໕໓໒. ໂສຓນນ຺ທຊາຕກໍ (໒)

໙໒. ‘‘ເທວຕາ ນຸສິ ຄນ຺ຘພ຺ໂພ, ອທຸ [ອາທຸ (ສີ. ສ຺ຍາ.)] ສກ຺ໂກ ປຸຣິນ຺ທໂທ;

ມນຸສ຺ສຠູໂຕ ອິທ຺ຘິມາ, ກຖໍ ຊາເນມຸ ຕໍ ມຍໍ’’.

໙໓. ‘‘ນາປິ ເທໂວ ນ ຄນ຺ຘພ຺ໂພ, ນາປິ ສກ຺ໂກ ປຸຣິນ຺ທໂທ;

ມນຸສ຺ສຠູໂຕ ອິທ຺ຘິມາ, ເອວໍ ຊານາຫິ ຠາຣຘ’’ [ຠາຣຠ (ກ.)].

໙໔. ‘‘ກຕຣູປມິທໍ ໂຠໂຕ [ໂຠໂຕ (ສີ. ປີ.)], ເວຍ຺ຍາວຈ຺ຈໍ ອນປ຺ປກໍ;

ເທວມ຺ຫິ ວສ຺ສມານມ຺ຫິ, ອໂນວສ຺ສໍ ຠວໍ ອກາ.

໙໕. ‘‘ຕໂຕ ວາຕາຕເປ ໂຆເຣ, ສີຕຈ຺ຉາຍໍ ຠວໍ ອກາ;

ຕໂຕ ອມິຕ຺ຕມຊ຺ເຌສຸ [ອມິຕ຺ຕມຊ຺ເຌ ຈ (ສີ.)], ສຣຕາຓໍ ຠວໍ ອກາ.

໙໖. ‘‘ຕໂຕ ຜີຕານິ ຣຏ຺ຐານິ, ວສິໂນ ເຕ ຠວໍ ອກາ;

ຕໂຕ ເອກສຕໍ ຂຕ຺ເຍ, ອນຸຍນ຺ເຕ [ອນຸຍຸຕ຺ເຕ (ປີ.)] ຠວໍ ອກາ.

໙໗. ‘‘ປຕີຕາສ຺ສຸ ມຍໍ ໂຠໂຕ, ວທ ຕໍ [ວຣ ຕໍ (ສີ. ສ຺ຍາ. ປີ.)] ຠຎ຺ຊ [ຠຎ຺ຎ (ສີ. ປີ.), ຠຸຎ຺ຊ (ສ຺ຍາ. ກ.)] ມິຈ຺ຉສິ;

ຫຕ຺ຖິຍານໍ ອສ຺ສຣຖໍ, ນາຣິໂຍ ຈ ອລງ຺ກຕາ;

ນິເວສນານິ ຣມ຺ມານິ, ມຍໍ ໂຠໂຕ ທທາມເສ.

໙໘. ‘‘ອຖ ວງ຺ເຄ [ອຖ ວາ ສງ຺ເຄ (ສີ. ປີ.)] ວາ ມຄເຘ, ມຍໍ ໂຠໂຕ ທທາມເສ;

ອຖ ວາ ອສ຺ສກາວນ຺ຕີ [ອສ຺ສກາວນ຺ຕິໍ (ສີ. ສ຺ຍາ. ປີ.)], ສຸມນາ ທມ຺ມ ເຕ ມຍໍ.

໙໙. ‘‘ອຸປຑ຺ຒໍ ວາປິ ຣຊ຺ຊສ຺ສ, ມຍໍ ໂຠໂຕ ທທາມເສ;

ສເຈ ເຕ ອຕ຺ໂຖ ຣຊ຺ເຊນ, ອນຸສາສ ຍທິຈ຺ຉສິ’’.

