໒໑. ອສີຕິນິປາໂຕ

໕໓໓. ຈູຬຫໍສຊາຕກໍ (໑)

໑. ‘‘ສຸມຸຂ ອນຸປຈິນນ຺ຕາ, ປກ຺ກມນ຺ຕິ ວິຫງ຺ຄມາ;

ຄຈ຺ຉ ຕຸວມ຺ປິ ມາ ກງ຺ຂິ, ນຕ຺ຖິ ພທ຺ເຘ [ພນ຺ເຘ (ສ຺ຍາ. ກ.)] ສຫາຍຕາ’’.

໒. ‘‘ຄຈ຺ເຉ ວາຫໍ ນ ວາ ຄຈ຺ເຉ, ນ ເຕນ ອມໂຣ ສິຍໍ;

ສຸຂິຕໍ ຕໍ ອຸປາສິຕ຺ວາ, ທຸກ຺ຂິຕໍ ຕໍ ກຖໍ ຊເຫ.

໓. ‘‘ມຣຓໍ ວາ ຕຍາ ສທ຺ຘິໍ, ຊີວິຕໍ ວາ ຕຍາ ວິນາ;

ຕເທວ ມຣຓໍ ເສຍ຺ໂຍ, ຍຎ຺ເຈ ຊີເວ ຕຍາ ວິນາ.

໔. ‘‘ເນສ ຘມ຺ໂມ ມຫາຣາຊ, ຍໍ ຕໍ ເອວໍ ຄຕໍ ຊເຫ;

ຍາ ຄຕິ ຕຸຍ຺ຫໍ ສາ ມຍ຺ຫໍ, ຣຸຈ຺ຈເຕ ວິຫຄາຘິປ.

໕. ‘‘ກາ ນຸ ປາເສນ ພທ຺ຘສ຺ສ [ພນ຺ຘສ຺ສ (ສ຺ຍາ. ກ.)], ຄຕິ ອຎ຺ຎາ ມຫານສາ;

ສາ ກຖໍ ເຈຕຍານສ຺ສ, ມຸຕ຺ຕສ຺ສ ຕວ ຣຸຈ຺ຈຕິ.

໖. ‘‘ກໍ ວາ ຕ຺ວໍ ປສ຺ສເສ ອຕ຺ຖໍ, ມມ ຕຸຍ຺ຫຎ຺ຈ ປກ຺ຂິມ;

ຎາຕີນໍ ວາວສິຏ຺ຐານໍ, ອຸຠິນ຺ນໍ ຊີວິຕກ຺ຂເຍ.

໗. ‘‘ຍໍ ນ ກຎ຺ຈນເທປິຎ຺ຉ [ເທປິຈ຺ຉ (ສີ. ປີ.), ທ຺ເວປິຈ຺ຉ (ສ຺ຍາ.)], ອນ຺ເຘນ ຕມສາ ຄຕໍ;

ຕາທິເສ ສຎ຺ຈຊໍ ປາຓໍ, ກມຕ຺ຖມຠິໂຊຕເຍ’’.

໘. ‘‘ກຖໍ ນຸ ປຕຕໍ ເສຏ຺ຐ, ຘມ຺ເມ ອຕ຺ຖໍ ນ ພຸຊ຺ຌສິ [ພຸຊ຺ຌເສ (ສີ.)];

ຘມ຺ໂມ ອປຈິໂຕ ສນ຺ໂຕ, ອຕ຺ຖໍ ທສ຺ເສຕິ ປາຓິນໍ.

໙. ‘‘ໂສຫໍ ຘມ຺ມໍ ອເປກ຺ຂາໂນ, ຘມ຺ມາ ຈຕ຺ຖໍ ສມຸຏ຺ຐິຕໍ;

ຠຕ຺ຕິຎ຺ຈ ຕຍິ ສມ຺ປສ຺ສໍ, ນາວກງ຺ຂາມິ ຊີວິຕໍ’’.

໑໐. ‘‘ອທ຺ຘາ ເອໂສ ສຕໍ ຘມ຺ໂມ, ໂຍ ມິຕ຺ໂຕ ມິຕ຺ຕມາປເທ;

ນ ຈເຊ ຊີວິຕສ຺ສາປິ, ເຫຕຸຘມ຺ມມນຸສ຺ສຣໍ.

