໕໓໕. ສຸຘາໂຠຊນຊາຕກໍ (໓)

໑໙໒. ‘‘ເນວ ກິຓາມິ ນປິ ວິກ຺ກິຓາມິ, ນ ຈາປິ ເມ ສນ຺ນິຈໂຍ ຈ ອຕ຺ຖິ [ອິຘຕ຺ຖິ (ສ຺ຍາ.)];

ສຸກິຈ຺ຉຣູປໍ ວຕິທໍ ປຣິຕ຺ຕໍ, ປຕ຺ໂຖທໂນ ນາລມຍໍ ທຸວິນ຺ນໍ’’.

໑໙໓. ‘‘ອປ຺ປມ຺ຫາ ອປ຺ປກໍ ທຊ຺ຊາ, ອນຸມຊ຺ຌໂຕ ມຊ຺ຌກໍ;

ພຫຸມ຺ຫາ ພຫຸກໍ ທຊ຺ຊາ, ອທານໍ ນຸປປຊ຺ຊຕິ [ນ ອຸປປຊ຺ຊຕິ (ສີ. ປີ.)].

໑໙໔. ‘‘ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ [ອຣິຍໍ ມຄ຺ຄໍ ສມາຣຸຫ (ສີ. ປີ.)], ເນກາສີ ລຠເຕ ສຸຂໍ’’.

໑໙໕. ‘‘ໂມຆຎ຺ຈສ຺ສ ຫຸຕໍ ໂຫຕິ, ໂມຆຎ຺ຈາປິ ສມີຫິຕໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເອໂກ ຠຸຎ຺ຊຕິ ໂຠຊນໍ.

໑໙໖. ‘‘ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ’’.

໑໙໗. ‘‘ສຈ຺ຈຎ຺ຈສ຺ສ ຫຸຕໍ ໂຫຕິ, ສຈ຺ຈຎ຺ຈາປິ ສມີຫິຕໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເນໂກ ຠຸຎ຺ຊຕິ ໂຠຊນໍ.

໑໙໘. ‘‘ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ’’.

໑໙໙. ‘‘ສຣຎ຺ຈ ຊຸຫຕິ ໂປໂສ, ພຫຸກາຍ ຄຍາຍ ຈ;

ໂທເຓ ຕິມ຺ພຣຸຕິຕ຺ຖສ຺ມິໍ, ສີຆໂສເຕ ມຫາວເຫ.

໒໐໐. ‘‘ອຕ຺ຣ ຈສ຺ສ ຫຸຕໍ ໂຫຕິ, ອຕ຺ຣ ຈສ຺ສ ສມີຫິຕໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເນໂກ ຠຸຎ຺ຊຕິ ໂຠຊນໍ.

໒໐໑. ‘‘ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ’’.

໒໐໒. ‘‘ພຬິສຎ຺ຫິ ໂສ ນິຄິລຕິ [ນິຄ຺ຄິລຕິ (ສີ. ປີ.)], ທີຆສຸຕ຺ຕໍ ສພນ຺ຘນໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເອໂກ ຠຸຎ຺ຊຕິ ໂຠຊນໍ.

໒໐໓. ‘‘ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ’’.

໒໐໔. ‘‘ອຸຬາຣວຓ຺ຓາ ວຕ ພ຺ຣາຫ຺ມຓາ ອິເມ, ອຍຎ຺ຈ ໂວ ສຸນໂຂ ກິສ຺ສ ເຫຕຸ;

ອຸຈ຺ຈາວຈໍ ວຓ຺ຓນິຠໍ ວິກຸພ຺ພຕິ, ອກ຺ຂາຖ ໂນ ພ຺ຣາຫ຺ມຓາ ເກ ນຸ ຕຸມ຺ເຫ’’.

໒໐໕. ‘‘ຈນ຺ໂທ ຈ ສູຣິໂຍ ຈ [ສູຣິໂຍ ຈ (ກ.)] ອຸໂຠ ອິຘາຄຕາ, ອຍໍ ປນ ມາຕລິ ເທວສາຣຖິ;

ສກ຺ໂກຫມສ຺ມິ ຕິທສານມິນ຺ໂທ, ເອໂສ ຈ ໂຂ ປຎ຺ຈສິໂຂຕິ ວຸຈ຺ຈຕິ.

໒໐໖. ‘‘ປາຓິສ຺ສຣາ ມຸທິງ຺ຄາ ຈ [ມຸຕິງ຺ຄາ ຈ (ສີ. ສ຺ຍາ. ປີ.)], ມຸຣຊາລມ຺ພຣານິ ຈ;

ສຸຕ຺ຕເມນໍ ປໂພເຘນ຺ຕິ, ປຏິພຸທ຺ໂຘ ຈ ນນ຺ທຕິ’’.

