໕໓໔. ມຫາຫໍສຊາຕກໍ (໒)

໘໙. ‘‘ເອເຕ ຫໍສາ ປກ຺ກມນ຺ຕິ, ວກ຺ກງ຺ຄາ ຠຍເມຣິຕາ;

ຫຣິຕ຺ຕຈ ເຫມວຓ຺ຓ, ກາມໍ ສຸມຸຂ ປກ຺ກມ.

໙໐. ‘‘ໂອຫາຍ ມໍ ຎາຕິຄຓາ, ເອກໍ ປາສວສໍ ຄຕໍ;

ອນເປກ຺ຂມານາ ຄຈ຺ຉນ຺ຕິ, ກິໍ ເອໂກ ອວຫີຍສິ.

໙໑. ‘‘ປເຕວ ປຕຕໍ ເສຏ຺ຐ, ນຕ຺ຖິ ພທ຺ເຘ ສຫາຍຕາ;

ມາ ອນີຆາຍ ຫາເປສິ, ກາມໍ ສຸມຸຂ ປກ຺ກມ’’.

໙໒. ‘‘ນາຫໍ ທຸກ຺ຂປເຣໂຕປິ [ທຸກ຺ຂປເຣໂຕ’’ຕິ (ຊາ. ໑.໑໕.໑໓໖) ອຏ຺ຐກຖາໂຍ ໂອໂລເກຕພ຺ພາ], ຘຕຣຏ຺ຐ ຕຸວໍ [ຕວໍ (ສີ. ປີ.)] ຊເຫ;

ຊີວິຕໍ ມຣຓໍ ວາ ເມ, ຕຍາ ສທ຺ຘິໍ ຠວິສ຺ສຕິ.

໙໓. ‘‘ນາຫໍ ທຸກ຺ຂປເຣໂຕປິ, ຘຕຣຏ຺ຐ ຕຸວໍ ຊເຫ;

ນ ມໍ ອນຣິຍສໍຍຸຕ຺ເຕ, ກມ຺ເມ ໂຍເຊຕຸມຣຫສິ.

໙໔. ‘‘ສກຸມາໂຣ ສຂາ ຕ຺ຍສ຺ມິ, ສຈິຕ຺ເຕ ຈສ຺ມິ ເຕ [ສມິເຕ (ປີ.), ຕ຺ຍສ຺ມິ ເຕ (ກ.)] ຐິໂຕ;

ຎາໂຕ ເສນາປຕິ ຕ຺ຍາຫໍ, ຫໍສານໍ ປວຣຸຕ຺ຕມ.

໙໕. ‘‘ກຖໍ ອຫໍ ວິກຕ຺ຖິສ຺ສໍ [ວິກຕ຺ຕິສ຺ສໍ (ປີ.)], ຎາຕິມຊ຺ເຌ ອິໂຕ ຄໂຕ;

ຕໍ ຫິຕ຺ວາ ປຕຕໍ ເສຏ຺ຐ, ກິໍ ເຕ ວກ຺ຂາມິໂຕ ຄໂຕ;

ອິຘ ປາຓໍ ຈຊິສ຺ສາມິ, ນານຣິຍໍ [ນ ອນຣິຍໍ (ປີ.)] ກຕ຺ຕຸມຸສ຺ສເຫ’’.

໙໖. ‘‘ເອໂສ ຫິ ຘມ຺ໂມ ສຸມຸຂ, ຍໍ ຕ຺ວໍ ອຣິຍປເຖ ຐິໂຕ;

ໂຍ ຠຕ຺ຕາຣໍ ສຂາຣໍ ມໍ, ນ ປຣິຈ຺ຈຕ຺ຕຸມຸສ຺ສເຫ.

໙໗. ‘‘ຕຎ຺ຫິ ເມ ເປກ຺ຂມານສ຺ສ, ຠຍໍ ນຕ຺ເວວ ຊາຍຕິ;

ອຘິຄຈ຺ຉສິ ຕ຺ວໍ ມຍ຺ຫໍ, ເອວໍ ຠູຕສ຺ສ ຊີວິຕໍ’’.

