໕໓໙. ມຫາຊນກຊາຕກໍ (໒)

໑໒໓. ‘‘ໂກຍໍ ມຊ຺ເຌ ສມຸທ຺ທສ຺ມິໍ, ອປສ຺ສໍ ຕີຣມາຍຸເຫ;

ກໍ [ກິໍ (ສ຺ຍາ. ກ.)] ຕ຺ວໍ ອຕ຺ຖວສໍ ຎຕ຺ວາ, ເອວໍ ວາຍມເສ ຠຸສໍ’’.

໑໒໔. ‘‘ນິສມ຺ມ ວຕ຺ຕໍ ໂລກສ຺ສ, ວາຍາມສ຺ສ ຈ ເທວເຕ;

ຕສ຺ມາ ມຊ຺ເຌ ສມຸທ຺ທສ຺ມິໍ, ອປສ຺ສໍ ຕີຣມາຍຸເຫ’’.

໑໒໕. ‘‘ຄມ຺ຠີເຣ ອປ຺ປເມຍ຺ຍສ຺ມິໍ, ຕີຣໍ ຍສ຺ສ ນ ທິສ຺ສຕິ;

ໂມໂຆ ເຕ ປຸຣິສວາຍາໂມ, ອປ຺ປຕ຺ວາວ ມຣິສ຺ສສິ’’.

໑໒໖. ‘‘ອນໂຓ ຎາຕິນໍ ໂຫຕິ, ເທວານໍ ປິຕຸນຎ຺ຈ [ປິຕຸໂນ ຈ (ສີ. ປີ.)] ໂສ;

ກຣໍ ປຸຣິສກິຈ຺ຈານິ, ນ ຈ ປຈ຺ຉານຸຕປ຺ປຕິ’’.

໑໒໗. ‘‘ອປາຣເຓຍ຺ຍໍ ຍໍ ກມ຺ມໍ, ອຜລໍ ກິລມຖຸທ຺ທຍໍ;

ຕຕ຺ຖ ໂກ ວາຍເມນຕ຺ໂຖ, ມຈ຺ຈຸ ຍສ຺ສາຠິນິປ຺ປຕໍ’’ [ຍສ຺ສາຠິນິປ຺ຜຕໍ (ສ຺ຍາ.)].

໑໒໘. ‘‘ອປາຣເຓຍ຺ຍມຈ຺ຈນ຺ຕໍ, ໂຍ ວິທິຕ຺ວານ ເທວເຕ;

ນ ຣກ຺ເຂ ອຕ຺ຕໂນ ປາຓໍ, ຊຎ຺ຎາ ໂສ ຍທິ ຫາປເຍ.

໑໒໙. ‘‘ອຘິປ຺ປາຍຜລໍ ເອເກ, ອສ຺ມິໍ ໂລກສ຺ມິ ເທວເຕ;

ປໂຍຊຍນ຺ຕິ ກມ຺ມານິ, ຕານິ ອິຊ຺ຌນ຺ຕິ ວາ ນ ວາ.

໑໓໐. ‘‘ສນ຺ທິຏ຺ຐິກໍ ກມ຺ມຜລໍ, ນນຸ ປສ຺ສສິ ເທວເຕ;

ສນ຺ນາ ອຎ຺ເຎ ຕຣາມຫໍ, ຕຎ຺ຈ ປສ຺ສາມິ ສນ຺ຕິເກ.

໑໓໑. ‘‘ໂສ ອຫໍ ວາຍມິສ຺ສາມິ, ຍຖາສຕ຺ຕິ ຍຖາພລໍ;

ຄຈ຺ຉໍ ປາຣໍ ສມຸທ຺ທສ຺ສ, ກສ຺ສໍ [ກາສໍ (ສີ. ປີ.)] ປຸຣິສກາຣິຍໍ’’.

໑໓໒. ‘‘ໂຍ ຕ຺ວໍ ເອວໍ ຄເຕ ໂອເຆ, ອປ຺ປເມຍ຺ເຍ ມຫຓ຺ຓເວ;

ຘມ຺ມວາຍາມສມ຺ປນ຺ໂນ, ກມ຺ມຸນາ ນາວສີທສິ;

ໂສ ຕ຺ວໍ ຕຕ຺ເຖວ ຄຈ຺ຉາຫິ, ຍຕ຺ຖ ເຕ ນິຣໂຕ ມໂນ’’.

໑໓໓. ‘‘ອາສີເສເຖວ [ອາສິໍເສເຖວ (ສີ. ສ຺ຍາ. ປີ.)] ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ຍຖາ ອິຈ຺ຉິໍ ຕຖາ ອຫຸ.