໑໐໐. ‘‘ນ ເມ ອຕ຺ໂຖປິ ຣຊ຺ເຊນ, ນຄເຣນ ຘເນນ ວາ;

ອໂຖປິ ຊນປເທນ, ອຕ຺ໂຖ ມຍ຺ຫໍ ນ ວິຊ຺ຊຕິ.

໑໐໑. ‘‘ໂຠໂຕວ ຣຏ຺ເຐ ວິຊິເຕ, ອຣຎ຺ເຎ ອຕ຺ຖິ ອສ຺ສໂມ;

ປິຕາ ມຍ຺ຫໍ ຊເນຕ຺ຕີ ຈ, ອຸໂຠ ສມ຺ມນ຺ຕິ ອສ຺ສເມ.

໑໐໒. ‘‘ເຕສາຫໍ [ເຕສ຺ວຫໍ (ກ.)] ປຸພ຺ພາຈຣິເຍສຸ, ປຸຎ຺ຎໍ ນ ລຠາມິ ກາຕເວ;

ຠວນ຺ຕໍ ອຊ຺ຌາວຣໍ ກຕ຺ວາ, ໂສຓໍ [ໂສນໍ (ປີ.)] ຍາເຈມຸ ສໍວຣໍ’’.

໑໐໓. ‘‘ກໂຣມິ ເຕ ຕໍ ວຈນໍ, ຍໍ ມໍ ຠຓສິ ພ຺ຣາຫ຺ມຓ;

ເອຕຎ຺ຈ ໂຂ ໂນ ອກ຺ຂາຫິ, ກີວນ຺ໂຕ ໂຫນ຺ຕຸ ຍາຈກາ’’.

໑໐໔. ‘‘ປໂຣສຕໍ ຊານປທາ, ມຫາສາລາ ຈ ພ຺ຣາຫ຺ມຓາ;

ອິເມ ຈ ຂຕ຺ຕິຍາ ສພ຺ເພ, ອຠິຊາຕາ ຍສສ຺ສິໂນ;

ຠວຎ຺ຈ ຣາຊາ ມໂນໂຊ, ອລໍ ເຫສ຺ສນ຺ຕິ ຍາຈກາ’’.

໑໐໕. ‘‘ຫຕ຺ຖີ ອສ຺ເສ ຈ ໂຍເຊນ຺ຕຸ, ຣຖໍ ສນ຺ນຍ຺ຫ ສາຣຖິ [ນໍ ຣຖິ (ປີ.)];

ອາພນ຺ຘນານິ ຄຓ຺ຫາຖ, ປາທາສຸສ຺ສາຣຍທ຺ຘເຊ [ປາເທສຸສ຺ສາຣຍໍ ຘເຊ (ສີ.), ປາທາສຸສ຺ສາຣຍໍ ຘເຊ (ປີ.)];

ອສ຺ສມໍ ຕໍ ຄມິສ຺ສາມິ, ຍຕ຺ຖ ສມ຺ມຕິ ໂກສິໂຍ’’.

໑໐໖. ‘‘ຕໂຕ ຈ ຣາຊາ ປາຍາສິ, ເສນາຍ ຈຕຸຣງ຺ຄິນີ;

ອຄມາ ອສ຺ສມໍ ຣມ຺ມໍ, ຍຕ຺ຖ ສມ຺ມຕິ ໂກສິໂຍ’’.

໑໐໗. ‘‘ກສ຺ສ ກາທມ຺ພໂຍ [ກສ຺ສ ກາທມ຺ພມໂຍ (ກ.)] ກາໂຊ, ເວຫາສໍ ຈຕຸຣງ຺ຄຸລໍ;

ອໍສໍ ອສມ຺ຜຸສໍ ເອຕິ, ອຸທຫາຣາຍ [ອຸທຫາຣສ຺ສ (ສີ. ສ຺ຍາ. ປີ.)] ຄຈ຺ຉໂຕ’’.

