໕໓໗. ມຫາສຸຕໂສມຊາຕກໍ (໕)

໓໗໑. ‘‘ກສ຺ມາ ຕຸວໍ ຣສກ ເອທິສານິ, ກໂຣສິ ກມ຺ມານິ ສຸທາຣຸຓານິ;

ຫນາສິ ອິຕ຺ຖີ ປຸຣິເສ ຈ ມູຬ຺ໂຫ, ມໍສສ຺ສ ເຫຕຸ ອທຸ [ອາທຸ (ສີ. ສ຺ຍາ.)] ຘນສ຺ສ ກາຣຓາ’’.

໓໗໒. ‘‘ນໍ ອຕ຺ຕເຫຕູ ນ ຘນສ຺ສ ກາຣຓາ, ນ ປຸຕ຺ຕທາຣສ຺ສ ສຫາຍຎາຕິນໍ;

ຠຕ຺ຕາ ຈ ເມ ຠຄວາ ຠູມິປາໂລ, ໂສ ຂາທຕິ ມໍສໍ ຠທນ຺ເຕທິສໍ’’.

໓໗໓. ‘‘ສເຈ ຕຸວໍ ຠຕ຺ຕຸຣຕ຺ເຖ ປຍຸຕ຺ໂຕ, ກໂຣສິ ກມ຺ມານິ ສຸທາຣຸຓານິ;

ປາໂຕວ ອນ຺ເຕປຸຣໍ ປາປຸຓິຕ຺ວາ, ລເປຍ຺ຍາສິ ເມ ຣາຊິໂນ ສມ຺ມຸເຂ ຕໍ’’.

໓໗໔. ‘‘ຕຖາ ກຣິສ຺ສາມິ ອຫໍ ຠທນ຺ເຕ, ຍຖາ ຕຸວໍ [ຍເມວ ຕ຺ວໍ (ສີ.)] ຠາສສິ ກາຬຫຕ຺ຖິ;

ປາໂຕວ ອນ຺ເຕປຸຣໍ ປາປຸຓິຕ຺ວາ, ວກ຺ຂາມິ ເຕ ຣາຊິໂນ ສມ຺ມຸເຂ ຕໍ’’.

໓໗໕. ຕໂຕ ຣຕ຺ຍາ ວິວສາເນ [ວິວສເນ (ສີ. ສ຺ຍາ. ປີ.)], ສູຣິຍຸຄ຺ຄມນໍ ປຕິ;

ກາໂຬ ຣສກມາທາຍ, ຣາຊານໍ ອຸປສງ຺ກມິ;

ອຸປສງ຺ກມ຺ມ [ອຸປສງ຺ກມິຕ຺ວາ (ສີ. ສ຺ຍາ. ປີ.)] ຣາຊານໍ, ອິທໍ ວຈນມພ຺ຣວິ.

໓໗໖. ‘‘ສຈ຺ຈໍ ກິຣ ມຫາຣາຊ, ຣສໂກ ເປສິໂຕ ຕຍາ;

ຫນຕິ ອິຕ຺ຖິປຸຣິເສ, ຕຸວໍ ມໍສານິ ຂາທສິ’’.

໓໗໗. ‘‘ເອວເມວ ຕຖາ ກາຬ, ຣສໂກ ເປສິໂຕ ມຍາ;

ມມ ອຕ຺ຖໍ ກໂຣນ຺ຕສ຺ສ, ກິເມຕໍ ປຣິຠາສສິ’’.

໓໗໘. ‘‘ອານນ຺ໂທ ສພ຺ພມຈ຺ຉານໍ, ຂາທິຕ຺ວາ ຣສຄິທ຺ຘິມາ;

ປຣິກ຺ຂີຓາຍ ປຣິສາຍ, ອຕ຺ຕານໍ ຂາທິຍາ ມໂຕ.

໓໗໙. ‘‘ເອວໍ ປມຕ຺ໂຕ ຣສຄາຣເວ ຣຕ຺ໂຕ [ຣໂຕ (ສີ. ສ຺ຍາ. ປີ.)], ພາໂລ ຍທີ ອາຍຕິ ນາວພຸຊ຺ຌຕິ;

ວິຘມ຺ມ ປຸຕ຺ເຕ ຈຊິ [ຈຊິຕ຺ວາ (ກ.)] ຎາຕເກ ຈ, ປຣິວຕ຺ຕິຍ ອຕ຺ຕານຎ຺ເຎວ [ອຕ຺ຕານເມວ (ສີ. ປີ.)] ຂາທຕິ.

