໕໔໑. ນິມິຊາຕກໍ (໔)

໔໒໑. ‘‘ອຈ຺ເຉຣໍ ວຕ ໂລກສ຺ມິໍ, ອຸປ຺ປຊ຺ຊນ຺ຕິ ວິຈກ຺ຂຓາ;

ຍທາ ອຫຸ ນິມິຣາຊາ, ປຓ຺ຑິໂຕ ກຸສລຕ຺ຖິໂກ.

໔໒໒. ‘‘ຣາຊາ ສພ຺ພວິເທຫານໍ, ອທາ ທານໍ ອຣິນ຺ທໂມ;

ຕສ຺ສ ຕໍ ທທໂຕ ທານໍ, ສງ຺ກປ຺ໂປ ອຸທປຊ຺ຊຖ;

ທານໍ ວາ ພ຺ຣຫ຺ມຈຣິຍໍ ວາ, ກຕມໍ ສຸ ມຫປ຺ຜລໍ.

໔໒໓. ຕສ຺ສ ສງ຺ກປ຺ປມຎ຺ຎາຍ, ມຆວາ ເທວກຸຎ຺ຊໂຣ;

ສຫສ຺ສເນຕ຺ໂຕ ປາຕຸຣຫຸ, ວຓ຺ເຓນ ວິຫນໍ [ນິຫນໍ (ສີ. ປີ.), ວິຫຕໍ (ສ຺ຍາ. ກ.)] ຕມໍ.

໔໒໔. ສໂລມຫຏ຺ໂຐ ມນຸຊິນ຺ໂທ, ວາສວໍ ອວຈາ ນິມິ;

‘‘ເທວຕາ ນຸສິ ຄນ຺ຘພ຺ໂພ, ອທຸ ສກ຺ໂກ ປຸຣິນ຺ທໂທ.

໔໒໕. ‘‘ນ ຈ ເມ ຕາທິໂສ ວຓ຺ໂຓ, ທິຏ຺ໂຐ ວາ ຍທິ ວາ ສຸໂຕ;

[ນຕ຺ຖິ ສີ. ປີ. ໂປຕ຺ຖເກສຸ] ອາຈິກ຺ຂ ເມ ຕ຺ວໍ ຠທ຺ທນ຺ເຕ, ກຖໍ ຊາເນມຸ ຕໍ ມຍໍ’’ [ນຕ຺ຖິ ສີ. ປີ. ໂປຕ຺ຖເກສຸ].

໔໒໖. ສໂລມຫຏ຺ຐໍ ຎຕ຺ວານ, ວາສໂວ ອວຈາ ນິມິໍ;

‘‘ສກ຺ໂກຫມສ຺ມິ ເທວິນ຺ໂທ, ອາຄໂຕສ຺ມິ ຕວນ຺ຕິເກ;

ອໂລມຫຏ຺ໂຐ ມນຸຊິນ຺ທ, ປຸຈ຺ຉ ປຎ຺ຫໍ ຍມິຈ຺ຉສິ’’.

໔໒໗. ໂສ ຈ ເຕນ ກໂຕກາໂສ, ວາສວໍ ອວຈາ ນິມິ;

‘‘ປຸຈ຺ຉາມິ ຕໍ ມຫາຣາຊ [ມຫາພາຫຸ (ສີ. ປີ.), ເທວຣາຊ (ກ.)], ສພ຺ພຠູຕານມິສ຺ສຣ;

ທານໍ ວາ ພ຺ຣຫ຺ມຈຣິຍໍ ວາ, ກຕມໍ ສຸ ມຫປ຺ຜລໍ’’.

໔໒໘. ໂສ ປຸຏ຺ໂຐ ນຣເທເວນ, ວາສໂວ ອວຈາ ນິມິໍ;

‘‘ວິປາກໍ ພ຺ຣຫ຺ມຈຣິຍສ຺ສ, ຊານໍ ອກ຺ຂາສິຊານໂຕ.

໔໒໙. ‘‘ຫີເນນ ພ຺ຣຫ຺ມຈຣິເຍນ, ຂຕ຺ຕິເຍ ອຸປປຊ຺ຊຕິ;

ມຊ຺ຌິເມນ ຈ ເທວຕ຺ຕໍ, ອຸຕ຺ຕເມນ ວິສຸຊ຺ຌຕິ.

