໒໐. ສຕ຺ຕຕິນິປາໂຕ

໕໓໑. ກຸສຊາຕກໍ (໑)

໑. ‘‘ອິທໍ ເຕ ຣຏ຺ຐໍ ສຘນໍ ສໂຍຄ຺ຄໍ, ສກາຍຸຣໍ ສພ຺ພກາມູປປນ຺ນໍ;

ອິທໍ ເຕ ຣຊ຺ຊໍ [ຣຏ຺ຐໍ (ກ.)] ອນຸສາສ ອມ຺ມ, ຄຈ຺ຉາມຫໍ ຍຕ຺ຖ ປິຍາ ປຠາວຕີ’’.

໒. ‘‘ອນຸຊ຺ຊຸຠູເຕນ ຫຣໍ ມຫນ຺ຕໍ, ທິວາ ຈ ຣຕ຺ໂຕ ຈ ນິສີຖກາເລ [ນິສີທ ກາເລ (ກ.)];

ປຏິຄຈ຺ຉ ຕ຺ວໍ ຂິປ຺ປໍ ກຸສາວຕິໍ ກຸສ [ກຸສາວຕິໍ (ສ຺ຍາ. ກ.)], ນິຈ຺ຉາມິ ທຸພ຺ພຓ຺ຓມຫໍ ວສນ຺ຕໍ’’.

໓. ‘‘ນາຫໍ ຄມິສ຺ສາມິ ອິໂຕ ກຸສາວຕິໍ, ປຠາວຕີ ວຓ຺ຓປໂລຠິໂຕ ຕວ;

ຣມາມິ ມທ຺ທສ຺ສ ນິເກຕຣມ຺ເມ, ຫິຕ຺ວານ ຣຏ຺ຐໍ ຕວ ທສ຺ສເນ ຣໂຕ.

໔. ‘‘ປຠາວຕີ ວຓ຺ຓປໂລຠິໂຕ ຕວ, ສມ຺ມູຬ຺ຫຣູໂປ ວິຈຣາມິ ເມທິນິໍ [ເມທນິໍ (ສ຺ຍາ. ກ.)];

ທິສໍ ນ ຊານາມິ ກຸໂຕມ຺ຫິ ອາຄໂຕ, ຕຍມ຺ຫິ ມຕ຺ໂຕ ມິຄມນ຺ທໂລຈເນ.

໕. ‘‘ສຸວຓ຺ຓຈີຣວສເນ, ຊາຕຣູປສຸເມຂເລ;

ສຸສ຺ໂສຓິ ຕວ ກາມາ ຫິ [ກາເມຫິ (ສີ. ສ຺ຍາ. ປີ.)], ນາຫໍ ຣຊ຺ເຊນ ມຕ຺ຖິໂກ’’.

໖. ‘‘ອພ຺ຠູຕິ [ອພ຺ຠູ ຫິ (ສີ.), ອຠູຕິ (ສ຺ຍາ.), ອພ຺ຠຸ ຫິ (ປີ.)] ຕສ຺ສ ໂຠ ໂຫຕິ, ໂຍ ອນິຈ຺ຉນ຺ຕມິຈ຺ຉຕິ;

ອກາມໍ ຣາຊ ກາເມສິ [ກາເມຫິ (ສີ. ປີ.)], ອກນ຺ຕໍ ກນ຺ຕຸ [ອກນ຺ໂຕ ກນ຺ຕ (ສີ. ສ຺ຍາ. ປີ.)] ມິຈ຺ຉສິ’’.

໗. ‘‘ອກາມໍ ວາ ສກາມໍ ວາ, ໂຍ ນໂຣ ລຠເຕ ປິຍໍ;

ລາຠເມຕ຺ຖ ປສໍສາມ, ອລາໂຠ ຕຕ຺ຖ ປາປໂກ’’.

໘. ‘‘ປາສາຓສາຣໍ ຂຓສິ, ກຓິກາຣສ຺ສ ທາຣຸນາ;

ວາຕໍ ຊາເລນ ພາເຘສິ, ໂຍ ອນິຈ຺ຉນ຺ຕມິຈ຺ຉສິ’’.

