໕໔໓. ຠູຣິທຕ຺ຕຊາຕກໍ (໖)

໗໘໔. ‘‘ຍໍ ກິຎ຺ຈິ ຣຕນໍ ອຕ຺ຖິ, ຘຕຣຏ຺ຐນິເວສເນ;

ສພ຺ພານິ ເຕ ອຸປຍນ຺ຕຸ, ຘີຕຣໍ ເທຫິ ຣາຊິໂນ’’.

໗໘໕. ‘‘ນ ໂນ ວິວາໂຫ ນາເຄຫິ, ກຕປຸພ຺ໂພ ກຸທາຈນໍ;

ຕໍ ວິວາຫໍ ອສໍຍຸຕ຺ຕໍ, ກຖໍ ອມ຺ເຫ ກໂຣມເສ’’.

໗໘໖. ‘‘ຊີວິຕໍ ນູນ ເຕ ຈຕ຺ຕໍ, ຣຏ຺ຐໍ ວາ ມນຸຊາຘິປ;

ນ ຫິ ນາເຄ ກຸປິຕມ຺ຫິ, ຈິຣໍ ຊີວນ຺ຕິ ຕາທິສາ.

໗໘໗. ‘‘ໂຍ ຕ຺ວໍ ເທວ ມນຸສ຺ໂສສິ, ອິທ຺ຘິມນ຺ຕໍ ອນິທ຺ຘິມາ;

ວຣຸຓສ຺ສ ນິຍໍ ປຸຕ຺ຕໍ, ຍາມຸນໍ ອຕິມຎ຺ຎສິ’’.

໗໘໘. ‘‘ນາຕິມຎ຺ຎາມິ ຣາຊານໍ, ຘຕຣຏ຺ຐໍ ຍສສ຺ສິນໍ;

ຘຕຣຏ຺ໂຐ ຫິ ນາຄານໍ, ພຫູນມປິ ອິສ຺ສໂຣ.

໗໘໙. ‘‘ອຫິ ມຫານຸຠາໂວປິ, ນ ເມ ຘີຕຣມາຣໂຫ;

ຂຕ຺ຕິໂຍ ຈ ວິເທຫານໍ, ອຠິຊາຕາ ສມຸທ຺ທຊາ’’.

໗໙໐. ‘‘ກມ຺ພລສ຺ສຕຣາ ອຸຏ຺ເຐນ຺ຕຸ, ສພ຺ເພ ນາເຄ ນິເວທຍ;

ພາຣາຓສິໍ ປວຊ຺ຊນ຺ຕຸ, ມາ ຈ ກຎ຺ຈິ [ກິຎ຺ຈິ (ສີ. ປີ. ກ.)] ວິເຫຐຍຸໍ’’.

໗໙໑. ‘‘ນິເວສເນສຸ ໂສພ຺ເຠສຸ, ຣຖິຍາ ຈຈ຺ຈເຣສຸ ຈ;

ຣຸກ຺ຂຄ຺ເຄສຸ ຈ ລມ຺ພນ຺ຕຸ, ວິຕຕາ ໂຕຣເຓສຸ ຈ.

໗໙໒. ‘‘ອຫມ຺ປິ ສພ຺ພເສເຕນ, ມຫຕາ ສຸມຫໍ ປຸຣໍ;

ປຣິກ຺ຂິປິສ຺ສໍ ໂຠເຄຫິ, ກາສີນໍ ຊນຍໍ ຠຍໍ’’.

໗໙໓. ຕສ຺ສ ຕໍ ວຈນໍ ສຸຕ຺ວາ, ອຸຣຄາເນກວຓ຺ຓິໂນ;

ພາຣາຓສິໍ ປວຊ຺ຊິໍສຸ, ນ ຈ ກຎ຺ຈິ ວິເຫຐຍຸໍ.

໗໙໔. ນິເວສເນສຸ ໂສພ຺ເຠສຸ, ຣຖິຍາ ຈຈ຺ຈເຣສຸ ຈ;

ຣຸກ຺ຂຄ຺ເຄສຸ ຈ ລມ຺ພິໍສຸ, ວິຕຕາ ໂຕຣເຓສຸ ຈ.

໗໙໕. ເຕສຸ ທິສ຺ວານ ລມ຺ພນ຺ເຕ, ປຸຖູ ກນ຺ທິໍສຸ ນາຣິໂຍ;

ນາເຄ ໂສຓ຺ຑິກເຕ ທິສ຺ວາ, ປສ຺ສສນ຺ເຕ ມຸຫຸໍ ມຸຫຸໍ.