໙໘. ‘‘ອິຈ຺ເຈວໍ [ອິຈ຺ເຈວ (ສີ. ປີ.)] ມນ຺ຕຍນ຺ຕານໍ, ອຣິຍານໍ ອຣິຍວຸຕ຺ຕິນໍ;

ທຓ຺ຑມາທາຍ ເນສາໂທ, ອາປຕີ [ອາປທີ (ກ.)] ຕຸຣິໂຕ ຠຸສໍ.

໙໙. ‘‘ຕມາປຕນ຺ຕໍ ທິສ຺ວານ, ສຸມຸໂຂ ອຕິພ຺ຣູຫຍິ [ອປຣິພ຺ຣູຫຍິ (ສີ. ປີ.)];

ອຏ຺ຐາສິ ປຸຣໂຕ ຣຎ຺ໂຎ, ຫໍໂສ ວິສ຺ສາສຍໍ ພ຺ຍຘໍ [ພ຺ຍຖໍ (ສີ. ສ຺ຍາ. ປີ.)].

໑໐໐. ‘‘ມາ ຠາຍິ ປຕຕໍ ເສຏ຺ຐ, ນ ຫິ ຠາຍນ຺ຕິ ຕາທິສາ;

ອຫໍ ໂຍຄໍ ປຍຸຎ຺ຊິສ຺ສໍ, ຍຸຕ຺ຕໍ ຘມ຺ມູປສໍຫິຕໍ;

ເຕນ ປຣິຍາປທາເນນ [ປຣິຍາທາເນນ (ກ.)], ຂິປ຺ປໍ ປາສາ ປໂມກ຺ຂສິ’’.

໑໐໑. ‘‘ຕສ຺ສ ຕໍ ວຈນໍ ສຸຕ຺ວາ, ສຸມຸຂສ຺ສ ສຸຠາສິຕໍ;

ປຫຏ຺ຐໂລໂມ ເນສາໂທ, ອຎ຺ຊລິສ຺ສ ປຓາມຍິ.

໑໐໒. ‘‘ນ ເມ ສຸຕໍ ວາ ທິຏ຺ຐໍ ວາ, ຠາສນ຺ໂຕ ມານຸສິໍ ທິໂຊ;

ອຣິຍໍ ພ຺ຣຸວາໂນ [ພ຺ຣູຫນ຺ໂຕ (ສ຺ຍາ. ກ.)] ວກ຺ກງ຺ໂຄ, ຈຊນ຺ໂຕ ມານຸສິໍ ຄິຣໍ.

໑໐໓. ‘‘ກິນ຺ນຸ ຕາຍໍ ທິໂຊ ໂຫຕິ, ມຸຕ຺ໂຕ ພທ຺ຘໍ ອຸປາສສິ;

ໂອຫາຍ ສກຸຓາ ຍນ຺ຕິ, ກິໍ ເອໂກ ອວຫີຍສິ’’.

໑໐໔. ‘‘ຣາຊາ ເມ ໂສ ທິຊາມິຕ຺ຕ, ເສນາປຈ຺ຈສ຺ສ ກາຣຍິໍ;

ຕມາປເທ ປຣິຈ຺ຈຕ຺ຕຸໍ, ນຸສ຺ສເຫ ວິຫຄາຘິປໍ.

໑໐໕. ‘‘ມຫາຄຓາຍ ຠຕ຺ຕາ ເມ, ມາ ເອໂກ ພ຺ຍສນໍ ອຄາ;

ຕຖາ ຕໍ ສມ຺ມ ເນສາທ, ຠຕ຺ຕາຍໍ ອຠິໂຕ ຣເມ’’.