໙. ‘‘ປາສາໂຓ ນູນ ເຕ ຫທເຍ, ໂອຫິໂຕ ມຸທຸລກ຺ຂເຓ;

ໂຍ ເຕ ສາຕໍ ນ ວິນ຺ທາມິ, ຕິໂຣຊນປທາຄໂຕ.

໑໐. ‘‘ຍທາ ມໍ ຠກຸຏິໍ [ຠູກຸຏິໍ (ສີ. ປີ.)] ກຕ຺ວາ, ຣາຊປຸຕ຺ຕີ ອຸທິກ຺ຂຕິ [ຣາຊປຸຕ຺ຕິ ອຸທິກ຺ຂສິ (ສີ. ປີ.)];

ອາຬາຣິໂກ ຕທາ ໂຫມິ, ຣຎ຺ໂຎ ມທ຺ທສ຺ສນ຺ເຕປຸເຣ [ມທ຺ທສ຺ສ ຖີປຸເຣ (ສີ. ປີ.) ເອວມຸປຣິປິ].

໑໑. ‘‘ຍທາ ອຸມ຺ຫຍມານາ ມໍ, ຣາຊປຸຕ຺ຕີ ອຸທິກ຺ຂຕິ [ຣາຊປຸຕ຺ຕິ ອຸທິກ຺ຂສິ (ສີ. ປີ.)];

ນາຬາຣິໂກ ຕທາ ໂຫມິ, ຣາຊາ ໂຫມິ ຕທາ ກຸໂສ’’.

໑໒. ‘‘ສເຈ ຫິ ວຈນໍ ສຈ຺ຈໍ, ເນມິຕ຺ຕານໍ ຠວິສ຺ສຕິ;

ເນວ ເມ ຕ຺ວໍ ປຕີ ອສ຺ສ, ກາມໍ ຉິນ຺ທນ຺ຕຸ ສຕ຺ຕຘາ’’.

໑໓. ‘‘ສເຈ ຫິ ວຈນໍ ສຈ຺ຈໍ, ອຎ຺ເຎສໍ ຍທິ ວາ ມມໍ;

ເນວ ຕຸຍ຺ຫໍ ປຕີ ອຕ຺ຖິ, ອຎ຺ໂຎ ສີຫສ຺ສຣາ ກຸສາ’’.

໑໔. ‘‘ເນກ຺ຂໍ ຄີວໍ ເຕ ກາເຣສ຺ສໍ, ປຕ຺ວາ ຂຸຊ຺ເຊ ກຸສາວຕິໍ;

ສເຈ ມໍ ນາຄນາສູຣູ, ໂອໂລເກຍ຺ຍ ປຠາວຕີ.

໑໕. ‘‘ເນກ຺ຂໍ ຄີວໍ ເຕ ກາເຣສ຺ສໍ, ປຕ຺ວາ ຂຸຊ຺ເຊ ກຸສາວຕິໍ;

ສເຈ ມໍ ນາຄນາສູຣູ, ອາລເປຍ຺ຍ ປຠາວຕີ.

໑໖. ‘‘ເນກ຺ຂໍ ຄີວໍ ເຕ ກາເຣສ຺ສໍ, ປຕ຺ວາ ຂຸຊ຺ເຊ ກຸສາວຕິໍ;

ສເຈ ມໍ ນາຄນາສູຣູ, ອຸມ຺ຫາເຍຍ຺ຍ ປຠາວຕີ.

໑໗. ‘‘ເນກ຺ຂໍ ຄີວໍ ເຕ ກາເຣສ຺ສໍ, ປຕ຺ວາ ຂຸຊ຺ເຊ ກຸສາວຕິໍ;

ສເຈ ມໍ ນາຄນາສູຣູ, ປມ຺ຫາເຍຍ຺ຍ ປຠາວຕີ.