໑໐໘. ‘‘ອຫໍ ໂສໂຓ ມຫາຣາຊ, ຕາປໂສ ສຫິຕພ຺ພໂຕ [ສຫິຕໍ ວໂຕ (ປີ.)];

ຠຣາມິ ມາຕາປິຕໂຣ, ຣຕ຺ຕິນ຺ທິວມຕນ຺ທິໂຕ.

໑໐໙. ‘‘ວເນ ຜລຎ຺ຈ ມູລຎ຺ຈ, ອາຫຣິຕ຺ວາ ທິສມ຺ປຕິ;

ໂປເສມິ ມາຕາປິຕໂຣ, ປຸພ຺ເພ ກຕມນຸສ຺ສຣໍ’’.

໑໑໐. ‘‘ອິຈ຺ຉາມ ອສ຺ສມໍ ຄນ຺ຕຸໍ, ຍຕ຺ຖ ສມ຺ມຕິ ໂກສິໂຍ;

ມຄ຺ຄໍ ໂນ ໂສຓ ອກ຺ຂາຫິ, ເຍນ ຄຈ຺ເຉມຸ [ຄຈ຺ຉາມ (ສີ.)] ອສ຺ສມໍ’’.

໑໑໑. ‘‘ອຍໍ ເອກປທີ ຣາຊ, ເຍເນຕໍ [ເຍນ ຕໍ (ກ.)] ເມຆສນ຺ນິຠໍ;

ໂກວິຬາເຣຫິ ສຎ຺ຉນ຺ນໍ, ເອຕ຺ຖ ສມ຺ມຕິ ໂກສິໂຍ’’.

໑໑໒. ‘‘ອິທໍ ວຕ຺ວານ ປກ຺ກາມິ, ຕຣມາໂນ ມຫາອິສິ;

ເວຫາເສ ອນ຺ຕລິກ຺ຂສ຺ມິໍ, ອນຸສາສິຕ຺ວານ ຂຕ຺ຕິເຍ.

໑໑໓. ‘‘ອສ຺ສມໍ ປຣິມຊ຺ຊິຕ຺ວາ, ປຎ຺ຎເປຕ຺ວານ [ປຎ຺ຎເປຕ຺ວານ (ສີ. ສ຺ຍາ.)] ອາສນໍ;

ປຓ຺ຓສາລໍ ປວິສິຕ຺ວາ, ປິຕຣໍ ປຏິໂພຘຍິ.

໑໑໔. ‘‘ອິເມ ອາຍນ຺ຕິ ຣາຊາໂນ, ອຠິຊາຕາ ຍສສ຺ສິໂນ;

ອສ຺ສມາ ນິກ຺ຂມິຕ຺ວານ, ນິສີທ ຕ຺ວໍ [ນິສີທາຫິ (ສີ.)] ມຫາອິເສ.

໑໑໕. ‘‘ຕສ຺ສ ຕໍ ວຈນໍ ສຸຕ຺ວາ, ຕຣມາໂນ ມຫາອິສິ;

ອສ຺ສມາ ນິກ຺ຂມິຕ຺ວານ, ສທ຺ວາຣມ຺ຫິ ອຸປາວິສິ’’.

໑໑໖. ‘‘ຕຎ຺ຈ ທິສ຺ວານ ອາຍນ຺ຕໍ, ຊລນ຺ຕໍຣິວ ເຕຊສາ;

ຂຕ຺ຍສງ຺ຆປຣິພ຺ຍູຬ຺ຫໍ, ໂກສິໂຍ ເອຕທພ຺ຣວິ.

໑໑໗. ‘‘ກສ຺ສ ເຠຣີ ມຸທິງ຺ຄາ ຈ [ມຸຕິງ຺ຄາ ຈ (ປີ.)], ສງ຺ຂາ ປຓວທິນ຺ທິມາ [ເທຓ຺ຑິມາ (ສີ. ປີ.)];

ປຸຣໂຕ ປຏິປນ຺ນານິ, ຫາສຍນ຺ຕາ ຣເຖສຠໍ.