໗໙໖. ພາຣາຓສີ ປພ຺ຍຘິຕາ, ອາຕຸຣາ ສມປຊ຺ຊຖ;

ພາຫາ ປຄ຺ຄຍ຺ຫ ປກ຺ກນ຺ທຸໍ, ‘‘ຘີຕຣໍ ເທຫິ ຣາຊິໂນ’’.

໗໙໗. ‘‘ປຸປ຺ຜາຠິຫາຣສ຺ສ ວນສ຺ສ ມຊ຺ເຌ, ໂກ ໂລຫິຕກ຺ໂຂ ວິຕຕນ຺ຕຣໍໂສ;

ກາ ກມ຺ພຸກາຍູຣຘຣາ ສຸວຕ຺ຖາ, ຕິຏ຺ຐນ຺ຕິ ນາຣິໂຍ ທສ ວນ຺ທມານາ.

໗໙໘. ‘‘ໂກ ຕ຺ວໍ ພ຺ຣຫາພາຫຸ ວນສ຺ສ ມຊ຺ເຌ, ວິໂຣຈສິ ຆຕສິຕ຺ໂຕວ ອຄ຺ຄິ;

ມເຫສກ຺ໂຂ ອຎ຺ຎຕໂຣສິ ຍກ຺ໂຂ, ອຸທາຫຸ ນາໂຄສິ ມຫານຸຠາໂວ’’.

໗໙໙. ‘‘ນາໂຄຫມສ຺ມິ ອິທ຺ຘິມາ, ເຕຊສ຺ສີ [ເຕຊສີ (ສີ. ສ຺ຍາ. ປີ. ກ.)] ທຸຣຕິກ຺ກໂມ;

ຑໍເສຍ຺ຍໍ ເຕຊສາ ກຸທ຺ໂຘ, ຜີຕໍ ຊນປທໍ ອປິ.

໘໐໐. ‘‘ສມຸທ຺ທຊາ ຫິ ເມ ມາຕາ, ຘຕຣຏ຺ໂຐ ຈ ເມ ປິຕາ;

ສຸທສ຺ສນກນິຏ຺ໂຐສ຺ມິ, ຠູຣິທຕ຺ໂຕຕິ ມໍ ວິທູ’’.

໘໐໑. ‘‘ຍໍ ຄມ຺ຠີຣໍ ສທາວຏ຺ຏໍ, ຣຫທໍ ຠິສ຺ມໍ ເປກ຺ຂສິ;

ເອສ ທິພ຺ໂຍ ມມາວາໂສ, ອເນກສຕໂປຣິໂສ.

໘໐໒. ‘‘ມຍູຣໂກຎ຺ຈາຠິຣຸທໍ, ນີໂລທໍ ວນມຊ຺ຌໂຕ;

ຍມຸນໍ ປວິສ ມາ ຠີໂຕ, ເຂມໍ ວຕ຺ຕວຕໍ [ວຕ຺ຕວຕິໍ (ສ຺ຍາ. ກ.)] ສິວໍ’’.

໘໐໓. ‘‘ຕຕ຺ຖ ປຕ຺ໂຕ ສານຸຈໂຣ, ສຫ ປຸຕ຺ເຕນ ພ຺ຣາຫ຺ມຓ;

ປູຊິໂຕ ມຍ຺ຫໍ ກາເມຫິ, ສຸຂໍ ພ຺ຣາຫ຺ມຓ ວຈ຺ຉສິ’’.

໘໐໔. ‘‘ສມາ ສມນ຺ຕປຣິໂຕ, ປຫູຕຕຄຣາ [ພຫຸກາ ຕຄ຺ຄຣາ (ສີ. ສ຺ຍາ. ປີ.)] ມຫີ;

ອິນ຺ທໂຄປກສຎ຺ຉນ຺ນາ, ໂສຠຕິ ຫຣິຕຸຕ຺ຕມາ.

໘໐໕. ‘‘ຣມ຺ມານິ ວນເຈຕ຺ຍານິ, ຣມ຺ມາ ຫໍສູປກູຊິຕາ;

ໂອປຸປ຺ຜາປທ຺ມາ ຕິຏ຺ຐນ຺ຕິ, ໂປກ຺ຂຣຎ຺ໂຎ [ໂປກ຺ຂຣຎ຺ຎາ (ສ຺ຍາ. ປີ.)] ສຸນິມ຺ມິຕາ.