໑໘. ‘‘ເນກ຺ຂໍ ຄີວໍ ເຕ ກາເຣສ຺ສໍ, ປຕ຺ວາ ຂຸຊ຺ເຊ ກຸສາວຕິໍ;

ສເຈ ເມ ນາຄນາສູຣູ, ປາຓີຫິ ອຸປສມ຺ຜຸເສ’’.

໑໙. ‘‘ນ ຫິ ນູນາຍໍ ຣາຊປຸຕ຺ຕີ, ກຸເສ ສາຕມ຺ປິ ວິນ຺ທຕິ;

ອາຬາຣິເກ ຠເຕ ໂປເສ, ເວຕເນນ ອນຕ຺ຖິເກ’’.

໒໐. ‘‘ນ ຫິ ນູນາຍໍ ສາ [ນູນ ອຍໍ (ສີ. ສ຺ຍາ.)] ຂຸຊ຺ຊາ, ລຠຕິ ຊິວ຺ຫາຍ ເຉທນໍ;

ສຸນິສິເຕນ ສຕ຺ເຖນ, ເອວໍ ທຸພ຺ຠາສິຕໍ ຠຓໍ’’.

໒໑. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຫາຍໂສຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໒. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຫທ຺ຘໂນຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໓. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຫພ຺ພໂລຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໔. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຫາຣຏ຺ໂຐຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໕. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຫາຣາຊາຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໖. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ສີຫສ຺ສໂຣຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໗. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ວຄ຺ຄຸສ຺ສໂຣຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໘. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ພິນ຺ທຸສ຺ສໂຣຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໒໙. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຎ຺ຊຸສ຺ສໂຣຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໓໐. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ມຘຸສ຺ສໂຣຕິ [ມຘຸຣສ຺ສໂຣຕິ (ສີ.)] ກຕ຺ວານ, ກຣສ຺ສຸ ຣຸຈິເຣ ປິຍໍ.

໓໑. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ສຕສິປ຺ໂປຕິ ກຕ຺ວານ, ກຣສ຺ສຸ ຣຸຈິເຣ ປິຍໍ.

໓໒. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ຂຕ຺ຕິໂຍຕິປິ ກຕ຺ວານ [ກຣິຕ຺ວານ (ສີ.)], ກຣສ຺ສຸ ຣຸຈິເຣ ປິຍໍ.

໓໓. ‘‘ມາ ນໍ ຣູເປນ ປາເມສິ, ອາໂຣເຫນ ປຠາວຕິ;

ກຸສຣາຊາຕິ ກຕ຺ວານ, ກຣສ຺ສຸ ຣຸຈິເຣ ປິຍໍ’’.

໓໔. ‘‘ເອເຕ ນາຄາ ອຸປຕ຺ຖທ຺ຘາ, ສພ຺ເພ ຕິຏ຺ຐນ຺ຕິ ວມ຺ມິຕາ [ວມ຺ມິກາ (ສ຺ຍາ.)];

ປຸຣາ ມທ຺ທນ຺ຕິ ປາກາຣໍ, ອາເນນ຺ເຕຕໍ ປຠາວຕິໍ’’.

໓໕. ‘‘ສຕ຺ຕ ພິເລ [ຂຓ຺ເຑ (ສີ. ປີ.)] ກຣິຕ຺ວານ, ອຫເມຕໍ ປຠາວຕິໍ;

ຂຕ຺ຕິຍານໍ ປທສ຺ສາມິ, ເຍ ມໍ ຫນ຺ຕຸໍ ອິຘາຄຕາ’’.

໓໖. ‘‘ອວຸຏ຺ຐຫິ ຣາຊປຸຕ຺ຕີ, ສາມາ ໂກເສຍ຺ຍວາສິນີ;

ອສ຺ສຸປຸຓ຺ເຓຫິ ເນຕ຺ເຕຫິ, ທາສີຄຓປຸຣກ຺ຂຕາ’’.

