໕໔໐. ສຸວຓ຺ຓສາມຊາຕກໍ (໓)

໒໙໖. ‘‘ໂກ ນຸ ມໍ ອຸສຸນາ ວິຊ຺ຌິ, ປມຕ຺ຕໍ ອຸທຫາຣກໍ [ຫາຣິກໍ (ສ຺ຍາ.), ຫາຣິຍໍ (ກ.)];

ຂຕ຺ຕິໂຍ ພ຺ຣາຫ຺ມໂຓ ເວສ຺ໂສ, ໂກ ມໍ ວິທ຺ຘາ ນິລີຍສິ.

໒໙໗. ‘‘ນ ເມ ມໍສານິ ຂຊ຺ຊານິ, ຈມ຺ເມນຕ຺ໂຖ ນ ວິຊ຺ຊຕິ;

ອຖ ເກນ ນຸ ວຓ຺ເຓນ, ວິທ຺ເຘຍ຺ຍໍ ມໍ ອມຎ຺ຎຖ.

໒໙໘. ‘‘ໂກ ວາ ຕ຺ວໍ ກສ຺ສ ວາ ປຸຕ຺ໂຕ, ກຖໍ ຊາເນມຸ ຕໍ ມຍໍ;

ປຸຏ຺ໂຐ ເມ ສມ຺ມ ອກ຺ຂາຫິ, ກິໍ ມໍ ວິທ຺ຘາ ນິລີຍສິ’’.

໒໙໙. ‘‘ຣາຊາຫມສ຺ມິ ກາສີນໍ, ປີຬິຍກ຺ໂຂຕິ ມໍ ວິທູ;

ໂລຠາ ຣຏ຺ຐໍ ປຫິຕ຺ວານ, ມິຄເມສໍ ຈຣາມຫໍ.

໓໐໐. ‘‘ອິສ຺ສຕ຺ເຖ ຈສ຺ມິ ກຸສໂລ, ທຬ຺ຫຘມ຺ໂມຕິ ວິສ຺ສຸໂຕ;

ນາໂຄປິ ເມ ນ ມຸຈ຺ເຈຍ຺ຍ, ອາຄໂຕ ອຸສຸປາຕນໍ.

໓໐໑. ‘‘ໂກ ວາ ຕ຺ວໍ ກສ຺ສ ວາ ປຸຕ຺ໂຕ [ຕ຺ວໍ ຈ ກສ຺ສ ວາ ປຸຕ຺ໂຕສິ (ສີ. ປີ.)], ກຖໍ ຊາເນມຸ ຕໍ ມຍໍ;

ປິຕຸໂນ ອຕ຺ຕໂນ ຈາປິ, ນາມໂຄຕ຺ຕໍ ປເວທຍ’’.

໓໐໒. ‘‘ເນສາທປຸຕ຺ໂຕ ຠທ຺ທນ຺ເຕ, ສາໂມ ອິຕິ ມໍ ຎາຕໂຍ;

ອາມນ຺ຕຍິໍສຸ ຊີວນ຺ຕໍ, ສ຺ວຊ຺ເຊວາຫໍ ຄໂຕ [ສ຺ວາຊ຺ເຊວງ຺ຄໂຕ (ສ຺ຍາ.), ສ຺ວຊ຺ເຊວງ຺ຄເຕ (ກ.)] ສເຍ.

໓໐໓. ‘‘ວິທ຺ໂຘສ຺ມິ ປຸຖຸສລ຺ເລນ, ສວິເສນ ຍຖາ ມິໂຄ;

ສກມ຺ຫິ ໂລຫິເຕ ຣາຊ, ປສ຺ສ ເສມິ ປຣິປ຺ລຸໂຕ.

໓໐໔. ‘‘ປຏິວາມຄຕໍ [ປຏິຘມ຺ມ ຄຕໍ (ສີ. ປີ.)] ສລ຺ລໍ, ປສ຺ສ ຘິມ຺ຫາມິ [ວິຫາມ຺ຫິ (ສີ. ປີ.)] ໂລຫິຕໍ;

ອາຕຸໂຣ ຕ຺ຍານຸປຸຈ຺ຉາມິ, ກິໍ ມໍ ວິທ຺ຘາ ນິລີຍສິ.