໓໘໐. ‘‘ອິທໍ ເຕ ສຸຕ຺ວານ ວິເຄຕຸ [ວິເຫຕຸ (ສີ. ປີ.)] ຉນ຺ໂທ, ມາ ຠກ຺ຂຍີ [ມາ ຠກ຺ຂສີ (ສີ. ປີ.)] ຣາຊ ມນຸສ຺ສມໍສໍ;

ມາ ຕ຺ວໍ ອິມໍ ເກວລໍ ວາຣິໂຊວ, ທ຺ວິປທາຘິປ [ທິປທາທິປ (ສີ. ປີ.) ເອວມຸປຣິປິ] ສຸຎ຺ຎມກາສິ ຣຏ຺ຐໍ’’.

໓໘໑. ‘‘ສຸຊາໂຕ ນາມ ນາເມນ, ໂອຣໂສ ຕສ຺ສ ອຕ຺ຣໂຊ [ຕສ຺ສ ໂອຣສ ອຕ຺ຣໂຊ (ສີ.), ຕສ຺ສ ອຕ຺ຣຊ ໂອຣໂສ (ປີ.)];

ຊມ຺ພຸເປສິມລທ຺ຘານ, ມໂຕ ໂສ ຕສ຺ສ ສງ຺ຂເຍ.

໓໘໒. ‘‘ເອວເມວ ອຫໍ ກາຬ, ຠຸຕ຺ວາ ຠກ຺ຂໍ ຣສຸຕ຺ຕມໍ;

ອລທ຺ຘາ ມານຸສໍ ມໍສໍ, ມຎ຺ເຎ ຫິສ຺ສາມິ [ເຫສ຺ສາມິ (ສີ. ສ຺ຍາ.), ຫສ຺ສາມິ (ປີ.)] ຊີວິຕໍ’’.

໓໘໓. ‘‘ມາຓວ ອຠິຣູໂປສິ, ກຸເລ ຊາໂຕສິ ໂສຕ຺ຖິເຍ;

ນ ຕ຺ວໍ ອຣຫສິ ຕາຕ, ອຠກ຺ຂໍ ຠກ຺ຂເຍຕເວ’’.

໓໘໔. ‘‘ຣສານໍ ອຎ຺ຎຕຣໍ ເອຕໍ, ກສ຺ມາ [ຍສ຺ມາ (ສີ. ປີ.)] ມໍ ຕ຺ວໍ ນິວາຣເຍ;

ໂສຫໍ ຕຕ຺ຖ ຄມິສ຺ສາມິ, ຍຕ຺ຖ ລຈ຺ຉາມິ ເອທິສໍ.

໓໘໕. ‘‘ໂສວາຫໍ ນິປ຺ປຕິສ຺ສາມິ, ນ ເຕ ວຈ຺ຉາມິ ສນ຺ຕິເກ;

ຍສ຺ສ ເມ ທສ຺ສເນນ ຕ຺ວໍ, ນາຠິນນ຺ທສິ ພ຺ຣາຫ຺ມຓ’’.

໓໘໖. ‘‘ອທ຺ຘາ ອຎ຺ເຎປິ ທາຍາເທ, ປຸຕ຺ເຕ ລຈ຺ຉາມ ມາຓວ;

ຕ຺ວຎ຺ຈ ຊມ຺ມ ວິນສ຺ສສ຺ສຸ, ຍຕ຺ຖ ປຕ຺ຕໍ ນ ຕໍ ສຸເຓ’’.

໓໘໗. ‘‘ເອວເມວ ຕຸວໍ ຣາຊ, ທ຺ວິປທິນ຺ທ ສຸໂຓຫິ ເມ;

ປພ຺ພາເຊສ຺ສນ຺ຕິ ຕໍ ຣຏ຺ຐາ, ໂສຓ຺ຑໍ ມາຓວກໍ ຍຖາ’’.

໓໘໘. ‘‘ສຸຊາໂຕ ນາມ ນາເມນ, ຠາວິຕຕ຺ຕານ ສາວໂກ;

ອຈ຺ຉຣໍ ກາມຍນ຺ໂຕວ, ນ ໂສ ຠຸຎ຺ຊິ ນ ໂສ ປິວິ.

໓໘໙. ‘‘ກຸສຄ຺ເຄນຸທກມາທາຍ [ກຸສຄ຺ເຄ ອຸທກມາທາຍ (ສີ. ປີ.)], ສມຸທ຺ເທ ອຸທກໍ ມິເນ;

ເອວໍ ມານຸສກາ ກາມາ, ທິພ຺ພກາມານ ສນ຺ຕິເກ.

໓໙໐. ‘‘ເອວເມວ ອຫໍ ກາຬ, ຠຸຕ຺ວາ ຠກ຺ຂໍ ຣສຸຕ຺ຕມໍ;

ອລທ຺ຘາ ມານຸສໍ ມໍສໍ, ມຎ຺ເຎ ຫິສ຺ສາມິ ຊີວິຕໍ’’.

