໕໔໒. ອຸມງ຺ຄຊາຕກໍ (໕)

໕໙໐. ‘‘ປຎ຺ຈາໂລ ສພ຺ພເສນາຍ, ພ຺ຣຫ຺ມທຕ຺ໂຕຍມາຄໂຕ;

ສາຍໍ ປຎ຺ຈາລິຍາ ເສນາ, ອປ຺ປເມຍ຺ຍາ ມໂຫສຘ.

໕໙໑. ‘‘ວີຖິມຕີ [ປິຏ຺ຐິມຕີ (ສີ. ປີ.), ວິທ຺ຘິມຕີ (ສ຺ຍາ.)] ປຕ຺ຕິມຕີ, ສພ຺ພສງ຺ຄາມໂກວິທາ;

ໂອຫາຣິນີ ສທ຺ທວຕີ, ເຠຣິສງ຺ຂປ຺ປໂພຘນາ.

໕໙໒. ‘‘ໂລຫວິຊ຺ຊາ ອລງ຺ກາຣາ, ຘຊິນີ ວາມໂຣຫິນີ;

ສິປ຺ປິເຍຫິ ສຸສມ຺ປນ຺ນາ, ສູເຣຫິ ສຸປ຺ປຕິຏ຺ຐິຕາ.

໕໙໓. ‘‘ທເສຕ຺ຖ ປຓ຺ຑິຕາ ອາຫຸ, ຠູຣິປຎ຺ຎາ ຣໂຫຄມາ [ຣໂຫຄຕາ (ສ຺ຍາ. ກ.)];

ມາຕາ ເອກາທສີ ຣຎ຺ໂຎ, ປຎ຺ຈາລິຍໍ ປສາສຕິ.

໕໙໔. ‘‘ອເຖຕ຺ເຖກສຕໍ ຂຕ຺ຍາ, ອນຸຍນ຺ຕາ ຍສສ຺ສິໂນ;

ອຈ຺ຉິນ຺ນຣຏ຺ຐາ ພ຺ຍຖິຕາ, ປຎ຺ຈາລິຍໍ [ປຎ຺ຈາລີນໍ (ພຫູສຸ)] ວສໍ ຄຕາ.

໕໙໕. ‘‘ຍໍວທາ-ຕກ຺ກຣາ ຣຎ຺ໂຎ, ອກາມາ ປິຍຠາຓິໂນ;

ປຎ຺ຈາລມນຸຍາຍນ຺ຕິ, ອກາມາ ວສິໂນ ຄຕາ.

໕໙໖. ‘‘ຕາຍ ເສນາຍ ມິຖິລາ, ຕິສນ຺ຘິປຣິວາຣິຕາ;

ຣາຊຘານີ ວິເທຫານໍ, ສມນ຺ຕາ ປຣິຂຎ຺ຎຕິ.

໕໙໗. ‘‘ອຸທ຺ຘໍ ຕາຣກຊາຕາວ, ສມນ຺ຕາ ປຣິວາຣິຕາ;

ມໂຫສຘ ວິຊານາຫິ, ກຖໍ ໂມກ຺ໂຂ ຠວິສ຺ສຕິ’’.

໕໙໘. ‘‘ປາເທ ເທວ ປສາເຣຫິ, ຠຸຎ຺ຊ ກາເມ ຣມສ຺ສຸ ຈ;

ຫິຕ຺ວາ ປຎ຺ຈາລິຍໍ ເສນໍ, ພ຺ຣຫ຺ມທຕ຺ໂຕ ປລາຍິຕິ’’ [ປລາຍຕິ (ສີ. ສ຺ຍາ.)].

໕໙໙. ‘‘ຣາຊາ ສນ຺ຖວກາໂມ ເຕ, ຣຕນານິ ປເວຈ຺ຉຕິ;

ອາຄຈ຺ຉນ຺ຕຸ ອິໂຕ [ຕໂຕ (ສີ. ສ຺ຍາ.)] ທູຕາ, ມຎ຺ຊຸກາ ປິຍຠາຓິໂນ.