໔໓໐. ‘‘ນ ເຫເຕ ສຸລຠາ ກາຍາ, ຍາຈໂຍເຄນ ເກນຈິ;

ເຍ ກາເຍ ອຸປປຊ຺ຊນ຺ຕິ, ອນາຄາຣາ ຕປສ຺ສິໂນ.

໔໓໑. ‘‘ທຸທີໂປ [ທຸຕິໂປ (ກ.)] ສາຄໂຣ ເສໂລ, ມຸຊກິນ຺ໂທ [ມຸຈລິນ຺ໂທ (ສີ. ສ຺ຍາ. ປີ.), ມຸຊກິນ຺ໂຕ (ກ.)] ຠຄີຣໂສ;

ອຸສິນ຺ທໂຣ [ອຸສີນໂຣ (ສີ. ປີ.)] ກສ຺ສໂປ ຈ [ອຏ຺ຐໂກ ຈ (ສີ. ປີ.), ອຕ຺ຖໂກ ຈ (ສ຺ຍາ.)], ອສໂກ ຈ ປຸຖຸຊ຺ຊໂນ.

໔໓໒. ‘‘ເອເຕ ຈຎ຺ເຎ ຈ ຣາຊາໂນ, ຂຕ຺ຕິຍາ ພ຺ຣາຫ຺ມຓາ ພຫູ;

ປຸຖຸຍຎ຺ຎໍ ຍຊິຕ຺ວານ, ເປຕຕ຺ຕໍ [ເປຕໍ ເຕ (ສີ. ປີ.)] ນາຕິວຕ຺ຕິສຸໍ.

໔໓໓. ‘‘ອຖ ຍີເມ [ອທ຺ຘາ ອິເມ (ສີ. ປີ.), ອທ຺ຘາຍິເມ (ສ຺ຍາ.)] ອວຕ຺ຕິໍສຸ, ອນາຄາຣາ ຕປສ຺ສິໂນ;

ສຕ຺ຕິສໂຍ ຍາມຫນຸ, ໂສມຍາໂມ [ໂສມຍາໂຄ (ສີ. ສ຺ຍາ. ປີ.)] ມໂນຊໂວ.

໔໓໔. ‘‘ສມຸທ຺ໂທ ມາໂຆ ຠຣໂຕ ຈ, ອິສິ ກາລປຸຣກ຺ຂໂຕ [ກາລິກຣິກ຺ຂິໂຍ (ສີ. ປີ.)];

ອງ຺ຄີຣໂສ ກສ຺ສໂປ ຈ, ກິສວຈ຺ໂຉ ອກຕ຺ຕິ [ອກິຕ຺ຕິ (ສີ. ປີ.), ອກນ຺ຕິ (ສ຺ຍາ.)] ຈ.

໔໓໕. ‘‘ອຸຕ຺ຕເຣນ ນທີ ສີທາ, ຄມ຺ຠີຣາ ທຸຣຕິກ຺ກມາ;

ນຬຄ຺ຄິວຓ຺ຓາ ໂຊຕນ຺ຕິ, ສທາ ກຎ຺ຈນປພ຺ພຕາ.

໔໓໖. ‘‘ປຣູຬ຺ຫກຈ຺ຉາ ຕຄຣາ, ຣູຬ຺ຫກຈ຺ຉາ ວນາ ນຄາ;

ຕຕ຺ຣາສຸໍ ທສສຫສ຺ສາ, ໂປຣາຓາ ອິສໂຍ ປຸເຣ.

໔໓໗. ‘‘ອຫໍ ເສຏ຺ໂຐສ຺ມິ ທາເນນ, ສໍຍເມນ ທເມນ ຈ;

ອນຸຕ຺ຕຣໍ ວຕໍ ກຕ຺ວາ, ປກິຣຈາຣີ ສມາຫິເຕ.

໔໓໘. ‘‘ຊາຕິມນ຺ຕໍ ອຊຈ຺ຈຎ຺ຈ, ອຫໍ ອຸຊຸຄຕໍ ນຣໍ;

ອຕິເວລໍ ນມສ຺ສິສ຺ສໍ, ກມ຺ມພນ຺ຘູ ຫິ ມາຓວາ [ມາຕິຍາ (ສີ. ປີ.)].