໑໑. ‘‘ສ຺ວາຍໍ ຘມ຺ໂມ ຈ ເຕ ຈິຓ຺ໂຓ, ຠຕ຺ຕິ ຈ ວິທິຕາ ມຍິ;

ກາມໍ ກຣສ຺ສຸ ມຍ຺ເຫຕໍ, ຄຈ຺ເຉວານຸມໂຕ ມຍາ’’.

໑໒. ‘‘ອປິ ຕ຺ເວວໍ ຄເຕ ກາເລ, ຍໍ ຂຓ຺ຑໍ [ພທ຺ຘໍ (ສີ.), ພນ຺ຘໍ (ປີ.)] ຎາຕິນໍ ມຍາ;

ຕຍາ ຕໍ ພຸທ຺ຘິສມ຺ປນ຺ນໍ [ພຸທ຺ຘິສມ຺ປນ຺ນ (ສີ. ສ຺ຍາ. ປີ.)], ອສ຺ສ ປຣມສໍວຸຕໍ.

໑໓. ‘‘ອິຈ຺ເຈວໍ [ອິຈ຺ເຈວ (ສີ. ປີ.)] ມນ຺ຕຍນ຺ຕານໍ, ອຣິຍານໍ ອຣິຍວຸຕ຺ຕິນໍ;

ປຈ຺ຈທິສ຺ສຖ ເນສາໂທ, ອາຕຸຣານມິວນ຺ຕໂກ.

໑໔. ‘‘ເຕ ສຕ຺ຕຸມຠິສຎ຺ຈິກ຺ຂ, ທີຆຣຕ຺ຕໍ ຫິຕາ ທິຊາ;

ຕຸຓ຺ຫີມາສິຕ຺ຖ ອຸຠໂຍ, ນ ສຎ຺ຈເລສຸມາສນາ [ນ ຈ ສຎ຺ເຈສຸ’ມາສນາ (ສີ. ປີ.)].

໑໕. ‘‘ຘຕຣຏ຺ເຐ ຈ ທິສ຺ວານ, ສມຸຑ຺ເຑນ຺ເຕ ຕໂຕ ຕໂຕ;

ອຠິກ຺ກມຖ ເວເຄນ, ທິຊສຕ຺ຕຸ ທິຊາຘິເປ.

໑໖. ‘‘ໂສ ຈ ເວເຄນຠິກ຺ກມ຺ມ, ອາສຊ຺ຊ ປຣເມ ທິເຊ;

ປຈ຺ຈກມິຕ຺ຖ [ປຈ຺ຈກມ຺ປິຕ຺ຖ (ສີ. ສ຺ຍາ. ປີ.)] ເນສາໂທ, ພທ຺ຘາ ອິຕິ ວິຈິນ຺ຕຍໍ.

໑໗. ‘‘ເອກໍວ ພທ຺ຘມາສີນໍ, ອພທ຺ຘຎ຺ຈ ປຸນາປຣໍ;

ອາສຊ຺ຊ ພທ຺ຘມາສີນໍ, ເປກ຺ຂມານມທີນວໍ.

໑໘. ‘‘ຕໂຕ ໂສ ວິມໂຕເຍວ, ປຓ຺ຑເຣ ອຊ຺ຌຠາສຖ;

ປວຑ຺ຒກາເຍ ອາສີເນ, ທິຊສງ຺ຆຄຓາຘິເປ.

໑໙. ‘‘ຍໍ ນຸ ປາເສນ ມຫຕາ, ພທ຺ໂຘ ນ ກຸຣຸເຕ ທິສໍ;

ອຖ ກສ຺ມາ ອພທ຺ໂຘ ຕ຺ວໍ, ພລີ ປກ຺ຂິ ນ ຄຈ຺ຉສິ.

໒໐. ‘‘ກິນ຺ນຸ ຕ຺ຍາຍໍ [ຕາ’ຍໍ (ສີ. ປີ. ກ.)] ທິໂຊ ໂຫຕິ, ມຸຕ຺ໂຕ ພທ຺ຘໍ ອຸປາສສິ;

ໂອຫາຍ ສກຸຓາ ຍນ຺ຕິ, ກິໍ ເອໂກ ອວຫີຍສິ’’.

໒໑. ‘‘ຣາຊາ ເມ ໂສ ທິຊາມິຕ຺ຕ, ສຂາ ປາຓສໂມ ຈ ເມ;

ເນວ ນໍ ວິຊຫິສ຺ສາມິ, ຍາວ ກາລສ຺ສ ປຣິຍາຍໍ.