໖໐໐. ‘‘ຠາສນ຺ຕຸ ມຸທຸກາ ວາຈາ, ຍາ ວາຈາ ປຏິນນ຺ທິຕາ;

ປຎ຺ຈາໂລ ຈ ວິເທໂຫ ຈ [ປຎ຺ຈາລາ ຈ ວິເທຫາ ຈ (ສີ. ປີ.)], ອຸໂຠ ເອກາ ຠວນ຺ຕຸ ເຕ’’.

໖໐໑. ‘‘ກຖໍ ນຸ ເກວຏ຺ຏ ມໂຫສເຘນ, ສມາຄໂມ ອາສິ ຕທິງ຺ຆ ພ຺ຣູຫິ;

ກຈ຺ຈິ ເຕ ປຏິນິຊ຺ຌຕ຺ໂຕ, ກຈ຺ຈິ ຕຸຏ຺ໂຐ ມໂຫສໂຘ’’.

໖໐໒. ‘‘ອນຣິຍຣູໂປ ປຸຣິໂສ ຊນິນ຺ທ, ອສມ຺ໂມທໂກ ຖທ຺ໂຘ ອສພ຺ຠິຣູໂປ;

ຍຖາ ມູໂຄ ຈ ພຘິໂຣ ຈ, ນ ກິຎ຺ຈິຕ຺ຖໍ ອຠາສຖ’’ [ອຠາສິຕ຺ຖ (ກ.)].

໖໐໓. ‘‘ອທ຺ຘາ ອິທໍ ມນ຺ຕປທໍ ສຸທຸທ຺ທສໍ, ອຕ຺ໂຖ ສຸທ຺ໂຘ ນຣວີຣິເຍນ ທິຏ຺ໂຐ;

ຕຖາ ຫິ ກາໂຍ ມມ ສມ຺ປເວຘຕິ, ຫິຕ຺ວາ ສຍໍ ໂກ ປຣຫຕ຺ຖເມສ຺ສຕິ’’.

໖໐໔. ‘‘ຉນ຺ນຎ຺ຫິ ເອກາວ ມຕີ ສເມຕິ, ເຍ ປຓ຺ຑິຕາ ອຸຕ຺ຕມຠູຣິປຕ຺ຕາ;

ຍານໍ ອຍານໍ ອຖ ວາປິ ຐານໍ, ມໂຫສຘ ຕ຺ວມ຺ປິ ມຕິໍ ກໂຣຫິ’’.

໖໐໕. ‘‘ຊານາສິ ໂຂ ຣາຊ ມຫານຸຠາໂວ, ມຫພ຺ພໂລ ຈູຬນິພ຺ຣຫ຺ມທຕ຺ໂຕ;

ຣາຊາ ຈ ຕໍ ອິຈ຺ຉຕິ ມາຣຓຕ຺ຖໍ [ກາຣຓຕ຺ຖໍ (ສີ. ປີ.)], ມິຄໍ ຍຖາ ໂອກຈເຣນ ລຸທ຺ໂທ.

໖໐໖. ‘‘ຍຖາປິ ມຈ຺ໂຉ ພຬິສໍ, ວງ຺ກໍ ມໍເສນ ຉາທິຕໍ;

ອາມຄິທ຺ໂຘ ນ ຊານາຕິ, ມຈ຺ໂຉ ມຣຓມຕ຺ຕໂນ.

໖໐໗. ‘‘ເອວເມວ ຕຸວໍ ຣາຊ, ຈູຬເນຍ຺ຍສ຺ສ ຘີຕຣໍ;

ກາມຄິທ຺ໂຘ ນ ຊານາສິ, ມຈ຺ໂຉວ ມຣຓມຕ຺ຕໂນ.

໖໐໘. ‘‘ສເຈ ຄຈ຺ຉສິ ປຎ຺ຈາລໍ, ຂິປ຺ປມຕ຺ຕໍ ຊຫິສ຺ສຕິ;

ມິຄໍ ປນ຺ຖານຸພນ຺ຘໍວ [ປຖານຸປນ຺ນໍວ (ສີ. ສ຺ຍາ. ປີ.)], ມຫນ຺ຕໍ ຠຍເມສ຺ສຕິ’’.