໓໗. ‘‘ຕໍ ນູນ ກກ຺ກູປນິເສວິຕໍ ມຸຂໍ, ອາທາສທນ຺ຕາຖຣຸປຈ຺ຈເວກ຺ຂິຕໍ;

ສຸຠໍ ສຸເນຕ຺ຕໍ ວິຣຊໍ ອນງ຺ຄຓໍ, ຉຸທ຺ຘໍ ວເນ ຐສ຺ສຕິ ຂຕ຺ຕິເຍຫິ.

໓໘. ‘‘ເຕ ນູນ ເມ ອສິເຕ ເວລ຺ລິຕຄ຺ເຄ, ເກເສ ມຸທູ ຈນ຺ທນສາຣລິຕ຺ເຕ;

ສມາກຸເລ ສີວຖິກາຍ ມຊ຺ເຌ, ປາເທຫິ ຄິຊ຺ຌາ ປຣິກຑ຺ຒິສ຺ສນ຺ຕິ [ປຣິກຑ຺ຒຍນ຺ຕິ (ສີ. ສ຺ຍາ. ປີ.)].

໓໙. ‘‘ຕາ ນູນ ເມ ຕມ຺ພນຂາ ສຸໂລມາ, ພາຫາ ມຸທູ ຈນ຺ທນສາຣລິຕ຺ຕາ;

ຉິນ຺ນາ ວເນ ອຸຊ຺ຌິຕາ ຂຕ຺ຕິເຍຫິ, ຄຍ຺ຫ ຘງ຺ໂກ [ວໂກ (ປີ.)] ຄຈ຺ຉຕິ ເຍນ ກາມໍ.

໔໐. ‘‘ເຕ ນູນ ຕາລູປນິເຠ ອລມ຺ເພ, ນິເສວິເຕ ກາສິກຈນ຺ທເນນ;

ຖເນສຸ ເມ ລມ຺ພິສ຺ສຕິ [ລມ຺ພຫີຕິ (ປີ.)] ສິງ຺ຄາໂລ [ສິຄາໂລ (ສີ. ສ຺ຍາ. ປີ.)], ມາຕູວ ປຸຕ຺ໂຕ ຕຣຸໂຓ ຕນູໂຊ.

໔໑. ‘‘ຕໍ ນູນ ໂສຓິໍ ປຸຖຸລໍ ສຸໂກຏ຺ຏິຕໍ, ນິເສວິຕໍ ກຎ຺ຈນເມຂລາຫິ;

ຉິນ຺ນໍ ວເນ ຂຕ຺ຕິເຍຫີ ອວຕ຺ຖໍ, ສິງ຺ຄາລສງ຺ຆາ ປຣິກຑ຺ຒິສ຺ສນ຺ຕິ [ຄຍ຺ຫາ ວໂກ ຄຈ຺ຉຕິ ເຍນກາມໍ (ປີ.)].

໔໒. ‘‘ໂສຓາ ຘງ຺ກາ [ວກາ (ປີ.)] ສິງ຺ຄາລາ ຈ, ເຍ ຈຎ຺ເຎ ສນ຺ຕິ ທາຐິໂນ;

ອຊຣາ ນູນ ເຫສ຺ສນ຺ຕິ, ຠກ຺ຂຍິຕ຺ວາ ປຠາວຕິໍ.

໔໓. ‘‘ສເຈ ມໍສານິ ຫຣິໍສຸ, ຂຕ຺ຕິຍາ ທູຣຄາມິໂນ;

ອຏ຺ຐີນິ ອມ຺ມ ຍາຈິຕ຺ວາ, ອນຸປເຖ ທຫາຖ ນໍ.

໔໔. ‘‘ເຂຕ຺ຕານິ ອມ຺ມ ກາເຣຕ຺ວາ, ກຓິກາເຣຕ຺ຖ ໂຣປຍ [ໂຣປເຍ (ກ.)];

ຍທາ ເຕ ປຸປ຺ຜິຕາ ອສ຺ສຸ, ເຫມນ຺ຕານໍ ຫິມຈ຺ຈເຍ;

ສເຣຍ຺ຍາຖ ມມໍ [ມມ (ປີ.)] ອມ຺ມ, ເອວໍວຓ຺ຓາ ປຠາວຕີ’’.