໑໐໖. ‘‘ອຣິຍວຕ຺ຕສິ ວກ຺ກງ຺ຄ, ໂຍ ປິຓ຺ຑມປຈາຍສິ;

ຈຊາມິ ເຕ ຕໍ ຠຕ຺ຕາຣໍ, ຄຈ຺ຉຖູໂຠ [ຄຈ຺ຉຕຸ ໂຠ (ປີ.)] ຍຖາສຸຂໍ’’.

໑໐໗. ‘‘ສເຈ ອຕ຺ຕປ຺ປໂຍເຄນ, ໂອຫິໂຕ ຫໍສປກ຺ຂິນໍ;

ປຏິຄຓ຺ຫາມ ເຕ ສມ຺ມ, ເອຕໍ ອຠຍທກ຺ຂິຓໍ.

໑໐໘. ‘‘ໂນ ເຈ ອຕ຺ຕປ຺ປໂຍເຄນ, ໂອຫິໂຕ ຫໍສປກ຺ຂິນໍ;

ອນິສ຺ສໂຣ ມຸຎ຺ຈມມ຺ເຫ, ເຖຍ຺ຍໍ ກຍິຣາສິ ລຸທ຺ທກ’’.

໑໐໙. ‘‘ຍສ຺ສ ຕ຺ວໍ ຠຕໂກ [ຠຏໂກ (ກ.)] ຣຎ຺ໂຎ, ກາມໍ ຕສ຺ເສວ ປາປຍ;

ຕຕ຺ຖ ສໍຍມໂນ [ສໍຍມາໂນ (ປີ.)] ຣາຊາ, ຍຖາຠິຎ຺ຎໍ ກຣິສ຺ສຕິ’’.

໑໑໐. ‘‘ອິຈ຺ເຈວໍ ວຸຕ຺ໂຕ ເນສາໂທ, ເຫມວຓ຺ເຓ ຫຣິຕ຺ຕເຈ;

ອຸໂຠ ຫຕ຺ເຖຫິ ສງ຺ຄຍ຺ຫ [ປຄ຺ຄຍ຺ຫ (ສ຺ຍາ. ກ.)], ປຎ຺ຊເຣ ອຊ຺ຌໂວທຫິ.

໑໑໑. ‘‘ເຕ ປຎ຺ຊຣຄເຕ ປກ຺ຂີ, ອຸໂຠ ຠສ຺ສຣວຓ຺ຓິເນ;

ສຸມຸຂໍ ຘຕຣຏ຺ຐຎ຺ຈ, ລຸທ຺ໂທ ອາທາຍ ປກ຺ກມິ’’.

໑໑໒. ‘‘ຫຣີຍມາໂນ ຘຕຣຏ຺ໂຐ, ສຸມຸຂໍ ເອຕທພ຺ຣວິ;

ພາຬ຺ຫໍ ຠາຍາມິ ສຸມຸຂ, ສາມາຍ ລກ຺ຂຓູຣຸຍາ;

ອສ຺ມາກໍ ວຘມຎ຺ຎາຍ, ອຖຕ຺ຕານໍ ວຘິສ຺ສຕິ.

໑໑໓. ‘‘ປາກຫໍສາ ຈ ສຸມຸຂ, ສຸເຫມາ ເຫມສຸຕ຺ຕຈາ;

ໂກຎ຺ຈີ ສມຸທ຺ທຕີເຣວ, ກປຓາ ນູນ ຣຸຈ຺ຉຕິ’’.

໑໑໔. ‘‘ເອວໍ ມຫນ຺ໂຕ ໂລກສ຺ສ, ອປ຺ປເມຍ຺ໂຍ ມຫາຄຓີ;

ເອກິຕ຺ຖິມນຸໂສເຈຍ຺ຍ, ນຍິທໍ ປຎ຺ຎວຕາມິວ.

໑໑໕. ‘‘ວາໂຕວ ຄນ຺ຘມາເທຕິ, ອຸຠຍໍ ເຉກປາປກໍ;

ພາໂລ ອາມກປກ຺ກໍວ, ໂລໂລ ອນ຺ໂຘວ ອາມິສໍ.