໓໐໕. ‘‘ອຊິນມ຺ຫິ ຫຎ຺ຎເຕ ທີປິ, ນາໂຄ ທນ຺ເຕຫິ ຫຎ຺ຎເຕ;

ອຖ ເກນ ນຸ ວຓ຺ເຓນ, ວິທ຺ເຘຍ຺ຍໍ ມໍ ອມຎ຺ຎຖ’’.

໓໐໖. ‘‘ມິໂຄ ອຸປຏ຺ຐິໂຕ ອາສິ, ອາຄໂຕ ອຸສຸປາຕນໍ;

ຕໍ ທິສ຺ວາ ອຸພ຺ພິຊີ ສາມ, ເຕນ ໂກໂຘ ມມາວິສິ’’.

໓໐໗. ‘‘ຍໂຕ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ວິຎ຺ຎຸຕໍ;

ນ ມໍ ມິຄາ ອຸຕ຺ຕສນ຺ຕິ, ອຣຎ຺ເຎ ສາປທານິປິ.

໓໐໘. ‘‘ຍໂຕ ນິຘິໍ ປຣິຫຣິໍ, ຍໂຕ ປຕ຺ໂຕສ຺ມິ ໂຍພ຺ພນໍ;

ນ ມໍ ມິຄາ ອຸຕ຺ຕສນ຺ຕິ, ອຣຎ຺ເຎ ສາປທານິປິ.

໓໐໙. ‘‘ຠີຣູ ກິມ຺ປຸຣິສາ ຣາຊ, ປພ຺ພເຕ ຄນ຺ຘມາທເນ;

ສມ຺ໂມທມານາ ຄຈ຺ຉາມ, ປພ຺ພຕານິ ວນານິ ຈ.

໓໑໐. (‘‘ນ ມໍ ມິຄາ ອຸຕ຺ຕສນ຺ຕິ, ອຣຎ຺ເຎ ສາປທານິປິ;) [( ) ນຕ຺ຖິ ສີ. ສ຺ຍາ. ປີ. ໂປຕ຺ຖເກສຸ]

ອຖ ເກນ ນຸ ວຓ຺ເຓນ, ອຸຕ຺ຣາສນ຺ຕິ ມິຄາ ມມໍ’’ [ອຸຕ຺ຣາເສ ໂສ ມິໂຄ ມມໍ (ສີ. ປີ.)].

໓໑໑. ‘‘ນ ຕໍ ຕສ [ນ ຕທ຺ທສາ (ສີ. ປີ.)] ມິໂຄ ສາມ, ກິໍ ຕາຫໍ ອລິກໍ ຠເຓ;

ໂກຘໂລຠາຠິຠູຕາຫໍ, ອຸສຸໍ ເຕ ຕໍ ອວສ຺ສຊິໍ [ອວິສ຺ສຊິໍ (ສ຺ຍາ.)].

໓໑໒. ‘‘ກຸໂຕ ນຸ ສາມ ອາຄມ຺ມ, ກສ຺ສ ວາ ປຫິໂຕ ຕຸວໍ;

ອຸທຫາໂຣ ນທິໍ ຄຈ຺ຉ, ອາຄໂຕ ມິຄສມ຺ມຕໍ’’.

໓໑໓. ‘‘ອນ຺ຘາ ມາຕາປິຕາ ມຍ຺ຫໍ, ເຕ ຠຣາມິ ພ຺ຣຫາວເນ;

ເຕສາຫໍ ອຸທກາຫາໂຣ, ອາຄໂຕ ມິຄສມ຺ມຕໍ.

໓໑໔. ‘‘ອຕ຺ຖິ ເນສໍ ອຸສາມຕ຺ຕໍ, ອຖ ສາຫສ຺ສ ຊີວິຕໍ;

ອຸທກສ຺ສ ອລາເຠນ, ມຎ຺ເຎ ອນ຺ຘາ ມຣິສ຺ສເຣ.

໓໑໕. ‘‘ນ ເມ ອິທໍ ຕຖາ ທຸກ຺ຂໍ, ລພ຺ຠາ ຫິ ປຸມຸນາ ອິທໍ;

ຍຎ຺ຈ ອມ຺ມໍ ນ ປສ຺ສາມິ, ຕໍ ເມ ທຸກ຺ຂຕຣໍ ອິໂຕ.