໒໒. ‘‘ກຖໍ ປນາຍໍ ວິຫງ຺ໂຄ, ນາທ຺ທສ ປາສໂມຑ຺ຑິຕໍ;

ປທຎ຺ເຫຕໍ ມຫນ຺ຕານໍ, ໂພທ຺ຘຸມຣຫນ຺ຕິ ອາປທໍ.

໒໓. ‘‘ຍທາ ປຣາຠໂວ ໂຫຕິ, ໂປໂສ ຊີວິຕສງ຺ຂເຍ;

ອຖ ຊາລຎ຺ຈ ປາສຎ຺ຈ, ອາສຊ຺ຊາປິ ນ ພຸຊ຺ຌຕິ.

໒໔. ‘‘ອປິ ຕ຺ເວວ ມຫາປຎ຺ຎ, ປາສາ ພຫຸວິຘາ ຕຕາ [ຕຕາ (ສ຺ຍາ. ກ.)];

ຄຸຍ຺ຫມາສຊ຺ຊ [ຄູຬ຺ຫມາສຊ຺ຊ (ສີ. ປີ.)] ພຊ຺ຌນ຺ຕິ, ອເຖວໍ ຊີວິຕກ຺ຂເຍ’’.

໒໕. ‘‘ອປິ ນາຍໍ ຕຍາ ສທ຺ຘິໍ, ສໍວາສສ຺ສ [ສມ຺ຠາສສ຺ສ (ສີ. ປີ.)] ສຸຂຸທ຺ຣໂຍ;

ອປິ ໂນ ອນຸມຎ຺ຎາສິ, ອປິ ໂນ ຊີວິຕໍ ທເທ’’.

໒໖. ‘‘ນ ເຈວ ເມ ຕ຺ວໍ ພທ຺ໂຘສິ, ນປິ ອິຈ຺ຉາມິ ເຕ ວຘໍ;

ກາມໍ ຂິປ຺ປມິໂຕ ຄນ຺ຕ຺ວາ, ຊີວ ຕ຺ວໍ ອນິໂຆ ຈິຣໍ’’.

໒໗. ‘‘ເນວາຫເມຕມິຈ຺ຉາມິ, ອຎ຺ຎຕ຺ເຣຕສ຺ສ ຊີວິຕາ;

ສເຈ ເອເກນ ຕຸຏ຺ໂຐສິ, ມຸຎ຺ເຈຕໍ ມຎ຺ຈ ຠກ຺ຂຍ.

໒໘. ‘‘ອາໂຣຫປຣິຓາເຫນ, ຕຸລ຺ຍາສ຺ມາ [ຕຸລ຺ຍາມ຺ຫາ (ກ.)] ວຍສາ ອຸໂຠ;

ນ ເຕ ລາເຠນ ຊີວຕ຺ຖິ [ຊີນຕ຺ຖິ (ສີ. ສ຺ຍາ. ປີ.)], ເອເຕນ ນິມິນາ ຕຸວໍ.

໒໙. ‘‘ຕທິງ຺ຆ ສມເປກ຺ຂສ຺ສຸ [ສມເວກ຺ຂສຸ (ສີ. ປີ.)], ໂຫຕຸ ຄິທ຺ຘິ ຕວມ຺ຫສຸ [ຕວສ຺ມສຸ (ສີ. ສ຺ຍາ.)];

ມໍ ປຸພ຺ເພ ພນ຺ຘ ປາເສນ, ປຈ຺ຉາ ມຸຎ຺ຈ ທິຊາຘິປໍ.

໓໐. ‘‘ຕາວເທວ ຈ ເຕ ລາໂຠ, ກຕາສ຺ສ [ກຕສ຺ສາ (ສີ. ປີ.)] ຍາຈນາຍ ຈ;

ມິຕ຺ຕິ ຈ ຘຕຣຏ຺ເຐຫິ, ຍາວຊີວາຍ ເຕ ສິຍາ’’.

໓໑. ‘‘ປສ຺ສນ຺ຕຸ ໂນ ມຫາສງ຺ຆາ, ຕຍາ ມຸຕ຺ຕໍ ອິໂຕ ຄຕໍ;

ມິຕ຺ຕາມຈ຺ຈາ ຈ ຠຈ຺ຈາ ຈ, ປຸຕ຺ຕທາຣາ ຈ ພນ຺ຘວາ.