໑໑໖. ‘‘ອວິນິຈ຺ຉຍຎ຺ຎຸ ອຕ຺ເຖສຸ, ມນ຺ໂທວ ປຏິຠາສິ [ປຏິຠາຕິ (ກ.)] ມໍ;

ກິຈ຺ຈາກິຈ຺ຈໍ ນ ຊານາສິ, ສມ຺ປຕ຺ໂຕ ກາລປຣິຍາຍໍ.

໑໑໗. ‘‘ອຑ຺ຒຸມ຺ມຕ຺ໂຕ ອຸທີເຣສິ, ໂຍ ເສຍ຺ຍາ ມຎ຺ຎສິຕ຺ຖິໂຍ;

ພຫຸສາຘາຣຓາ ເຫຕາ, ໂສຓ຺ຑານໍວ ສຸຣາຆຣໍ.

໑໑໘. ‘‘ມາຍາ ເຈສາ ມຣີຈີ ຈ, ໂສໂກ ໂຣໂຄ ຈຸປທ຺ທໂວ;

ຂຣາ ຈ ພນ຺ຘນາ ເຈຕາ, ມຈ຺ຈຸປາສາ ຄຸຫາສຍາ [ປຈ຺ຈຸປາໂສ ຄຸຫາສໂຍ (ສີ. ປີ.)];

ຕາສຸ ໂຍ ວິສ຺ສເສ ໂປໂສ, ໂສ ນເຣສຸ ນຣາຘໂມ’’.

໑໑໙. ‘‘ຍໍ ວຸທ຺ເຘຫິ ອຸປຎ຺ຎາຕໍ, ໂກ ຕໍ ນິນ຺ທິຕຸມຣຫຕິ;

ມຫາຠູຕິຕ຺ຖິໂຍ ນາມ, ໂລກສ຺ມິໍ ອຸທປຊ຺ຊິສຸໍ.

໑໒໐. ‘‘ຂິຑ຺ຑາ ປຓິຫິຕາ ຕ຺ຍາສຸ, ຣຕິ ຕ຺ຍາສຸ ປຕິຏ຺ຐິຕາ;

ພີຊານິ ຕ຺ຍາສຸ ຣູຫນ຺ຕິ, ຍທິທໍ ສຕ຺ຕາ ປຊາຍເຣ;

ຕາສຸ ໂກ ນິພ຺ພິເທ [ນິພ຺ພິເຊ (ກ.)] ໂປໂສ, ປາຓມາສຊ຺ຊ ປາຓິຠິ [ປາຓຫິ (ສີ.)].

໑໒໑. ‘‘ຕ຺ວເມວ ນຎ຺ໂຎ ສຸມຸຂ, ຖີນໍ ອຕ຺ເຖສຸ ຍຸຎ຺ຊສິ;

ຕສ຺ສ ຕ຺ຍຊ຺ຊ ຠເຍ ຊາເຕ, ຠີເຕນ ຊາຍເຕ ມຕິ.

໑໒໒. ‘‘ສພ຺ໂພ ຫິ ສໍສຍໍ ປຕ຺ໂຕ, ຠຍໍ ຠີຣຸ ຕິຕິກ຺ຂຕິ;

ປຓ຺ຑິຕາ ຈ ມຫນ຺ຕາໂນ [ມຫຕ຺ຕາໂນ (ສີ.)], ອຕ຺ເຖ ຍຸຎ຺ຊນ຺ຕິ ທຸຍ຺ຍຸເຊ.

໑໒໓. ‘‘ເອຕທຕ຺ຖາຍ ຣາຊາໂນ, ສູຣມິຈ຺ຉນ຺ຕິ ມນ຺ຕິນໍ;

ປຏິພາຫຕິ ຍໍ ສູໂຣ, ອາປທໍ ອຕ຺ຕປຣິຍາຍໍ.