໘໐໖. ‘‘ອຏ຺ຐໍສາ ສຸກຕາ ຖມ຺ຠາ, ສພ຺ເພ ເວຬຸຣິຍາມຍາ;

ສຫສ຺ສຖມ຺ຠາ ປາສາທາ, ປູຣາ ກຎ຺ຎາຫິ ໂຊຕເຣ.

໘໐໗. ‘‘ວິມານໍ ອຸປປນ຺ໂນສິ, ທິພ຺ຍໍ ປຸຎ຺ເຎຫິ ອຕ຺ຕໂນ;

ອສມ຺ພາຘໍ ສິວໍ ຣມ຺ມໍ, ອຈ຺ຈນ຺ຕສຸຂສໍຫິຕໍ.

໘໐໘. ‘‘ມຎ຺ເຎ ສຫສ຺ສເນຕ຺ຕສ຺ສ, ວິມານໍ ນາຠິກງ຺ຂສິ;

ອິທ຺ຘີ ຫິ ຕ຺ຍາຍໍ ວິປຸລາ, ສກ຺ກສ຺ເສວ ຊຸຕີມໂຕ’’.

໘໐໙. ‘‘ມນສາປິ ນ ປຕ຺ຕພ຺ໂພ, ອານຸຠາໂວ ຊຸຕີມໂຕ;

ປຣິຈາຣຍມານານໍ, ສອິນ຺ທານໍ [ອິນ຺ທານໍ (ສ຺ຍາ. ກ.)] ວສວຕ຺ຕິນໍ’’.

໘໑໐. ‘‘ຕໍ ວິມານໍ ອຠິຊ຺ຌາຍ, ອມຣານໍ ສຸເຂສິນໍ;

ອຸໂປສຖໍ ອຸປວສນ຺ໂຕ, ເສມິ ວມ຺ມິກມຸທ຺ຘນິ’’.

໘໑໑. ‘‘ອຫຎ຺ຈ ມິຄເມສາໂນ, ສປຸຕ຺ໂຕ ປາວິສິໍ ວນໍ;

ຕໍ ມໍ ມຕໍ ວາ ຊີວໍ ວາ, ນາຠິເວເທນ຺ຕິ ຎາຕກາ.

໘໑໒. ‘‘ອາມນ຺ຕເຍ ຠູຣິທຕ຺ຕໍ, ກາສິປຸຕ຺ຕໍ ຍສສ຺ສິນໍ;

ຕຍາ ໂນ ສມນຸຎ຺ຎາຕາ, ອປິ ປສ຺ເສມຸ ຎາຕເກ’’.

໘໑໓. ‘‘ເອໂສ ຫິ ວຕ ເມ ຉນ຺ໂທ, ຍໍ ວເສສິ ມມນ຺ຕິເກ;

ນ ຫິ ເອຕາທິສາ ກາມາ, ສຸລຠາ ໂຫນ຺ຕິ ມານຸເສ.

໘໑໔. ‘‘ສເຈ ຕ຺ວໍ ນິຈ຺ຉເສ ວຕ຺ຖຸໍ, ມມ ກາເມຫິ ປູຊິໂຕ;

ມຍາ ຕ຺ວໍ ສມນຸຎ຺ຎາໂຕ, ໂສຕ຺ຖິໍ ປສ຺ສາຫິ ຎາຕເກ’’.

໘໑໕. ‘‘ຘາຣຍິມໍ ມຓິໍ ທິພ຺ຍໍ, ປສຸໍ ປຸຕ຺ເຕ ຈ ວິນ຺ທຕິ;

ອໂຣໂຄ ສຸຂິໂຕ ໂຫຕິ [ໂຫຫິ (ສ຺ຍາ.)], ຄຈ຺ເຉວາທາຍ ພ຺ຣາຫ຺ມຓ’’.

໘໑໖. ‘‘ກຸສລໍ ປຏິນນ຺ທາມິ, ຠູຣິທຕ຺ຕ ວໂຈ ຕວ;

ປພ຺ພຊິສ຺ສາມິ ຊິຓ຺ໂຓສ຺ມິ, ນ ກາເມ ອຠິປຕ຺ຖເຍ’’.