໓໒. ‘‘ນ ຈ ເຕ ຕາທິສາ ມິຕ຺ຕາ, ພຫູນໍ [ພຫຸນ຺ນໍ (ສີ. ປີ.)] ອິຘ ວິຊ຺ຊຕິ;

ຍຖາ ຕ຺ວໍ ຘຕຣຏ຺ຐສ຺ສ, ປາຓສາຘາຣໂຓ ສຂາ.

໓໓. ‘‘ໂສ ເຕ ສຫາຍໍ ມຸຎ຺ຈາມິ, ໂຫຕຸ ຣາຊາ ຕວານຸໂຄ;

ກາມໍ ຂິປ຺ປມິໂຕ ຄນ຺ຕ຺ວາ, ຎາຕິມຊ຺ເຌ ວິໂຣຈຖ’’.

໓໔. ‘‘ໂສ ປຕີໂຕ ປມຸຕ຺ເຕນ, ຠຕ຺ຕຸນາ [ຠຕ຺ຕຸໂນ (ສ຺ຍາ.)] ຠຕ຺ຕຸຄາຣໂວ;

ອຊ຺ຌຠາສຖ ວກ຺ກງ຺ໂຄ [ວງ຺ກງ຺ໂຄ (ສ຺ຍາ.)], ວາຈໍ ກຓ຺ຓສຸຂໍ ຠຓໍ.

໓໕. ‘‘ເອວໍ ລຸທ຺ທກ ນນ຺ທສ຺ສຸ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ນນ຺ທາມິ, ມຸຕ຺ຕໍ ທິສ຺ວາ ທິຊາຘິປໍ’’.

໓໖. ‘‘ເອຫິ ຕໍ ອນຸສິກ຺ຂາມິ, ຍຖາ ຕ຺ວມປິ ລຈ຺ຉເສ;

ລາຠໍ ຕວາຍໍ [ຍຖາຍໍ (ສີ. ປີ.)] ຘຕຣຏ຺ໂຐ, ປາປໍ ກິຎ຺ຈິ [ກຎ຺ຈິ (ສີ.)] ນ ທກ຺ຂຕິ.

໓໗. ‘‘ຂິປ຺ປມນ຺ເຕປຸຣໍ ເນຕ຺ວາ [ຄນ຺ຕ຺ວາ (ສ຺ຍາ. ກ.)], ຣຎ຺ໂຎ ທສ຺ເສຫິ ໂນ ອຸໂຠ;

ອພທ຺ເຘ ປກຕິຠູເຕ, ກາເຊ [ກາເຈ (ປີ.)] ອຸຠຍໂຕ ຐິເຕ.

໓໘. ‘‘ຘຕຣຏ຺ຐາ ມຫາຣາຊ, ຫໍສາຘິປຕິໂນ ອິເມ;

ອຍຎ຺ຫິ ຣາຊາ ຫໍສານໍ, ອຍໍ ເສນາປຕີຕໂຣ.

໓໙. ‘‘ອສໍສຍໍ ອິມໍ ທິສ຺ວາ, ຫໍສຣາຊໍ ນຣາຘິໂປ;

ປຕີໂຕ ສຸມໂນ ວິຕ຺ໂຕ [ຈິຕ຺ໂຕ (ກ.)], ພຫຸໍ ທສ຺ສຕິ ເຕ ຘນໍ’’.

໔໐. ‘‘ຕສ຺ສ ຕໍ ວຈນໍ ສຸຕ຺ວາ, ກມ຺ມຸນາ ອຸປປາທຍິ;

ຂິປ຺ປມນ຺ເຕປຸຣໍ ຄນ຺ຕ຺ວາ, ຣຎ຺ໂຎ ຫໍເສ ອທສ຺ສຍິ;

ອພທ຺ເຘ ປກຕິຠູເຕ, ກາເຊ ອຸຠຍໂຕ ຐິເຕ.

໔໑. ‘‘ຘຕຣຏ຺ຐາ ມຫາຣາຊ, ຫໍສາຘິປຕິໂນ ອິເມ;

ອຍຎ຺ຫິ ຣາຊາ ຫໍສານໍ, ອຍໍ ເສນາປຕີຕໂຣ’’.