໑໒໔. ‘‘ມາ ໂນ ອຊ຺ຊ ວິກນ຺ຕິໍສຸ, ຣຎ຺ໂຎ ສູທາ ມຫານເສ;

ຕຖາ ຫິ ວຓ຺ໂຓ ປຕ຺ຕານໍ, ຜລໍ ເວຬຸໍວ ຕໍ ວຘິ.

໑໒໕. ‘‘ມຸຕ຺ໂຕປິ ນ ອິຈ຺ຉິ [ນິຈ຺ຉສິ (ກ.)] ອຸຑ຺ເຑຕຸໍ [ໂອຑ຺ເຑຕຸໍ (ສີ.)], ສຍໍ ພນ຺ຘໍ ອຸປາຄມິ;

ໂສປຊ຺ຊ ສໍສຍໍ ປຕ຺ໂຕ, ອຕ຺ຖໍ ຄຓ຺ຫາຫິ ມາ ມຸຂໍ’’.

໑໒໖. ‘‘ໂສ ຕໍ [ຕ຺ວໍ (ສ຺ຍາ. ປີ.)] ໂຍຄໍ ປຍຸຎ຺ຊສ຺ສຸ, ຍຸຕ຺ຕໍ ຘມ຺ມູປສໍຫິຕໍ [ຘມ຺ໂມປສຎ຺ຫິຕໍ (ກ.)];

ຕວ ປຣິຍາປທາເນນ, ມມ ປາເຓສນໍ ຈຣ’’.

໑໒໗. ‘‘ມາ ຠາຍິ ປຕຕໍ ເສຏ຺ຐ, ນ ຫິ ຠາຍນ຺ຕິ ຕາທິສາ;

ອຫໍ ໂຍຄໍ ປຍຸຎ຺ຊິສ຺ສໍ, ຍຸຕ຺ຕໍ ຘມ຺ມູປສໍຫິຕໍ [ຘມ຺ໂມປສຎ຺ຫິຕໍ (ກ.)];

ມມ ປຣິຍາປທາເນນ, ຂິປ຺ປໍ ປາສາ ປໂມກ຺ຂສິ’’.

໑໒໘. ‘‘ໂສ [ສ (ສີ.)] ລຸທ຺ໂທ ຫໍສກາເຊນ [ຫໍສກາເຈນ (ປີ.)], ຣາຊທ຺ວາຣໍ ອຸປາຄມິ;

ປຏິເວເທຖ ມໍ ຣຎ຺ໂຎ, ຘຕຣຏ຺ຐາຍມາຄໂຕ’’.

໑໒໙. ‘‘ເຕ ທິສ຺ວາ ປຸຎ຺ຎສໍກາເສ, ອຸໂຠ ລກ຺ຂຓສມ຺ມເຕ [ລກ຺ຂຎ຺ຎາສມ຺ມເຕ (ສີ. ປີ.)];

ຂລຸ ສໍຍມໂນ ຣາຊາ, ອມຈ຺ເຈ ອຊ຺ຌຠາສຖ.

໑໓໐. ‘‘ເທຖ ລຸທ຺ທສ຺ສ ວຕ຺ຖານິ, ອນ຺ນໍ ປານຎ຺ຈ ໂຠຊນໍ;

ກາມໍ ກໂຣ ຫິຣຎ຺ຎສ຺ສ, ຍາວນ຺ໂຕ ເອສ ອິຈ຺ຉຕິ’’.

໑໓໑. ‘‘ທິສ຺ວາ ລຸທ຺ທໍ ປສນ຺ນຕ຺ຕໍ, ກາສິຣາຊາ ຕທພ຺ຣວິ;

ຍທ຺ຍາຍໍ [ຍທາຍໍ (ສີ. ສ຺ຍາ. ປີ.)] ສມ຺ມ ເຂມກ, ປຸຓ຺ຓາ ຫໍເສຫິ ຕິຏ຺ຐຕິ.