໘໑໗. ‘‘ພ຺ຣຫ຺ມຈຣິຍສ຺ສ ເຈ ຠງ຺ໂຄ, ໂຫຕິ ໂຠເຄຫິ ກາຣິຍໍ;

ອວິກມ຺ປມາໂນ ເອຍ຺ຍາສິ, ພຫຸໍ ທສ຺ສາມິ ເຕ ຘນໍ’’.

໘໑໘. ‘‘ກຸສລໍ ປຏິນນ຺ທາມິ, ຠູຣິທຕ຺ຕ ວໂຈ ຕວ;

ປຸນປິ ອາຄມິສ຺ສາມິ, ສເຈ ອຕ຺ໂຖ ຠວິສ຺ສຕິ’’.

໘໑໙. ‘‘ອິທໍ ວຕ຺ວາ ຠູຣິທຕ຺ໂຕ, ເປເສສິ ຈຕຸໂຣ ຊເນ;

ເອຖ ຄຈ຺ຉຖ ອຸຏ຺ເຐຖ, ຂິປ຺ປໍ ປາເປຖ ພ຺ຣາຫ຺ມຓໍ.

໘໒໐. ຕສ຺ສ ຕໍ ວຈນໍ ສຸຕ຺ວາ, ອຸຏ຺ຐາຍ ຈຕຸໂຣ ຊນາ;

ເປສິຕາ ຠູຣິທຕ຺ເຕນ, ຂິປ຺ປໍ ປາເປສຸ ພ຺ຣາຫ຺ມຓໍ.

໘໒໑. ‘‘ມຓິໍ ປຄ຺ຄຍ຺ຫ ມງ຺ຄລ຺ຍໍ, ສາຘຸວິຕ຺ຕໍ [ສາຘຸຈິຕ຺ຕໍ (ປີ.)] ມໂນຣມໍ;

ເສລໍ ພ຺ຍຎ຺ຊນສມ຺ປນ຺ນໍ, ໂກ ອິມໍ ມຓິມຊ຺ຌຄາ’’.

໘໒໒. ‘‘ໂລຫິຕກ຺ຂສຫສ຺ສາຫິ, ສມນ຺ຕາ ປຣິວາຣິຕໍ;

ອຊ຺ຊ ກາລໍ ປຖໍ [ປທໍ (ສີ. ປີ.)] ຄຈ຺ຉໍ, ອຊ຺ຌຄາຫໍ ມຓິໍ ອິມໍ’’.

໘໒໓. ‘‘ສຸປຈິຓ຺ໂຓ ອຍໍ ເສໂລ, ອຈ຺ຈິໂຕ ມຫິໂຕ [ມານິໂຕ (ກ.)] ສທາ;

ສຸຘາຣິໂຕ ສຸນິກ຺ຂິຕ຺ໂຕ, ສພ຺ພຕ຺ຖມຠິສາຘເຍ.

໘໒໔. ‘‘ອຸປຈາຣວິປນ຺ນສ຺ສ, ນິກ຺ເຂເປ ຘາຣຓາຍ ວາ;

ອຍໍ ເສໂລ ວິນາສາຍ, ປຣິຈິຓ຺ໂຓ ອໂຍນິໂສ.

໘໒໕. ‘‘ນ ອິມໍ ອກຸສໂລ [ກຸສລໍ (ກ.)] ທິພ຺ຍໍ, ມຓິໍ ຘາເຣຕຸມາຣໂຫ;

ປຏິປຊ຺ຊ ສຕໍ ນິກ຺ຂໍ, ເທຫິມໍ ຣຕນໍ ມມ’’.

໘໒໖. ‘‘ນ ຈ ມ຺ຍາຍໍ ມຓີ ເກຍ຺ໂຍ, ໂຄຫິ [ເກຫິ (ກ.)] ວາ ຣຕເນຫິ ວາ;

ເສໂລ ພ຺ຍຎ຺ຊນສມ຺ປນ຺ໂນ, ເນວ ເກຍ຺ໂຍ ມຓີ ມມ’’.

໘໒໗. ‘‘ໂນ ເຈ ຕຍາ ມຓີ ເກຍ຺ໂຍ, ໂຄຫິ [ເກຫິ (ກ.)] ວາ ຣຕເນຫິ ວາ;

ອຖ ເກນ ມຓີ ເກຍ຺ໂຍ, ຕໍ ເມ ອກ຺ຂາຫິ ປຸຈ຺ຉິໂຕ’’.