໒໐໗. ‘‘ເຍ ເກຈິເມ ມຈ຺ຉຣິໂນ ກທຣິຍາ, ປຣິຠາສກາ ສມຓພ຺ຣາຫ຺ມຓານໍ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ນິຣຍໍ ວຊນ຺ຕິ’’.

໒໐໘. ‘‘ເຍ ເກຈິເມ ສຸຄ຺ຄຕິມາສມານາ [ສຸຄ຺ຄຕິມາສສານາ (ສີ. ປີ.), ສຸຄ຺ຄຕາສິສມານາ (ກ.)], ຘມ຺ເມ ຐິຕາ ສໍຍເມ ສໍວິຠາເຄ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ສຸຄຕິໍ ວຊນ຺ຕິ’’.

໒໐໙. ‘‘ຕ຺ວໍ ໂນສິ ຎາຕິ ປຸຣິມາສຸ ຊາຕິສຸ, ໂສ ມຈ຺ຉຣີ ໂຣສໂກ [ໂກສິໂຍ (ສ຺ຍາ. ກ.)] ປາປຘມ຺ໂມ;

ຕເວວ ອຕ຺ຖາຍ ອິຘາຄຕມ຺ຫາ, ມາ ປາປຘມ຺ໂມ ນິຣຍໍ ຄມິຕ຺ຖ’’ [ອປຕ຺ຖ (ກ. ສີ. ສ຺ຍາ. ປີ.)].

໒໑໐. ‘‘ອທ຺ຘາ ຫິ ມໍ ໂວ ຫິຕກາມາ, ຍໍ ມໍ ສມນຸສາສຖ;

ໂສຫໍ ຕຖາ ກຣິສ຺ສາມິ, ສພ຺ພໍ ວຸຕ຺ຕໍ ຫິເຕສິຠິ.

໒໑໑. ‘‘ເອສາຫມຊ຺ເຊວ ອຸປາຣມາມິ, ນ ຈາປິຫໍ [ນ ຈາປຫໍ (ສີ. ປີ.)] ກິຎ຺ຈິ ກເຣຍ຺ຍ ປາປໍ;

ນ ຈາປິ ເມ ກິຎ຺ຈິ ອເທຍ຺ຍມຕ຺ຖິ, ນ ຈາປິທຕ຺ວາ ອຸທກໍ ປິວາມິ [ອຸທກມ຺ປຫໍ ປິເພ (ສີ.)].

໒໑໒. ‘‘ເອວຎ຺ຈ ເມ ທທໂຕ ສພ຺ພກາລໍ [ສພ຺ພກາເລ (ກ.)], ໂຠຄາ ອິເມ ວາສວ ຂີຍິສ຺ສນ຺ຕິ;

ຕໂຕ ອຫໍ ປພ຺ພຊິສ຺ສາມິ ສກ຺ກ, ຫິຕ຺ວານ ກາມານິ ຍໂຖຘິການິ’’.

໒໑໓. ‘‘ນຄຸຕ຺ຕເມ ຄິຣິວເຣ ຄນ຺ຘມາທເນ, ໂມທນ຺ຕິ ຕາ ເທວວຣາຠິປາລິຕາ;

ອຖາຄມາ ອິສິວໂຣ ສພ຺ພໂລກຄູ, ສຸປຸປ຺ຜິຕໍ ທຸມວຣສາຂມາທິຍ.

໒໑໔. ‘‘ສຸຈິໍ ສຸຄນ຺ຘໍ ຕິທເສຫິ ສກ຺ກຕໍ, ປຸປ຺ຜຸຕ຺ຕມໍ ອມຣວເຣຫິ ເສວິຕໍ;

ອລທ຺ຘ ມຈ຺ເຈຫິ ວ ທານເວຫິ ວາ, ອຎ຺ຎຕ຺ຣ ເທເວຫິ ຕທາຣຫໍ ຫິທໍ [ຫິຕໍ (ສ຺ຍາ.)].

໒໑໕. ‘‘ຕໂຕ ຈຕສ຺ໂສ ກນກຕ຺ຕຈູປມາ, ອຸຏ຺ຐາຍ ນາຣິໂຍ ປມທາຘິປາ ມຸນິໍ;

ອາສາ ຈ ສທ຺ຘາ ຈ ສິຣີ ຕໂຕ ຫິຣີ, ອິຈ຺ຈພ຺ຣວຸໍ ນາຣທເທວ ພ຺ຣາຫ຺ມຓໍ.