໑໑໘. ‘‘ກສ຺ສ ກຎ຺ຈນປຏ຺ເຏນ, ປຸຖຸນາ ວິຊ຺ຊຸວຓ຺ຓິນາ;

ຍຸວາ ກລາປສນ຺ນທ຺ໂຘ, ໂກ ເອຕິ ສິຣິຍາ ຊລໍ.

໑໑໙. ‘‘ອຸກ຺ກາມຸຂປຫຏ຺ຐໍວ, ຂທິຣງ຺ຄາຣສນ຺ນິຠໍ;

ມຸຂຎ຺ຈ ຣຸຈິຣາ ຠາຕິ, ໂກ ເອຕິ ສິຣິຍາ ຊລໍ.

໑໒໐. ‘‘ກສ຺ສ ປຄ຺ຄຫິຕໍ ຉຕ຺ຕໍ, ສສລາກໍ ມໂນຣມໍ;

ອາທິຈ຺ຈຣໍສາວຣຓໍ, ໂກ ເອຕິ ສິຣິຍາ ຊລໍ.

໑໒໑. ‘‘ກສ຺ສ ອງ຺ຄໍ ປຣິຄ຺ຄຍ຺ຫ, ວາຬພີຊນິມຸຕ຺ຕມໍ;

ຈຣນ຺ຕິ ວຣປຸຎ຺ຎສ຺ສ [ວຣປຎ຺ຎສ຺ສ (ສີ. ປີ.)], ຫຕ຺ຖິກ຺ຂນ຺ເຘນ ອາຍໂຕ.

໑໒໒. ‘‘ກສ຺ສ ເສຕານິ ຉຕ຺ຕານິ, ອາຊານີຍາ ຈ ວມ຺ມິຕາ;

ສມນ຺ຕາ ປຣິກິເຣນ຺ຕິ [ປຣິກິຣນ຺ຕິ (ສີ. ສ຺ຍາ. ປີ.)], ໂກ ເອຕິ ສິຣິຍາ ຊລໍ.

໑໒໓. ‘‘ກສ຺ສ ເອກສຕໍ ຂຕ຺ຍາ, ອນຸຍນ຺ຕາ [ອນຸຍຸຕ຺ຕາ (ປີ.)] ຍສສ຺ສິໂນ;

ສມນ຺ຕານຸປຣິຍນ຺ຕິ, ໂກ ເອຕິ ສິຣິຍາ ຊລໍ.

໑໒໔. ‘‘ຫຕ຺ຖິ ອສ຺ສຣຖ ປຕ຺ຕິ [ຫຕ຺ຖີ ອສ຺ສາ ຣຖາ ປຕ຺ຕີ (ສີ.)], ເສນາ ຈ ຈຕຸຣງ຺ຄິນີ;

ສມນ຺ຕານຸປຣິຍນ຺ຕິ [ສມນ຺ຕາ ອນຸປຣິຍາຕິ (ປີ.)], ໂກ ເອຕິ ສິຣິຍາ ຊລໍ.

໑໒໕. ‘‘ກສ຺ເສສາ ມຫຕີ ເສນາ, ປິຏ຺ຐິໂຕ ອນຸວຕ຺ຕຕິ;

ອກ຺ໂຂຠຓີ [ອກ຺ຂາຠນີ (ສີ.), ອກ຺ໂຂຠິນີ (ສ຺ຍາ.)] ອປຣິຍນ຺ຕາ, ສາຄຣສ຺ເສວ ອູມິໂຍ’’.

໑໒໖. ‘‘ຣາຊາຠິຣາຊາ [ຣາຊາຘິຣາຊາ (ກ.)] ມໂນໂຊ, ອິນ຺ໂທວ ຊຍຕໍ ປຕິ;

ນນ຺ທສ຺ສຊ຺ຌາວຣໍ ເອຕິ, ອສ຺ສມໍ ພ຺ຣຫ຺ມຈາຣິນໍ.