໓໙໑. ‘‘ຍຖາປິ ເຕ ຘຕຣຏ຺ຐາ, ຫໍສາ ເວຫາຍສງ຺ຄມາ;

ອຠຸຕ຺ຕປຣິໂຠເຄນ [ອວຸຕ຺ຕິປຣິໂຠເຄນ (ສີ. ປີ.), ອຍຸຕ຺ຕປຣິໂຠເຄນ (ສ຺ຍາ.)], ສພ຺ເພ ອພ຺ຠຕ຺ຖຕໍ ຄຕາ.

໓໙໒. ‘‘ເອວເມວ ຕຸວໍ ຣາຊ, ທ຺ວິປທິນ຺ທ ສຸໂຓຫິ ເມ;

ອຠກ຺ຂໍ ຣາຊ ຠກ຺ເຂສິ, ຕສ຺ມາ ປພ຺ພາຊຍນ຺ຕິ ຕໍ’’.

໓໙໓. ‘‘ຕິຏ຺ຐາຫີຕິ ມຍາ ວຸຕ຺ໂຕ, ໂສ ຕ຺ວໍ ຄຈ຺ຉສິ ປມ຺ມຸໂຂ [ປາມຸໂຂ (ກ.)];

ອຏ຺ຐິໂຕ ຕ຺ວໍ ຐິໂຕມ຺ຫີຕິ, ລປສິ ພ຺ຣຫ຺ມຈາຣິນິ;

ອິທໍ ເຕ ສມຓາຍຸຕ຺ຕໍ, ອສິຎ຺ຈ ເມ ມຎ຺ຎສິ ກງ຺ກປຕ຺ຕໍ’’ [ກງ຺ຂປຕ຺ຕໍ (ສ຺ຍາ. ກ.)].

໓໙໔. ‘‘ຐິໂຕຫມສ຺ມີ ສຘມ຺ເມສຸ ຣາຊ, ນ ນາມໂຄຕ຺ຕໍ ປຣິວຕ຺ຕຍາມິ;

ໂຈຣຎ຺ຈ ໂລເກ ອຐິຕໍ ວທນ຺ຕິ, ອາປາຍິກໍ ເນຣຍິກໍ ອິໂຕ ຈຸຕໍ.

໓໙໕. ‘‘ສເຈ ຕ຺ວໍ ສທ຺ທຫສິ [ສເຈປິ ສຫສິ (ສີ. ປີ.)] ຣາຊ, ສຸຕໍ ຄຓ຺ຫາຫິ ຂຕ຺ຕິຍ [ຂຕ຺ຕິຍໍ (ສ຺ຍາ.)];

ເຕນ ຍຎ຺ຎໍ ຍຊິຕ຺ວານ, ເອວໍ ສຄ຺ຄໍ ຄມິສ຺ສສິ’’.

໓໙໖. ‘‘ກິສ຺ມິໍ ນຸ ຣຏ຺ເຐ ຕວ ຊາຕິຠູມິ [ຊາຕຠູມິ (ສີ.)], ອຖ ເກນ ອຕ຺ເຖນ ອິຘານຸປຕ຺ໂຕ;

ອກ຺ຂາຫິ ເມ ພ຺ຣາຫ຺ມຓ ເອຕມຕ຺ຖໍ, ກິມິຈ຺ຉສີ ເທມິ ຕຍຊ຺ຊ ປຕ຺ຖິຕໍ’’.

໓໙໗. ‘‘ຄາຖາ ຈຕສ຺ໂສ ຘຣຓີມຫິສ຺ສຣ, ສຸຄມ຺ຠິຣຕ຺ຖາ ວຣສາຄຣູປມາ;

ຕເວວ ອຕ຺ຖາຍ ອິຘາຄໂຕສ຺ມິ, ສຸໂຓຫິ ຄາຖາ ປຣມຕ຺ຖສໍຫິຕາ’’.

໓໙໘. ‘‘ນ ເວ ຣຸທນ຺ຕິ ມຕິມນ຺ໂຕ ສປຎ຺ຎາ, ພຫຸສ຺ສຸຕາ ເຍ ພຫຸຏ຺ຐານຈິນ຺ຕິໂນ;

ທີປຎ຺ຫິ ເອຕໍ ປຣມໍ ນຣານໍ, ຍໍ ປຓ຺ຑິຕາ ໂສກນຸທາ ຠວນ຺ຕິ.

໓໙໙. ‘‘ອຕ຺ຕານໍ ຎາຕີ ອຸທາຫຸ [ອຸທ (ສີ. ປີ.)] ປຸຕ຺ຕທາຣໍ, ຘຎ຺ຎໍ ຘນໍ ຣຊຕໍ ຊາຕຣູປໍ;

ກິເມວ ຕ຺ວໍ [ກິໂມ ນຸ ຕ຺ວໍ (ສີ. ປີ.)] ສຸຕໂສມານຸຕປ຺ເປ, ໂກຣພ຺ຍເສຏ຺ຐ ວຈນໍ ສຸໂຓມ ເຕຕໍ’.