໒໑໖. ‘‘ສເຈ ອນຸທ຺ທິຏ຺ຐໍ ຕຍາ ມຫາມຸນິ, ປຸປ຺ຜໍ ອິມໍ ປາຣິຉຕ຺ຕສ຺ສ ພ຺ຣຫ຺ເມ;

ທທາຫິ ໂນ ສພ຺ພາ ຄຕິ ເຕ ອິຊ຺ຌຕຸ, ຕຸວມ຺ປິ ໂນ ໂຫຫິ ຍເຖວ ວາສໂວ.

໒໑໗. ‘‘ຕໍ ຍາຈມານາຠິສເມກ຺ຂ ນາຣໂທ, ອິຈ຺ຈພ຺ຣວີ ສໍກລຫໍ ອຸທີຣຍິ;

ນ ມຍ຺ຫມຕ຺ຖຕ຺ຖິ ອິເມຫິ ໂກຈິ ນໍ, ຍາເຍວ ໂວ ເສຍ຺ຍສິ ສາ ປິຬນ຺ຘຖ’’ [ປິຬຍ຺ຫຖ (ສີ. ປີ.)].

໒໑໘. ‘‘ຕ຺ວໍ ໂນຕ຺ຕເມວາຠິສເມກ຺ຂ ນາຣທ, ຍສ຺ສິຈ຺ຉສິ ຕສ຺ສາ ອນຸປ຺ປເວຈ຺ຉສຸ;

ຍສ຺ສາ ຫິ ໂນ ນາຣທ ຕ຺ວໍ ປທສ຺ສສິ, ສາເຍວ ໂນ ເຫຫິຕິ ເສຏ຺ຐສມ຺ມຕາ’’.

໒໑໙. ‘‘ອກລ຺ລເມຕໍ ວຈນໍ ສຸຄຕ຺ເຕ, ໂກ ພ຺ຣາຫ຺ມໂຓ ສໍກລຫໍ ອຸທີຣເຍ;

ຄນ຺ຕ຺ວານ ຠູຕາຘິປເມວ ປຸຈ຺ຉຖ, ສເຈ ນ ຊານາຖ ອິຘຸຕ຺ຕມາຘມໍ’’.

໒໒໐. ‘‘ຕາ ນາຣເທນ ປຣມປ຺ປໂກປິຕາ, ອຸທີຣິຕາ ວຓ຺ຓມເທນ ມຕ຺ຕາ;

ສກາເສ [ສກາສໍ (ກ.)] ຄນ຺ຕ຺ວານ ສຫສ຺ສຈກ຺ຂຸໂນ, ປຸຈ຺ຉິໍສຸ ຠູຕາຘິປໍ ກາ ນຸ ເສຍ຺ຍສິ’’.

໒໒໑. ‘‘ຕາ ທິສ຺ວາ ອາຍຕ຺ຕມນາ ປຸຣິນ຺ທໂທ, ອິຈ຺ຈພ຺ຣວີ ເທວວໂຣ ກຕຎ຺ຊລີ;

ສພ຺ພາວ ໂວ ໂຫຖ ສຸຄຕ຺ເຕ ສາທິສີ, ໂກ ເນວ ຠທ຺ເທ ກລຫໍ ອຸທີຣຍິ’’.

໒໒໒. ‘‘ໂຍ ສພ຺ພໂລກຈ຺ຈຣິໂຕ [ສພ຺ພໂລກໍ ຈຣໂກ (ສີ. ສ຺ຍາ. ປີ.)] ມຫາມຸນິ, ຘມ຺ເມ ຐິໂຕ ນາຣໂທ [ນາຣທ (ສ຺ຍາ.)] ສຈ຺ຈນິກ຺ກໂມ;

ໂສ ໂນພ຺ຣວິ [ພ຺ຣວີ (ສີ. ສ຺ຍາ. ປີ.)] ຄິຣິວເຣ ຄນ຺ຘມາທເນ, ຄນ຺ຕ຺ວານ ຠູຕາຘິປເມວ ປຸຈ຺ຉຖ;

ສເຈ ນ ຊານາຖ ອິຘຸຕ຺ຕມາຘມໍ’’.

໒໒໓. ‘‘ອສຸ [ອສູ (ສ຺ຍາ.)] ພ຺ຣຫາຣຎ຺ຎຈໂຣ ມຫາມຸນິ, ນາທຕ຺ວາ ຠຕ຺ຕໍ ວຣຄຕ຺ເຕ ຠຸຎ຺ຊຕິ;

ວິເຈຍ຺ຍ ທານານິ ທທາຕິ ໂກສິໂຍ, ຍສ຺ສາ ຫິ ໂສ ທສ຺ສຕິ ສາວ ເສຍ຺ຍສິ’’.