໔໕. ‘‘ຕສ຺ສາ ມາຕາ ອຸທຏ຺ຐາສິ, ຂຕ຺ຕິຍາ ເທວວຓ຺ຓິນີ;

ທິສ຺ວາ ອສິຎ຺ຈ ສູນຎ຺ຈ, ຣຎ຺ໂຎ ມທ຺ທສ຺ສນ຺ເຕປຸເຣ’’.

໔໖. ‘‘ອິມິນາ ນູນ ອສິນາ, ສຸສຎ຺ຎໍ ຕນຸມຊ຺ຌິມໍ;

ຘີຕຣໍ ມທ຺ທ [ມມ (ສີ.), ມທ຺ໂທ (ປີ.)] ຫນ຺ຕ຺ວານ, ຂຕ຺ຕິຍານໍ ປທສ຺ສສິ’’ [ປທສ຺ສຕິ (ປີ. ກ.)].

໔໗. ‘‘ນ ເມ ອກາສິ ວຈນໍ, ອຕ຺ຖກາມາຍ ປຸຕ຺ຕິເກ;

ສາຊ຺ຊ ໂລຫິຕສຎ຺ຉນ຺ນາ, ຄຈ຺ຉສິ [ຄຎ຺ຉິສິ (ສີ. ປີ.)] ຍມສາຘນໍ.

໔໘. ‘‘ເອວມາປຊ຺ຊຕີ ໂປໂສ, ປາປິຍຎ຺ຈ ນິຄຈ຺ຉຕິ;

ໂຍ ເວ ຫິຕານໍ ວຈນໍ, ນ ກໂຣຕິ [ນ ກຣໍ (ສີ.)] ອຕ຺ຖທສ຺ສິນໍ.

໔໙. ‘‘ສເຈ ຈ ອຊ຺ຊ [ຕ຺ວໍ ອມ຺ມ (ສີ.)] ຘາເຣສິ [ວາເຣສິ (ປີ.)], ກຸມາຣໍ ຈາຣຸທສ຺ສນໍ;

ກຸເສນ ຊາຕໍ ຂຕ຺ຕິຍໍ, ສຸວຓ຺ຓມຓິເມຂລໍ;

ປູຊິຕໍ [ປູຊິຕາ (ປີ.)] ຎາຕິສງ຺ເຆຫິ, ນ ຄຈ຺ຉສິ [ຄຎ຺ຉິສິ (ສີ. ປີ.)] ຍມກ຺ຂຍໍ.

໕໐. ‘‘ຍຕ຺ຖສ຺ສຸ ເຠຣີ ນທຕິ, ກຸຎ຺ຊໂຣ ຈ ນິກູຊຕິ [ນິກຸຎ຺ຊຕິ (ປີ.)];

ຂຕ຺ຕິຍານໍ ກຸເລ ຠທ຺ເທ, ກິໍ ນຸ ສຸຂຕຣໍ ຕໂຕ.

໕໑. ‘‘ອສ຺ໂສ ຈ ສິສຕິ [ອສ຺ໂສ ຫສິສຕິ (ສີ.), ອສ຺ໂສ ຫສິຍຕິ (ສ຺ຍາ.), ອສ຺ໂສ ຈ ສິໍສຕິ (ປີ.)] ທ຺ວາເຣ, ກຸມາໂຣ ອຸປໂຣທຕິ;

ຂຕ຺ຕິຍານໍ ກຸເລ ຠທ຺ເທ, ກິໍ ນຸ ສຸຂຕຣໍ ຕໂຕ.

໕໒. ‘‘ມຍູຣໂກຎ຺ຈາຠິຣຸເທ, ໂກກິລາຠິນິກູຊິເຕ;

ຂຕ຺ຕິຍານໍ ກຸເລ ຠທ຺ເທ, ກິໍ ນຸ ສຸຂຕຣໍ ຕໂຕ’’.