໓໑໖. ‘‘ນ ເມ ອິທໍ ຕຖາ ທຸກ຺ຂໍ, ລພ຺ຠາ ຫິ ປຸມຸນາ ອິທໍ;

ຍຎ຺ຈ ຕາຕໍ ນ ປສ຺ສາມິ, ຕໍ ເມ ທຸກ຺ຂຕຣໍ ອິໂຕ.

໓໑໗. ‘‘ສາ ນູນ ກປຓາ ອມ຺ມາ, ຈິຣຣຕ຺ຕາຍ ຣຸຈ຺ຉຕິ [ຣຸຈ຺ຈຕິ (ກ.)];

ອຑ຺ຒຣຕ຺ເຕວ ຣຕ຺ເຕ ວາ, ນທີວ ອວສຸຈ຺ຉຕິ [ອວສຸສ຺ສຕິ (ສ຺ຍາ.)].

໓໑໘. ‘‘ໂສ ນູນ ກປໂຓ ຕາໂຕ, ຈິຣຣຕ຺ຕາຍ ຣຸຈ຺ຉຕິ [ຣຸຈ຺ຈຕິ (ກ.)];

ອຑ຺ຒຣຕ຺ເຕວ ຣຕ຺ເຕ ວາ, ນທີວ ອວສຸຈ຺ຉຕິ [ອວສຸສ຺ສຕິ (ສ຺ຍາ.)].

໓໑໙. ‘‘ອຸຏ຺ຐານປາທຈຣິຍາຍ [ປາຣິຈຣິຍາຍ (ສີ. ປີ.)], ປາທສມ຺ພາຫນສ຺ສ ຈ;

ສາມ ຕາຕ ວິລປນ຺ຕາ, ຫິຓ຺ຑິສ຺ສນ຺ຕິ ພ຺ຣຫາວເນ.

໓໒໐. ‘‘ອິທມ຺ປິ ທຸຕິຍໍ ສລ຺ລໍ, ກມ຺ເປຕິ ຫທຍໍ ມມໍ;

ຍຎ຺ຈ ອນ຺ເຘ ນ ປສ຺ສາມິ, ມຎ຺ເຎ ຫິສ຺ສາມິ [ຍຎ຺ຈ ເຫສ຺ສາມິ (ສີ. ປີ.), ຕໍ ເມໍ ຫິສ຺ສາມິ (ກ.)] ຊີວິຕໍ’’.

໓໒໑. ‘‘ມາ ພາຬ຺ຫໍ ປຣິເທເວສິ, ສາມ ກລ຺ຍາຓທສ຺ສນ;

ອຫໍ ກມ຺ມກໂຣ ຫຸຕ຺ວາ, ຠຣິສ຺ສໍ ເຕ ພ຺ຣຫາວເນ.

໓໒໒. ‘‘ອິສ຺ສຕ຺ເຖ ຈສ຺ມິ ກຸສໂລ, ທຬ຺ຫຘມ຺ໂມຕິ ວິສ຺ສຸໂຕ;

ອຫໍ ກມ຺ມກໂຣ ຫຸຕ຺ວາ, ຠຣິສ຺ສໍ ເຕ ພ຺ຣຫາວເນ.

໓໒໓. ‘‘ມິຄານໍ [ມຄານໍ (ກ.)] ວິຆາສມນ຺ເວສໍ, ວນມູລຜລານິ ຈ;

ອຫໍ ກມ຺ມກໂຣ ຫຸຕ຺ວາ, ຠຣິສ຺ສໍ ເຕ ພ຺ຣຫາວເນ.

໓໒໔. ‘‘ກຕມໍ ຕໍ ວນໍ ສາມ, ຍຕ຺ຖ ມາຕາປິຕາ ຕວ;

ອຫໍ ເຕ ຕຖາ ຠຣິສ຺ສໍ, ຍຖາ ເຕ ອຠຣີ ຕຸວໍ’’.