໒໒໔. ‘‘ອສູ ຫິ ໂຍ ສມ຺ມຕິ ທກ຺ຂິຓໍ ທິສໍ, ຄງ຺ຄາຍ ຕີເຣ ຫິມວນ຺ຕປສ຺ສນິ [ຫິມວນ຺ຕປສ຺ມນິ (ສີ. ປີ. ກ.)];

ສ ໂກສິໂຍ ທຸລ຺ລຠປານໂຠຊໂນ, ຕສ຺ສ ສຸຘໍ ປາປຍ ເທວສາຣຖິ’’.

໒໒໕. ‘‘ສ [ໂສ (ສ຺ຍາ.)] ມາຕລີ ເທວວເຣນ ເປສິໂຕ, ສຫສ຺ສຍຸຕ຺ຕໍ ອຠິຣຸຍ຺ຫ ສນ຺ທນໍ;

ສຸຂິປ຺ປເມວ [ສ ຂິປ຺ປເມວ (ສີ. ປີ.)] ອຸປຄມ຺ມ ອສ຺ສມໍ, ອທິສ຺ສມາໂນ ມຸນິໂນ ສຸຘໍ ອທາ’’.

໒໒໖. ‘‘ອຸທຄ຺ຄິຫຸຕ຺ຕໍ ອຸປຕິຏ຺ຐໂຕ ຫິ ເມ, ປຠງ຺ກຣໍ ໂລກຕໂມນຸທຸຕ຺ຕມໍ;

ສພ຺ພານິ ຠູຕານິ ອຘິຈ຺ຈ [ອຕິຈ຺ຈ (ສີ. ປີ.)] ວາສໂວ, ໂກ ເນວ ເມ ປາຓິສຸ ກິໍ ສຸໂຘທຫິ.

໒໒໗. ‘‘ສງ຺ຂູປມໍ ເສຕມຕຸລ຺ຍທສ຺ສນໍ, ສຸຈິໍ ສຸຄນ຺ຘໍ ປິຍຣູປມພ຺ຠຸຕໍ;

ອທິຏ຺ຐປຸພ຺ພໍ ມມ ຊາຕຸ ຈກ຺ຂຸຠິ [ຊາຕຈກ຺ຂຸຫິ (ສີ. ປີ.)], ກາ ເທວຕາ ປາຓິສຸ ກິໍ ສຸໂຘທຫິ’’.

໒໒໘. ‘‘ອຫໍ ມຫິນ຺ເທນ ມເຫສິ ເປສິໂຕ, ສຸຘາຠິຫາສິໍ ຕຸຣິໂຕ ມຫາມຸນິ;

ຊານາສິ ມໍ ມາຕລິ ເທວສາຣຖິ, ຠຸຎ຺ຊສ຺ສຸ ຠຕ຺ຕຸຕ຺ຕມ ມາຠິວາຣຍິ [ມາ ວິຈາຣຍິ (ສີ. ປີ.)].

໒໒໙. ‘‘ຠຸຕ຺ຕາ ຈ ສາ ທ຺ວາທສ ຫນ຺ຕິ ປາປເກ, ຂຸທໍ ປິປາສໍ ອຣຕິໍ ທຣກ຺ລມໍ [ທຣຖໍ ກິລໍ (ສ຺ຍາ.), ທຣຖກ຺ຂມໍ (ກ.)];

ໂກຘູປນາຫຎ຺ຈ ວິວາທເປສຸຓໍ, ສີຕຸຓ຺ຫຕນ຺ທິຎ຺ຈ ຣສຸຕ຺ຕມໍ ອິທໍ’’.

໒໓໐. ‘‘ນ ກປ຺ປຕີ ມາຕລິ ມຍ຺ຫ ຠຸຎ຺ຊິຕຸໍ, ປຸພ຺ເພ ອທຕ຺ວາ ອິຕິ ເມ ວຕຸຕ຺ຕມໍ;

ນ ຈາປິ ເອກາສ຺ນມຣີຍປູຊິຕໍ [ເອກາສນໍ ອຣິຍປູຊິຕໍ (ສີ. ປີ.)], ອສໍວິຠາຄີ ຈ ສຸຂໍ ນ ວິນ຺ທຕິ’’.

໒໓໑. ‘‘ຖີຆາຕກາ ເຍ ຈິເມ ປາຣທາຣິກາ, ມິຕ຺ຕທ຺ທຸໂນ ເຍ ຈ ສປນ຺ຕິ ສຸພ຺ພເຕ;

ສພ຺ເພ ຈ ເຕ ມຈ຺ຉຣິປຎ຺ຈມາຘມາ, ຕສ຺ມາ ອທຕ຺ວາ ອຸທກມ຺ປິ ນາສ຺ນິເຍ [ນາສ຺ມິເຍ (ສີ. ປີ.)].