໔໐໐. ‘‘ເນວາຫມຕ຺ຕານມນຸຕ຺ຖຸນາມິ, ນ ປຸຕ຺ຕທາຣໍ ນ ຘນໍ ນ ຣຏ຺ຐໍ;

ສຕຎ຺ຈ ຘມ຺ໂມ ຈຣິໂຕ ປຸຣາໂຓ, ຕໍ ສງ຺ກຣໍ [ສງ຺ຄຣໍ (ສີ. ສ຺ຍາ. ປີ.) ເອວມຸປຣິປິ] ພ຺ຣາຫ຺ມຓສ຺ສານຸຕປ຺ເປ.

໔໐໑. ‘‘ກໂຕ ມຍາ ສງ຺ກໂຣ ພ຺ຣາຫ຺ມເຓນ, ຣຏ຺ເຐ ສເກ ອິສ຺ສຣິເຍ ຐິເຕນ;

ຕໍ ສງ຺ກຣໍ ພ຺ຣາຫ຺ມຓສປ຺ປທາຍ, ສຈ຺ຈານຸຣກ຺ຂີ ປຸນຣາວຊິສ຺ສໍ’’.

໔໐໒. ‘‘ເນວາຫເມຕໍ ອຠິສທ຺ທຫາມິ, ສຸຂີ ນໂຣ ມຈ຺ຈຸມຸຂາ ປມຸຕ຺ໂຕ;

ອມິຕ຺ຕຫຕ຺ຖໍ ປຸນຣາວເຊຍ຺ຍ, ໂກຣພ຺ຍເສຏ຺ຐ ນ ຫິ ມໍ ອຸເປສິ.

໔໐໓. ‘‘ມຸຕ຺ໂຕ ຕຸວໍ ໂປຣິສາທສ຺ສ ຫຕ຺ຖາ, ຄນ຺ຕ຺ວາ ສກໍ ມນ຺ທິຣໍ ກາມກາມີ;

ມຘຸຣໍ ປິຍໍ ຊີວິຕໍ ລທ຺ຘ ຣາຊ, ກຸໂຕ ຕຸວໍ ເອຫິສິ ເມ ສກາສໍ’’.

໔໐໔. ‘‘ມຕໍ ວເຣຍ຺ຍ ປຣິສຸທ຺ຘສີໂລ, ນ ຊີວິຕໍ [ນ ຫິ ຊີວິຕໍ (ສີ.)] ຄຣຫິໂຕ ປາປຘມ຺ໂມ;

ນ ຫິ ຕໍ ນຣໍ ຕາຍຕິ [ຕາຍເຕ (ສີ. ສ຺ຍາ. ປີ. ກ.)] ທຸຄ຺ຄຕີຫິ, ຍສ຺ສາປິ ເຫຕຸ ອລິກໍ ຠເຓຍ຺ຍ.

໔໐໕. ‘‘ສເຈປິ ວາໂຕ ຄິຣິມາວເຫຍ຺ຍ, ຈນ຺ໂທ ຈ ສູຣິໂຍ ຈ ຉມາ ປເຕຍ຺ຍຸໍ;

ສພ຺ພາ ຈ ນຊ຺ໂຊ ປຏິໂສຕໍ ວເຊຍ຺ຍຸໍ, ນ ຕ຺ເວວຫໍ ຣາຊ ມຸສາ ຠເຓຍ຺ຍໍ.

໔໐໖. [ອຍໍ ຄາຖາ ສີ. ປີ. ໂປຕ຺ຖເກສຸ ນ ທິສ຺ສຕິ] ‘‘ນຠໍ ຜເລຍ຺ຍ ອຸທຘີປິ ສຸສ຺ເສ, ສໍວຏ຺ຏເຍ ຠູຕຘຣາ ວສຸນ຺ຘຣາ;

ສິລຸຈ຺ຈໂຍ ເມຣຸ ສມູລມຸປ຺ປເຕ, ນ ຕ຺ເວວຫໍ ຣາຊ ມຸສາ ຠເຓຍ຺ຍໍ’’ [ອຍໍ ຄາຖາ ສີ. ປີ. ໂປຕ຺ຖເກສຸ ນ ທິສ຺ສຕິ].

໔໐໗. ‘‘ອສິຎ຺ຈ ສຕ຺ຕິຎ຺ຈ ປຣາມສາມິ, ສປຖມ຺ປິ ເຕ ສມ຺ມ ອຫໍ ກໂຣມິ;

ຕຍາ ປມຸຕ຺ໂຕ ອນໂຓ ຠວິຕ຺ວາ, ສຈ຺ຈານຸຣກ຺ຂີ ປຸນຣາວຊິສ຺ສໍ’’.