໓໒໕. ‘‘ອຍໍ ເອກປທີ ຣາຊ, ໂຍຍໍ ອຸສ຺ສີສເກ ມມ;

ອິໂຕ ຄນ຺ຕ຺ວາ ອຑ຺ຒໂກສໍ, ຕຕ຺ຖ ເນສໍ ອຄາຣກໍ;

ຍຕ຺ຖ ມາຕາປິຕາ ມຍ຺ຫໍ, ເຕ ຠຣສ຺ສຸ ອິໂຕ ຄໂຕ.

໓໒໖. ‘‘ນໂມ ເຕ ກາສິຣາຊຕ຺ຖຸ, ນໂມ ເຕ ກາສິວຑ຺ຒນ;

ອນ຺ຘາ ມາຕາປິຕາ ມຍ຺ຫໍ, ເຕ ຠຣສ຺ສຸ ພ຺ຣຫາວເນ.

໓໒໗. ‘‘ອຎ຺ຊລິໍ ເຕ ປຄ຺ຄຓ຺ຫາມິ, ກາສິຣາຊ ນມຕ຺ຖຸ ເຕ;

ມາຕຣໍ ປິຕຣໍ ມຍ຺ຫໍ, ວຸຕ຺ໂຕ ວຊ຺ຊາສິ ວນ຺ທນໍ’’.

໓໒໘. ‘‘ອິທໍ ວຕ຺ວານ ໂສ ສາໂມ, ຍຸວາ ກລ຺ຍາຓທສ຺ສໂນ;

ມຸຈ຺ຉິໂຕ ວິສເວເຄນ, ວິສຎ຺ຎີ ສມປຊ຺ຊຖ.

໓໒໙. ‘‘ສ ຣາຊາ ປຣິເທເວສິ, ພຫຸໍ ກາຣຸຎ຺ຎສຎ຺ຫິຕໍ;

ອຊຣາມໂຣຫໍ ອາສິໍ, ອຊ຺ເຊຕໍ ຎາມິ [ອຊ຺ຊຫຎ຺ຎາມິ (ກ.)] ໂນ ປຸເຣ;

ສາມໍ ກາລງ຺ກຕໍ ທິສ຺ວາ, ນຕ຺ຖິ ມຈ຺ຈຸສ຺ສ ນາຄໂມ.

໓໓໐. ‘‘ຍສ຺ສຸ ມໍ ປຏິມນ຺ເຕຕິ, ສວິເສນ ສມປ຺ປິໂຕ;

ສ຺ວຊ຺ເຊວໍ ຄເຕ ກາເລ, ນ ກິຎ຺ຈິ ມຠິຠາສຕິ.

໓໓໑. ‘‘ນິຣຍໍ ນູນ ຄຈ຺ຉາມິ, ເອຕ຺ຖ ເມ ນຕ຺ຖິ ສໍສໂຍ;

ຕທາ ຫິ ປກຕໍ ປາປໍ, ຈິຣຣຕ຺ຕາຍ ກິພ຺ພິສໍ.

໓໓໒. ‘‘ຠວນ຺ຕິ ຕສ຺ສ ວຕ຺ຕາໂຣ, ຄາເມ ກິພ຺ພິສກາຣໂກ;

ອຣຎ຺ເຎ ນິມ຺ມນຸສ຺ສມ຺ຫິ, ໂກ ມໍ ວຕ຺ຕຸມຣຫຕິ.

໓໓໓. ‘‘ສາຣຍນ຺ຕິ ຫິ ກມ຺ມານິ, ຄາເມ ສໍຄຈ຺ຉ ມາຓວາ;

ອຣຎ຺ເຎ ນິມ຺ມນຸສ຺ສມ຺ຫິ, ໂກ ນຸ ມໍ ສາຣຍິສ຺ສຕິ’’.

໓໓໔. ‘‘ສາ ເທວຕາ ອນ຺ຕຣຫິຕາ, ປພ຺ພເຕ ຄນ຺ຘມາທເນ;

ຣຎ຺ໂຎວ ອນຸກມ຺ປາຍ, ອິມາ ຄາຖາ ອຠາສຖ.

໓໓໕. ‘‘ອາຄຸໍ ກິຣ ມຫາຣາຊ, ອກຣິ [ອກຣາ (ສີ.)] ກມ຺ມ ທຸກ຺ກຏໍ;

ອທູສກາ ປິຕາປຸຕ຺ຕາ, ຕໂຍ ເອກູສຸນາ ຫຕາ.