໒໓໒. ‘‘ໂສ ຫິຕ຺ຖິຍາ ວາ ປຸຣິສສ຺ສ ວາ ປນ, ທສ຺ສາມິ ທານໍ ວິທຸສມ຺ປວຓ຺ຓິຕໍ;

ສທ຺ຘາ ວທຎ຺ຎູ ອິຘ ວີຕມຈ຺ຉຣາ, ຠວນ຺ຕິ ເຫເຕ ສຸຈິສຈ຺ຈສມ຺ມຕາ’’ [ສມ຺ມສມ຺ມຕາ (ສີ.)].

໒໓໓. ‘‘ອໂຕ ມຕາ [ມຸຕາ (ສີ. ປີ.)] ເທວວເຣນ ເປສິຕາ, ກຎ຺ຎາ ຈຕສ຺ໂສ ກນກຕ຺ຕຈູປມາ;

ອາສາ ຈ ສທ຺ຘາ ຈ ສິຣີ ຕໂຕ ຫິຣີ [ສິຣີ ຫິຣີ ຕໂຕ (ປີ.)], ຕໍ ອສ຺ສມໍ ອາຄມຸ [ອາຄມຸໍ (ສີ. ປີ. ກ.)] ຍຕ຺ຖ ໂກສິໂຍ.

໒໓໔. ‘‘ຕາ ທິສ຺ວາ ສພ຺ໂພ ປຣມປ຺ປໂມທິໂຕ [ສພ຺ພາ ປຣມປ຺ປໂມທິຕາ (ສ຺ຍາ.)], ສຸເຠນ ວຓ຺ເຓນ ສິຂາຣິວຄ຺ຄິໂນ;

ກຎ຺ຎາ ຈຕສ຺ໂສ ຈຕຸໂຣ ຈຕຸທ຺ທິສາ, ອິຈ຺ຈພ຺ຣວີ ມາຕລິໂນ ຈ ສມ຺ມຸຂາ.

໒໓໕. ‘‘ປຸຣິມໍ ທິສໍ ກາ ຕ຺ວໍ ປຠາສິ ເທວເຕ, ອລງ຺ກຕາ ຕາຣວຣາວ ໂອສຘີ;

ປຸຈ຺ຉາມິ ຕໍ ກຎ຺ຈນເວລ຺ລິວິຄ຺ຄເຫ, ອາຈິກ຺ຂ ເມ ຕ຺ວໍ ກຕມາສິ ເທວຕາ.

໒໓໖. ‘‘ສິຣາຫ ເທວີມນຸເຊຠິ [ມນຸເຊສຸ (ສີ. ສ຺ຍາ. ປີ.)] ປູຊິຕາ, ອປາປສຕ຺ຕູປນິເສວິນີ ສທາ;

ສຸຘາວິວາເທນ ຕວນ຺ຕິມາຄຕາ, ຕໍ ມໍ ສຸຘາຍ ວຣປຎ຺ຎ ຠາຊຍ.

໒໓໗. ‘‘ຍສ຺ສາຫມິຈ຺ຉາມິ ສຸຘໍ [ສຸຂໍ (ປີ.)] ມຫາມຸນິ, ໂສ [ສ (ສີ. ປີ.)] ສພ຺ພກາເມຫິ ນໂຣ ປໂມທຕິ;

ສິຣີຕິ ມໍ ຊານຫິ ຊູຫຕຸຕ຺ຕມ, ຕໍ ມໍ ສຸຘາຍ ວຣປຎ຺ຎ ຠາຊຍ’’.

໒໓໘. ‘‘ສິປ຺ເປນ ວິຊ຺ຊາຈຣເຓນ ພຸທ຺ຘິຍາ, ນຣາ ອຸເປຕາ ປຄຸຓາ ສກມ຺ມຸນາ [ສກມ຺ມນາ (ສີ. ປີ.)];

ຕຍາ ວິຫີນາ ນ ລຠນ຺ຕິ ກິຎ຺ຈນໍ [ກິຎ຺ຈິນໍ (ກ.)], ຕຍິທໍ ນ ສາຘຸ ຍທິທໍ ຕຍາ ກຕໍ.

໒໓໙. ‘‘ປສ຺ສາມິ ໂປສໍ ອລສໍ ມຫຄ຺ຆສໍ, ສຸທຸກ຺ກຸລີນມ຺ປິ ອຣູປິມໍ ນຣໍ;

ຕຍານຸຄຸຕ຺ໂຕ ສິຣິ ຊາຕິມາມປິ [ຊາຕິມໍ ອປິ (ສີ.)], ເປເສຕິ ທາສໍ ວິຍ ໂຠຄວາ ສຸຂີ.