໔໐໘. ‘‘ໂຍ ເຕ ກໂຕ ສງ຺ກໂຣ ພ຺ຣາຫ຺ມເຓນ, ຣຏ຺ເຐ ສເກ ອິສ຺ສຣິເຍ ຐິເຕນ;

ຕໍ ສງ຺ກຣໍ ພ຺ຣາຫ຺ມຓສປ຺ປທາຍ, ສຈ຺ຈານຸຣກ຺ຂີ ປຸນຣາວຊສ຺ສຸ’’.

໔໐໙. ‘‘ໂຍ ເມ ກໂຕ ສງ຺ກໂຣ ພ຺ຣາຫ຺ມເຓນ, ຣຏ຺ເຐ ສເກ ອິສ຺ສຣິເຍ ຐິເຕນ;

ຕໍ ສງ຺ກຣໍ ພ຺ຣາຫ຺ມຓສປ຺ປທາຍ, ສຈ຺ຈານຸຣກ຺ຂີ ປຸນຣາວຊິສ຺ສໍ’’.

໔໑໐. ‘‘ມຸຕ຺ໂຕ ຈ ໂສ ໂປຣິສາທສ຺ສ ຫຕ຺ຖາ, ຄນ຺ຕ຺ວານ ຕໍ ພ຺ຣາຫ຺ມຓໍ ເອຕທໂວຈ;

ສຸໂຓມ [ສຸໂຓມິ (ສີ. ສ຺ຍາ.)] ຄາຖາໂຍ ສຕາຣຫາໂຍ, ຍາ ເມ ສຸຕາ ອສ຺ສຸ ຫິຕາຍ ພ຺ຣຫ຺ເມ’’.

໔໑໑. ‘‘ສກິເທວ ສຸຕໂສມ, ສພ຺ຠິ ໂຫຕິ [ໂຫຕຸ (ປີ.)] ສມາຄໂມ;

ສາ ນໍ ສງ຺ຄຕິ ປາເລຕິ, ນາສພ຺ຠິ ພຫຸສງ຺ຄໂມ.

໔໑໒. ‘‘ສພ຺ຠິເຣວ ສມາເສຖ, ສພ຺ຠິ ກຸພ຺ເພຖ ສນ຺ຖວໍ;

ສຕໍ ສທ຺ຘມ຺ມມຎ຺ຎາຍ, ເສຍ຺ໂຍ ໂຫຕິ ນ ປາປິໂຍ.

໔໑໓. ‘‘ຊີຣນ຺ຕິ ເວ ຣາຊຣຖາ ສຸຈິຕ຺ຕາ, ອໂຖ ສຣີຣມ຺ປິ ຊຣໍ ອຸເປຕິ;

ສຕຎ຺ຈ ຘມ຺ໂມ ນ ຊຣໍ ອຸເປຕິ, ສນ຺ໂຕ ຫເວ ສພ຺ຠິ ປເວທຍນ຺ຕິ.

໔໑໔. ‘‘ນຠຎ຺ຈໍ ທູເຣ ປຖວີ ຈ ທູເຣ, ປາຣໍ ສມຸທ຺ທສ຺ສ ຕທາຫຸ ທູເຣ;

ຕໂຕ ຫເວ ທູຣຕຣໍ ວທນ຺ຕິ, ສຕຎ຺ຈ ຘມ຺ໂມ [ຘມ຺ມໍ (ສີ. ປີ.)] ອສຕຎ຺ຈ ຣາຊ’’.

໔໑໕. ‘‘ສຫສ຺ສິຍາ [ສຫສ຺ສິໂຍ (ສີ. ປີ.)] ອິມາ ຄາຖາ, ນຫິມາ [ນ ອິມາ, (ສີ. ປີ.) ນຍິມາ (ສ຺ຍາ.)] ຄາຖາ ສຕາຣຫາ;

ຈຕ຺ຕາຣິ ຕ຺ວໍ ສຫສ຺ສານິ, ຂິປ຺ປໍ ຄຓ຺ຫາຫິ ພ຺ຣາຫ຺ມຓ’’.

໔໑໖. ‘‘ອາສີຕິຍາ ນາວຸຕິຍາ [ອສີຕິຍາ ນວຸຕິຍາ (ປີ.)] ຈ ຄາຖາ, ສຕາຣຫາ ຈາປິ ຠເວຍ຺ຍ [ຠເວຍ຺ຍຸ (ສີ. ສ຺ຍາ. ປີ.)] ຄາຖາ;

ປຈ຺ຈຕ຺ຕເມວ ສຸຕໂສມ ຊານຫິ, ສຫສ຺ສິຍາ ນາມ ກາ ອຕ຺ຖິ [ສຫສ຺ສິໂຍ ນາມ ອິຘຕ຺ຖິ (ສີ.)] ຄາຖາ’’.