໓໓໖. ‘‘ເອຫິ ຕໍ ອນຸສິກ຺ຂາມິ, ຍຖາ ເຕ ສຸຄຕີ ສິຍາ;

ຘມ຺ເມນນ຺ເຘ ວເນ ໂປສ, ມຎ຺ເຎຫໍ ສຸຄຕີ ຕຍາ.

໓໓໗. ‘‘ສ ຣາຊາ ປຣິເທວິຕ຺ວາ, ພຫຸໍ ກາຣຸຎ຺ຎສຎ຺ຫິຕໍ;

ອຸທກກຸມ຺ຠມາທາຍ, ປກ຺ກາມິ ທກ຺ຂິຓາມຸໂຂ.

໓໓໘. ‘‘ກສ຺ສ ນຸ ເອໂສ ປທສທ຺ໂທ, ມນຸສ຺ສສ຺ເສວ ອາຄໂຕ;

ເນໂສ ສາມສ຺ສ ນິຄ຺ໂຆໂສ, ໂກ ນຸ ຕ຺ວມສິ ມາຣິສ.

໓໓໙. ‘‘ສນ຺ຕຎ຺ຫິ ສາໂມ ວຊຕິ, ສນ຺ຕໍ ປາທານິ ເນຍຕິ [ອຸຕ຺ຕຫິ (ສີ.)];

ເນໂສ ສາມສ຺ສ ນິຄ຺ໂຆໂສ, ໂກ ນຸ ຕ຺ວມສິ ມາຣິສ’’.

໓໔໐. ‘‘ຣາຊາຫມສ຺ມິ ກາສີນໍ, ປີຬິຍກ຺ໂຂຕິ ມໍ ວິທູ;

ໂລຠາ ຣຏ຺ຐໍ ປຫິຕ຺ວານ, ມິຄເມສໍ ຈຣາມຫໍ.

໓໔໑. ‘‘ອິສ຺ສຕ຺ເຖ ຈສ຺ມິ ກຸສໂລ, ທຬ຺ຫຘມ຺ໂມຕິ ວິສ຺ສຸໂຕ;

ນາໂຄປິ ເມ ນ ມຸຈ຺ເຈຍ຺ຍ, ອາຄໂຕ ອຸສຸປາຕນໍ’’.

໓໔໒. ‘‘ສ຺ວາຄຕໍ ເຕ ມຫາຣາຊ, ອໂຖ ເຕ ອທຸຣາຄຕໍ;

ອິສ຺ສໂຣສິ ອນຸປ຺ປຕ຺ໂຕ, ຍໍ ອິຘຕ຺ຖິ ປເວທຍ.

໓໔໓. ‘‘ຕິນ຺ທຸການິ ປິຍາລານິ, ມຘຸເກ ກາສຸມາຣິໂຍ;

ຜລານິ ຂຸທ຺ທກປ຺ປານິ, ຠຸຎ຺ຊ ຣາຊ ວຣໍ ວຣໍ.

໓໔໔. ‘‘ອິທມ຺ປິ ປານີຍໍ ສີຕໍ, ອາຠຕໍ ຄິຣິຄພ຺ຠຣາ;

ຕໂຕ ປິວ ມຫາຣາຊ, ສເຈ ຕ຺ວໍ ອຠິກງ຺ຂສິ’’.

໓໔໕. ‘‘ນາລໍ ອນ຺ຘາ ວເນ ທຏ຺ຐຸໍ, ໂກ ນຸ ໂວ ຜລມາຫຣິ;

ອນນ຺ຘສ຺ເສວຍໍ ສມ຺ມາ, ນິວາໂປ ມຍ຺ຫ ຂາຍຕິ’’.

໓໔໖. ‘‘ທຫໂຣ ຍຸວາ ນາຕິພ຺ຣຫາ, ສາໂມ ກລ຺ຍາຓທສ຺ສໂນ;

ທີຆສ຺ສ ເກສາ ອສິຕາ, ອໂຖ ສູນຄ຺ຄ [ໂສນຄ຺ຄ (ກ.)] ເວລ຺ລິຕາ.