໔໒. ‘‘ກຖໍ ປນິເມ ວິຫງ຺ຄາ [ວິຫຄາ (ສີ. ປີ.)], ຕວ ຫຕ຺ຖຕ຺ຕມາຄຕາ [ຫຕ຺ຖຕ຺ຖ’ມາຄຕາ (ສີ. ສ຺ຍາ. ປີ.)];

ກຖໍ ລຸທ຺ໂທ ມຫນ຺ຕານໍ, ອິສ຺ສເຣ ອິຘ ອຊ຺ຌຄາ’’.

໔໓. ‘‘ວິຫິຕາ ສນ຺ຕິເມ ປາສາ, ປລ຺ລເລສຸ ຊນາຘິປ;

ຍໍ ຍທາຍຕນໍ ມຎ຺ເຎ, ທິຊານໍ ປາຓໂຣຘນໍ.

໔໔. ‘‘ຕາທິສໍ ປາສມາສຊ຺ຊ, ຫໍສຣາຊາ ອພຊ຺ຌຖ;

ຕໍ ອພທ຺ໂຘ ອຸປາສີໂນ, ມມາຍໍ ອຊ຺ຌຠາສຖ.

໔໕. ‘‘ສຸທຸກ຺ກຣໍ ອນຣິເຍຫິ, ທຫເຕ ຠາວມຸຕ຺ຕມໍ;

ຠຕ຺ຕຸຣຕ຺ເຖ ປຣກ຺ກນ຺ໂຕ, ຘມ຺ມຍຸຕ຺ໂຕ [ຘມ຺ເມ ຍຸຕ຺ໂຕ (ສີ. ປີ.)] ວິຫງ຺ຄໂມ.

໔໖. ‘‘ອຕ຺ຕນາຍໍ [ອຕ຺ຕໂນ ຍໍ (ສ຺ຍາ.)] ຈຊິຕ຺ວານ, ຊີວິຕໍ ຊີວິຕາຣໂຫ;

ອນຸຕ຺ຖຸນນ຺ໂຕ ອາສີໂນ, ຠຕ຺ຕຸ ຍາຈິຕ຺ຖ ຊີວິຕໍ.

໔໗. ‘‘ຕສ຺ສ ຕໍ ວຈນໍ ສຸຕ຺ວາ, ປສາທມຫມຊ຺ຌຄາ;

ຕໂຕ ນໍ ປາມຸຈິໍ [ປາມຸຎ຺ຈິໍ (ປີ. ກ.)] ປາສາ, ອນຸຎ຺ຎາສິໍ ສຸເຂນ ຈ.

໔໘. ‘‘‘ໂສ ປຕີໂຕ ປມຸຕ຺ເຕນ, ຠຕ຺ຕຸນາ ຠຕ຺ຕຸຄາຣໂວ;

ອຊ຺ຌຠາສຖ ວກ຺ກງ຺ໂຄ, ວາຈໍ ກຓ຺ຓສຸຂໍ ຠຓໍ.

໔໙. ‘‘‘ເອວໍ ລຸທ຺ທກ ນນ຺ທສ຺ສຸ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ນນ຺ທາມິ, ມຸຕ຺ຕໍ ທິສ຺ວາ ທິຊາຘິປໍ.

໕໐. ‘‘‘ເອຫິ ຕໍ ອນຸສິກ຺ຂາມິ, ຍຖາ ຕ຺ວມປິ ລຈ຺ຉເສ;

ລາຠໍ ຕວາຍໍ ຘຕຣຏ຺ໂຐ, ປາປໍ ກິຎ຺ຈິ ນ ທກ຺ຂຕິ.

໕໑. ‘‘‘ຂິປ຺ປມນ຺ເຕປຸຣໍ ເນຕ຺ວາ [ຄນ຺ຕ຺ວາ (ສພ຺ພຕ຺ຖ)], ຣຎ຺ໂຎ ທສ຺ເສຫິ ໂນ ອຸໂຠ;

ອພທ຺ເຘ ປກຕິຠູເຕ, ກາເຊ ອຸຠຍໂຕ ຐິເຕ.

໕໒. ‘‘‘ຘຕຣຏ຺ຐາ ມຫາຣາຊ, ຫໍສາຘິປຕິໂນ ອິເມ;

ອຍຎ຺ຫິ ຣາຊາ ຫໍສານໍ, ອຍໍ ເສນາປຕີຕໂຣ.