໔໑໗. ‘‘ອິຈ຺ຉາມິ ໂວຫໍ ສຸຕວຸທ຺ຘິມຕ຺ຕໂນ, ສນ຺ໂຕຕິ ມໍ [ສນ຺ໂຕ ມມໍ (ສ຺ຍາ.), ສນ຺ໂຕ ຈ ມໍ (ສີ. ປີ. ກ.)] ສປ຺ປຸຣິສາ ຠເຊຍ຺ຍຸໍ;

ອຫໍ ສວນ຺ຕີຫິ ມໂຫທຘີວ, ນ ຫິ ຕາຕ ຕປ຺ປາມິ ສຸຠາສິເຕນ.

໔໑໘. ‘‘ອຄ຺ຄິ ຍຖາ ຕິຓກຏ຺ຐໍ ທຫນ຺ໂຕ, ນ ຕປ຺ປຕີ ສາຄໂຣວ [ສາຄໂຣ ວາ (ສີ. ປີ.)] ນທີຫິ;

ເອວມ຺ປິ ເຕ ປຓ຺ຑິຕາ ຣາຊເສຏ຺ຐ, ສຸຕ຺ວາ ນ ຕປ຺ປນ຺ຕິ ສຸຠາສິເຕນ.

໔໑໙. ‘‘ສກສ຺ສ ທາສສ຺ສ ຍທາ ສຸໂຓມິ, ຄາຖໍ ອຫໍ ອຕ຺ຖວຕິໍ [ຄາຖາ ອຫໍ ອຕ຺ຖວຕີ (ສີ. ປີ.)] ຊນິນ຺ທ;

ຕເມວ ສກ຺ກຈ຺ຈ ນິສາມຍາມິ, ນ ຫິ ຕາຕ ຘມ຺ເມສຸ ມມຕ຺ຖິ ຕິຕ຺ຕິ’’.

໔໒໐. ‘‘ອິທໍ ເຕ ຣຏ຺ຐໍ ສຘນໍ ສໂຍຄ຺ຄໍ, ສກາຍຸຣໍ ສພ຺ພກາມູປປນ຺ນໍ;

ກິໍ ກາມເຫຕຸ ປຣິຠາສສິມໍ [ຠາສເສ ມໍ (ສີ. ສ຺ຍາ. ປີ.)], ຄຈ຺ຉາມຫໍ ໂປຣິສາທສ຺ສ ຎຕ຺ເຕ’’ [ໂປຣິສາທສ຺ສ ກນ຺ເຕ (ສີ. ປີ.), ໂປຣິສາທສ຺ສຸປນ຺ເຕ (ກ.)].

໔໒໑. ‘‘ອຕ຺ຕານຸຣກ຺ຂາຍ ຠວນ຺ຕິ ເຫເຕ, ຫຕ຺ຖາໂຣຫາ ຣຖິກາ ປຕ຺ຕິກາ ຈ;

ອສ຺ສາຣຸຫາ [ອສ຺ສາໂຣຫາ (ສ຺ຍາ. ປີ.)] ເຍ ຈ ຘນຸຄ຺ຄຫາເສ, ເສນໍ ປຍຸຎ຺ຊາມ ຫນາມ ສຕ຺ຕຸໍ’’.

໔໒໒. ‘‘ສຸທຸກ຺ກຣໍ ໂປຣິສາໂທ ອກາສິ, ຊີວໍ ຄເຫຕ຺ວານ ອວສ຺ສຊີ ມໍ;

ຕໍ ຕາທິສໍ ປຸພ຺ພກິຈ຺ຈໍ ສຣນ຺ໂຕ, ທຸພ຺ເຠ ອຫໍ ຕສ຺ສ ກຖໍ ຊນິນ຺ທ’’.

໔໒໓. ‘‘ວນ຺ທິຕ຺ວາ ໂສ ປິຕຣໍ ມາຕຣຎ຺ຈ, ອນຸສາເສຕ຺ວາ ເນຄມຎ຺ຈ ພລຎ຺ຈ;

ສຈ຺ຈວາທີ ສຈ຺ຈານຸຣກ຺ຂມາໂນ, ອຄມາສິ ໂສ ຍຕ຺ຖ ໂປຣິສາໂທ’’.

໔໒໔. ‘‘ກໂຕ ມຍາ ສງ຺ກໂຣ ພ຺ຣາຫ຺ມເຓນ, ຣຏ຺ເຐ ສເກ ອິສ຺ສຣິເຍ ຐິເຕນ;

ຕໍ ສງ຺ກຣໍ ພ຺ຣາຫ຺ມຓສປ຺ປທາຍ, ສຈ຺ຈານຸຣກ຺ຂີ ປຸນຣາຄໂຕສ຺ມິ;

ຍຊສ຺ສຸ ຍຎ຺ຎໍ ຂາທ ມໍ ໂປຣິສາທ’’.