໖໐໙. ‘‘ມຍເມວ ພາລມ຺ຫເສ ເອຬມູຄາ, ເຍ ອຸຕ຺ຕມຕ຺ຖານິ ຕຍີ ລປິມ຺ຫາ;

ກິເມວ ຕ຺ວໍ ນງ຺ຄລໂກຏິວຑ຺ໂຒ, ອຕ຺ຖານິ ຊານາສິ ຍຖາປິ ອຎ຺ເຎ’’.

໖໑໐. ‘‘ອິມໍ ຄເລ ຄເຫຕ຺ວານ, ນາເສຖ ວິຊິຕາ ມມ;

ໂຍ ເມ ຣຕນລາຠສ຺ສ, ອນ຺ຕຣາຍາຍ ຠາສຕິ’’.

໖໑໑. ‘‘ຕໂຕ ຈ ໂສ ອປກ຺ກມ຺ມ, ເວເທຫສ຺ສ ອຸປນ຺ຕິກາ;

ອຖ ອາມນ຺ຕຍີ ທູຕໍ, ມາຘຣໍ [ມຒຣໍ (ສີ.), ມາຘຸຣໍ (ສ຺ຍາ.), ມາຐຣໍ (ປີ.)] ສຸວປຓ຺ຑິຕໍ.

໖໑໒. ‘‘ເອຫິ ສມ຺ມ ຫຣິຕປກ຺ຂ [ຫຣີປກ຺ຂ (ສີ. ປີ.)], ເວຍ຺ຍາວຈ຺ຈໍ ກໂຣຫິ ເມ;

ອຕ຺ຖິ ປຎ຺ຈາລຣາຊສ຺ສ, ສາຬິກາ ສຍນປາລິກາ.

໖໑໓. ‘ຕໍ ພນ຺ຘເນນ [ຕໍ ປຕ຺ຖເຣນ (ສີ. ປີ.), ຕໍ ສນ຺ຖເວນ (ສ຺ຍາ.)] ປຸຈ຺ຉສ຺ສຸ, ສາ ຫິ ສພ຺ພສ຺ສ ໂກວິທາ;

ສາ ເຕສໍ ສພ຺ພໍ ຊານາຕິ, ຣຎ຺ໂຎ ຈ ໂກສິຍສ຺ສ ຈ.

໖໑໔. ‘‘‘ອາໂມ’ຕິ ໂສ ປຏິສ຺ສຸຕ຺ວາ, ມາຘໂຣ ສຸວປຓ຺ຑິໂຕ;

ອຄມາສິ ຫຣິຕປກ຺ໂຂ [ຫຣີປກ຺ໂຂ (ສີ. ປີ.)], ສາຬິກາຍ ອຸປນ຺ຕິກໍ.

໖໑໕. ‘‘ຕໂຕ ຈ ໂຂ ໂສ ຄນ຺ຕ຺ວານ, ມາຘໂຣ ສຸວປຓ຺ຑິໂຕ;

ອຖາມນ຺ຕຍິ ສຸຆຣໍ, ສາຬິກໍ ມຎ຺ຊຸຠາຓິກໍ.

໖໑໖. ‘ກຈ຺ຈິ ເຕ ສຸຆເຣ ຂມນີຍໍ, ກຈ຺ຈິ ເວສ຺ເສ ອນາມຍໍ;

ກຈ຺ຈິ ເຕ ມຘຸນາ ລາຊາ, ລພ຺ຠເຕ ສຸຆເຣ ຕຸວໍ’ [ຕວ (ສີ. ປີ.)].

໖໑໗. ‘ກຸສລຎ຺ເຈວ ເມ ສມ຺ມ, ອໂຖ ສມ຺ມ ອນາມຍໍ;

ອໂຖ ເມ ມຘຸນາ ລາຊາ, ລພ຺ຠເຕ ສຸວປຓ຺ຑິຕ.