໑໓໒. ‘‘ກຖໍ ຣຸຈິມຊ຺ຌຄຕໍ, ປາສຫຕ຺ໂຖ ອຸປາຄມິ;

ໂອກິຓ຺ຓໍ ຎາຕິສງ຺ເຆຫິ, ນິມ຺ມຊ຺ຌິມໍ [ນິມຊ຺ຌິມໍ (ສີ. ປີ. ກ.)] ກຖໍ ຄຫິ’’.

໑໓໓. ‘‘ອຊ຺ຊ ເມ ສຕ຺ຕມາ ຣຕ຺ຕິ, ອທນານິ [ອາທານານິ (ສ຺ຍາ. ປີ. ກ.)] ອຸປາສໂຕ [ອຸປາຄໂຕ (ກ.)];

ປທເມຕສ຺ສ ອນ຺ເວສໍ, ອປ຺ປມຕ຺ໂຕ ຆຏສ຺ສິໂຕ.

໑໓໔. ‘‘ອຖສ຺ສ ປທມທ຺ທກ຺ຂິໍ, ຈຣໂຕ ອທເນສນໍ;

ຕຕ຺ຖາຫໍ ໂອທຫິໍ ປາສໍ, ເອວໍ ຕໍ [ເອເວຕໍ (ສີ. ປີ.)] ທິຊມຄ຺ຄຫິໍ’’.

໑໓໕. ‘‘ລຸທ຺ທ ທ຺ເວ ອິເມ ສກຸຓາ, ອຖ ເອໂກຕິ ຠາສສິ;

ຈິຕ຺ຕໍ ນຸ ເຕ ວິປຣິຍຕ຺ຕໍ [ວິປຣິຍຕ຺ຖໍ (ປີ.)], ອທຸ ກິນ຺ນຸ ຊິຄີສສິ’’ [ຊິຄິໍສສິ (ສີ. ປີ.)].

໑໓໖. ‘‘ຍສ຺ສ ໂລຫິຕກາ ຕາລາ, ຕປນີຍນິຠາ ສຸຠາ;

ອຸຣໍ ສໍຫຈ຺ຈ ຕິຏ຺ຐນ຺ຕິ, ໂສ ເມ ພນ຺ຘໍ ອຸປາຄມິ.

໑໓໗. ‘‘ອຖາຍໍ ຠສ຺ສໂຣ ປກ຺ຂີ, ອພທ຺ໂຘ ພທ຺ຘມາຕຸຣໍ;

ອຣິຍໍ ພ຺ຣຸວາໂນ ອຏ຺ຐາສິ, ຈຊນ຺ໂຕ ມານຸສິໍ ຄິຣໍ’’.

໑໓໘. ‘‘ອຖ ກິໍ [ອຖ ກິນ຺ນຸ (ສີ. ປີ.), ກຖໍ ນຸ (ສ຺ຍາ.)] ທານິ ສຸມຸຂ, ຫນຸໍ ສໍຫຈ຺ຈ ຕິຏ຺ຐສິ;

ອທຸ ເມ ປຣິສໍ ປຕ຺ໂຕ, ຠຍາ ຠີໂຕ ນ ຠາສສິ’’.

໑໓໙. ‘‘ນາຫໍ ກາສິປຕິ ຠີໂຕ, ໂອຄຍ຺ຫ ປຣິສໍ ຕວ;

ນາຫໍ ຠຍາ ນ ຠາສິສ຺ສໍ, ວາກ຺ຍໍ ອຕ຺ຖມ຺ຫິ ຕາທິເສ’’.

໑໔໐. ‘‘ນ ເຕ ອຠິສຣໍ ປສ຺ເສ, ນ ຣເຖ ນປິ ປຕ຺ຕິເກ;

ນາສ຺ສ ຈມ຺ມໍ ວ ກີຏໍ ວາ, ວມ຺ມິເຕ ຈ ຘນຸຄ຺ຄເຫ.