໑໒໗. ‘‘ຕສ຺ເສສາ ມຫຕີ ເສນາ, ປິຏ຺ຐິໂຕ ອນຸວຕ຺ຕຕິ;

ອກ຺ໂຂຠຓີ ອປຣິຍນ຺ຕາ, ສາຄຣສ຺ເສວ ອູມິໂຍ’’.

໑໒໘. ‘‘ອນຸລິຕ຺ຕາ ຈນ຺ທເນນ, ກາສິກຸຕ຺ຕມຘາຣິໂນ [ກາສິກວຕ຺ຖຘາຣິໂນ (ປີ.)];

ສພ຺ເພ ປຎ຺ຊລິກາ ຫຸຕ຺ວາ, ອິສີນໍ ອຊ຺ຌຸປາຄມຸໍ’’.

໑໒໙. ‘‘ກຈ຺ຈິ ນຸ ໂຠໂຕ ກຸສລໍ, ກຈ຺ຈິ ໂຠໂຕ ອນາມຍໍ;

ກຈ຺ຈິ ອຸຎ຺ເຉນ ຍາເປຖ, ກຈ຺ຈິ ມູລຜລາ ພຫູ.

໑໓໐. ‘‘ກຈ຺ຈິ ຑໍສາ ມກສາ ຈ, ອປ຺ປເມວ ສຣີສປາ [ສິຣິໍສປາ (ສີ. ສ຺ຍາ. ປີ.)];

ວເນ ວາຬມິຄາກິຓ຺ເຓ, ກຈ຺ຈິ ຫິໍສາ ນ ວິຊ຺ຊຕິ’’.

໑໓໑. ‘‘ກຸສລຎ຺ເຈວ ໂນ ຣາຊ, ອໂຖ ຣາຊ ອນາມຍໍ;

ອໂຖ ອຸຎ຺ເຉນ ຍາເປມ, ອໂຖ ມູລຜລາ ພຫູ.

໑໓໒. ‘‘ອໂຖ ຑໍສາ ມກສາ ຈ [ຑໍສາ ຈ ມກສາ (ສີ.), ຑໍສາ ຈ ມກສາ ຈ (ປີ.)], ອປ຺ປເມວ ສຣີສປາ [ສິຣິໍສປາ (ສີ. ສ຺ຍາ. ປີ.)];

ວເນ ວາຬມິຄາກິຓ຺ເຓ, ຫິໍສາ ມຍ຺ຫໍ [ອ ມ຺ຫໍ (ສີ. ປີ.)] ນ ວິຊ຺ຊຕິ.

໑໓໓. ‘‘ພຫູນິ ວສ຺ສປູຄານິ, ອສ຺ສເມ ສມ຺ມຕໍ [ວສໂຕ (ສີ.)] ອິຘ;

ນາຠິຊານາມິ ອຸປ຺ປນ຺ນໍ, ອາພາຘໍ ອມໂນຣມໍ.

໑໓໔. ‘‘ສ຺ວາຄຕໍ ເຕ ມຫາຣາຊ, ອໂຖ ເຕ ອທຸຣາຄຕໍ;

ອິສ຺ສໂຣສິ ອນຸປ຺ປຕ຺ໂຕ, ຍໍ ອິຘຕ຺ຖິ ປເວທຍ.

໑໓໕. ‘‘ຕິນ຺ທຸການິ ປິຍາລານິ, ມຘຸເກ ກາສຸມາຣິໂຍ [ກາສມາຣິໂຍ (ສີ. ສ຺ຍາ.)];

ຜລານິ ຂຸທ຺ທກປ຺ປານິ, ຠຸຎ຺ຊ ຣາຊ ວຣໍ ວຣໍ.

໑໓໖. ‘‘ອິທມ຺ປິ ປານີຍໍ ສີຕໍ, ອາຠຕໍ ຄິຣິຄພ຺ຠຣາ;

ຕໂຕ ປິວ ມຫາຣາຊ, ສເຈ ຕ຺ວໍ ອຠິກງ຺ຂສິ’’.