໘໒໘. ‘‘ໂຍ ເມ ສໍເສ ມຫານາຄໍ, ເຕຊສ຺ສິໍ ທຸຣຕິກ຺ກມໍ;

ຕສ຺ສ ທຊ຺ຊໍ ອິມໍ ເສລໍ, ຊລນ຺ຕມິວ ເຕຊສາ’’.

໘໒໙. ‘‘ໂກ ນຸ ພ຺ຣາຫ຺ມຓວຓ຺ເຓນ, ສຸປຓ຺ໂຓ ປຕຕໍ ວໂຣ;

ນາຄໍ ຊິຄີສມນ຺ເວສິ, ອນ຺ເວສໍ ຠກ຺ຂມຕ຺ຕໂນ.

໘໓໐. ‘‘ນາຫໍ ທິຊາຘິໂປ ໂຫມິ, ນ ທິຏ຺ໂຐ ຄຣຸໂຬ ມຍາ;

ອາສີວິເສນ ວິຕ຺ໂຕຕິ [ວິຕ຺ໂຕສ຺ມິ (ສ຺ຍາ. ກ.)], ວຊ຺ໂຊ ພ຺ຣາຫ຺ມຓ ມໍ ວິທູ’’.

໘໓໑. ‘‘ກິໍ ນຸ ຕຸຍ຺ຫໍ ພລໍ ອຕ຺ຖິ, ກິໍ ສິປ຺ປໍ ວິຊ຺ຊເຕ ຕວ;

ກິສ຺ມິໍ ວາ ຕ຺ວໍ ປຣຕ຺ຖທ຺ໂຘ, ອຸຣຄໍ ນາປຈາຍສິ’’.

໘໓໒. ‘‘ອາຣຎ຺ຎິກສ຺ສ ອິສິໂນ, ຈິຣຣຕ຺ຕໍ ຕປສ຺ສິໂນ;

ສຸປຓ຺ໂຓ ໂກສິຍສ຺ສກ຺ຂາ, ວິສວິຊ຺ຊໍ ອນຸຕ຺ຕຣໍ.

໘໓໓. ‘‘ຕໍ ຠາວິຕຕ຺ຕຎ຺ຎຕຣໍ, ສມ຺ມນ຺ຕໍ ປພ຺ພຕນ຺ຕເຣ;

ສກ຺ກຈ຺ຈໍ ຕໍ ອຸປຏ຺ຐາສິໍ, ຣຕ຺ຕິນ຺ທິວມຕນ຺ທິໂຕ.

໘໓໔. ‘‘ໂສ ຕທາ ປຣິຈິຓ຺ໂຓ ເມ, ວຕ຺ຕວາ ພ຺ຣຫ຺ມຈຣິຍວາ;

ທິພ຺ພໍ ປາຕຸກຣີ ມນ຺ຕໍ, ກາມສາ ຠຄວາ ມມ.

໘໓໕. ‘‘ຕ຺ຍາຫໍ ມນ຺ເຕ ປຣຕ຺ຖທ຺ໂຘ, ນາຫໍ ຠາຍາມິ ໂຠຄິນໍ;

ອາຈຣິໂຍ ວິສຆາຕານໍ, ອລມ຺ປາໂນຕິ [ອາລມ຺ພາໂນຕິ (ສີ. ປີ.), ອາລມ຺ພາຍໂນຕິ (ສ຺ຍາ.)] ມໍ ວິທູ’’.

໘໓໖. ‘‘ຄຓ຺ຫາມເສ ມຓິໍ ຕາຕ, ໂສມທຕ຺ຕ ວິຊານຫິ;

ມາ ທຓ຺ເຑນ ສິຣິໍ ປຕ຺ຕໍ, ກາມສາ ປຊຫິມ຺ຫເສ’’.

໘໓໗. ‘‘ສກໍ ນິເວສນໍ ປຕ຺ຕໍ, ໂຍ ຕໍ ພ຺ຣາຫ຺ມຓ ປູຊຍິ;

ເອວໍ ກລ຺ຍາຓກາຣິສ຺ສ, ກິໍ ໂມຫາ ທຸພ຺ຠິມິຈ຺ຉສິ’’.

໘໓໘. ‘‘ສເຈ ຕ຺ວໍ [ສເຈ ຫິ (ສີ. ປີ. ກ.)] ຘນກາໂມສິ, ຠູຣິທຕ຺ໂຕ ປທສ຺ສຕິ [ຠູຣິທຕ຺ຕໍ ປທິສ຺ສສິ (ກ.)];

ຕເມວ ຄນ຺ຕ຺ວາ ຍາຈສ຺ສຸ, ພຫຸໍ ທສ຺ສຕິ ເຕ ຘນໍ’’.