໑໔໑. ‘‘ນ ຫິຣຎ຺ຎໍ ສຸວຓ຺ຓໍ ວາ, ນຄຣໍ ວາ ສຸມາປິຕໍ;

ໂອກິຓ຺ຓປຣິຂໍ ທຸຄ຺ຄໍ, ທຬ຺ຫມຏ຺ຏາລໂກຏ຺ຐກໍ;

ຍຕ຺ຖ ປວິຏ຺ໂຐ ສຸມຸຂ, ຠາຍິຕພ຺ພໍ ນ ຠາຍສິ’’.

໑໔໒. ‘‘ນ ເມ ອຠິສເຣນຕ຺ໂຖ, ນຄເຣນ ຘເນນ ວາ;

ອປເຖນ ປຖໍ ຍາມ, ອນ຺ຕລິກ຺ເຂຈຣາ ມຍໍ.

໑໔໓. ‘‘ສຸຕາ ຈ ປຓ຺ຑິຕາ ຕ຺ຍມ຺ຫາ, ນິປຸຓາ ອຕ຺ຖຈິນ຺ຕກາ [ຈຕ຺ຖຈິນ຺ຕກາ (ກ.)];

ຠາເສມຕ຺ຖວຕິໍ ວາຈໍ, ສຈ຺ເຈ ຈສ຺ສ ປຕິຏ຺ຐິໂຕ.

໑໔໔. ‘‘ກິຎ຺ຈ ຕຸຍ຺ຫໍ ອສຈ຺ຈສ຺ສ, ອນຣິຍສ຺ສ ກຣິສ຺ສຕິ;

ມຸສາວາທິສ຺ສ ລຸທ຺ທສ຺ສ, ຠຓິຕມ຺ປິ ສຸຠາສິຕໍ’’.

໑໔໕. ‘‘ຕໍ ພ຺ຣາຫ຺ມຓານໍ ວຈນາ, ອິມໍ ເຂມມກາຣຍິ [ເຂມິກາຣຍິ (ສີ. ປີ.)];

ອຠຍຎ຺ຈ ຕຍາ ຆຸຏ຺ຐໍ, ອິມາໂຍ ທສຘາ ທິສາ.

໑໔໖. ‘‘ໂອຄຍ຺ຫ ເຕ ໂປກ຺ຂຣຓິໍ, ວິປ຺ປສນ຺ໂນທກໍ ສຸຈິໍ;

ປຫູຕໍ ຈາທນໍ ຕຕ຺ຖ, ອຫິໍສາ ເຈຕ຺ຖ ປກ຺ຂິນໍ.

໑໔໗. ‘‘ອິທໍ ສຸຕ຺ວານ ນິຄ຺ໂຆສໍ, ອາຄຕມ຺ຫ ຕວນ຺ຕິເກ;

ເຕ ເຕ ພນ຺ຘສ຺ມ ປາເສນ, ເອຕໍ ເຕ ຠາສິຕໍ ມຸສາ.

໑໔໘. ‘‘ມຸສາວາທໍ ປຸຣກ຺ຂຕ຺ວາ, ອິຈ຺ຉາໂລຠຎ຺ຈ ປາປກໍ;

ອຸໂຠ ສນ຺ຘິມຕິກ຺ກມ຺ມ, ອສາຕໍ ອຸປປຊ຺ຊຕິ’’.

໑໔໙. ‘‘ນາປຣຊ຺ຌາມ ສຸມຸຂ, ນປິ ໂລຠາວ ມຄ຺ຄຫິໍ;

ສຸຕາ ຈ ປຓ຺ຑິຕາຕ຺ຍຕ຺ຖ, ນິປຸຓາ ອຕ຺ຖຈິນ຺ຕກາ.

໑໕໐. ‘‘ອປ຺ເປວຕ຺ຖວຕິໍ ວາຈໍ, ພ຺ຍາຫເຣຍ຺ຍຸໍ [ພ຺ຍາກເຣຍ຺ຍຸໍ (ສີ. ປີ.)] ອິຘາຄຕາ;

ຕຖາ ຕໍ ສມ຺ມ ເນສາໂທ, ວຸຕ຺ໂຕ ສຸມຸຂ ມຄ຺ຄຫິ’’.