໕໓. ‘‘ກຫໍ ນຸ ໂສ ສຕ຺ຕຸມທ຺ທໂນ, ປຣຣຏ຺ຐປ຺ປມທ຺ທໂນ;

ກຸໂສ ໂສຬາຣປຎ຺ຎາໂຓ, ໂຍ ໂນ ທຸກ຺ຂາ ປໂມຈເຍ’’.

໕໔. ‘‘ອິເຘວ ໂສ ສຕ຺ຕຸມທ຺ທໂນ, ປຣຣຏ຺ຐປ຺ປມທ຺ທໂນ;

ກຸໂສ ໂສຬາຣປຎ຺ຎາໂຓ, ໂຍ ເຕ ສພ຺ເພ ວຘິສ຺ສຕິ’’ [ໂຍ ໂນ ທຸກ຺ຂາ ປໂມຈເຍ (ສີ.), ໂສ ໂນ ສພ຺ເພ ວຘິສ຺ສຕິ (ປີ.)].

໕໕. ‘‘ອຸມ຺ມຕ຺ຕິກາ ນຸ ຠຓສິ, ອນ຺ຘພາລາ ປຠາສສິ [ອາທຸ ພາລາວ ຠາສສິ (ສີ. ປີ.)];

ກຸໂສ ເຈ ອາຄໂຕ ອສ຺ສ, ກິໍ ນ [ກິນ຺ນຸ (ສ຺ຍາ. ກ.)] ຊາເນມຸ ຕໍ ມຍໍ’’.

໕໖. ‘‘ເອໂສ ອາຬາຣິໂກ ໂປໂສ, ກຸມາຣີປຸຣມນ຺ຕເຣ;

ທຬ຺ຫໍ ກຕ຺ວານ ສໍເວລ຺ລິໍ, ກຸມ຺ຠິໍ ໂຘວຕິ ໂອຓໂຕ’’.

໕໗. ‘‘ເວຓີ ຕ຺ວມສິ ຈຓ຺ຑາລີ, ອທູສິ ກຸລຄນ຺ຘິນີ;

ກຖໍ ມທ຺ທກຸເລ ຊາຕາ, ທາສໍ ກຍິຣາສິ ກາມຸກໍ’’.

໕໘. ‘‘ນມ຺ຫິ ເວຓີ ນ ຈຓ຺ຑາລີ, ນ ຈມ຺ຫິ ກຸລຄນ຺ຘິນີ;

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ’’.

໕໙. ‘‘ໂຍ ພ຺ຣາຫ຺ມຓສຫສ຺ສານິ, ສທາ ໂຠເຊຕິ ວີສຕິໍ;

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ’’.

໖໐. ‘‘ຍສ຺ສ ນາຄສຫສ຺ສານິ, ສທາ ໂຍເຊນ຺ຕິ ວີສຕິໍ;

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ.

໖໑. ‘‘ຍສ຺ສ ອສ຺ສສຫສ຺ສານິ, ສທາ ໂຍເຊນ຺ຕິ ວີສຕິໍ;

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ.

໖໒. ‘‘ຍສ຺ສ ຣຖສຫສ຺ສານິ, ສທາ ໂຍເຊນ຺ຕິ ວີສຕິໍ;

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ.

[( ) ອຍໍ ຄາຖາ ສີ. ປີ. ໂປຕ຺ຖເກສຸເຍວ ທິສ຺ສຕິ] (‘‘ຍສ຺ສ ອຸສຠສຫສ຺ສານິ, ສທາ ໂຍເຊນ຺ຕິ ວີສຕິໍ;

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ) [( ) ອຍໍ ຄາຖາ ສີ. ປີ. ໂປຕ຺ຖເກສຸເຍວ ທິສ຺ສຕິ].