໖໑໘. ‘ກຸໂຕ ນຸ ສມ຺ມ ອາຄມ຺ມ, ກສ຺ສ ວາ ປຫິໂຕ ຕຸວໍ;

ນ ຈ ເມສິ ອິໂຕ ປຸພ຺ເພ, ທິຏ຺ໂຐ ວາ ຍທິ ວາ ສຸໂຕ’’.

໖໑໙. ‘‘ອໂຫສິໍ ສິວິຣາຊສ຺ສ, ປາສາເທ ສຍນປາລໂກ;

ຕໂຕ ໂສ ຘມ຺ມິໂກ ຣາຊາ, ພທ຺ເຘ ໂມເຈສິ ພນ຺ຘນາ’’.

໖໒໐. ‘‘ຕສ຺ສ ເມກາ ທຸຕິຍາສິ, ສາຬິກາ ມຎ຺ຊຸຠາຓິກາ;

ຕໍ ຕຕ຺ຖ ອວຘີ ເສໂນ, ເປກ຺ຂໂຕ ສຸຆເຣ ມມ’’.

໖໒໑. ‘‘ຕສ຺ສາ ກາມາ ຫິ ສມ຺ມຕ຺ໂຕ, ອາຄໂຕສ຺ມິ ຕວນ຺ຕິເກ;

ສເຈ ກເຣຍ຺ຍ [ກເຣຍ຺ຍາສິ (ສີ.), ກເຣຍຸ (ສ຺ຍາ.), ກເຣຍ຺ຍາສິ ເມ (ປີ.)] ໂອກາສໍ, ອຸຠໂຍວ ວສາມເສ’’.

໖໒໒. ‘‘ສຸໂວວ ສຸວິໍ ກາເມຍ຺ຍ, ສາຬິໂກ ປນ ສາຬິກໍ;

ສຸວສ຺ສ ສາຬິກາເຍວ [ສາຬິກາຍ ຈ (ສີ. ປີ.)], ສໍວາໂສ ໂຫຕິ ກີທິໂສ’’.

໖໒໓. ‘‘ໂຍຍໍ ກາເມ [ຍໍ ຍໍ ກາມີ (ສີ. ປີ.)] ກາມຍຕິ, ອປິ ຈຓ຺ຑາລິກາມປິ;

ສພ຺ໂພ ຫິ ສທິໂສ ໂຫຕິ, ນຕ຺ຖິ ກາເມ ອສາທິໂສ’’.

໖໒໔. ‘‘ອຕ຺ຖິ ຊມ຺ປາວຕີ [ຊມ຺ພາວຕີ (ສີ. ສ຺ຍາ.), ຈມ຺ປາວຕີ (ກ.)] ນາມ, ມາຕາ ສິວິສ຺ສ [ສິພ຺ພິສ຺ສ (ສີ. ປີ.)] ຣາຊິໂນ;

ສາ ຠຣິຍາ ວາສຸເທວສ຺ສ, ກຓ຺ຫສ຺ສ ມເຫສີ ປິຍາ.

໖໒໕. ‘‘ຣຏ຺ຐວຕີ [ຣຖວຕີ (ສີ. ປີ.), ຣຕນວຕີ (ສ຺ຍາ.)] ກິມ຺ປຸຣິສີ, ສາປິ ວຈ຺ຉໍ ອກາມຍິ;

ມນຸສ຺ໂສ ມິຄິຍາ ສທ຺ຘິໍ, ນຕ຺ຖິ ກາເມ ອສາທິໂສ’’.

໖໒໖. ‘‘ຫນ຺ທ ຂ຺ວາຫໍ ຄມິສ຺ສາມິ, ສາຬິເກ ມຎ຺ຊຸຠາຓິເກ;

ປຈ຺ຈກ຺ຂານຸປທຎ຺ເຫຕໍ, ອຕິມຎ຺ຎສິ ນູນ ມໍ’’.