໔໓໙. ‘‘ສພ຺ເພ ວຓ຺ຓາ ອຘມ຺ມຏ຺ຐາ, ປຕນ຺ຕິ ນິຣຍໍ ອໂຘ;

ສພ຺ເພ ວຓ຺ຓາ ວິສຸຊ຺ຌນ຺ຕິ, ຈຣິຕ຺ວາ ຘມ຺ມມຸຕ຺ຕມໍ’’.

໔໔໐. ອິທໍ ວຕ຺ວານ ມຆວາ, ເທວຣາຊາ ສຸຊມ຺ປຕິ;

ເວເທຫມນຸສາສິຕ຺ວາ, ສຄ຺ຄກາຍໍ ອປກ຺ກມິ.

໔໔໑. ‘‘ອິມໍ ໂຠນ຺ໂຕ ນິສາເມຖ, ຍາວນ຺ເຕຕ຺ຖ ສມາຄຕາ;

ຘມ຺ມິການໍ ມນຸສ຺ສານໍ, ວຓ຺ຓໍ ອຸຈ຺ຈາວຈໍ ພຫຸໍ.

໔໔໒. ‘‘ຍຖາ ອຍໍ ນິມິຣາຊາ, ປຓ຺ຑິໂຕ ກຸສລຕ຺ຖິໂກ;

ຣາຊາ ສພ຺ພວິເທຫານໍ, ອທາ ທານໍ ອຣິນ຺ທໂມ.

໔໔໓. ‘‘ຕສ຺ສ ຕໍ ທທໂຕ ທານໍ, ສງ຺ກປ຺ໂປ ອຸທປຊ຺ຊຖ;

ທານໍ ວາ ພ຺ຣຫ຺ມຈຣິຍໍ ວາ, ກຕມໍ ສຸ ມຫປ຺ຜລໍ’’.

໔໔໔. ອພ຺ຠຸໂຕ ວຕ ໂລກສ຺ມິໍ, ອຸປ຺ປຊ຺ຊິ ໂລມຫໍສໂນ;

ທິພ຺ໂພ ຣໂຖ ປາຕຸຣຫຸ, ເວເທຫສ຺ສ ຍສສ຺ສິໂນ.

໔໔໕. ເທວປຸຕ຺ໂຕ ມຫິທ຺ຘິໂກ, ມາຕລິ ເທວສາຣຖິ;

ນິມນ຺ຕຍິຕ຺ຖ ຣາຊານໍ, ເວເທຫໍ ມິຖິລຄ຺ຄຫໍ.

໔໔໖. ‘‘ເອຫິມໍ ຣຖມາຣຸຍ຺ຫ, ຣາຊເສຏ຺ຐ ທິສມ຺ປຕິ;

ເທວາ ທສ຺ສນກາມາ ເຕ, ຕາວຕິໍສາ ສອິນ຺ທກາ;

ສຣມານາ ຫິ ເຕ ເທວາ, ສຸຘມ຺ມາຍໍ ສມຈ຺ຉເຣ’’.

໔໔໗. ຕໂຕ ຣາຊາ ຕຣມາໂນ, ເວເທໂຫ ມິຖິລຄ຺ຄໂຫ;

ອາສນາ ວຸຏ຺ຐຫິຕ຺ວານ, ປມຸໂຂ ຣຖມາຣຸຫິ.

໔໔໘. ອຠິຣູຬ຺ຫໍ ຣຖໍ ທິພ຺ພໍ, ມາຕລິ ເອຕທພ຺ຣວິ;

‘‘ເກນ ຕໍ ເນມິ ມຄ຺ເຄນ, ຣາຊເສຏ຺ຐ ທິສມ຺ປຕິ;

ເຍນ ວາ ປາປກມ຺ມນ຺ຕາ, ປຸຎ຺ຎກມ຺ມາ ຈ ເຍ ນຣາ’’.

໔໔໙. ‘‘ອຸຠເຍເນວ ມໍ ເນຫິ, ມາຕລິ ເທວສາຣຖິ;

ເຍນ ວາ ປາປກມ຺ມນ຺ຕາ, ປຸຎ຺ຎກມ຺ມາ ຈ ເຍ ນຣາ’’.

໔໕໐. ‘‘ເກນ ຕໍ ປຐມໍ ເນມິ, ຣາຊເສຏ຺ຐ ທິສມ຺ປຕິ;

ເຍນ ວາ ປາປກມ຺ມນ຺ຕາ, ປຸຎ຺ຎກມ຺ມາ ຈ ເຍ ນຣາ’’.