໕໓. ‘‘‘ອສໍສຍໍ ອິມໍ ທິສ຺ວາ, ຫໍສຣາຊໍ ນຣາຘິໂປ;

ປຕີໂຕ ສຸມໂນ ວິຕ຺ໂຕ, ພຫຸໍ ທສ຺ສຕິ ເຕ ຘນໍ’.

໕໔. ‘‘ເອວເມຕສ຺ສ ວຈນາ, ອານີຕາເມ ອຸໂຠ ມຍາ;

ເອຕ຺ເຖວ ຫິ ອິເມ ອາສຸໍ [ອສ຺ສຸ (ສີ. ສ຺ຍາ. ປີ.)], ອຸໂຠ ອນຸມຕາ ມຍາ.

໕໕. ‘‘ໂສຍໍ ເອວໍ ຄໂຕ ປກ຺ຂີ, ທິໂຊ ປຣມຘມ຺ມິໂກ;

ມາທິສສ຺ສ ຫິ ລຸທ຺ທສ຺ສ, ຊນເຍຍ຺ຍາຖ ມທ຺ທວໍ.

໕໖. ‘‘ອຸປາຍນຎ຺ຈ ເຕ ເທວ, ນາຎ຺ຎໍ ປສ຺ສາມິ ເອທິສໍ;

ສພ຺ພສາກຸຓິກາຄາເມ, ຕໍ ປສ຺ສ ມນຸຊາຘິປ’’.

໕໗. ‘‘ທິສ຺ວາ ນິສິນ຺ນໍ ຣາຊານໍ, ປີເຐ ໂສວຓ຺ຓເຍ ສຸເຠ;

ອຊ຺ຌຠາສຖ ວກ຺ກງ຺ໂຄ, ວາຈໍ ກຓ຺ຓສຸຂໍ ຠຓໍ.

໕໘. ‘‘ກຈ຺ຈິນ຺ນຸ ໂຠໂຕ ກຸສລໍ, ກຈ຺ຈິ ໂຠໂຕ ອນາມຍໍ;

ກຈ຺ຈິ ຣຏ຺ຐມິທໍ ຜີຕໍ, ຘມ຺ເມນ ມນຸສາສສິ’’.

໕໙. ‘‘ກຸສລຎ຺ເຈວ ເມ ຫໍສ, ອໂຖ ຫໍສ ອນາມຍໍ;

ອໂຖ ຣຏ຺ຐມິທໍ ຜີຕໍ, ຘມ຺ເມນ ມນຸສາສຫໍ’’ [ມນຸສິສ຺ສຕິ (ສີ. ປີ.)].

໖໐. ‘‘ກຈ຺ຈິ ໂຠໂຕ ອມຈ຺ເຈສຸ, ໂທໂສ ໂກຈິ ນ ວິຊ຺ຊຕິ;

ກຈ຺ຈິ ຈ [ກຈ຺ຈິນ຺ນຸ (ສີ. ປີ.)] ເຕ ຕວຕ຺ເຖສຸ, ນາວກງ຺ຂນ຺ຕິ ຊີວິຕໍ’’.

໖໑. ‘‘ອໂຖປິ ເມ ອມຈ຺ເຈສຸ, ໂທໂສ ໂກຈິ ນ ວິຊ຺ຊຕິ;

ອໂຖປິ ເຕ [ອໂຖປິເມ (ສີ. ປີ.)] ມມຕ຺ເຖສຸ, ນາວກງ຺ຂນ຺ຕິ ຊີວິຕໍ’’.

໖໒. ‘‘ກຈ຺ຈິ ເຕ ສາທິສີ ຠຣິຍາ, ອສ຺ສວາ ປິຍຠາຓິນີ;

ປຸຕ຺ຕຣູປຍສູເປຕາ, ຕວ ຉນ຺ທວສານຸຄາ’’.

໖໓. ‘‘ອໂຖ ເມ ສາທິສີ ຠຣິຍາ, ອສ຺ສວາ ປິຍຠາຓິນີ;

ປຸຕ຺ຕຣູປຍສູເປຕາ, ມມ ຉນ຺ທວສານຸຄາ’’.

໖໔. ‘‘ຠວນ຺ຕໍ [ຠວໍ ຕຸ (ສີ. ປີ.), ຠວນ຺ນຸ (ສ຺ຍາ.)] ກຈ຺ຈິ ນຸ ມຫາ-ສຕ຺ຕຸຫຕ຺ຖຕ຺ຕຕໍ [ຫຕ຺ຖຕ຺ຖຕໍ (ສີ. ສ຺ຍາ. ປີ.)] ຄໂຕ;

ທຸກ຺ຂມາປຊ຺ຊິ ວິປຸລໍ, ຕສ຺ມິໍ ປຐມມາປເທ.