໖໒໗. ‘‘ນ ສິຣີ ຕຣມານສ຺ສ, ມາຘຣ ສຸວປຓ຺ຑິຕ;

ອິເຘວ ຕາວ ອຈ຺ຉສ຺ສຸ, ຍາວ ຣາຊານ ທກ຺ຂສິ [ທກ຺ຂິສິ (ປີ.)];

ໂສສ຺ສິ [ໂສສ຺ສສິ (ສີ.)] ສທ຺ທໍ ມຸທິງ຺ຄານໍ, ອານຸຠາວຎ຺ຈ ຣາຊິໂນ’’.

໖໒໘. ‘‘ໂຍ ນຸ ຂ຺ວາຍໍ ຕິພ຺ໂພ ສທ຺ໂທ, ຕິໂຣຊນປເທ [ຕິໂຣຊນປທໍ (ປີ. ກ.)] ສຸໂຕ;

ຘີຕາ ປຎ຺ຈາລຣາຊສ຺ສ, ໂອສຘີ ວິຍ ວຓ຺ຓິນີ;

ຕໍ ທສ຺ສຕິ ວິເທຫານໍ, ໂສ ວິວາໂຫ ຠວິສ຺ສຕິ’’.

໖໒໙. ‘‘ເອທິໂສ ມາ [ເນທິໂສ ເຕ (ສີ.)] ອມິຕ຺ຕານໍ, ວິວາໂຫ ໂຫຕຸ ມາຘຣ;

ຍຖາ ປຎ຺ຈາລຣາຊສ຺ສ, ເວເທເຫນ ຠວິສ຺ສຕິ’’.

໖໓໐. ‘‘ອານຍິຕ຺ວານ ເວເທຫໍ, ປຎ຺ຈາລານໍ ຣເຖສໂຠ;

ຕໂຕ ນໍ ຆາຕຍິສ຺ສຕິ, ນສ຺ສ ສຂີ ຠວິສ຺ສຕິ’’.

໖໓໑. ‘‘ຫນ຺ທ ໂຂ ມໍ ອນຸຊານາຫິ, ຣຕ຺ຕິໂຍ ສຕ຺ຕມຕ຺ຕິໂຍ;

ຍາວາຫໍ ສິວິຣາຊສ຺ສ, ອາໂຣເຈມິ ມເຫສິໂນ;

ລທ຺ໂຘ ຈ ເມ ອາວສໂຖ, ສາຬິກາຍ ອຸປນ຺ຕິກໍ’’ [ອຸປນ຺ຕິກາ (ສີ. ກ.)].

໖໓໒. ‘‘ຫນ຺ທ ໂຂ ຕໍ ອນຸຊານາມິ, ຣຕ຺ຕິໂຍ ສຕ຺ຕມຕ຺ຕິໂຍ;

ສເຈ ຕ຺ວໍ ສຕ຺ຕຣຕ຺ເຕນ, ນາຄຈ຺ຉສິ ມມນ຺ຕິເກ;

ມຎ຺ເຎ ໂອກ຺ກນ຺ຕສຕ຺ຕໍ [ໂອກ຺ກນ຺ຕສນ຺ຕໍ (ສ຺ຍາ. ປີ. ກ.)] ມໍ, ມຕາຍ ອາຄມິສ຺ສສິ’’.

໖໓໓. ‘‘ຕໂຕ ຈ ໂຂ ໂສ ຄນ຺ຕ຺ວານ, ມາຘໂຣ ສຸວປຓ຺ຑິໂຕ;

ມໂຫສຘສ຺ສ ອກ຺ຂາສິ, ສາຬິກາວຈນໍ ອິທໍ’’.

໖໓໔. ‘‘ຍສ຺ເສວ ຆເຣ ຠຸຎ຺ເຊຍ຺ຍ ໂຠຄໍ, ຕສ຺ເສວ ອຕ຺ຖໍ ປຸຣິໂສ ຈເຣຍ຺ຍ’’;

‘‘ຫນ຺ທາຫໍ ຄຈ຺ຉາມິ ປຸເຣ ຊນິນ຺ທ, ປຎ຺ຈາລຣາຊສ຺ສ ປຸຣໍ ສຸຣມ຺ມໍ;

ນິເວສນານິ ມາເປຕຸໍ, ເວເທຫສ຺ສ ຍສສ຺ສິໂນ.