໔໕໑. ‘‘ນິຣເຍ [ນິຣິຍໍ (ສ຺ຍາ. ກ.)] ຕາວ ປສ຺ສາມິ, ອາວາເສ [ອາວາສໍ (ສ຺ຍາ. ກ.)] ປາປກມ຺ມິນໍ;

ຐານານິ ລຸທ຺ທກມ຺ມານໍ, ທຸສ຺ສີລານຎ຺ຈ ຍາ ຄຕິ’’.

໔໕໒. ທສ຺ເສສິ ມາຕລິ ຣຎ຺ໂຎ, ທຸຄ຺ຄໍ ເວຕຣຓິໍ ນທິໍ;

ກຸຖິຕໍ ຂາຣສໍຍຸຕ຺ຕໍ, ຕຕ຺ຕໍ ອຄ຺ຄິສິຂູປມໍ [ອຄ຺ຄິສໂມທກໍ (ກ.)].

໔໕໓. ນິມີ ຫເວ ມາຕລິມຊ຺ຌຠາສຖ [ມາຕລິມຊ຺ຌຠາສິ (ສ຺ຍາ.)], ທິສ຺ວາ ຊນໍ ປຕມານໍ ວິທຸຄ຺ເຄ;

‘‘ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ເວຕຣຓິໍ ປຕນ຺ຕິ’’.

໔໕໔. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໕໕. ‘‘ເຍ ທຸພ຺ພເລ ພລວນ຺ຕາ ຊີວໂລເກ, ຫິໍສນ຺ຕິ ໂຣສນ຺ຕິ ສຸປາປຘມ຺ມາ;

ເຕ ລຸທ຺ທກມ຺ມາ ປສເວຕ຺ວ ປາປໍ, ເຕເມ ຊນາ ເວຕຣຓິໍ ປຕນ຺ຕິ’’.

໔໕໖. ‘‘ສາມາ ຈ ໂສຓາ ສພລາ ຈ ຄິຊ຺ຌາ, ກາໂກລສງ຺ຆາ ອທນ຺ຕິ [ອເທນ຺ຕິ (ສີ. ສ຺ຍາ. ປີ.) ເອວມຸປຣິປິ] ເຠຣວາ;

ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊເນ ກາໂກລສງ຺ຆາ ອທນ຺ຕິ’’.

໔໕໗. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໕໘. ‘‘ເຍ ເກຈິເມ ມຈ຺ຉຣິໂນ ກທຣິຍາ, ປຣິຠາສກາ ສມຓພ຺ຣາຫ຺ມຓານໍ;

ຫິໍສນ຺ຕິ ໂຣສນ຺ຕິ ສຸປາປຘມ຺ມາ, ເຕ ລຸທ຺ທກມ຺ມາ ປສເວຕ຺ວ ປາປໍ;

ເຕເມ ຊເນ ກາໂກລສງ຺ຆາ ອທນ຺ຕິ’’.

໔໕໙. ‘‘ສໂຊຕິຠູຕາ ປຖວິໍ ກມນ຺ຕິ, ຕຕ຺ເຕຫິ ຂນ຺ເຘຫິ ຈ ໂປຖຍນ຺ຕິ;

ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ຂນ຺ຘຫຕາ ສຍນ຺ຕິ’’.

໔໖໐. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໖໑. ‘‘ເຍ ຊີວໂລກສ຺ມິ ສຸປາປຘມ຺ມິໂນ, ນຣຎ຺ຈ ນາຣິຎ຺ຈ ອປາປຘມ຺ມໍ;

ຫິໍສນ຺ຕິ ໂຣສນ຺ຕິ ສຸປາປຘມ຺ມາ [ສຸປາປຘມ຺ມິໂນ (ກ.)], ເຕ ລຸທ຺ທກມ຺ມາ ປສເວຕ຺ວ ປາປໍ;

ເຕເມ ຊນາ ຂນ຺ຘຫຕາ ສຍນ຺ຕິ’’.

໔໖໒. ‘‘ອງ຺ຄາຣກາສຸໍ ອປເຣ ຜຸຓນ຺ຕິ [ຖຸນນ຺ຕິ (ສີ. ສ຺ຍາ.), ຜຸນນ຺ຕິ (ປີ.)], ນຣາ ຣຸທນ຺ຕາ ປຣິທຑ຺ຒຄຕ຺ຕາ;

ຠຍຎ຺ຫິ ມໍ ວິທນ຺ຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ອງ຺ຄາຣກາສຸໍ ຜຸຓນ຺ຕິ’’.