໑໓໔. ‘‘ອາສີເສເຖວ ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ອຸທກາ ຖລມຸພ຺ຠຕໍ.

໑໓໕. ‘‘ວາຍເມເຖວ ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ຍຖາ ອິຈ຺ຉິໍ ຕຖາ ອຫຸ.

໑໓໖. ‘‘ວາຍເມເຖວ ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ອຸທກາ ຖລມຸພ຺ຠຕໍ.

໑໓໗. ‘‘ທຸກ຺ຂູປນີໂຕປິ ນໂຣ ສປຎ຺ໂຎ, ອາສໍ ນ ຉິນ຺ເທຍ຺ຍ ສຸຂາຄມາຍ;

ພຫູ ຫິ ຜສ຺ສາ ອຫິຕາ ຫິຕາ ຈ, ອວິຕກ຺ກິຕາ ມຈ຺ຈຸມຸປພ຺ພຊນ຺ຕິ [ມຈ຺ຈຸມຸປ຺ປຊ຺ຊນ຺ຕິ (ສ຺ຍາ.)].

໑໓໘. ‘‘ອຈິນ຺ຕິຕມ຺ປິ ຠວຕິ, ຈິນ຺ຕິຕມ຺ປິ ວິນສ຺ສຕິ;

ນ ຫິ ຈິນ຺ຕາມຍາ ໂຠຄາ, ອິຕ຺ຖິຍາ ປຸຣິສສ຺ສ ວາ’’.

໑໓໙. ‘‘ອໂປຣາຓໍ [ອປຸຣາຓໍ (ສີ. ປີ.)] ວຕ ໂຠ ຣາຊາ, ສພ຺ພຠຸມ຺ໂມ ທິສມ຺ປຕິ;

ນາຊ຺ຊ ນຈ຺ເຈ [ນ ຈ ນຈ຺ເຈ (ກ.)] ນິສາເມຕິ, ນ ຄີເຕ ກຸຣຸເຕ ມໂນ.

໑໔໐. ‘‘ນ ມິເຄ [ມເຄ (ກ.)] ນປິ ອຸຍ຺ຍາເນ, ນປິ ຫໍເສ ອຸທິກ຺ຂຕິ;

ມູໂຄວ ຕຸຓ຺ຫິມາສີໂນ, ນ ອຕ຺ຖມນຸສາສຕິ’’.

໑໔໑. ‘‘ສຸຂກາມາ ຣໂຫສີລາ, ວຘພນ຺ຘາ ອຸປາຣຕາ [ອຸປາຣຸຕາ (ສ຺ຍາ. ກ.)];

ກສ຺ສ [ເກສໍ (ສີ. ປີ.)] ນຸ ອຊ຺ຊ ອາຣາເມ, ທຫຣາ ວຸທ຺ຘາ ຈ ອຈ຺ຉເຣ.

໑໔໒. ‘‘ອຕິກ຺ກນ຺ຕວນຖາ ຘີຣາ, ນໂມ ເຕສໍ ມເຫສິນໍ;

ເຍ ອຸສ຺ສຸກມ຺ຫິ ໂລກມ຺ຫິ, ວິຫຣນ຺ຕິ ມນຸສ຺ສຸກາ.

໑໔໓. ‘‘ເຕ ເຉຕ຺ວາ ມຈ຺ຈຸໂນ ຊາລໍ, ຕຕໍ [ຕນ຺ຕໍ (ສີ. ສ຺ຍາ. ປີ.), ຕໍ ຕໍ (ກ.)] ມາຍາວິໂນ ທຬໍ;

ຉິນ຺ນາລຍຕ຺ຕາ [ສນ຺ຕາລຍນ຺ຕາ (ສ຺ຍາ. ກ.)] ຄຈ຺ຉນ຺ຕິ, ໂກ ເຕສໍ ຄຕິມາປເຍ’’ [ເນສໍ ຄຕິ ປາປເຍ (ກ.)].

໑໔໔. ‘‘ກທາຫໍ ມິຖິລໍ [ມິຘິລໍ (ກ.)] ຜີຕໍ, ວິຠຕ຺ຕໍ ຠາຄໂສ ມິຕໍ;

ປຫາຍ ປພ຺ພຊິສ຺ສາມິ, ຕໍ ກຸທາສ຺ສຸ [ກທາສ຺ສຸ (ສີ. ປີ.), ກທາສຸ (ສ຺ຍາ.)] ຠວິສ຺ສຕິ.

໑໔໕. ‘‘ກທາຫໍ ມິຖິລໍ ຜີຕໍ, ວິສາລໍ ສພ຺ພໂຕປຠໍ;