໘໓໙. ‘‘ຫຕ຺ຖຄຕໍ ປຕ຺ຕຄຕໍ, ນິກິຓ຺ຓໍ ຂາທິຕຸໍ ວຣໍ;

ມາ ໂນ ສນ຺ທິຏ຺ຐິໂກ ອຕ຺ໂຖ, ໂສມທຕ຺ຕ ອຸປຈ຺ຈຄາ’’.

໘໔໐. ‘‘ປຈ຺ຈຕິ ນິຣເຍ ໂຆເຣ, ມຫິສ຺ສມປິ ວິວຣຕິ [ມຫິສ຺ສມວ ທີຍຕິ (ສີ. ປີ.), ມຫິມສ຺ສ ວິນ຺ທ຺ຣີຍຕິ (ສ຺ຍາ.)];

ມິຕ຺ຕທຸພ຺ຠີ ຫິຕຈ຺ຈາຄີ, ຊີວເຣວາປິ ສຸສ຺ສຕິ [ຊີວເຣ ຈາປິ ສຸສ຺ສເຣ (ສີ. ປີ.)].

໘໔໑. ‘‘ສເຈ ຕ຺ວໍ [ສເຈ ຫິ (ສີ. ປີ. ກ.)] ຘນກາໂມສິ, ຠູຣິທຕ຺ໂຕ ປທສ຺ສຕິ;

ມຎ຺ເຎ ອຕ຺ຕກຕໍ ເວຣໍ, ນຈິຣໍ ເວທຍິສ຺ສສິ’’.

໘໔໒. ‘‘ມຫາຍຎ຺ຎໍ ຍຊິຕ຺ວານ, ເອວໍ ສຸຊ຺ຌນ຺ຕິ ພ຺ຣາຫ຺ມຓາ;

ມຫາຍຎ຺ຎໍ ຍຊິສ຺ສາມ, ເອວໍ ໂມກ຺ຂາມ ປາປກາ’’.

໘໔໓. ‘‘ຫນ຺ທ ທານິ ອປາຍາມິ, ນາຫໍ ອຊ຺ຊ ຕຍາ ສຫ;

ປທມ຺ເປກໍ [ປທເມກໍ (ສ຺ຍາ. ກ.)] ນ ຄຈ຺ເຉຍ຺ຍໍ, ເອວໍ ກິພ຺ພິສກາຣິນາ’’.

໘໔໔. ‘‘ອິທໍ ວຕ຺ວານ ປິຕຣໍ, ໂສມທຕ຺ໂຕ ພຫຸສ຺ສຸໂຕ;

ອຸຊ຺ຌາເປຕ຺ວານ ຠູຕານິ, ຕມ຺ຫາ ຐານາ ອປກ຺ກມິ.

໘໔໕. ‘‘ຄຓ຺ຫາເຫຕໍ ມຫານາຄໍ, ອາຫເຣຕໍ ມຓິໍ ມມ;

ອິນ຺ທໂຄປກວຓ຺ຓາໂຠ, ຍສ຺ສ ໂລຫິຕໂກ ສິໂຣ.

໘໔໖. ‘‘ກປ຺ປາສປິຈຸຣາສີວ, ເອໂສ ກາໂຍ ປທິສ຺ສຕິ [ກາຍ’ສ຺ສ ທິສ຺ສຕິ (ສີ. ປີ.)];

ວມ຺ມິກຄ຺ຄຄໂຕ ເສຕິ, ຕໍ ຕ຺ວໍ ຄຓ຺ຫາຫິ ພ຺ຣາຫ຺ມຓ’’.

໘໔໗. ‘‘ອໂຖສເຘຫິ ທິພ຺ເພຫິ, ຊປ຺ປໍ ມນ຺ຕປທານິ ຈ;

ເອວໍ ຕໍ ອສກ຺ຂິ ສຕ຺ຖຸໍ [ສຏ຺ຐຸໍ (ສີ. ປີ.), ຍຸຏ຺ຐຸໍ (ສ຺ຍາ.), ສຸຕ຺ຕຸໍ (ກ.)], ກຕ຺ວາ ປຣິຕ຺ຕມຕ຺ຕໂນ’’.