໔໖໓. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໖໔. ‘‘ເຍ ເກຈິ ປູຄາຍ ຘນສ຺ສ [ປູຄາຍຕນສ຺ສ (ສີ. ປີ.)] ເຫຕຸ, ສກ຺ຂິໍ ກຣິຕ຺ວາ ອິຓໍ ຊາປຍນ຺ຕິ;

ເຕ ຊາປຍິຕ຺ວາ ຊນຕໍ ຊນິນ຺ທ, ເຕ ລຸທ຺ທກມ຺ມາ ປສເວຕ຺ວ ປາປໍ;

ເຕເມ ຊນາ ອງ຺ຄາຣກາສຸໍ ຜຸຓນ຺ຕິ’’.

໔໖໕. ‘‘ສໂຊຕິຠູຕາ ຊລິຕາ ປທິຕ຺ຕາ, ປທິສ຺ສຕິ ມຫຕີ ໂລຫກຸມ຺ຠີ;

ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ອວໍສິຣາ ໂລຫກຸມ຺ຠິໍ ປຕນ຺ຕິ’’.

໔໖໖. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໖໗. ‘‘ເຍ ສີລວນ຺ຕໍ [ສີລວໍ (ປີ.)] ສມຓໍ ພ຺ຣາຫ຺ມຓໍ ວາ, ຫິໍສນ຺ຕິ ໂຣສນ຺ຕິ ສຸປາປຘມ຺ມາ;

ເຕ ລຸທ຺ທກມ຺ມາ ປສເວຕ຺ວ ປາປໍ, ເຕເມ ຊນາ ອວໍສິຣາ ໂລຫກຸມ຺ຠິໍ ປຕນ຺ຕິ’’.

໔໖໘. ‘‘ລຸຎ຺ຈນ຺ຕິ ຄີວໍ ອຖ ເວຐຍິຕ຺ວາ [ອວິເວຐຍິຕ຺ວາ (ກ.)], ອຸຓ຺ໂຫທກສ຺ມິໍ ປກິເລທຍິຕ຺ວາ [ປກິເລທຍິຕ຺ວາ (ສີ. ປີ.)];

ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ລຸຕ຺ຕສິຣາ ສຍນ຺ຕິ’’.

໔໖໙. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໗໐. ‘‘ເຍ ຊີວໂລກສ຺ມິ ສຸປາປຘມ຺ມິໂນ, ປກ຺ຂີ ຄເຫຕ຺ວານ ວິເຫຐຍນ຺ຕິ ເຕ;

ວິເຫຐຍິຕ຺ວາ ສກຸຓໍ ຊນິນ຺ທ, ເຕ ລຸທ຺ທກາມາ ປສເວຕ຺ວ ປາປໍ;

ເຕເມ ຊນາ ລຸຕ຺ຕສິຣາ ສຍນ຺ຕິ.

໔໗໑. ‘‘ປຫູຕໂຕຍາ ອນິຄາຘກູລາ [ອນິຂາຕກູລາ (ສີ. ສ຺ຍາ. ປີ.)], ນທີ ອຍໍ ສນ຺ທຕິ ສຸປ຺ປຕິຕ຺ຖາ;

ຆມ຺ມາຠິຕຕ຺ຕາ ມນຸຊາ ປິວນ຺ຕິ, ປີຕຎ຺ຈ [ປິວຕໍ ຈ (ສີ. ສ຺ຍາ. ປີ. ກ.)] ເຕສໍ ຠຸສ ໂຫຕິ ປານິ.

໔໗໒. ‘‘ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ປີຕຎ຺ຈ ເຕສໍ ຠຸສ ໂຫຕິ ປານິ’’.

໔໗໓. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໗໔. ‘‘ເຍ ສຸທ຺ຘຘຎ຺ຎໍ ປລາເສນ ມິສ຺ສໍ, ອສຸທ຺ຘກມ຺ມາ ກຍິໂນ ທທນ຺ຕິ;

ຆມ຺ມາຠິຕຕ຺ຕານ ປິປາສິຕານໍ, ປີຕຎ຺ຈ ເຕສໍ ຠຸສ ໂຫຕິ ປານິ’’.