໑໓໗. ‘‘ປຏິຄ຺ຄຫິຕໍ ຍໍ ທິນ຺ນໍ, ສພ຺ພສ຺ສ ອຄ຺ຆິຍໍ ກຕໍ;

ນນ຺ທສ຺ສາປິ ນິສາເມຖ, ວຈນໍ ໂສ [ຍໍ (ສີ.), ຍໍ ໂສ (ປີ.)] ປວກ຺ຂຕິ.

໑໓໘. ‘‘ອຊ຺ຌາວຣມ຺ຫາ ນນ຺ທສ຺ສ, ໂຠໂຕ ສນ຺ຕິກມາຄຕາ;

ສຸຓາຕຸ [ສຸຓາຕຸ ເມ (ສີ. ສ຺ຍາ.)] ຠວໍ ວຈນໍ, ນນ຺ທສ຺ສ ປຣິສາຍ ຈ’’.

໑໓໙. ‘‘ປໂຣສຕໍ ຊານປທາ [ຊນປທາ (ປີ.)], ມຫາສາລາ ຈ ພ຺ຣາຫ຺ມຓາ;

ອິເມ ຈ ຂຕ຺ຕິຍາ ສພ຺ເພ, ອຠິຊາຕາ ຍສສ຺ສິໂນ;

ຠວຎ຺ຈ ຣາຊາ ມໂນໂຊ, ອນຸມຎ຺ຎນ຺ຕຸ ເມ ວໂຈ.

໑໔໐. ‘‘ເຍ ຈ ສນ຺ຕິ [ເຍ ວສນ຺ຕິ (ສີ.), ເຍ ຫິ ສນ຺ຕິ (ປີ.)] ສມີຕາໂຣ, ຍກ຺ຂານິ ອິຘ ມສ຺ສເມ;

ອຣຎ຺ເຎ ຠູຕຠພ຺ຍານິ, ສຸຓນ຺ຕຸ ວຈນໍ ມມ.

໑໔໑. ‘‘ນໂມ ກຕ຺ວານ ຠູຕານໍ, ອິສິໍ ວກ຺ຂາມິ ສຸພ຺ພຕໍ;

ໂສ ຕ຺ຍາຫໍ ທກ຺ຂິຓາ ພາຫຸ, ຕວ ໂກສິຍ ສມ຺ມໂຕ.

໑໔໒. ‘‘ປິຕຣໍ ເມ ຊເນຕ຺ຕິຎ຺ຈ, ຠຕ຺ຕຸກາມສ຺ສ ເມ ສໂຕ;

ວີຣ ປຸຎ຺ຎມິທໍ ຐານໍ, ມາ ມໍ ໂກສິຍ ວາຣຍ.

໑໔໓. ‘‘ສພ຺ຠິ ເຫຕໍ ອຸປຎ຺ຎາຕໍ, ມເມຕໍ ອຸປນິສ຺ສຊ;

ອຸຏ຺ຐານປາຣິຈຣິຍາຍ, ທີຆຣຕ຺ຕໍ ຕຍາ ກຕໍ;

ມາຕາປິຕູສຸ ປຸຎ຺ຎານິ, ມມ ໂລກທໂທ ຠວ.

໑໔໔. ‘‘ຕເຖວ ສນ຺ຕິ ມນຸຊາ, ຘມ຺ເມ ຘມ຺ມປທໍ ວິທູ;

ມຄ຺ໂຄ ສຄ຺ຄສ຺ສ ໂລກສ຺ສ, ຍຖາ ຊານາສິ ຕ຺ວໍ ອິເສ.

໑໔໕. ‘‘ອຸຏ຺ຐານປາຣິຈຣິຍາຍ, ມາຕາປິຕຸສຸຂາວຫໍ;

ຕໍ ມໍ ປຸຎ຺ຎາ ນິວາເຣຕິ, ອຣິຍມຄ຺ຄາວໂຣ ນໂຣ’’.