໖໕. ‘‘ກຈ຺ຈິ ຍນ຺ຕາປຕິຕ຺ວານ, ທຓ຺ເຑນ ສມໂປຖຍິ;

ເອວເມເຕສໍ ຊມ຺ມານໍ, ປາຕິກໍ [ປາກຕິກໍ (ສີ. ປີ.)] ຠວຕິ ຕາວເທ’’.

໖໖. ‘‘ເຂມມາສິ ມຫາຣາຊ, ເອວມາປທິຍາ ສຕິ [ເອວມາປທິ ສໍສຕິ (ສີ. ປີ.)];

ນ ຈາຍໍ ກິຎ຺ຈິ ຣສ຺ມາສຸ, ສຕ຺ຕູວ ສມປຊ຺ຊຖ.

໖໗. ‘‘ປຈ຺ຈຄມິຕ຺ຖ ເນສາໂທ, ປຸພ຺ເພວ ອຊ຺ຌຠາສຖ;

ຕທາຍໍ ສຸມຸໂຂເຍວ, ປຓ຺ຑິໂຕ ປຈ຺ຈຠາສຖ.

໖໘. ‘‘ຕສ຺ສ ຕໍ ວຈນໍ ສຸຕ຺ວາ, ປສາທມຍມຊ຺ຌຄາ;

ຕໂຕ ມໍ ປາມຸຈີ ປາສາ, ອນຸຎ຺ຎາສິ ສຸເຂນ ຈ.

໖໙. ‘‘ອິທຎ຺ຈ ສຸມຸເຂເນວ, ເອຕທຕ຺ຖາຍ ຈິນ຺ຕິຕໍ;

ໂຠໂຕ ສກາເສຄມນໍ [ສກາເສ + ອາຄມນໍ], ເອຕສ຺ສ ຘນມິຈ຺ຉຕາ’’.

໗໐. ‘‘ສ຺ວາຄຕຎ຺ເຈວິທໍ ຠວຕໍ, ປຕີໂຕ ຈສ຺ມິ ທສ຺ສນາ;

ເອໂສ ຈາປິ ພຫຸໍ ວິຕ຺ຕໍ, ລຠຕໍ ຍາວທິຈ຺ຉຕິ’’ [ຍາວຕິຈ຺ຉຕິ (ສີ. ປີ.)].

໗໑. ‘‘ສນ຺ຕປ຺ປຍິຕ຺ວາ ເນສາທໍ, ໂຠເຄຫິ ມນຸຊາຘິໂປ;

ອຊ຺ຌຠາສຖ ວກ຺ກງ຺ຄໍ, ວາຈໍ ກຓ຺ຓສຸຂໍ ຠຓໍ’’.

໗໒. ‘‘ຍໍ ຂລຸ ຘມ຺ມມາຘີນໍ, ວໂສ ວຕ຺ຕຕິ ກິຎ຺ຈນໍ;

ສພ຺ພຕ຺ຖິສ຺ສຣິຍໍ ຕວ [ສພ຺ພຕ຺ຖິສ຺ສຣິຍໍ ຠວຕໍ (ສີ. ສ຺ຍາ. ປີ.), ສພ຺ພິສ຺ສຣິຍໍ ຠວຕໍ (ສ຺ຍາ. ກ.)], ຕໍ ປສາສ [ປສາສຖ (ສີ. ສ຺ຍາ. ປີ.)] ຍທິຈ຺ຉຖ.

໗໓. ‘‘ທານຕ຺ຖໍ ອຸປໂຠຕ຺ຕຸໍ ວາ, ຍໍ ຈຎ຺ຎໍ ອຸປກປ຺ປຕິ;

ເອຕໍ ທທາມິ ໂວ ວິຕ຺ຕໍ, ອິສ຺ສຣິຍໍ [ອິສ຺ເສຣໍ (ສີ.), ອິສ຺ສຣໍ (ປີ.)] ວິສ຺ສຊາມິ ໂວ’’.

໗໔. ‘‘ຍຖາ ຈ ມ຺ຍາຍໍ ສຸມຸໂຂ, ອຊ຺ຌຠາເສຍ຺ຍ ປຓ຺ຑິໂຕ;