໔໗໕. ‘‘ອຸສູຫິ ສຕ຺ຕີຫິ ຈ ໂຕມເຣຫິ, ທຸຠຍານິ ປສ຺ສານິ ຕຸທນ຺ຕິ ກນ຺ທຕໍ;

ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ສຕ຺ຕິຫຕາ ສຍນ຺ຕິ’’.

໔໗໖. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໗໗. ‘‘ເຍ ຊີວໂລກສ຺ມິ ອສາຘຸກມ຺ມິໂນ, ອທິນ຺ນມາທາຍ ກໂຣນ຺ຕິ ຊີວິກໍ;

ຘຎ຺ຎໍ ຘນໍ ຣຊຕໍ ຊາຕຣູປໍ, ອເຊຬກຎ຺ຈາປິ ປສຸໍ ມຫິໍສໍ [ມຫີສໍ (ສີ. ປີ.)];

ເຕ ລຸທ຺ທກມ຺ມາ ປສເວຕ຺ວ ປາປໍ, ເຕເມ ຊນາ ສຕ຺ຕິຫຕາ ສຍນ຺ຕິ’’.

໔໗໘. ‘‘ຄີວາຍ ພທ຺ຘາ ກິສ຺ສ ອິເມ ປຸເນເກ, ອຎ຺ເຎ ວິກນ຺ຕາ [ວິກຕ຺ຕາ (ສີ. ປີ.)] ພິລກຕາ ສຍນ຺ຕິ [ປຸເນເກ (ສີ. ປີ.)];

ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ, ປຸຈ຺ຉາມິ ຕໍ ມາຕລິ ເທວສາຣຖິ;

ອິເມ ນຸ ມຈ຺ຈາ ກິມກໍສຸ ປາປໍ, ເຍເມ ຊນາ ພິລກຕາ ສຍນ຺ຕິ’’.

໔໗໙. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໘໐. ‘‘ໂອຣພ຺ຠິກາ ສູກຣິກາ ຈ ມຈ຺ຉິກາ, ປສຸໍ ມຫິໍສຎ຺ຈ ອເຊຬກຎ຺ຈ;

ຫນ຺ຕ຺ວານ ສູເນສຸ ປສາຣຍິໍສຸ, ເຕ ລຸທ຺ທກມ຺ມາ ປສເວຕ຺ວ ປາປໍ;

ເຕເມ ຊນາ ພິລກຕາ ສຍນ຺ຕິ.

໔໘໑. ‘‘ຣຫໂທ ອຍໍ ມຸຕ຺ຕກຣີສປູໂຣ, ທຸຄ຺ຄນ຺ຘຣູໂປ ອສຸຈິ ປູຕິ ວາຕິ;

ຂຸທາປເຣຕາ ມນຸຊາ ອທນ຺ຕິ, ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ;

ປຸຈ຺ຉາມິ ຕໍ ມາຕລິ ເທວສາຣຖິ, ອິເມ ນຸ ມຈ຺ຈາ ກິມກໍສຸ ປາປໍ;

ເຍເມ ຊນາ ມຸຕ຺ຕກຣີສຠກ຺ຂາ’’.

໔໘໒. ຕສ຺ສ ປຸຏ຺ໂຐ ວິຍາກາສິ, ມາຕລິ ເທວສາຣຖິ;

ວິປາກໍ ປາປກມ຺ມານໍ, ຊານໍ ອກ຺ຂາສິຊານໂຕ.

໔໘໓. ‘‘ເຍ ເກຈິເມ ກາຣຓິກາ ວິໂຣສກາ, ປເຣສໍ ຫິໍສາຍ ສທາ ນິວິຏ຺ຐາ;

ເຕ ລຸທ຺ທກມ຺ມາ ປສເວຕ຺ວ ປາປໍ, ມິຕ຺ຕທ຺ທຸໂນ ມີຬ຺ຫມທນ຺ຕິ ພາລາ.

໔໘໔. ‘‘ຣຫໂທ ອຍໍ ໂລຫິຕປຸພ຺ພປູໂຣ, ທຸຄ຺ຄນ຺ຘຣູໂປ ອສຸຈິ ປູຕິ ວາຕິ;

ຆມ຺ມາຠິຕຕ຺ຕາ ມນຸຊາ ປິວນ຺ຕິ, ຠຍຎ຺ຫິ ມໍ ວິນ຺ທຕິ ສູຕ ທິສ຺ວາ;