໖໓໕. ‘‘ນິເວສນານິ ມາເປຕ຺ວາ, ເວເທຫສ຺ສ ຍສສ຺ສິໂນ;

ຍທາ ເຕ ປຫິເຓຍ຺ຍາມິ, ຕທາ ເອຍ຺ຍາສິ ຂຕ຺ຕິຍ’’.

໖໓໖. ‘‘ຕໂຕ ຈ ປາຍາສິ ປຸເຣ ມໂຫສໂຘ, ປຎ຺ຈາລຣາຊສ຺ສ ປຸຣໍ ສຸຣມ຺ມໍ;

ນິເວສນານິ ມາເປຕຸໍ, ເວເທຫສ຺ສ ຍສສ຺ສິໂນ’’.

໖໓໗. ‘‘ນິເວສນານິ ມາເປຕ຺ວາ, ເວເທຫສ຺ສ ຍສສ຺ສິໂນ;

ອຖສ຺ສ ປາຫິຓີ ທູຕໍ, [ນຕ຺ຖິ ສີ. ປີ. ໂປຕ຺ຖເກສຸ] ເວເທຫໍ ມິຖິລຄ຺ຄຫໍ [ນຕ຺ຖິ ສີ. ປີ. ໂປຕ຺ຖເກສຸ];

ເອຫິ ທານິ ມຫາຣາຊ, ມາປິຕໍ ເຕ ນິເວສນໍ’’.

໖໓໘. ‘‘ຕໂຕ ຈ ຣາຊາ ປາຍາສິ, ເສນາຍ ຈຕຸຣງ຺ຄິຍາ [ຈຕຸຣງ຺ຄິນິຍາ (ກ.)];

ອນນ຺ຕວາຫນໍ ທຏ຺ຐຸໍ, ຜີຕໍ ກປິລິຍໍ [ກມ຺ປິລ຺ລິຍໍ (ສີ. ປີ.)] ປຸຣໍ’’.

໖໓໙. ‘‘ຕໂຕ ຈ ໂຂ ໂສ ຄນ຺ຕ຺ວານ, ພ຺ຣຫ຺ມທຕ຺ຕສ຺ສ ປາຫິຓິ;

‘ອາຄໂຕ’ສ຺ມິ ມຫາຣາຊ, ຕວ ປາທານິ ວນ຺ທິຕຸໍ.

໖໔໐. ‘ທທາຫິ ທານິ ເມ ຠຣິຍໍ, ນາຣິໍ ສພ຺ພງ຺ຄໂສຠິນິໍ;

ສຸວຓ຺ເຓນ ປຏິຈ຺ຉນ຺ນໍ, ທາສີຄຓປຸຣກ຺ຂຕໍ’’’.

໖໔໑. ‘‘ສ຺ວາຄຕໍ ເຕວ [ເຕ (ສີ.), ເຕປິ (ສ຺ຍາ.), ເຕນ (ປີ.)] ເວເທຫ, ອໂຖ ເຕ ອທຸຣາຄຕໍ;

ນກ຺ຂຕ຺ຕໍເຍວ ປຣິປຸຈ຺ຉ, ອຫໍ ກຎ຺ຎໍ ທທາມິ ເຕ;

ສຸວຓ຺ເຓນ ປຏິຈ຺ຉນ຺ນໍ, ທາສີຄຓປຸຣກ຺ຂຕໍ’’.

໖໔໒. ‘‘ຕໂຕ ຈ ຣາຊາ ເວເທໂຫ, ນກ຺ຂຕ຺ຕໍ ປຣິປຸຈ຺ຉຖ [ປຣິປຸຈ຺ຉຕິ (ສ຺ຍາ. ກ.)];

ນກ຺ຂຕ຺ຕໍ ປຣິປຸຈ຺ຉິຕ຺ວາ, ພ຺ຣຫ຺ມທຕ຺ຕສ຺ສ ປາຫິຓິ.