໒໔໐. ‘‘ຕໍ ຕໍ ອສຈ຺ຈໍ ອວິຠຊ຺ຊເສວິນິໍ, ຊານາມິ ມູຬ຺ຫໍ ວິທຸຣານຸປາຕິນິໍ;

ນ ຕາທິສີ ອຣຫຕິ ອາສນູທກໍ, ກຸໂຕ ສຸຘາ ຄຈ຺ຉ ນ ມຍ຺ຫ ຣຸຈ຺ຈສິ’’.

໒໔໑. ‘‘ກາ ສຸກ຺ກທາຐາ ປຏິມຸກ຺ກກຸຓ຺ຑລາ, ຈິຕ຺ຕງ຺ຄທາ ກມ຺ພຸວິມຏ຺ຐຘາຣິນີ;

ໂອສິຕ຺ຕວຓ຺ຓໍ ປຣິທຍ຺ຫ ໂສຠສິ, ກຸສຄ຺ຄິຣຕ຺ຕໍ ອປິຬຍ຺ຫ ມຎ຺ຊຣິໍ.

໒໔໒. ‘‘ມິຄີວ ຠນ຺ຕາ ສຣຈາປຘາຣິນາ, ວິຣາຘິຕາ ມນ຺ທມິວ ອຸທິກ຺ຂສິ;

ໂກ ເຕ ທຸຕີໂຍ ອິຘ ມນ຺ທໂລຈເນ, ນ ຠາຍສິ ເອກິກາ ການເນ ວເນ’’.

໒໔໓. ‘‘ນ ເມ ທຸຕີໂຍ ອິຘ ມຕ຺ຖິ ໂກສິຍ, ມສກ຺ກສາຣປ຺ປຠວມ຺ຫິ ເທວຕາ;

ອາສາ ສຸຘາສາຍ ຕວນ຺ຕິມາຄຕາ, ຕໍ ມໍ ສຸຘາຍ ວຣປຎ຺ຎ ຠາຊຍ’’.

໒໔໔. ‘‘ອາສາຍ ຍນ຺ຕິ ວາຓິຊາ ຘເນສິໂນ, ນາວໍ ສມາຣຸຍ຺ຫ ປເຣນ຺ຕິ ອຓ຺ຓເວ;

ເຕ ຕຕ຺ຖ ສີທນ຺ຕິ ອໂຖປິ ເອກທາ, ຊີນາຘນາ ເອນ຺ຕິ ວິນຏ຺ຐປາຠຕາ.

໒໔໕. ‘‘ອາສາຍ ເຂຕ຺ຕານິ ກສນ຺ຕິ ກສ຺ສກາ, ວປນ຺ຕິ ພີຊານິ ກໂຣນ຺ຕຸປາຍໂສ;

ອີຕີນິປາເຕນ ອວຸຏ຺ຐິຕາຍ [ອວຸຏ຺ຐິກາຍ (ສີ. ປີ.)] ວາ, ນ ກິຎ຺ຈິ ວິນ຺ທນ຺ຕິ ຕໂຕ ຜລາຄມໍ.

໒໔໖. ‘‘ອຖຕ຺ຕກາຣານິ ກໂຣນ຺ຕິ ຠຕ຺ຕຸສຸ, ອາສໍ ປຸຣກ຺ຂຕ຺ວາ ນຣາ ສຸເຂສິໂນ;

ເຕ ຠຕ຺ຕຸຣຕ຺ຖາ ອຕິຄາຬ຺ຫິຕາ ປຸນ, ທິສາ ປນສ຺ສນ຺ຕິ ອລທ຺ຘ ກິຎ຺ຈນໍ.

໒໔໗. ‘‘ຫິຕ຺ວານ [ຊຫິຕ຺ວ (ສີ. ສ຺ຍາ. ປີ.)] ຘຎ຺ຎຎ຺ຈ ຘນຎ຺ຈ ຎາຕເກ, ອາສາຍ ສຄ຺ຄາຘິມນາ ສຸເຂສິໂນ;

ຕປນ຺ຕິ ລູຂມ຺ປິ ຕປໍ ຈິຣນ຺ຕຣໍ, ກຸມຄ຺ຄມາຣຸຍ຺ຫ [ກຸມ຺ມຄ຺ຄມາຣຸຍ຺ຫ (ສີ. ສ຺ຍາ. ປີ.)] ປເຣນ຺ຕິ ທຸຄ຺ຄຕິໍ.