໔໒໕. ‘‘ນ ຫາຍເຕ ຂາທິຕໍ [ຂາທິຕຸໍ (ສີ. ສ຺ຍາ. ປີ.)] ມຍ຺ຫໍ ປຈ຺ຉາ, ຈິຕກາ ອຍໍ ຕາວ ສຘູມິກາວ [ສຘູມກາ ຈ (ສ຺ຍາ.)];

ນິທ຺ຘູມເກ ປຈິຕໍ ສາຘຸປກ຺ກໍ, ສຸໂຓມ [ສຸໂຓມິ (ສີ.), ສຸຓາມ (ປີ.)] ຄາຖາໂຍ ສຕາຣຫາໂຍ’’.

໔໒໖. ‘‘ອຘມ຺ມິໂກ ຕ຺ວໍ ໂປຣິສາທກາສິ [ໂປຣິສາທມກາສິ (ກ.)], ຣຏ຺ຐາ ຈ ຠຏ຺ໂຐ ອຸທຣສ຺ສ ເຫຕຸ;

ຘມ຺ມຎ຺ຈິມາ ອຠິວທນ຺ຕິ ຄາຖາ, ຘມ຺ໂມ ຈ ອຘມ຺ໂມ ຈ ກຸຫິໍ ສເມຕິ.

໔໒໗. ‘‘ອຘມ຺ມິກສ຺ສ ລຸທ຺ທສ຺ສ, ນິຈ຺ຈໍ ໂລຫິຕປາຓິໂນ;

ນຕ຺ຖິ ສຈ຺ຈໍ ກຸໂຕ ຘມ຺ໂມ, ກິໍ ສຸເຕນ ກຣິສ຺ສສິ’’.

໔໒໘. ‘‘ໂຍ ມໍສເຫຕຸ ມິຄວໍ ຈເຣຍ຺ຍ, ໂຍ ວາ ຫເນ ປຸຣິສມຕ຺ຕເຫຕຸ;

ອຸໂຠປິ ເຕ ເປຈ຺ຈ ສມາ ຠວນ຺ຕິ, ກສ຺ມາ ໂນ [ກສ຺ມາ ນຸ (ກ.)] ອຘມ຺ມິກໍ ພ຺ຣູສິ ມໍ ຕ຺ວໍ’’.

໔໒໙. ‘‘ປຎ຺ຈ ປຎ຺ຈນຂາ ຠກ຺ຂາ, ຂຕ຺ຕິເຍນ ປຊານຕາ;

ອຠກ຺ຂໍ ຣາຊ ຠກ຺ເຂສິ, ຕສ຺ມາ ອຘມ຺ມິໂກ ຕຸວໍ’’.

໔໓໐. ‘‘ມຸຕ຺ໂຕ ຕຸວໍ ໂປຣິສາທສ຺ສ ຫຕ຺ຖາ, ຄນ຺ຕ຺ວາ ສກໍ ມນ຺ທິຣໍ ກາມກາມີ;

ອມິຕ຺ຕຫຕ຺ຖໍ ປຸນຣາຄໂຕສິ, ນ ຂຕ຺ຕຘມ຺ເມ ກຸສໂລສິ ຣາຊ’’.

໔໓໑. ‘‘ເຍ ຂຕ຺ຕຘມ຺ເມ ກຸສລາ ຠວນ຺ຕິ, ປາເຍນ ເຕ ເນຣຍິກາ ຠວນ຺ຕິ;

ຕສ຺ມາ ອຫໍ ຂຕ຺ຕຘມ຺ມໍ ປຫາຍ, ສຈ຺ຈານຸຣກ຺ຂີ ປຸນຣາຄໂຕສ຺ມິ;

ຍຊສ຺ສຸ ຍຎ຺ຎໍ ຂາທ ມໍ ໂປຣິສາທ’’.

໔໓໒. ‘‘ປາສາທວາສາ ປຖວີຄວສ຺ສາ, ກາມິຕ຺ຖິໂຍ ກາສິກຈນ຺ທນຎ຺ຈ;

ສພ຺ພໍ ຕຫິໍ ລຠສິ [ລພ຺ຠຕິ (ປີ.)] ສາມິຕາຍ, ສຈ຺ເຈນ ກິໍ ປສ຺ສສິ ອານິສໍສໍ’’.

໔໓໓. ‘‘ເຍ ເກຈິເມ ອຕ຺ຖິ ຣສາ ປຖພ຺ຍາ, ສຈ຺ຈໍ ເຕສໍ ສາຘຸຕຣໍ ຣສານໍ;

ສຈ຺ເຈ ຐິຕາ ສມຓພ຺ຣາຫ຺ມຓາ ຈ, ຕຣນ຺ຕິ ຊາຕິມຣຓສ຺ສ ປາຣໍ’’.