໖໓. ‘‘ຍສ຺ສ ເຘນຸສຫສ຺ສານິ, ສທາ ທຸຫນ຺ຕິ ວີສຕິໍ [ທຸຍ຺ຫນ຺ຕິ ວີສຕິ (ສີ. ປີ.)];

ໂອກ຺ກາກປຸຕ຺ໂຕ ຠທ຺ທນ຺ເຕ, ຕ຺ວໍ ນຸ ທາໂສຕິ ມຎ຺ຎສິ’’.

໖໔. ‘‘ຕຄ຺ຆ ເຕ ທຸກ຺ກຏໍ ພາເລ, ຍໍ ຂຕ຺ຕິຍໍ ມຫພ຺ພລໍ;

ນາຄໍ ມຓ຺ຑູກວຓ຺ເຓນ, ນ ນໍ [ນ ຕໍ (ສີ. ປີ.)] ອກ຺ຂາສິຘາຄຕໍ’’ [ອກ຺ຂາສິ ອາຄຕໍ (ສີ.)].

໖໕. ‘‘ອປຣາຘໍ ມຫາຣາຊ, ຕ຺ວໍ ໂນ ຂມ ຣເຖສຠ;

ຍໍ ຕໍ ອຎ຺ຎາຕເວເສນ, ນາຎ຺ຎາສິມ຺ຫາ ອິຘາຄຕໍ’’.

໖໖. ‘‘ມາທິສສ຺ສ ນ ຕໍ ຉນ຺ນໍ, ໂຍຫໍ ອາຬາຣິໂກ ຠເວ;

ຕ຺ວຎ຺ເຎວ ເມ ປສີທສ຺ສຸ, ນຕ຺ຖິ ເຕ ເທວ ທຸກ຺ກຏໍ’’.

໖໗. ‘‘ຄຈ຺ຉ ພາເລ ຂມາເປຫິ, ກຸສຣາຊໍ ມຫພ຺ພລໍ;

ຂມາປິໂຕ ກຸໂສ ຣາຊາ [ກຸສຣາຊາ (ສພ຺ພຕ຺ຖ)], ໂສ ເຕ ທສ຺ສຕິ ຊີວິຕໍ’’.

໖໘. ‘‘ປິຕຸສ຺ສ ວຈນໍ ສຸຕ຺ວາ, ເທວວຓ຺ຓີ ປຠາວຕີ;

ສິຣສາ ອຄ຺ຄຫີ ປາເທ, ກຸສຣາຊໍ ມຫພ຺ພລໍ’’.

໖໙. ‘‘ຍາມາ ຣຕ຺ໂຍ ອຕິກ຺ກນ຺ຕາ, ຕາມາ ເທວ ຕຍາ ວິນາ;

ວນ຺ເທ ເຕ ສິຣສາ ປາເທ, ມາ ເມ ກຸຊ຺ຌໍ ຣເຖສຠ.

໗໐. ‘‘ສພ຺ພໍ [ສຈ຺ຈໍ (ສີ. ສ຺ຍາ. ປີ.)] ເຕ ປຏິຊານາມິ, ມຫາຣາຊ ສຸໂຓຫິ ເມ;

ນ ຈາປິ ອປ຺ປິຍໍ ຕຸຍ຺ຫໍ, ກເຣຍ຺ຍາມິ ອຫໍ ປຸນ.

໗໑. ‘‘ເອວໍ ເຈ ຍາຈມານາຍ, ວຈນໍ ເມ ນ ກາຫສິ;

ອິທານິ ມໍ ຕາໂຕ ຫນ຺ຕ຺ວາ, ຂຕ຺ຕິຍານໍ ປທສ຺ສຕິ’’.

໗໒. ‘‘ເອວໍ ເຕ ຍາຈມານາຍ, ກິໍ ນ ກາຫາມິ ເຕ ວໂຈ;

ວິກຸທ຺ໂຘ ຕ຺ຍສ຺ມິ ກລ຺ຍາຓິ, ມາ ຕ຺ວໍ ຠາຍິ ປຠາວຕິ.