໖໔໓. ‘‘ທທາຫິ ທານິ ເມ ຠຣິຍໍ, ນາຣິໍ ສພ຺ພງ຺ຄໂສຠິນິໍ;

ສຸວຓ຺ເຓນ ປຏິຈ຺ຉນ຺ນໍ, ທາສີຄຓປຸຣກ຺ຂຕໍ’’.

໖໔໔. ‘‘ທທາມິ ທານິ ເຕ ຠຣິຍໍ, ນາຣິໍ ສພ຺ພງ຺ຄໂສຠິນິໍ;

ສຸວຓ຺ເຓນ ປຏິຈ຺ຉນ຺ນໍ, ທາສີຄຓປຸຣກ຺ຂຕໍ’’.

໖໔໕. ‘‘ຫຕ຺ຖີ ອສ຺ສາ ຣຖາ ປຕ຺ຕີ, ເສນາ ຕິຏ຺ຐນ຺ຕິ ວມ຺ມິຕາ [ວມ຺ມິກາ (ສ຺ຍາ. ກ.)];

ອຸກ຺ກາ ປທິຕ຺ຕາ ຌາຍນ຺ຕິ, ກິນ຺ນຸ ມຎ຺ຎນ຺ຕິ ປຓ຺ຑິຕາ.

໖໔໖. ‘‘ຫຕ຺ຖີ ອສ຺ສາ ຣຖາ ປຕ຺ຕີ, ເສນາ ຕິຏ຺ຐນ຺ຕິ ວມ຺ມິຕາ [ວມ຺ມິກາ (ສ຺ຍາ. ກ.)];

ອຸກ຺ກາ ປທິຕ຺ຕາ ຌາຍນ຺ຕິ, ກິໍ ນຸ ກາຫນ຺ຕິ [ກາຫຕິ (ກ.)] ປຓ຺ຑິຕ’’.

໖໔໗. ‘‘ຣກ຺ຂຕິ ຕໍ ມຫາຣາຊ, ຈູຬເນຍ຺ໂຍ ມຫພ຺ພໂລ;

ປທຸຏ຺ໂຐ ພ຺ຣຫ຺ມທຕ຺ເຕນ [ປທຸຏ຺ໂຐ ເຕ ພ຺ຣຫ຺ມທຕ຺ໂຕ (ສີ. ສ຺ຍາ. ປີ.)], ປາໂຕ ຕໍ ຆາຕຍິສ຺ສຕິ’’.

໖໔໘. ‘‘ອຸພ຺ເພຘຕິ ເມ ຫທຍໍ, ມຸຂຎ຺ຈ ປຣິສຸສ຺ສຕິ;

ນິພ຺ພຸຕິໍ ນາຘິຄຈ຺ຉາມິ, ອຄ຺ຄິທຑ຺ໂຒວ ອາຕເປ.

໖໔໙. ‘‘ກມ຺ມາຣານໍ ຍຖາ ອຸກ຺ກາ, ອນ຺ໂຕ ຌາຍຕິ ໂນ ພຫິ;

ເອວມ຺ປິ ຫທຍໍ ມຍ຺ຫໍ, ອນ຺ໂຕ ຌາຍຕິ ໂນ ພຫິ’’.

໖໕໐. ‘‘ປມຕ຺ໂຕ ມນ຺ຕນາຕີໂຕ, ຠິນ຺ນມນ຺ໂຕສິ ຂຕ຺ຕິຍ;

ອິທານິ ໂຂ ຕໍ ຕາຍນ຺ຕຸ, ປຓ຺ຑິຕາ ມນ຺ຕິໂນ ຊນາ.

໖໕໑. ‘‘ອກຕ຺ວາມຈ຺ຈສ຺ສ ວຈນໍ, ອຕ຺ຖກາມຫິເຕສິໂນ;

ອຕ຺ຕປີຕິຣໂຕ ຣາຊາ, ມິໂຄ ກູເຏວ ໂອຫິໂຕ.