໘໔໘. ‘‘ມມໍ ທິສ຺ວານ ອາຍນ຺ຕໍ, ສພ຺ພກາມສມິທ຺ຘິນໍ;

ອິນ຺ທ຺ຣິຍານິ ອຫຏ຺ຐານິ, ສາວໍ [ສາມໍ (ສີ. ປີ.)] ຊາຕໍ ມຸຂໍ ຕວ.

໘໔໙. ‘‘ປທ຺ມໍ ຍຖາ ຫຕ຺ຖຄຕໍ, ປາຓິນາ ປຣິມທ຺ທິຕໍ;

ສາວໍ ຊາຕໍ [ຍນ຺ຕໍ (ກ.)] ມຸຂໍ ຕຸຍ຺ຫໍ, ມມໍ ທິສ຺ວານ ເອທິສໍ.

໘໕໐. ‘‘ກຈ຺ຈິ ນຸ ເຕ ນາຠິສສິ [ເຕ ນາຠິສຍິ (ສີ.), ເຕ ນາຠິສ຺ສສິ (ສ຺ຍາ.)], ກຈ຺ຈິ ເຕ ອຕ຺ຖິ ເວທນາ;

ເຍນ ສາວໍ ມຸຂໍ ຕຸຍ຺ຫໍ, ມມໍ ທິສ຺ວານ ອາຄຕໍ’’.

໘໕໑. ‘‘ສຸປິນໍ ຕາຕ ອທ຺ທກ຺ຂິໍ, ອິໂຕ ມາສໍ ອໂຘຄຕໍ;

ທກ຺ຂິຓໍ ວິຍ ເມ ພາຫຸໍ, ເຉຕ຺ວາ ຣຸຫິຣມກ຺ຂິຕໍ;

ປຸຣິໂສ ອາທາຍ ປກ຺ກາມິ, ມມ ໂຣທນ຺ຕິຍາ ສຕິ.

໘໕໒. ‘‘ຍໂຕຫໍ [ຍໂຕ ຕໍ (ສີ.)] ສຸປິນມທ຺ທກ຺ຂິໍ, ສຸທສ຺ສນ ວິຊານຫິ;

ຕໂຕ ທິວາ ວາ ຣຕ຺ຕິໍ ວາ, ສຸຂໍ ເມ ໂນປລພ຺ຠຕິ’’.

໘໕໓. ‘‘ຍໍ ປຸພ຺ເພ ປຣິວາຣິໍສຸ [ປຣິຈາຣິໍສຸ (ສີ. ປີ.)], ກຎ຺ຎາ ຣຸຈິຣວິຄ຺ຄຫາ;

ເຫມຊາລປຏິຈ຺ຉນ຺ນາ, ຠູຣິທຕ຺ໂຕ ນ ທິສ຺ສຕິ.

໘໕໔. ‘‘ຍໍ ປຸພ຺ເພ ປຣິວາຣິໍສຸ [ປຣິຈາຣິໍສຸ (ສີ. ປີ.)], ເນຕ຺ຕິໍສວຣຘາຣິໂນ;

ກຓິກາຣາວ ສມ຺ຜຸລ຺ລາ, ຠູຣິທຕ຺ໂຕ ນ ທິສ຺ສຕິ.

໘໕໕. ‘‘ຫນ຺ທ ທານິ ຄມິສ຺ສາມ, ຠູຣິທຕ຺ຕນິເວສນໍ;

ຘມ຺ມຏ຺ຐໍ ສີລສມ຺ປນ຺ນໍ, ປສ຺ສາມ ຕວ ຠາຕຣໍ’’.

໘໕໖. ‘‘ຕຎ຺ຈ ທິສ຺ວານ ອາຍນ຺ຕິໍ, ຠູຣິທຕ຺ຕສ຺ສ ມາຕຣໍ;

ພາຫາ ປຄ຺ຄຍ຺ຫ ປກ຺ກນ຺ທຸໍ, ຠູຣິທຕ຺ຕສ຺ສ ນາຣິໂຍ.

໘໕໗. ‘‘ປຸຕ຺ຕໍ ເຕຍ຺ເຍ ນ ຊານາມ, ອິໂຕ ມາສໍ ອໂຘຄຕໍ;

ມຕໍ ວາ ຍທິ ວາ ຊີວໍ, ຠູຣິທຕ຺ຕໍ ຍສສ຺ສິນໍ’’.