໓໔໗. ‘‘ໂສ ຫເວ ຜລມາຫຣິຕ຺ວາ, ອິໂຕ ອາທາຍ [ອາທາ (ສີ. ປີ.)] ກມຓ຺ຑລຸໍ;

ນທິໍ ຄໂຕ ອຸທຫາໂຣ, ມຎ຺ເຎ ນ ທູຣມາຄໂຕ’’.

໓໔໘. ‘‘ອຫໍ ຕໍ ອວຘິໍ ສາມໍ, ໂຍ ຕຸຍ຺ຫໍ ປຣິຈາຣໂກ;

ຍໍ ກຸມາຣໍ ປເວເທຖ, ສາມໍ ກລ຺ຍາຓທສ຺ສນໍ.

໓໔໙. ‘‘ທີຆສ຺ສ ເກສາ ອສິຕາ, ອໂຖ ສູນຄ຺ຄເວລ຺ລິຕາ;

ເຕສຸ ໂລຫິຕລິຕ຺ເຕສຸ, ເສຕິ ສາໂມ ມຍາ ຫໂຕ’’.

໓໕໐. ‘‘ເກນ ທຸກູລມນ຺ເຕສິ, ຫໂຕ ສາໂມຕິ ວາທິນາ;

ຫໂຕ ສາໂມຕິ ສຸຕ຺ວານ, ຫທຍໍ ເມ ປເວຘຕິ.

໓໕໑. ‘‘ອສ຺ສຕ຺ຖສ຺ເສວ ຕຣຸຓໍ, ປວາຬໍ ມາລຸເຕຣິຕໍ;

ຫໂຕ ສາໂມຕິ ສຸຕ຺ວານ, ຫທຍໍ ເມ ປເວຘຕິ’’.

໓໕໒. ‘‘ປາຣິເກ ກາສິຣາຊາຍໍ, ໂສ ສາມໍ ມິຄສມ຺ມເຕ;

ໂກຘສາ ອຸສຸນາ ວິຊ຺ຌິ, ຕສ຺ສ ມາ ປາປມິຈ຺ຉິມ຺ຫາ’’.

໓໕໓. ‘‘ກິຈ຺ຉາ ລທ຺ໂຘ ປິໂຍ ປຸຕ຺ໂຕ, ໂຍ ອນ຺ເຘ ອຠຣີ ວເນ;

ຕໍ ເອກປຸຕ຺ຕໍ ຆາຕິມ຺ຫິ, ກຖໍ ຈິຕ຺ຕໍ ນ ໂກປເຍ’’.

໓໕໔. ‘‘ກິຈ຺ຉາ ລທ຺ໂຘ ປິໂຍ ປຸຕ຺ໂຕ, ໂຍ ອນ຺ເຘ ອຠຣີ ວເນ;

ຕໍ ເອກປຸຕ຺ຕໍ ຆາຕິມ຺ຫິ, ອກ຺ໂກຘໍ ອາຫຸ ປຓ຺ຑິຕາ’’.

໓໕໕. ‘‘ມາ ພາຬ຺ຫໍ ປຣິເທເວຖ, ຫໂຕ ສາໂມຕິ ວາທິນາ;

ອຫໍ ກມ຺ມກໂຣ ຫຸຕ຺ວາ, ຠຣິສ຺ສາມິ ພ຺ຣຫາວເນ.

໓໕໖. ‘‘ອິສ຺ສຕ຺ເຖ ຈສ຺ມິ ກຸສໂລ, ທຬ຺ຫຘມ຺ໂມຕິ ວິສ຺ສຸໂຕ;

ອຫໍ ກມ຺ມກໂຣ ຫຸຕ຺ວາ, ຠຣິສ຺ສາມິ ພ຺ຣຫາວເນ.

໓໕໗. ‘‘ມິຄານໍ ວິຆາສມນ຺ເວສໍ, ວນມູລຜລານິ ຈ;

ອຫໍ ກມ຺ມກໂຣ ຫຸຕ຺ວາ, ຠຣິສ຺ສາມິ ພ຺ຣຫາວເນ’’.

໓໕໘. ‘‘ເນສ ຘມ຺ໂມ ມຫາຣາຊ, ເນຕໍ ອມ຺ເຫສຸ ກປ຺ປຕິ;

ຣາຊາ ຕ຺ວມສິ ອມ຺ຫາກໍ, ປາເທ ວນ຺ທາມ ເຕ ມຍໍ’’.