໑໕໑. ‘‘ເນວ ຠີຕາ [ຠູຕາ (ສ຺ຍາ. ກ.)] ກາສິປຕິ, ອຸປນີຕສ຺ມິ ຊີວິເຕ;

ຠາເສມຕ຺ຖວຕິໍ ວາຈໍ, ສມ຺ປຕ຺ຕາ ກາລປຣິຍາຍໍ.

໑໕໒. ‘‘ໂຍ ມິເຄນ ມິຄໍ ຫນ຺ຕິ, ປກ຺ຂິໍ ວາ ປນ ປກ຺ຂິນາ;

ສຸເຕນ ວາ ສຸຕໍ ກິຓ຺ຍາ [ກິເຓ (ສີ. ປີ.)], ກິໍ ອນຣິຍຕຣໍ ຕໂຕ.

໑໕໓. ‘‘ໂຍ ຈາຣິຍຣຸທໍ [ຈ ອຣິຍຣຸທໍ (ສີ. ປີ.)] ຠາເສ, ອນຣິຍຘມ຺ມວສ຺ສິໂຕ [ອນຣິຍຘມ຺ມມວສ຺ສິໂຕ (ສີ.)];

ອຸໂຠ ໂສ ຘໍສເຕ ໂລກາ, ອິຘ ເຈວ ປຣຕ຺ຖ ຈ.

໑໕໔. ‘‘ນ ມຊ຺ເຊຖ ຍສໍ ປຕ຺ໂຕ, ນ ພ຺ຍາເຘ [ພ຺ຍເຖ (ສີ. ປີ.)] ປຕ຺ຕສໍສຍໍ;

ວາຍເມເຖວ ກິຈ຺ເຈສຸ, ສໍວເຣ ວິວຣານິ ຈ.

໑໕໕. ‘‘ເຍ ວຸທ຺ຘາ ອພ຺ຠຕິກ຺ກນ຺ຕາ [ນາພ຺ຠຈິກ຺ຂນ຺ຕາ (ກ.)], ສມ຺ປຕ຺ຕາ ກາລປຣິຍາຍໍ;

ອິຘ ຘມ຺ມໍ ຈຣິຕ຺ວານ, ເອວໍເຕ [ເອເວເຕ (ສີ. ປີ.)] ຕິທິວໍ ຄຕາ.

໑໕໖. ‘‘ອິທໍ ສຸຕ຺ວາ ກາສິປຕິ, ຘມ຺ມມຕ຺ຕນິ ປາລຍ;

ຘຕຣຏ຺ຐຎ຺ຈ ມຸຎ຺ຈາຫິ, ຫໍສານໍ ປວຣຸຕ຺ຕມໍ’’.

໑໕໗. ‘‘ອາຫຣນ຺ຕຸທກໍ ປຊ຺ຊໍ, ອາສນຎ຺ຈ ມຫາຣຫໍ;

ປຎ຺ຊຣໂຕ ປໂມກ຺ຂາມິ, ຘຕຣຏ຺ຐໍ ຍສສ຺ສິນໍ.

໑໕໘. ‘‘ຕຎ຺ຈ ເສນາປຕິໍ ຘີຣໍ, ນິປຸຓໍ ອຕ຺ຖຈິນ຺ຕກໍ;

ໂຍ ສຸເຂ ສຸຂິໂຕ ຣຎ຺ເຎ [ຣຎ຺ໂຎ (ສີ. ສ຺ຍາ. ປີ. ກ.)], ທຸກ຺ຂິເຕ ໂຫຕິ ທຸກ຺ຂິໂຕ.

໑໕໙. ‘‘ເອທິໂສ ໂຂ ອຣຫຕິ, ປິຓ຺ຑມສ຺ນາຕຸ ຠຕ຺ຕຸໂນ;

ຍຖາຍໍ ສຸມຸໂຂ ຣຎ຺ໂຎ, ປາຓສາຘາຣໂຓ ສຂາ’’.