໒໔໘. ‘‘ອາສາ ວິສໍວາທິກສມ຺ມຕາ ອິເມ, ອາເສ ສຸຘາສໍ [ສຸຘາຍ (ສ຺ຍາ ປີ. ກ.)] ວິນຍສ຺ສຸ ອຕ຺ຕນິ;

ນ ຕາທິສີ ອຣຫຕິ ອາສນູທກໍ, ກຸໂຕ ສຸຘາ ຄຈ຺ຉ ນ ມຍ຺ຫ ຣຸຈ຺ຈສິ’’.

໒໔໙. ‘‘ທທ຺ທລ຺ລມານາ ຍສສາ ຍສສ຺ສິນີ, ຊິຆຎ຺ຎນາມວ຺ຫຍນໍ ທິສໍ ປຕິ;

ປຸຈ຺ຉາມິ ຕໍ ກຎ຺ຈນເວລ຺ລິວິຄ຺ຄເຫ, ອາຈິກ຺ຂ ເມ ຕ຺ວໍ ກຕມາສິ ເທວຕາ’’.

໒໕໐. ‘‘ສທ຺ຘາຫ ເທວີມນຸເຊຫິ [ເທວີມນຸເຊສຸ (ສີ. ສ຺ຍາ. ປີ.)] ປູຊິຕາ, ອປາປສຕ຺ຕູປນິເສວິນີ ສທາ;

ສຸຘາວິວາເທນ ຕວນ຺ຕິມາຄຕາ, ຕໍ ມໍ ສຸຘາຍ ວຣປຎ຺ຎ ຠາຊຍ’’.

໒໕໑. ‘‘ທານໍ ທມໍ ຈາຄມໂຖປິ ສໍຍມໍ, ອາທາຍ ສທ຺ຘາຍ ກໂຣນ຺ຕິ ເຫກທາ;

ເຖຍ຺ຍໍ ມຸສາ ກູຏມໂຖປິ ເປສຸຓໍ, ກໂຣນ຺ຕິ ເຫເກ ປຸນ ວິຈ຺ຈຸຕາ ຕຍາ.

໒໕໒. ‘‘ຠຣິຍາສຸ ໂປໂສ ສທິສີສຸ ເປກ຺ຂວາ [ເປຂວາ (ປີ.)], ສີລູປປນ຺ນາສຸ ປຕິພ຺ພຕາສຸປິ;

ວິເນຕ຺ວານ [ວິເນຕ຺ວາ (ສີ. ສ຺ຍາ. ປີ.)] ຉນ຺ທໍ ກຸລິຕ຺ຖິຍາສຸປິ [ກຸລຘີຕິຍາສຸປິ (ສີ. ປີ.)], ກໂຣຕິ ສທ຺ຘໍ ປຸນ [ປນ (ສີ. ປີ.)] ກຸມ຺ຠທາສິຍາ.

໒໕໓. ‘‘ຕ຺ວເມວ ສທ຺ເຘ ປຣທາຣເສວິນີ, ປາປໍ ກໂຣສິ ກຸສລມ຺ປິ ຣິຎ຺ຈສິ;

ນ ຕາທິສີ ອຣຫຕິ ອາສນູທກໍ, ກຸໂຕ ສຸຘາ ຄຈ຺ຉ ນ ມຍ຺ຫ ຣຸຈ຺ຈສິ’’.

໒໕໔. ‘‘ຊິຆຎ຺ຎຣຕ຺ຕິໍ ອຣຸຓສ຺ມິມູຫເຕ, ຍາ ທິສ຺ສຕິ ອຸຕ຺ຕມຣູປວຓ຺ຓິນີ;

ຕຖູປມາ ມໍ ປຏິຠາສິ ເທວເຕ, ອາຈິກ຺ຂ ເມ ຕ຺ວໍ ກຕມາສິ ອຈ຺ຉຣາ.

໒໕໕. ‘‘ກາລາ ນິທາເຆຣິວ ອຄ຺ຄິຊາຣິວ [ອຄ຺ຄຊາຕິວ (ສີ.), ອຄ຺ຄິຊາຕິວ (ປີ.)], ອນິເລຣິຕາ ໂລຫິຕປຕ຺ຕມາລິນີ;

ກາ ຕິຏ຺ຐສິ ມນ຺ທມິຄາວໂລກຍໍ [ມນ຺ທມິວາວໂລກຍໍ (ສີ. ປີ.)], ຠາເສສມານາວ ຄິຣໍ ນ ມຸຎ຺ຈສິ’’.

໒໕໖. ‘‘ຫິຣາຫ ເທວີມນຸເຊຫິ ປູຊິຕາ, ອປາປສຕ຺ຕູປນິເສວິນີ ສທາ;

ສຸຘາວິວາເທນ ຕວນ຺ຕິມາຄຕາ, ສາຫໍ ນ ສກ຺ໂກມິ ສຸຘມ຺ປິ ຍາຈິຕຸໍ;

ໂກປີນຣູປາ ວິຍ ຍາຈນິຕ຺ຖິຍາ’’.

