານໍ ເອທິສໍ ມຫາຍຎ຺ຎໍ’’.

໑໐໔໙. ‘‘ສພ຺ພຣຕນສ຺ສ ຍຎ຺ໂຎ ອຸປກ຺ຂໂຏ, ເອກຣາຊ ຕວ ປຏິຍຕ຺ໂຕ;

ອຠິນິກ຺ຂມສ຺ສຸ ເທວ, ສຄ຺ຄໍ ຄໂຕ ຕ຺ວໍ ປໂມທິສ຺ສສິ’’.

໑໐໕໐. ‘‘ທຫຣາ ສຕ຺ຕສຕາ ເອຕາ, ຈນ຺ທກຸມາຣສ຺ສ ຠຣິຍາໂຍ;

ເກເສ ປກິຣິຕ຺ວານ [ປຣິກິຣິຕ຺ວານ (ສີ. ປີ.), ວິກິຣິຕ຺ວານ (ສ຺ຍາ. ກ.)], ໂຣທນ຺ຕິໂຍ ມຄ຺ຄມນຸຍາຍິໍສຸ [ມຄ຺ຄມນຸຍນ຺ຕິ (ສີ. ປີ.), ມຄ຺ຄມນຸຍາຍນ຺ຕິ (ສ຺ຍາ.)].

໑໐໕໑. ‘‘ອປຣາ ປນ ໂສເກນ, ນິກ຺ຂນ຺ຕາ ນນ຺ທເນ ວິຍ ເທວາ;

ເກເສ ປກິຣິຕ຺ວານ [ປຣິກິຣິຕ຺ວານ (ສີ. ປີ.), ວິກິຣິຕ຺ວານ (ສ຺ຍາ. ກ.)], ໂຣທນ຺ຕິໂຍ ມຄ຺ຄມນຸຍາຍິໍສຸ’’ [ມຄ຺ຄມນຸຍນ຺ຕິ (ສີ. ປີ.), ມຄ຺ຄມນຸຍາຍນ຺ຕິ (ສ຺ຍາ.)].

໑໐໕໒. ‘‘ກາສິກສຸຈິວຕ຺ຖຘຣາ, ກຸຓ຺ຑລິໂນ ອຄລຸຈນ຺ທນວິລິຕ຺ຕາ;

ນິຍ຺ຍນ຺ຕິ ຈນ຺ທສູຣິຍາ, ຍຎ຺ຎຕ຺ຖາຍ ເອກຣາຊສ຺ສ.

໑໐໕໓. ‘‘ກາສິກສຸຈິວຕ຺ຖຘຣາ, ກຸຓ຺ຑລິໂນ ອຄລຸຈນ຺ທນວິລິຕ຺ຕາ;

ນິຍ຺ຍນ຺ຕິ ຈນ຺ທສູຣິຍາ, ມາຕຸ ກຕ຺ວາ ຫທຍໂສກໍ.

໑໐໕໔. ‘‘ກາສິກສຸຈິວຕ຺ຖຘຣາ, ກຸຓ຺ຑລິໂນ ອຄລຸຈນ຺ທນວິລິຕ຺ຕາ;