໑໔໖. ‘‘ສຸຓນ຺ຕຸ ໂຠນ຺ໂຕ ວຈນໍ, ຠາຕຸຣຊ຺ຌາວຣາ ມມ;

ກຸລວໍສໍ ມຫາຣາຊ, ໂປຣາຓໍ ປຣິຫາປຍໍ;

ອຘມ຺ມຈາຣີ ເຊຏ຺ເຐສຸ [ໂຍ ເຊຏ຺ໂຐ (ສີ.)], ນິຣຍໍ ໂສປປຊ຺ຊຕິ [ໂສ ອຸປປຊ຺ຊຕິ (ສີ. ສ຺ຍາ. ປີ.)].

໑໔໗. ‘‘ເຍ ຈ ຘມ຺ມສ຺ສ ກຸສລາ, ໂປຣາຓສ຺ສ ທິສມ຺ປຕິ;

ຈາຣິຕ຺ເຕນ ຈ ສມ຺ປນ຺ນາ, ນ ເຕ ຄຈ຺ຉນ຺ຕິ ທຸຄ຺ຄຕິໍ.

໑໔໘. ‘‘ມາຕາປິຕາ ຈ ຠາຕາ ຈ, ຠຄິນີ ຎາຕິພນ຺ຘວາ;

ສພ຺ເພ ເຊຏ຺ຐສ຺ສ ເຕ ຠາຣາ, ເອວໍ ຊານາຫິ ຠາຣຘ [ຠາຣຖ (ສ຺ຍາ.)].

໑໔໙. ‘‘ອາທິຍິຕ຺ວາ ຄຣຸໍ ຠາຣໍ, ນາວິໂກ ວິຍ ອຸສ຺ສເຫ;

ຘມ຺ມຎ຺ຈ ນປ຺ປມຊ຺ຊາມິ, ເຊຏ຺ໂຐ ຈສ຺ມິ ຣເຖສຠ’’.

໑໕໐. ‘‘ອຘິຄມາ [ອຘິຄຕມ຺ຫາ (ສີ.), ອຘິຄມ຺ຫາ (ສ຺ຍາ.), ອຘິຄຕມ຺ຫ (ປີ.)] ຕເມ ຎາຓໍ, ຊາລໍວ ຊາຕເວທໂຕ;

ເອວເມວ ໂນ ຠວໍ ຘມ຺ມໍ, ໂກສິໂຍ ປວິທໍສຍິ.

໑໕໑. ‘‘ຍຖາ ອຸທຍມາທິຈ຺ໂຈ, ວາສຸເທໂວ ປຠງ຺ກໂຣ;

ປາຓີນໍ ປວິທໍເສຕິ, ຣູປໍ ກລ຺ຍາຓປາປກໍ;

ເອວເມວ ໂນ ຠວໍ ຘມ຺ມໍ, ໂກສິໂຍ ປວິທໍສຍິ’’.

໑໕໒. ‘‘ເອວໍ ເມ ຍາຈມານສ຺ສ, ອຎ຺ຊລິໍ ນາວພຸຊ຺ຌຖ;

ຕວ ປທ຺ຘຈໂຣ [ຕວ ປຏ຺ຐຈໂຣ (ສ຺ຍາ.), ຕວ ພທ຺ຘຎ຺ຈໂຣ (ປີ.), ຕວຸປຏ຺ຐຈໂຣ (ກ.)] ເຫສ຺ສໍ, ວຸຏ຺ຐິໂຕ ປຣິຈາຣໂກ’’.

໑໕໓. ‘‘ອທ຺ຘາ ນນ຺ທ ວິຊານາສິ [ປຊານາສິ (ສີ.)], ສທ຺ຘມ຺ມໍ ສພ຺ຠິ ເທສິຕໍ;

ອຣິໂຍ ອຣິຍສມາຈາໂຣ, ພາຬ຺ຫໍ ຕ຺ວໍ ມມ ຣຸຈ຺ຈສິ.