໒໕໗. ‘‘ຘມ຺ເມນ ຎາເຍນ ສຸຄຕ຺ເຕ ລຈ຺ຉສິ, ເອໂສ ຫິ ຘມ຺ໂມ ນ ຫິ ຍາຈນາ ສຸຘາ;

ຕໍ ຕໍ ອຍາຈນ຺ຕິມຫໍ ນິມນ຺ຕເຍ, ສຸຘາຍ ຍຎ຺ຈິຈ຺ຉສິ ຕມ຺ປິ ທມ຺ມິ ເຕ.

໒໕໘. ‘‘ສາ ຕ຺ວໍ ມຍາ ອຊ຺ຊ ສກມ຺ຫິ ອສ຺ສເມ, ນິມນ຺ຕິຕາ ກຎ຺ຈນເວລ຺ລິວິຄ຺ຄເຫ;

ຕຸວຎ຺ຫິ ເມ ສພ຺ພຣເສຫິ ປູຊິຍາ, ຕໍ ປູຊຍິຕ຺ວານ ສຸຘມ຺ປິ ອສ຺ນິເຍ’’.

໒໕໙. ‘‘ສາ ໂກສິເຍນານຸມຕາ ຊຸຕີມຕາ, ອທ຺ຘາ ຫິຣິ ຣມ຺ມໍ ປາວິສິ ຍສ຺ສມໍ;

ອຸທກວນ຺ຕໍ [ອຸທຎ຺ຎວນ຺ຕໍ (ສີ. ປີ.)] ຜລມຣິຍປູຊິຕໍ, ອປາປສຕ຺ຕູປນິເສວິຕໍ ສທາ.

໒໖໐. ‘‘ຣຸກ຺ຂຄ຺ຄຫານາ ພຫຸເກຕ຺ຖ ປຸປ຺ຜິຕາ, ອມ຺ພາ ປິຍາລາ ປນສາ ຈ ກິໍສຸກາ;

ໂສຠຎ຺ຊນາ ໂລທ຺ທມໂຖປິ ປທ຺ມກາ, ເກກາ ຈ ຠງ຺ຄາ ຕິລກາ ສຸປຸປ຺ຜິຕາ.

໒໖໑. ‘‘ສາລາ ກເຣຣີ ພຫຸເກຕ຺ຖ ຊມ຺ພຸໂຍ, ອສ຺ສຕ຺ຖນິຄ຺ໂຣຘມຘຸກເວຕສາ [ເວທິສາ (ກ.)];

ອຸທ຺ທາລກາ ປາຏລິ ສິນ຺ທຸວາຣກາ [ສິນ຺ທຸວາຣິຕາ (ພຫູສຸ)], ມນຸຎ຺ຎຄນ຺ຘາ ມຸຈລິນ຺ທເກຕກາ.

໒໖໒. ‘‘ຫເຣຓຸກາ ເວຬຸກາ ເກຓຸ [ເວຓຸ (ສີ. ປີ.)] ຕິນ຺ທຸກາ, ສາມາກນີວາຣມໂຖປິ ຈີນກາ;

ໂມຈາ ກທລີ ພຫຸເກຕ຺ຖ ສາລິໂຍ, ປວີຫໂຍ ອາຠູຊິໂນ ຈ [ອາຠຸຊິໂນປິ (ສີ. ສ຺ຍາ.)] ຕຓ຺ຑຸລາ.

໒໖໓. ‘‘ຕສ຺ເສວຸຕ຺ຕຣປສ຺ເສນ [ຕສ຺ສ ຈ ອຸຕ຺ຕເຣ ປສ຺ເສ (ສີ. ປີ.), ຕສ຺ສ ຈ ອຸຕ຺ຕຣປສ຺ເສນ (ສ຺ຍາ.)], ຊາຕາ ໂປກ຺ຂຣຓີ ສິວາ;

ອກກ຺ກສາ ອປພ຺ຠາຣາ, ສາຘຸ ອປ຺ປຏິຄນ຺ຘິກາ.

໒໖໔. ‘‘ຕຕ຺ຖ ມຈ຺ຉາ ສນ຺ນິຣຕາ, ເຂມິໂນ ພຫຸໂຠຊນາ;

ສິງ຺ຄູ ສວງ຺ກາ ສໍກຸລາ [ສກຸລາ (ສີ. ສ຺ຍາ. ປີ.)], ສຕວງ຺ກາ ຈ ໂຣຫິຕາ;

ອາຬິຄຄ຺ຄຣກາກິຓ຺ຓາ, ປາຐີນາ ກາກມຈ຺ຉກາ.