໓໕໙. ‘‘ຘມ຺ມໍ ເນສາທ ຠຓຖ, ກຕາ ອປຈິຕີ ຕຍາ;

ປິຕາ ຕ຺ວມສິ [ຕ຺ວມຫິ (?)] ອມ຺ຫາກໍ, ມາຕາ ຕ຺ວມສິ ປາຣິເກ’’.

໓໖໐. ‘‘ນໂມ ເຕ ກາສິຣາຊຕ຺ຖຸ, ນໂມ ເຕ ກາສິວຑ຺ຒນ;

ອຎ຺ຊລິໍ ເຕ ປຄ຺ຄຓ຺ຫາມ, ຍາວ ສາມານຸປາປຍ.

໓໖໑. ‘‘ຕສ຺ສ ປາເທ ສມຊ຺ຊນ຺ຕາ [ປວຏ຺ຏນ຺ຕາ (ປີ.)], ມຸຂຎ຺ຈ ຠຸຊທສ຺ສນໍ;

ສໍສຸມ຺ຠມານາ ອຕ຺ຕານໍ, ກາລມາຄມຍາມເສ’’.

໓໖໒. ‘‘ພ຺ຣຫາ ວາຬມິຄາກິຓ຺ຓໍ, ອາກາສນ຺ຕໍວ ທິສ຺ສຕິ;

ຍຕ຺ຖ ສາໂມ ຫໂຕ ເສຕິ, ຈນ຺ໂທວ ປຕິໂຕ ຉມາ.

໓໖໓. ‘‘ພ຺ຣຫາ ວາຬມິຄາກິຓ຺ຓໍ, ອາກາສນ຺ຕໍວ ທິສ຺ສຕິ;

ຍຕ຺ຖ ສາໂມ ຫໂຕ ເສຕິ, ສູຣິໂຍວ ປຕິໂຕ ຉມາ.

໓໖໔. ‘‘ພ຺ຣຫາ ວາຬມິຄາກິຓ຺ຓໍ, ອາກາສນ຺ຕໍວ ທິສ຺ສຕິ;

ຍຕ຺ຖ ສາໂມ ຫໂຕ ເສຕິ, ປໍສຸນາ ປຕິກຸນ຺ຕິໂຕ [ກຸຓ຺ຐິໂຕ (ສີ. ສ຺ຍາ. ປີ.) ເອວມຸປຣິປິ].

໓໖໕. ‘‘ພ຺ຣຫາ ວາຬມິຄາກິຓ຺ຓໍ, ອາກາສນ຺ຕໍວ ທິສ຺ສຕິ;

ຍຕ຺ຖ ສາໂມ ຫໂຕ ເສຕິ, ອິເຘວ ວສຖສ຺ສເມ’’.

໓໖໖. ‘‘ຍທິ ຕຕ຺ຖ ສຫສ຺ສານິ, ສຕານິ ນິຍຸຕານິ [ນຫຸຕານິ (ສີ. ສ຺ຍາ. ປີ.)] ຈ;

ເນວມ຺ຫາກໍ ຠຍໍ ໂກຈິ, ວເນ ວາເຬສຸ ວິຊ຺ຊຕິ’’.

໓໖໗. ‘‘ຕໂຕ ອນ຺ຘານມາທາຍ, ກາສິຣາຊາ ພ຺ຣຫາວເນ;

ຫຕ຺ເຖ ຄເຫຕ຺ວາ ປກ຺ກາມິ, ຍຕ຺ຖ ສາໂມ ຫໂຕ ອຫຸ.

໓໖໘. ‘‘ທິສ຺ວານ ປຕິຕໍ ສາມໍ, ປຸຕ຺ຕກໍ ປໍສຸກຸນ຺ຖິຕໍ;

ອປວິທ຺ຘໍ ພ຺ຣຫາຣຎ຺ເຎ, ຈນ຺ທໍວ ປຕິຕໍ ຉມາ.

໓໖໙. ‘‘ທິສ຺ວານ ປຕິຕໍ ສາມໍ, ປຸຕ຺ຕກໍ ປໍສຸກຸນ຺ຖິຕໍ;