໑໕໔. ‘‘ຠວນ຺ຕໍ ວທາມິ ໂຠຕິຎ຺ຈ, ສຸຓາຖ ວຈນໍ ມມ;

ນາຍໍ ຠາໂຣ ຠາຣມໂຕ [ຠາຣມຕ຺ໂຕ (ສີ. ສ຺ຍາ.)], ອຫຸ ມຍ຺ຫໍ ກຸທາຈນໍ.

໑໕໕. ‘‘ຕໍ ມໍ ອຸປຏ຺ຐິຕໍ ສນ຺ຕໍ, ມາຕາປິຕຸສຸຂາວຫໍ;

ນນ຺ໂທ ອຊ຺ຌາວຣໍ ກຕ຺ວາ, ອຸປຏ຺ຐານາຍ ຍາຈຕິ.

໑໕໖. ‘‘ໂຍ ເວ ອິຈ຺ຉຕິ ກາເມນ, ສນ຺ຕານໍ ພ຺ຣຫ຺ມຈາຣິນໍ;

ນນ຺ທໍ ໂວ ວຣຖ ເອໂກ [ນນ຺ທໍ ວທຖ ເອເກ (ປີ.)], ກໍ ນນ຺ໂທ ອຸປຕິຏ຺ຐຕຸ’’.

໑໕໗. ‘‘ຕຍາ ຕາຕ ອນຸຎ຺ຎາຕາ, ໂສຓ ຕໍ ນິສ຺ສິຕາ ມຍໍ;

ອຸປຆາຕຸໍ [ອຸປຆາຍິຕຸໍ (ສີ.)] ລເຠ ນນ຺ທໍ, ມຸທ຺ຘນິ ພ຺ຣຫ຺ມຈາຣິນໍ’’.

໑໕໘. ‘‘ອສ຺ສຕ຺ຖສ຺ເສວ ຕຣຸຓໍ, ປວາຬໍ ມາລຸເຕຣິຕໍ;

ຈິຣສ຺ສໍ ນນ຺ທໍ ທິສ຺ວານ, ຫທຍໍ ເມ ປເວຘຕິ.

໑໕໙. ‘‘ຍທາ ສຸຕ຺ຕາປິ ສຸປິເນ [ສຸປ຺ປນ຺ເຕ (ສ຺ຍາ. ປີ.)], ນນ຺ທໍ ປສ຺ສາມິ ອາຄຕໍ;

ອຸທຄ຺ຄາ ສຸມນາ ໂຫມິ, ນນ຺ໂທ ໂນ ອາຄໂຕ ອຍໍ.

໑໖໐. ‘‘ຍທາ ຈ ປຏິພຸຊ຺ຌິຕ຺ວາ, ນນ຺ທໍ ປສ຺ສາມິ ນາຄຕໍ;

ຠິຍ຺ໂຍ ອາວິສຕີ ໂສໂກ, ໂທມນສ຺ສຎ຺ຈນປ຺ປກໍ.

໑໖໑. ‘‘ສາຫໍ ອຊ຺ຊ ຈິຣສ຺ສມ຺ປິ, ນນ຺ທໍ ປສ຺ສາມິ ອາຄຕໍ;

ຠຕ຺ຕຸຈ຺ຈ [ຠຕ຺ຕຸຎ຺ຈ (ກ.)] ມຍ຺ຫຎ຺ຈ ປິໂຍ, ນນ຺ໂທ ໂນ ປາວິສີ ຆຣໍ.

໑໖໒. ‘‘ປິຕຸປິ ນນ຺ໂທ ສຸປ຺ປິໂຍ, ຍໍ ນນ຺ໂທ ນປ຺ປວເສ [ປາວິສີ (ປີ.)] ຆຣາ [ຆຣໍ (ສ຺ຍາ. ປີ. ກ.)];

ລຠຕູ ຕາຕ ນນ຺ໂທ ຕໍ, ມໍ ນນ຺ໂທ ອຸປຕິຏ຺ຐຕຸ’’.