໖໕໒. ‘‘ຍຖາປິ ມຈ຺ໂຉ ພຬິສໍ, ວງ຺ກໍ ມໍເສນ ຉາທິຕໍ;

ອາມຄິທ຺ໂຘ ນ ຊານາຕິ, ມຈ຺ໂຉ ມຣຓມຕ຺ຕໂນ.

໖໕໓. ‘‘ເອວເມວ ຕຸວໍ ຣາຊ, ຈູຬເນຍ຺ຍສ຺ສ ຘີຕຣໍ;

ກາມຄິທ຺ໂຘ ນ ຊານາສິ, ມຈ຺ໂຉວ ມຣຓມຕ຺ຕໂນ.

໖໕໔. ‘‘ສເຈ ຄຈ຺ຉສິ ປຎ຺ຈາລໍ, ຂິປ຺ປມຕ຺ຕໍ ຊຫິສ຺ສສິ;

ມິຄໍ ປນ຺ຖານຸພນ຺ຘໍວ, ມຫນ຺ຕໍ ຠຍເມສ຺ສຕິ.

໖໕໕. ‘‘ອນຣິຍຣູໂປ ປຸຣິໂສ ຊນິນ຺ທ, ອຫີວ ອຸຈ຺ຉງ຺ຄຄໂຕ ຑເສຍ຺ຍ;

ນ ເຕນ ມິຕ຺ຕິໍ ກຍິຣາຖ ຘີໂຣ [ປຎ຺ໂຎ (ປີ.)], ທຸກ຺ໂຂ ຫເວ ກາປຸຣິເສນ [ກາປຸຣິເສຫິ (ກ.)] ສງ຺ຄໂມ.

໖໕໖. ‘‘ຍເທວ [ຍໍ ຕ຺ເວວ (ສີ. ສ຺ຍາ. ປີ.)] ຊຎ຺ຎາ ປຸຣິສໍ [ປຸຣິໂສ (ສ຺ຍາ. ກ.)] ຊນິນ຺ທ, ສີລວາຍໍ ພຫຸສ຺ສຸໂຕ;

ເຕເນວ ມິຕ຺ຕິໍ ກຍິຣາຖ ຘີໂຣ, ສຸໂຂ ຫເວ ສປ຺ປຸຣິເສນ ສງ຺ຄໂມ’’.

໖໕໗. ‘‘ພາໂລ ຕຸວໍ ເອຬມູໂຄສິ ຣາຊ, ໂຍ ອຸຕ຺ຕມຕ຺ຖານິ ມຍີ ລປິຕ຺ໂຖ;

ກິເມວຫໍ ນງ຺ຄລໂກຏິວຑ຺ໂຒ, ອຕ຺ຖານິ ຊານາມິ [ຊານິສ຺ສໍ (ສີ. ສ຺ຍາ. ປີ.)] ຍຖາປິ ອຎ຺ເຎ.

໖໕໘. ‘‘ອິມໍ ຄເລ ຄເຫຕ຺ວານ, ນາເສຖ ວິຊິຕາ ມມ;

ໂຍ ເມ ຣຕນລາຠສ຺ສ, ອນ຺ຕຣາຍາຍ ຠາສຕິ’’.

໖໕໙. ‘‘ມໂຫສຘ ອຕີເຕນ, ນານຸວິຊ຺ຌນ຺ຕິ ປຓ຺ຑິຕາ;

ກິໍ ມໍ ອສ຺ສໍວ ສມ຺ພນ຺ຘໍ, ປໂຕເທເນວ ວິຊ຺ຌສິ.

໖໖໐. ‘‘ສເຈ ປສ຺ສສິ ໂມກ຺ຂໍ ວາ, ເຂມໍ ວາ ປນ ປສ຺ສສິ;

ເຕເນວ ມໍ ອນຸສາສ, ກິໍ ອຕີເຕນ ວິຊ຺ຌສິ’’.