໔໓໔. ‘‘ມຸຕ຺ໂຕ ຕຸວໍ ໂປຣິສາທສ຺ສ ຫຕ຺ຖາ, ຄນ຺ຕ຺ວາ ສກໍ ມນ຺ທິຣໍ ກາມກາມີ;

ອມິຕ຺ຕຫຕ຺ຖໍ ປຸນຣາຄໂຕສິ, ນ ຫິ ນູນ ເຕ ມຣຓຠຍໍ ຊນິນ຺ທ;

ອລີນຈິຕ຺ໂຕ ອສິ [ຈ’ສິ (ສີ. ສ຺ຍາ. ປີ.)] ສຈ຺ຈວາທີ’’.

໔໓໕. ‘‘ກຕາ ເມ ກລ຺ຍາຓາ ອເນກຣູປາ, ຍຎ຺ຎາ ຍິຏ຺ຐາ ເຍ ວິປຸລາ ປສຕ຺ຖາ;

ວິໂສຘິໂຕ ປຣໂລກສ຺ສ ມຄ຺ໂຄ, ຘມ຺ເມ ຐິໂຕ ໂກ ມຣຓສ຺ສ ຠາເຍ.

໔໓໖. ‘‘ກຕາ ເມ ກລ຺ຍາຓາ ອເນກຣູປາ, ຍຎ຺ຎາ ຍິຏ຺ຐາ ເຍ ວິປຸລາ ປສຕ຺ຖາ;

ອນານຸຕປ຺ປໍ ປຣໂລກໍ ຄມິສ຺ສໍ, ຍຊສ຺ສຸ ຍຎ຺ຎໍ ອທ [ຂາທ (ສີ. ສ຺ຍາ. ປີ.)] ມໍ ໂປຣິສາທ.

໔໓໗. ‘‘ປິຕາ ຈ ມາຕາ ຈ ອຸປຏ຺ຐິຕາ ເມ, ຘມ຺ເມນ ເມ ອິສ຺ສຣິຍໍ ປສຕ຺ຖໍ;

ວິໂສຘິໂຕ ປຣໂລກສ຺ສ ມຄ຺ໂຄ, ຘມ຺ເມ ຐິໂຕ ໂກ ມຣຓສ຺ສ ຠາເຍ.

໔໓໘. ‘‘ປິຕາ ຈ ມາຕາ ຈ ອຸປຏ຺ຐິຕາ ເມ, ຘມ຺ເມນ ເມ ອິສ຺ສຣິຍໍ ປສຕ຺ຖໍ;

ອນານຸຕປ຺ປໍ ປຣໂລກໍ ຄມິສ຺ສໍ, ຍຊສ຺ສຸ ຍຎ຺ຎໍ ອທ ມໍ ໂປຣິສາທ.

໔໓໙. ‘‘ຎາຕີສຸ ມິຕ຺ເຕສຸ ກຕາ ເມ ກາຣາ [ກຕູປກາໂຣ (ສ຺ຍາ. ກ.)], ຘມ຺ເມນ ເມ ອິສ຺ສຣິຍໍ ປສຕ຺ຖໍ;

ວິໂສຘິໂຕ ປຣໂລກສ຺ສ ມຄ຺ໂຄ, ຘມ຺ເມ ຐິໂຕ ໂກ ມຣຓສ຺ສ ຠາເຍ.

໔໔໐. ‘‘ຎາຕີສຸໍ ມິຕ຺ເຕສຸ ກຕາ ເມ ກາຣາ, ຘມ຺ເມນ ເມ ອິສ຺ສຣິຍໍ ປສຕ຺ຖໍ;

ອນານຸຕປ຺ປໍ ປຣໂລກໍ ຄມິສ຺ສໍ, ຍຊສ຺ສຸ ຍຎ຺ຎໍ ອທ ມໍ ໂປຣິສາທ.

໔໔໑. ‘‘ທິນ຺ນໍ ເມ ທານໍ ພຫຸຘາ ພຫູນໍ, ສນ຺ຕປ຺ປິຕາ ສມຓພ຺ຣາຫ຺ມຓາ ຈ;

ວິໂສຘິໂຕ ປຣໂລກສ຺ສ ມຄ຺ໂຄ, ຘມ຺ເມ ຐິໂຕ ໂກ ມຣຓສ຺ສ ຠາເຍ.

໔໔໒. ‘‘ທິນ຺ນໍ ເມ ທານໍ ພຫຸຘາ ພຫູນໍ, ສນ຺ຕປ຺ປິຕາ ສມຓພ຺ຣາຫ຺ມຓາ ຈ;

ອນານຸຕປ຺ປໍ ປຣໂລກໍ ຄມິສ຺ສໍ, ຍຊສ຺ສຸ ຍຎ຺ຎໍ ອທ ມໍ ໂປຣິສາທ’’.